Sib is-Serħan fl-Affarijiet Spiritwali
Sib is-Serħan fl-Affarijiet Spiritwali
“Ħudu l-madmad tiegħi fuqkom . . . , u intom issibu serħan għal ruħkom.”—MT. 11:29.
1. X’arranġament għamel Alla ħdejn il-Muntanja Sinaj, u għala?
META l-patt tal-Liġi ġie inawgurat ħdejn il-Muntanja Sinaj, dan inkluda l-arranġament tas-Sabat taʼ kull ġimgħa. Permezz tal-kelliemi tiegħu Mosè, Ġeħova kkmanda lill-ġens taʼ Israel: “Sitt ijiem għandek tagħmel ix-xogħol tiegħek; imma fis-seba’ jum tistrieħ, sabiex il-barri u l-ħmar tiegħek jistrieħu u bin l-ilsira tiegħek u r-resident barrani jieħdu r-ruħ.” (Eżo. 23:12) Iva, minħabba l-konsiderazzjoni tiegħu għal dawk taħt il-Liġi, Ġeħova bi mħabba għamel arranġament biex ikun hemm jum taʼ mistrieħ sabiex in-nies tiegħu jkunu jistgħu “jieħdu r-ruħ.”
2. L-Israelin kif ibbenefikaw billi żammew is-Sabat?
2 Kien is-Sabat sempliċement jum taʼ mistrieħ? Le, dan kien parti essenzjali mill-qima tal-Israelin lil Ġeħova. Il-fatt li jżommu s-Sabat ippermetta lill-kapijiet tal-familja biex ikollhom ħin biex jgħallmu lill-familja tagħhom “iħarsu t-triq taʼ Ġeħova ħalli jagħmlu s-sewwa.” (Ġen. 18:19) Ukoll, ipprovda opportunità għall-familja u l-ħbieb biex jingħaqdu flimkien ħalli jirriflettu fuq l-għemejjel taʼ Ġeħova u jgawdu sħubija ferriħija. (Is. 58:13, 14) Iktar importanti, is-Sabat b’mod profetiku pponta ’l quddiem lejn żmien meta s-serħan veru kellu jiġi permezz tar-Renju Millennjali taʼ Kristu. (Rum. 8:21) Imma xi ngħidu għal żmienna? Il-Kristjani veri, li huma interessati fit-triqat taʼ Ġeħova, fejn u kif jistgħu jsibu serħan bħal dan?
Sib is-Serħan Permezz taʼ Sħubija Kristjana
3. Il-Kristjani tal-ewwel seklu b’liema mod appoġġaw lil xulxin, u b’liema riżultat?
3 L-appostlu Pawlu ddeskriva l-kongregazzjoni Kristjana bħala “pilastru u appoġġ tal-verità.” (1 Tim. 3:15) Il-Kristjani tal-bidu rċivew ħafna appoġġ billi inkuraġġew lil xulxin u bnew lil xulxin fl-imħabba. (Efes. 4:11, 12, 16) Waqt li kien Efesu, Pawlu rċieva żjara inkuraġġanti minn xi membri tal-kongregazzjoni f’Korintu. Innota l-effett li kellha: “Nithenna bil-preżenza taʼ Stefanas u Fortunatu u Akajku,” qal Pawlu, “għax kienu taʼ serħan għall-ispirtu tiegħi.” (1 Kor. 16:17, 18) B’mod simili, meta Titu mar Korintu biex jaqdi lill-aħwa hemmhekk, Pawlu kiteb lura lill-kongregazzjoni u qalilhom: “L-ispirtu tiegħu ġie mserraħ minnkom ilkoll.” (2 Kor. 7:13) Bl-istess mod illum, ix-Xhieda taʼ Ġeħova jsibu serħan ġenwin permezz taʼ sħubija Kristjana li tibni.
4. Il-laqgħat tal-kongregazzjoni kif iserrħuna?
4 Mill-esperjenza int taf li l-laqgħat tal-kongregazzjoni huma sors taʼ ferħ kbir. Hemmhekk insibu li “ninkuraġġixxu lil xulxin bil-fidi tagħna.” (Rum. 1:12) Ħutna l-Kristjani mhumiex nies li magħhom għandna relazzjoni superfiċjali. Huma ħbieb veri, nies li nħobbuhom u nirrispettawhom. Nirċievu ħafna ferħ u faraġ billi b’mod regulari niltaqgħu magħhom fil-laqgħat tagħna.—Flm. 7.
5. Kif nistgħu nkunu taʼ serħan għal xulxin fil-konvenzjonijiet u l-assembleat?
5 Sors ieħor taʼ serħan jiġi permezz tal-konvenzjonijiet u l-assembleat tagħna taʼ kull sena. Minbarra li jipprovdu l-ilmijiet tal-verità li jagħtu l-ħajja mill-Kelma t’Alla, il-Bibbja, dawn il-laqgħat akbar jipprovdulna opportunità biex ‘inwessgħu qalbna’ fis-sħubijiet tagħna. (2 Kor. 6:12, 13) Imma xi ngħidu jekk nistħu u nsibuha diffiċli biex niltaqgħu man-nies? Mod wieħed biex insiru nafu aħjar lil ħutna hu billi nagħtu minna nfusna f’xi konvenzjoni. Wara li għenet f’li tassisti f’konvenzjoni internazzjonali, oħt qalet: “Minbarra l-familja tiegħi u xi ftit ħbieb, ma kontx naf lil ħafna hemmhekk. Imma meta għent fit-tindif iltqajt maʼ ħafna aħwa! Verament ħadt pjaċir!”
6. X’inhu mod wieħed li nistgħu nsibu serħan waqt li nkunu fuq vaganza?
6 L-Israelin kienu jivvjaġġaw lejn Ġerusalemm għall-qima fi tliet festi kull sena. (Eżo. 34:23) Dan spiss kien ifisser li jħallu warajhom għelieqi u ħwienet u jivvjaġġaw jiem sħaħ bil-mixi f’toroq mimlijin trab. Xorta waħda, li jmorru t-tempju kien jirriżulta f’“hena kbir” hekk kif dawk preżenti kienu ‘joffru tifħir lil Ġeħova.’ (2 Kron. 30:21) Bl-istess mod, ħafna mill-qaddejja taʼ Ġeħova llum isibu hena kbir meta jivvjaġġaw mal-familja tagħhom biex iżuru Betel, il-faċilitajiet tal-fergħa tax-Xhieda taʼ Ġeħova li jkunu fil-viċin. Tistaʼ tinkludi żjara bħal din fil-vaganza li jmiss tal-familja tiegħek?
7. (a) Il-laqgħat soċjali kif jistgħu jkunu taʼ benefiċċju? (b) X’jistaʼ jikkontribwixxi għal laqgħa soċjali memorabbli u li tibni?
7 Jistaʼ jkun ukoll taʼ inkuraġġiment li niltaqgħu flimkien mal-familja u l-ħbieb għal laqgħat soċjali. L-għaref Sultan Salamun iddikjara: “Għall-bniedem m’hemm xejn aħjar milli jiekol u jixrob u jgawdi affarijiet tajbin minħabba x-xogħol iebes tiegħu.” (Ekk. 2:24) Il-laqgħat soċjali mhux biss iserrħuna imma wkoll isaħħu r-rabta tal-imħabba maʼ sħabna l-Kristjani hekk kif insiru nafuhom aħjar. Biex nikkontribwixxu għal okkażjoni memorabbli u li tibni, ikun aħjar jekk inżommu l-laqgħat soċjali żgħar u nagħmlu żgur li jkun hemm superviżjoni xierqa, speċjalment jekk jiġi servut l-alkoħol.
Il-Ministeru Jġib is-Serħan
8, 9. (a) Agħmel kuntrast bejn il-messaġġ taʼ Ġesù u dak tal-iskribi u l-Fariżej. (b) Kif nibbenefikaw meta naqsmu l-veritajiet tal-Bibbja?
8 Ġesù kien żeluż għall-ministeru, u inkuraġġixxa lid-dixxipli tiegħu biex ikunu l-istess. Dan hu evidenti mill-kliem tiegħu: “Il-ħsad hu kbir, imma l-ħaddiema huma ftit. Għalhekk, itolbu bil-ħrara lil Sid il-ħsad biex jibgħat il-ħaddiema fil-ħsad tiegħu.” (Mt. 9:37, 38) Il-messaġġ li għallem Ġesù kien verament taʼ serħan; kien “aħbar tajba.” (Mt. 4:23; 24:14) Dan kien differenti ħafna mir-regoli tqal li l-Fariżej imponew fuq in-nies.—Aqra Mattew 23:4, 23, 24.
9 Meta naqsmu l-messaġġ tas-Saltna maʼ oħrajn, noffrulhom serħan spiritwali u, fl-istess ħin, innaqqxu l-veritajiet prezzjużi tal-Bibbja f’moħħna u f’qalbna stess. Is-salmista b’mod xieraq qal: “Faħħru lil Jah, għax tajjeb li ngħannu lil Alla tagħna; għax dan hu pjaċevoli.” (Salm 147:1) Tistaʼ żżid il-ferħ li ssib meta tfaħħar lil Ġeħova mal-ġirien tiegħek?
10. Jiddependi s-suċċess tagħna fil-ministeru milli nirċievu respons pożittiv għall-messaġġ tagħna? Spjega.
10 Veru, f’xi territorji n-nies ikunu iktar lesti li jaċċettaw l-aħbar tajba milli jkunu f’oħrajn. (Aqra Atti 18:1, 5-8.) Jekk tgħix f’post fejn ma tantx iwieġbu għall-messaġġ tas-Saltna, ipprova ffoka fuq it-tajjeb li qed twettaq fil-ministeru. Ftakar li l-isforz kontinwu tiegħek biex tipproklama l-isem taʼ Ġeħova mhuwiex għalxejn. (1 Kor. 15:58) Iktar minn hekk, is-suċċess tagħna ma jiddependix minn kif in-nies iwieġbu għall-aħbar tajba. Nistgħu nibqgħu ċerti li Ġeħova se jara li dawk li għandhom attitudni xierqa se jingħataw opportunità biex iwieġbu għall-messaġġ tas-Saltna.—Ġw. 6:44.
Nistgħu Nsibu s-Serħan fil-Qima tal-Familja
11. Ġeħova liema responsabbiltà ta lill-ġenituri, u kif jistgħu jwettquha?
11 Ġenituri li jibżgħu minn Alla huma responsabbli biex jgħallmu lil uliedhom dwar Ġeħova u t-triqat tiegħu. (Dt. 11:18, 19) Jekk int ġenitur, twarrab ħin fl-iskeda tiegħek biex tgħallem lil uliedek dwar Missierna tas-sema kollu mħabba? Biex jgħinek twettaq din ir-responsabbiltà importanti u tieħu ħsieb il-bżonnijiet tal-familja tiegħek, Ġeħova pprovda abbundanza taʼ ikel spiritwali li jsaħħaħ permezz taʼ kotba, rivisti, vidjos, u rekordings bl-awdjo.
12, 13. (a) Il-familji kif jistgħu jibbenefikaw mil-lejla tal-Qima tal-Familja? (b) Il-ġenituri kif jistgħu jagħmlu ċert li l-qima tal-familja tagħhom hi sors taʼ serħan spiritwali?
12 Barra minn dan, il-klassi tal-ilsir leali u għaqli għamlet arranġamenti biex ikun hemm lejla tal-Qima tal-Familja. Din hi lejla mwarrba apposta kull ġimgħa għal studju tal-Bibbja tal-familja. Ħafna sabu li dan l-arranġament ressaqhom iktar lejn xulxin fl-imħabba u saħħaħ ir-relazzjoni tagħhom maʼ Ġeħova. Imma l-ġenituri kif jistgħu jagħmlu ċert li l-qima tal-familja tagħhom hi sors taʼ serħan spiritwali?
13 Il-lejla tal-Qima tal-Familja m’għandhiex tkun okkażjoni taʼ dwejjaq u serja żżejjed. Wara kollox, aħna nqimu lill-“Alla l-hieni,” u hu jridna nkunu ferħanin fil-qima tagħna. (1 Tim. 1:11; Flp. 4:4) Li jkollna lejla oħra biex niddiskutu veritajiet prezzjużi mill-Bibbja hu verament barka. Il-ġenituri jistgħu jkunu flessibbli fil-metodi taʼ tagħlim tagħhom billi jużaw l-immaġinazzjoni u l-kreattività. Pereżempju, familja waħda ħalliet lit-tifel tagħhom Brandon, li għandu għaxar snin, jippreżenta rapport intitolat “Ġeħova Għala Uża Serp Biex Jirrappreżenta lil Satana?” Din il-kwistjoni kienet nikktet lil Brandon għax hu jħobb is-sriep, u kien imdejjaq li kienu assoċjati maʼ Satana. Xi familji kultant jirreċtaw drammi Bibliċi, billi kull membru tal-familja jkollu rwol u jaqra l-parti tiegħu mill-Bibbja; jew jirreċta xi ġrajja. Dawn il-metodi taʼ tagħlim mhux biss huma pjaċevoli, imma wkoll jistgħu jinvolvu t-tfal, biex b’hekk il-prinċipji Bibliċi jkunu jistgħu jmissulhom qalbhom. a
Evita Dak li Jistaʼ Jtaqqlek
14, 15. (a) L-istress u n-nuqqas taʼ sigurtà kif żdiedu fl-aħħar jiem? (b) Liema stress ieħor nistgħu niffaċċjaw?
14 L-istress u n-nuqqas taʼ sigurtà żdiedu f’dawn l-aħħar jiem tas-sistema mill-agħar. Il-qagħad u tbatijiet ekonomiċi oħrajn jeffettwaw lil miljuni. Saħansitra dawk li għandhom xogħol spiss iħossu li l-flus li jaqilgħu jiħduh id-dar f’but imtaqqab, u dan ftit iġib benefiċċju lill-familja tagħhom. (Qabbel Ħaggaj 1:4-6.) Il-politikanti u mexxejja oħrajn jidhru li ma jistgħu jagħmlu xejn hekk kif jitqabdu biex ikampaw mat-terroriżmu u sorsi oħrajn taʼ ħażen. Ħafna nies iħossuhom skuraġġiti minħabba n-nuqqasijiet persunali tagħhom stess.—Salm 38:4.
15 Il-Kristjani veri jesperjenzaw il-problemi u l-pressjonijiet li tpoġġi fuqhom is-sistema taʼ Satana. (1 Ġw. 5:19) F’xi każi, id-dixxipli taʼ Kristu jistgħu jiffaċċjaw ċertu stress ieħor hekk kif jistinkaw biex jibqgħu leali lejn Ġeħova. “Jekk ippersegwitaw lili, jippersegwitaw lilkom ukoll,” qal Ġesù. (Ġw. 15:20) Madankollu, saħansitra meta niġu “persegwitati” ma nkunux “abbandunati.” (2 Kor. 4:9) Dan għala hu minnu?
16. X’jistaʼ jgħinna nżommu l-ferħ tagħna?
16 Ġesù qal: “Ejjew għandi, intom ilkoll li mħabbtin u mgħobbijin, u jien inserraħkom.” (Mt. 11:28) Billi jkollna fidi sħiħa fil-provvediment tal-fidwa taʼ Kristu, aħna npoġġu lilna nfusna f’idejn Ġeħova, biex ngħidu hekk. B’dan il-mod, niksbu “qawwa iktar min-normal.” (2 Kor. 4:7) “L-ajjutant,” l-ispirtu qaddis t’Alla, isaħħaħ il-fidi tagħna b’mod sinifikanti sabiex mhux biss inkunu nistgħu nissaportu l-provi u t-tribulazzjonijiet li niffaċċjaw imma wkoll nibqgħu ferħanin.—Ġw. 14:26; Ġak. 1:2-4.
17, 18. (a) Kontra liema spirtu għandna bżonn ngħassu? (b) X’jistaʼ jirriżulta jekk inpoġġu enfasi fuq il-pjaċiri tad-dinja?
17 Illum, il-Kristjani ġenwini għandhom bżonn jgħassu kontra li jiġu influwenzati żżejjed mill-inklinazzjoni tad-dinja li ġġiegħel lin-nies ifittxu l-pjaċiri akkost taʼ kollox. (Aqra Efesin 2:2-5.) Inkella nistgħu naqgħu fin-nassa tax-“xewqa tal-laħam u x-xewqa taʼ l-għajnejn u l-iffanfrar bil-mezzi tal-ħajja.” (1 Ġw. 2:16) Jew b’mod żbaljat nistgħu nemmnu li jekk inċedu għax-xewqat tal-laħam se nsibu s-serħan. (Rum. 8:6) Pereżempju, xi nies daru għad-droga u l-abbuż tal-alkoħol, il-pornografija, l-isport estrem, jew diversi attivitajiet illeċiti fi sforz biex iqanqlu s-sensi tagħhom. It-“tnassis” taʼ Satana hu intenzjonat li jqarraq, billi jagħti lil dak li jkun sens ħażin taʼ serħan.—Efes. 6:11.
18 Veru, m’hemm xejn ħażin meta nieklu, nixorbu, jew nieħdu sehem f’xi forom taʼ divertiment li jibnu jekk isiru bil-moderazzjoni. Madankollu, ma nħallux affarijiet bħal dawn ikollhom l-ewwel post f’ħajjitna. Il-bilanċ u r-rażan huma vitali, speċjalment meta nqisu ż-żminijiet li qed ngħixu fihom. Il-ġiri wara affarijiet persunali jistaʼ jtaqqalna sal-punt li nsiru “inattivi jew bla frott rigward l-għarfien eżatt dwar il-Mulej tagħna Ġesù Kristu.”—2 Pt. 1:8.
19, 20. Is-serħan veru kif jistaʼ jinstab?
19 Meta nġibu l-mod taʼ ħsib tagħna fi qbil mar-regolamenti taʼ Ġeħova, nirrikonoxxu li kwalunkwe pjaċir li toffri din id-dinja hu mumentanju. Mosè rrealizzah dan, u anki aħna. (Ebr. 11:25) Il-fatt hu li s-serħan veru, it-tip li jġib sens taʼ ferħ u sodisfazzjon profond u dejjiemi, jiġi milli nagħmlu r-rieda taʼ Missierna tas-sema.—Mt. 5:6.
20 Jalla nkomplu nsibu s-serħan fl-affarijiet spiritwali. Billi nagħmlu hekk, “inwarrbu dak kollu li hu kontra r-rieda t’Alla u x-xewqat tad-dinja . . . waqt li nistennew it-tama hienja u l-manifestazzjoni glorjuża tal-kbir Alla u taʼ Kristu Ġesù, is-Salvatur tagħna.” (Titu 2:12, 13) Mela ejja nkunu determinati li nibqgħu taħt il-madmad taʼ Ġesù billi nissottomettu ruħna għall-awtorità u d-direzzjoni tiegħu. Billi nagħmlu hekk, se nsibu l-hena u s-serħan veru!
[Nota taʼ taħt]
a Għal iktar informazzjoni dwar kif studju tal-familja jistaʼ jkun interessanti u informattiv ara l-Ministeru tas-Saltna bl-Ingliż taʼ Diċembru 1990, paġni 1-2.
Int Kif Twieġeb?
• In-nies taʼ Ġeħova kif isibu s-serħan veru llum?
• Il-ministeru b’liema mod iserraħ lilna u lil dawk li nitkellmu magħhom?
• Il-kapijiet tal-familja x’jistgħu jagħmlu biex ikunu ċerti li l-qima tal-familja tagħhom iġġib is-serħan?
• Liema affarijiet itaqqluna spiritwalment?
[Mistoqsijiet taʼ Studju]
[Stampi f’paġna 26]
Billi nieħdu l-madmad taʼ Ġesù fuqna, insibu ħafna sorsi taʼ serħan