“Oqogħdu Attenti X’Tip taʼ Persuni Għandkom Tkunu!”

“Ladarba dawn kollha għad idubu b’dan il-​mod, oqogħdu attenti x’tip taʼ persuni għandkom tkunu f’dawk li huma atti taʼ kondotta qaddisa u għemejjel taʼ devozzjoni lejn Alla!”—2 PT. 3:11.

1. It-​tieni ittra taʼ Pietru għala kienet twissija f’waqtha għall-​Kristjani fi żmienu?

 META l-​appostlu Pietru kiteb it-​tieni ittra mnebbħa tiegħu, il-​kongregazzjoni Kristjana kienet diġà ssaportiet ħafna persekuzzjoni, imma din ma naqqsitx iż-​żelu tagħha jew waqqfitha milli tikber. Għalhekk, ix-​Xitan uża tattika oħra, waħda li kienet irnexxiet ħafna drabi qabel. Kif irrivela Pietru, Satana pprova jikkorrompi lin-​nies t’Alla permezz taʼ għalliema foloz li kellhom “għajnejhom mimlijin adulterju” u “qalbhom imħarrġa fir-​regħba.” (2 Pt. 2:1-​3, 14; Ġuda 4) Għaldaqstant, it-​tieni ittra taʼ Pietru kienet twissija mill-​qalb biex jibqgħu leali lejn Alla.

2. It-​2 Pietru kapitlu 3 fuqiex jiffoka, u liema mistoqsijiet għandna nistaqsu lilna nfusna?

² Pietru kiteb: “Jien jidhirli li hu sewwa, sakemm inkun f’din it-​tinda, li nqajjimkom billi nfakkarkom, għax naf li dalwaqt titneħħa t-​tinda tiegħi . . . Għalhekk, nagħmel ukoll l-​almu tiegħi issa biex, wara li nitlaq, tkunu dejjem tistgħu tfakkru lilkom infuskom dawn l-​affarijiet.” (2 Pt. 1:13-​15) Iva, Pietru kien jaf li kien qorob biex imut, imma xtaq li t-​tfakkiriet tiegħu f’waqthom jibqgħu miftakrin. U, tabilħaqq, saru parti mill-​Bibbja u jistgħu jinqraw minna lkoll illum. Kapitlu 3 tat-​tieni ittra taʼ Pietru hu taʼ interess partikulari għalina, għax jiffoka fuq “l-​aħħar jiem” tas-​sistema preżenti u  fuq il-​qerda tas-​smewwiet u l-​art figurattiva. (2 Pt. 3:3, 7, 10) Pietru x’pariri għandu għalina? Il-​fatt li napplikaw il-​pariri tiegħu kif se jgħinna niksbu l-​approvazzjoni taʼ Ġeħova?

3, 4. (a) Pietru għamel liema esklamazzjoni, u liema twissija ta? (b) Liema tliet punti se nikkunsidraw?

³ Wara li semma t-​tmiem tad-​dinja taʼ Satana, Pietru qal: “Oqogħdu attenti x’tip taʼ persuni għandkom tkunu f’dawk li huma atti taʼ kondotta qaddisa u għemejjel taʼ devozzjoni lejn Alla!” (2 Pt. 3:11, 12) Pietru kien jaf li dawk biss li jagħmlu r-​rieda t’Alla u juru kwalitajiet li jogħġbu Lilu se jinżammu ħajjin matul “jum il-​vendetta” li ġej. (Is. 61:2) B’hekk, l-​appostlu żied jgħid: “Għalhekk, maħbubin, billi għandkom dan l-​għarfien bil-​quddiem, oqogħdu għassa li ma tmorrux tinġarru magħhom [mal-​għalliema foloz] bl-​iżball taʼ nies li jisfidaw il-​liġi, u titilfu s-​sodizza tagħkom.”—2 Pt. 3:17.

⁴ Peress li kien fost dawk li kellhom “għarfien bil-​quddiem,” Pietru kien jaf li fl-​aħħar jiem, il-​Kristjani kien se jkollhom ikunu għassa b’mod partikulari sabiex iżommu l-​integrità tagħhom. Iktar tard, l-​appostlu Ġwanni spjega b’mod ċar għala. Hu ra bil-​quddiem it-​tkeċċija taʼ Satana mis-​sema u r-​“rabja kbira” tiegħu kontra dawk “li josservaw il-​kmandamenti t’Alla u li għandhom ix-​xogħol li jixhdu dwar Ġesù.” (Riv. 12:9, 12, 17) Il-​qaddejja midlukin leali t’Alla flimkien maʼ sħabhom leali n-​“nagħaġ oħrajn” se joħorġu rebbiħin. (Ġw. 10:16) Imma xi ngħidu għalina individwalment? Se nżommu l-​integrità tagħna? Se niġu megħjunin biex nagħmlu dan jekk nistinkaw biex (1) nikkultivaw kwalitajiet li jogħġbu lil Alla, (2) nibqgħu bla tebgħa u bla difett moralment u spiritwalment, u (3) ikollna l-​ħarsa xierqa lejn il-​provi. Ejja nikkunsidraw dawn il-​punti.

Ikkultiva Kwalitajiet li Jogħġbu lil Alla

5, 6. Liema kwalitajiet għandna nistinkaw biex nikkultivaw, u dan għala jirrikjedi “sforz ħerqan”?

⁵ Fil-​bidu tat-​tieni ittra tiegħu, Pietru kiteb: “Aġixxu billi tagħmlu kull sforz ħerqan, u mal-​fidi tagħkom żidu l-​virtù, mal-​virtù l-​għarfien, maʼ l-​għarfien ir-​rażna, mar-​rażna s-​sabar, mas-​sabar id-​devozzjoni lejn Alla, mad-​devozzjoni lejn Alla l-​affezzjoni lejn l-​aħwa, maʼ l-​affezzjoni lejn l-​aħwa l-​imħabba. Għax jekk dawn l-​affarijiet jeżistu u joktru fikom, ma jħallukomx tkunu inattivi jew bla frott rigward l-​għarfien eżatt dwar il-​Mulej tagħna Ġesù Kristu.”—2 Pt. 1:5-​8.

⁶ Huwa minnu li jirrikjedi “sforz ħerqan” biex nieħdu sehem f’attivitajiet li jgħinuna nikkultivaw kwalitajiet li jogħġbu lil Alla. Pereżempju, jirrikjedi sforz biex nattendu l-​laqgħat Kristjani kollha, biex naqraw il-​Bibbja kuljum, u biex inżommu programm tajjeb taʼ studju persunali. U jistaʼ jirrikjedi xogħol iebes flimkien maʼ ppjanar tajjeb biex ikollna lejla tal-​Qima tal-​Familja regulari, pjaċevoli, u siewja. Imma ladarba nidħlu f’rutina tajba, drawwiet siewja jsiru eħfef—speċjalment meta nduqu l-​benefiċċji.

7, 8. (a) Xi wħud x’qalu dwar il-​lejla tal-​Qima tal-​Familja? (b) Kif qed tibbenefika int mill-​qima tal-​familja tiegħek?

⁷ Rigward il-​Qima tal-​Familja, waħda oħt tikteb: “Tgħinna nitgħallmu dwar ħafna suġġetti differenti.” Oħra tgħid: “Biex inkun onesta, ma xtaqtux jispiċċa l-​istudju tal-​ktieb, għax kien il-​laqgħa favorita tiegħi. Imma issa, peress li għandna l-​lejla tal-​Qima tal-​Familja tagħna, nirrealizza li Ġeħova jaf x’għandna bżonn u meta għandna bżonnu.” Kap taʼ familja jgħid: “Il-​qima tal-​familja tgħinna ħafna. Li jkollna laqgħa adattata għall-​bżonnijiet speċifiċi tagħna bħala koppja huwa utli ferm! It-​tnejn li aħna nħossu li qed nitjiebu f’li nuru l-​frott tal-​ispirtu qaddis, u qed insibu iktar ferħ minn qatt qabel  fil-​ministeru tagħna.” Kap ieħor taʼ familja jgħid: “It-​tfal qed jagħmlu r-​riċerka tagħhom stess u qed jitgħallmu ħafna—u qed jieħdu gost. L-​arranġament jagħmilna iktar fiduċjużi li Ġeħova jaf it-​tħassib tagħna u jwieġeb it-​talb tagħna.” Jirriflettu dawn is-​sentimenti l-​ħarsa tiegħek lejn dan il-​provvediment spiritwali meraviljuż?

⁸ Tħallix affarijiet żgħar itellfu l-​qima tal-​familja. Koppja miżżewġa qalu, “Kull Ħamis filgħaxija għall-​aħħar erbaʼ ġimgħat, ġrat xi ħaġa fil-​familja tagħna li kważi waqqfitna milli nagħmlu l-​istudju tagħna, imma ma ħallejnihiex ittellifna.” M’għandniex xi ngħidu, kultant forsi jkollok bżonn taġġusta l-​iskeda tiegħek. Xorta waħda, kun determinat li ma tikkanċellax il-​lejla tal-​Qima tal-​Familja tiegħek—lanqas biss għal ġimgħa waħda!

9. Ġeħova kif sostnieh lil Ġeremija, u x’nistgħu nitgħallmu mill-​eżempju tiegħu?

⁹ Il-​profeta Ġeremija huwa eżempju tajjeb għalina. Hu kellu bżonn is-​sosteniment spiritwali li rċieva mingħand Ġeħova u apprezzah b’mod profond. Dan is-​sosteniment għenu jipprietka bis-​sabar lil nies indifferenti. “Il-​kelma taʼ Ġeħova . . . saret bħal nar jaqbad magħluq f’għadmi,” qal hu. (Ġer. 20:8, 9) Għenu wkoll jissaporti ż-​żminijiet diffiċli li laħqu l-​quċċata tagħhom bil-​qerda taʼ Ġerusalemm. Illum, aħna għandna l-​Kelma t’Alla sħiħa bil-​miktub. Meta nistudjawha b’mod diliġenti u nagħmlu l-​ħsibijiet t’Alla l-​ħsibijiet tagħna, aħna, bħal Ġeremija, se nkunu nistgħu nissaportu bil-​ferħ fil-​ministeru, nibqgħu leali waqt il-​provi, u nibqgħu nodfa moralment u spiritwalment.—Ġak. 5:10.

Ibqaʼ “bla Tebgħa u bla Difett”

10, 11. Għala għandna nagħmlu l-​almu tagħna biex nibqgħu “bla tebgħa u bla difett,” u dan x’jirrikjedi minna?

¹⁰ Bħala Kristjani, aħna nafu li qed ngħixu fiż-​żmien tat-​tmiem. Għalhekk, m’aħniex sorpriżi li d-​dinja saret ossessjonata bl-​affarijiet li jobgħod Ġeħova, bħar-​regħba, l-​immoralità sesswali, u l-​vjolenza. L-​istrateġija taʼ Satana tistaʼ tinġabar f’dan il-​kliem: ‘Jekk il-​qaddejja t’Alla ma jistgħux jiġu mbeżżgħin, forsi jistgħu jiġu korrotti.’ (Riv. 2:13, 14) B’hekk, irridu nniżżlu f’qalbna t-​twissija kollha mħabba taʼ Pietru: “Agħmlu l-​almu tagħkom biex fl-​aħħar [Alla] jsibkom bla tebgħa u bla difett u fil-​paċi.”—2 Pt. 3:14.

¹¹ L-​espressjoni “agħmlu l-​almu tagħkom” hija simili għat-​twissija li Pietru qal qabel biex nagħmlu “kull sforz ħerqan.” B’mod ċar, Ġeħova—dak li nebbaħ lil Pietru biex jesprimi dawn is-​sentimenti—jaf li għandna bżonn neżerċitaw ruħna biex nibqgħu “bla tebgħa u bla difett,” mhux imniġġsin bil-​ħmieġ tad-​dinja taʼ Satana. Li neżerċitaw lilna nfusna jinkludi li nipproteġu qalbna milli tinħakem minn xewqat ħżiena. (Aqra Proverbji 4:23; Ġakbu 1:14, 15.) Jinkludi wkoll li nieħdu waqfa soda kontra dawk li huma mħawdin dwar il-​ħajja Kristjana tagħna u li ‘jibdew jgħajruna.’—1 Pt. 4:4.

12. Liema assiguranza nsibu f’Luqa 11:13?

¹² Minħabba l-​imperfezzjoni tagħna, irridu nissieltu biex nagħmlu s-​sewwa. (Rum. 7:21-​25) Nistgħu nittamaw li nirnexxu biss jekk  induru lejn Ġeħova, li b’mod ġeneruż jagħti l-​ispirtu qaddis lil dawk li jitolbuh bis-​sinċerità. (Lq. 11:13) Dan l-​ispirtu, min-​naħa tiegħu, jiżviluppa fina kwalitajiet li jistħoqqilhom l-​approvazzjoni t’Alla u li jgħinuna nkampaw mhux biss mat-​tentazzjonijiet tal-​ħajja imma wkoll mal-​provi li ġġib magħha, li jistaʼ jagħti l-​każ li jiżdiedu hekk kif joqrob il-​jum taʼ Ġeħova.

Ħalli l-​Provi Jsaħħuk

13. Meta nesperjenzaw il-​provi f’ħajjitna, x’se jgħinna nistabru?

¹³ Waqt li qegħdin f’din is-​sistema qadima, dejjem se nesperjenzaw diversi provi. Imma minflok ma taqtaʼ qalbek, għala ma tqisx il-​provi bħala opportunità biex tikkonferma mħabbtek għal Alla u biex issaħħaħ il-​fidi tiegħek fih u fil-​Kelma tiegħu? Id-​dixxiplu Ġakbu kiteb: “Qisuh bħala ferħ mill-​akbar, ħuti, meta tiltaqgħu maʼ diversi provi, għax bħalma tafu, meta l-​fidi tagħkom tgħaddi mill-​provi tipproduċi s-​sabar.” (Ġak. 1:2-​4) Ftakar ukoll li “Ġeħova jaf kif jeħles mill-​provi lil dawk li huma devoti lejh.”—2 Pt. 2:9.

14. L-​eżempju taʼ Ġużeppi lilek kif jinkuraġġik?

¹⁴ Ikkunsidra l-​eżempju taʼ Ġużeppi, bin Ġakobb, li ġie mibjugħ fil-​jasar minn ħutu stess. (Ġen. 37:23-​28; 42:21) Tilef il-​fidi tiegħu Ġużeppi minħabba dan l-​att taʼ krudeltà? Imtela bl-​imrar għal Alla talli ħallieh iġarrab dan il-​ħażen? Il-​Kelma t’Alla b’mod ċar twieġeb le! Iktar minn hekk, il-​provi taʼ Ġużeppi ma spiċċawx hemm. Iktar tard, ġie akkużat b’mod falz b’attentat taʼ stupru u ġie mitfugħ il-​ħabs. Però, għal darb’oħra baqaʼ sod fid-​devozzjoni tiegħu lejn Alla. (Ġen. 39:9-​21) Ukoll, ħalla l-​provi jsaħħuh, u għal dan ġie premjat bil-​kbir.

15. X’nistgħu nitgħallmu mill-​eżempju taʼ Nagħomi?

¹⁵ Huwa minnu li nistgħu nħossuna mdejqin jew dipressi minħabba l-​provi. Forsi Ġużeppi hekk ħassu kultant. Qaddejja leali oħrajn t’Alla ċertament li hekk ħassewhom. Ikkunsidra lil Nagħomi, li tilfet kemm lil żewġha kif ukoll liż-​żewġ uliedha subien. “Issejħulix Nagħomi,” qalet hi. “Sejħuli Mâra [ifisser “Morra”], għax Dak li Jistaʼ Kollox sqieni ħafna mrar.” (Rut 1:20, 21, ntt.) Ir-​reazzjoni taʼ Nagħomi kienet naturali u taʼ min jifhimha. Però, bħal Ġużeppi, hi la tfixklet spiritwalment u lanqas ċediet fl-​integrità tagħha. Ġeħova, min-​naħa tiegħu, ippremja lil din il-​mara għażiża. (Rut 4:13-​17, 22) Iżjed minn hekk, fil-​Ġenna tal-​art li ġejja, se jneħħi l-​ħsara kollha li kkaġunaw Satana u d-​dinja mill-​agħar tiegħu. “L-​affarijiet  taʼ qabel ma jitfakkrux, u lanqas ma jweġġgħu l-​qalb.”—Is. 65:17.

16. X’għandha tkun l-​attitudni tagħna lejn it-​talb, u għala?

¹⁶ Minkejja l-​provi li nistgħu nesperjenzaw, l-​imħabba t’Alla qiegħda hemm biex issostnina. (Aqra Rumani 8:35-​39.) Għalkemm Satana mhux se jieqaf jipprova jiskuraġġina, mhux se jirnexxilu jekk nibqgħu ‘moħħna f’loku’ u ‘noqogħdu attenti u ma nittraskurawx it-​talb.’ (1 Pt. 4:7) Ġesù qal: “Għalhekk, ibqgħu mqajmin u itolbu bil-​ħerqa l-​ħin kollu biex jirnexxilkom taħarbu minn dak kollu li għandu jseħħ u tieqfu quddiem Bin il-​bniedem.” (Lq. 21:36) Innota li Ġesù ma qalx sempliċement itolbu, imma “itolbu bil-​ħerqa.” Billi wissiena biex nitolbu bil-​ħerqa, Ġesù enfasizza li dan hu ż-​żmien li nieħdu bis-​serjetà l-​waqfa tagħna quddiemu u quddiem Missieru. Dawk biss li għandhom waqfa approvata se jkollhom il-​prospett li jgħaddu ħajjin minn jum Ġeħova.

Ibqaʼ Attiv fis-​Servizz taʼ Ġeħova

17. Jekk it-​territorju li tipprietka fih hu taʼ sfida, kif tistaʼ tibbenefika mill-​eżempju tajjeb tal-​profeti tal-​qedem?

¹⁷ Inħossu s-​serħan meta nieħdu sehem f’attivitajiet spiritwali. Dan ifakkarna fil-​kliem taʼ Pietru: “Oqogħdu attenti x’tip taʼ persuni għandkom tkunu f’dawk li huma atti taʼ kondotta qaddisa u għemejjel taʼ devozzjoni lejn Alla!” (2 Pt. 3:11) L-​iktar importanti fost dawn l-​għemejjel hu x-​xandir tal-​aħbar tajba. (Mt. 24:14) Veru, f’xi territorji x-​xogħol tal-​ippritkar jistaʼ jkun taʼ sfida, forsi minħabba l-​apatija jew l-​oppożizzjoni jew sempliċement għax in-​nies huma preokkupati bl-​affarijiet tal-​ħajja taʼ kuljum. Il-​qaddejja taʼ Ġeħova tal-​qedem kellhom jissieltu m’attitudnijiet simili. Però, qatt ma qatgħu qalbhom, imma baqgħu jmorru lura “darba wara l-​oħra” bil-​messaġġ tagħhom li tahom Alla. (Aqra t-​2 Kronaki 36:15, 16; Ġer. 7:24-​26) X’għenhom jissaportu? Qiesu l-​inkarigu tagħhom mill-​ħarsa taʼ Ġeħova, mhux mill-​ħarsa tad-​dinja. Ukoll, ikkunsidrawh l-​akbar unur li jġorru l-​isem t’Alla.—Ġer. 15:16.

18. Ix-​xogħol tal-​ippritkar tas-​Saltna se jkollu liema effett fuq it-​tkabbir taʼ isem Alla fil-​futur?

¹⁸ Aħna wkoll għandna l-​privileġġ li nħabbru l-​isem u l-​iskop taʼ Ġeħova. Aħseb dwar dan: Bħala riżultat dirett tax-​xogħol tal-​ippritkar tagħna, l-​għedewwa t’Alla mhux se jkunu jistgħu jgħidu li ma jafux meta jiġu wiċċ imb wiċċ miegħu matul il-​jum il-​kbir tiegħu. Tabilħaqq, bħall-​Fargħun tal-​qedem, se jkunu jafu li hu Ġeħova li qed jaġixxi kontrihom. (Eżo. 8:1, 20; 14:25) Fl-​istess ħin, Ġeħova se jonora lill-​qaddejja leali tiegħu billi jagħmilha ċara daqs il-​kristall li kienu, tabilħaqq, ir-​rappreżentanti tiegħu.—Aqra Eżekjel 2:5; 33:33.

19. Kif nistgħu nuru li nixtiequ nagħmlu użu tajjeb mill-​paċenzja taʼ Ġeħova?

¹⁹ Lejn it-​tmiem tat-​tieni ittra tiegħu, Pietru kiteb lil sħabu fit-​twemmin: “Il-​paċenzja tal-​Mulej tagħna qisuha bħala salvazzjoni.” (2 Pt. 3:15) Iva, ejja nkomplu nagħmlu użu tajjeb mill-​paċenzja taʼ Ġeħova. Kif? Billi niżviluppaw kwalitajiet li jogħġbuh, billi nibqgħu “bla tebgħa u bla difett,” billi jkollna l-​attitudni xierqa lejn il-​provi, u billi nibqgħu beżlin fis-​servizz tas-​Saltna. Jekk nagħmlu hekk, inkunu nistgħu nirċievu barkiet bla tmiem assoċjati mas-​‘smewwiet ġodda u l-​art ġdida.’—2 Pt. 3:13.

Tiftakar Int?

• Kif nistgħu nikkultivaw kwalitajiet li jogħġbu lil Alla?

• Kif nistgħu nibqgħu “bla tebgħa u bla difett”?

• X’nistgħu nitgħallmu minn Ġużeppi u Nagħomi?

• Għala hu privileġġ kbir li nieħdu sehem fix-​xogħol tal-​ippritkar?

[Mistoqsijiet taʼ Studju]

[Stampa f’paġna 9]

X’se jgħin lilkom l-​irġiel miżżewġin biex tikkultivaw kwalitajiet li jogħġbu lil Alla fikom u fil-​familja tagħkom?

[Stampi f’paġna 10]

X’nistgħu nitgħallmu minn kif Ġużeppi ttratta mal-​provi?