“Min Sar Jaf Moħħ Ġeħova?”
“Min Sar Jaf Moħħ Ġeħova?”
“‘Min sar jaf moħħ Ġeħova biex ikun jistaʼ jgħallmu?’ Imma aħna għandna l-moħħ taʼ Kristu.”—1 KOR. 2:16.
1, 2. (a) Ħafna nies liema diffikultà jesperjenzaw? (b) X’għandna bżonn niftakru dwar il-ħsib tagħna u dak taʼ Ġeħova?
ĠIELI sibt li hu diffiċli li tifhem il-mod taʼ ħsib taʼ persuna oħra? Forsi għadek kif iżżewwiġt, u tħoss li m’hemmx mod li tifhem għalkollox kif is-sieħeb jew is-sieħba tiegħek taħsibha. Tabilħaqq, l-irġiel u n-nisa jaħsbu u anki jitkellmu differenti. Fil-fatt, f’xi kulturi, l-irġiel u n-nisa saħansitra jitkellmu djaletti differenti tal-istess lingwa! Barra minn dan, differenzi fil-kultura u l-lingwa jistgħu jirriżultaw f’modi taʼ ħsib u aġir differenti. Madankollu, iktar ma ssir taf lil oħrajn, iktar se jkollok opportunità biex tibda tifhem il-mod taʼ ħsib tagħhom.
2 Għalhekk, m’għandniex għalfejn nissorprendu ruħna li l-mod taʼ ħsib tagħna hu differenti ħafna minn dak taʼ Ġeħova. Permezz tal-profeta tiegħu Iżaija, Ġeħova qal lill-Iżraelin: “Ħsibijietkom m’humiex ħsibijieti, u lanqas triqati m’huma triqatkom.” Imbagħad biex juri dan il-fatt, Ġeħova kompla jgħid: “Għax daqskemm is-smewwiet huma ogħla mill-art, hekk triqati huma ogħla minn triqatkom, u ħsibijieti minn ħsibijietkom.”—Is. 55:8, 9.
3. X’inhuma żewġ modi li bihom nistgħu nipprovaw niksbu “intimità maʼ Ġeħova”?
3 Imma jfisser dan li m’għandniex saħansitra nipprovaw nifhmu l-mod taʼ ħsib taʼ Ġeħova? Le. Għalkemm qatt ma nistgħu nifhmu għalkollox il-ħsibijiet kollha taʼ Ġeħova, il-Bibbja xorta waħda tinkuraġġina biex niksbu “intimità maʼ Ġeħova.” (Aqra Salm 25:14; Proverbji 3:32.) Mod wieħed biex nersqu eqreb lejn Ġeħova hu billi nuru rispett u noqogħdu attenti għall-attivitajiet tiegħu li huma mniżżlin fil-Kelma tiegħu, il-Bibbja. (Salm 28:5) Mod ieħor hu billi nsiru nafu “l-moħħ taʼ Kristu,” li hu “x-xbieha t’Alla li ma jidhirx.” (1 Kor. 2:16; Kol. 1:15) Billi nieħdu l-ħin biex nistudjaw rakkonti Bibliċi u nimmeditaw fuqhom, aħna nistgħu nibdew nifhmu l-kwalitajiet taʼ Ġeħova u l-mod taʼ ħsib tiegħu.
Oqogħdu Attenti Minn Tendenza Ħażina
4, 5. (a) Liema tendenza ħażina għandna bżonn nevitaw? Spjega. (b) L-Iżraelin waqgħu f’liema mod taʼ ħsib żbaljat?
4 Hekk kif nimmeditaw fuq l-attivitajiet taʼ Ġeħova, għandna bżonn nevitaw it-tendenza li niġġudikaw lil Alla skont il-livelli umani. Din it-tendenza hi msemmija fil-kliem taʼ Ġeħova li nsibu f’Salm 50:21: “Int immaġinajt li jien kont se nsir bħalek.” Huwa bħalma qal studjuż tal-Bibbja iktar minn 175 sena ilu: ‘Il-bnedmin għandhom it-tendenza li jiġġudikaw lil Alla skont il-livelli tagħhom u jaħsbu li Alla hu limitat bl-istess liġijiet li huma jaħsbu li l-bnedmin għandhom isegwu.’
5 Irridu noqogħdu attenti li ma nħallux il-ħarsa tagħna lejn Ġeħova tiġi determinata mil-livelli u x-xewqat tagħna stess. Għala hu importanti dan? Hekk kif nistudjaw l-Iskrittura, xi azzjonijiet taʼ Ġeħova jistgħu jidhru li ma tantx huma ġusti mill-ħarsa limitata u imperfetta tagħna. L-Iżraelin tal-qedem waqgħu f’dan il-mod taʼ ħsib u waslu għal konklużjoni żbaljata rigward il-mod kif Ġeħova aġixxa magħhom. Innota x’qalilhom Ġeħova: “U intom se tgħidu: ‘It-triq taʼ Ġeħova mhix ġusta.’ Ismaʼ, jekk jogħġbok, O dar Israel. Triqti mhix ġusta? Mhux triqatkom m’humiex ġusti?”—Eżek. 18:25.
6. Ġob liema lezzjoni tgħallem, u kif nistgħu nibbenefikaw mill-esperjenza tiegħu?
6 Mod kif nevitaw in-nassa li niġġudikaw lil Ġeħova skont il-livelli tagħna stess hu billi nirrikonoxxu li l-ħarsa tagħna hi limitata u kultant difettuża ħafna. Ġob kellu bżonn jitgħallem din il-lezzjoni. Matul iż-żmien taʼ tbatija tiegħu, Ġob issielet mad-disprament u sar xi ftit egoist. Ma baqax jiffoka fuq il-kwistjonijiet iktar importanti. Imma Ġeħova bi mħabba għenu jkabbar il-ħarsa tiegħu. Billi staqsa lil Ġob iktar minn 70 mistoqsija differenti, li Ġob lanqas waħda minnhom ma setaʼ jwieġeb, Ġeħova enfasizza l-limitazzjonijiet tal-fehma taʼ Ġob. Ġob aġixxa b’mod umli billi rranġa l-ħarsa tiegħu.—Aqra Ġob 42:1-6.
Niksbu “l-Moħħ taʼ Kristu”
7. Għala niġu megħjunin nifhmu il-mod taʼ ħsib taʼ Ġeħova jekk neżaminaw l-attivitajiet taʼ Ġesù?
7 Ġesù imita perfettament lil Missieru f’kull ħaġa li qal u għamel. (Ġw. 14:9) Għalhekk, jekk neżaminaw l-attivitajiet taʼ Ġesù niġu megħjunin nifhmu l-mod taʼ ħsib taʼ Ġeħova. (Rum. 15:5; Flp. 2:5) Mela, ejja neżaminaw żewġ rakkonti tal-Evanġelju.
8, 9. Bħalma hu miktub fi Ġwanni 6:1-5, liema sitwazzjoni wasslet lil Ġesù biex jagħmel mistoqsija lil Filippu, u Ġesù għala għamel hekk?
8 Immaġina x-xena. Kien eżatt qabel il-Qbiż tas-sena 32 E.K. L-appostli taʼ Ġesù kienu għadhom kif waslu minn vjaġġ rimarkevoli taʼ ppritkar fil-Galilija. Peress li kienu għajjenin minn din l-attività kollha, Ġesù ħadhom f’post imwarrab lejn ix-xatt tal-Grigal tal-Baħar tal-Galilija. Madankollu, eluf segwewhom hemmhekk. Wara li Ġesù fejjaq lil din il-folla kollha u għallimhom ħafna affarijiet, qamet problema. Dawn in-nies kollha kif setgħu jsibu xi ħaġa x’jieklu f’post daqstant imwarrab? Billi induna bil-bżonn, Ġesù staqsa lil Filippu, li kien minn dawk l-inħawi: “Minfejn se nixtru l-ħobż biex dawn ikollhom x’jieklu?”—Ġw. 6:1-5.
9 Ġesù għala għamillu din il-mistoqsija lil Filippu? Kien Ġesù inkwetat dwar x’se jagħmel? Le. X’kien tassew il-ħsib tiegħu? L-appostlu Ġwanni, li wkoll kien hemm, jispjega: “[Ġesù] kien qed jgħidlu dan bi prova biex jara x’se jgħid, għax hu stess kien jaf x’se jagħmel.” (Ġw. 6:6) Ġesù hawnhekk ried jara l-progress spiritwali tad-dixxipli tiegħu. Billi staqsa din il-mistoqsija, ġibed l-attenzjoni tagħhom u tahom opportunità biex jesprimu l-fidi tagħhom f’dak li setaʼ jagħmel. Imma tilfu din l-opportunità u wrew kemm il-ħarsa tagħhom kienet tassew limitata. (Aqra Ġwanni 6:7-9.) Imbagħad Ġesù kompla biex juri li hu setaʼ jagħmel xi ħaġa li huma lanqas biss kienu immaġinaw. B’mod mirakoluż, temaʼ lil dawk l-eluf taʼ nies bil-ġuħ.—Ġw. 6:10-13.
10-12. (a) Lill-mara Griega, Ġesù għala għandu mnejn ma tahiex dak li talbet immedjatament? Spjega. (b) X’se nikkunsidraw issa?
10 Dan ir-rakkont jistaʼ jgħinna nifhmu l-mod taʼ ħsib taʼ Ġesù f’okkażjoni oħra. Ftit wara li temaʼ lil dan il-grupp kbir taʼ nies, Ġesù u l-appostli tiegħu vvjaġġaw lejn it-Tramuntana, lil hemm mill-fruntiera taʼ Iżrael, fl-inħawi taʼ Tir u Sidon. Meta kienu hemm, iltaqgħu maʼ mara Griega li talbet bil-ħrara lil Ġesù biex ifejjaq lil bintha. Għall-ewwel, Ġesù injora lill-mara. Imma meta kompliet tinsisti, Ġesù qalilha: “L-ewwel ħa jixbgħu t-tfal, għax mhux sewwa li tieħu l-ħobż tat-tfal u titfgħu lill-ġriewi.”—Mk. 7:24-27.
11 Ġesù għala għall-ewwel irrifjuta li jgħin lil din il-mara? Kien Ġesù qed jittestjaha, bħalma għamel lil Filippu, biex jara kif kienet se tirreaġixxi, u b’hekk jagħtiha opportunità biex turi l-fidi tagħha? It-ton taʼ leħnu, għalkemm mhux irrivelat fir-rakkont miktub, ma qatgħalhiex qalbha. L-użu tal-kelma “ġriewi” għamel ix-xebh iktar ġentili. Għalhekk, Ġesù forsi kien qed jagħmel bħal ġenitur li għandu l-intenzjoni li jilqaʼ t-talba taʼ ibnu, imma jżomm lura milli juri l-intenzjoni tiegħu sabiex jittestja d-determinazzjoni tat-tifel. Kien x’kien il-każ, malli l-mara esprimiet il-fidi tagħha, Ġesù minn qalbu taha dak li talbet.—Aqra Marku 7:28-30.
12 Dawn iż-żewġ rakkonti tal-Evanġelju jagħtuna dehen prezzjuż dwar “il-moħħ taʼ Kristu.” Issa ejja naraw kif dawn ir-rakkonti jistgħu jgħinuna nifhmu aħjar il-moħħ taʼ Ġeħova stess.
Il-Mod Kif Ġeħova Ttratta maʼ Mosè
13. Il-fatt li niksbu dehen dwar il-mod taʼ ħsib taʼ Ġesù kif jgħinna?
13 Il-fatt li niksbu dehen dwar il-mod taʼ ħsib taʼ Ġesù jgħinna nifhmu siltiet mill-Iskrittura li jistgħu jkunu diffiċli biex nifhmuhom. Pereżempju, ikkunsidra l-kliem li Ġeħova qal lil Mosè wara li l-Iżraelin kienu għamlu għoġol tad-deheb biex iqimuh. Alla qal: “Jien ħarist lejn dan il-poplu, u, ara, hu poplu rasu iebsa. Għalhekk, issa ħallini, biex ir-rabja tiegħi tixgħel kontrihom u neqridhom għalkollox, u lilek nagħmlek ġens kbir.”—Eżo. 32:9, 10.
14. Mosè kif irreaġixxa għall-kliem taʼ Ġeħova?
14 Ir-rakkont ikompli jgħid: “Mosè taffa l-korla taʼ Ġeħova Alla tiegħu u qallu: ‘Għala, O Ġeħova, għandha r-rabja tiegħek tixgħel kontra l-poplu tiegħek li int ħriġt mill-art taʼ l-Eġittu b’qawwa kbira u b’id b’saħħitha? Għala għandhom l-Eġizzjani jgħidu, “B’intenzjoni ħażina ħariġhom sabiex joqtolhom qalb il-muntanji u biex jeqridhom għalkollox minn fuq wiċċ l-art”? Erġaʼ lura mir-rabja taħraq tiegħek u ħa jiddispjaċik għad-deni li trid tagħmel lill-poplu tiegħek. Ftakar fil-qaddejja tiegħek, Abraham, Iżakk, u Israel, li lilhom ħlift bik innifsek, billi għedtilhom, “Se nkattar lil nisilkom bħall-kwiekeb tas-smewwiet, u din l-art kollha li jien għażilt nagħtiha lil nisilkom, sabiex jiħduha f’idejhom għal żmien indefinit.”’ U Ġeħova ddispjaċieh għad-deni li kien qal li se jagħmel lill-poplu tiegħu.”—Eżo. 32:11-14. a
15, 16. (a) Mosè liema opportunità kellu minħabba dak li qal Ġeħova? (b) Ġeħova f’liema sens “iddispjaċieh”?
15 Kellu Mosè verament għalfejn jikkoreġi l-ħsib taʼ Ġeħova? Dażgur li le! Għalkemm Ġeħova esprima dak li kien inklinat biex jagħmel, dan ma kienx il-ġudizzju finali tiegħu. Sa ċertu punt, Ġeħova hawnhekk kien qed jittestja lil Mosè, sewwasew bħalma iktar tard Ġesù ttestja lil Filippu u lill-mara Griega. Mosè ngħata opportunità biex jesprimi l-ħarsa tiegħu. b Ġeħova kien ħatar lil Mosè bħala medjatur bejn Iżrael u bejnu Nnifsu. U Ġeħova rrispetta l-fatt li ħatar lil Mosè għal dan l-irwol. Kien Mosè se jħalli l-frustrazzjoni teffettwa l-azzjonijiet tiegħu? Kien se jieħu din l-opportunità biex jinkuraġġixxi lil Ġeħova biex jinsa lil Iżrael u biex jagħmel ġens qawwi mid-dixxendenti taʼ Mosè stess?
16 It-tweġiba taʼ Mosè wriet il-fidi u l-fiduċja tiegħu fil-ġustizzja taʼ Ġeħova. Ir-reazzjoni tiegħu ma wrietx interess egoist, imma tħassib għall-isem taʼ Ġeħova. Hu ma riedx li l-isem taʼ Ġeħova jiġi malafamat. Għalhekk, Mosè wera li hu fehem “moħħ Ġeħova” rigward din il-kwistjoni. (1 Kor. 2:16) X’kien ir-riżultat? Minħabba li Ġeħova ma kienx għadu ħa d-deċiżjoni finali, ir-rakkont ispirat jgħid li hu “ddispjaċieh.” Bl-Ebrajk, din l-espressjoni tistaʼ tfisser sempliċement li Ġeħova ma ġabx il-kastig li hu qal li kien inklinat li jġib fuq il-ġens kollu.
Il-Mod Kif Ġeħova Ttratta m’Abraham
17. Ġeħova kif wera paċenzja kbira meta ttratta mat-tħassib t’Abraham?
17 Eżempju ieħor taʼ kif Ġeħova jagħti opportunità lill-qaddejja tiegħu biex jesprimu l-fidi u l-fiduċja tagħhom jinvolvi t-talba t’Abraham rigward Sodoma. F’dan ir-rakkont, Ġeħova wera paċenzja kbira billi ħalla lil Abraham jagħmel serje taʼ tmien mistoqsijiet. F’ħin minnhom, Abraham jagħmel dan l-appell mimli emozzjoni: “Lanqas qatt ma jgħaddili minn moħħi li int taġixxi hekk biex toqtol lir-raġel sewwa maʼ dak li hu mill-agħar, u b’hekk lir-raġel sewwa jiġrilu l-istess bħal min hu mill-agħar! Lanqas qatt ma jgħaddili minn moħħi. Sejjer l-Imħallef taʼ l-art kollha ma jagħmilx dak li hu sewwa?”—Ġen. 18:22-33.
18. X’nitgħallmu mill-mod kif Ġeħova ttratta m’Abraham?
18 Minn dan ir-rakkont, x’nitgħallmu dwar il-mod taʼ ħsib taʼ Ġeħova? Kellu Ġeħova bżonn lil Abraham biex jirraġuna miegħu ħalli jieħu d-deċiżjoni t-tajba? Le. Naturalment, Ġeħova setaʼ sempliċement qal mill-ewwel ir-raġunijiet għad-deċiżjoni tiegħu. Imma permezz taʼ dawn il-mistoqsijiet, Ġeħova ta l-ħin lil Abraham biex jaċċetta d-deċiżjoni u biex jifhem il-mod taʼ ħsib Tiegħu. Ukoll, ħalla lil Abraham jifhem il-profondità tal-mogħdrija u l-ġustizzja taʼ Ġeħova. Iva, Ġeħova lil Abraham ittrattah bħala ħabib.—Is. 41:8; Ġak. 2:23.
Lezzjonijiet Għalina
19. Kif nistgħu nimitaw lil Ġob?
19 X’tgħallimna dwar “moħħ Ġeħova”? Għandna bżonn inħallu l-Kelma t’Alla ssawwar il-fehma tagħna dwar moħħ Ġeħova. Qatt m’għandna nimponu l-limitazzjonijiet tagħna fuq Ġeħova u niġġudikawh skont il-livelli u l-mod taʼ ħsib tagħna. Ġob qal: “[Alla] mhux bniedem bħali biex inwieġbu, biex immorru flimkien għall-ħaqq.” (Ġob 9:32) Bħal Ġob, meta nibdew nifhmu moħħ Ġeħova niġu mqanqlin nesklamaw: “Ara! Dawn m’humiex ħlief it-trufijiet taʼ triqatu, u kemm hu ftit dak li nisimgħu dwaru! Imma r-ragħad setgħan tiegħu min jistaʼ jifhmu?”—Ġob 26:14.
20. X’għandna nagħmlu jekk niltaqgħu maʼ silta fl-Iskrittura li hi diffiċli għalina biex nifhmuha?
20 Hekk kif naqraw l-Iskrittura, x’għandna nagħmlu jekk niltaqgħu maʼ silta li hi diffiċli biex nifhmuha, speċjalment rigward il-ħsib taʼ Ġeħova? Jekk wara li nkunu għamilna riċerka xorta waħda ma jkollniex tweġiba ċara, nistgħu nqisuha bħala prova tal-fidi tagħna f’Ġeħova. Ftakar, xi kultant ċerti stqarrijiet jagħtuna opportunità biex nuru l-fidi tagħna fil-kwalitajiet taʼ Ġeħova. Ejja b’umiltà nagħrfu li ma nifhmux kull ħaġa li jagħmel. (Ekk. 11:5) B’hekk, żgur li se niġu mqanqlin biex naqblu mal-appostlu Pawlu meta qal dan il-kliem: “O kemm huma profondi r-rikkezzi u l-għerf u l-għarfien t’Alla! Kemm ma jistgħux jinkixfu l-ġudizzji tiegħu, u kemm huma bla tarf triqatu! Għax ‘min sar jaf moħħ Ġeħova, jew min sar il-kunsillier tiegħu?’ Jew, ‘Min tah l-ewwel, biex ikun jistħoqqlu jitħallas?’ Għax kollox ġej minnu, u kollox hu bih u għalih. Lilu tkun il-glorja għal dejjem. Amen.”—Rum. 11:33-36.
[Noti taʼ taħt]
a Rakkont simili jidher f’Numri 14:11-20.
b Skont xi studjużi, l-idjoma Ebrajka tradotta “ħallini” f’Eżodu 32:10 tistaʼ titqies bħala stedina, implikazzjoni li Mosè kien se jitħalla jinterċedi, jew ‘jidħol’ għall-ġens quddiem Ġeħova. (Salm 106:23; Eżek. 22:30) Kien x’kien il-każ, Mosè ovvjament ħassu komdu jesprimi l-opinjoni tiegħu lil Ġeħova bla tlaqliq.
X’Tiftakar?
• X’se jgħinna nevitaw it-tendenza li niġġudikaw lil Ġeħova skont il-livelli tagħna stess?
• Li nifhmu l-azzjonijiet taʼ Ġesù kif se jgħinna niksbu “intimità maʼ Ġeħova”?
• X’lezzjonijiet tgħallimt mill-konversazzjonijiet li Ġeħova kellu maʼ Mosè u Abraham?
[Mistoqsijiet taʼ Studju]
[Stampi f’paġna 5]
X’nitgħallmu dwar il-mod taʼ ħsib taʼ Ġeħova minn kif ittratta maʼ Mosè u m’Abraham?