“Jgħinni Nilħaq il-Qalb tan-Nies”
“Jgħinni Nilħaq il-Qalb tan-Nies”
F’PORTO ALEGRE, belt fin-Nofsinhar tal-Brażil, ftit taʼ żmien ilu nżammet konferenza internazzjonali rigward kwistjonijiet soċjali. Għaxriet t’eluf taʼ nies minn 135 pajjiż attendew l-avveniment. Matul l-intervalli, grupp taʼ Xhieda minn kongregazzjoni f’Porto Alegre avviċinaw ħafna delegati biex ikunu jistgħu jaqsmu magħhom il-messaġġ tas-Saltna mill-Bibbja. Kif ikkomunikaw?
“Użajna l-ktejjeb Good News for People of All Nations,” tgħid Elizabete, li hi pijuniera. Hi żiedet: “Ħafna mid-delegati qatt ma kienu semgħu dwar l-aħbar tajba tas-Saltna, imma huma wieġbu b’mod favorevoli għall-messaġġ tagħna. Tkellimna maʼ nies mill-Bolivja, iċ-Ċina, Franza, l-Indja, l-Iżrael, u n-Niġerja. Għal xi delegati, kellna letteratura Biblika bil-lingwa tagħhom stess, li aċċettaw mill-qalb.”
Fil-Messiku, pijunier jismu Raúl ukoll juża dan il-ktejjeb b’riżultati tajbin. Xi żmien ilu, avviċina raġel Għarbi taʼ 80 sena li reċentement kien tilef lil martu fil-mewt. Wara li r-raġel qara l-paġna fil-ktejjeb li fiha hemm il-messaġġ tas-Saltna bl-Għarbi, hu beka bil-ferħ. Għala? Għax il-wegħda t’Alla li mhux se jkun hemm iktar mewt, bħalma hu miktub f’Rivelazzjoni 21:3, 4, messitlu qalbu meta qraha bil-lingwa tiegħu. F’okkażjoni oħra, waqt li kien qed jipprietka b’mod informali, Raúl iltaqaʼ maʼ raġel li jitkellem bil-Portugiż. Dan ir-raġel ukoll kien tilef lil xi ħadd maħbub fil-mewt—’l ibnu. Raúl ħallieh jaqra l-paġna bil-Portugiż fil-ktejjeb. Wara li qraha, ir-raġel indika li ried jitgħallem iktar dwar il-Bibbja, u aċċetta studju tal-Bibbja.
Raúl uża Good News for People of All Nations biex jagħti xhieda lil dawk li jitkellmu bl-Armenjan, iċ-Ċiniż, il-Franċiż, il-Ġermaniż, il-Ħindi, l-Ingliż, il-Korean, il-Mixe, il-Persjan, ir-Russu, u z-Zapotec. Huwa jgħid: “Għaraft kemm hu importanti li nuża din l-għodda fil-ministeru tiegħi. Tgħinni nilħaq il-qalb tan-nies anki jekk ma nitkellimx bil-lingwa tagħhom.”
Hekk kif iktar u iktar nies jivvjaġġaw u jmorru jgħixu f’pajjiżi barranin, għandna iktar opportunitajiet biex niltaqgħu maʼ dawk li jitkellmu lingwa oħra. Se nkunu nistgħu naqsmu l-messaġġ tas-Saltna magħhom billi nużaw il-ktejjeb Good News for People of All Nations. Int iġġorru miegħek?
[Stampi f’paġna 32]
Raúl bil-ktejjeb li jgħinu jilħaq il-qalb tan-nies