FTIT wara li Ġesù kien irxoxtat, tnejn mid-​dixxipli tiegħu kienu mexjin minn Ġerusalemm għal Għemmaws. Ir-​rakkont tal-​Evanġelju taʼ Luqa jgħid: “Huma u jitkellmu u jiddiskutu, Ġesù nnifsu resaq lejhom u beda miexi magħhom; imma għajnejhom kienu miżmumin biex ma jagħrfuhx.” Imbagħad Ġesù qalilhom: “‘Fuqiex qed tiddiskutu bejnietkom intom u mexjin?ʼ U waqfu b’wiċċhom imnikket.” Għala kienu mnikktin? Id-​dixxipli kellhom l-​idea li Ġesù f’dak iż-​żmien kellu jeħles lil Iżrael mill-​ħakma tal-​Ġentili, imma ħelsien bħal dan ma seħħx. Minflok, Ġesù kien ġie maqtul. Għalhekk kienu mnikktin.—Lq. 24:15-​21; Atti 1:6.

Ġesù beda jirraġuna mad-​dixxipli tiegħu. “Beda minn Mosè u l-​Profeti kollha jfissrilhom dak li kien hemm miktub fuqu fl-​Iskrittura kollha.” Tabilħaqq, ħafna ġrajjiet importanti u li jsaħħu l-​fidi seħħew waqt il-​ministeru taʼ Ġesù! Hekk kif id-​dixxipli semgħu l-​ispjegazzjoni li tahom Ġesù, huma bdew jidhru ferħanin minflok imdejqin. Iżjed tard dik il-​lejla huma qalu: “Ma kinux qlubna mkebbsin fina meta beda jkellimna fit-​triq, hu u jispjegalna ċar l-​Iskrittura?” (Lq. 24:27, 32) X’lezzjoni nistgħu nitgħallmu mir-​reazzjoni tad-​dixxipli taʼ Ġesù?

Kif Niġu Effettwati Meta Ma Sseħħx Xi Ħaġa li Nkunu Stennejna?

Iż-​żewġ dixxipli li kienu sejrin lejn Għemmaws ħassewhom imnikktin għaliex il-​ġrajjiet li stennew ma seħħewx. Huma esperjenzaw dak li hu mniżżel fi Proverbji 13:12: “L-​istennija mtawla qed tmarrad il-​qalb.” Bl-​istess mod, xi wħud fostna li ilhom jaqdu lil Ġeħova għal għaxriet taʼ snin ħasbu li t-​“tribulazzjoni kbira” kienet se tkun laħqet ġiet u għaddiet s’issa. (Mt. 24:21; Riv. 7:14) Nistgħu nifhmu li, għalissa, stennija mhix imwettqa bħal din tistaʼ tikkaġuna niket.

Iżda, ftakar li dawk iż-​żewġ dixxipli reġgħu ħassewhom ferħanin wara li Ġesù għenhom jiffokaw fuq profeziji li kienu diġà seħħew, saħansitra matul ħajjithom stess. Aħna nistgħu nibqgħu nżommu l-​ferħ  ġewwieni tagħna u nkampaw maʼ sentimenti taʼ diżappunt bl-​istess mod. Anzjan Kristjan tal-​esperjenza jismu Michael: “Tikkonċentrax fuq dak li Ġeħova għadu m’għamilx. Minflok, ibqaʼ aħseb fuq dak li diġà għamel.” Tassew parir f’loku!

Dak li Ġeħova Għamel

Ikkunsidra ftit mill-​affarijiet li jispikkaw diġà mwettqin minn Ġeħova. Ġesù qal: “Min jeżerċita l-​fidi fija, dan ukoll se jagħmel l-​għemejjel li nagħmel jien; u se jagħmel għemejjel akbar minn dawn.” (Ġw. 14:12) Illum, il-​qaddejja t’Alla qed iwettqu l-​akbar xogħlijiet li qatt saru mill-​Kristjani. ’Il fuq minn sebaʼ miljun persuna jħarsu ’l quddiem li jibqgħu ħajjin wara t-​tribulazzjoni l-​kbira. Immaġina, qatt qabel ma kien hemm daqshekk qaddejja leali taʼ Ġeħova attivi f’tant artijiet madwar id-​dinja! Ġeħova għamel realtà l-​kliem profetiku taʼ Ġesù dwar “għemejjel akbar minn dawn.”

X’għamel iżjed għalina Ġeħova? Hu għamilha possibbli għal uħud sinċieri biex joħorġu mid-​dinja mill-​agħar, biex ngħidu hekk, u jidħlu f’ġenna spiritwali li hu ħalaq. (2 Kor. 12:1-​4) Ħu l-​ħin biex tirrifletti dwar xi aspetti taʼ dik il-​ġenna li diġà għandna. Pereżempju, agħti titwila lejn il-​librerija persunali tiegħek jew dik tas-​Sala tas-​Saltna. Qalleb fil-​paġni tal-​Watch Tower Publications Index, jew fittex fil-​Watchtower Library. Ismaʼ rekording taʼ drama tal-​Bibbja. Ġib quddiem għajnejk dak li rajt u smajt f’konvenzjoni reċenti. Flimkien maʼ dan, aħseb dwar is-​sħubija bnina li ngawdu maʼ ħutna l-​Kristjani. Kemm kien ġeneruż Ġeħova f’li jipprovdilna ikel spiritwali bl-​abbundanza u fratellanza li taf tħobb—ġenna spiritwali tassew!

Is-​salmista David stqarr: “Int għamilt ħafna affarijiet, iva, għemejjel taʼ l-​għaġeb, O Ġeħova Alla tiegħi, u ħsibijietek huma dwarna.” (Salm 40:5) Iva, billi nibqgħu naħsbu fuq l-​affarijiet meraviljużi li Ġeħova diġà għamel għalina u billi nirriflettu fuq kemm jaħseb dwarna bi mħabba, aħna se nsibu saħħa mġedda sabiex nissaportu lealment fis-​servizz li nagħtu b’qalb sħiħa lil Missierna tas-​sema, Ġeħova.—Mt. 24:13.

[Stampa f’paġna 31]

Ġesù għen lid-​dixxipli tiegħu biex jibqgħu jaħsbu fuq dak li Ġeħova kien diġà għamel għalihom

[Stampi f’paġna 32]

Ġib quddiem għajnejk dak li rajt u smajt f’konvenzjoni reċenti