Qatt Mhu Tard Wisq Biex Taqdi ’l Alla

F’Málaga, fin-​Nofsinhar taʼ Spanja, omm u bintha, li t-​tnejn li huma jisimhom Ana, tgħammdu fid-​19 taʼ Diċembru, 2009. Huma kienu fost l-​2,352 ruħ li tgħammdu fi Spanja matul l-​2009. Iżda kien hemm xi ħaġa unika dwar din l-​omm u din il-​bint—l-​etajiet tagħhom. L-​omm kellha 107 snin u l-​bint kellha 83 sena!

X’wassalhom biex jitgħammdu b’simbolu tad-​dedikazzjoni tagħhom lil Ġeħova? Kmieni fis-​snin 70, waħda mill-​ġirien li kienet Xhud kienet tistieden lil Ana l-​bint sabiex tattendi l-​Istudju tal-​Ktieb tal-​Kongregazzjoni li kien jinżamm fid-​dar taʼ din ix-​Xhud. Kultant, Ana kienet tattendi. Madankollu, minħabba x-​xogħol sekulari tagħha, Ana ma komplietx tagħmel progress.

Madwar għaxar snin wara, xi wħud mit-​tfal taʼ Ana bdew jistudjaw il-​Bibbja u maż-​żmien saru qaddejja taʼ Ġeħova. Sa fl-​aħħar, waħda minnhom, li kien jisimha Mari Carmen, reġgħet kebbset l-​imħabba li ommha kellha għall-​verità tal-​Bibbja u għenitha taċċetta studju tal-​Bibbja. Imbagħad, in-​nanna taʼ Mari Carmen, li tiġi Ana l-​kbira, ukoll bdiet turi interess fil-​Bibbja. Maż-​żmien, għaxar membri minn din il-​familja tgħammdu.

Dakinhar li tgħammdu, kemm Ana l-​omm u kemm Ana l-​bint, kienu se jtiru bil-​ferħ. Ana l-​omm, li kellha 107 snin qalet: “Ġeħova kien twajjeb ħafna miegħi għax ħallieni nsir nafu.” Bintha żiedet tgħid: “Qabel tiġi l-​Ġenna tal-​art irrid naqdi lil Ġeħova billi nagħmel ir-​rieda tiegħu u nxandar kemm niflaħ l-​aħbar tajba.”

L-​attendenza għal-​laqgħat iġġib ferħ speċjali lil dawn iż-​żewġ romol. Wieħed mill-​anzjani fil-​kongregazzjoni tagħhom jgħid hekk dwarhom: “Lanqas qatt ma jitilfu laqgħa. Huma dejjem lesti jipparteċipaw bil-​kummenti tagħhom waqt l-​Istudju tat-​Torri tal-​Għassa.”

L-​eżempju taʼ lealtà tagħhom ifakkarna f’armla li kien jisimha Anna. Din “qatt ma kienet tonqos mit-​tempju biex tagħti servizz sagru lejl u nhar bis-​sawm u bit-​talb.” Dan wassal biex ikollha l-​privileġġ li tara lit-​tifel ċkejken, Ġesù. (Lq. 2:36-​38) Fl-​età taʼ 84 sena, Anna ma kinitx xiħa wisq biex taqdi lil Ġeħova, u lanqas ma huma xjuħ wisq iż-​żewġ nisa li jisimhom Ana.

Għandek xi qraba li huma lesti li jisimgħu l-​messaġġ tal-​Bibbja? Jew iltqajt maʼ xi ħadd anzjan li wera interess u li kien lest li jisimgħek meta żortu d-​dar? Uħud bħal dawn jistgħu jkunu bħaż-​żewġ nisa li jisimhom Ana li ssemmew f’din l-​esperjenza, għax qatt mhu tard wisq biex tibda taqdi lil Alla l-​veru, Ġeħova.

[Kumment f’paġna 25]

“Ġeħova kien twajjeb ħafna miegħi”

[Kumment f’paġna 25]

“Qabel tiġi l-​Ġenna tal-​art irrid naqdi lil Ġeħova”