Għandek Raġuni għall-Hena
MILL-IĊKEN ċellula ħajja sal-galassji enormi fi gruppi kbar u oħrajn ġganteski, naraw li l-ħolqien fih l-ordni. Dan żgur li ma jissorprendiniex, għax il-Ħallieq “m’huwiex Alla tad-diżordni.” (1 Kor. 14:33) L-arranġament t’Alla għall-qima huwa impressjonanti wkoll. Ikkunsidra dak li Ġeħova għamel. Hu għaqqad f’organizzazzjoni universali waħda mijiet taʼ miljuni taʼ ħlejjaq intelliġenti, kemm fuq l-art kif ukoll fis-sema, li għandhom rieda ħielsa u li huma magħqudin fil-qima pura. X’meravilja!
F’Iżrael tal-qedem, il-parti tal-organizzazzjoni t’Alla fuq l-art kienet simbolizzata minn Ġerusalemm, fejn kien hemm it-tempju taʼ Ġeħova u s-sultan midluk minnu. Priġunier Iżraeli f’Babilonja esprima s-sentimenti tiegħu għall-belt qaddisa b’dan il-mod: “Ħa jeħilli lsieni mas-saqaf taʼ ħalqi, jekk ma niftakarx fik, jekk Ġerusalemm ma tkunx għalija l-akbar raġuni għall-hena.”—Salm 137:6.
Int hekk tħossok dwar l-organizzazzjoni t’Alla llum? Iġġiblek iktar hena minn kwalunkwe ħaġa oħra? Jifhmu wliedek l-istorja u l-funzjoni tal-parti tal-organizzazzjoni t’Alla fuq l-art? Jifhmu li huma parti minn fratellanza globali tax-Xhieda taʼ Ġeħova u jqisuh taʼ valur dan? (1 Pt. 2:17) Għala ma tużax is-suġġerimenti li ġejjin fil-lejla tal-Qima tal-Familja tiegħek sabiex issaħħaħ l-apprezzament tal-familja tiegħek għall-organizzazzjoni taʼ Ġeħova?
Irrakkonta Dwar “Żmien il-Qedem”
Kull sena, familji Iżraelin kienu jiltaqgħu biex jiċċelebraw il-Qbiż. Meta twaqqfet din il-festa, Mosè istruwixxa lill-poplu: “Fil-każ li ibnek jistaqsik iktar tard u jgħidlek, ‘Dan xi jfisser?’ int trid tgħidlu, ‘Bis-saħħa taʼ idu Ġeħova ħariġna mill-Eġittu, minn dar l-ilsiera.’” (Eżo. 13:14) Dak li Ġeħova għamel mal-Iżraelin ma kellux jintesa. Żgur li ħafna missirijiet Iżraelin segwew il-kmand taʼ Mosè. Ġenerazzjonijiet wara, Iżraeli talab: “O Alla, smajna b’widnejna, missirijietna rrakkontawlna dak li għamilt fi żmienhom, fi żmien il-qedem.”—Salm 44:1.
Għal xi ħadd żgħir illum, l-istorja tax-Xhieda taʼ Ġeħova matul, bejn wieħed u ieħor, l-aħħar 100 sena wkoll tistaʼ tidher bħal “żmien il-qedem.” Kif tistaʼ tagħti l-ħajja lil dawn il-ġrajjiet għal uliedek? Sabiex jagħmlu dan, xi ġenituri jużaw il-ktieb Jehovah’s Witnesses—Proclaimers of God’s Kingdom, il-Yearbook, bijografiji li ġew pubblikati fir-rivisti tagħna, u rapporti oħrajn tal-istorja teokratika, inkluż id-DVD ġdid tagħna dwar il-poplu t’Alla fi żminijiet moderni. Vidjos dwar il-persekuzzjoni taʼ ħutna f’dik li qabel kienet l-Unjoni Sovjetika u fil-Ġermanja Nazista jgħallmu lill-familji biex jistrieħu fuq Ġeħova matul il-provi. Inkludi materjal bħal dan fil-lejla tal-Qima tal-Familja tiegħek. Dan se jkabbar il-fidi taʼ wliedek għal meta jiffaċċjaw xi sfidi tal-integrità tagħhom.
Madankollu, prietka dwar l-istorja tistaʼ malajr iddejjaq liż-żgħażagħ. Għalhekk, involvi lil uliedek. Pereżempju, tistaʼ tistaqsi lil ibnek biex jagħżel pajjiż li jinteressah, jagħmel riċerka dwar l-istorja teokratika tal-pajjiż, u jippreżenta ftit minn dak li tgħallem lill-familja. Fil-kongregazzjoni tiegħek jistaʼ jkun hemm Kristjani li ilhom ħafna jaqdu f’servizz leali u li tistaʼ tistieden biex jingħaqdu magħkom lejla
minnhom għall-qima tal-familja. Forsi bintek tistaʼ tintervistahom u tinkuraġġihom jitkellmu dwar l-esperjenzi tagħhom. Jew tistaʼ tgħid lil uliedek biex ipinġu stampi taʼ ġrajjiet sinifikanti teokratiċi, bħal pereżempju, il-kostruzzjoni taʼ xi fergħa, xi konvenzjoni internazzjonali, jew l-użu tal-fonografu fil-ministeru minn dar għal dar.Tgħallem Kif “Kull Parti Tagħmel Xogħolha”
L-appostlu Pawlu qabbel lill-kongregazzjoni Kristjana maʼ “ġisem sħiħ, magħqud u miżmum flimkien permezz taʼ kull ligament, li jikber u jinbena bl-imħabba, hekk kif kull parti tagħmel xogħolha.” (Efes. 4:16, New International Version) L-apprezzament u r-rispett tagħna lejn il-Ħallieq tagħna jikbru hekk kif nitgħallmu dwar kif jaħdem il-ġisem uman. B’mod simili, meta neżaminaw kif taħdem il-kongregazzjoni globali, aħna nistagħġbu bl-“għerf t’Alla li jintwera b’ħafna modi differenti.”—Efes. 3:10.
Ġeħova jiddeskrivi kif l-organizzazzjoni tiegħu, inkluż il-parti fis-sema, taħdem. Pereżempju, hu jgħidilna li hu l-ewwel ta rivelazzjoni lil Ġesù Kristu, li mbagħad “bagħat lill-anġlu tiegħu, u permezz taʼ dan l-anġlu ppreżentaha b’sinjali lill-ilsir tiegħu Ġwanni, li xehed.” (Riv. 1:1, 2) Jekk Alla jirrivela kif taħdem il-parti inviżibbli tal-organizzazzjoni tiegħu, ma taħsibx li jixtieqna nifhmu kif “kull parti tagħmel xogħolha” fuq l-art?
Pereżempju, jekk l-indokratur tas-circuit dalwaqt se jżur lill-kongregazzjoni tiegħek, għala ma tikkunsidrax flimkien mal-familja tiegħek id-dmirijiet u l-privileġġi t’indokraturi li jivvjaġġaw? Kif jgħinu lil kull wieħed u waħda minna? Mistoqsijiet oħrajn li jistgħu jiġu kunsidrati huma: Għala huwa importanti li nirrapportaw is-servizz tal-għalqa? L-ispejjeż tal-organizzazzjoni t’Alla minn fejn jitħallsu? Il-Ġemgħa li Tiggverna kif inhi organizzata, u kif tipprovdi l-ikel spiritwali?
Meta nifhmu kif il-poplu taʼ Ġeħova hu organizzat, aħna nibbenefikaw mill-inqas bi tliet modi: L-apprezzament tagħna għal dawk li jaħdmu iebes għalina jikber. (1 Tess. 5:12, 13) Ukoll, niġu mqanqlin nappoġġaw l-arranġamenti teokratiċi. (Atti 16:4, 5) Fl-aħħar, il-fiduċja tagħna f’dawk li jieħdu t-tmexxija tissaħħaħ hekk kif naraw il-bażi Skritturali għad-deċiżjonijiet li jittieħdu u l-arranġamenti li jsiru.—Ebr. 13:7.
‘Iflilha t-Torrijiet Mgħammrin Tagħha’
“Immarċjaw madwar Sijon, u duru magħha, għoddu t-torrijiet tagħha. Ħarsu sew lejn il-ħitan b’saħħithom tagħha. Iflulha t-torrijiet mgħammrin tagħha, sabiex tkunu tistgħu tirrakkontaw dan lill-ġenerazzjoni tal-futur.” (Salm 48:12, 13) Is-salmista hawnhekk ħeġġeġ lill-Iżraelin biex jaraw lil Ġerusalemm mill-viċin. Tistaʼ timmaġina l-memorji prezzjużi li kellhom il-familji Iżraelin li kienu vvjaġġaw lejn il-belt qaddisa għall-festi taʼ kull sena u li kienu raw it-tempju meraviljuż tagħha? Żgur li ġew imqanqlin biex ‘jirrakkontaw dan lill-ġenerazzjoni tal-futur.’
Aħseb dwar is-sultana taʼ Xeba li għall-ewwel kienet dubjuża dwar ir-rapporti li semgħet rigward il-ħakma mill-aħjar taʼ Salamun u l-għerf kbir tiegħu. Xi kkonvinċieha li l-affarijiet li semgħet kienu minnhom? Hi qalet: “M’emmintx il-kliem li qalu sakemm ġejt u rajt b’għajnejja.” (2 Kron. 9:6) Iva, dak li naraw ‘b’għajnejna’ stess jistaʼ jeffettwana profondament.
Kif tistaʼ tgħin lil uliedek jaraw l-għeġubijiet tal-organizzazzjoni taʼ Ġeħova ‘b’għajnejhom’ stess? Jekk hemm uffiċċju tal-fergħa tax-Xhieda taʼ Ġeħova viċin fejn tgħixu, agħmel sforz biex tmorru żżuruh. Pereżempju, Mandy u Bethany trabbew xi 1,500 kilometru ’l bogħod mid-dar Betel f’pajjiżhom. Madankollu, il-ġenituri taʼ sikwit irranġaw biex iżuru u jaraw il-faċilitajiet tagħha, speċjalment hekk kif kienu qed jikbru wliedhom. “Qabel żorna l-Betel, aħna ħsibna li kien post serju
ħafna u għan-nies xjuħ biss,” jispjegaw il-bniet. “Imma ltqajna maʼ żgħażagħ li kienu qed jaħdmu iebes għal Ġeħova u li kienu qed jieħu gost jagħmlu dan! Rajna li l-organizzazzjoni taʼ Ġeħova kienet akbar minn sempliċement l-inħawi żgħar fejn konna ngħixu aħna, u kull żjara f’Betel tatna doża żgħira t’enerġija spiritwali.” Il-fatt li raw l-organizzazzjoni t’Alla mill-viċin qanqal lil Mandy u Bethany biex jibdew jaqdu bħala pijunieri, u saħansitra ġew mistidnin jaqdu f’Betel bħala volontieri temporanji.Għandna mod ieħor kif nistgħu ‘naraw’ l-organizzazzjoni taʼ Ġeħova, mod li ma kienx disponibbli għal Iżrael tal-qedem. Fis-snin reċenti, il-poplu t’Alla rċieva vidjos u DVDs li jiddiskutu diversi aspetti tal-organizzazzjoni t’Alla, bħal: Jehovah’s Witnesses—Organized to Share the Good News, Our Whole Association of Brothers, To the Ends of the Earth, u United by Divine Teaching. Meta int u l-familja tiegħek taraw ix-xogħol iebes li jagħmlu l-Beteliti, l-uħud li jipprovdu għajnuna, il-missjunarji, u l-aħwa li jippreparaw u jorganizzaw il-konvenzjonijiet, żgur li l-apprezzament għall-fratellanza globali se jikber fi qlubkom.
Kull kongregazzjoni tal-poplu t’Alla għandha parti importanti f’li tipprietka l-aħbar tajba u tappoġġa l-Kristjani fl-inħawi tagħha. Madankollu, ħu l-ħin mal-familja tiegħek biex tiftakar “fil-fratellanza kollha fid-dinja.” Dan se jgħin lilek u lil uliedek tibqgħu “sodi fil-fidi,” għax tagħrfu li għandkom raġuni għall-hena.—1 Pt. 5:9.
[Kaxxa/Stampa f’paġna 18]
L-Organizzazzjoni t’Alla—Suġġett taʼ Min Jistudjah!
Aħna għandna abbundanza taʼ provvedimenti li jgħinuna nitgħallmu iktar dwar l-istorja tal-organizzazzjoni taʼ Ġeħova u dwar kif taħdem. Il-mistoqsijiet li ġejjin jistgħu jgħinuk tibda:
☞ Kif inbeda x-xogħol tal-indokraturi li jivvjaġġaw tal-lum?—It-Torri tal-Għassa tal-1 taʼ Diċembru, 1996, paġni 8-13.
☞ X’kien sinifikanti dwar “Il-Ġurnata tat-Tfal” li kien hemm fl-Assemblea Teokratika fl-1941?—It-Torri tal-Għassa tal-15 taʼ Lulju, 2001, paġna 8.
☞ Il-Ġemgħa li Tiggverna kif tieħu d-deċiżjonijiet?—Nagħtu Xhieda bir-Reqqa Dwar is-Saltna t’Alla, paġni 108-114.