Stedina Miftuħa Għal Kulħadd!
Stedina Miftuħa Għal Kulħadd!
STEDINA miftuħa għal xiex? Biex iżżur wieħed mill-uffiċċji tal-fergħa tax-Xhieda taʼ Ġeħova, li ġeneralment nirreferu għalihom bħala Betel. Hemm 118 minn dawn iċ-ċentri f’diversi pajjiżi. Il-viżitaturi spiss jesprimu l-apprezzament tagħhom mill-qalb għal dak li jaraw iseħħ f’Betel.
Wara li ra ħafna ħaddiema beżlin jaqdu lil Ġeħova bil-ferħ fl-uffiċċju tal-fergħa fil-Messiku, student tal-Bibbja żagħżugħ tant baqaʼ impressjonat li staqsa: “Xi rrid nagħmel biex nibqaʼ hawn?” Wiġbuh: “L-ewwel trid titgħammed. Imbagħad ikun tajjeb li taqdi bħala pijunier—proklamatur tas-Saltna full-time.” Iż-żagħżugħ segwa s-suġġerimenti, u sentejn wara ġie mistieden biex jaqdi fil-Betel tal-Messiku, fejn ilu jaqdi għal dawn l-aħħar 20 sena.
X’Inhi Betel?
Fil-lingwa Ebrajka, “Betel” tfisser “Dar t’Alla.” (Ġen. 28:19, ntt.) Il-faċilitajiet taʼ diversi uffiċċji tal-fergħa jintużaw biex jistampaw u jqassmu Bibbji u letteratura Biblika u biex jipprovdu għajnuna spiritwali lil iktar minn 100,000 kongregazzjoni tax-Xhieda taʼ Ġeħova madwar id-dinja. Kważi 20,000 ħaddiem f’Betel—irġiel u nisa minn ħafna sfondi soċjali u kulturali differenti—bla egoiżmu jaqdu lil Ġeħova u lil ħuthom spiritwali full-time. Dawk li qattgħu ħafna snin f’dan ix-xogħol Kristjan jaqdu spalla maʼ spalla maʼ żgħażagħ enerġetiċi. Filgħaxijiet u fi tmiem il-ġimgħa, membri taʼ familji Betel jieħdu gost jassoċjaw maʼ kongregazzjonijiet fil-qrib tax-Xhieda taʼ Ġeħova fil-laqgħat u fil-ministeru Kristjan. Ukoll, jużaw il-ħin liberu tagħhom għall-istudju tal-Bibbja, ir-rikreazzjoni, u biex jieħdu ħsieb affarijiet persunali.
Membri tal-familja Betel jirċievu xi ħaġa żgħira tal-flus kull xahar. Huma jgawdu ikliet bnien u sustanzjużi u jgħixu fi kmamar nodfa u komdi. Id-djar taʼ Betel mhumiex disinjati biex ikunu lussużi. Madankollu, huma prattiki. Il-viżitaturi mhumiex biss impressjonati bil-bini u l-ambjent tal-madwar li jinżammu f’kundizzjoni tajba u b’kif kollox jimxi ħarir, imma wkoll bl-ispirtu taʼ qalb tajba u kooperazzjoni li jispikka f’Betel. Kulħadd jaħdem b’mod diliġenti, però ħadd m’għandu wisq x’jagħmel biex ma jkunx dħuli. F’Betel la hemm distinzjonijiet soċjali u lanqas sentimenti taʼ superjorità minħabba l-inkarigu taʼ dak li jkun. Kull inkarigu hu importanti, kemm jekk hu tindif, ġardinaġġ, tisjir, kif Kol. 3:23.
ukoll jekk hu xogħol fi stamperija jew f’uffiċċju. Il-Beteliti, bħalma huma magħrufin dawk li jaqdu f’Betel, jaħdmu flimkien bħala tim biex jappoġġaw il-ministeru tax-Xhieda taʼ Ġeħova.—Ejja Niltaqgħu maʼ Xi Wħud mill-Beteliti
Ejja nsiru nafu ftit iktar lil dawk li jifformaw din il-familja internazzjonali. X’qanqalhom ikunu jridu jaqdu f’Betel? Ikkunsidra l-każ taʼ Mario. Meta sar wieħed mix-Xhieda taʼ Ġeħova, Mario kellu xogħol li jrendi ħafna maʼ kumpanija Ġermaniża prestiġjuża tal-vetturi u kellu opportunità biex javanza. Ftit wara l-magħmudija tiegħu, hu offra biex iqattaʼ ġimgħa jaħdem fil-Betel taʼ pajjiżu. Bagħtuh jgħin fl-istamperija. Mario setaʼ jara l-kuntrast kbir bejn sħabu tax-xogħol f’Betel u dawk tax-xogħol sekulari tiegħu. Għalhekk, applika biex jaqdi full-time f’Betel. Għalkemm ħafna mill-qraba u l-kollegi sabuha diffiċli biex jifhmu d-deċiżjoni tiegħu, Mario issa qed jaqdi bil-ferħ fil-Betel tal-Ġermanja.
Ħafna jidħlu fis-servizz taʼ Betel mingħajr ebda abbiltà jew edukazzjoni speċjali. Dan kien minnu fil-każ taʼ Abel, li ilu jaqdi fil-Betel tal-Messiku għal 15-il sena. “Betel kienet skola taʼ vera għalija,” jgħid hu. “Tgħallimt inħaddem stamperiji sofistikati ħafna. Naf li b’dan l-għarfien kieku nistaʼ naqlaʼ ħafna flus barra minn Betel, imma kieku ma jkollix dak li ngawdi hawnhekk—ħajja trankwilla u sodisfaċenti mingħajr l-inkwiet u l-kompetizzjoni li hemm f’ħafna mill-postijiet tax-xogħol kummerċjali. Inħoss li ngħatajt l-aqwa edukazzjoni possibbli, waħda li għenitni niżviluppa kemm spiritwalment kif ukoll intellettwalment. Lanqas fl-aqwa università ma kont nirċievi benefiċċji spiritwali bħal dawn.”
Żjara Tistaʼ Tkun Inkuraġġanti
Anki sempliċi żjara f’Betel jistaʼ jkollha effett pożittiv fuq l-ispiritwalità taʼ dak li jkun. Dan kien minnu fil-każ taʼ Omar, fil-Messiku. Ommu għallmitu l-veritajiet tal-Bibbja. Imma fl-età taʼ 17-il sena, Omar waqaf jattendi l-laqgħat Kristjani u ma baqax jieħu sehem
fil-ministeru pubbliku. Eventwalment involva ruħu f’vizzji u f’ħajja materjalistika. Iktar tard, meta kien qed jaħdem għal kumpanija tal-komunikazzjonijiet, Omar kien parti minn grupp li żaru l-Betel fil-Messiku biex juru xi apparat. Omar jikkummenta: “Wara t-turija tagħna, dawk li stidnuna dawruna mal-faċilitajiet. Dak li rajt u l-mod dħuli kif ittrattawni qanqluni nirrifletti fuq il-ħajja li kont qed ngħix imbiegħda minn Ġeħova. Mill-ewwel erġajt bdejt nattendi l-laqgħat u nistudja l-Bibbja. Sitt xhur wara ż-żjara tiegħi f’Betel tgħammidt. Nirringrazzja lil Ġeħova għall-motivazzjoni li rċivejt permezz taʼ dik iż-żjara f’Betel.”Masahiko, fil-Ġappun, ukoll trabba f’familja tax-Xhieda. Madankollu, beda jħares lejn il-ħajja Kristjana bħala li hi restrittiva żżejjed. Hu beda jkollu sehem kbir fl-attivitajiet tal-iskola u ma baqax jattendi l-laqgħat u jipparteċipa fix-xogħol tal-ippritkar. Masahiko jirrakkonta: “Ġurnata minnhom il-familja tiegħi u ftit ħbieb Kristjani ddeċidew li jżuru l-Betel. Peress li l-familja tiegħi insistew, jien mort magħhom. Jien u ndur Betel ħassejtni inkuraġġit bħal qatt qabel. Is-sodisfazzjon li ksibt mis-sħubija maʼ Kristjani oħrajn waqt il-vjaġġ kien xi ħaġa li qatt ma kont esperjenzajt maʼ sħabi li ma kinux Xhieda. Ix-xewqa li ngħix il-mod taʼ ħajja Kristjana kibret fija, u ddeċidejt li nistaqsi għal studju tal-Bibbja.” Masahiko issa jaqdi bħala ministru full-time fil-kongregazzjoni tiegħu.
Xhud minn Franza marret toqgħod Moska biex taħdem. Hemmhekk tilfet il-kuntatt mal-poplu taʼ Ġeħova u ddgħajfet spiritwalment. Involviet ruħha fil-ħażen u eventwalment iżżewġet raġel li ma kienx Xhud. Imbagħad oħt spiritwali minn Franza marret taraha u flimkien ivvjaġġaw lejn San Pietruburgu, ir-Russja, biex iżuru d-dar taʼ Betel hemmhekk. Hi tikteb: “F’Betel ngħatajna merħba mill-qalb, u dan messli qalbi. Kien hemm il-paċi. Ħassejt l-ispirtu taʼ Ġeħova. Kif stajt għamilt l-iżball li nitbiegħed mill-organizzazzjoni taʼ Ġeħova? Wara ż-żjara tiegħi f’Betel tlabt għall-għajnuna taʼ Ġeħova u bdejt ngħallem lil uliedi l-Bibbja b’determinazzjoni mġedda.” Minbarra għajnuna spiritwali oħra li din ix-Xhud, li dak iż-żmien kienet batuta spiritwalment, setgħet irċiviet, issaħħet bil-kbir miż-żjara tagħha f’Betel u minn dakinhar ’il quddiem għamlet progress ġmielu.
Xi ngħidu għall-impressjoni li żjara f’Betel tistaʼ tħalli fuq dawk li mhumiex familjari max-Xhieda taʼ Ġeħova? Fl-1988, Alberto, li kien involut ħafna fil-politika, żar il-Betel fil-Brażil. L-indafa, l-ordni, u partikolarment is-sinċerità li biha sar ix-xogħol impressjonawh ħafna. Ftit qabel ma żar il-Betel, Alberto kien żar is-seminarju fejn ħu martu kien jaqdi bħala qassis. Alberto nnota l-kuntrast. “Fis-seminarju kollox kien isir bil-moħbi,” jgħid Alberto. Ftit wara ż-żjara tiegħu f’Betel, hu aċċetta studju tal-Bibbja, abbanduna l-politika, u issa jaqdi bħala anzjan fil-kongregazzjoni.
Ejja Żur Betel!
Ħafna għamlu sforz straordinarju biex iżuru l-uffiċċju tal-fergħa f’pajjiżhom. Pereżempju, fil-Brażil, Paulo u Eugenia damu erbaʼ snin ifaddlu sabiex ikunu jistgħu jagħmlu l-vjaġġ taʼ 3,000 kilometru, li jdum jumejn b’tal-linja, biex jaraw il-faċilitajiet taʼ Betel f’dak il-pajjiż. Huma jgħidu: “Verament kien jistħoqqlu l-isforz kollu li għamilna. Issa għandna ħarsa ħafna iktar kompleta tal-organizzazzjoni taʼ Ġeħova. Meta nispjegaw ix-xogħol li jsir f’Betel lill-istudenti tal-Bibbja tagħna, kultant jistaqsu, ‘Ġieli mortu hemm?’ Issa nistgħu ngħidu iva.”
Hemm uffiċċju tal-fergħa u dar taʼ Betel f’pajjiżek jew f’pajjiż fil-qrib? Aħna nistidnuk biex iżżur il-faċilitajiet. Żgur li se tirċievi merħba mill-qalb u se tikseb benefiċċju spiritwali kbir jekk iżżur Betel.
[Stampa f’paġna 18]
Mario
[Stampa f’paġna 18]
Abel
[Stampa f’paġna 18]
Ġermanja
[Stampa f’paġna 18]
Ġappun
[Stampa f’paġna 18]
Brażil