Mistoqsijiet mill-Qarrejja
Mistoqsijiet mill-Qarrejja
Ġesù għala setaʼ jgħid lil mara li kienet magħrufa bħala midinba li dnubietha kienu maħfurin?—Lq. 7:37, 48.
Hekk kif Ġesù kien mal-mejda għall-ikel fid-dar taʼ Fariżew li kien jismu Xmun, mara ‘qagħdet wara Ġesù ħdejn saqajh.’ Xarrbitlu saqajh bid-dmugħ tagħha u xxottathomlu b’xagħarha. Imbagħad b’tenerezza bisitlu saqajh u dilkithomlu b’żejt ifuħ. Il-mara “fil-belt kienet magħrufa bħala midinba,” jgħid ir-rakkont tal-Evanġelju. Huwa minnu li kull bniedem imperfett huwa midneb, imma l-Iskrittura s-soltu tuża dan it-terminu biex tiddeskrivi individwu li d-dnubiet tiegħu huma magħrufin sew jew li għandu reputazzjoni li jidneb. X’aktarx li l-mara kienet prostituta. Kien lil persuna bħal din li Ġesù qal: “Dnubietek maħfurin.” (Lq. 7:36-38, 48) X’ried ifisser Ġesù b’dan? Ladarba s-sagrifiċċju tal-fidwa kien għadu ma ġiex offrut, kif kienet possibbli din il-maħfra?
Wara li l-mara ħaslet u dilket saqajn Ġesù imma qabel ma ħafrilha, Ġesù uża tixbiha biex jispjega punt importanti lil Xmun, dak li stiednu. Billi xebbah id-dnub maʼ dejn li hu kbir wisq biex jitħallas lura, Ġesù qal lil Xmun: “Żewġt irġiel kellhom id-dejn maʼ wieħed li jislef il-flus; wieħed kellu jagħtih ħames mitt dinar u l-ieħor ħamsin. Meta ma kellhomx biex iħallsuh, qabad u ħafrilhom kollox. Għalhekk, min minnhom se jħobbu l-iktar?” Bi tweġiba Xmun qal: “Nimmaġina li dak li nħafirlu l-iktar.” Ġesù wieġbu: “Iġġudikajt sew.” (Lq. 7:41-43) Ilkoll kemm aħna obbligati li nobdu lil Alla, allura meta ma nobduhx u nidinbu, nonqsu milli nħallsu lil Alla dak li hu dovut lilu. B’hekk nakkumulaw id-dejn. Però, Ġeħova huwa bħal wieħed li jislef u li hu lest li jaħfer id-djun. Għal dan il-fatt, Ġesù inkuraġġixxa lis-segwaċi tiegħu biex jitolbu lil Alla u jistaqsu: “Aħfrilna d-djun tagħna, bħalma aħna wkoll ħfirna lil min kellu d-dejn magħna.” (Mt. 6:12) Luqa 11:4 jidentifika dawn id-djun bħala dnubiet.
Fil-passat, Alla fuq liema kundizzjonijiet ħafer id-dnubiet? Il-ġustizzja perfetta tiegħu tirrikjedi l-piena tal-mewt għad-dnub. Għalhekk, Adam ħallas b’ħajtu għal dnubu. Però, taħt il-Liġi li Alla ta lill-ġens t’Israel, id-dnubiet taʼ wieħed ħati setgħu jiġu maħfurin billi jissagrifika annimal lil Ġeħova. L-appostlu Pawlu qal: “Kważi kollox jitnaddaf bid-demm skond il-Liġi, u jekk ma jixxerridx demm ma sseħħ ebda maħfra.” (Ebr. 9:22) Il-Lhud ma kinux jafu b’mod ieħor kif il-maħfra setgħet tinkiseb mingħand Alla. Allura mhux sorprendenti li osservaturi fi żmien Ġesù oġġezzjonaw għal dak li qal lil din il-mara. Dawk li kienu mal-mejda maʼ Ġesù qalu bejnhom u bejn ruħhom: “Min hu dan ir-raġel li saħansitra jaħfer id-dnubiet?” (Lq. 7:49) Allura fuq liema bażi l-ħtijiet taʼ din il-mara mimlija dnubiet setgħu jiġu maħfurin?
L-ewwel profezija, li tlissnet wara li l-ewwel koppja umana rribellat, iddikjarat l-iskop taʼ Ġeħova biex iqajjem ‘nisel’ li kien se jinsaħaq fl-għarqub minn Satana u ‘nislu.’ (Ġen. 3:15) Dan it-tisħiq seħħ meta Ġesù ġie maqtul mill-għedewwa t’Alla. (Gal 3:13, 16) Id-demm imxerred taʼ Kristu jservi bħala l-fidwa li teħles lill-umanità mid-dnub u l-mewt. Minħabba li xejn ma jistaʼ jwaqqaf lil Ġeħova milli jwettaq l-iskop tiegħu, hekk kif intqal il-kliem miktub f’Ġenesi 3:15, Alla qies il-fidwa bħallikieku kienet diġà tħallset. Issa hu setaʼ jaħfer lil dawk li eżerċitaw fidi fil-wegħdi tiegħu.
Matul iż-żmien taʼ qabel il-Kristjanità, Ġeħova qies lil diversi wħud bħala ġusti. Fosthom Ġak. 2:21-25.
kien hemm Enok, Noè, Abraham, Raħab, u Ġob. Bil-fidi huma ħarsu ’l quddiem għat-twettiq tal-wegħdi t’Alla. “Abraham poġġa l-fidi f’Ġeħova,” kiteb id-dixxiplu Ġakbu, “u dan ngħaddlu bħala ġustizzja.” Rigward Raħab, Ġakbu qal: “Bl-istess mod ma kinitx ukoll Raħab il-prostituta dikjarata ġusta bl-għemejjel?”—Is-Sultan David t’Israel tal-qedem għamel diversi dnubiet serji, imma kellu fidi soda fl-Alla l-veru u wera ndiema ġenwina kull darba. Iktar minn hekk, l-Iskrittura tgħid: “Alla [ta lil Ġesù] bħala offerta propizjatorja permezz tal-fidi f’demmu. Dan kien sabiex juri l-ġustizzja tiegħu, għax kien qed jaħfer id-dnubiet li seħħew fil-passat waqt li Alla kien qed jeżerċita t-tolleranza; sabiex juri l-ġustizzja tiegħu f’dan iż-żmien stabbilit, biex ikun ġust anki meta jiddikjara ġust lill-bniedem li jkollu fidi f’Ġesù.” (Rum. 3:25, 26) Fuq il-bażi tas-sagrifiċċju tal-fidwa taʼ Ġesù li kellu jkun provdut fil-futur, Ġeħova setaʼ jaħfer il-ħtijiet taʼ David mingħajr ma jmur kontra l-ħtiġijiet Tiegħu stess għall-ġustizzja.
Evidentement, is-sitwazzjoni tal-mara li dilket saqajn Ġesù kienet simili. Kienet għexet ħajja immorali, imma kienet nidmet. Hi għarfet il-bżonn li tiġi mifdija mid-dnub u bl-azzjonijiet tagħha wriet li verament kienet tapprezza lill-individwu li permezz tiegħu Ġeħova pprovda din il-fidwa. Għalkemm kien għadu se jseħħ, dan is-sagrifiċċju tant kien ċert li l-valur tiegħu setaʼ jiġi applikat minn qabel lil individwi bħalha. Għalhekk, Ġesù qalilha: “Dnubietek maħfurin.”
Bħalma juri b’mod ċar dan ir-rakkont, Ġesù m’evitax lill-midinbin. Għamel it-tajjeb magħhom. Iktar minn hekk, Ġeħova huwa lest li jaħfer lill-midinbin li jindmu. X’assiguranza mill-isbaħ u inkuraġġanti hu dan għalina l-bnedmin imperfetti!
[Stampa f’paġna 7]
Ngħaddilhom bħala ġustizzja