JOHN (JACK) BARR, li qeda bħala membru tal-​Ġemgħa li Tiggverna tax-​Xhieda taʼ Ġeħova, temm il-​ħajja tiegħu fuq l-​art nhar is-​Sibt filgħodu, 4 taʼ Diċembru, 2010, fl-​età taʼ 97 sena. Hu ġie deskritt bħala “indokratur mill-​aħjar u ħabib għażiż.”

Ħuna Jack Barr twieled f’Aberdeen, l-​Iskozja. Hu kien l-​iżgħar fost tliet aħwa. Il-​ġenituri tiegħu kienu t-​tnejn li huma mill-​midlukin. Ħuna Barr spiss kien jitkellem b’għożża dwar it-​trobbija tiegħu fil-​familja; hu kien grat għall-​eżempju li jispikka li ħallewlu l-​għeżież ġenituri tiegħu.

Lejn il-​bidu tas-​snin tal-​adoloxxenza tiegħu, iż-​żagħżugħ Jack beda jsibha ferm diffiċli biex jitkellem maʼ nies li ma jafhomx. Però, hu ħadem iebes biex jegħleb din il-​problema. Fil-​fatt, darba l-​Ħadd waranofsinhar fl-​1927, meta Jack kellu 14-​il sena, stqarr maʼ missieru li kien lest biex jieħu sehem miegħu fix-​xogħol tal-​ippritkar minn bieb għal bieb. Dan kien il-​bidu tal-​bosta snin li qattaʼ fis-​servizz lil Ġeħova. Minn dakinhar sa meta miet, Ħuna Barr baqaʼ żeluż fl-​ippritkar tal-​aħbar tajba.

Inċident traġiku li kważi sewa ħajjet ommu l-​għażiża ġiegħel liż-​żagħżugħ Jack jaħseb bis-​serjetà dwar l-​iskop tal-​ħajja. B’hekk, fl-​1929 iddedika lilu nnifsu lil Ġeħova, u fl-​1934 issimbolizza d-​dedikazzjoni tiegħu mal-​ewwel opportunità li kellu. Imbagħad fl-​1939, hu sar membru tal-​familja taʼ Betel f’Londra, l-​Ingilterra. Dan kien il-​bidu tal-​karriera tiegħu fis-​servizz full-​time li damet 71 sena.

Fid-​29 t’Ottubru tal-​1960, Ħuna Barr daħal f’“relazzjoni prezzjuża ħafna,” bħalma kien isejħilha hu, billi żżewweġ lil Mildred Willett, li kienet ilha taqdi b’mod żeluż bħala pijuniera u missjunarja. Ħuna u Oħtna Barr kienu magħrufin bħala koppja miżżewġa eżemplari u devota, u hekk baqgħu sakemm Mildred temmet il-​ħajja tagħha fuq l-​art f’Ottubru tal-​2004. Matul il-​ħajja miżżewġa tagħhom, Ħuna u Oħtna Barr kienu jaqraw flimkien silta mill-​Bibbja kuljum.

Għal dawk li kienu jafuh, l-​isem Jack Barr ifakkarhom f’raġel li kien jagħti pariri għaqlin—dejjem bilanċjati, dejjem mogħtijin b’qalb tajba, u bbażati mill-​Iskrittura. Hu kien ħaddiem bieżel, indokratur li kien juri konsiderazzjoni u mħabba, u wkoll ħabib leali. Il-​kummenti, it-​taħditiet, u t-​talb tiegħu kienu juru kemm kellu mħabba għall-​verità u kemm kellu relazzjoni mill-​qrib maʼ Ġeħova.

Minkejja li se nimmissjaw lill-​għażiż Ħuna Barr, aħna nifirħu għax irċieva l-​għotja tiegħu tal-​immortalità. Dan il-​privileġġ kien qed iħares ’il quddiem għalih u spiss kien jitkellem dwaru; kien privileġġ li minn dejjem xtaq.—1 Kor. 15:53, 54. a

[Nota taʼ taħt]