“Għal kollox għandi s-​saħħa permezz taʼ dak li jagħtini l-​qawwa.”—FLP. 4:13.

1. In-​nies taʼ Ġeħova għala jiffaċċjaw ħafna għawġ?

 IN-​NIES taʼ Ġeħova kemm-​il darba ffaċċjaw xi tip jew ieħor t’għawġ. Xi provi jiġu minħabba l-​imperfezzjonijiet tagħna stess jew huma konsegwenza tas-​sistema li ngħixu fiha. Oħrajn jiġu minħabba l-​għadwa li teżisti bejn dawk li jaqdu ’l Alla u dawk li ma jaqduhx. (Ġen. 3:15) Sa minn kmieni fl-​istorja umana, Alla għen lill-​qaddejja leali tiegħu biex iżommu sod kontra l-​persekuzzjoni reliġjuża, biex jirreżistu l-​pressjoni minn taʼ madwarhom li tagħmlilhom ħsara, u biex jissaportu kull tip t’għawġ ieħor. L-​ispirtu qaddis tiegħu jistaʼ jagħtina l-​qawwa biex nagħmlu dawn l-​istess affarijiet.

Megħjunin Biex Inżommu Sod Kontra l-​Persekuzzjoni Reliġjuża

2. X’inhu l-​iskop tal-​persekuzzjoni reliġjuża, u b’liema modi tistaʼ ssir?

² Il-​persekuzzjoni reliġjuża hija meta ssir ħsara fuq nies oħrajn jew jiġu maħqurin apposta minħabba l-​fidi jew it-​twemmin tagħhom. L-​iskop tagħha hu li telimina għalkollox dan it-​twemmin, iżżommu milli jinxtered, jew tikser l-​integrità taʼ dawk li jemmnu. Il-​persekuzzjoni għandha diversi forom, ftit minnhom isiru fil-​beraħ, oħrajn bil-​moħbi. Il-​Bibbja xxebbah l-​attakki taʼ Satana maʼ dawk taʼ ljun kif ukoll taʼ kobra.—Aqra Salm 91:13.

3. X’jikkaratterizza attakki bħal taʼ ljun u bħal taʼ kobra?

 ³ Bħal iljun salvaġġ, Satana spiss għamel attakki diretti fil-​beraħ permezz taʼ vjolenza, tfigħ fil-​ħabs, jew projbizzjoni. (Salm 94:20) Il-​Yearbook, li jiddeskrivi l-​attivitajiet tax-​Xhieda taʼ Ġeħova fi żminijiet moderni, fih diversi rakkonti taʼ kif Satana uża dawn il-​metodi. Marmalji bla liġi, xi drabi mmexxijin minn membri tal-​kleru jew fanatiċi tal-​politika, immaltrattaw lin-​nies t’Alla f’ħafna pajjiżi. Dawn l-​attakki bħal taʼ ljun ġiegħlu lil xi wħud ma jibqgħux jaqdu lil Ġeħova. Bħal kobra, ix-​Xitan ukoll jattakka lin-​nies minn post moħbi sabiex jivvelena l-​imħuħ u jqarraq bin-​nies ħalli jagħmlu r-​rieda tiegħu. Dan it-​tip t’attakk isir bil-​ħsieb li jdgħajjef il-​fidi tagħna jew iġegħelna nagħmlu kompromess. Permezz tal-​ispirtu qaddis t’Alla, aħna nistgħu nifilħu għaż-​żewġ forom taʼ persekuzzjoni.

4, 5. X’inhu l-​aħjar mod kif tipprepara għall-​persekuzzjoni, u għala? Agħti eżempju.

⁴ L-​immaġinazzjoni fuq tipi differenti taʼ persekuzzjoni futura li tistaʼ tinqalaʼ mhijiex l-​aħjar mod kif tipprepara għaliha. Il-​fatt hu li aħna sempliċement ma nistgħux inkunu nafu x’se jġib miegħu l-​futur, allura ma tantx jinkiseb ġid milli wieħed joqgħod jinkwieta dwar affarijiet li jafu qatt ma jiġru. Però, hemm xi ħaġa li nistgħu nagħmlu. Il-​biċċa l-​kbira minn dawk li ssaportew b’suċċess il-​persekuzzjoni rnexxielhom jagħmlu dan billi qagħdu jimmeditaw fuq l-​eżempji taʼ qaddejja leali taʼ Ġeħova, kif inhuma mniżżlin fl-​Iskrittura, kif ukoll fuq it-​tagħlim u l-​eżempju taʼ Ġesù. Dan għenhom ikabbru mħabbithom għal Ġeħova. Imbagħad, din l-​imħabba għenithom jirreżistu kwalunkwe prova li ffaċċjaw.

⁵ Ikkunsidra l-​eżempju taʼ tnejn minn ħutna nisa fil-​Malawi. Fi sforz biex iġegħluhom jixtru biljetti taʼ partiti politiċi, marmalja vjolenti sawtithom, neżżgħethom, u heddet li tistuprahom. Il-​marmalja gidbitilhom u qaltilhom li anki membri tal-​familja Betel kienu xtraw biljetti tal-​partit. L-​aħwa nisa kif wieġbu? “Aħna lil Alla Ġeħova biss naqdu. Għalhekk, ma tagħmel l-​ebda differenza għalina jekk l-​aħwa fl-​uffiċċju tal-​fergħa xtraw il-​biljetti. M’aħniex se nagħmlu kompromess, lanqas jekk toqtluna!” Wara li ħadu din il-​waqfa kuraġġuża, l-​aħwa nħelsu.

6, 7. Ġeħova kif jagħti l-​qawwa lill-​qaddejja tiegħu biex jiffaċċjaw il-​persekuzzjoni?

⁶ L-​appostlu Pawlu qal li l-​Kristjani f’Tessalonika kienu aċċettaw il-​messaġġ tal-​verità waqt li kienu għaddejjin minn “ħafna tribulazzjoni” imma għamlu dan “bil-​ferħ taʼ l-​ispirtu qaddis.” (1 Tess. 1:6) Tabilħaqq, ħafna Kristjani, kemm fil-​passat kif ukoll fil-​preżent, li ffaċċjaw u għelbu l-​persekuzzjoni jgħidu li fl-​iktar punt diffiċli tal-​provi tagħhom, huma gawdew paċi ġewwinija, aspett mill-​frott tal-​ispirtu qaddis t’Alla. (Gal. 5:22) Imbagħad, din il-​paċi għenet biex tgħasses lil qalbhom u l-​qawwa mentali tagħhom. Ġeħova tassew juża l-​forza attiva tiegħu biex jagħti l-​qawwa lill-​qaddejja tiegħu ħalli jkampaw mal-​provi u jaġixxu b’għaqal meta jiffaċċjaw l-​għawġ. a

⁷ Nies li josservawna baqgħu mbellhin bid-​determinazzjoni tan-​nies t’Alla li jżommu l-​integrità tagħhom anki meta dawn kienu wiċċ imb wiċċ maʼ persekuzzjoni ħarxa. Ix-​Xhieda kienu donnhom mimlijin b’saħħa sovrumana, u infatti hekk kienu. L-​appostlu Pietru jaċċertana: “Jekk qed jgħajrukom minħabba isem Kristu, henjin intom, għax l-​ispirtu tal-​glorja, iva, l-​ispirtu t’Alla, qed jistrieħ fuqkom.” (1 Pt. 4:14) Il-​fatt li aħna persegwitati talli nżommu mal-​livelli ġusti juri li aħna għandna l-​approvazzjoni t’Alla. (Mt. 5:10-​12; Ġw. 15:20) X’hena ġġibilna din it-​turija tal-​barka taʼ Ġeħova!

 Megħjunin Biex Nirreżistu l-​Pressjoni Minn taʼ Madwarna

8. (a) X’għen lil Ġożwè u Kaleb biex jirreżistu l-​pressjoni minn dawk taʼ madwarhom? (b) X’nistgħu nitgħallmu mill-​eżempju taʼ Ġożwè u Kaleb?

⁸ Forma iktar sottili tal-​oppożizzjoni li għandhom jissaportu l-​Kristjani hi l-​pressjoni minn taʼ madwarhom li tagħmlilhom il-​ħsara. Madankollu, peress li l-​ispirtu taʼ Ġeħova huwa bil-​wisq iktar qawwi mill-​ispirtu tad-​dinja, aħna nistgħu nirreżistu lin-​nies li jwaqqgħuna għaċ-​ċajt, li jxerrdu l-​gideb dwarna, jew li jipprovaw iġegħluna ninbidlu biex inkunu bħalhom. Pereżempju, x’għen lil Ġożwè u Kaleb biex ma jaqblux mal-​ħarsa tal-​għaxar spiji oħrajn li ntbagħtu fl-​art taʼ Kangħan? L-​ispirtu qaddis qanqal ġo fihom “spirtu,” jew inklinazzjoni mentali, differenti.—Aqra Numri 13:30; 14:6-​10, 24.

9. Il-​Kristjani għala għandhom ikunu lesti li jkunu differenti mill-​maġġuranza tan-​nies?

⁹ B’mod simili, l-​ispirtu qaddis ta l-​qawwa lill-​appostli taʼ Ġesù biex jobdu lil Alla minflok lil dawk li ħafna rrispettawhom bħala għalliema tar-​reliġjon vera. (Atti 4:21, 31; 5:29, 32) Il-​maġġuranza tan-​nies jippreferu jimxu mal-​kurrent, biex ngħidu hekk, ħalli jevitaw konfrontazzjoni, jew konflitt. Iżda, il-​Kristjani veri spiss ikollhom jieħdu waqfa għal dak li jafu li hu sewwa. Xorta waħda, grazzi għall-​qawwa li jirċievu mill-​forza attiva t’Alla, ma jibżgħux ikunu differenti. (2 Tim. 1:7) Ikkunsidra aspett wieħed li fih m’għandniex inċedu għall-​pressjoni minn taʼ madwarna.

10. Liema deċiżjoni forsi jkollhom jieħdu xi Kristjani?

¹⁰ Xi żgħażagħ forsi ma jkunux jafu x’se jaqbdu jagħmlu meta jsiru jafu li xi ħabib ħa sehem f’kondotta mhix Skritturali. Forsi jħossuhom li jekk jistaqsu lill-​anzjani biex jgħinu lill-​ħabib tagħhom, huma jkunu qed jitilfu l-​fiduċja li għandu l-​ħabib fihom; għalhekk, jirrifjutaw li jitkellmu minħabba lealtà żbaljata. Il-​midneb jistaʼ saħansitra jipprova jissikka lil ħbiebu biex ma jikxfux id-​dnub tiegħu lil oħrajn. Ovvjament, din it-​tip taʼ problema ma teffettwax liż-​żgħażagħ biss. Xi adulti wkoll għandhom mnejn isibuha diffiċli li javviċinaw lill-​anzjani tal-​kongregazzjoni dwar xi għemil ħażin taʼ ħabib jew membru tal-​familja. Imma Kristjani veri kif għandhom jirreaġixxu għal pressjoni bħal din?

11, 12. X’inhi l-​aħjar ħaġa li tistaʼ tagħmel jekk membru tal-​kongregazzjoni jħeġġek biex ma tikxifx id-​dnub tiegħu, u għala?

¹¹ Ġib quddiem għajnejk din is-​sitwazzjoni. Ejja ngħidu li Alex, ħu żagħżugħ, isir jaf li Steve, sieħbu fil-​kongregazzjoni, kellu l-​vizzju li jara l-​pornografija. Alex jgħid lil Steve li hu tassew inkwetat dwar dak li Steve qed jagħmel. Imma, Steve ma jagħtix kas dak li qed jgħidlu. Meta Alex iħeġġu biex jitkellem mal-​anzjani dwar dan, Steve jgħidlu li jekk huma tassew ħbieb ma jikxfux. Għandu jibżaʼ Alex li ħa jitlef lil sieħbu? Forsi jaħseb dwar lil min kieku jemmnu l-​anzjani jekk Steve jiċħad kollox. Xorta  waħda, is-​sitwazzjoni mhijiex se titjieb jekk Alex jibqaʼ sieket. Tabilħaqq, tistaʼ twassal biex Steve jitlef ir-​relazzjoni li għandu maʼ Ġeħova. Alex jagħmel tajjeb jekk jiftakar li “t-​tregħid mill-​bniedem huwa nassa, imma min jafda f’Ġeħova jkun protett.” (Prov. 29:25) X’jistaʼ jagħmel iktar Alex? Forsi bi mħabba jistaʼ jerġaʼ jmur fuq Steve u bla tlaqliq jitkellem miegħu dwar il-​problema. Dan jeħtieġ il-​kuraġġ. Iżda, jistaʼ jkun li din id-​darba Steve jilqaʼ l-​opportunità li jitkellem dwar il-​problema tiegħu. Alex imissu jerġaʼ jħeġġeġ lil Steve biex jitkellem mal-​anzjani u jgħidlu li jekk ma jagħmilx dan f’perijodu taʼ żmien raġunevoli, se jmur jgħidilhom hu.—Lev. 5:1.

¹² Jekk xi darba jkollok tittratta maʼ sitwazzjoni bħal din, għandu mnejn li għall-​ewwel il-​ħabib tiegħek ma japprezzax l-​isforzi tiegħek biex tgħinu. Imma maż-​żmien jistaʼ jirrealizza li dak li għamilt kien l-​aħjar ħaġa għalih. Jekk il-​midneb jirċievi u jaċċetta l-​għajnuna, imbagħad għandu mnejn ikun grat għal dejjem għall-​kuraġġ u l-​lealtà tiegħek. Min-​naħa l-​oħra, jekk jiħodha kontrik, taħseb li hu verament it-​tip taʼ ħabib li tixtieq? Li nogħġbu lill-​akbar Ħabib tagħna, Ġeħova, hu dejjem l-​aħjar ħaġa li nistgħu nagħmlu. Meta npoġġu lilu l-​ewwel, oħrajn li jħobbuh se jirrispettawna għal-​lealtà tagħna u jsiru l-​ħbieb veri tagħna. Qatt m’għandna nagħtu wisaʼ lix-​Xitan fil-​kongregazzjoni Kristjana. Li kieku kellna nagħmlu hekk inkunu tassew qed innikktu l-​ispirtu qaddis taʼ Ġeħova. Madankollu, aħna naħdmu fi qbil miegħu billi naħdmu biex inżommu l-​kongregazzjoni Kristjana pura.—Efes. 4:27, 30.

Mogħtijin il-​Qawwa Biex Nissaportu Kull Tip t’Għawġ

13. Liema tipi t’għawġ qed jiffaċċjaw in-​nies taʼ Ġeħova, u dawn l-​affarijiet għala huma tant komuni?

¹³ Hemm ħafna forom t’għawġ—problemi finanzjarji, telf t’impjieg, diżastri naturali, mewt taʼ xi ħadd maħbub, kriżi tas-​saħħa, u nistgħu nibqgħu sejrin. Ladarba ngħixu fi “żminijiet kritiċi,” nistgħu nistennew li f’xi żmien jew ieħor ilkoll kemm aħna se jkollna ngħaddu minn xi tip taʼ prova. (2 Tim. 3:1) Meta jiġri dan, huwa importanti li ma nippanikkjawx. L-​ispirtu qaddis jistaʼ jagħtina l-​qawwa biex nissaportu kwalunkwe tip t’għawġ.

14. X’saħħaħ lil Ġob biex jissaporti l-​għawġ tiegħu?

¹⁴ Ġob sofra prova wara oħra. Tilef il-​mezz t’għajxien, it-​tfal, il-​ħbieb, marad, u martu tilfet il-​fiduċja li kellha f’Ġeħova. (Ġob 1:13-​19; 2:7-​9) Madankollu, Ġob kellu lil Eliħu bħala farraġ veru. Il-​messaġġ t’Eliħu, u l-​punt prinċipali tal-​messaġġ li tah Ġeħova stess, kien: “Ieqaf ftit u oqgħod attent għall-​għemejjel meraviljużi t’Alla.” (Ġob 37:14) X’għen lil Ġob jissaporti l-​provi tiegħu? U x’jistaʼ jgħin lilna nissaportu? Nistgħu niġu megħjunin jekk niftakru u nimmeditaw fuq il-​modi differenti kif Ġeħova wera l-​ispirtu qaddis u l-​qawwa tiegħu. (Ġob 38:1-​41; 42:1, 2) Forsi nistgħu niftakru f’waqtiet f’ħajjitna stess meta rajna evidenza tal-​fatt li Ġeħova hu interessat fina personalment. Hu għadu interessat fina.

15. X’saħħaħ lil Pawlu ħalli jkun jistaʼ jissaporti l-​provi?

¹⁵ Minħabba l-​fidi tiegħu, l-​appostlu Pawlu ssaporta ħafna għawġ li kien taʼ periklu  għal ħajtu. (2 Kor. 11:23-​28) Kif żamm il-​bilanċ u baqaʼ stabbli emozzjonalment f’dawk iċ-​ċirkustanzi diffiċli? Billi straħ bit-​talb fuq Ġeħova. Matul dan iż-​żmien taʼ prova li milli jidher fl-​aħħar wassal għall-​mewta tiegħu bħala martri, Pawlu kiteb: “Il-​Mulej qagħad ħdejja u mlieni bil-​qawwa, biex permezz tiegħi l-​ippridkar jitwettaq bis-​sħiħ u l-​ġnus kollha jisimgħuh; u jien inħlist minn ħalq l-​iljun.” (2 Tim. 4:17) Għalhekk, mill-​esperjenza persunali tiegħu, Pawlu setaʼ jaċċerta lil sħabu fit-​twemmin li ma kien hemm għalfejn “ikunu ansjużi fuq xejn.”—Aqra Filippin 4:6, 7, 13.

16, 17. Agħti eżempji taʼ kif Ġeħova qed jagħti l-​qawwa lil niesu llum biex ikunu jistgħu jissaportu l-​għawġ.

¹⁶ Pijuniera jisimha Roxana hija waħda li esperjenzat kif Ġeħova jipprovdi għal niesu. Meta staqsiet lill-​imgħallem tagħha biex tieħu xi ġranet leave sabiex tkun tistaʼ tattendi waħda mill-​konvenzjonijiet tagħna, hu b’rabja wieġeb li jekk tmur, ikeċċiha. Roxana xorta waħda marret waqt li talbet bil-​ħeġġa li forsi tkun tistaʼ żżomm xogħolha. Wara dan ħassitha kalma. Eżatt kif kien heddidha, it-​Tnejn taʼ wara l-​konvenzjoni, l-​imgħallem tagħha keċċieha. Roxana kienet inkwetata ferm. Għalkemm dak ix-​xogħol ma tantx kien irendi flus, kellha bżonnu biex jgħinha tieħu ħsieb il-​familja tagħha. Reġgħet talbet u mmeditat fuq il-​fatt li Alla kien ipprovda b’mod spiritwali għaliha fil-​konvenzjoni, għalhekk hu żgur setaʼ jipprovdi għajnuna fiżika wkoll. Hekk kif kienet miexja lejn id-​dar, Roxana rat tabella b’informazzjoni dwar il-​bżonn taʼ ħaddiema tal-​esperjenza fuq magni industrijali tal-​ħjata, u applikat għall-​impjieg. Il-​maniġer induna li ma kellhiex esperjenza imma xorta waħda offrielha x-​xogħol, u l-​paga kienet kważi d-​doppju taʼ kemm kienet taqlaʼ qabel. Roxana ħasset li t-​talb tagħha twieġeb. Madankollu, l-​akbar barka kienet li setgħet taqsam l-​aħbar tajba maʼ xi wħud mill-​kollegi tagħha. Ħamsa minnhom, inkluż il-​maniġer, aċċettaw il-​verità u tgħammdu.

¹⁷ Xi kultant, forsi jidher li t-​talb tagħna mhux qed jitwieġeb—għall-​inqas mhux mill-​ewwel jew bil-​mod li stennejna. Jekk inhu hekk żgur li hemm raġuni tajba għal dan. Ġeħova jaf ir-​raġuni imma aħna forsi nifhmu għala biss fil-​futur. Minn ħaġa waħda nistgħu nkunu ċerti—Alla ma jabbandunax lil-​leali tiegħu.—Ebr. 6:10.

Megħjunin Biex Negħlbu l-​Provi u t-​Tentazzjonijiet

18, 19. (a) Għala nistgħu nistennew li niffaċċjaw il-​provi u t-​tentazzjonijiet? (b) Kif tistaʼ tiffaċċja l-​provi b’suċċess?

¹⁸ In-​nies taʼ Ġeħova ma jissorprendux ruħhom li jkollhom jiffaċċjaw it-​tentazzjoni, l-​iskuraġġiment, il-​persekuzzjoni, u l-​pressjoni minn taʼ madwarhom. Bażikament, id-​dinja tobgħodna. (Ġw. 15:17-​19) Imma, l-​ispirtu qaddis jistaʼ jgħinna negħlbu kwalunkwe sfida li niffaċċjaw fis-​servizz lil Alla. Ġeħova mhux se jħallina niġu ttantati iktar milli nifilħu. (1 Kor. 10:13) Hu żgur li qatt mhu se jitlaqna jew jabbandunana. (Ebr. 13:5) L-​ubbidjenza lejn il-​Kelma mnebbħa tiegħu tipproteġina u tqawwina. Minbarra dan, l-​ispirtu tiegħu jistaʼ jqanqal lil sħabna fit-​twemmin biex jagħtuna l-​għajnuna li neħtieġu meta jkollna bżonnha l-​iktar.

¹⁹ Jalla lkoll kemm aħna nibqgħu nfittxu l-​ispirtu qaddis permezz tat-​talb u l-​istudju tal-​Iskrittura. Jalla nkomplu ‘nsiru setgħana bil-​qawwa kollha li tiġi mis-​setgħa glorjuża t’Alla sabiex nissaportu bis-​sħiħ u nibqgħu nistabru bil-​ferħ.’—Kol. 1:11.

[Nota taʼ taħt]

Int Kif Twieġeb?

• Kif tistaʼ tipprepara biex iżżomm sod kontra l-​persekuzzjoni?

• Kif għandek tirreaġixxi jekk xi ħadd iħeġġek biex ma tikxifx xi għemil ħażin?

• Liema fiduċja jistaʼ jkollok meta tiffaċċja kwalunkwe tip t’għawġ?

[Mistoqsijiet taʼ Studju]

[Stampa f’paġna 28]

X’nistgħu nitgħallmu mill-​eżempju taʼ Ġożwè u Kaleb?

[Stampa f’paġna 29]

Kif tistaʼ tgħin lil ħabib li b’xi mod dineb?