“Ħa nibqgħu mqajmin u f’sensina.”—1 TESS. 5:6.

1, 2. X’inhu meħtieġ biex familja jirnexxilha tibqaʼ mqajma spiritwalment?

 META l-​appostlu Pawlu rrefera għall-​“jum il-​kbir taʼ Ġeħova, jum li jqanqal il-​biżaʼ,” lill-​Kristjani f’Tessalonika kitbilhom: “Aħwa, m’intomx fid-​dlam, biex dak il-​jum jiġi fuqkom bħalma jagħmel lill-​ħallelin, għax intom ilkoll ulied id-​dawl u wlied il-​jum. Aħna la aħna tal-​lejl u lanqas tad-​dlam.” Pawlu żied jgħid: “Għalhekk, mela, ħa ma nibqgħux reqdin bħalma jagħmlu l-​oħrajn, imma ħa nibqgħu mqajmin u f’sensina.”—Ġoel 2:31; 1 Tess. 5:4-​6.

² Il-​parir li Pawlu ta lit-​Tessalonikin japplika b’mod speċjali għall-​Kristjani li jgħixu fi “żmien it-​tmiem.” (Dan. 12:4) Hekk kif qed joqrob it-​tmiem tas-​sistema mill-​agħar tiegħu, Satana hu determinat li jwaqqaf lil kemm jiflaħ aduraturi veri milli jaqdu lil Alla. Għalhekk, aħna nkunu għaqlin jekk nieħdu bis-​serjetà t-​twissija taʼ Pawlu biex nibqgħu għassa spiritwalment. Sabiex familja Kristjana jirnexxilha tibqaʼ mqajma huwa importanti li kull membru jerfaʼ r-​responsabbiltà Skritturali tiegħu. Mela, liema rwol għandhom l-​irġiel u n-​nisa miżżewġin u t-​tfal f’li jgħinu lill-​familji tagħhom ‘jibqgħu mqajmin’?

Irġiel Miżżewġin—Imitaw lir-​“Ragħaj mill-​Aħjar”

3. Skont l-​1 Timotju 5:8, x’tinkludi r-​responsabbiltà tar-​raġel bħala l-​kap tal-​familja?

³ “Il-​kap tal-​mara hu r-​raġel,” tgħid il-​Bibbja. (1 Kor. 11:3) X’tinvolvi r-​responsabbiltà tar-​raġel bħala l-​kap tal-​familja? L-​Iskrittura turi aspett wieħed tal-​istat taʼ kap billi tgħid: “Jekk xi ħadd ma jipprovdix għal tiegħu, u speċjalment għall-​membri taʼ daru, ikun ċaħad il-​fidi u jkun agħar minn bniedem mingħajr fidi.” (1 Tim. 5:8) Tabilħaqq, raġel irid jipprovdi materjalment għall-​familja tiegħu. Iżda biex jgħin lill-​membri tal-​familja tiegħu jibqgħu mqajmin irid ikun iktar minn sempliċi wieħed li jaqlaʼ l-​ħobża taʼ kuljum. Jeħtieġ li jibni lil taʼ daru spiritwalment billi jgħin lil kull membru fil-​familja biex isaħħaħ ir-​relazzjoni tiegħu m’Alla. (Prov. 24:3, 4) Kif jistaʼ jagħmel dan?

4. X’jistaʼ jgħin lil raġel jirnexxi f’li jibni lil taʼ daru spiritwalment?

⁴ Ladarba “r-​raġel hu l-​kap taʼ martu bħalma l-​Kristu wkoll hu l-​kap tal-​kongregazzjoni,” raġel miżżewweġ għandu jeżamina u jimita l-​mod kif Ġesù jaġixxi bħala kap tal-​kongregazzjoni. (Efes. 5:23) Ikkunsidra kif Ġesù ddeskriva r-​relazzjoni li kellu mas-​segwaċi tiegħu. (Aqra Ġwanni 10:14, 15.) Raġel li jkun irid jibni lil taʼ daru spiritwalment kif jistaʼ jkollu suċċess? X’inhu s-​sigriet? Li jistudja dak li qal u għamel Ġesù bħala “r-​ragħaj mill-​aħjar,” u ‘jimxi mill-​qrib wara l-​passi tiegħu.’—1 Pt. 2:21.

5. Ir-​Ragħaj mill-​Aħjar x’jaf dwar il-​kongregazzjoni?

⁵ B’mod figurattiv, ir-​relazzjoni bejn ragħaj u n-​nagħaġ tiegħu hija bbażata fuq l-​għarfien u l-​fiduċja. Ir-​ragħaj jaf kollox dwar in-​nagħaġ tiegħu, u n-​nagħaġ jafu lir-​ragħaj u jafdawh. Huma jagħrfu leħnu u jobduh. Ġesù qal: “Naf lin-​nagħaġ tiegħi u n-​nagħaġ tiegħi jafu lili.” Hu mhux sempliċement jaf lill-​kongregazzjoni fuq fuq. Il-​kelma Griega li hawnhekk hija tradotta “naf” tfisser “għarfien intimu  u persunali.” Iva, ir-​Ragħaj mill-​Aħjar jaf lin-​nagħaġ tiegħu personalment. Jaf x’għandha bżonn kull waħda minnhom. Hu jaf id-​dgħufijiet u l-​kwalitajiet tajbin tagħhom. Ix-​Xempju tagħna xejn ma jaħrablu dwar in-​nagħaġ tiegħu. U n-​nagħaġ jafuh sew lir-​ragħaj u għandhom fiduċja fit-​tmexxija tiegħu.

6. L-​irġiel miżżewġin kif jistgħu jimitaw lir-​Ragħaj mill-​Aħjar?

⁶ Sabiex raġel miżżewweġ jimita lil Kristu fl-​irwol tiegħu bħala kap, jeħtieġ li jitgħallem jaħseb dwaru nnifsu bħala ragħaj u dwar dawk taħt il-​ħarsien tiegħu bħala nagħaġ. Hu għandu jagħmel ħiltu kollha biex isir jaf lill-​membri tal-​familja tiegħu sew. Jistaʼ raġel miżżewweġ verament isir jafhom sew? Iva. Dan jistaʼ jagħmlu billi jikkomunika tajjeb mal-​membri kollha tal-​familja tiegħu, jagħti widen għal dak kollu li jkun qed jinkwetahom, u jieħu t-​tmexxija fl-​attivitajiet tal-​familja. Irid ukoll ikun kuxjenzjuż dwar li jieħu deċiżjonijiet tajbin li jinvolvu kwistjonijiet bħalma huma l-​qima tal-​familja, l-​attendenza għal-​laqgħat, is-​servizz tal-​għalqa, ir-​rikreazzjoni, u d-​divertiment. Meta Kristjan miżżewweġ ikun jaf sew x’tgħid il-​Kelma t’Alla u jsir jaf sew lill-​membri tal-​familja tiegħu sabiex jagħtihom eżempju u jieħu deċiżjonijiet għaqlin, x’aktarx li l-​membri tal-​familja tiegħu se jkollhom fiduċja fit-​tmexxija tiegħu. Barra minn hekk, hu se jkollu s-​sodisfazzjon li jarahom jibqgħu magħqudin fil-​qima vera.

7, 8. Raġel miżżewweġ kif jistaʼ jimita lir-​Ragħaj mill-​Aħjar meta juri affezzjoni lejn dawk taħt il-​ħarsien tiegħu?

⁷ Ukoll, ragħaj tajjeb ikollu affezzjoni lejn in-​nagħaġ tiegħu. Meta nistudjaw ir-​rakkonti tal-​Evanġelju dwar il-​ħajja u l-​ministeru taʼ Ġesù, qalbna titqanqal b’apprezzament għall-​affezzjoni li wera Ġesù lejn id-​dixxipli tiegħu. Hu saħansitra ‘ta ruħu għan-​nagħaġ.’ L-​irġiel miżżewġin għandhom jimitaw il-​mod kif Ġesù wera affezzjoni lejn dawk taħt il-​ħarsien tiegħu. Minflok ma jiddomina lil martu bi ħruxija, raġel miżżewweġ li jkun jixtieq l-​approvazzjoni t’Alla jkompli jħobbha “bħalma l-​Kristu wkoll ħabb lill-​kongregazzjoni.” (Efes. 5:25) Għandu juri konsiderazzjoni u jkun ħelu fi kliemu għax hi jistħoqqilha unur.—1 Pt. 3:7.

⁸ Meta jħarreġ lit-​tfal, il-​kap tal-​familja għandu jżomm sod mal-​prinċipji divini. Madankollu, hu m’għandux jonqos milli juri affezzjoni lejn uliedu. Għandu juża d-​dixxiplina meħtieġa bi mħabba. Xi żgħażagħ jistgħu jdumu iktar minn oħrajn biex jifhmu xi jkun mistenni minnhom. F’każ bħal dan, il-​missier għandu jkun iktar paċenzjuż magħhom. Meta l-​irġiel isegwu b’mod konsistenti l-​eżempju taʼ Ġesù jkunu qed joħolqu ambjent taʼ sigurtà fil-​familja. Il-​familji tagħhom igawdu t-​tip taʼ sigurtà spiritwali li kanta dwarha s-​salmista.—Aqra Salm 23:1-​6.

9. Bħall-​patrijarka Noè, liema responsabbiltà għandhom l-​irġiel Kristjani miżżewġin, u x’se jgħinhom jerfgħu din ir-​responsabbiltà?

⁹ Il-​patrijarka Noè kien jgħix fl-​aħħar jiem tad-​dinja taʼ żmienu. Imma Ġeħova żammu “qawwi u sħiħ maʼ sebgħa oħrajn meta ġab dilluvju fuq dinja taʼ nies bla devozzjoni lejn Alla.” (2 Pt. 2:5) Noè kellu r-​responsabbiltà li jgħin lill-​familja tiegħu ssalva mid-​Dilluvju. Il-​kapijiet tal-​familja li jkunu Kristjani qegħdin fl-​istess sitwazzjoni f’dawn l-​aħħar jiem. (Mt. 24:37) Kemm hu vitali li jistudjaw l-​eżempju tar-​“ragħaj mill-​aħjar” u jistinkaw biex jimitawh!

Nisa Miżżewġin—‘Ibnu lil taʼ Darkom’

10. Is-​sottomissjoni lejn żewġha xi tfisser għal mara?

¹⁰ L-​appostlu Pawlu kiteb: “In-​nisa ħa jkunu sottomessi lejn żwieġhom bħallikieku lejn il-​Mulej.” (Efes. 5:22) Din l-​istqarrija bl-​ebda mod ma tindika xi pożizzjoni mhix dinjituża. Qabel ma ħalaq lill-​ewwel mara, Eva, l-​Alla l-​veru ddikjara: “Mhux tajjeb li r-​raġel jibqaʼ  waħdu. Se nagħmillu għajnuna, sieħba li taqbel għal miegħu.” (Ġen. 2:18) L-​irwol tal-​“għajnuna” u s-​“sieħba li taqbel għal miegħu”—li tappoġġa lil żewġha hekk kif jieħu ħsieb ir-​responsabbiltajiet tal-​familja tiegħu—hu wieħed tassew onorabbli.

11. Mara miżżewġa li tkun eżemplari kif ‘tibni lil dawk taʼ darha’?

¹¹ Mara miżżewġa li tkun eżemplari taħdem għall-​ġid taʼ dawk taʼ darha. (Aqra Proverbji 14:1.) B’kuntrast maʼ mara belha, li ma turix rispett għall-​arranġament taʼ kap, mara għaqlija jkollha rispett profond għal dan il-​provvediment. Minflok ma turi attitudni taʼ diżubbidjenza u indipendenza, li huma karatteristiki tad-​dinja, hi turi sottomissjoni lejn żewġha. (Efes. 2:2) Mara belha ma taħsibhiex darbtejn biex titkellem b’mod negattiv dwar żewġha, filwaqt li mara għaqlija tistinka biex uliedha u oħrajn ikollhom iżjed rispett lejh. Mara bħal din toqgħod attenta li ma tnaqqasx mill-​importanza tar-​raġel tagħha bħala l-​kap billi toqgħod tgerger u tħaqqaqha miegħu. Hemm ukoll il-​kwistjoni taʼ li tagħmel l-​ekonomija. Mara belha x’aktarx li tberbaq il-​flus li l-​familja tkun tant batiet għalihom. Mara li tappoġġa lil żewġha ma tagħmilx hekk. Hi tikkoopera maʼ żewġha fi kwistjonijiet finanzjarji u tagħmel kollox bil-​prudenza u b’mod ekonomiku. Ma tagħmilx pressjoni fuq żewġha biex jagħmel l-​overtime.

12. Mara miżżewġa x’tistaʼ tagħmel biex tgħin lill-​familja tagħha ‘tibqaʼ mqajma’?

¹² Mara miżżewġa li tkun eżemplari tgħin lill-​familja tagħha ‘tibqaʼ mqajma’ billi tikkoopera maʼ żewġha sabiex tgħallem lil uliedha dwar Ġeħova. (Prov. 1:8) Hi tħabrek biex tappoġġa l-​Qima tal-​Familja. Iktar minn hekk, hi tappoġġa lil żewġha meta jagħti xi parir u jiddixxiplina lil uliedhom. X’differenza minn mara li ma tikkooperax u li wliedha jbatu kemm fiżikament u kemm spiritwalment!

13. Għala hu importanti li mara tappoġġa lil żewġha fl-​attivitajiet teokratiċi li jkun involut fihom?

¹³ Mara li tappoġġa lil żewġha kif tħossha meta tara lil żewġha involut sew fil-​kongregazzjoni Kristjana? Hi tieħu gost! Jekk żewġha jkun jaqdi bħala qaddej ministerjali, bħala anzjan, jew forsi membru tal-​Kumitat taʼ Koordinazzjoni mal-​Isptarijiet jew tal-​Kumitat Reġjonali tal-​Bini, hi tkun kuntenta li jkollu dan il-​privileġġ. Żgur li jinvolvi sagrifiċċji min-​naħa tagħha biex tappoġġa lil żewġha sew bil-​kliem u sew bl-​għemil. Imma hi tkun konxja li l-​attivitajiet teokratiċi li żewġha jkun involut fihom jgħinu biex il-​familja kollha tibqaʼ mqajma spiritwalment.

14. (a) X’jistaʼ jkun taʼ sfida għal mara biex tappoġġa lil żewġha, u kif tistaʼ tegħleb din l-​isfida? (b) Mara miżżewġa kif tistaʼ tkun taʼ ġid għall-​familja kollha?

¹⁴ Ikun taʼ sfida għal mara eżemplari li tappoġġa lil żewġha meta dan jieħu xi deċiżjoni  li ma tkunx taqbel magħha. Saħansitra f’ċirkustanzi bħal dawn, hi turi “spirtu kwiet u ġwejjed” u tikkoopera miegħu biex id-​deċiżjoni tiegħu tirnexxi. (1 Pt. 3:4) Barra minn hekk, mara tajba tipprova ssegwi l-​eżempju mill-​aqwa li ħallew dawn in-​nisa tal-​qedem li kienu jogħġbu lil Alla: Sara, Rut, Abigajl, u Marija, omm Ġesù. (1 Pt. 3:5, 6) Hi timita wkoll lill-​aħwa nisa taʼ żmienna li jkunu avanzati fl-​età u li “juru l-​biżaʼ t’Alla fl-​imġiba tagħhom.” (Titu 2:3, 4) Meta turi mħabba u rispett lejn żewġha, mara eżemplari tkun qed tgħin ferm biex iż-​żwieġ jirnexxi u tkun taʼ ġid għall-​familja kollha. Darha tkun post taʼ faraġ u sigurtà. Mara li tappoġġa lil żewġha hija imprezzabbli għal raġel spiritwali.—Prov. 18:22.

Żgħażagħ—‘Żommu Għajnejkom fuq l-​Affarijiet li Ma Jidhrux’

15. Kif jistgħu ż-​żgħażagħ jaħdmu id f’id mal-​ġenituri tagħhom sabiex il-​familja ‘tibqaʼ mqajma’?

¹⁵ Kif tistgħu intom iż-​żgħażagħ taħdmu id f’id mal-​ġenituri tagħkom sabiex il-​familja tagħkom ‘tibqaʼ mqajma’ spiritwalment? Ikkunsidra l-​premju li Ġeħova poġġa quddiemek. Forsi sa minn ċkunitek il-​ġenituri tiegħek urewk stampi taʼ kif se tkun il-​ħajja fil-​Ġenna tal-​art. Meta bdejt tikber, huma x’aktarx użaw il-​Bibbja u l-​pubblikazzjonijiet Kristjani biex jgħinuk iġġib quddiem għajnejk kif se tkun il-​ħajja taʼ dejjem fid-​dinja l-​ġdida. Jekk iżżomm għajnejk iffokati fuq is-​servizz lil Ġeħova u tippjana ħajtek fi qbil maʼ dan se tiġi megħjun ‘tibqaʼ mqajjem.’

16, 17. Iż-​żgħażagħ x’jistgħu jagħmlu biex jirnexxilhom jiġru t-​tellieqa għall-​ħajja?

¹⁶ Aħseb bis-​serjetà dwar il-​kliem tal-​appostlu Pawlu li nsibu fl-​1 Korintin 9:24. (Aqra.) Iġri t-​tellieqa għall-​ħajja bl-​intenzjoni li tirbaħ. Agħżel triq li se twasslek biex tikseb il-​premju taʼ ħajja taʼ dejjem. Ħafna ħallew il-​ġiri wara l-​affarijiet materjali jaljenahom u b’hekk ma żammewx għajnejhom fuq il-​premju. Xi bluha! Jekk f’ħajtek ikun moħħok biss biex tikseb ir-​rikkezzi, m’intix se tikseb l-​hena veru. L-​affarijiet li jinxtraw bil-​flus huma temporanji. Iżda, int żomm għajnejk fuq ‘l-​affarijiet li ma jidhrux.’ Għala? Għaliex l-​affarijiet “li ma jidhrux huma għal dejjem.”—2 Kor. 4:18.

¹⁷ ‘L-​affarijiet li ma jidhrux’ jinkludu l-​barkiet tas-​Saltna. Ippjana ħajtek b’tali mod li tkun tistaʼ tikseb dawn il-​barkiet. L-​hena veru jiġi milli tuża ħajtek biex taqdi lil Ġeħova. Meta taqdi lill-​Alla l-​veru se jkollok opportunità li tilħaq miri kemm kbar u kemm żgħar. a Miri spiritwali realistiċi jistgħu jgħinuk tibqaʼ ffokat biex taqdi lil Alla bl-​iskop li tikseb il-​premju taʼ ħajja taʼ dejjem.—1 Ġw. 2:17.

18, 19. Żagħżugħ kif jistaʼ jara jekk il-​verità tkunx f’qalbu?

¹⁸ Żgħażagħ, l-​ewwel pass fit-​triq li twassal għall-​ħajja hu li jkollkom il-​verità f’qalbkom. Għamiltu int dan il-​pass? Staqsi lilek innifsek: ‘Jien persuna spiritwali, jew niddependi mill-​ġenituri tiegħi biex nieħu sehem fl-​attivitajiet spiritwali? Qiegħed jien nikkultiva kwalitajiet li jogħġbu lil Alla? Qiegħed jien nagħmel sforz biex inżomm rutina konsistenti f’li nieħu sehem f’attivitajiet li għandhom x’jaqsmu mal-​qima vera bħat-​talb, l-​istudju, l-​attendenza għal-​laqgħat, u s-​servizz tal-​għalqa b’mod  regulari? Qiegħed jien nersaq qrib lejn Alla billi niżviluppa relazzjoni persunali miegħu?ʼ—Ġak. 4:8.

¹⁹ Irrifletti fuq l-​eżempju taʼ Mosè. Minkejja li ġie mġiegħel jidra kultura barranija, hu għażel li jiġi identifikat bħala aduratur taʼ Ġeħova minflok bħala bin bint il-​Fargħun. (Aqra Ebrej 11:24-​27.) Żgħażagħ Kristjani, intom ukoll jeħtieġ li tkunu determinati li taqdu lil Ġeħova fedelment. Jekk tagħmlu dan se tiksbu l-​hena veru, l-​aqwa kwalità taʼ ħajja llum, u t-​tama li taqbdu “qabda soda mal-​ħajja vera.”—1 Tim. 6:19.

20. Fit-​tellieqa għall-​ħajja, min jirċievi l-​premju?

²⁰ Fil-​logħob tal-​qedem, ġerrej wieħed biss kien jirbaħ it-​tellieqa. Dan ma japplikax għat-​tellieqa għall-​ħajja. Hija r-​rieda t’Alla “li bnedmin taʼ kull xorta jiġu salvati u jaslu għall-​għarfien eżatt dwar il-​verità.” (1 Tim. 2:3, 4) Ħafna qablek ġrew din it-​tellieqa b’suċċess, u ħafna qed jiġru flimkien miegħek. (Ebr. 12:1, 2) Il-​premju jiħduh dawk li ma jaqtgħux qalbhom. Għalhekk kun determinat li tirbaħ!

21. X’se jiġi diskuss fl-​artiklu li jmiss?

²¹ Il-​miġja tal-​“jum il-​kbir taʼ Ġeħova, jum li jqanqal il-​biżaʼ” hija inevitabbli. (Mal. 4:5) Il-​familji Kristjani għandhom ikunu lesti għal dan il-​jum. Huwa vitali li kull membru tal-​familja jerfaʼ r-​responsabbiltà Skritturali tiegħu stess. X’tistaʼ tagħmel iktar biex tibqaʼ mqajjem spiritwalment u ssaħħaħ ir-​relazzjoni tiegħek m’Alla? Fl-​artiklu li jmiss se niddiskutu tliet fatturi li jeffettwaw il-​ġid spiritwali tal-​familja kollha.

[Nota taʼ taħt]

X’Tgħallimt?

• Għala hu essenzjali li l-​familji Kristjani ‘jibqgħu mqajmin’?

• Kif jistaʼ raġel miżżewweġ jimita lir-​Ragħaj mill-​Aħjar?

• X’tistaʼ tagħmel mara eżemplari biex tappoġġa lil żewġha?

• Kif jistgħu ż-​żgħażagħ jgħinu biex iżommu lill-​familji tagħhom imqajmin spiritwalment?

[Mistoqsijiet taʼ Studju]

[Stampa f’paġna 9]

Mara li tappoġġa lil żewġha hija imprezzabbli għal raġel spiritwali