Huwa possibbli li ngħidu bl-​eżatt kemm hemm profeziji Messjaniċi fl-​Iskrittura Ebrajka?

Studju bir-​reqqa tal-​Iskrittura Ebrajka jagħmilhielna possibbli li nidentifikaw għaxriet taʼ profeziji li twettqu permezz taʼ Ġesù Kristu. Dawn il-​profeziji bassru dettalji dwar il-​Messija, pereżempju, il-​passat tiegħu, iż-​żmien meta kellu jidher, dak li kellu jagħmel, kif kellu jiġi trattat, u l-​post tiegħu fl-​arranġament t’Alla Ġeħova. Dan kollu jagħti stampa grandjuża waħda li tgħinna nidentifikaw lil Ġesù bħala l-​Messija. Madanakollu, hemm bżonn t’attenzjoni jekk nipprovaw niddeterminaw bl-​eżatt kemm hemm profeziji Messjaniċi fl-​Iskrittura Ebrajka.

Mhux kulħadd jaqbel x’inhi jew x’mhijiex profezija Messjanika. Fil-​ktieb tiegħu The Life and Times of Jesus the Messiah, Alfred Edersheim qal li l-​kitba rabbinika tal-​qedem ikklassifikat 456 silta mill-​Iskrittura Ebrajka bħala li huma Messjaniċi, għalkemm ħafna minnhom ma jsemmux speċifikament lill-​Messija. Ħarsa mill-​qrib lejn dawn l-​456 silta tqajjem dubji jekk xi wħud minnhom humiex profeziji dwar Ġesù Kristu. Pereżempju, Edersheim qal li l-​Lhud qiesu Ġenesi 8:11 bħala profezija Messjanika. Huma emmnu li “l-​werqa taż-​żebbuġ li nġiebet mill-​ħamiema ttieħdet mill-​Muntanja tal-​Messija.” L-​awtur semma wkoll Eżodu 12:42. Waqt li spjega kif il-​Lhud fehmu ħażin din is-​silta, hu kiteb: “Bħalma Mosè ħareġ mid-​deżert, il-​Messija kien se joħroġ minn Ruma.” Ħafna studjużi u oħrajn bla dubju kienu se jsibuha diffiċli biex iqabblu dawn iż-​żewġ siltiet u spjegazzjonijiet żbaljati maʼ Ġesù Kristu.

Anke jekk nagħtu l-​attenzjoni tagħna biss lil dawk il-​profeziji li tassew twettqu f’Ġesù Kristu, aħna nħabbtu wiċċna maʼ diffikultajiet fuq li naqblu dwar numru eżatt. Pereżempju, ikkunsidra Isaija kapitlu 53, li fih diversi aspetti profetiċi dwar il-​Messija. Isaija 53:2-​7 jipprofetizza: “M’għandux sura impressjonanti . . . Kien mistmerr u skartat min-​nies . . . Hu ġarr il-​mard tagħna . . . Hu kien qed jiġi minfud minħabba li aħna ksirna l-​liġi . . . Inġieb bħal nagħġa għall-​qatla.” Għandha din is-​silta kollha f’Isaija kapitlu 53 titqies bħala profezija Messjanika waħda, jew għandha kull waħda minn dawn il-​karatteristiki tal-​Messija titqies bħala profezija separata fuq il-​mertu tagħha stess?

Ikkunsidra wkoll Isaija 11:1, li jgħid: “Trid toħroġ fergħa żgħira miz-​zokk taʼ Ġesse; u mill-​għeruq tiegħu rimja se tagħti l-​frott.” F’vers 10, din il-​profezija terġaʼ tidher, bi kliem simili. Għandna ngħoddu dawn iż-​żewġ versi bħala żewġ profeziji separati jew bħala profezija waħda li ġiet ripetuta? Il-​konklużjonijiet li tasal għalihom dwar Isaija kapitlu 53 u Isaija kapitlu 11 żgur li jeffettwaw in-​numru totali tal-​profeziji Messjaniċi.

Għaldaqstant, nagħmlu tajjeb jekk nevitaw li nkunu speċifiċi dwar in-​numru totali tal-​profeziji Messjaniċi fl-​Iskrittura Ebrajka. L-​organizzazzjoni taʼ Ġeħova ppubblikat listi li juru għaxriet taʼ profeziji dwar Ġesù u t-​twettiq tagħhom. a Dawn il-​listi jistgħu jkunu t’għajnuna u taʼ inkuraġġiment għalina fl-​istudju persunali u tal-​familja u fil-​ministeru pubbliku tagħna. Iktar minn hekk, id-​diversi profeziji Messjaniċi, hemm kemm hemm, juruna biċ-​ċar li Ġesù hu l-​Kristu, jew il-​Messija.

[Nota taʼ taħt]