Mogħtijin il-Qawwa Biex Nirreżistu t-Tentazzjoni u Nkampaw mal-Iskuraġġiment
“Meta l-ispirtu qaddis jiġi fuqkom tirċievu qawwa.”—ATTI 1:8.
1, 2. Liema għajnuna wiegħed Ġesù lid-dixxipli tiegħu, u għala kienu se jiġu bżonnha?
ĠESÙ kien jaf li d-dixxipli tiegħu ma setgħux josservaw kulma kien ikkmandahom bil-ħila tagħhom stess. Meta nqisu li kellhom jippritkaw f’ħafna artijiet, is-saħħa taʼ min kien jopponihom, u d-dgħufija tal-bniedem, kien jidher ċar li kellhom bżonn qawwa sovrumana. B’hekk, proprju qabel ma telaʼ s-sema, Ġesù aċċerta lid-dixxipli tiegħu: “Meta l-ispirtu qaddis jiġi fuqkom tirċievu qawwa u tkunu xhieda tiegħi f’Ġerusalemm u fil-Lhudija kollha u fis-Samarija u sa l-iktar parti mbiegħda taʼ l-art.”—Atti 1:8.
2 Din il-wegħda beda jkollha t-twettiq tagħha f’Pentekoste tas-sena 33 E.K. meta l-ispirtu qaddis ta l-qawwa lis-segwaċi taʼ Ġesù Kristu biex jimlew lil Ġerusalemm bl-ippritkar tagħhom. L-ebda oppożizzjoni ma setgħet twaqqfu. (Atti 4:20) Fil-“jiem kollha sal-konklużjoni tas-sistema,” is-segwaċi leali taʼ Ġesù, inkluż aħna, kien se jkollhom bżonn urġenti taʼ dik l-istess qawwa mogħtija minn Alla.—Mt. 28:20.
3. (a) Spjega d-differenza bejn l-ispirtu qaddis u l-qawwa. (b) Il-qawwa li jagħti Ġeħova x’tistaʼ tgħinna nagħmlu?
3 Ġesù wiegħed lid-dixxipli tiegħu li ‘meta l-ispirtu qaddis jiġi fuqhom jirċievu qawwa.’ Il-kelmtejn “spirtu” u “qawwa” huma differenti fit-tifsir tagħhom. L-ispirtu t’Alla, il-forza attiva tiegħu, huwa enerġija li toħroġ u taħdem fuq bnedmin jew affarijiet biex twettaq ir-rieda t’Alla. Madankollu, il-qawwa tistaʼ tiġi spjegata bħala “l-abbiltà li taġixxi jew tipproduċi effett.” Tistaʼ tkun inattiva f’xi ħadd jew f’xi ħaġa sakemm jinħass il-bżonn biex tipproduċi ċertu riżultat. Għalhekk, l-ispirtu qaddis jistaʼ jiġi mqabbel mal-kurrent elettriku li jagħti l-enerġija lil batterija li tistaʼ terġaʼ tiġi ċarġjata, filwaqt li l-qawwa tixbah iktar lill-enerġija li mbagħad tiġi maħżuna f’din il-batterija. Il-qawwa li Ġeħova jagħti lill-qaddejja tiegħu permezz tal-ispirtu qaddis tagħti lil kull wieħed u waħda minna l-abbiltà biex inwettqu d-dedikazzjoni Kristjana tagħna u, meta jkun hemm bżonn, biex nirreżistu l-forzi negattivi li huma użati kontrina.—Aqra Mikea 3:8; Kolossin 1:29.
4. X’se jiġi kunsidrat f’dan l-artiklu, u għala?
4 Kif inhi murija l-qawwa mogħtija lilna mill-ispirtu qaddis? Kif jistaʼ l-ispirtu qaddis iqanqalna biex naġixxu jew nirreaġixxu f’sitwazzjonijiet differenti? Hekk kif nipprovaw naqdu b’lealtà lil Alla, aħna niffaċċjaw ħafna ostakli li jiġu kaġunati jew minn Satana, jew mis-sistema tiegħu, jew mill-ġisem imperfett tagħna. Huwa importanti li negħlbu ostakli bħal dawn biex nipperseveraw bħala Kristjani, nieħdu sehem regulari fil-ministeru, u nżommu relazzjoni tajba maʼ Ġeħova. Ejja nikkunsidraw kif l-ispirtu qaddis jgħinna biex nirreżistu t-tentazzjoni u nkampaw mal-għeja u l-iskuraġġiment.
Mogħtijin il-Qawwa Biex Nirreżistu t-Tentazzjoni
5. It-talb kif jistaʼ jagħtina l-qawwa?
5 Ġesù għallem lis-segwaċi tiegħu biex jitolbu: “Iddaħħalniex fit-tentazzjoni, imma eħlisna mill-Ħażin.” (Mt. 6:13) Ġeħova mhux se jabbanduna lill-qaddejja leali tiegħu li jitolbu dan. F’okkażjoni oħra, Ġesù qal li “l-Missier li hu fis-sema [se] jagħti l-ispirtu qaddis lil dawk li jitolbuh.” (Lq. 11:13) Kemm tassigurana l-wegħda taʼ Ġeħova li jagħtina din il-forza biex nagħmlu dak li hu sewwa! M’għandniex xi ngħidu, dan ma jfissirx li Ġeħova se jwarrbilna t-tentazzjoni. (1 Kor. 10:13) Iżda meta niġu ttantati jkun il-waqt li saħansitra nitolbu b’iktar ħeġġa.—Mt. 26:42.
6. Ġesù fuq xiex ibbaża t-tweġibiet tiegħu għat-tentazzjonijiet taʼ Satana?
6 Bi tweġiba għat-tentazzjonijiet tax-Xitan, Ġesù kkwota xi skritturi. Il-Kelma t’Alla kienet ċara f’moħħ Ġesù meta wieġeb: “Hu miktub . . . Jerġaʼ hu miktub . . . Mur ’l hemm, Satana! Għax hu miktub, ‘Qim lil Ġeħova Alla tiegħek, u lilu biss agħti servizz sagru.’” Imħabba għal Ġeħova u l-Kelma tiegħu qanqlet lil Ġesù biex iwarrab it-tentazzjonijiet li t-Tentatur ġablu quddiemu. (Mt. 4:1-10) Wara li Ġesù b’mod ripetut irreżista t-tentazzjoni, Satana ħallieh.
7. Il-Bibbja kif tgħinna nirreżistu t-tentazzjoni?
7 Ladarba Ġesù fada fl-Iskrittura biex jirreżisti t-tentazzjonijiet tax-Xitan, kemm iżjed għandna nagħmlu hekk aħna! Tabilħaqq, il-kapaċità tagħna biex nirreżistu x-Xitan u r-rappreżentanti tiegħu tibda b’determinazzjoni li nkunu nafu l-livelli t’Alla u li nżommu bis-sħiħ magħhom. Ħafna nies tqanqlu biex jgħixu skont il-livelli tal-Bibbja hekk kif studjaw l-Iskrittura u waslu biex jifhmu u japprezzaw l-għerf u s-sewwa t’Alla. Tabilħaqq, “il-kelma t’Alla” hi qawwija u tistaʼ tagħraf “il-ħsibijiet u l-intenzjonijiet tal-qalb.” (Ebr. 4:12) Iktar ma wieħed jaqra u jimmedita fuq l-Iskrittura, iktar wieħed jistaʼ jikseb ‘dehen skond il-verità taʼ Ġeħova.’ (Dan. 9:13) Ladarba dan hu minnu, nagħmlu tajjeb jekk nimmeditaw fuq skritturi li jittrattaw dwar id-dgħufijiet speċifiċi tagħna.
8. Permezz taʼ xiex nistgħu niksbu l-ispirtu qaddis?
8 Flimkien maʼ li kien jaf l-Iskrittura, Ġesù setaʼ jirreżisti t-tentazzjoni għaliex hu kien “mimli bl-ispirtu qaddis.” (Lq. 4:1) Sabiex aħna jkollna l-istess saħħa u abbiltà għandna bżonn nersqu eqreb lejn Ġeħova billi nieħdu vantaġġ sħiħ mill-provvedimenti kollha li għamel biex jimliena bl-ispirtu tiegħu. (Ġak. 4:7, 8) Fost dawn hemm l-istudju tal-Bibbja, it-talb, u s-sħubija maʼ sħabna fit-twemmin. Ħafna apprezzaw ukoll il-benefiċċju taʼ li jżommu skeda mimlija b’attivitajiet Kristjani li tgħin biex iżżomm il-moħħ iffokat fuq ħsibijiet spiritwali li jibnu.
9, 10. (a) Liema tentazzjonijiet huma komuni fl-inħawi tiegħek? (b) Il-meditazzjoni u t-talb kif jistgħu jagħtuk il-qawwa biex tirreżisti t-tentazzjoni anki meta tinsab għajjien?
9 Liema ġibdiet biex tiżbalja għandek x’tirreżisti? Qatt ġejt imħajjar biex tiġbed lejk lil xi ħadd li mhuwiex ir-raġel jew il-mara tiegħek? Jekk m’intix miżżewweġ, qatt kellek ix-xewqa li taċċetta li toħroġ maʼ xi ħadd li mhuwiex tal-istess twemmin tiegħek? Il-Kristjani jistgħu f’daqqa waħda jiġu ttantati biex jaraw xi ħaġa maħmuġa waqt li jkunu jaraw it-televixin jew ikunu fuq l-Internet. Qatt ġralek dan, u jekk iva, kif irreaġixxejt? Ikun għaqli li timmedita fuq kif pass żbaljat jistaʼ jwassal għal ieħor u mbagħad għal għemil ħażin serju. (Ġak. 1:14, 15) Aħseb dwar l-uġigħ li att żleali kieku jġib fuq Ġeħova, il-kongregazzjoni, u l-familja tiegħek. Kuxjenza nadifa, min-naħa l-oħra, tiġi milli wieħed iżomm lealtà għal prinċipji divini. (Aqra Salm 119:37; Proverbji 22:3.) Kull meta tiffaċċja provi bħal dawn, kun determinat li titlob għas-saħħa biex tirreżistihom.
10 Hemm ħaġ’oħra x’tiftakar dwar it-tentazzjonijiet tax-Xitan. Satana avviċina lil Ġesù wara li Hu kien ilu sajjem għal 40 ġurnata fix-xagħri. Mingħajr dubju, għax-Xitan dan kien “ħin konvenjenti” b’mod partikulari biex jittestja l-integrità taʼ Ġesù. (Lq. 4:13) Satana jfittex ħinijiet konvenjenti biex jittestja l-integrità tagħna wkoll. Għalhekk, huwa vitali li nżommu ruħna b’saħħitna spiritwalment. Spiss, Satana jattakka meta jirrealizza li l-priża tiegħu tkun fl-iktar punt dgħajjef tagħha. Għalhekk, kull meta nħossuna għajjenin jew skuraġġiti, għandna nkunu determinati iktar minn qatt qabel biex nitolbu bil-qalb lil Ġeħova għall-għajnuna protettiva tiegħu u għall-ispirtu qaddis.—2 Kor. 12:8-10.
Mogħtijin il-Qawwa Biex Inkampaw mal-Għeja u l-Iskuraġġiment
11, 12. (a) Ħafna għala jħossuhom skuraġġiti llum? (b) X’jistaʼ jagħtina l-qawwa biex nirreżistu l-iskuraġġiment?
11 Minn żmien għal żmien, inħossuna skuraġġiti bħala bnedmin imperfetti. Dan jistaʼ jkun partikolarment minnu llum peress li ż-żmien li qed ngħixu fih huwa speċjalment mimli stress. Qed ngħaddu minn dawk li probabbli huma l-iktar żminijiet diffiċli li l-umanità inġenerali qatt esperjenzat s’issa. (2 Tim. 3:1-5) Hekk kif toqrob Armageddon, pressjonijiet ekonomiċi, emozzjonali, u oħrajn qed joktru. M’għandhiex tkun sorpriża mela, li xi wħud isibuha dejjem iżjed diffiċli biex iwettqu r-responsabbiltà li jieħdu ħsieb il-familji tagħhom u jipprovdu għalihom. Iħossuhom għajjenin, imtaqqlin, bla saħħa, u saħansitra eżawriti. Jekk dan hu minnu fil-każ tiegħek, kif tistaʼ tkampa mal-pressjoni?
12 Ftakar, Ġesù assigura lid-dixxipli tiegħu li kellu jagħtihom ajjutant—l-ispirtu qaddis t’Alla. (Aqra Ġwanni 14:16, 17.) Dan hu l-iktar forza qawwija fl-univers. Permezz tiegħu, Ġeħova jistaʼ jipprovdilna “bil-wisq iżjed” is-saħħa li għandna bżonn biex nissaportu kwalunkwe prova. (Efes. 3:20) L-appostlu Pawlu qal li billi nistrieħu fuq dan l-ispirtu, aħna nirċievu “qawwa iktar min-normal,” għalkemm aħna “magħfusin b’kull mod.” (2 Kor. 4:7, 8) Ġeħova ma jwegħedniex li jwarrbilna l-istress, iżda jaċċertana li permezz tal-ispirtu tiegħu se jagħtina s-saħħa biex inkampaw maʼ dan l-istress.—Flp. 4:13.
13. (a) Waħda żagħżugħa kif ġiet mogħtija l-qawwa biex tkampa maʼ sitwazzjoni diffiċli? (b) Taf b’xi eżempji bħal dan?
13 Ikkunsidra l-eżempju taʼ Stephanie, pijuniera regulari taʼ 19-il sena. Meta kellha 12-il sena tatha puplesija u sabu li kellha tumur f’rasha. Minn dak iż-żmien ’l hawn ġiet operata darbtejn, għamlulha r-raġġi, u għaddiet minn żewġ puplesiji oħrajn li ħallewha b’moviment limitat fuq in-naħa tax-xellug tagħha u b’vista batuta. Stephanie jkollha tibżaʼ għal saħħitha biex tieħu ħsieb l-affarijiet li hi tqishom bħala iktar importanti, bħal-laqgħat Kristjani u s-servizz tal-għalqa. Madankollu, hi tħoss l-idejn li jsaħħu taʼ Ġeħova fuqha u li jgħinuha tkampa b’ħafna modi. Il-pubblikazzjonijiet ibbażati fuq il-Bibbja li fihom esperjenzi taʼ Kristjani sħabna inkuraġġewha meta kienet imnikkta. L-aħwa appoġġawha billi bagħtulha ittri jew billi inkuraġġewha bi kliemhom qabel u wara l-laqgħat. Nies interessati qed juru l-apprezzament ukoll għal dak li Stephanie qed tgħallimhom billi jmorru d-dar tagħha biex jieħdu t-tagħlim mill-Bibbja. Għal dan kollu, Stephanie tħossha grata ferm lejn Ġeħova. L-iskrittura favorita tagħha hija Salm 41:3, li hi temmen li twettqet fil-każ tagħha.
14. X’għandna nevitaw meta nħossuna skuraġġiti, u għala?
14 Meta nkunu għajjenin jew taħt pressjoni m’għandna qatt nirraġunaw li l-mod kif nittrattaw mal-istress huwa billi nnaqqsu mill-attivitajiet spiritwali. Din tkun l-agħar ħaġa li qatt nistgħu nagħmlu. Għala? Għax attivitajiet bħall-istudju persunali u tal-familja, is-servizz tal-għalqa, u l-attendenza għal-laqgħat huma l-mezz li permezz tiegħu nirċievu spirtu qaddis li jagħtina l-enerġija spiritwali. Attivitajiet Kristjani dejjem huma rifreskanti. (Aqra Mattew 11:28, 29.) Spiss jiġri li l-aħwa jħossuhom għajjenin meta jiġu għal-laqgħat, iżda meta jasal il-ħin li jitilqu d-dar, donnu jidher li l-enerġija tagħhom ġiet imġedda u li l-batteriji spiritwali tagħhom ġew ċarġjati.
15. (a) Iwegħedna Ġeħova li m’hemmx bżonn nagħmlu sforz fil-ħajja Kristjana tagħna? Spjega b’mod Skritturali. (b) Xi jwegħedna Ġeħova, u dan iwassalna għal liema mistoqsija?
15 M’għandniex xi ngħidu, dan ma jfissirx li t-tagħbija taʼ li tkun dixxiplu Kristjan hija ħafifa. Jeħtieġ sforz biex tkun Kristjan leali. (Mt. 16:24-26; Lq. 13:24) Minkejja dan, permezz tal-ispirtu qaddis, Ġeħova jistaʼ jagħti s-saħħa lill-wieħed għajjien. “Dawk li jittamaw f’Ġeħova se jiksbu l-qawwa mill-ġdid,” kiteb il-profeta Isaija. “Se jogħlew bil-ġwienaħ bħall-ajkli. Jiġru u ma jinfilġux; jimxu u ma jegħjewx.” (Is. 40:29-31) Ladarba dan hu l-każ, nagħmlu tajjeb nistaqsu, X’inhi l-vera raġuni għala nħossuna għajjenin bl-attivitajiet Kristjani tagħna?
16. X’nistgħu nagħmlu biex neliminaw xi affarijiet li jistgħu jikkaġunaw l-għeja jew l-iskuraġġiment?
16 Il-Kelma taʼ Ġeħova tħeġġiġna biex ‘naċċertaw ruħna minn dak li hu iktar importanti.’ (Flp. 1:10) Billi jqabbel il-ħajja taʼ Kristjan maʼ tellieqa twila, taħt ispirazzjoni l-appostlu Pawlu ta l-parir: “Ħa nneħħu aħna wkoll kull piż . . . , u ħa niġru bis-sabar it-tiġrija li tqiegħdet quddiemna.” (Ebr. 12:1) Il-punt tiegħu kien li għandna nevitaw li niġru wara attivitajiet bla bżonn, piżijiet mhux meħtiġin, li jifilġuna. Jistaʼ jkun li wħud minna qegħdin sempliċement jipprovaw ideffsu żżejjed fil-ħajja li diġà hi mimlija. Għalhekk, jekk int spiss tħossok għajjien u taħt pressjoni, tistaʼ tibbenefika milli tara kemm qed tuża enerġija għax-xogħol sekulari, kemm spiss qed issiefer għall-gost, u kemm sforz ħabrieki qed tagħmel biex tieħu sehem fl-isports jew f’attivitajiet biex tirrilassa. Ir-raġunevolezza u l-modestja għandhom iqanqlu lil kull wieħed u waħda minna biex nirrikonoxxu l-limitazzjonijiet tagħna u nevitaw li jkollna ħafna impenji bla bżonn.
17. Xi wħud għala jħossuhom skuraġġiti, imma Ġeħova liema assiguranza jipprovdilna f’dan ir-rigward?
17 Jistaʼ jkun ukoll li wħud fostna jħossu xi ftit skuraġġiment għaliex it-tmiem taʼ din is-sistema ma ġiex malajr daqskemm stennejna. (Prov. 13:12) Madankollu, kull min iħossu hekk jistaʼ jkun inkuraġġit bil-kliem li nsibu f’Ħabakkuk 2:3: “Il-viżjoni qed tistenna ż-żmien stabbilit tagħha, u tibqaʼ tilheġ lejn it-tmiem, u mhix se tigdeb. Saħansitra jekk iddum, int ibqaʼ stennieha; għax se sseħħ żgur. Mhix se tkun tard.” Għandna l-assiguranza minn Ġeħova li t-tmiem taʼ din is-sistema se jiġi eżatt fil-ħin imwaqqat t’Alla!
18. (a) Liema wegħdiet isaħħuk? (b) L-artiklu li jmiss kif se jkun taʼ benefiċċju għalina?
18 Dażgur, il-qaddejja leali kollha taʼ Ġeħova jixxennqu għal dak il-jum meta ma jkunx hemm iżjed għeja u skuraġġiment, meta kull min ikun ħaj igawdi l-“enerġija taż-żgħożija.” (Ġob 33:25) Anki issa nistgħu nissaħħu minn ġewwa permezz tal-azzjoni tal-ispirtu qaddis hekk kif nipparteċipaw f’attivitajiet spiritwali li jagħtuna l-enerġija. (2 Kor. 4:16; Efes. 3:16) Tħallix l-għeja twaqqfek milli jkollok barkiet eterni. Kull prova—kemm jekk kaġunata b’xi tentazzjoni, bl-għeja, jew bl-iskuraġġiment—se tgħaddi, jekk mhux fil-pront, mela fid-dinja ġdida t’Alla. Fl-artiklu li jmiss se naraw kif l-ispirtu qaddis jagħti l-qawwa lill-Kristjani biex iżommu sod kontra l-persekuzzjoni, biex jirreżistu l-pressjoni minn taʼ madwarhom, u biex jissaportu kull tip t’għawġ ieħor.
Int Kif Twieġeb?
• Il-qari tal-Bibbja kif jagħtina l-qawwa?
• It-talb u l-meditazzjoni kif jagħtuna l-qawwa?
• X’tistaʼ tagħmel biex telimina xi affarijiet li jistgħu jikkaġunaw l-iskuraġġiment?
[Mistoqsijiet taʼ Studju]
[Stampa f’paġna 24]
Il-laqgħat Kristjani jistgħu jagħtuna l-enerġija spiritwali