“Se nħalli . . . poplu umli u ġwejjed, u huma se jistkennu fl-​isem taʼ Ġeħova.”—SOF. 3:12.

1, 2. Liema maltempata figurattiva se tolqot lill-​umanità dalwaqt?

 ĠIELI kellek tistkenn minn maltempata bix-​xita jew bis-​silġ billi ssib kenn, bħal taħt xi pont? Pont kapaċi jipprovdilek il-​kenn meħtieġ għal waqt maltempata bix-​xita jew bis-​silġ, imma probabbilment ma tantx se jipprovdi protezzjoni minn xi riefnu jew uragan.

² Tip differenti taʼ maltempata tinsab riesqa—waħda li thedded l-​istess eżistenza tal-​umanità. Dan hu “jum taʼ maltempata” figurattiv. Dan “il-​jum il-​kbir taʼ Ġeħova” se jeffettwa lill-​umanità kollha. Madankollu, nistgħu nsibu l-​kenn li neħtieġu. (Aqra Sofonija 1:14-​18.) Kif nistgħu nagħmlu dan matul “jum il-​qilla taʼ Ġeħova” li se jibda dalwaqt?

Żmien taʼ Maltemp fi Żminijiet Bibliċi

3. Liema “maltempata bir-​ragħad” ġiet fuq is-​saltna t’Iżrael b’għaxar tribujiet?

³ Il-​jum taʼ Ġeħova se jfaqqaʼ bil-​qerda tar-​reliġjon falza kollha fuq l-​art. Biex inkunu nafu kif insibu kenn, nistgħu nfittxu għat-​tweġiba fl-​istorja tal-​poplu t’Alla tal-​qedem. Isaija, li kien jgħix fit-​tmien seklu Q.E.K., xebbah il-​ġudizzju taʼ Ġeħova fuq is-​saltna apostata t’Iżrael b’għaxar tribujiet maʼ “maltempata bir-​ragħad” li n-​nies ma setgħux iwaqqfuha. (Aqra Isaija 28:1, 2.) Din il-​profezija kellha l-​ewwel twettiq tagħha fis-​sena 740 Q.E.K., meta l-​Assirja invadiet l-​art taʼ dawn it-​tribujiet, u Efrajm kien l-​iktar tribù prominenti minnhom kollha.

4. ‘Jum kbir taʼ Ġeħova’ kif laqat lil Ġerusalemm fis-​sena 607 Q.E.K.?

⁴ Il-​ġudizzju kontra Iżrael li ma kienx leali ġie segwit minn ‘jum kbir taʼ Ġeħova’ kontra Ġerusalemm u s-​saltna taʼ Ġuda fis-​sena 607 Q.E.K. Din il-​ġrajja seħħet minħabba li l-​poplu taʼ Ġuda wkoll kien sar apostata. Il-​Babiloniżi taħt Nebukadnessar heddew lil Ġuda u l-​kapitali tagħha Ġerusalemm. In-​nies taʼ Ġuda fittxew l-​għajnuna mingħand “il-​kenn tal-​gidba,” jiġifieri, mingħand l-​alleanza politika tagħhom mal-​Eġittu. Minkejja dan, bħal maltempata qerrieda, il-​Babiloniżi kaxkru ’l hemm lil dan il-​“kenn.”—Is. 28:14, 17.

5. X’se jiġrilu l-​poplu t’Alla bħala grupp matul il-​qerda tar-​reliġjon falza kollha kemm hi?

 ⁵ Il-​jum il-​kbir taʼ Ġeħova li laqat lil Ġerusalemm kien juri bil-​quddiem il-​ġudizzju li ġej fuq il-​Kristjaneżmu apostata fi żmienna. Barra minn hekk, il-​bqija taʼ “Babilonja l-​Kbira,” l-​imperu dinji taʼ reliġjon falza, se tinqered. Wara dan, dak li jibqaʼ mis-​sistema mill-​agħar taʼ Satana se jinqered. Imma l-​poplu t’Alla bħala grupp se jsalva minħabba li qed jistkenn f’Ġeħova.—Riv. 7:14; 18:2, 8; 19:19-​21.

Kenn Spiritwali u Fiżiku

6. Il-​poplu taʼ Ġeħova kif jistaʼ jsib kenn?

⁶ Il-​poplu t’Alla kif jistaʼ jsib kenn anki issa f’dan iż-​żmien tat-​tmiem? Aħna nsibu kenn spiritwali billi bit-​talb ‘naħsbu fuq isem Alla’ u billi naqduh biż-​żelu. (Aqra Malakija 3:16-​18.) Imma hemm bżonn nifhmu li rridu nagħmlu iktar milli sempliċement naħsbu fuq ismu. Naqraw: “Kulmin isejjaħ isem Ġeħova jiġi salvat.” (Rum. 10:13) Hemm rabta bejn li nsejħu isem Ġeħova u s-​salvazzjoni minnu li tirriżulta minn dan. U ħafna nies taʼ qalb onesta jistgħu jaraw id-​differenza bejn il-​Kristjani veri, li b’devozzjoni qed “jaħsbu fuq ismu” u jaqdu bħala Xhieda tiegħu, u dawk mill-​bnedmin li mhumiex jaqduh.

7, 8. Il-​Kristjani tal-​ewwel seklu b’liema mod esperjenzaw salvazzjoni fiżika, u liema xebh hemm fi żmienna?

⁷ Minkejja dan, is-​salvazzjoni disponibbli għalina mhijiex biss kenn spiritwali. Alla jwiegħed salvazzjoni fiżika lill-​poplu tiegħu. Naraw dan minn dak li seħħ fis-​sena 66 E.K. wara li armata Rumana taħt Ċestju Gallu attakkat lil Ġerusalemm. Ġesù kien bassar li l-​jiem taʼ din it-​tribulazzjoni kellhom ‘jitqassru.’ (Mt. 24:15, 16, 21, 22) Dan seħħ meta l-​forzi Rumani abbandunaw l-​assedju tal-​belt bla mistenni, u dan ippermetta li xi ‘bnedmin,’ jiġifieri l-​Kristjani veri, setgħu ‘jiġu salvati.’ Huma setgħu jaħarbu mill-​belt u mill-​inħawi taʼ madwarha. Xi wħud qasmu l-​Ġordan u sabu kenn fil-​muntanji fin-​naħa tal-​Lvant taʼ din ix-​xmara.

⁸ Nistgħu nagħmlu xebh bejn dawk il-​Kristjani u l-​poplu t’Alla llum. Fil-​passat, il-​Kristjani tal-​ewwel seklu fittxew kenn, u l-​qaddejja t’Alla llum se jagħmlu l-​istess. Però, din id-​darba mhux se jinvolvi li jaħarbu lejn post speċifiku, għaliex il-​Kristjani veri jinsabu madwar id-​dinja kollha. Xorta waħda, bħala poplu, “il-​magħżulin” u l-​imseħbin leali tagħhom se jsalvaw fiżikament mit-​tmiem tal-​Kristjaneżmu apostata billi jistkennu f’Ġeħova u fl-​organizzazzjoni tiegħu li qisha muntanja.

9. Min ipprova jnissi l-​isem taʼ Ġeħova? Agħti eżempju.

⁹ Mill-​banda l-​oħra, il-​Kristjaneżmu jistħoqqlu l-​qerda li ġejja talli l-​mexxejja tiegħu m’għallmux il-​verità dwar Alla u l-​prinċipji tiegħu lin-​nies li jmorru l-​knisja u talli wera mibegħda lejn isem Alla. Fil-​Medju Evu, l-​isem persunali t’Alla kien magħruf sew fl-​Ewropa. Dan l-​isem, rappreżentat minn erbaʼ ittri Ebrajċi li jissejħu t-​Tetragrammaton u normalment tradotti letteralment bħala JĦWH, kont issibu fuq il-​muniti, il-​faċċati tad-​djar, f’ħafna kotba u Bibbji, u anki f’xi knejjes Kattoliċi u Protestanti. Però, dan l-​aħħar daħlet id-​drawwa li l-​isem t’Alla jitneħħa minn traduzzjonijiet Bibliċi u minn affarijiet oħrajn. Indikazzjoni waħda taʼ dan hi l-​Ittra lill-​Konferenzi tal-​Isqfijiet dwar ‘l-​Isem t’Alla,’ bid-​data tad-​29 taʼ Ġunju, 2008, maħruġa mill-​Kongregazzjoni għall-​Qima Divina u d-​Dixxiplina tas-​Sagramenti. Fiha, il-​Knisja Kattolika Rumana tat il-​parir li minflok it-​Tetragrammaton bit-​traduzzjonijiet diversi tagħha għandha titpoġġa l-​kelma “Mulej.” Il-​Vatikan ta l-​istruzzjoni li l-​isem persunali t’Alla la għandu jiġi użat u lanqas pronunzjat fl-​attivitajiet,  l-​għanjiet, u t-​talb reliġjuż Kattoliku. U l-​mexxejja taʼ reliġjonijiet oħrajn fil-​Kristjaneżmu u reliġjonijiet oħrajn ukoll ħbew l-​identità tal-​Alla l-​veru mill-​ħafna miljuni t’aduraturi.

Protezzjoni Għal Dawk li Jqaddsu l-​Isem t’Alla

10. Isem Alla kif qed jingħata unur illum?

¹⁰ B’differenza li tassew tispikka għal dak li jagħmlu reliġjonijiet oħrajn, ix-​Xhieda taʼ Ġeħova jonoraw u jigglorifikaw l-​isem divin. Huma jqaddsuh billi jużawh b’mod li juri rispett. Ġeħova jieħu pjaċir b’dawk li jafdaw fih, u hu jsir kulma hu meħtieġ biex ibierek u jipproteġi l-​poplu tiegħu. Hu “jaf b’dawk li jfittxu l-​kenn fih.”—Naħ. 1:7; Atti 15:14.

11, 12. Min appoġġa l-​isem taʼ Ġeħova f’Ġuda tal-​qedem, u min għamel dan fiż-​żmien tal-​lum?

¹¹ Għalkemm il-​maġġuranza min-​nies tal-​ġens taʼ Ġuda tal-​qedem kienu saru apostati, kien hemm xi wħud li ‘stkennew fl-​isem taʼ Ġeħova.’ (Aqra Sofonija 3:12, 13.) Iva, meta Alla kkastiga l-​art taʼ Ġuda li kienet bla fidi billi ħalla l-​Babiloniżi jirbħulha u jieħdu l-​poplu tagħha fil-​jasar, xi individwi bħal Ġeremija, Baruk, u Għebed-​melek, ġew meħlusin. Huma għexu ‘f’nofs’ ġens apostata. Oħrajn baqgħu leali meta kienu fil-​jasar. Fis-​sena 539 Q.E.K., il-​Medi u l-​Persjani taħt Ċiru rebħu lil Babilonja. Ċiru ma damx ma ħareġ digriet li ppermetta li fdal tal-​Lhud imur lura pajjiżu.

¹² Dwar dawk li kienu se jgawdu dan it-​tiġdid tal-​qima vera, Sofonija bassar li Ġeħova kien se jsalvahom u jifraħ bihom. (Aqra Sofonija 3:14-​17.) Dan seħħ fi żmienna wkoll. Wara li s-​Saltna t’Alla ġiet stabbilita fis-​sema, Ġeħova ħeles lill-​fdal leali tal-​midlukin minn jasar spiritwali f’Babilonja l-​Kbira. U hu għadu jifraħ bih sal-​lum.

13. Liema ħelsien qed jesperjenzaw in-​nies tal-​ġnus kollha?

¹³ Dawk li jittamaw li jgħixu għal dejjem fuq l-​art ukoll ħarġu minn Babilonja l-​Kbira u jgawdu ħelsien spiritwali minn tagħlim reliġjuż falz. (Riv. 18:4) Għalhekk, Sofonija 2:3 għandu l-​akbar twettiq fi żmienna: “Fittxu lil Ġeħova, intom il-​ġwejdin kollha taʼ l-​art.” Il-​ġwejdin tal-​ġnus kollha, kemm jekk għandhom it-​tama għas-​sema u kemm jekk għall-​art, issa qed jistkennu fl-​isem taʼ Ġeħova.

L-​Isem t’Alla Mhuwiex Xi Taliżman

14, 15. (a) Xi wħud x’qiesu u użaw bħala taliżmani? (b) X’m’għandux jintuża bħala oġġett li jġib il-​fortuna?

¹⁴ Xi Iżraelin kienu jqisu t-​tempju bħala taliżman, jew oġġett li jġib ir-​risq, li kien se jipproteġihom mill-​għedewwa. (Ġer. 7:1-​4) Iktar kmieni, l-​Iżraelin kienu jqisu l-​arka tal-​patt bħala oġġett li jġib il-​fortuna u li kien se jipproteġihom fil-​gwerer. (1 Sam. 4:3, 10, 11) Kostantinu l-​Kbir pinġa l-​ittri Griegi ki u ro, l-​ewwel żewġ ittri tat-​titlu “Kristu” bil-​Grieg, fuq it-​tarki tas-​suldati tiegħu bit-​tama li jipproteġihom matul il-​battalja. U huwa maħsub li s-​Sultan Gustavu Adolfu II tal-​Isvezja, li ġġieled fil-​Gwerra taʼ Tletin Sena, libes l-​armatura murija f’paġna 7. Tistaʼ tara li l-​isem “Iehova” tpoġġa fejn jispikka fuq din il-​biċċa armatura.

¹⁵ Xi wħud min-​nies t’Alla li ġew attakkati mid-​demonji sabu kenn f’Ġeħova billi għajtulu b’leħen għoli. Xorta waħda, oġġett li jkollu l-​isem t’Alla m’għandux jitqies bħala taliżman jew jintuża bħala oġġett li jġib il-​fortuna fil-​ħajja taʼ kuljum bħallikieku kellu xi qawwa maġika taʼ protezzjoni. Li nistkennu f’isem Ġeħova ma jfissirx dan.

Kif Nistkennu Llum

16. Kif nistgħu nistkennu spiritwalment illum?

¹⁶ Illum insibu kenn fis-​sigurtà spiritwali li jgawdi l-​poplu taʼ Ġeħova kollu kemm hu. (Salm 91:1) Permezz tal-​“ilsir leali u għaqli” u l-​anzjani fil-​kongregazzjoni aħna niġu  mwissijin dwar tendenzi tad-​dinja li jistgħu jipperikolaw din is-​sigurtà. (Mt. 24:45-​47; Is. 32:1, 2) Aħseb dwar kemm-​il darba ġejna mwissijin dwar il-​materjaliżmu u aħseb dwar kif dawn it-​twissijiet ipproteġewna mill-​gwaj spiritwali. U xi ngħidu għall-​periklu li niżviluppaw attitudni indifferenti li tistaʼ twassal biex aħna nsiru inattivi fis-​servizz taʼ Ġeħova? Il-​Kelma t’Alla tgħid: “L-​indifferenza taʼ l-​istupidi teqridhom. Imma min jismaʼ minni jgħammar fis-​sigurtà u ma jinkwetax mill-​biżaʼ taʼ xi gwaj.” (Prov. 1:32, 33) Aħna niġu megħjunin ukoll biex inżommu s-​sigurtà spiritwali tagħna jekk nistinkaw biex nibqgħu nodfa moralment.

17, 18. X’inhu jgħin lil miljuni taʼ wħud jistkennu f’isem Ġeħova llum?

¹⁷ Aħseb ukoll dwar l-​inkuraġġiment mill-​ilsir leali biex insegwu l-​kmand taʼ Ġesù biex nippritkaw l-​aħbar tajba tas-​Saltna fl-​art abitata kollha. (Mt. 24:14; 28:19, 20) Sofonija semma bidla li kienet se tgħin lin-​nies isibu kenn fl-​isem t’Alla. Naqraw: “Għax f’dak iż-​żmien se nagħti lill-​popli l-​bidla għal lingwa pura, biex ilkoll isejħu isem Ġeħova, biex jaqduh spalla maʼ spalla.”—Sof. 3:9.

¹⁸ X’inhi din il-​lingwa pura? Il-​lingwa pura hi l-​verità dwar Alla Ġeħova u l-​iskopijiet tiegħu kif insibuhom fil-​Kelma ispirata tiegħu. Int f’ċertu sens tkun qed tuża din il-​lingwa meta taqsam m’oħrajn il-​fehma eżatta dwar is-​Saltna t’Alla u kif se tqaddes ismu, meta tenfasizza d-​dritt t’Alla li jkun is-​Sovran, u meta b’ferħ titkellem dwar il-​barkiet dejjiema li se jgawdu l-​bnedmin leali. Minħabba li hawn tant uħud li qed jitkellmu din il-​lingwa figurattiva, għadd li dejjem jikber qed “isejħu isem Ġeħova” u “jaqduh spalla maʼ spalla.” Iva, miljuni madwar id-​dinja issa qed isibu kenn f’Ġeħova.—Salm 1:1, 3.

19, 20. Fi żminijiet Bibliċi, dawk li wrew fiduċja fil-​“kenn tal-​gidba” kif ġew diżappuntati?

¹⁹ In-​nies fid-​dinja jkollhom ikampaw maʼ problemi li mill-​ħarsa tagħhom ma jistgħux jegħlbuhom. Iddisprati biex isolvu l-​problemi tagħhom, ħafna jfittxu l-​għajnuna taʼ bnedmin imperfetti. Jew jittamaw għal soluzzjonijiet minn organizzazzjonijiet politiċi, sewwasew bħalma Iżrael tal-​qedem kultant kien ifittex l-​appoġġ tal-​ġnus taʼ madwaru, u kien jagħmel alleanza magħhom. Madankollu, int taf li Iżrael ma ġiex megħjun meta għamel dan. U ebda stat politiku llum mhu se jsolvi għalkollox il-​problemi tal-​umanità, lanqas l-​organizzazzjoni tal-​Ġnus Magħquda. Allura, għala għandu individwu jħares lejn l-​organizzazzjonijiet politiċi u l-​alleanza maʼ ġnus oħrajn bħala kenn? B’mod profetiku, il-​Bibbja ssejħilhom “kenn tal-​gidba.” Tagħmel sew tħares lejhom b’dan il-​mod għaliex kull min jittama fihom se jkun diżappuntat għall-​aħħar.—Aqra Isaija 28:15, 17.

²⁰ Dalwaqt il-​maltempata bis-​silġ figurattiva tal-​jum taʼ Ġeħova se tolqot id-​dinja. L-​iskemi tal-​bnedmin mhux se jkunu jistgħu  jipprovdu protezzjoni; lanqas il-​postijiet li joffru protezzjoni mill-​attakki nukleari jew l-​għana mhu se jagħmel dan. Isaija 28:17 jgħid: “Is-​silġ irid jiknes il-​kenn tal-​gidba, u l-​ilmijiet se jgħarrqu l-​moħba.”

21. Liema benefiċċji nistgħu ngawdu jekk insegwu l-​parir tal-​iskrittura għas-​sena 2011?

²¹ Kemm issa u kemm matul dan l-​iżvilupp fil-​futur, il-​poplu t’Alla se jsib sigurtà vera fl-​Alla tagħhom, Ġeħova. Isem Sofonija, li jfisser “Ġeħova Ħeba,” jurina li dan hu s-​sors veru fejn nistgħu nsibu kenn. Huwa xieraq li għandna l-​parir għaqli, ‘stkenn fl-​isem taʼ Ġeħova’ bħala l-​iskrittura għas-​sena 2011. (Sof. 3:12) Anki issa, nistgħu nsibu kenn f’isem Ġeħova billi nafdaw fih għalkollox, u hekk għandna nagħmlu. (Salm 9:10) Ejja kuljum inżommu f’moħħna din l-​assiguranza ispirata: “Isem Ġeħova hu torri b’saħħtu. Fih jidħol jiġri l-​ġust u jingħata l-​protezzjoni.”—Prov. 18:10.

Tiftakar Int?

• Kif nistgħu nsibu kenn f’isem Ġeħova minn issa?

• Għala m’għandniex nafdaw fil-​“kenn tal-​gidba”?

• Minn liema kenn aħna żgurati fil-​futur?

[Mistoqsijiet taʼ Studju]

[Kumment f’paġna 6]

L-​iskrittura għas-​sena 2011 hi: ‘Stkenn fl-​isem taʼ Ġeħova.’ —Sofonija 3:12.

[Sors tal-istampa f’paġna 7]

Thüringer Landesmuseum Heidecksburg Rudolstadt, Waffensammlung “Schwarzburger Zeughaus”