“Huwa għalhekk li raġel iħalli lil missieru u lil ommu u jrid jingħaqad maʼ martu u huma jsiru ġisem wieħed.”—ĠEN. 2:24.

1. Ġeħova għala jistħoqqlu r-​rispett tagħna?

 ALLA ĠEĦOVA, l-​Oriġinatur taż-​żwieġ, żgur li jistħoqqlu r-​rispett tagħna. Bħala l-​Ħallieq, is-​Sovran, u l-​Missier tagħna tas-​sema, hu jiġi deskritt b’mod xieraq bħala d-​Donatur taʼ “kull għotja tajba u kull rigal perfett.” (Ġak. 1:17; Riv. 4:11) Din hija turija tal-​imħabba kbira tiegħu. (1 Ġw. 4:8) Kulma għallimna, kulma talab minna, kulma tana kien biss għall-​benesseri u l-​ġid tagħna.—Is. 48:17.

2. Ġeħova liema istruzzjonijiet tahom lill-​ewwel koppja miżżewġa?

² Il-​Bibbja tippreżenta ż-​żwieġ bħala waħda minn dawn l-​għotjiet ‘tajbin’ mingħand Alla. (Rut 1:9; 2:12) Meta għaqqad l-​ewwel żewġ persuni fiż-​żwieġ, Ġeħova ta lill-​ewwel koppja, Adam u Eva, istruzzjonijiet speċifiċi dwar kif jirnexxu. (Aqra Mattew 19:4-​6.) Kieku segwew id-​direzzjoni t’Alla, huma kienu se jgawdu hena dejjiemi. Madankollu, huma bi bluha ma tawx kas il-​kmand t’Alla u batew konsegwenzi koroh ħafna.—Ġen. 3:6-​13, 16-​19, 23.

3, 4. (a) Ħafna llum kif qed juru nuqqas taʼ rispett kemm lejn iż-​żwieġ u kemm lejn Alla Ġeħova? (b) Liema eżempji se nikkunsidraw f’dan l-​artiklu?

³ Bħal din l-​ewwel koppja, ħafna nies illum juru li bid-​deċiżjonijiet li jieħdu fiż-​żwieġ ftit jagħtu kas id-​direzzjoni taʼ Ġeħova jew xejn affattu. Xi koppji lanqas biss jgħaddilhom minn rashom li jiżżewġu, waqt li oħrajn jadattaw iż-​żwieġ għax-​xewqat tagħhom stess. (Rum. 1:24-​32; 2 Tim. 3:1-​5) Huma jinjoraw il-​fatt li ż-​żwieġ hu għotja mingħand Alla, u billi juru nuqqas taʼ rispett lejn din l-​għotja, huma juru nuqqas taʼ rispett ukoll lejn id-​Donatur, Alla Ġeħova.

⁴ Kultant, anki xi wħud min-​nies t’Alla ma jibqgħux iħarsu lejn iż-​żwieġ bħalma jħares lejh Ġeħova. Xi koppji Kristjani jiddeċiedu li jisseparaw, jew jiddivorzjaw mingħajr ma jkollhom bażi Skritturali biex jagħmlu dan. Dan kif jistaʼ jiġi evitat? Id-​direzzjoni t’Alla f’Ġenesi 2:24 kif tistaʼ tgħin lill-​Kristjani miżżewġin isaħħu ż-​żwieġ tagħhom? U dawk li qed jaħsbu biex jiżżewġu kif jistgħu jħejju għalih? Ejja neżaminaw tliet żwiġijiet li rnexxew fi żminijiet Bibliċi u li juruna kif ir-​rispett lejn Ġeħova hu vitali u fundamentali biex żwieġ ikun dejjiemi.

Ikkultiva l-​Lealtà

5, 6. Liema sitwazzjoni setgħet kienet taʼ prova għal Żakkarija u Eliżabetta, u l-​lealtà tagħhom kif ġiet premjata?

⁵ Żakkarija u Eliżabetta għamlu kollox kif suppost. Huma żżewġu qaddej leali taʼ Ġeħova. Żakkarija qeda lealment id-​dmirijiet tiegħu bħala qassis, u t-​tnejn li huma żammew mal-​Liġi t’Alla bl-​aħjar mod li setgħu. Żgur li kellhom ħafna għal xiex ikunu grati. Però, kieku kellek iżżur id-​dar tagħhom f’Ġuda, malajr kont tinduna li kien hemm xi ħaġa nieqsa. Ma kellhomx tfal. Eliżabetta kienet ħawlija, u issa t-​tnejn li huma kienu mdaħħlin sew fiż-​żmien.—Lq. 1:5-​7.

⁶ F’Iżrael tal-​qedem, kien importanti ħafna li jkollhom it-​tfal, u spiss il-​familji kienu kbar mhux ħażin. (1 Sam. 1:2, 6, 10; Salm 128:3, 4) Raġel Iżraeli lura f’dak iż-​żmien setaʼ jaġixxi bi  tradiment billi jiddivorzja lil martu jekk hi ma setax ikollha t-​tfal. Però, Żakkarija baqaʼ leali lejn Eliżabetta. Hu ma pprovax isib mod faċli kif itemm iż-​żwieġ, u lanqas martu m’għamlet dan. Għalkemm sewdu qalbhom għax ma kellhomx tfal, huma komplew jaqdu lil Ġeħova flimkien lealment. Maż-​żmien, b’mod mirakoluż Ġeħova ppremjahom bil-​kbir billi berikhom b’iben fi xjuħithom.—Lq. 1:8-​14.

7. B’liema mod ieħor Eliżabetta wriet lealtà lejn żewġha?

⁷ Eliżabetta wriet lealtà taʼ min ifaħħarha jerġaʼ b’mod ieħor. Meta twieled binha, Ġwanni, Żakkarija ma setax jitkellem għaliex kien immuta talli ddubita dak li qal l-​anġlu t’Alla. Imma Żakkarija b’xi mod żgur li rnexxielu juri lil martu li l-​anġlu taʼ Ġeħova kien qallu biex isemmi lit-​tifel “Ġwanni.” Il-​ġirien u l-​qraba riedu jsemmu lit-​tifel għal missieru. Imma Eliżabetta żammet lealment mad-​direzzjoni li taha żewġha. Hi qalet: “Le! Ismu jkun Ġwanni.”—Lq. 1:59-​63.

8, 9. (a) Il-​lealtà kif issaħħaħ żwieġ? (b) Liema huma xi modi speċifiċi kif raġel u mara miżżewġin jistgħu juru lealtà?

⁸ Bħal Żakkarija u Eliżabetta, il-​koppji miżżewġin illum jiffaċċjaw diżappunti u sfidi oħrajn. Żwieġ mingħajr lealtà ma jirnexxix. Il-​ksuħat mas-​sess oppost, il-​pornografija, l-​adulterju, u theddid ieħor għal żwieġ tajjeb jistgħu jeqirdu għalkollox il-​fiduċja fiż-​żwieġ. U meta din tisfaxxa fix-​xejn, l-​imħabba tibda tidbiel. B’xi modi, il-​lealtà hi bħal ħajt protettiv madwar id-​dar tal-​familja li jżomm il-​viżitaturi mhux mixtiqin u t-​theddid ’il barra mid-​dar, u jipprovdi ammont taʼ sigurtà lil dawk li jkunu fiha. Għalhekk, meta mara u raġel miżżewġin ikunu leali lejn xulxin, huma jkunu jistgħu jgħixu flimkien fis-​sigurtà, jiftħu qalbhom maʼ xulxin, u jħallu l-​imħabba tagħhom tikber. Iva, il-​lealtà hi vitali.

⁹ Ġeħova qal lil Adam: “Raġel iħalli lil missieru u lil ommu u jrid jingħaqad maʼ martu.” (Ġen. 2:24) Xi jfisser dan? Ir-​relazzjonijiet li kellhom qabel mal-​ħbieb u l-​qraba jridu jiġu aġġustati. L-​imseħbin iridu l-​ewwel jagħtu lil xulxin il-​ħin u l-​attenzjoni tagħhom. Il-​ħbieb u l-​qraba m’għadhomx jistgħu jieħdu l-​prijorità bil-​konsegwenza li l-​familja ġdida tiġi traskurata; u l-​koppja lanqas m’għandha tħalli l-​ġenituri jindaħlu fid-​deċiżjonijiet jew in-​nuqqas taʼ ftehim tal-​familja. Il-​koppja issa trid tingħaqad flimkien. Din hi d-​direzzjoni t’Alla.

10. X’jgħin lill-​imseħbin fiż-​żwieġ jikkultivaw il-​lealtà?

¹⁰ Anki fi djar fejn mhux kulħadd għandu l-​istess reliġjon, il-​lealtà ġġib il-​premjijiet. Oħt li r-​raġel tagħha mhuwiex tal-​istess twemmin tgħid: “Jien tassew grata lejn Ġeħova talli għallimni kif inkun sottomessa lejn żewġi u jkolli rispett profond lejh. Minħabba l-​lealtà kellna 47 sena taʼ mħabba u rispett kontinwi.” (1 Kor. 7:10, 11; 1 Pt. 3:1, 2) Għalhekk, aħdem iebes biex is-​sieħeb jew is-​sieħba tiegħek tħossha fis-​sigurtà. Bil-​kliem u l-​għemejjel tiegħek, ipprova sib modi kif taċċerta lis-​sieħeb jew lis-​sieħba tiegħek li għalik hu jew hi hija l-​iktar persuna importanti fuq l-​art. Sakemm jiddependi minnek, tħalli lil ħadd jew xejn jidħol bejnek u bejn martek jew żewġek. (Aqra Proverbji 5:15-​20.) Ron u Jeanette, li ilhom ferħanin fiż-​żwieġ tagħhom għal iktar minn 35 sena, jgħidu, “Minħabba li lealment nagħmlu dak li jeħtieġ Alla minna, aħna għandna żwieġ hieni u li rnexxa.”

L-​Unità Ssaħħaħ iż-​Żwieġ

11, 12. Akwila u Prixilla kif ikkooperaw (a) fid-​dar, (b) fix-​xogħol sekulari, u (ċ) fil-​ministeru Kristjan?

¹¹ Meta l-​appostlu Pawlu tkellem dwar il-​ħbieb tal-​qalb tiegħu, Akwila u Prixilla, hu kien dejjem isemmihom it-​tnejn flimkien. Din il-​koppja magħquda hija eżempju tajjeb taʼ dak li ried ifisser Alla meta qal li raġel u mara għandhom isiru “ġisem wieħed.” (Ġen. 2:24) Huma kienu dejjem jaħdmu flimkien f’darhom, fix-​xogħol sekulari tagħhom, u fil-​ministeru Kristjan tagħhom. Pereżempju, meta  Pawlu wasal Korintu għall-​ewwel darba, Akwila u Prixilla stidnuh b’qalb tajba biex joqgħod f’darhom, u milli jidher wara dan darhom saret il-​bażi tal-​attivitajiet tiegħu għal xi żmien. Iktar tard, f’Efesu, huma użaw darhom għal-​laqgħat tal-​kongregazzjoni u ħadmu flimkien biex jgħinu lil uħud ġodda, bħal Apollo, biex jikbru spiritwalment. (Atti 18:2, 18-​26) Din il-​koppja żeluża mbagħad marret Ruma, fejn għal darb’oħra fetħet darha għal-​laqgħat tal-​kongregazzjoni. Iktar tard, reġgħu lura Efesu biex isaħħu lill-​aħwa.—Rum. 16:3-​5.

¹² Għal xi żmien, Akwila u Prixilla ħadmu wkoll maʼ Pawlu fis-​sengħa li kellhom it-​tlieta li huma, dik li jagħmlu t-​tined. Għal darb’oħra nsibu l-​koppja flimkien, tikkoopera mingħajr kompetizzjoni jew ġlied. (Atti 18:3) Però, żgur li kien il-​ħin li qattgħu flimkien fl-​attivitajiet Kristjani li żammilhom livell għoli taʼ spiritwalità fiż-​żwieġ. Kemm jekk f’Korintu, f’Efesu, jew f’Ruma, huma saru magħrufin ħafna bħala ‘ħaddiema sħab fi Kristu Ġesù.’ (Rum. 16:3) Huma ħadmu spalla maʼ spalla biex imexxu ’l quddiem ix-​xogħol tal-​ippritkar tas-​Saltna kull fejn qdew.

13, 14. (a) Liema sitwazzjonijiet jistgħu jkissru l-​unità fiż-​żwieġ? (b) Liema huma xi affarijiet li jistgħu jagħmlu l-​imseħbin fiż-​żwieġ biex isaħħu r-​rabta tagħhom bħala “ġisem wieħed”?

¹³ Tabilħaqq, l-​unità fil-​miri u l-​attivitajiet issaħħaħ iż-​żwieġ. (Ekk. 4:9, 10) B’sogħba, ħafna koppji llum ftit iqattgħu ħin flimkien. Huma jaħdmu sigħat twal fix-​xogħlijiet differenti tagħhom. Oħrajn jivvjaġġaw fit-​tul għax-​xogħol sekulari tagħhom jew imorru waħedhom jaħdmu f’pajjiż ieħor biex jibagħtu l-​flus lura d-​dar. Anki meta jkunu d-​dar, xi mseħbin fiż-​żwieġ isibu ruħhom iżolati minn xulxin minħabba l-​ħin li jqattgħu fid-​delizzji, fl-​isports, fil-​logħob tal-​kompjuter, fuq l-​Internet, jew jaraw it-​televixin. Huwa dan minnu f’darek? Jekk iva, tistgħu intom taġġustaw iċ-​ċirkustanzi tagħkom biex tqattgħu iktar ħin flimkien? Xi ngħidu dwar li tagħmlu affarijiet taʼ kuljum flimkien bħal li tippreparaw l-​ikel, taħslu l-​platti, jew taħdmu fil-​ġnien? Tistgħu taħdmu flimkien intom u tieħdu ħsieb it-​tfal jew tgħinu lill-​ġenituri mdaħħlin fiż-​żmien?

¹⁴ L-​iktar importanti hu li tqattgħu l-​ħin flimkien regolarment f’attivitajiet konnessi mal-​qima lil Ġeħova. Meta tiddiskutu l-​iskrittura tal-​jum flimkien u tagħmlu l-​qima tal-​familja, ikollkom opportunitajiet mill-​aqwa biex iżżommu l-​ħsibijiet u l-​miri tal-​familja tagħkom magħqudin. Ukoll, ħudu sehem fil-​ministeru flimkien. Jekk inhu possibbli, ipprovaw aqdu bħala pijunieri flimkien, anki jekk iċ-​ċirkustanzi tagħkom jippermettulkom tagħmlu dan għal xahar jew sena waħda biss. (Aqra l-​1 Korintin 15:58.) Oħt li qdiet bħala pijuniera maʼ żewġha tgħid: “Il-​ministeru kien wieħed mill-​modi kif stajna nqattgħu l-​ħin flimkien u verament niftħu qalbna. Minħabba li t-​tnejn li aħna kellna l-​istess mira li ngħinu spiritwalment lil dawk li niltaqgħu magħhom fil-​ministeru, ħassejt li konna tim taʼ veru. Ħassejtni iktar qrib tiegħu mhux biss bħala żewġi imma wkoll bħala ħabib tal-​qalb.” Hekk kif taħdmu  flimkien f’miri mill-​aqwa, l-​interessi, il-​prijoritajiet, u d-​drawwiet tagħkom bil-​mod il-​mod se jsiru bħal taʼ xulxin, sakemm bħal Akwila u Prixilla tibdew taħsbu, tħossu, u taġixxu iktar u iktar bħal “ġisem wieħed.”

Ħalli l-​Ispiritwalità Tiggwidak

15. X’inhi l-​iktar ħaġa fundamentali biex żwieġ jirnexxi? Spjega.

¹⁵ Ġesù kien jaf kemm hu importanti li Alla jingħata l-​ewwel post fiż-​żwieġ. Hu ra lil Ġeħova jgħaqqad l-​ewwel koppja fiż-​żwieġ. Hu osserva kemm kienu henjin Adam u Eva sakemm baqgħu jsegwu d-​direzzjoni t’Alla, u ra b’għajnejh stess l-​inkwiet li ġabu meta injorawha. Allura, meta Ġesù għallem lil oħrajn, hu rrifletta l-​istruzzjoni taʼ Missieru li tinsab f’Ġenesi 2:24. Ukoll, hu żied dan il-​ħsieb: “Dak li Alla għaqqad flimkien ħa ma jifirdu ebda bniedem.” (Mt. 19:6) Għalhekk, rispett profond lejn Ġeħova għadu l-​iktar ħaġa fundamentali biex żwieġ ikun hieni u jirnexxi. Dwar dan, il-​ġenituri taʼ Ġesù fuq l-​art, Ġużeppi u Marija, ħallew eżempju li jispikka.

16. Ġużeppi u Marija kif urew spiritwalità fil-​ħajja tal-​familja tagħhom?

¹⁶ Ġużeppi ttratta lil Marija b’qalb tajba u rispett. Meta sar jaf li kienet tqila, hu ried jittrattaha bi ħniena, anki qabel ma l-​anġlu t’Alla spjegalu x’kien ġara lil Marija. (Mt. 1:18-​20) Bħala koppja, huma obdew id-​digriet taʼ Ċesari kif ukoll żammew mill-​qrib mal-​Liġi Mosajka. (Lq. 2:1-​5, 21, 22) U għalkemm kien meħtieġ mill-​irġiel biss li jattendu l-​festi reliġjużi l-​kbar f’Ġerusalemm, Ġużeppi u Marija, flimkien maʼ membri tal-​familja tagħhom, attendewhom kull sena. (Dt. 16:16; Lq. 2:41) B’dawn il-​modi u b’modi oħrajn, din il-​koppja devota lejn Alla kienet tistinka biex togħġob lil Ġeħova u wriet rispett profond lejn l-​affarijiet spiritwali. Mhux taʼ b’xejn li Ġeħova għażilhom biex jieħdu ħsieb lil Ibnu matul l-​ewwel parti tal-​ħajja taʼ Ġesù fuq l-​art.

17, 18. (a) B’liema modi tistaʼ koppja tpoġġi l-​ispiritwalità fl-​ewwel post fil-​familja? (b) Dan kif se jkun taʼ ġid għalihom?

¹⁷ Tiggwidakom l-​ispiritwalità b’mod simili fil-​ħajja tal-​familja tagħkom? Pereżempju, meta tieħdu deċiżjonijiet importanti, tfittxu l-​ewwel għal prinċipji Bibliċi, titolbu dwar il-​kwistjoni, u mbagħad tfittxu l-​parir taʼ Kristjan matur? Jew għandkom it-​tendenza li ssolvu l-​problemi billi timxu skont is-​sentimenti tagħkom stess jew tal-​familja u tal-​ħbieb? Tistinkaw biex tapplikaw il-​ħafna suġġerimenti prattiċi pubblikati mill-​ilsir leali dwar iż-​żwieġ u l-​ħajja tal-​familja? Jew issibu ruħkom sempliċement issegwu d-​drawwiet lokali jew il-​pariri sekulari li huma popolari? Titolbu u tistudjaw regolarment flimkien, tagħmlu miri spiritwali, u titkellmu dwar il-​prijoritajiet tal-​familja tagħkom?

¹⁸ Dwar il-​50 sena tagħhom fi żwieġ hieni, Ray jgħid, “Qatt ma kellna problema li ma stajniex negħlbuha, għaliex żammejna lil Ġeħova bħala parti mill-​‘ħabel bi tlieta’ tagħna.” (Aqra Ekkleżjasti 4:12.) Danny u Trina jaqblu maʼ dan. Huma jgħidu, “Hekk kif qdejna lil Alla flimkien, iż-​żwieġ tagħna ssaħħaħ.” Huma ilhom kuntenti fiż-​żwieġ tagħhom għal iktar minn 34 sena. Jekk dejjem tagħti lil Ġeħova l-​ewwel post fiż-​żwieġ tiegħek, hu se jgħinek tirnexxi u se jbierkek bil-​kbir.—Salm 127:1.

Kompli Rrispetta l-​Għotja t’Alla

19. Ġeħova għal pprovda l-​għotja taż-​żwieġ?

¹⁹ Ħafna llum jimpurtahom biss mill-​hena  persunali tagħhom. Imma qaddej taʼ Ġeħova jħares lejn l-​affarijiet minn lenti differenti. Hu jaf li Alla pprovda ż-​żwieġ bħala għotja biex jitwettaq l-​iskop Tiegħu. (Ġen. 1:26-​28) Kieku Adam u Eva wrew rispett lejn din l-​għotja, kieku l-​art kollha kienet issir ġenna mimlija qaddejja t’Alla henjin u ġusti.

20, 21. (a) Għala għandna nittrattaw iż-​żwieġ bħala li hu qaddis? (b) Dwar liema għotja se nistudjaw il-​ġimgħa d-​dieħla?

²⁰ Fuq kollox, il-​qaddejja t’Alla jħarsu lejn iż-​żwieġ bħala opportunità biex jigglorifikaw lil Ġeħova. (Aqra l-​1 Korintin 10:31.) Bħalma rajna, il-​lealtà, l-​unità, u l-​ispiritwalità huma kwalitajiet divini li jsaħħu ż-​żwieġ. Allura, kemm jekk qed inħejju għaż-​żwieġ, kemm jekk qed insaħħuh, u kemm jekk qed nipprovaw insalvawh, l-​ewwel irridu nħarsu lejn iż-​żwieġ bħala dak li hu tassew: arranġament divin u qaddis. Jekk inżommu din il-​verità f’moħħna se niġu mqanqlin biex nagħmlu l-​aħjar tagħna ħalli nieħdu deċiżjonijiet fiż-​żwieġ ibbażati fuq il-​Kelma t’Alla. B’dan il-​mod, mhux biss nuru rispett lejn l-​għotja taż-​żwieġ imma wkoll lejn id-​Donatur taʼ din l-​għotja, Alla Ġeħova.

²¹ M’għandniex xi ngħidu, iż-​żwieġ mhuwiex l-​unika għotja li tana Ġeħova; lanqas mhu l-​uniku mod kif nistgħu nkunu henjin f’ħajjitna. Fl-​artiklu tagħna li jmiss, se neżaminaw jerġaʼ għotja oħra prezzjuża mingħand Alla—l-​għotja tal-​fatt li wieħed ma jkunx miżżewweġ.

Int Kif Twieġeb?

• Il-​lealtà kif għandha teffettwa lill-​Kristjani miżżewġin?

• Għala jissaħħaħ iż-​żwieġ meta koppja taħdem flimkien f’unità?

• Liema huma xi modi kif il-​miżżewġin jistgħu jħallu l-​ispiritwalità tiggwidahom?

• Kif nistgħu nuru rispett lejn Ġeħova, l-​Oriġinatur taż-​żwieġ?

[Mistoqsijiet taʼ Studju]

[Stampi f’paġna 15]

Meta koppja taħdem flimkien tiġi megħjuna tibqaʼ f’unità