X’Inhu l-Mistrieħ t’Alla?
“Baqaʼ mistrieħ tas-Sabat għan-nies t’Alla.”—EBR. 4:9.
1, 2. (a) X’nitgħallmu minn Ġenesi 2:2? (b) Liema mistoqsijiet se nwieġbu?
MILL-EWWEL kapitlu tal-Ġenesi nitgħallmu li matul sitt ijiem, Alla ħejja l-art biex in-nies jgħixu fuqha. Dawn ma kinux jiem taʼ 24 siegħa kull wieħed imma perijodi taʼ żmien ħafna itwal. Rigward it-tmiem taʼ kull wieħed minn dawn il-perijodi, il-Bibbja tgħid: “Kien hemm fil-għaxija u kien hemm fil-għodu.” (Ġen. 1:5, 8, 13, 19, 23, 31) Madankollu, rigward is-sebaʼ jum, il-Bibbja tgħid: “U sas-seba’ jum Alla lesta x-xogħol tiegħu li kien għamel, u fis-seba’ jum beda jistrieħ mix-xogħol kollu tiegħu li kien għamel.”—Ġen. 2:2.
2 Meta l-ktieb tal-Ġenesi qal li Alla beda jistrieħ kien ifisser li Alla kien għadu qed jistrieħ f’dak iż-żmien. Allura nistgħu ngħidu li meta Mosè kiteb il-ktieb tal-Ġenesi, fis-sena 1513 Q.E.K., Alla kien għadu qed jistrieħ. Għadu għaddej il-jum taʼ mistrieħ t’Alla? Jekk iva, nistgħu nidħlu fih illum? It-tweġibiet għal dawn il-mistoqsijiet huma importanti ħafna għalina.
Ġeħova Għadu Qed Jistrieħ?
3. Il-kliem taʼ Ġesù fi Ġwanni 5:16, 17, kif juri li kien għadu s-sebaʼ jum matul iż-żmien taʼ Ġesù?
3 Hemm żewġ raġunijiet għala nistgħu ngħidu li kien għadu s-sebaʼ jum matul iż-żmien taʼ Ġesù u tal-ewwel Kristjani. L-ewwel, ikkunsidra l-kliem taʼ Ġesù lill-opponenti tiegħu li kkritikawh talli fejjaq fis-Sabat, li qisuh bħala tip taʼ xogħol. Biex iwiġibhom, Ġesù qalilhom: “Missieri baqaʼ jaħdem s’issa, u jien nibqaʼ naħdem.” (Ġw. 5:16, 17) X’kien il-punt? Ġesù kien qed jiġi akkużat li kien qed jaħdem fis-Sabat. Ir-risposta tiegħu: “Missieri baqaʼ jaħdem” wieġbet din l-akkuża. Sa ċertu punt, Ġesù kien qed jgħid lil dawk li kkritikawh: ‘Missieri u jien qed nieħdu sehem fl-istess tip taʼ xogħol. Ladarba Missieri baqaʼ jaħdem matul is-Sabat tiegħu li ilu għaddej millenji sħaħ, huwa aċċettabbli għalija li nibqaʼ naħdem, anki fis-Sabat.’ B’hekk, il-kliem taʼ Ġesù juri li rigward l-art, fi żmienu kien għadu s-sebaʼ jum, jiġifieri, il-jum taʼ mistrieħ t’Alla. a
4. Minn dak li qal Pawlu, kif nafu li s-sebaʼ jum kien għadu għaddej fi żmienu?
4 Hemm raġuni oħra għala nafu li kien għadu s-sebaʼ jum matul iż-żmien taʼ Ġesù u tal-ewwel Kristjani. Meta kkwota minn Ġenesi 2:2 rigward il-mistrieħ t’Alla, taħt ispirazzjoni, Pawlu kiteb: “Aħna li eżerċitajna l-fidi nidħlu fil-mistrieħ.” (Ebr. 4:3, 4, 6, 9) Mela s-sebaʼ jum kien għadu għaddej fi żmien Pawlu. Is-sebaʼ jum meta jintemm?
5. (a) X’kien l-iskop tas-sebaʼ jum? (b) Alla meta se jwettaq l-iskop tiegħu?
5 Sabiex inwieġbu din il-mistoqsija, irridu niftakru l-iskop tas-sebaʼ jum. Ġenesi 2:3 jispjega x’inhu: “Alla bierek is-seba’ jum u qaddsu.” Ġeħova għamel dan il-jum sagru għax għażlu biex ikun il-jum li fih iwettaq l-iskop tiegħu għall-art. Dan l-iskop hu li fuq l-art jgħixu rġiel u nisa ubbidjenti li jieħdu ħsiebha u kulma hemm fiha. (Ġen. 1:28) Ir-raġuni għala Alla Ġeħova u Ġesù Kristu, li hu s-“Sid tas-Sabat,” ‘baqgħu jaħdmu s’issa’ hi biex l-iskop t’Alla għall-art jagħmluh reali. (Mt. 12:8) Għalhekk, il-jum taʼ mistrieħ t’Alla se jkompli sakemm iwettaq l-iskop tiegħu. Dan se jkun fi tmiem ir-Renju t’Elf Sena taʼ Kristu.
Taqax “fl-Istess Mudell taʼ Diżubbidjenza”
6. (a) Liema eżempji huma taʼ twissija għalina? (b) X’lezzjoni nistgħu nitgħallmu minn dawn l-eżempji?
6 Alla b’mod ċar qal lil Adam u Eva x’kien l-iskop tiegħu għall-art, imma huma aġixxew kontra l-iskop tiegħu. Wara Adam u Eva, miljuni taʼ nies oħrajn ukoll kienu diżubbidjenti. Saħansitra l-poplu magħżul t’Alla, il-ġens t’Iżrael, waqaʼ fl-istess mudell taʼ diżubbidjenza. U Pawlu wissa lill-Kristjani fi żmienu li xi wħud minnhom setgħu jsiru diżubbidjenti bħall-Iżraelin. Hu kiteb: “Għalhekk, ħa nagħmlu l-almu tagħna biex nidħlu f’dak il-mistrieħ, li ma jmurx xi ħadd jaqaʼ fl-istess mudell taʼ diżubbidjenza.” (Ebr. 4:11) Innota li Pawlu jagħmel konnessjoni bejn li wieħed ikun diżubbidjenti u bejn li ma jidħolx fil-mistrieħ t’Alla. Dan xi jfisser għalina? Ifisser dan li jekk b’xi mod naġixxu kontra l-iskop t’Alla m’aħniex se nidħlu fil-mistrieħ t’Alla? Huwa importanti ħafna għalina li nkunu nafu t-tweġiba għal din il-mistoqsija, u se nitkellmu iktar dwarha f’dan l-artiklu. Imma l-ewwel se nitkellmu dwar l-eżempju ħażin tal-Iżraelin u għala ma daħlux fil-mistrieħ t’Alla.
“Ma Jidħlux fil-Mistrieħ Tiegħi”
7. (a) Ġeħova x’kellu f’moħħu meta ħeles lill-Iżraelin mill-jasar fl-Eġittu? (b) X’kien mistenni mill-Iżraelin?
7 Fis-sena 1513 Q.E.K., Ġeħova qal lill-qaddej tiegħu Mosè x’kien l-iskop tiegħu għall-Iżraelin. Alla qal: “Se ninżel neħlishom minn id l-Eġizzjani u ntellagħhom u noħroġhom minn dik l-art [l-Eġittu] għal ġo art tajba u spazjuża, art li tnixxi ħalib u għasel.” (Eżo. 3:8) Ġeħova ħeles lill-Iżraelin mill-Eġittu biex jagħmilhom il-poplu tiegħu, sewwasew bħalma kien wiegħed lil Abraham. (Ġen. 22:17) Lill-Iżraelin, Alla tahom liġijiet li kienu se jippermettulhom igawdu relazzjoni paċifika miegħu. (Is. 48:17, 18) Qal lill-Iżraelin: “Jekk tassew tobdu kliemi u tħarsu l-patt tiegħi, imbagħad issiru l-proprjetà speċjali tiegħi mill-popli l-oħrajn kollha, għax l-art kollha hi tiegħi.” (Eżo. 19:5, 6) Allura l-Iżraelin setgħu jkunu l-poplu t’Alla biss jekk jobdu l-liġijiet tiegħu.
8. L-Iżraelin x’opportunitajiet kellhom kieku obdew lil Alla?
8 Aħseb dwar l-opportunitajiet li kellhom l-Iżraelin! Ġeħova wegħedhom li jekk jobduh, hu kien se jbierek l-għelieqi, l-għelieqi tad-dwieli, u l-annimali tagħhom. Wegħedhom ukoll li jipproteġihom mill-għedewwa tagħhom. (Aqra l-1 Slaten 10:23-27.) Kellhom l-opportunità li jkunu meħlusin mill-ħakma taʼ ġnus oħrajn, anki matul iż-żmien taʼ Ġesù meta r-Rumani ħakmu fuq ħafna ġnus. Ġeħova ried li l-ġens t’Iżrael ikun eżempju tajjeb għal ġnus oħrajn. Hu ried lil kulħadd jifhem b’mod ċar li dawk li jobdu lilu, l-Alla l-veru, se jirċievu barkiet mingħandu.
9, 10. (a) Ix-xewqa tal-Iżraelin li jmorru lura l-Eġittu, għala kienet kwistjoni serja? (b) Kieku l-Iżraelin marru lura l-Eġittu, il-qima tagħhom kif setgħet ġiet effettwata?
9 L-Iżraelin kellhom l-opportunità speċjali li jħallu lil Ġeħova jużahom biex iwettaq l-iskop tiegħu. Setgħu jirċievu l-barkiet taʼ Ġeħova, u wkoll iġibu barkiet lill-familji kollha tal-art. (Ġen. 22:18) Imma l-biċċa l-kbira mill-Iżraelin ma kkunsidrawhiex importanti l-opportunità li jkunu l-ġens t’Alla u li jkunu t’eżempju għal ġnus oħrajn. Saħansitra qalu li xtaqu jmorru lura l-Eġittu! (Aqra Numri 14:2-4.) Imma kieku marru lura, ma setgħux iqimu lil Ġeħova bil-mod kif xtaq hu u ma setgħux ikunu t’eżempju għal ġnus oħrajn. Kieku reġgħu saru lsiera fl-Eġittu, ma setgħux ikunu liberi biex jobdu l-Liġi t’Alla u jirċievu l-maħfra għal dnubiethom. Meta qalu li riedu jmorru lura l-Eġittu, kienu qed jaħsbu biss fihom infushom. Ma kinux qed jaħsbu dwar Alla u l-iskop tiegħu. Mhux taʼ b’xejn li Ġeħova qal dan dwar dawk ir-ribelli: “Ħassejtni diżgustat b’din il-ġenerazzjoni u għedt, ‘Dejjem jiżvijaw fi qlubhom, u ma sarux jafu triqati.’ Għalhekk, ħlift fir-rabja tiegħi, ‘Ma jidħlux fil-mistrieħ tiegħi.’”—Ebr. 3:10, 11; Salm 95:10, 11.
10 Ix-xewqa tagħhom li jmorru lura l-Eġittu wriet li ma kinux japprezzaw il-barkiet li rċivew mingħand Ġeħova. Minflok, dawk l-Iżraelin diżubbidjenti riedu l-ikel tajjeb li kellhom fl-Eġittu. (Num. 11:5) Kienu bħal Għesaw, li m’apprezzax id-dritt tiegħu bħala l-ewwel imwieled u biegħu għal platt ikel.—Ġen. 25:30-32; Ebr. 12:16.
11. Peress li l-Iżraelin li telqu mill-Eġittu ma wrewx fidi, biddel dan l-iskop taʼ Ġeħova?
11 Għalkemm dawk l-Iżraelin li telqu mill-Eġittu ma wrewx fidi f’Ġeħova, hu ma biddilx l-iskop tiegħu għal Iżrael. Uliedhom kienu iktar ubbidjenti mill-ġenituri tagħhom. Fi qbil mal-kmand taʼ Ġeħova, huma daħlu fl-Art Imwiegħda u bdew jirbħuha. F’Ġożwè 24:31 naqraw: “Israel kompla jaqdi lil Ġeħova l-jiem kollha taʼ Ġożwè u l-jiem kollha tax-xjuħ li baqgħu ħajjin wara Ġożwè u li kienu jafu l-għemejjel kollha li Ġeħova għamel għal Israel.”
12. Kif nafu li hu possibbli li nidħlu fil-mistrieħ t’Alla llum?
12 Madankollu, din il-ġenerazzjoni ubbidjenti maż-żmien mietet u minflokha telgħet ġenerazzjoni “li ma kinitx taf lil Ġeħova jew dak li kien għamel għal Israel.” Għalhekk, bdew jagħmlu “dak li hu ħażin f’għajnejn Ġeħova u jaqdu lill-Bagħalim.” (Mħ. 2:10, 11) Minħabba li dawn l-Iżraelin kienu diżubbidjenti, ma baqgħux fil-paċi m’Alla. Allura l-Art Imwiegħda ma kinitx “post taʼ mistrieħ” għalihom. Pawlu kiteb hekk dwar dawn l-Iżraelin: “Kieku Ġożwè daħħalhom f’post taʼ mistrieħ, Alla ma kienx iktar tard jitkellem dwar jum ieħor.” Imbagħad qal: “Għalhekk, baqaʼ mistrieħ tas-Sabat għan-nies t’Alla.” (Ebr. 4:8, 9) In-“nies t’Alla” li Pawlu tkellem dwarhom kienu Kristjani. Ifisser dan li l-Kristjani setgħu jidħlu fil-mistrieħ t’Alla? Dażgur li setgħu—kemm il-Kristjani Lhud kif ukoll il-Kristjani mhux Lhud!
Xi Wħud Ma Jidħlux fil-Mistrieħ t’Alla
13, 14. (a) Fi żmien Mosè, l-Iżraelin x’kellhom jagħmlu biex jidħlu fil-mistrieħ t’Alla? (b) Fi żmien Pawlu, il-Kristjani x’kellhom jagħmlu biex jidħlu fil-mistrieħ t’Alla?
13 Meta Pawlu kiteb lill-Kristjani Ebrej, hu kien konċernat li xi wħud fosthom ma kinux qed jikkooperaw mal-iskop t’Alla. (Aqra Ebrej 4:1.) F’liema sens? Ironikament, kienu għadhom qed jobdu xi affarijiet fil-Liġi Mosajka. Għal xi 1,500 sena, kull Iżraeli li xtaq jgħix fi qbil mal-iskop t’Alla kellu jobdi l-Liġi. Imma wara li miet Ġesù, ma kienx għad kellhom bżonn il-Liġi Mosajka. Ċerti Kristjani ma fehmuhx dan, u għalhekk kienu jemmnu li xorta kellhom bżonn jobdu xi partijiet mil-Liġi. b
14 Pawlu spjega lil dawn il-Kristjani Ebrej li Ġesù kien qassis il-kbir aħjar minn kwalunkwe qassis il-kbir imperfett. Hu wera li l-patt il-ġdid kien aħjar mill-patt maʼ Iżrael. U wera wkoll li t-tempju l-kbir taʼ Ġeħova kien ‘akbar u iktar perfett’ mit-tempju ‘magħmul bl-idejn.’ (Ebr. 7:26-28; 8:7-10; 9:11, 12) Pawlu uża l-eżempju tas-Sabat fil-Liġi Mosajka biex jispjega kif il-Kristjani jistgħu jidħlu fil-jum taʼ mistrieħ taʼ Ġeħova. Hu kiteb: “Baqaʼ mistrieħ tas-Sabat għan-nies t’Alla. Għax il-bniedem li daħal fil-mistrieħ t’Alla wkoll straħ mill-għemejjel tiegħu stess, bħalma Alla straħ minn tiegħu.” (Ebr. 4:8-10) Dawk il-Kristjani Ebrej kellhom ineħħuha minn moħħhom li setgħu jiksbu l-approvazzjoni taʼ Ġeħova billi jagħmlu għemejjel ibbażati fuq il-Liġi Mosajka. Minn Pentekoste tas-sena 33 E.K. ’l hawn, l-approvazzjoni taʼ Ġeħova hi għotja li jagħti b’ġenerożità lil dawk li juru l-fidi f’Ġesù Kristu.
15. L-ubbidjenza għala hi essenzjali biex nidħlu fil-mistrieħ t’Alla?
15 L-Iżraelin fi żmien Mosè, għala ma daħlux fl-Art Imwiegħda? Għax m’obdewx lil Ġeħova. Xi Kristjani fi żmien Pawlu, għala ma daħlux fil-mistrieħ t’Alla? Għall-istess raġuni. M’obdewx lil Ġeħova. M’emmnux li Ġeħova issa ried li n-nies tiegħu jqimuh b’mod differenti u ma jibqgħux jobdu l-Liġi Mosajka.
Kif Nistgħu Nidħlu fil-Mistrieħ t’Alla Llum
16, 17. (a) Xi jfisser li nidħlu fil-mistrieħ t’Alla llum? (b) X’se niddiskutu fl-artiklu li jmiss?
16 Ħadd minna llum ma jemmen li l-Kristjani għandhom jobdu l-Liġi Mosajka biex jiksbu s-salvazzjoni. Il-kliem taʼ Pawlu lill-Efesin hu ċar daqs il-kristall: “Tabilħaqq, b’din il-qalb tajba mhix mistħoqqa ġejtu salvati permezz tal-fidi; u dan mhux bis-saħħa tagħkom, imma hi l-għotja t’Alla. Le, m’huwiex bis-saħħa taʼ l-għemejjel.” (Efes. 2:8, 9) Allura, xi jfisser għall-Kristjani li jidħlu fil-mistrieħ t’Alla? Ġeħova warrab is-sebaʼ jum—il-jum taʼ mistrieħ tiegħu—sabiex iwettaq l-iskop tiegħu għall-art u għall-bnedmin ubbidjenti. Permezz tal-organizzazzjoni tiegħu, Ġeħova jgħidilna dwar l-iskop tiegħu u dak li jrid minna. Aħna nistgħu nidħlu fil-mistrieħ taʼ Ġeħova jekk nobduh u naħdmu id f’id mal-organizzazzjoni tiegħu.
17 Imma jekk ma nobdux lill-ilsir leali u għaqli jew jekk nagħżlu li nobdu biss dak li aħna nqisuh importanti, inkunu qed naġixxu kontra l-iskop taʼ Ġeħova. Dan jistaʼ jipperikola r-relazzjoni paċifika tagħna maʼ Ġeħova. Fl-artiklu li jmiss, se niddiskutu xi sitwazzjonijiet li jagħtuna opportunità nuru jekk aħniex ubbidjenti. Id-deċiżjonijiet li nieħdu f’dawn is-sitwazzjonijiet se juru jekk dħalniex fil-mistrieħ t’Alla.
[Noti taʼ taħt]
a Il-qassisin u l-Leviti ħadmu fit-tempju fis-Sabat, u dan ma kienx imur kontra l-Liġi taʼ Mosè. Alla għażel lil Ġesù biex ikun il-qassis il-kbir tagħna. Għalhekk, Ġesù m’għamel xejn ħażin meta fis-Sabat għamel ix-xogħol li Ġeħova tah biex jagħmel.—Mt. 12:5, 6.
b Ma nafux jekk xi ħadd mill-Kristjani Ebrej kienx joffri xi sagrifiċċji f’Jum it-Tpattija saħansitra wara Pentekoste tas-sena 33 E.K. Imma jekk għamlu dan, ma wrew ebda rispett għas-sagrifiċċju taʼ Ġesù. Li nafu hu li xi Kristjani Ebrej kienu għadhom qed isegwu tradizzjonijiet li kienu parti mil-Liġi Mosajka.—Gal. 4:9-11.
Mistoqsijiet għall-Meditazzjoni
• X’kien l-iskop tas-sebaʼ jum taʼ mistrieħ t’Alla?
• Kif nafu li llum għadu s-sebaʼ jum?
• L-Iżraelin fi żmien Mosè u xi wħud mill-Kristjani fi żmien Pawlu, għala ma daħlux fil-mistrieħ t’Alla?
• Xi jfisser li nidħlu fil-mistrieħ t’Alla llum?
[Mistoqsijiet taʼ Studju]
[Kumment f’paġna 27]
Aħna nistgħu nidħlu fil-mistrieħ taʼ Ġeħova jekk nobduh u naħdmu id f’id mal-organizzazzjoni tiegħu
[Stampi f’paġna 26, 27]
In-nies t’Alla llum x’għandhom bżonn jagħmlu biex jidħlu fil-mistrieħ tiegħu?