Il-​Mexxej Attiv Tagħna Llum

“Ħareġ jirbaħ u jtemm ir-​rebħa tiegħu.”—RIV. 6:2.

1, 2. (a) L-​attività taʼ Kristu bħala sultan sa mill-​1914 kif inhi deskritta fil-​Bibbja? (b) Liema azzjonijiet ħa Kristu mindu ngħata t-​tron?

 KRISTU ngħata t-​tron bħala Sultan tas-​Saltna Messjanika taʼ Ġeħova fl-​1914. Meta nġibuh quddiem għajnejna, kif nimmaġinawh? Bħala xi sultan bilqiegħda fuq it-​tron tiegħu medhi fi ħsibijietu u kultant jitfaʼ ħarstu ’l isfel lejn l-​art biex jara kif inhi sejra l-​kongregazzjoni tiegħu? Jekk iva, għandna nbiddlu l-​opinjoni tagħna. Is-​Salmi u l-​ktieb tar-​Rivelazzjoni jiddeskrivuh bħala sultan mimli enerġija riekeb fuq żiemel biex “jirbaħ u jtemm ir-​rebħa tiegħu,” sakemm ‘jirnexxi’ għalkollox.—Riv. 6:2; Salm 2:6-​9; 45:1-​4.

² L-​ewwel azzjoni li ħa Kristu bħala sultan wara li ngħata t-​tron kienet ir-​rebħa tiegħu fuq “id-​dragun u l-​anġli tiegħu.” Kristu, bħala l-​arkanġlu Mikiel u kmandant tal-​anġli tiegħu, waddab lil Satana u lid-​demonji tiegħu ’l barra mis-​smewwiet sagri u llimitahom għall-​viċinanzi tal-​art. (Riv. 12:7-​9) Imbagħad, fl-​irwol tiegħu bħala “l-​messaġġier tal-​patt” taʼ Ġeħova, Ġesù ġie maʼ Missieru biex iwettaq spezzjoni tat-​tempju spiritwali. (Mal. 3:1) Hu għamel ġudizzju fuq il-​Kristjaneżmu, l-​iktar parti mill-​agħar taʼ “Babilonja l-​Kbira,” u sabha ħatja taʼ tixrid taʼ demm u adulterju spiritwali mas-​sistema politika taʼ din id-​dinja.—Riv. 18:2, 3, 24.

Kristu Naddaf l-​Ilsir Tiegħu Fuq l-​Art

3, 4. (a) Kristu liema xogħol wettaq bħala “l-​messaġġier” taʼ Ġeħova? (b) L-​ispezzjoni tat-​tempju xi rrivelat, u bħala l-​Kap tal-​kongregazzjoni, Ġesù liema ħatra għamel?

³ L-​ispezzjoni minn Ġeħova u “l-​messaġġier” tiegħu rrivelat ukoll li fil-​bitħa tal-​art taʼ dan it-​tempju spiritwali kien hemm grupp  taʼ Kristjani veri, li ma kinux parti mill-​knejjes tal-​Kristjaneżmu. Madankollu, anki dawn il-​Kristjani midlukin, jew “ulied Levi,” kellhom bżonn jiġu mnaddfin. Kien bħalma kien bassar il-​profeta Malakija: “[Ġeħova] jrid joqgħod bil-​qiegħda bħala raffinatur u wieħed li jnaddaf il-​fidda u jnaddaf lil ulied Levi; u jrid isaffihom bħad-​deheb u bħall-​fidda, u jsiru għal Ġeħova nies li qed jippreżentaw offerta bħala għotja bis-​sewwa.” (Mal. 3:3) Ġeħova uża “l-​messaġġier tal-​patt” tiegħu, Kristu Ġesù, sabiex inaddaf lil dawn l-​Iżraelin spiritwali.

⁴ Xorta waħda, Kristu sab lil dawn il-​Kristjani midlukin leali jagħmlu l-​almu tagħhom biex jipprovdu ikel spiritwali f’waqtu għan-​nies taʼ dar il-​fidi. Mill-​1879 ’l hawn, sew jekk f’ċirkustanzi favorevoli u sew jekk le, huma ilhom jippubblikaw veritajiet Bibliċi dwar is-​Saltna t’Alla fil-​paġni taʼ din ir-​rivista. Ġesù kien ipprofetizza li “meta jasal” biex jispezzjona lil dawk taʼ daru matul il-​“konklużjoni tas-​sistema,” hu kellu jsib ilsir jipprovdilhom “l-​ikel fiż-​żmien xieraq.” Hu kellu jiddikjara lil dan l-​ilsir bħala hieni u kellu “jaħtru fuq kulma għandu” fuq l-​art. (Mt. 24:3, 45-​47) Bħala l-​Kap tal-​kongregazzjoni Kristjana, Kristu uża lil dan “l-​ilsir leali u għaqli” biex jieħu ħsieb l-​interessi tas-​Saltna Tiegħu fuq l-​art. Hu pprovda direzzjoni għall-​midlukin “taʼ daru” u sħabhom in-​“nagħaġ oħrajn” permezz taʼ Ġemgħa li Tiggverna.—Ġw. 10:16.

Il-​Ħsad fuq l-​Art

5. L-​appostlu Ġwanni liema attività taʼ sultan ra f’viżjoni?

⁵ L-​appostlu Ġwanni kellu viżjoni taʼ xi ħaġa oħra li kellu jagħmel is-​Sultan Messjaniku “f’jum il-​Mulej” wara li Hu ngħata t-​tron bħala sultan fl-​1914. Ġwanni kiteb: “Rajt, u, ara, sħaba bajda, u fuq is-​sħaba xi ħadd bil-​qiegħda bħal bin il-​bniedem, b’kuruna tad-​deheb fuq rasu u minġel misnun f’idu.” (Riv. 1:10; 14:14) Ġwanni semaʼ anġlu taʼ Ġeħova jgħid lill-​Ħassad biex imidd il-​minġel tiegħu għax “il-​prodott taʼ l-​art misjur għalkollox.”—Riv. 14:15, 16.

6. Ġesù x’qal li kellu jiżviluppa maż-​żmien?

⁶ Dan il-​ħsad tal-​“prodott taʼ l-​art” ifakkarna fil-​parabbola taʼ Ġesù tal-​qamħ u s-​sikrana. Ġesù xebbah lilu nnifsu maʼ raġel li żeraʼ l-​għalqa tiegħu biż-​żrieragħ tal-​qamħ bl-​għan li jaħsad prodott taʼ qamħ mill-​aqwa, li jirrappreżenta lil “ulied is-​saltna,” il-​Kristjani veri midlukin biex jissieħbu miegħu fis-​Saltna tiegħu. Iżda matul il-​lejl, l-​għadu, “ix-​Xitan,” żeraʼ s-​sikrana fl-​għalqa, “ulied il-​Ħażin.” Dak li żeraʼ ż-​żerriegħa qal lill-​ħaddiema tiegħu biex iħallu l-​qamħ u s-​sikrana jikbru flimkien sa ma jasal żmien il-​ħsad, fil-​“konklużjoni tas-​sistema.” F’dan iż-​żmien, hu kellu jibgħat lill-​anġli tiegħu biex jifirdu l-​qamħ mis-​sikrana.—Mt. 13:24-​30, 36-​41.

7. Kristu kif qed iwettaq il-​ħsad tal-​“prodott taʼ l-​art”?

 ⁷ Bi twettiq tal-​viżjoni li ngħata Ġwanni, Ġesù għadu jidderieġi x-​xogħol tal-​ħsad mad-​dinja kollha. Il-​ħsad tal-​“prodott taʼ l-​art” beda bil-​ġbir tal-​fdal tal-​144,000 “ulied is-​saltna,” jiġifieri, “il-​qamħ” tal-​parabbola taʼ Ġesù. Id-​differenza bejn il-​Kristjani veri u l-​Kristjani tal-​isem saret ċara iktar minn qatt qabel wara l-​Ewwel Gwerra Dinjija, tant li kkontribwiet għat-​tieni parti tal-​ħsad tal-​“prodott taʼ l-​art”—il-​ġbir tan-​nagħaġ oħrajn. Dawn mhumiex “ulied is-​saltna” iżda, pjuttost, huma “folla kbira” taʼ wħud li lesti jkunu sudditi taʼ din is-​Saltna. Dawn jinġabru minn fost “il-​popli, il-​ġnus, u l-​lingwi” kollha. Huma jissottomettu ruħhom lejn is-​Saltna Messjanika magħmula minn Kristu Ġesù u l-​144,000 “qaddisin” li se jkunu mseħbin miegħu f’dan il-​gvern tas-​sema.—Riv. 7:9, 10; Dan. 7:13, 14, 18.

It-​Tmexxija tal-​Kongregazzjonijiet

8, 9. (a) X’juri li Kristu ma josservax biss il-​kondotta tal-​kongregazzjoni kollha iżda josserva wkoll il-​mod taʼ ħajja tal-​membri individwali tagħha? (b) Bħalma jidher f’paġna 26, liema “affarijiet profondi taʼ Satana” għandna nevitaw?

⁸ Fl-​artiklu taʼ qabel rajna kemm Kristu osserva mill-​qrib il-​kundizzjoni spiritwali tal-​kongregazzjonijiet individwali fl-​ewwel seklu E.K. Fi żmienna, bħala Sultan renjanti li ngħata “kull awtorità fis-​sema u fuq l-​art,” Kristu l-​Mexxej tagħna huwa l-​kap attiv tal-​kongregazzjonijiet mad-​dinja kollha u tal-​indokraturi tagħhom. (Mt. 28:18; Kol. 1:18) Ġeħova “għamlu kap fuq kollox għall-​kongregazzjoni” taʼ wħud midlukin. (Efes. 1:22) Bħala tali, xejn ma jaħrablu minn dak li qed jiġri f’iktar minn 100,000 kongregazzjoni individwali tax-​Xhieda taʼ Ġeħova.

⁹ Lill-​kongregazzjoni tal-​qedem taʼ Tjatira, Ġesù bagħtilha dan il-​messaġġ: “Dan jgħid l-​Iben t’Alla, li għandu għajnejh bħal fjamma nar, . . . ‘Naf l-​għemejjel tiegħek.’” (Riv. 2:18, 19) Hu ċanfar lill-​membri taʼ din il-​kongregazzjoni għall-​ħajja immorali laxka li kienu qed jgħixu, billi qalilhom: “Jien hu dak li jgħarbel il-​kliewi u l-​qlub, u nagħti lil kull wieħed skond għemilu.” (Riv. 2:23) Din l-​istqarrija tindika li Kristu ma josservax biss il-​kondotta inġenerali taʼ kull kongregazzjoni iżda wkoll il-​mod taʼ ħajja tal-​membri individwali tagħha. Ġesù faħħar lil dawk il-​Kristjani fi Tjatira “li ma sarux jafu l-​‘affarijiet profondi taʼ Satana.’” (Riv. 2:24) Illum, hu bl-​istess mod japprova lil dawk, kemm żgħar u kemm kbar, li joqogħdu lura milli jħaffru fil-​fond fl-​“affarijiet profondi taʼ Satana” permezz tal-​Internet jew tal-​logħob vjolenti bil-​kompjuter jew billi jieħdu gost bi rraġunar uman permissiv. Hi l-​għaxqa tiegħu josserva l-​isforzi u s-​sagrifiċċji taʼ ħafna Kristjani llum li qed jagħmlu l-​almu tagħhom biex isegwu t-​tmexxija tiegħu fl-​aspetti kollha taʼ ħajjithom!

10. Il-​mod kif Kristu jidderieġi lill-​anzjani tal-​kongregazzjoni kif inhu deskritt, iżda dawn liema arranġament jeħtieġ jirrikonoxxu?

¹⁰ Kristu bi mħabba jindokra l-​kongregazzjonijiet tiegħu fuq l-​art permezz tal-​anzjani maħturin. (Efes. 4:8, 11, 12) Fl-​ewwel seklu, l-​indokraturi kollha kienu mnisslin bl-​ispirtu. Dawn kienu deskritti f’Rivelazzjoni bħala kwiekeb fl-​id il-​leminija taʼ Kristu. (Riv. 1:16, 20) Illum, ħafna mill-​anzjani tal-​kongregazzjoni huma min-​nagħaġ oħrajn. Huma jinħatru wara li jkun sar it-​talb u taħt it-​tmexxija tal-​ispirtu qaddis, u għalhekk, anki huma jistgħu jitqiesu bħala li qegħdin taħt id-​direzzjoni, jew il-​gwida taʼ Kristu. (Atti 20:28) Madankollu, huma jirrikonoxxu li Kristu qed juża grupp żgħir taʼ rġiel Kristjani midlukin bħala Ġemgħa li Tiggverna biex imexxi u jidderieġi lid-​dixxipli tiegħu fuq l-​art.—Aqra Atti 15:6, 28-​30.

 “Ejja, Mulej Ġesù”

11. Għala ninsabu ħerqanin li naraw lill-​Mexxej tagħna jiġi malajr?

¹¹ Fir-​rivelazzjoni li ngħata l-​appostlu Ġwanni, Ġesù ħafna drabi qal li kien ġej malajr. (Riv. 2:16; 3:11; 22:7, 20) Bla dubju, hu kien qed jirreferi għall-​miġja tiegħu biex jagħmel ġudizzju fuq Babilonja l-​Kbira u l-​bqija tas-​sistema mill-​agħar taʼ Satana. (2 Tess. 1:7, 8) Ħerqan biex jara t-​twettiq tal-​ġrajjiet meraviljużi kollha li kienu mbassrin, ix-​xwejjaħ appostlu Ġwanni qal: “Amen! Ejja, Mulej Ġesù.” Anki aħna li qed ngħixu fiż-​żmien tat-​tmiem taʼ din is-​sistema mill-​agħar ninsabu ħerqanin li naraw lill-​Mexxej u s-​Sultan tagħna jiġi bil-​qawwa tas-​Saltna biex iqaddes isem Missieru u jivvindika s-​sovranità Tiegħu.

12. Kristu liema xogħol se jlesti qabel l-​irjieħ tal-​qerda jitħallew jonfħu?

¹² Qabel ma jiġi Ġesù biex jeqred l-​organizzazzjoni viżibbli taʼ Satana, il-​fdal tal-​144,000, membri taʼ Iżrael spiritwali, se jirċievu l-​immarkar finali bis-​siġill. Il-​Bibbja tgħid ċar u tond li l-​irjieħ tal-​qerda fuq is-​sistema taʼ Satana mhumiex se jitħallew jonfħu qabel jitlesta dan l-​issiġillar tal-​144,000.—Riv. 7:1-​4.

13. Kristu kif se juri l-​preżenza tiegħu matul l-​ewwel fażi tat-​“tribulazzjoni kbira”?

¹³ Il-​“preżenza” taʼ Kristu li bdiet fl-​1914 ma ġietx notata mill-​maġġuranza tal-​abitanti fuq l-​art. (2 Pt. 3:3, 4) Madankollu, hu dalwaqt se juri l-​preżenza tiegħu billi jesegwixxi l-​ġudizzji taʼ Ġeħova fuq id-​diversi elementi tas-​sistema taʼ Satana. Il-​qerda tal-​“bniedem bla liġi,” il-​kleru tal-​Kristjaneżmu, se tkun bla dubju taʼ xejn “manifestazzjoni tal-​preżenza tiegħu.” (Aqra t-​2 Tessalonikin 2:3, 8.) Din se tagħti prova konkreta li Kristu beda jaġixxi bħala l-​Imħallef maħtur taʼ Ġeħova. (Aqra t-​2 Timotju 4:1.) Il-​qerda tal-​iktar parti mill-​agħar taʼ Babilonja l-​Kbira se sservi taʼ preludju għall-​qerda totali taʼ dan l-​imperu dinji mill-​agħar taʼ reliġjon falza. Ġeħova se jpoġġi fil-​qlub tal-​mexxejja politiċi r-​rieda li jeqirdu lil din il-​prostituta. (Riv. 17:15-​18) Din se tkun l-​ewwel parti tat-​“tribulazzjoni kbira.”—Mt. 24:21.

14. (a) L-​ewwel parti tat-​tribulazzjoni kbira għala se titqassar? (b) “Is-​sinjal taʼ Bin il-​bniedem” x’se jkun ifisser għall-​poplu taʼ Ġeħova?

¹⁴ Ġesù stqarr li l-​jiem taʼ din it-​tribulazzjoni se jitqassru “minħabba l-​magħżulin,” il-​fdal tal-​Kristjani midlukin li jkunu għadhom fuq l-​art. (Mt. 24:22) Ġeħova mhux se jippermetti li dan l-​attakk qerried fuq ir-​reliġjon falza jeqred għalkollox lill-​Kristjani midlukin u lil sħabhom in-​nagħaġ oħrajn. Ġesù żied jgħid li “wara t-​tribulazzjoni taʼ dawk il-​jiem,” se jkun hemm sinjali fix-​xemx, fil-​qamar, u fil-​kwiekeb, u “mbagħad jidher fis-​sema s-​sinjal taʼ Bin il-​bniedem.” Dan se jġiegħel lill-​ġnus tal-​art “jibku u jħabbtu fuq sidirhom.” Dan mhux se jkun minnu fil-​każ tal-​midlukin li għandhom tama għas-​sema, u taʼ sħabhom li għandhom tama għall-​art. Dawn se ‘jqumu dritti u jgħollu rashom ’il fuq, għax ikun qorob il-​ħelsien tagħhom.’—Mt. 24:29, 30; Lq. 21:25-​28.

15. Kristu liema xogħol se jagħmel meta jiġi?

¹⁵ Qabel ma jtemm ir-​rebħa tiegħu, Bin il-​bniedem jiġi saħansitra b’mod ieħor. Hu pprofetizza: “Meta Bin il-​bniedem jasal fil-​glorja tiegħu, u l-​anġli kollha miegħu, imbagħad  joqgħod bil-​qiegħda fuq it-​tron glorjuż tiegħu. U l-​ġnus kollha jinġabru quddiemu, u hu jifred lin-​nies, wieħed mill-​ieħor, bħalma ragħaj jifred lin-​nagħaġ mill-​mogħoż. U jpoġġi lin-​nagħaġ fuq il-​lemin tiegħu u l-​mogħoż fuq ix-​xellug.” (Mt. 25:31-​33) Dan jirreferi għall-​miġja taʼ Kristu bħala Mħallef biex jifred lin-​nies tal-​“ġnus kollha” f’żewġ kategoriji: “in-​nagħaġ,” dawk li jkunu appoġġaw b’mod attiv lil ħutu spiritwali (l-​Kristjani midlukin fuq l-​art) u l-​“mogħoż,” dawk “li ma jobdux l-​aħbar tajba dwar il-​Mulej tagħna Ġesù.” (2 Tess. 1:7, 8) In-​nagħaġ, deskritti bħala “nies sewwa,” se jirċievu “l-​ħajja taʼ dejjem” fuq l-​art, iżda l-​mogħoż “imorru fil-​qtugħ taʼ dejjem,” jew qerda.—Mt. 25:34, 40, 41, 45, 46.

Ġesù Jtemm ir-​Rebħa Tiegħu

16. Kristu l-​Mexxej tagħna kif se jtemm ir-​rebħa tiegħu?

¹⁶ Bin-​numru totali taʼ sħabu s-​slaten u l-​qassisin siġillat u bin-​nagħaġ identifikati u mpoġġijin fuq l-​id il-​leminija tiegħu għas-​salvazzjoni, Kristu jistaʼ jibqaʼ għaddej biex “itemm ir-​rebħa tiegħu.” (Riv. 5:9, 10; 6:2) Bħala l-​kap taʼ armata taʼ anġli setgħanin u, bla dubju, ħutu rxoxtati, hu se jeqred is-​sistema politika, militari, u kummerċjali kollha kemm hi taʼ Satana fuq l-​art. (Riv. 2:26, 27; 19:11-​21) Ir-​rebħa taʼ Kristu se tkun kompluta meta hu jeqred is-​sistema mill-​agħar taʼ Satana. Imbagħad, se jitfaʼ lil Satana u lid-​demonji tiegħu fl-​abbiss għal elf sena.—Riv. 20:1-​3.

17. Kristu lejn xiex se jmexxi lin-​nagħaġ oħrajn tiegħu matul ir-​Renju taʼ Elf Sena, u x’għandha tkun id-​determinazzjoni tagħna?

¹⁷ Meta tkellem dwar il-​“folla kbira” taʼ nagħaġ oħrajn, li se jibqgħu ħajjin fit-​tribulazzjoni kbira, l-​appostlu Ġwanni pprofetizza li “l-​Ħaruf, li qiegħed ħdejn it-​tron, jirgħahom, u jiggwidahom lejn għejun taʼ l-​ilmijiet tal-​ħajja.” (Riv. 7:9, 17) Tabilħaqq, matul ir-​Renju taʼ Elf Sena tiegħu, Kristu se jkompli jmexxi lin-​nagħaġ oħrajn, li tassew jisimgħu minn leħnu, u jiggwidahom lejn ħajja taʼ dejjem. (Aqra Ġwanni 10:16, 26-​28.) Jalla nsegwu fedelment lill-​Mexxej irjali tagħna—issa u fid-​dinja l-​ġdida li wiegħed Ġeħova!

Bħala Reviżjoni

• Kristu liema azzjoni ħa wara li ngħata t-​tron?

• Kristu liema għodod viżibbli qed juża biex imexxi lill-​kongregazzjonijiet?

• Kristu l-​Mexxej tagħna b’liema modi għad irid jiġi?

• Kristu kif se jkompli jmexxina fid-​dinja l-​ġdida?

[Mistoqsijiet taʼ Studju]

[Stampa f’paġna 29]

Permezz tal-​qerda tas-​sistema mill-​agħar taʼ Satana se tintwera l-​preżenza taʼ Kristu