Huma Stennew lill-Messija
“Il-poplu kien qiegħed jistenna ħerqan, u kulħadd kien jistaqsi lilu nnifsu dwar Ġwanni, jekk kienx hu l-Messija.” —LQ. 3:15, GĦAQDA BIBLIKA MALTIJA.
1. Liema dikjarazzjoni anġelika semgħu ċerti rgħajja?
IL-LEJL kien daħal sew. Ir-rgħajja kienu fl-għelieqi, jgħassu n-nagħaġ. Kemm baqgħu skantati xħin deher anġlu taʼ Ġeħova fil-viċin u l-glorja t’Alla bdiet tiddi madwarhom! Huma semgħu lill-anġlu jagħmel din id-dikjarazzjoni drammatika: “Tibżgħux, għax, ara! Qed inxandrilkom aħbar tajba taʼ ferħ kbir li se jkollhom in-nies kollha, għax illum . . . twildilkom Salvatur li hu Kristu l-Mulej,” il-wieħed li se juri li hu l-Messija. Ir-rgħajja setgħu jsibu lil din it-tarbija f’maxtura f’belt fil-viċin. F’daqqa waħda, “dehret kotra mill-armata tas-sema” u bdiet tfaħħar lil Ġeħova u tgħid: “Glorja lil Alla fl-ogħla postijiet tas-smewwiet, u paċi fuq l-art fost il-bnedmin taʼ rieda tajba.”—Lq. 2:8-14.
2. Xi tfisser il-kelma “Messija,” u n-nies kif setgħu jkunu jafu min hu?
2 Ovvjament, ir-rgħajja Lhud kienu jafu li l-kelma “Messija,” jew “Kristu,” tirreferi għall-“Midluk” t’Alla. (Eżo. 29:5-7) Imma kif setgħu jitgħallmu iktar u jikkonvinċu lil oħrajn li t-tarbija li semma l-anġlu kienet se tkun il-Messija maħtur minn Ġeħova? Billi jeżaminaw xi profeziji fl-Iskrittura Ebrajka u jqabbluhom mal-attivitajiet u l-ħajja taʼ dan it-tifel.
In-Nies Għala Kienu Qed Jistennew lill-Messija?
3, 4. Il-profezija f’Danjel 9:24, 25 kif twettqet?
3 Meta Ġwanni l-Għammied beda x-xogħol tal-ippritkar tiegħu snin wara, dak li qal u għamel ġiegħel lil xi nies jaħsbu jekk il-Messija kienx wasal. (Aqra Luqa 3:15.) Jistaʼ jkun li xi wħud fehmu b’mod tajjeb il-profezija Messjanika dwar is-“sebgħin ġimgħa.” Jekk dan hu l-każ, setgħu kienu jafu meta l-Messija kien se jidher. Parti mill-profezija kienet tgħid: “Mill-ħruġ tal-kelma biex Ġerusalemm tiġi restawrata u mibnija mill-ġdid sal-Messija l-Mexxej, ikun hemm seba’ ġimgħat, kif ukoll tnejn u sittin ġimgħa.” (Dan. 9:24, 25) Diversi studjużi jaqblu li dawn huma ġimgħat taʼ snin. Pereżempju, il-Bibbja Revised Standard Version tgħid: “Sebgħin ġimgħa taʼ snin huma dikjarati.”
4 Illum, il-qaddejja taʼ Ġeħova jafu li d-69 ġimgħa, jew l-483 sena, taʼ Danjel 9:25 bdew fis-sena 455 Q.E.K. meta s-sultan Persjan Artaserse ta l-awtorità lil Neħemija biex imur jirrestawra u jibni mill-ġdid lil Ġerusalemm. (Neħ. 2:1-8) Dawn il-ġimgħat spiċċaw 483 sena wara, fis-sena 29 E.K., meta Ġesù taʼ Nazaret tgħammed u ġie midluk bl-ispirtu qaddis, u b’hekk sar il-Messija.—Mt. 3:13-17. a
5. Liema profeziji se nikkunsidraw issa?
5 Issa ejja nikkunsidraw ftit mill-ħafna profeziji oħra dwar il-Messija li twettqu permezz tat-twelid, it-tfulija, u l-ministeru taʼ Ġesù. Dan bla dubju se jsaħħilna l-fidi fil-kelma profetika t’Alla. Ukoll, se jagħtina evidenza ċara li Ġesù tassew kien il-Messija tant mistenni.
Tfulitu Mbassra
6. Spjega kif twettaq Ġenesi 49:10.
6 Il-Messija kellu jitwieled mit-tribù taʼ Ġuda f’Iżrael. Meta l-patrijarka Ġakobb kien fuq is-sodda tal-mewt tiegħu, hu bierek lil uliedu u bassar: “Ix-xettru ma jitwarrabx minn Ġuda, lanqas il-ħatar taʼ kmandant minn bejn riġlejh, sakemm jiġi Silo; u l-popli se jobdu lilu.” (Ġen. 49:10) Ħafna għalliema Lhud tal-passat emmnu li dan il-kliem kien dwar il-Messija. Mill-ħakma tas-Sultan David li kien minn Ġuda, ix-xettru (is-sovranità rjali) u l-ħatar taʼ kmandant (il-qawwa li jikkmanda) kellhom ikunu fit-tribù taʼ Ġuda. “Silo” jfisser “Dak li tiegħu hija; Dak li lilu tappartjeni.” Il-ħakma rjali taʼ Ġuda kienet se tispiċċa b’“Silo” bħala s-sultan Werriet permanenti, għax Alla qal lil Sedekija, l-aħħar sultan mit-tribù taʼ Ġuda, li l-ħakma kienet se tingħata lil dak li għandu d-dritt legali għaliha. (Eżek. 21:26, 27) Wara Sedekija, Ġesù kien l-uniku dixxendent taʼ David li lilu ġiet imwiegħda ħakma. Qabel it-twelid taʼ Ġesù, l-anġlu Gabrijel qal lil Marija: “Alla Ġeħova jagħtih it-tron taʼ David missieru, u jsaltan fuq dar Ġakobb għal dejjem, u ma jkunx hemm tmiem għal saltnatu.” (Lq. 1:32, 33) Silo bilfors li hu Ġesù Kristu, li kien dixxendent taʼ Ġuda u David.—Mt. 1:1-3, 6; Lq. 3:23, 31-34.
7. Il-Messija fejn twieled, u dan għala hu sinifikanti?
7 Il-Messija kien se jitwieled f’Betlehem. Il-profeta Mikea kiteb: “Int, O Betlehem t’Efrata, li int ċkejkna wisq biex tkun fost l-eluf taʼ Ġuda, minnek għad joħroġli dak li għandu jsir ħakkiem f’Israel, li l-oriġini tiegħu hi mill-qedem, mill-jiem taʼ żmien twil ilu.” (Mik. 5:2) Il-Messija kellu jitwieled fil-belt Lhudija, Betlehem, li milli jidher xi darba kien jisimha Efrata. Imma omm Ġesù, Marija, u missieru adottiv, Ġużeppi, kienu jgħixu f’belt differenti jisimha Nazaret. Meta kien kważi wasal iż-żmien biex Ġesù jitwieled, il-ħakkiem Ruman qal lin-nies imorru lura fil-post fejn twieled il-missier ħalli jirreġistraw isimhom. Allura, Marija u Ġużeppi marru Betlehem, fejn twieled Ġesù fis-sena 2 Q.E.K. (Mt. 2:1, 5, 6) Xi twettiq tal-għaġeb tal-profezija!
8, 9. X’ġie mbassar dwar it-twelid tal-Messija u dak li ġara wara?
8 Il-Messija kien se jitwieled minn verġni. (Aqra Isaija 7:14.) Il-kelma Ebrajka bethu·lahʹ tfisser “verġni,” imma kelma oħra (ʽal·mahʹ) tidher f’Isaija 7:14. Hemm ġie profetizzat li “t-tfajla [ha·ʽal·mahʹ]” kienet se tiled iben. Il-kelma ʽal·mahʹ tintuża b’konnessjoni mat-tfajla Rebekka qabel ma żżewġet. (Ġen. 24:16, 43) Mattew ġie mnebbaħ juża l-kelma Griega għal “verġni” (par·theʹnos) meta wera li Isaija 7:14 twettaq b’konnessjoni mat-twelid taʼ Ġesù. Il-kittieba tal-Evanġelji Mattew u Luqa qalu li Marija kienet verġni u li nqabdet tqila permezz tal-ispirtu t’Alla.—Mt. 1:18-25; Lq. 1:26-35.
9 Tfal żgħar kienu se jiġu maqtulin wara t-twelid tal-Messija. Ġrat xi ħaġa simili sekli qabel, meta l-Fargħun tal-Eġittu ħareġ digriet li t-trabi subien Lhud jiġu mitfugħin fix-Xmara Nil. (Eżo. 1:22) Imma xi ħaġa li tassew hi taʼ min jinnotaha hi l-iskrittura taʼ Ġeremija 31:15, 16, li fiha Rakele tiġi deskritta bħala li qed tibki minħabba wliedha li ttieħdu fil-“pajjiż taʼ l-għadu.” Il-biki tagħha jinstemaʼ sa Rama, fit-territorju taʼ Benjamin, lejn it-Tramuntana taʼ Ġerusalemm. Mattew juri li kliem Ġeremija twettaq meta s-Sultan Erodi ordna li jinqatlu t-tfal żgħar subien f’Betlehem u fil-bliet tal-madwar. (Aqra Mattew 2:16-18.) Immaġina n-niket f’dawk l-inħawi!
10. Spjega kif twettqet f’Ġesù l-profezija taʼ Ħosea 11:1.
10 Bħall-Iżraelin, il-Messija kien se jissejjaħ mill-Eġittu. (Ħos. 11:1) Biex isalva lil Ġesù minn Erodi, anġlu qal lil Ġużeppi u lil Marija biex jitilqu minn Iżrael u jieħdu lil Ġesù l-Eġittu. Huma baqgħu hemm “sal-mewt t’Erodi, sabiex jitwettaq dak li qal Ġeħova permezz tal-profeta tiegħu [Ħosea]: ‘Mill-Eġittu sejjaħt lil ibni.’” (Mt. 2:13-15) M’għandniex xi ngħidu, kien impossibbli li Ġesù kkontrolla l-affarijiet li ġraw fit-twelid tiegħu u fi tfulitu.
Il-Messija Jibda l-Ministeru Tiegħu!
11. Min ħejja t-triq għall-Messija?
11 Messaġġier kellu jħejji t-triq għall-Midluk t’Alla. Malakija bassar li “Elija l-profeta” kien se jagħmel dan ix-xogħol u jħejji l-qlub tan-nies għall-Messija li kien ġej. (Aqra Malakija 4:5, 6.) Ġesù nnifsu identifika lil dan “Elija” bħala Ġwanni l-Għammied. (Mt. 11:12-14) U Marku qal li l-ministeru taʼ Ġwanni wettaq il-kliem profetiku t’Isaija. (Is. 40:3; Mk. 1:1-4) Ġesù ma qalx lil Ġwanni jħejji t-triq għalih. Kien Alla li ried li n-nies ikunu jafu min hu l-Messija. Allura kien Alla li għażel lil Ġwanni biex jagħmel xogħol bħal taʼ Elija u jħejji n-nies biex jilqgħu lill-Messija.
12. Liema inkarigu jgħinna nidentifikaw lill-Messija?
12 Inkarigu mogħti minn Alla jgħinna nidentifikaw lill-Messija. Fis-sinagoga taʼ Nazaret, il-belt fejn trabba, Ġesù qara mir-romblu t’Isaija u applika l-kliem għalih innifsu. Dan hu dak li qara: “L-ispirtu taʼ Ġeħova qiegħed fuqi, għax Hu dilikni biex inxandar aħbar tajba lill-foqra, bagħatni nippriedka l-ħelsien lill-imjassrin u l-għoti tad-dawl lill-għomja, biex neħles lill-imgħakksin, biex nippriedka s-sena aċċettabbli mingħand Ġeħova.” Minħabba li hu tassew kien il-Messija, Ġesù kellu kull dritt jgħid: “Illum twettqet din l-iskrittura li għadkom kemm smajtu.”—Lq. 4:16-21.
13. Il-ministeru pubbliku taʼ Ġesù fil-Galilija kif ġie mbassar?
13 Il-ministeru pubbliku tal-Messija fil-Galilija ġie mbassar. Rigward “l-art taʼ Żebulun u l-art taʼ Naftali . . . il-Galilija tal-ġnus,” Isaija kiteb: “In-nies li kienu mexjin fid-dlam raw dawl kbir. U dawk li jgħammru fl-art taʼ dell iswed ħafna, idda dawl fuqhom.” (Is. 9:1, 2) Ġesù beda l-ministeru pubbliku tiegħu fil-Galilija, filwaqt li hu għex f’Kafarnahum, fejn ħafna mir-residenti taʼ Żebulun u Naftali gawdew il-benefiċċji tad-dawl spiritwali li wasslilhom. (Mt. 4:12-16) Fil-Galilija, Ġesù ta l-Prietka taʼ fuq il-Muntanja li tqanqal il-ħsieb, għażel lill-appostli tiegħu, wettaq l-ewwel miraklu, u x’aktarx deher lil xi 500 dixxiplu wara l-irxoxt tiegħu. (Mt. 5:1–7:27; 28:16-20; Mk. 3:13, 14; Ġw. 2:8-11; 1 Kor. 15:6) B’hekk, hu wettaq il-profezija t’Isaija billi pprietka “fl-art taʼ Żebulun u l-art taʼ Naftali.” Naturalment, Ġesù pprietka l-messaġġ tas-Saltna f’postijiet oħra f’Iżrael.
L-Attivitajiet l-Oħrajn tal-Messija Mbassrin
14. B’liema mod twettaq Salm 78:2 permezz taʼ Ġesù?
14 Il-Messija kien se jitkellem bil-parabboli, jew bit-tixbihat. Is-salmista Asaf kanta: “Bil-qwiel se niftaħ fommi.” (Salm 78:2) Kif nafu li dan applika b’mod profetiku għal Ġesù? Għax jgħidilna Mattew. Wara li jirrakkonta tixbihat li fihom Ġesù xebbah lis-Saltna maʼ żerriegħa tal-mustarda li qed tinbet u mal-ħmira, Mattew jgħid: “Ma kienx ikellimhom [Ġesù] mingħajr xi tixbiha; sabiex iseħħ dak li ntqal permezz tal-profeta: ‘Se niftaħ fommi bit-tixbihat, inxandar affarijiet moħbijin sa mit-tisjis tad-dinja.’” (Mt. 13:31-35) Il-qwiel, jew il-parabboli, kienu fost l-iktar affarijiet effettivi li uża Ġesù biex jgħallem.
15. Uri kif il-profezija f’Isaija 53:4 twettqet.
15 Il-Messija kellu jġorr il-mard tagħna. Isaija bassar: “Tassew, hu ġarr il-mard tagħna; u inkwantu għall-weġgħat tagħna, tgħabba bihom hu.” (Is. 53:4) Wara li qal li Ġesù fejjaq il-kunjata taʼ Pietru, Mattew qal li Ġesù fejjaq lil oħrajn “sabiex jitwettaq dak li ntqal mill-profeta Isaija: ‘Hu stess ħa l-weġgħat tagħna u ġarr il-mard tagħna.’” (Mt. 8:14-17) U dan hu biss darba waħda fost il-ħafna drabi dokumentati meta Ġesù fejjaq lill-morda.
16. L-appostlu Ġwanni kif wera li Ġesù wettaq Isaija 53:1?
16 Minkejja t-tajjeb kollu li għamel il-Messija, ħafna nies ma kinux se jemmnu fih. (Aqra Isaija 53:1.) L-appostlu Ġwanni wera li din il-profezija twettqet meta kiteb: “Għalkemm [Ġesù] kien wettaq ħafna sinjali quddiemhom, ma kinux qed ipoġġu l-fidi fih, sabiex b’hekk twettqet il-kelma tal-profeta Isaija li qal: ‘Ġeħova, min poġġa l-fidi f’dak li nstemaʼ minna? U lil min ġie rivelat id-driegħ taʼ Ġeħova?’” (Ġw. 12:37, 38) Anke snin wara, meta l-appostlu Pawlu pprietka l-aħbar tajba, ma kienx hemm ħafna nies li emmnu li Ġesù kien il-Messija.—Rum. 10:16, 17.
17. Il-profezija f’Salm 69:4 kif twettqet?
17 In-nies kienu se jobogħdu lill-Messija għalxejn. (Salm 69:4) L-appostlu Ġwanni jikkwota lil Ġesù bħala li qal: “Kieku m’għamiltx fost [in-nies] l-għemejjel li ħadd qatt m’għamel, ma kien ikollhom ebda dnub; imma issa raw u bagħdu kemm lili kif ukoll lil Missieri. Imma dan ġara biex jitwettaq dak li hemm miktub fil-Liġi tagħhom, ‘Bagħduni għalxejn.’” (Ġw. 15:24, 25) Spiss, il-kelma “Liġi” tfisser l-Iskrittura kollha. (Ġw. 10:34; 12:34) Ir-rakkonti tal-Evanġelji juru biċ-ċar li Ġesù kien mibgħud, speċjalment mill-mexxejja reliġjużi Lhud. Iktar minn hekk, Kristu qal: “Id-dinja m’għandhiex għalfejn tobgħodkom, imma lili tobgħodni, għax nixhed dwarha li l-għemejjel tagħha huma mill-agħar.”—Ġw. 7:7.
18. X’se nitgħallmu fl-artiklu li jmiss?
18 Is-segwaċi taʼ Ġesù fl-ewwel seklu kienu ċerti li Ġesù kien il-Messija għax tabilħaqq hu wettaq il-profeziji Messjaniċi li nsibu fl-Iskrittura Ebrajka. (Mt. 16:16) Bħalma rajna, xi wħud minn dawn twettqu matul it-tfulija u l-ministeru taʼ Ġesù taʼ Nazaret. Iktar profeziji Messjaniċi se jiġu eżaminati fl-artiklu li jmiss. Il-fatt li nirriflettu fuqhom bit-talb żgur li se jsaħħaħ il-konvinzjoni tagħna li Ġesù Kristu tassew hu l-Messija li ġie maħtur minn Missierna tas-sema, Ġeħova.
[Nota taʼ taħt]
a Għal diskussjoni dettaljata tas-“sebgħin ġimgħa,” ara kapitlu 11 tal-ktieb Oqgħod Attent għall-Profezija taʼ Danjel!
Int Kif Twieġeb?
• Liema profeziji twettqu b’konnessjoni mat-twelid taʼ Ġesù?
• Min ħejja t-triq għall-Messija?
• Liema kliem profetiku taʼ Isaija kapitlu 53 twettaq permezz taʼ Ġesù?
[Mistoqsijiet taʼ Studju]