“Ġeħova jismaʼ meta nsejjaħlu.”—SALM 4:3.

1, 2. (a) David liema sitwazzjoni ferm perikoluża ffaċċja? (b) Liema salmi se niddiskutu?

 IS-​SULTAN DAVID ħakem fuq Iżrael għal xi żmien. Darba minnhom, hu ffaċċja sitwazzjoni ferm perikoluża. L-​iben makakk tiegħu, Absalom, iddikjara lilu nnifsu sultan u David ġie mġiegħel jitlaq minn Ġerusalemm. Ukoll, hu ġie tradut minn ħabib tal-​qalb, u mbagħad mexa ħafi jibki fuq l-​Għolja taż-​Żebbuġ akkumpanjat minn ftit uħud leali. Iktar minn hekk, Simgħi, li kien jappartjeni lil familja taʼ dar is-​Sultan Sawl, xeħet il-​ġebel u t-​trab lejn David waqt li kien qed jisħtu.—2 Sam. 15:30, 31; 16:5-​14.

² Din is-​sitwazzjoni taʼ tbatija li nqalgħet, wasslitu lil David f’Xeol b’niket u b’għajb? Le għax hu fada f’Ġeħova. Dan hu evidenti fit-​tielet Salm li ġie komponut minn David u li jitkellem dwar il-​ħarba tiegħu. Hu kiteb ukoll ir-​rabaʼ Salm. Dawn iż-​żewġ kompożizzjonijiet jesprimu l-​konvinzjoni li Alla jismaʼ u jwieġeb it-​talb. (Salm 3:4; 4:3) Dawn is-​salmi jassigurawna li Ġeħova jinsab mal-​qaddejja leali tiegħu lejl u nhar, u jberikhom billi jagħtihom l-​appoġġ tiegħu, kif ukoll il-​paċi, u sens taʼ sigurtà. (Salm 3:5; 4:8) Mela ejja nikkunsidraw dawn is-​salmi u naraw kif inisslu sens taʼ sigurtà u jippromwovu fiduċja f’Alla.

Meta ‘Ħafna Jqumu Kontrina’

3. Bħalma jintwera f’Salm 3:1, 2 x’kienet is-​sitwazzjoni taʼ David?

³ Messaġġier qal: “Qalb l-​irġiel taʼ Israel daret għal wara Absalom.” (2 Sam. 15:13) Mgħaġġeb kif Absalom kien kapaċi jikkonvinċi tant nies biex jappoġġawh, David staqsa: “O Ġeħova, għalfejn kotru daqshekk l-​avversarji tiegħi? Għala hemm ħafna li qed iqumu kontrija? Bosta qed jgħidu dwari: ‘M’hemmx salvazzjoni għalih minn Alla.’” (Salm 3:1, 2) Ħafna Iżraelin ħasbu li Ġeħova ma kienx se jsalva lil David mill-​inkwiet li ġabu fuqu Absalom u sħabu.

4, 5. (a) David minn xiex kien ċert? (b) Xi jfisser il-​kliem ‘Dak li jgħollili rasi’?

⁴ Iżda David ħass sens taʼ sigurtà għax kellu fiduċja sħiħa f’Alla. Hu kanta: “Madankollu, O Ġeħova, int tarka madwari, int il-​glorja tiegħi u Dak li tgħollili rasi.” (Salm 3:3) David kien ċert li Ġeħova kien se jipproteġih, sewwasew bħalma tarka tipproteġi suldat. Iva, is-​sultan imdaħħal fiż-​żmien kien qed jaħrab, rasu mgħottija u baxxuta bl-​umiljazzjoni. Iżda l-​Iktar Għoli kien se jbiddel il-​kundizzjoni taʼ David għal waħda taʼ glorja. Ġeħova kien se jippermettilu jieqaf dritt, jgħolli rasu, u għal darb’oħra jżommha mgħollija. David sejjaħ lil Alla, b’fiduċja li Hu kien se jwieġbu. Turi int fiduċja bħal din f’Ġeħova?

⁵ Bil-​kliem ‘Dak li jgħollili rasi,’ David kien jaf li l-​għajnuna li kien se jirċievi kienet se tiġi mingħand Ġeħova. Il-​Bibbja Today’s English Version tgħid: “Imma int, O MULEJ, dejjem tkun it-​tarka tiegħi mill-​periklu; int tagħtini r-​rebħa u terġaʼ tkebbes ġewwa fija l-​kuraġġ.” Rigward l-​espressjoni ‘Dak li jgħollili rasi,’ xogħol taʼ referenza jgħid: “Meta Alla jgħolli . . . ‘ras’ dak li jkun, Hu jimlieh bit-​tama u bis-​sens taʼ sigurtà.” Imġiegħel iħalli t-​tron taʼ Iżrael, David kellu raġun iħossu qalbu maqtugħa.  Madankollu, il-​fatt li Alla ‘jgħollilu rasu’ kien se jirriżulta f’kuraġġ imġedded, sens taʼ sigurtà, u fiduċja sħiħa f’Alla.

‘Ġeħova Se Jwieġeb!’

6. David għala qal li t-​tweġiba għat-​talba tiegħu ġiet mill-​muntanja qaddisa taʼ Ġeħova?

⁶ B’fiduċja f’Ġeħova u mimli b’sens taʼ sigurtà, David kompla jkanta: “B’leħen għoli nsejjaħ lil Ġeħova, u hu jwiġibni mill-​muntanja qaddisa tiegħu.” (Salm 3:4) Sabiex jiġu osservati l-​ordnijiet taʼ David, l-​arka tal-​patt, li tissimbolizza l-​preżenza t’Alla, ittieħdet fuq il-​Muntanja Sijon. (Aqra t-​2 Samwel 15:23-​25.) Mela, mhux taʼ b’xejn li David qal li t-​tweġiba għat-​talba tiegħu ġiet mill-​muntanja qaddisa taʼ Ġeħova.

7. David għala ma ħassux beżgħan?

⁷ Peress li kien ċert li t-​talb lil Alla ma kienx se jkun għalxejn, David ma ħassux beżgħan. Minflok, hu kanta: “Jien immur nimtedd biex norqod; u nqum, għax Ġeħova jibqaʼ jwiżinni.” (Salm 3:5) Anki bil-​lejl, meta l-​periklu taʼ attakk għal għarrieda jkun ikbar, David ma kienx beżgħan li jmur jorqod. Hu kien ċert li se jqum għax l-​esperjenzi tiegħu tal-​passat għamluh assolutament fiduċjuż li setaʼ jistrieħ fuq l-​appoġġ t’Alla li ma jfalli qatt. Aħna wkoll nistgħu nħossuna hekk jekk inżommu mat-​“triqat taʼ Ġeħova” u qatt ma nitilquh.—Aqra t-​2 Samwel 22:21, 22.

8. Salm 27:1-​4 kif juri li David kellu fiduċja f’Alla?

⁸ Is-​sens taʼ sigurtà u l-​fiduċja sħiħa li David kellu f’Alla huma evidenti f’salm ieħor minn tiegħu, wieħed li fih dan il-​kliem ispirat: “Ġeħova hu d-​dawl tiegħi u s-​salvazzjoni tiegħi. Minn min se nibżaʼ? Ġeħova hu l-​fortizza taʼ ħajti. Minn min se nitkexkex? . . . Għalkemm armata tistaʼ tikkampja kontrija, qalbi ma tibżax. . . . Ħaġa waħda tlabt mingħand Ġeħova—lilha se nfittex, li ngħammar fid-​dar taʼ Ġeħova l-​jiem kollha taʼ ħajti, biex nara s-​sbuħija taʼ Ġeħova u biex inħares b’apprezzament lejn it-​tempju tiegħu.” (Salm 27:1-​4) Jekk int tħossok hekk, u jekk iċ-​ċirkustanzi tiegħek jippermettu, int se tattendi  b’mod regulari l-​laqgħat tal-​kongregazzjoni mal-​qaddejja sħabek taʼ Ġeħova.—Ebr. 10:23-​25.

9, 10. Minkejja l-​kliem taʼ Salm 3:6, 7, għala tgħid li David ma kellux spirtu vendikattiv?

⁹ Għalkemm David iffaċċja t-​tradiment t’Absalom u n-​nuqqas taʼ lealtà taʼ ħafna wħud oħrajn, hu kanta: “Ma nibżax minn għaxriet t’eluf taʼ nies li jinġemgħu kontrija minn kull naħa. Qum, O Ġeħova! Salvani, O Alla tiegħi! Idrob lill-​għedewwa kollha tiegħi fuq ix-​xedaq. Kisser snien il-​ħżiena.”—Salm 3:6, 7.

¹⁰ David ma kellux spirtu vendikattiv. Li kieku l-​għedewwa tiegħu kellhom jiġu ‘midrubin fuq ix-​xedaq,’ Alla kellu jkun il-​wieħed li jagħmel dan. Is-​Sultan David kiteb kopja persunali tal-​Liġi u kien jaf li fiha Ġeħova ddikjara: “Il-​vendetta hi tiegħi, u t-​tpattija.” (Dt. 17:14, 15, 18; 32:35) Huwa Alla wkoll li kellu ‘jkisser snien il-​ħżiena.’ Li jkissrilhom snienhom ifisser li jagħmilhom bla setgħa biex jagħmlu l-​ħsara. Ġeħova jaf min huma l-​ħżiena għax hu “jara l-​qalb.” (1 Sam. 16:7) Kemm aħna grati li Alla jagħtina l-​fidi u s-​saħħa biex nieqfu sodi kontra l-​iktar wieħed ħażin, Satana, li dalwaqt se jiġi mitfugħ fl-​abbiss bħal iljun jgħajjat imma bla snien—tajjeb biss għall-​qerda!—1 Pt. 5:8, 9; Riv. 20:1, 2, 7-​10.

“Is-​Salvazzjoni Hi taʼ Ġeħova”

11. Għala għandna nitolbu għal sħabna fit-​twemmin?

¹¹ David irrealizza li Ġeħova biss setaʼ jġib il-​ħelsien li hu tant kellu bżonn. Imma s-​salmista ma ħasibx fih innifsu biss. Xi ngħidu għan-​nies li bħala poplu kellhom l-​approvazzjoni taʼ Ġeħova? B’mod xieraq, David ikkonkluda l-​kompożizzjoni ispirata tiegħu bil-​kliem: “Is-​salvazzjoni hi taʼ Ġeħova. Il-​barka tiegħek qiegħda fuq il-​poplu tiegħek.” (Salm 3:8) Huwa minnu li David kellu problemi kbar, iżda hu żamm f’moħħu lin-​nies taʼ Ġeħova inġenerali u kien fiduċjuż li Alla kien se jberikhom. M’għandniex aħna wkoll inżommu f’moħħna lil sħabna fit-​twemmin? Ejja niftakru fihom fit-​talb tagħna u nitolbu lil Ġeħova biex jagħtihom l-​ispirtu qaddis tiegħu sabiex ikunu jistgħu jrabbu l-​kuraġġ u jaġixxu b’sens taʼ sigurtà meta jiddikjaraw l-​aħbar tajba.—Efes. 6:17-​20.

12, 13. Xi ġralu Absalom, u David kif irreaġixxa?

¹² Ħajjet Absalom intemmet bl-​għajb—twissija għal dawk kollha li jabbużaw minn oħrajn, speċjalment mill-​uħud midlukin t’Alla, bħal David. (Aqra Proverbji 3:31-​35.) Seħħet ġlieda u l-​forzi taʼ Absalom ġew megħlubin. Absalom innifsu kien riekeb fuq bagħal meta f’daqqa waħda xagħru, li kien oħxon u f’saħħtu, tħabbel maʼ biċċa minn fergħa baxxa taʼ siġra kbira. Hu sab ruħu mdendel hemm—ħaj iżda ma setaʼ jagħmel xejn—sakemm Ġowab qatlu billi niffidlu tliet vleġeġ f’qalbu.—2 Sam. 18:6-​17.

¹³ Feraħ David meta sar jaf x’kien ġralu ibnu? Le. Minflok, hu beda jippassiġġa ’l hemm u ’l hawn, jibki u jgħajjat: “Ibni Absalom, ibni, ibni Absalom! O mhux li mitt jien, jien stess, minflokok, Absalom ibni, ibni!” (2 Sam. 18:24-​33) Il-​kliem taʼ Ġowab biss kellu jkun biex joħroġ lil David min-​niket li kważi ħakmu. Xi tmiem traġiku għal Absalom, li l-​egoiżmu tiegħu qanqlu jiġġieled kontra missieru stess—il-​midluk taʼ Ġeħova—u jġib diżastru fuqu nnifsu!—2 Sam. 19:1-​8; Prov. 12:21; 24:21, 22.

David Reġaʼ Esprima Fiduċja f’Alla

14. X’jistaʼ jintqal dwar il-​kompożizzjoni taʼ Salm 4?

¹⁴ Bħat-​tielet Salm, ir-​rabaʼ Salm huwa talba bil-​ħrara minn David li tagħti evidenza li hu kellu fiduċja sħiħa f’Ġeħova. (Salm 3:4; 4:3) Forsi David ikkompona din l-​għanja biex jesprimi serħan u gratitudni lejn Alla wara li l-​azzjonijiet t’Absalom kienu fallew. Jew forsi  kitibha bil-​kantanti Leviti f’moħħu. Kien x’kien il-​każ, il-​meditazzjoni fuq din l-​għanja tistaʼ ssaħħilna l-​fiduċja tagħna f’Ġeħova.

15. Għala nistgħu nitolbu b’fiduċja lil Ġeħova permezz taʼ Ibnu?

¹⁵ David reġaʼ wera fiduċja sħiħa f’Alla u wera sens taʼ sigurtà fl-​effettività tat-​talb. Hu kanta: “Meta nsejjaħ wiġibni, O Alla ġust tiegħi. Fi żmien id-​dwejjaq, oħroġni fil-​wisaʼ. Ħenn għalija u ismaʼ t-​talba tiegħi.” (Salm 4:1) Anki aħna nistgħu nkunu fiduċjużi b’mod simili jekk nipprattikaw il-​ġustizzja. Peress li aħna konxji li Ġeħova, l-​“Alla ġust,” ibierek lin-​nies retti, nistgħu b’fiduċja nitolbu lilu permezz taʼ Ibnu b’fidi fis-​sagrifiċċju tal-​fidwa taʼ Ġesù. (Ġw. 3:16, 36) X’paċi jagħtina dan!

16. David għala setaʼ ħassu skuraġġit?

¹⁶ Kultant nistgħu niffaċċjaw sitwazzjoni skuraġġanti li tisirqilna s-​sens taʼ sigurtà. Għal xi żmien, dan setaʼ kien minnu fil-​każ taʼ David, għax hu kanta: “O wlied il-​bnedmin, kemm se ddumu tinsultaw il-​glorja tiegħi, waqt li tibqgħu tħobbu l-​frugħat, waqt li tibqgħu tipprovaw issibu gidba?” (Salm 4:2) L-​espressjoni “wlied il-​bnedmin” b’mod evidenti tirreferi għall-​bnedmin b’mod mhux favorevoli. L-​għedewwa taʼ David kienu ‘jħobbu l-​frugħat.’ Fil-​Bibbja New International Version dan il-​vers jiġi tradott: “Kemm se ddumu tħobbu d-​delużjonijiet u tfittxu allat foloz?” Anki jekk inħossuna skuraġġiti minħabba dak li jkun għamel ħaddieħor, ejja nkomplu nitolbu bil-​ħrara u nuru fiduċja sħiħa fl-​uniku Alla veru.

17. Spjega kif nistgħu naġixxu fi qbil maʼ Salm 4:3.

¹⁷ Il-​fiduċja taʼ David f’Alla hi ċara mill-​kliem: “Kunu afu li Ġeħova jittrattah b’mod speċjali lil dak li hu leali lejh; Ġeħova jismaʼ meta nsejjaħlu.” (Salm 4:3) Il-​kuraġġ u l-​fiduċja sħiħa f’Ġeħova huma meħtiġin sabiex nibqgħu leali lejh. Pereżempju, dawn il-​kwalitajiet huma meħtiġin minn familja Kristjana meta qarib li ma jkunx niedem jiġi maqtugħ mis-​sħubija. Alla jonora lil dawk leali lejh u li jżommu mal-​mogħdijiet tiegħu. Għaldaqstant, il-​lealtà u l-​fiduċja sħiħa f’Ġeħova jippromwovu l-​ferħ fost il-​poplu tiegħu.—Salm 84:11, 12.

18. Fi qbil maʼ Salm 4:4, x’għandna nagħmlu jekk ġejna suġġetti għal kliem jew għemil li jkun weġġagħna?

¹⁸ Xi ngħidu jekk xi ħadd jgħid jew jagħmel xi ħaġa li tirritana? Nistgħu nibqgħu ferħanin jekk nagħmlu dak li jgħid David: “Jekk tibdew tħossukom aġitati, tidinbux. Tkellmu f’qalbkom, fis-​sodda tagħkom, u ibqgħu siekta.” (Salm 4:4) Jekk ġejna suġġetti għal kliem jew għemil li jkun weġġagħna, ejja ma nidinbux billi npattu. (Rum. 12:17-​19) Nistgħu nesprimu s-​sentimenti tagħna dwar il-​kwistjoni permezz tat-​talb meta nkunu fis-​sodda. Jekk nitolbu dwar il-​kwistjoni, nistgħu narawha f’dawl differenti u nkunu mqanqlin biex naħfru bi mħabba. (1 Pt. 4:8) Taʼ min jinnota l-​parir tal-​appostlu Pawlu f’dan ir-​rigward, li milli jidher hu bbażat fuq Salm 4:4: “Jekk tinkorlaw, tidinbux; tħallux ix-​xemx tinżel waqt li tkunu għadkom inkorlati, u tagħtux wisaʼ lix-​Xitan.”—Efes. 4:26, 27.

19. Salm 4:5 kif jistaʼ jgħinna b’konnessjoni mas-​sagrifiċċji spiritwali tagħna?

¹⁹ Meta saħaq dwar il-​bżonn li jkollna fiduċja f’Alla, David kanta: “Offru s-​sagrifiċċji tas-​sewwa, u afdaw f’Ġeħova.” (Salm 4:5)  Is-​sagrifiċċji offruti mill-​Iżraelin kienu jkunu taʼ valur biss jekk in-​nies kien ikollhom motivi xierqa. (Is. 1:11-​17) Sabiex is-​sagrifiċċji spiritwali tagħna jkunu aċċettabbli għal Alla, anki aħna jeħtieġ li jkollna motivi xierqa u li nafdaw fih kompletament.—Aqra Proverbji 3:5, 6; Ebrej 13:15, 16.

20. Xi tfisser il-​frażi ‘d-​dawl taʼ wiċċ Ġeħova’?

²⁰ David kompla jgħid: “Hemm ħafna li qed jgħidu: ‘Min se jurina affarijiet tajbin?’ Itfaʼ d-​dawl taʼ wiċċek fuqna, O Ġeħova.” (Salm 4:6) ‘Id-​dawl taʼ wiċċ Ġeħova’ jfisser favur divin. (Salm 89:15) Għalhekk, meta David talab: “Itfaʼ d-​dawl taʼ wiċċek fuqna,” hu ried ifisser ‘urina favur.’ Minħabba li nafdaw f’Ġeħova, aħna għandna l-​favur tiegħu u nħossu ferħ kbir hekk kif inkomplu nagħmlu r-​rieda tiegħu b’sens taʼ sigurtà.

21. Minn xiex niġu assigurati jekk nieħdu sehem bis-​sħiħ fix-​xogħol tal-​ħsad spiritwali li qed issir illum?

²¹ Minħabba li ħares ’il quddiem għall-​ferħ li jagħtina Alla u li jisboq il-​ferħ taʼ żmien il-​ħsad, David kanta lil Ġeħova: “Int tferraħli qalbi iktar milli ferħu huma meta kellhom ħafna qmuħ u nbid ġdid.” (Salm 4:7) Aħna nistgħu nibqgħu ċerti li se nesperjenzaw ferħ mill-​qalb jekk nieħdu sehem bis-​sħiħ fix-​xogħol tal-​ħsad spiritwali li qed isir illum. (Lq. 10:2) Bil-​“ġens kotran” taʼ wħud midlukin li qed jieħdu t-​tmexxija, issa qed nifirħu hekk kif in-​numru tal-​‘ħassada’ jkompli jikber. (Is. 9:3) Qiegħed int tieħu sehem b’mod tassew sodisfaċenti f’dan il-​ħsad taʼ ferħ?

Komplu Rsistu b’Fiduċja Sħiħa f’Alla

22. Fi qbil maʼ Salm 4:8, l-​Iżraelin kif swielhom taʼ ġid meta żammew mal-​Liġi t’Alla?

²² David ikkonkluda dan is-​salm bil-​kliem: “Nimtedd u norqod fil-​paċi, għax int waħdek, O Ġeħova, tħallini ngħammar fis-​sigurtà.” (Salm 4:8) Meta l-​Iżraelin żammew mal-​Liġi taʼ Ġeħova kienu fil-​paċi miegħu u ħassewhom fiż-​żgur. Pereżempju, “Ġuda u Israel baqgħu jgħammru fis-​sigurtà” matul il-​ħakma taʼ Salamun. (1 Slat. 4:25) Dawk li kienu jafdaw f’Alla kienu jgawdu paċi saħansitra anki meta l-​ġnus taʼ madwarhom kienu ostili. Bħal David, aħna norqdu fil-​paċi għax Alla jġegħelna nħossuna fiż-​żgur.

23. X’se nesperjenzaw jekk ikollna fiduċja sħiħa f’Alla?

²³ Ejja nkomplu nirsistu fis-​servizz taʼ Ġeħova. Jalla wkoll nitolbu bil-​fidi u b’hekk nesperjenzaw “il-​paċi t’Alla li tisboq kull ħsieb.” (Flp. 4:6, 7) X’ferħ kbir iġibilna dan! U jekk nibqgħu nafdaw bis-​sħiħ f’Ġeħova żgur nistgħu niffaċċjaw il-​futur b’sens taʼ sigurtà.

Int Kif Twieġeb?

• Liema problemi ffaċċja David minħabba Absalom?

• Salm 3 kif inissel sens taʼ sigurtà?

• Salm 4 b’liema modi jistaʼ jsaħħilna l-​fiduċja tagħna f’Ġeħova?

• Kif nistgħu nibbenefikaw jekk ikollna fiduċja sħiħa f’Alla?

[Mistoqsijiet taʼ Studju]

[Stampa f’paġna 29]

Anki meta ħarab minħabba Absalom, David kellu fiduċja f’Ġeħova

[Stampi f’paġna 32]

Għandek int fiduċja sħiħa f’Ġeħova?