BDIET fl-​1995 u damet sejra 15-​il sena. Matul dak iż-​żmien, il-​Kristjani veri fir-​Russja ġew attakkati minn dawk li jopponu l-​libertà tar-​reliġjon. Dawn l-​opponenti kienu determinati li jipprojbixxu lix-​Xhieda taʼ Ġeħova f’Moska u lil hinn minnha. Minkejja dan, Ġeħova raha ħaġa xierqa li jippremja l-​integrità tal-​għeżież ħutna Russi b’rebħa legali. Iżda, x’wassal għal din il-​ġlieda?

LIBERTÀ—SA FL-​AĦĦAR!

Matul l-​ewwel nofs tas-​snin 90, ħutna fir-​Russja reġgħu kisbu l-​libertà reliġjuża li tilfu fl-​1917. Fl-​1991, ġew reġistrati bħala reliġjon uffiċjali mill-​gvern tal-​Unjoni Sovjetika. Wara li l-​Unjoni Sovjetika nqasmet fi stati, ix-​Xhieda taʼ Ġeħova ġew reġistrati fil-​Federazzjoni Russa. Iktar minn hekk, ix-​Xhieda li kienu sofrew persekuzzjoni reliġjuża għaxriet taʼ snin qabel ġew rikonoxxuti uffiċjalment mill-​Istat bħala vittmi t’oppressjoni politika. Fl-​1993, id-​Dipartiment tal-​Ġustizzja taʼ Moska rreġistra l-​Komunità tax-​Xhieda taʼ Ġeħova f’Moska, kif jafuna legalment hemmhekk. F’din l-​istess sena saret effettiva wkoll il-​kostituzzjoni ġdida tar-​Russja, li tiggarantixxi l-​libertà tar-​reliġjon. Mhux taʼ b’xejn li ħu esklama, “Lanqas qatt ma ħlomna li se naraw libertà bħal din!” Imbagħad kompla jgħid, “Konna ilna 50 sena nistennewh dan!”

L-​aħwa fir-​Russja użaw sew dan iż-​“żmien favorevoli” billi żiedu fix-​xogħol tal-​ippritkar tagħhom, u ħafna wieġbu favorevolment. (2 Tim. 4:2) “In-​nies kienu interessati ħafna fir-​reliġjon,” innota osservatur. Fi żmien qasir, l-​għadd taʼ pubblikaturi, pijunieri, u kongregazzjonijiet immultiplika. Fil-​fatt, mill-​1990 sal-​1995, l-​għadd tax-​Xhieda f’Moska żdied minn xi 300 għal iktar minn 5,000! Minħabba dan, l-​għedewwa tax-​Xhieda taʼ Ġeħova bdew jinkwetaw. Madwar dan iż-​żmien, huma bdew jattakkaw, jew jopponu, lin-​nies taʼ Ġeħova fi qrati legali. Din il-​battalja kellha tgħaddi minn erbaʼ stadji mtawlin qabel ma finalment ġiet solvuta.

JIBDEW INVESTIGAZZJONIJIET KRIMINALI

L-​ewwel stadju tal-​battalja beda f’Ġunju tal-​1995. Grupp taʼ nies f’Moska li kien jappoġġa lill-​Knisja Ortodossa Russa akkuża uffiċjalment lil ħutna li kienu qed jipparteċipaw f’attivitajiet kriminali. Il-​grupp sostna li kien qed jaġixxi għan-​nom taʼ membri tal-​familji li ma ħadux pjaċir li l-​imseħbin tagħhom fiż-​żwieġ jew uliedhom kienu saru Xhieda. F’Ġunju tal-​1996, l-​investigaturi qalu li ma sabu ebda evidenza kontra x-​Xhieda taʼ Ġeħova. Imma l-​grupp taʼ Moska akkuża lil ħutna dwar l-​istess affarijiet erbaʼ darbiet oħra. U kull darba, l-​investigaturi fittxew evidenza, imma ma setgħu jsibu xejn kontra x-​Xhieda taʼ Ġeħova. Fl-​aħħar nett, nhar it-​13 t’April, 1998, l-​investigatur il-​ġdid għalaq il-​każ.

“Imma mbagħad,” jgħid avukat involut fil-​każ, “ġrat xi ħaġa stramba.” Għalkemm ir-​rappreżentanta tal-​prosekutur li kkonduċa din il-​ħames investigazzjoni ammettiet li ma kien hemm ebda evidenza t’attività kriminali, hi xorta waħda ssuġġeriet li għandha tinfetaħ kawża ċivili kontra ħutna. Kawża ċivili hi lment uffiċjali mressaq min-​nies,  mhux mill-​pulizija. Ir-​rappreżentanta allegat li l-​Komunità tax-​Xhieda taʼ Ġeħova f’Moska kisret il-​liġi nazzjonali u internazzjonali. Il-​prosekutur tas-​Circuit Amministrattiv tat-​Tramuntana taʼ Moska qabel magħha u ressaq ilment ċivili. a Fid-​29 taʼ Settembru, 1998, is-​smigħ beda fil-​Qorti tad-​Distrett taʼ Golovinsky f’Moska. It-​tieni stadju kien beda.

IL-​BIBBJA FIL-​QORTI

F’sala taʼ qorti ffollata fit-​Tramuntana taʼ Moska, il-​Prosekutriċi Tatyana Kondratyeva fetħet l-​attakk, billi użat liġi nazzjonali ffirmata fl-​1997. Din il-​liġi tgħid li l-​Kristjanità Ortodossa, l-​Iżlam, il-​Ġudaiżmu, u l-​Buddiżmu biss huma reliġjonijiet tradizzjonali. b L-​istess liġi, fil-​prattika, għamlitha diffiċli biex reliġjonijiet oħrajn jiksbu rikonoxximent legali. Tippermetti wkoll li l-​qrati jipprojbixxu reliġjonijiet li jippromwovu l-​mibegħda. Billi użat din il-​liġi, il-​prosekutriċi allegat b’mod falz li x-​Xhieda taʼ Ġeħova jippromwovu l-​mibegħda u jkissru lill-​familji, u għalhekk għandhom jiġu projbiti.

Avukat li ddefenda lil ħutna staqsa: “Min huma l-​individwi fil-​Kongregazzjoni taʼ Moska li huma ħatjin li kisru l-​liġi?” Il-​prosekutriċi ma setgħet issemmi lil ħadd. Iżda hi sostniet li l-​letteratura tax-​Xhieda taʼ Ġeħova tqanqal l-​għadwa reliġjuża. Biex tagħti prova tal-​punt tagħha, hi qrat mir-​rivisti tat-​Torri tal-​Għassa u Stenbaħ! u minn pubblikazzjonijiet oħrajn (ara hawn fuq). Meta ġiet mistoqsija b’liema mod dawn il-​pubblikazzjonijiet iqanqlu l-​għadwa, hi qalet: “Ix-​Xhieda taʼ Ġeħova jgħallmu li għandhom ir-​reliġjon vera.”

Avukat, wieħed minn ħutna, ta kopja tal-​Bibbja lill-​imħallef u kopja lill-​prosekutriċi u qara Efesin 4:5: “Mulej wieħed, fidi waħda, magħmudija waħda.” L-​imħallef, il-​prosekutriċi, u l-​avukat—kollha bil-​Bibbja f’idhom—ma damux ma kienu qed jiddiskutu skritturi bħal Ġwanni 17:18 u Ġakbu 1:27. Il-​qorti staqsiet: “Iqanqlu dawn l-​iskritturi l-​għadwa reliġjuża?” Il-​prosekutriċi qalet li ma kienx jimpurta x’kienet taħseb hi għax ma kinitx esperta tal-​Bibbja. L-​avukat wera xi pubblikazzjonijiet tal-​Knisja Ortodossa Russa li jikkritikaw bl-​aħrax lix-​Xhieda taʼ Ġeħova u staqsa: “Dawn l-​istqarrijiet jiksru l-​liġi?” Il-​prosekutriċi reġgħet qalet li ma kienx importanti x’kienet taħseb hi għaliex ma kinitx esperta tar-​reliġjon.

AKKUŻI BLA EVIDENZA

Meta l-​prosekutriċi akkużat lix-​Xhieda b’li jeqirdu l-​familji, hi qalet li raġuni waħda hi li ma jiċċelebrawx festi. Madankollu, iktar tard hi ammettiet li l-​liġi Russa ma tirrikjedix li ċ-​ċittadini jiċċelebraw festi. Ir-​Russi—inkluż ix-​Xhieda taʼ Ġeħova Russi—għandhom għażla. Il-​prosekutriċi sostniet ukoll li l-​organizzazzjoni tagħna ‘ċċaħħad lit-​tfal minn mistrieħ normali u minn ferħ emozzjonali.’  Xorta waħda, iktar tard hi ammettiet li qatt ma kienet tkellmet maʼ żgħażagħ imrobbijin minn ġenituri li huma Xhieda. Meta avukata staqsiet lill-​prosekutriċi jekk qatt kinitx attendiet il-​laqgħat tax-​Xhieda taʼ Ġeħova, hi wieġbet: “Ma kienx hemm għalfejn.”

Il-​prosekuzzjoni stiednet lil professur tal-​psikjatrija biex jagħti l-​opinjoni tiegħu fil-​qorti. Hu allega li min jaqra l-​letteratura tagħna jkollu problemi mentali. Hu ammetta li kien sempliċement ikkopja ħafna mill-​affarijiet li kiteb dwar dan il-​każ legali mid-​dokument li kiteb il-​Patrijarkat taʼ Moska, jew il-​mexxejja tal-​Knisja Ortodossa f’Moska. Qal ukoll li qatt ma kien ikkura pazjent li kien wieħed mix-​Xhieda taʼ Ġeħova. B’kuntrast, professur ieħor tal-​psikjatrija xehed fil-​qorti li kien studja lil iktar minn 100 Xhud f’Moska. Hu sab li l-​grupp kellu saħħa mentali normali, u żied jgħid li l-​membri tal-​grupp kienu saru iktar tolleranti għal reliġjonijiet oħrajn minn mindu kienu saru Xhieda.

REBĦA—IMMA MHIX FINALI

Nhar it-​12 taʼ Marzu, 1999, l-​imħallef ħatret ħames akkademiċi biex jistudjaw il-​letteratura tax-​Xhieda taʼ Ġeħova, u ssospendiet il-​ġuri. Imma qabel ma ġara dan, il-​Ministeru tal-​Ġustizzja għall-​pajjiż tar-​Russja wkoll ordna grupp taʼ akkademiċi biex jistudjaw il-​letteratura tagħna. Nhar il-​15 t’April, 1999, dan il-​grupp qal li ma sab xejn ħażin fil-​pubblikazzjonijiet tagħna. Għalhekk, fid-​29 t’April, 1999, il-​Ministeru tal-​Ġustizzja ġedded ir-​reġistrazzjoni nazzjonali tax-​Xhieda taʼ Ġeħova. Imma f’Moska, l-​imħallef xorta ddeċidiet li l-​ħames persuni li għażlet kellhom jistudjaw il-​letteratura tagħna. Dan ħalaq sitwazzjoni stramba—ix-​Xhieda taʼ Ġeħova kienu rikonoxxuti nazzjonalment mill-​Ministeru tal-​Ġustizzja tar-​Russja bħala reliġjon approvata li tħares  il-​liġi imma, fl-​istess ħin, kienu qed jiġu investigati mid-​Dipartiment tal-​Ġustizzja taʼ Moska għax oħrajn akkużawhom li kienu qed jiksru l-​liġi!

Għaddew kważi sentejn qabel ma reġaʼ beda l-​ġuri, u nhar it-​23 taʼ Frar, 2001, l-​Imħallef Yelena Prokhorycheva waslet għal verdett. Wara li kkunsidrat dak li sab il-​grupp li kienet ħatret, hi ddeċidiet li ma kienx hemm raġuni biex jiġu projbiti l-​attivitajiet tax-​Xhieda taʼ Ġeħova f’Moska. Fl-​aħħar nett, ġie stabbilit legalment li ħutna kienu innoċenti minn kull akkuża miġjuba kontrihom! Madankollu, il-​prosekutriċi rrifjutat il-​verdett u appellat għal quddiem il-​Qorti tal-​Belt taʼ Moska. Tliet xhur wara, fit-​30 taʼ Mejju, 2001, din il-​qorti annullat id-​deċiżjoni tal-​Imħallef Prokhorycheva. Il-​qorti ordnat li jerġaʼ jibda każ legali ieħor bl-​istess prosekutriċi imma bi mħallef differenti. Kien se jibda t-​tielet stadju.

TELFA—IMMA MHIX FINALI

Nhar it-​30 t’Ottubru, 2001, l-​Imħallef Vera Dubinskaya tat bidu għal ġuri ieħor. c Il-​Prosekutriċi Kondratyeva akkużat għal darb’oħra lix-​Xhieda taʼ Ġeħova li kienu qed jippromwovu l-​mibegħda, imma mbagħad żiedet li l-​projbizzjoni fuq il-​komunità legali tax-​Xhieda taʼ Ġeħova kienet mezz biex jiġu protetti d-​drittijiet tax-​Xhieda f’Moska! B’risposta għal din l-​istqarrija stramba, l-​10,000 Xhud f’Moska minnufih iffirmaw petizzjoni li fiha talbu lill-​qorti biex tirrifjuta l-​“protezzjoni” offruta mill-​prosekutriċi.

Il-​prosekutriċi stqarret li ma kellhiex bżonn tipprovdi evidenza biex turi li x-​Xhieda kienu ħatjin taʼ għemil ħażin. Hi qalet li l-​ġuri kien dwar il-​letteratura u t-​twemmin tax-​Xhieda taʼ Ġeħova, u mhux dwar l-​attivitajiet tagħhom. Hi ħabbret li kienet se tippreżenta lil kelliemi tal-​Knisja Ortodossa Russa bħala xhud espert. Naturalment, dan l-​avviż ikkonferma li l-​membri tal-​kleru kienu dawk li riedu jipprojbixxu lix-​Xhieda. Nhar it-​22 taʼ Mejju, 2003, l-​imħallef ordnat li grupp taʼ esperti—għal darb’oħra—għandhom jistudjaw il-​pubblikazzjonijiet tax-​Xhieda taʼ Ġeħova.

Fis-​17 taʼ Frar, 2004, il-​ġuri ltaqaʼ biex jirrivedi r-​riżultati tal-​istudju tal-​grupp. L-​esperti sabu li l-​pubblikazzjonijiet tagħna jinkuraġġixxu lill-​qarrejja biex “iħarsu l-​arranġament tal-​familja u taż-​żwieġ” u l-​istqarrija li l-​letteratura tagħna tippromwovi l-​mibegħda kienet “bla bażi.” Studjużi oħrajn qablu. Professur tal-​istorja reliġjuża ġie mistoqsi: “Ix-​Xhieda taʼ Ġeħova għala jippritkaw?” Hu wieġeb lill-​qorti: “Ix-​xogħol tal-​ippritkar hu obbligu għal Kristjan. Dan hu dak li jgħid l-​Evanġelju u dak li Kristu inkariga lid-​dixxipli tiegħu biex jagħmlu—‘morru u ppritkaw fl-​artijiet kollha.’” Minkejja dan, fis-​26 taʼ Marzu, 2004, l-​imħallef ipprojbiet l-​attivitajiet tax-​Xhieda taʼ Ġeħova f’Moska. Fis-​16 taʼ Ġunju, 2004, il-​Qorti tal-​Belt taʼ Moska appoġġat dik id-​deċiżjoni. d Meta kkummenta fuq il-​verdett, ħu li kien ilu Xhud osserva: “Fi żminijiet Sovjetiċi, Russu kellu jkun ateu. Illum, Russu għandu jkun Ortodoss.”

L-​aħwa kif irreaġixxew għall-​projbizzjoni? Bħal Neħemija tal-​qedem. Fi żmienu, meta l-​għedewwa tal-​poplu t’Alla opponew l-​isforzi tiegħu biex jerġaʼ jibni s-​sur taʼ Ġerusalemm, Neħemija u l-​poplu tiegħu ma ħallew ebda għamla taʼ oppożizzjoni tiżvijahom. Minflok, ‘komplew jibnu’ u “kien  għad għandhom qalb jaħdmu.” (Neħ. 4:1-​6) Bl-​istess mod, ħutna f’Moska ma ħallewx lill-​opponenti jiżvijawhom mix-​xogħol li għandu jitwettaq illum—l-​ippritkar tal-​aħbar tajba. (1 Pt. 4:12, 16) Huma kienu fiduċjużi li Ġeħova kien se jieħu ħsiebhom, u kienu lesti li jidħlu fir-​rabaʼ stadju f’din il-​battalja twila.

ŻIEDA FL-​OSTILITÀ

Nhar il-​25 t’Awwissu, 2004, ħutna bagħtu petizzjoni lil Vladimir Putin, li dak iż-​żmien kien president tar-​Russja. Il-​petizzjoni, li esprimiet tħassib profond dwar il-​projbizzjoni, kienet tikkonsisti minn 76 volum u kien fiha iktar minn 315,000 firma. Fl-​istess żmien, il-​mexxejja tal-​Knisja Ortodossa Russa qalu: “Aħna assolutament kontra l-​attivitajiet tax-​Xhieda taʼ Ġeħova.” Mexxej Musulman qal li l-​projbizzjoni kienet “sinifikanti u ġrajja pożittiva.”

Xi nies fir-​Russja emmnu l-​akkużi foloz li nġiebu kontra x-​Xhieda taʼ Ġeħova u bdew jattakkawhom. Xi Xhieda li kienu qed jieħdu sehem fix-​xogħol tal-​ippritkar f’Moska ġew imsawtin bil-​ponn u bis-​sieq minn opponenti. Raġel mgħaddab ġera wara oħt u taha daqqa taʼ sieq tant vjolenti fis-​sinsla taʼ daharha li hi waqgħet u ħabtet rasha. Kellha bżonn l-​għajnuna medika; madankollu, il-​pulizija ma ħadu ebda azzjoni kontra dak li attakkaha. Il-​pulizija arrestaw lil ħafna Xhieda, ittrattawhom bħala kriminali, u żammewhom maqfulin il-​ħabs matul il-​lejl. Peress li kienu beżgħanin li jitilfu l-​impjieg, in-​nies li kienu jieħdu ħsieb il-​bini li ħutna kienu jużawh għal-​laqgħat tagħhom ma ridux jikruhulhom iktar. Fi żmien qasir, għadd taʼ kongregazzjonijiet tilfu l-​postijiet mikrijin fejn kienu jiltaqgħu. Erbgħin kongregazzjoni kellhom jużaw biss erbaʼ Swali tas-​Saltna li kienu jinsabu f’bini wieħed. Kongregazzjoni waħda li kienet tuża din il-​faċilità  kellha tagħmel il-​Laqgħa Pubblika fis-​sebgħa u nofs taʼ filgħodu. “Biex jattendu, il-​pubblikaturi kellhom iqumu fil-​ħamsa taʼ filgħodu,” irrakkonta indokratur li jivvjaġġa, “imma dan għamluh minn jeddhom għal iktar minn sena.”

“BIEX TINGĦATA XIEHDA”

Biex jistabbilixxu li l-​projbizzjoni f’Moska kienet illegali, f’Diċembru tal-​2004, l-​avukati tagħna talbu l-​għajnuna tal-​Qorti Ewropea tad-​Drittijiet tal-​Bniedem. (Ara l-​kaxxa “Għala Verdett Russu Jiġi Rivedut fi Franza,” f’paġna 6.) Sitt snin wara, fl-​10 taʼ Ġunju, 2010, il-​Qorti ddeċidiet b’vot unanimu li x-​Xhieda taʼ Ġeħova ma kienu ħatjin taʼ ebda akkuża! e Il-​Qorti kkunsidrat l-​akkużi kollha li saru kontrina u sabet li kienu totalment bla bażi. Iddeċidiet ukoll li l-​gvern tar-​Russja kellu jtemm il-​projbizzjoni u jagħmel kulma kien possibbli biex jikkoreġi dak li għamel lix-​Xhieda.—Ara l-​kaxxa “Il-​Ġudizzju tal-​Qorti,” f’paġna 8.

Il-​Qorti ddeċidiet li l-​Konvenzjoni Ewropea Dwar id-​Drittijiet tal-​Bniedem tipproteġi l-​attivitajiet tax-​Xhieda taʼ Ġeħova. Din id-​deċiżjoni ma tapplikax biss għar-​Russja. Tapplika wkoll għas-​46 nazzjon ieħor li huma membri tal-​Kunsill tal-​Ewropa. Ħafna mħallfin, leġislaturi, u nies madwar id-​dinja li jistudjaw id-​drittijiet tal-​bniedem se jinteressaw ruħhom ukoll f’din id-​deċiżjoni. Għala? Meta waslet għad-​deċiżjoni tagħha, il-​Qorti rreferiet mhux biss għal tmien deċiżjonijiet li kienet ħadet qabel favur ix-​Xhieda taʼ Ġeħova, imma wkoll għal disaʼ rebħiet li kellhom ix-​Xhieda taʼ Ġeħova quddiem l-​ogħla qrati tal-​Afrika t’Isfel, tal-​Arġentina, tal-​Ġappun, tal-​Istati Uniti, tal-​Kanada, tar-​Renju Unit, tar-​Russja, u taʼ Spanja. Ix-​Xhieda taʼ Ġeħova madwar id-​dinja kollha issa jistgħu jużaw id-​deċiżjoni tal-​Qorti biex jiddefendu l-​qima tagħhom.

Ġesù qal lis-​segwaċi tiegħu: “Iressqukom quddiem gvernaturi u slaten minħabba fija, biex tingħata xiehda lilhom u lill-​ġnus.” (Mt. 10:18) Il-​battalja legali li seħħet matul l-​aħħar 15-​il sena tat lil ħutna l-​opportunità li jagħmlu magħruf l-​isem taʼ Ġeħova bħal qatt qabel f’Moska u f’postijiet oħrajn. L-​attenzjoni li ngħatat lix-​Xhieda mill-​investigazzjonijiet, mill-​każi fil-​qrati, u mill-​verdett taʼ qorti internazzjonali kienet tabilħaqq “biex tingħata xiehda” u kkontribwiet għall-​“avanz taʼ l-​aħbar tajba.” (Flp. 1:12) Fil-​fatt, meta x-​Xhieda f’Moska jieħdu sehem fix-​xogħol tal-​ippritkar illum, ħafna inkwilini jirreaġixxu billi jgħidu, “Imma intom m’intomx projbiti?” Din il-​mistoqsija spiss tagħti opportunità lil ħutna biex jagħtu lill-​inkwilini iktar informazzjoni dwar it-​twemmin tagħna. Xejn u ħadd ma jistaʼ jwaqqafna mill-​attività tagħna tal-​ippritkar tas-​Saltna. Aħna nitolbu lil Ġeħova biex ikompli jgħin lil ħutna fir-​Russja li huma kuraġġużi u li nħobbuhom ħafna.

[Noti taʼ taħt]

[Kaxxa/Stampa f’paġna 6]

Għala Verdett Russu Jiġi Rivedut fi Franza

Fit-​28 taʼ Frar, 1996, ir-​Russja ffirmat il-​Konvenzjoni Ewropea Dwar id-​Drittijiet tal-​Bniedem. (Fil-​5 taʼ Mejju, 1998, ir-​Russja kkonfermat il-​Konvenzjoni.) Billi ffirma dan it-​trattat, il-​gvern tar-​Russja ddikjara li s-​sudditi tiegħu għandhom

‘id-​dritt għal-​libertà tar-​reliġjon u d-​dritt li jipprattikaw ir-​reliġjon tagħhom fid-​dar u fil-​pubbliku u li jbiddlu r-​reliġjon tagħhom jekk ikunu jridu jagħmlu hekk.’—Artiklu 9.

‘id-​dritt li jgħidu u jiktbu b’mod responsabbli dak li jaħsbu u li jagħtu informazzjoni lil ħaddieħor.’—Artiklu 10.

‘id-​dritt li jieħdu sehem f’laqgħat paċifiċi.’—Artiklu 11.

Individwi jew organizzazzjonijiet li huma vittmi tal-​ksur tat-​trattat u li użaw il-​mezzi legali kollha taʼ pajjiżhom jistgħu jieħdu l-​każ tagħhom quddiem il-​Qorti Ewropea tad-​Drittijiet tal-​Bniedem fi Strasbourg, Franza (murija hawn fuq). Din hi magħmula minn 47 imħallef—numru ekwivalenti għan-​numru taʼ pajjiżi li ffirmaw il-​Konvenzjoni Ewropea Dwar id-​Drittijiet tal-​Bniedem. Il-​ġudizzji tal-​Qorti huma obbligatorji. Pajjiżi li ffirmaw it-​trattat iridu jaġixxu fi qbil mal-​ġudizzji.

[Kaxxa f’paġna 8]

Il-​Ġudizzju tal-​Qorti

Hawnhekk hawn tliet siltiet qosra mill-​ġudizzju tal-​Qorti.

Akkuża waħda kienet li x-​Xhieda taʼ Ġeħova jkissru lill-​familji. Il-​Qorti ddeċidiet mod ieħor. Din qalet:

“Hija r-​reżistenza tal-​membri tal-​familja li mhumiex reliġjużi u l-​fatt li ma jkunux lesti jaċċettaw u jirrispettaw il-​libertà tal-​qarib reliġjuż tagħhom biex jesprimi u jipprattika r-​reliġjon tiegħu li huma s-​sors tal-​konflitt.”—Para. 111.

Il-​Qorti ma sabet ukoll ebda evidenza li tappoġġa l-​akkuża tal-​“kontroll tal-​moħħ,” u qalet:

“Il-​Qorti ssibha ħaġa tal-​għaġeb li l-​qrati [Russi] ma semmewx l-​isem taʼ individwu wieħed li d-​dritt tiegħu għal-​libertà tal-​kuxjenza kien inkiser, skont kif ġie allegat, permezz taʼ dawn il-​metodi.”—Para. 129.

Akkuża oħra stqarret li peress li ma jaċċettawx trasfużjonijiet tad-​demm, ix-​Xhieda taʼ Ġeħova jagħmlu l-​ħsara lis-​saħħa tal-​kredenti. Il-​Qorti m’aċċettatx l-​akkuża, billi qalet:

“Il-​libertà li wieħed jaċċetta jew jirrifjuta kura medika speċifika, jew li jagħżel forma oħra taʼ kura, hija vitali għall-​prinċipji tal-​libertà tal-​għażla u tal-​awtonomija persunali. Pazjent adult u kompetenti hu ħieles li jiddeċiedi, perkażu, jekk għandux jagħmel xi operazzjoni jew jieħu xi kura jew le jew, bl-​istess raġunar, jekk għandux jieħu trasfużjoni tad-​demm.”—Para. 136.