“SAKEMM tispiċċa din il-​laqgħa, intom se tgħidu, ‘Din verament kienet laqgħa annwali li titniżżel fl-​istorja teokratika!’” B’dan il-​kliem, Stephen Lett tal-​Ġemgħa li Tiggverna tax-​Xhieda taʼ Ġeħova kabbar l-​antiċipazzjoni ħerqana tal-​udjenza kbira. Kienu miġburin għall-​126 laqgħa annwali tal-​Watch Tower Bible and Tract Society of Pennsylvania, li saret fit-​2 t’Ottubru, 2010, fis-​Sala tal-​Assemblea tax-​Xhieda taʼ Ġeħova fil-​Belt taʼ Jersey, New Jersey, l-​Istati Uniti. X’kienu ftit mill-​affarijiet li spikkaw f’din l-​okkażjoni storika?

It-​taħdita tal-​ftuħ taʼ Ħuna Lett kienet diskussjoni entużjastika dwar il-​karru ċelestjali taʼ Ġeħova bħalma hu deskritt fil-​ktieb Bibliku t’Eżekjel. Dan il-​karru kbir u glorjuż jagħti stampa tal-​organizzazzjoni t’Alla, b’Ġeħova f’kontroll sħiħ. Il-​parti fis-​sema tagħha, magħmula minn ħlejjaq spirti, timxi f’leħħa taʼ berqa—l-​istess bħall-​ħsibijiet taʼ Ġeħova nnifsu, qal Ħuna Lett. Il-​parti tal-​organizzazzjoni t’Alla Ġeħova fuq l-​art bl-​istess mod tinsab miexja. Ħuna Lett semma diversi żviluppi eċċitanti li saru fil-​parti viżibbli tal-​organizzazzjoni t’Alla fis-​snin reċenti.

Pereżempju, għadd taʼ uffiċċji tal-​fergħa qed jingħaqdu flimkien. Dan jagħmilha possibbli għal dawk li qabel kienu jaqdu fid-​djar taʼ Betel f’dawk il-​pajjiżi biex jiffokaw fuq ix-​xogħol tal-​ippritkar. Ħuna Lett ħeġġeġ lill-​udjenza tibqaʼ titlob biex il-​Ġemgħa li Tiggverna, bħala rappreżentanta tal-​klassi tal-​ilsir, tkompli tkun mhux biss leali imma wkoll għaqlija, jew diskreta.—Mt. 24:45-​47.

Rapporti Inkuraġġanti u Intervisti li Jqawwu l-​Qalb

Tab Honsberger, li jaqdi fil-​Kumitat tal-​Fergħa fil-​Ħaiti, ta rapport li jmiss il-​qalb dwar dak li ġara wara t-​terremot tat-​12 taʼ Jannar, 2010, li rriżulta fil-​mewt taʼ 300,000 ruħ skont kalkoli li saru. Hu qal li membri tal-​kleru kienu qed jgħidu lin-​nies li Alla kkastiga lil dawk il-​vittmi għax kienu bla fidi waqt li pproteġa lil uħud tajbin. Iżda, eluf taʼ kriminali ħatjin ħarbu meta l-​ħitan taʼ ħabs waqgħu matul it-​theżżiża. B’hekk, xi Ħaitjani taʼ qalb onesta qed jitfarrġu hekk kif jitgħallmu l-​verità dwar għala żminijietna fihom tant inkwiet. Ħuna Honsberger ikkwota lil ħu leali Ħaitjan li tilef lil martu fid-​diżastru u li qal: “Għadni nibki sal-​lum. Ma nafx kemm se ndum nitnikket, imma nifraħ għax inħoss l-​imħabba tal-​organizzazzjoni taʼ Ġeħova. Jien għandi t-​tama, u ninsab determinat li naqsamha m’oħrajn.”

Mark Sanderson, li issa huwa membru tal-​familja  Betel fi Brooklyn, ta rapport mill-​Filippini. Qabel kien membru tal-​kumitat tal-​fergħa hemmhekk u kien ferħan li jitkellem dwar it-​32 quċċata li kellhom waħda wara l-​oħra fil-​pajjiż fin-​numru taʼ pubblikaturi tas-​Saltna u dwar kif in-​numru tal-​istudji tal-​Bibbja jaqbeż bil-​kbir in-​numru taʼ pubblikaturi. Hu tkellem dwar ħu jismu Miguel li n-​neputi tiegħu nqatel. Miguel ħadem iebes biex il-​qattiel jiġi mħarrek u mitfugħ il-​ħabs. Iktar tard, waqt li Miguel kien qed jagħti xhieda fil-​ħabs iltaqaʼ mal-​qattiel. Għalkemm kien ansjuż, Miguel kellmu bil-​ħlewwa u b’qalb tajba. Hu eventwalment studja mar-​raġel, li wieġeb b’mod favorevoli u sar iħobb lil Ġeħova. Issa tgħammed. Miguel, li hu l-​ħabib tal-​qalb tiegħu, qed jaħdem biex ħuh il-​ġdid jinħeles kmieni mill-​ħabs. a

Il-​programm imbagħad kien fih intervisti mmexxijin minn Mark Noumair, istruttur fid-​Dipartiment tal-​Iskejjel Teokratiċi. Hu intervista lil tliet koppji—Alex u Sarah Reinmueller, David u Krista Schafer, u Robert u Ketra Ciranko. Alex Reinmueller, wieħed li jgħin fil-​Kumitat tal-​Ippubblikar, tkellem dwar kif għamel il-​verità parti minnu waqt li qeda bħala pijunier fil-​Kanada meta kellu biss 15-​il sena u spiss kien jaħdem waħdu. Meta ġie mistoqsi min kellu l-​akbar impatt fuqu f’Betel, Ħuna Reinmueller semma tlett irġiel leali u wera kif kull wieħed minnhom għenu jikber spiritwalment. Martu, Sarah, tkellmet dwar il-​ħbiberija tagħha maʼ oħt, li ssaportiet għaxriet taʼ snin fil-​ħabsijiet Ċiniżi minħabba l-​fidi tagħha. Sarah qalet li tgħallmet tistrieħ fuq Ġeħova permezz tat-​talb persunali.

David Schafer, wieħed li jgħin fil-​Kumitat tat-​Tagħlim, faħħar lil ommu għall-​fidi b’saħħitha tagħha u tkellem dwar aħwa li ħadmu f’li jaqtgħu l-​injam u għenuh jaqdi bħala pijunier awżiljarju matul żgħożitu. Martu, Krista, tkellmet b’għożża dwar kif ġiet influwenzata minn membri akbar tal-​familja Betel li wrew “fedeltà fl-​inqas ħaġa,” kif irrikkmanda Ġesù.—Lq. 16:10.

Robert Ciranko, wieħed li jgħin fil-​Kumitat tal-​Kitba, tkellem b’nostalġija dwar l-​erbaʼ nanniet tiegħu, li kienu immigranti Ungeriżi u Kristjani midlukin. Bħala tifel, baqaʼ impressjonat meta attenda konvenzjonijiet kbar fis-​snin 50 u tgħallem li l-​organizzazzjoni taʼ Ġeħova kienet bil-​wisq akbar mill-​kongregazzjoni tiegħu stess. Martu, Ketra, tkellmet dwar kif tgħallmet dwar il-​lealtà meta qdiet  bħala pijuniera f’kongregazzjoni li fiha kien hemm l-​apostasija u problemi oħra. Hi ssaportiet u eventwalment ġiet inkarigata taqdi bħala pijuniera speċjali f’kongregazzjoni fejn l-​unità messitilha qalbha.

Manfred Tonak imbagħad ta rapport fuq l-​Etjopja. Din l-​art kienet teżisti fi żminijiet Bibliċi, u issa ġiet imbierka b’iktar minn 9,000 pubblikatur tal-​aħbar tajba. Il-​biċċa l-​kbira minnhom jgħixu ħdejn jew fil-​kapitali, Addis Ababa. B’hekk, inħawi remoti għandhom bżonn iktar pubblikaturi tas-​Saltna. Biex jieħdu ħsieb dan il-​bżonn, Xhieda Etjopjani li jgħixu f’pajjiżi oħra ġew mistidnin iżuru l-​pajjiż ħalli jippritkaw f’xi ftit mill-​partijiet remoti. Ġew ħafna aħwa u dawn ħeġġew lill-​aħwa lokali u sabu wħud li tawhom widen.

Xi ħaġa li spikkat fil-​programm kienet serje taʼ taħditiet dwar ix-​Xhieda taʼ Ġeħova fir-​Russja u l-​problemi legali tagħhom. Aulis Bergdahl mill-​Kumitat tal-​Fergħa tar-​Russja ppreżenta l-​istorja tal-​persekuzzjoni tax-​Xhieda fir-​Russja, partikolarment f’Moska. Philip Brumley mid-​Dipartiment Legali tal-​fergħa tal-​Istati Uniti tkellem dwar l-​iżviluppi eċċitanti fix-​xhur reċenti meta l-​Qorti Ewropea tad-​Drittijiet tal-​Bniedem (QEDB) semgħet id-​disaʼ akkużi li nġiebu kontra x-​Xhieda. Il-​Qorti b’mod unanimu sabet li l-​ebda waħda mid-​disaʼ akkużi ma kienet vera, u f’diversi każi l-​qorti saħansitra għamlet sforz ħabrieki biex tispjega fid-​dettall għala l-​argumenti kienu żbaljati. Waqt li għad irridu naraw x’se jiżvolġi, Ħuna Brumley tkellem bit-​tama dwar l-​impatt li jistaʼ jkollu l-​ġudizzju tal-​Qorti fuq każi f’artijiet oħra.

Wara din l-​aħbar eċċitanti, Ħuna Lett ħabbar li l-​QEDB kienet aċċettat li tirrivedi l-​każ tat-​taxxa li ilu għaddej u li jinvolvi l-​gvern taʼ Franza u x-​Xhieda taʼ Ġeħova. Din il-​Qorti rispettata ferm tirrivedi veru ftit mill-​każi li jiġu preżentati. S’issa, il-​QEDB ikkunsidrat 39 każ li involvew lix-​Xhieda taʼ Ġeħova, u ddeċidiet favurina f’37 każ minnhom. Ħuna Lett ħeġġeġ lill-​poplu t’Alla kollu biex jitlob lil Alla Ġeħova dwar din il-​kwistjoni.

L-​aħħar rapport ġie mingħand Richard Morlan, li jintbagħat jgħallem fl-​Iskola għall-​Anzjani tal-​Kongregazzjoni. Hu tkellem b’entużjażmu dwar l-​iskola u l-​apprezzament li wrew l-​anzjani li attendewha.

Taħditiet Oħrajn Minn Membri tal-​Ġemgħa li Tiggverna

Guy Pierce tal-​Ġemgħa li Tiggverna ta taħdita mill-​qalb li ffokat fuq l-​iskrittura  għas-​sena 2011, ‘Stkenn fl-​isem taʼ Ġeħova.’ (Sof. 3:12) Hu qal li filwaqt li dan hu żmien taʼ ferħ b’ħafna modi għan-​nies taʼ Ġeħova, huwa wkoll żmien serju u taʼ min jaħseb fuqu. Il-​jum il-​kbir taʼ Ġeħova hu fil-​qrib; imma, in-​nies jibqgħu ifittxu kenn fir-​reliġjon falza, f’istituzzjonijiet politiċi, fl-​għana materjali, f’li jagħlqu għajnejhom għal dak li qed jiġri madwarhom, u affarijiet simili. Sabiex insibu kenn ġenwin, irridu nsejħu isem Ġeħova, u dan jinvolvi li nkunu nafu, nirrispettaw profondament, u nafdaw lil Dak li hu rappreżentat minn dan l-​isem u li nħobbuh b’dak kollu li għandna.

David Splane tal-​Ġemgħa li Tiggverna mbagħad iddiskuta b’ħeġġa u b’mod li jqanqal il-​ħsieb it-​tema “Dħalt Int fil-​Mistrieħ t’Alla?” Hu qal li l-​mistrieħ t’Alla ma jfissirx inattività, ladarba Ġeħova u Ibnu ‘baqgħu jaħdmu’ matul dan il-​jum taʼ mistrieħ figurattiv sabiex iġibu l-​iskop t’Alla għall-​affarijiet li nħalqu b’konnessjoni mal-​art għal konklużjoni xierqa. (Ġw. 5:17) Allura, kif nistgħu nidħlu fil-​mistrieħ t’Alla? Li nieqfu milli nidinbu u mill-​għemejjel li bihom niġġustifikaw lilna nfusna huma biss parti mit-​tweġiba. Aħna rridu neżerċitaw il-​fidi u ngħixu bl-​iskop t’Alla f’moħħna u ngħinu biex dan l-​iskop jitwettaq bi kwalunkwe mod li nistgħu. Xi kultant, dan jistaʼ jkun taʼ sfida speċjali, imma aħna rridu naċċettaw il-​parir u nikkooperaw mad-​direzzjoni mill-​organizzazzjoni taʼ Ġeħova. Ħuna Splane talab bil-​ħrara lill-​udjenza biex jagħmlu dak kollu li jistgħu biex jidħlu fil-​mistrieħ t’Alla.

L-​aħħar taħdita mogħtija minn Anthony Morris tal-​Ġemgħa li Tiggverna kien jisimha “Għal Xiex Qed Nistennew?” B’urġenza u bi mħabba bħal taʼ missier, Ħuna Morris fakkar l-​udjenza bl-​iżviluppi profetiċi li għad iridu jseħħu, ġrajjiet li l-​uħud leali kollha jistennew b’ħerqa. Dawn jinkludu l-​għajta taʼ “Paċi u sigurtà!” u l-​qerda tar-​reliġjon falza. (1 Tess. 5:2, 3; Riv. 17:15-​17) Ħuna Morris wissa kontra li ngħidu, “Din żgur li hi Armageddon,” meta naraw ġrajjiet fl-​aħbarijiet li ma jwettqux profeziji bħal dawn. Hu rrikkmanda li jkollna l-​attitudni ferriħija, paċenzjuża, u taʼ stennija li hi deskritta f’Mikea 7:7. Iżda, fl-​istess ħin, ħeġġeġ lil kulħadd biex jersaq qrib xulxin flimkien mal-​Ġemgħa li Tiggverna, bħalma jagħmlu s-​suldati qabel ma jidħlu fl-​eqqel tal-​battalja. Hu qal: “Qawwu qalbkom intom ilkoll li qed tistennew lil Ġeħova.”—Salm 31:24.

Bħala konklużjoni, kien hemm xi avviżi eċċitanti u storiċi. Geoffrey Jackson tal-​Ġemgħa li Tiggverna ħabbar il-​pjanijiet għall-​prova taʼ edizzjoni tal-​istudju tat-​Torri tal-​Għassa simplifikata għal dawk li ma tantx jafu jaqraw bl-​Ingliż. Imbagħad, Stephen Lett ħabbar li l-​Ġemgħa li Tiggverna se tirranġa għal żjajjar pastorali għall-​indokraturi tad-​distrett u n-​nisa tagħhom fl-​Istati Uniti. Wara ħabbar li l-​Iskola tat-​Taħriġ Ministerjali minn issa ’l quddiem se tissejjaħ l-​Iskola tal-​Bibbja Għal Aħwa Rġiel Mhux Miżżewġin. Hu ħabbar ukoll skola ġdida jisimha l-​Iskola tal-​Bibbja Għal Koppji Kristjani. Din l-​iskola se tagħti iktar taħriġ lill-​koppji ħalli jkunu iktar utli fl-​organizzazzjoni taʼ Ġeħova. Ħuna Lett ħabbar ukoll li l-​Iskola Għal Indokraturi li Jivvjaġġaw u n-​Nisa Tagħhom u l-​Iskola Għal Membri tal-​Kumitati tal-​Fergħa u n-​Nisa Tagħhom kienu se jiżdiedu għal żewġ klassijiet kull sena f’Patterson, u b’hekk dawk li diġà attendew jistgħu jerġgħu jattendu.

Il-​programm ikkonkluda b’mod kommoventi meta John E. Barr li għandu 97 sena u li ilu membru tal-​Ġemgħa li Tiggverna, offra talba umli u sinċiera. b Kulħadd telaq bl-​impressjoni li dan kien tassew jum storiku.

[Noti taʼ taħt]

[Kumment f’paġna 19]

Kull min attenda ħa pjaċir bl-​intervisti

[Kumment f’paġna 20]

Ġeħova bierek ix-​xogħol tal-​ippritkar fl-​Etjopja