Ġeħova Hu s-Sehem Tiegħi
“Jien is-sehem tiegħek u l-wirt tiegħek f’nofs ulied Israel.” —NUM. 18:20.
1, 2. (a) X’kienet is-sitwazzjoni tal-Leviti inkwantu għal art bħala wirt? (b) Ġeħova liema assiguranza tahom lil-Leviti?
WARA li l-Iżraelin kienu ħadu f’idejhom ħafna mill-Art Imwiegħda, Ġożwè, il-Qassis il-Kbir Elegħażar, u l-mexxejja tat-tribujiet qasmu l-art f’porzjonijiet, jew partijiet. Dawn il-porzjonijiet kienu s-sehem tal-art li ngħataw it-tribujiet. (Num. 34:13-29) Inkwantu għal-Leviti, ma setax ikollhom art bħala wirt bħalma ngħataw it-tribujiet l-oħrajn. (Ġoż. 14:1-5) Il-Leviti għala ma kellhomx territorju fl-Art Imwiegħda, jew sehem minnha? Kienu minsijin?
2 Ir-risposta nsibuha f’dak li Ġeħova qal lil-Leviti. Ġeħova wiegħed li mhux se jabbandunahom. Hu qalilhom: ‘Jien is-sehem tagħkom u l-wirt tagħkom f’nofs ulied Israel.’ (Num. 18:20) X’assiguranza profonda: ‘Jien is-sehem tagħkom’! Kif kont tħossok kieku Ġeħova qal dan lilek? L-ewwel reazzjoni tiegħek għandha mnejn tkun, ‘Jistħoqqli jien assiguranza bħal din mingħand Dak li Jistaʼ Kollox?’ Forsi tistaqsi wkoll, ‘Jistaʼ Ġeħova tassew ikun is-sehem taʼ kwalunkwe Kristjan imperfett illum?’ Dawn il-mistoqsijiet jinvolvu lilek u lill-maħbubin tiegħek. Għalhekk, ejja naraw xi tfisser din l-istqarrija divina. Dan se jgħinna nifhmu kif Ġeħova jistaʼ jkun is-sehem tal-Kristjani llum. Iktar speċifikament, hu jistaʼ jkun is-sehem tiegħek, kemm jekk għandek it-tama li tgħix fis-sema kif ukoll jekk tħares ’il quddiem lejn il-ħajja f’ġenna tal-art.
Ġeħova Jipprovdi għal-Leviti
3. X’wassal biex Alla jieħu lil-Leviti għas-servizz tiegħu?
3 Qabel ma Ġeħova ta l-Liġi lill-Iżraelin, il-kapijiet tal-familja qdew bħala qassisin fosthom. Imma meta Ġeħova ta l-Liġi lil Iżrael, hu għażel lil xi wħud mit-tribù taʼ Levi biex jaqdu bħala qassisin u assistenti. Dan kif seħħ? Meta Alla qered lill-ewwel imweldin tal-Eġittu, hu qaddes lill-ewwel imweldin taʼ Iżrael. Dan ifisser li kienu jappartjenu lilu għas-servizz tiegħu. Imbagħad Alla għamel dan l-aġġustament sinifikanti: “Nieħu l-Leviti . . . minflok l-ewwel imweldin kollha taʼ wlied Israel.” Ladarba ċensiment wera li l-ewwel imweldin taʼ Iżrael kienu iktar mil-Leviti fl-għadd, tħallas prezz tal-fidwa biex ipatti għad-differenza. (Num. 3:11-13, 41, 46, 47) B’hekk, il-Leviti setgħu jwettqu l-irwol tagħhom f’li jaqdu lill-Alla taʼ Iżrael.
4, 5. (a) X’kien ifisser għal-Leviti li jkollhom lil Alla bħala s-sehem tagħhom? (b) Alla kif kien jipprovdi għal-Leviti?
4 Dan l-inkarigu x’kien ifisser għal-Leviti? Ġeħova qal li hu kien is-sehem tagħhom fis-sens li minflok ma jirċievu art bħala wirt, huma ġew fdati bi privileġġ taʼ servizz imprezzabbli. Il-wirt tagħhom kien il-fatt li kienu “s-saċerdozju taʼ Ġeħova.” (Ġoż. 18:7) Il-kuntest taʼ Numri 18:20 juri li dan ma ħallihomx foqra materjalment. (Aqra Numri 18:19, 21, 24.) Il-Leviti kellhom jingħataw “kull għaxar parti f’Israel bħala wirt talli qed iwettqu s-servizz tagħhom.” Kellhom jirċievu 10 fil-mija mill-prodott taʼ Iżrael u miż-żieda tal-annimali domestiċi. Min-naħa tagħhom, il-Leviti kellhom jikkontribwixxu parti waħda minn għaxra taʼ dak li rċivew, “mill-aqwanett,” għall-appoġġ tas-saċerdozju. a (Num. 18:25-29) Il-qassisin ngħataw ukoll “il-kontribuzzjonijiet imqaddsin kollha” li wlied Iżrael kienu jieħdu għand Alla fil-post taʼ qima tiegħu. B’hekk, membri tas-saċerdozju kellhom raġun jemmnu li Ġeħova kien se jieħu ħsieb il-bżonnijiet tagħhom.
5 Xi wħud jemmnu li l-Iżraelin taw it-tieni għexur. Il-familji Iżraelin kienu jużawhom għall-ikel, għax-xorb, u għat-tgawdija matul il-konvenzjonijiet qaddisin kull sena. (Dt. 14:22-27) Imma kien hemm użu ieħor għal dawn l-għexur. L-Iżraelin kienu jiċċelebraw sena tas-Sabat kull sebaʼ snin. Fi tmiem kull tielet u sitt sena taʼ dan il-perijodu taʼ sebaʼ snin, l-Iżraelin kienu jużaw dawn l-għexur biex jgħinu lill-foqra u wkoll lil-Leviti. Il-Leviti għala kienu inklużi f’din il-liġi? Għax ma kellhom “ebda sehem jew wirt” f’Iżrael.—Dt. 14:28, 29.
6. Għalkemm ma kellhom ebda sehem mill-art f’Iżrael, il-Leviti fejn kienu se jgħammru?
6 Forsi tistaqsi, ‘Jekk il-Leviti ma ngħataw ebda art, fejn kienu se jgħammru?’ Alla pprovdielhom. Tahom 48 belt flimkien mal-mergħat taʼ madwarhom. Dawn inkludew is-sitt ibliet tar-refuġju. (Num. 35:6-8) B’hekk, il-Leviti kellhom fejn joqogħdu meta ma kinux ikunu qed jaqdu fis-santwarju t’Alla. Ġeħova pprovda bl-abbundanza għal dawk li taw ruħhom għas-servizz tiegħu. Għalhekk, il-Leviti kif setgħu juru li Ġeħova kien is-sehem tagħhom? Billi jkunu fiduċjużi li Ġeħova kellu l-qawwa li jagħtihom dak li kellhom bżonn u li ried jieħu ħsiebhom.
7. X’kien meħtieġ mil-Leviti biex ikollhom lil Ġeħova bħala s-sehem tagħhom?
7 Ma kienx hemm kastig fil-Liġi għal Iżraeli li ma kienx jagħti l-għexur. Imma meta n-nies ma kinux jobdu l-liġi taʼ Ġeħova dwar l-għexur, il-qassisin u l-Leviti kienu jsofru. Dan ġara fi żmien Neħemija. Minħabba f’hekk, il-Leviti kellhom jaħdmu fl-għelieqi tagħhom, u b’hekk ittraskuraw il-ministeru tagħhom. (Aqra Neħemija 13:10.) Kien biss meta l-ġens obda l-Liġi taʼ Ġeħova li l-Leviti setaʼ jkollhom dak li kienu jeħtieġu. Barra minn hekk, il-qassisin u l-Leviti nfushom kellhom bżonn il-fidi f’Ġeħova u fil-mezzi tiegħu biex jipprovdilhom.
Individwi li Kellhom lil Ġeħova Bħala Sehemhom
8. Iddeskrivi l-inkwiet li ffaċċja l-Levita Asaf.
8 Il-Leviti bħala tribù kellu jkollhom lil Ġeħova bħala sehemhom. Iżda, taʼ min jinnota li Leviti individwali kienu jużaw il-frażi “Ġeħova huwa sehmi” biex jesprimu kemm kellhom devozzjoni lejn Alla u kemm kienu jistrieħu fuqu. (Lam. 3:24) Levita bħal dan kien għannej u kompożitur. Għalkemm setaʼ kien membru tad-dar t’Asaf, se nirreferu għalih bħala Asaf, il-Levita li kien imexxi lill-għannejja fi żmien is-Sultan David. (1 Kron. 6:31-43) F’Salm 73 naqraw li Asaf (jew wieħed mid-dixxendenti tiegħu) beda jgħir għall-ħżiena. Hu ma setax jifhem għala donnhom kellhom ħajja komda, u wasal sal-punt li qal: “Żgur li għalxejn naddaft qalbi u li naħsel idejja fl-innoċenza.” Milli jidher, hu ma baqax jiffoka fuq il-privileġġ taʼ servizz tiegħu; naqas li japprezza li Ġeħova kien sehmu. Kien inkwetat spiritwalment ‘sakemm daħal fis-santwarju grandjuż t’Alla.’—Salm 73:2, 3, 12, 13, 17.
9, 10. Asaf għala setaʼ jirreferi għal Alla bħala ‘s-sehem tiegħu għal dejjem’?
9 Fis-santwarju, Asaf beda jħares lejn l-affarijiet bħalma jħares lejhom Alla. Int għandek mnejn kellek esperjenza simili. Forsi f’xi żmien, sa ċertu punt, ma bqajtx tiffoka fuq il-privileġġi spiritwali tiegħek u bdejt tiffoka fuq dak li ma kellekx materjalment. Imma billi studjajt il-Kelma t’Alla u billi mort għal-laqgħat Kristjani, bdejt tara l-affarijiet kif jarahom Ġeħova. Asaf induna x’kien se jiġrilhom eventwalment il-ħżiena. Hu ħaseb dwar l-affarijiet tajbin li kellu u rrealizza li Ġeħova kien se jaqbadlu idu l-leminija u jmexxih. B’hekk, Asaf setaʼ jgħid lil Ġeħova: “Ħliefek m’għandi ebda għaxqa oħra fuq l-art.” (Salm 73:23, 25) Hu mbagħad irrefera għal Alla bħala s-sehem tiegħu. (Aqra Salm 73:26.) Għalkemm ‘il-ġisem u l-qalb’ tas-salmista setgħu ‘jiġu fix-xejn,’ Alla kellu jkun ‘is-sehem tiegħu għal dejjem.’ Is-salmista kien fiduċjuż li Ġeħova kien se jiftakar fih bħala ħabib. Is-servizz leali tiegħu ma kienx se jintesa. (Ekk. 7:1) Min jaf kemm kien rassiguranti dan għal Asaf! Hu kanta: “Min-naħa tiegħi, li nersaq qrib Alla huwa tajjeb għalija. Fil-Mulej Sovran Ġeħova stkennejt.”—Salm 73:28.
10 Il-fatt li Ġeħova kien is-sehem t’Asaf kien iktar importanti għalih mill-affarijiet materjali li kien jirċievi bħala Levita. Dak li rrefera għalih kien prinċipalment il-privileġġ taʼ servizz tiegħu u r-relazzjoni tiegħu maʼ Ġeħova, il-ħbiberija li kien ikkultiva mal-Iktar Għoli. (Ġak. 2:21-23) Biex jipproteġi din ir-relazzjoni, is-salmista kellu jżomm il-fidi f’Ġeħova, billi jafda fih. Hu kellu jkun żgur li Ġeħova kien se jippremjah b’futur hieni jekk jobdih. Int jistaʼ jkollok l-istess fiduċja f’Dak li Jistaʼ Kollox.
11. Ġeremija liema mistoqsija kellu, u kif twieġbet?
11 Il-profeta Ġeremija kien Levita ieħor li rrikonoxxa lil Ġeħova bħala sehmu. Ejja nikkunsidraw x’ried ifisser meta uża din l-espressjoni. Ġeremija kien jgħix f’Għanatot, belt Levita qrib Ġerusalemm. (Ġer. 1:1) Kien hemm żmien meta Ġeremija wkoll staqsa lil Ġeħova: Il-ħżiena għala kienu qed jistagħnew waqt li n-nies sewwa kienu qed ibatu? (Ġer. 12:1) Wara li osserva dak li kien qed iseħħ f’Ġerusalemm u f’Ġuda, ħassu mġiegħel ‘jilmenta’ dwar dak li ra. Ġeremija kien jaf li Ġeħova hu ġust. Dak li Ġeħova mbagħad nebbaħ lil Ġeremija biex jipprofetizza u kif Hu wettaq dak il-kliem profetiku ta risposta konkreta għall-mistoqsija tal-profeta. F’armonija maʼ profeziji divini, dawk li obdew id-direzzjoni taʼ Ġeħova ‘ħadu ruħhom bħala priża,’ filwaqt li l-ħżiena li stagħnew injoraw it-twissija u għabu.—Ġer. 21:9.
12, 13. (a) X’qanqal lil Ġeremija biex jgħid: “Ġeħova huwa sehmi”? (b) Liema attitudni wera? (ċ) It-tribujiet kollha taʼ Iżrael għala kellhom jikkultivaw attitudni taʼ stennija?
12 Hekk kif iktar tard ħares lejn art twelidu li kienet ħerba, Ġeremija ħassu bħallikieku kien qed jimxi fid-dlam. Kien bħallikieku Ġeħova kien ġiegħlu jpoġġi bilqiegħda “bħal dawk li ilhom mejtin żmien twil.” (Lam. 1:1, 16; 3:6) Ġeremija kien qal lill-ġens stinat biex iduru lura lejn Missierhom tas-sema, imma l-ħażen tagħhom kien wasal sal-punt li Alla kellu jħalli lil Ġerusalemm u lil Ġuda jiġu meqrudin. Dan weġġaʼ lil Ġeremija, għalkemm hu ma kellux ħtija. Saħansitra f’dan iż-żmien taʼ sogħba, Ġeremija qal: “Ma ntemmejniex.” Dwar il-ħniniet taʼ Ġeħova, hu qal: “Jiġġeddu kull fil-għodu.” Kien f’dan il-waqt li Ġeremija ddikjara: “Ġeħova huwa sehmi.” Hu kompla jkollu l-privileġġ li jaqdi lil Ġeħova bħala profeta.—Aqra Lamentazzjonijiet 3:22-24.
13 Għal 70 sena, l-art tal-Iżraelin kienet se tkun vojta u ħerba. (Ġer. 25:11) Imma l-espressjoni taʼ Ġeremija, “Ġeħova huwa sehmi,” uriet il-fiduċja tiegħu fil-ħniena divina u tatu raġuni biex ‘jistenna b’attitudni xierqa.’ It-tribujiet kollha taʼ Iżrael kienu tilfu l-wirt tagħhom, u għalhekk kellhom bżonn jikkultivaw l-istess attitudni bħall-profeta. Ġeħova kien l-unika tama għalihom. Wara 70 sena, in-nies t’Alla ttieħdu lura lejn art twelidhom u kellhom il-privileġġ li jaqduh hemmhekk.—2 Kron. 36:20-23.
Oħrajn Setaʼ Jkollhom lil Ġeħova Bħala Sehemhom
14, 15. Minbarra l-Leviti, min ħalla lil Ġeħova jkun is-sehem tiegħu, u għala?
14 Kemm Asaf u kemm Ġeremija kienu mit-tribù taʼ Levi, imma kienu l-Leviti biss li setaʼ jkollhom il-privileġġ li jaqdu lil Ġeħova? Żgur li le! Iż-żagħżugħ David, dak li kellu jkun is-sultan taʼ Iżrael fil-futur, lil Alla sejjaħlu ‘s-sehem tiegħu fl-art tal-ħajjin.’ (Aqra Salm 142:1, 5.) Meta David ikkompona dan is-salm, hu ma kienx f’xi palazz jew saħansitra f’xi dar. Kien f’għar, jistaħba mill-għedewwa tiegħu. Għall-inqas f’żewġ okkażjonijiet, David stkenn fl-għerien—wieħed ħdejn Għadullam u l-ieħor fix-xagħri taʼ Għajn-gedi. Jistaʼ jkun li hu kkompona Salm 142 f’wieħed minn dawn l-għerien.
15 Jekk dan kien il-każ, kien is-Sultan Sawl li kien qed jiġri wara David biex jipprova joqtlu. David ħarab lejn għar li kien diffiċli biex jintlaħaq. (1 Sam. 22:1, 4) F’dan ir-reġjun imwarrab, David forsi ħass li ma kellu ebda ħabib maġenbu biex jappoġġah u jipproteġih. (Salm 142:4) Dan kien meta David sejjaħ lil Alla.
16, 17. (a) David għala setaʼ ħass li ma kellu lil ħadd biex jgħinu? (b) David lejn min setaʼ jdur għall-għajnuna?
16 Qabel ma David kiteb Salm 142, hu għandu mnejn sar jaf x’kien ġralu l-Qassis il-Kbir Aħimelek. Bla ma kien jaf li David kien qed jaħrab minn Sawl, Aħimelek kien għen lil David. Is-Sultan Sawl, li kien għajjur, qatel lil Aħimelek u lil taʼ daru. (1 Sam. 22:11, 18, 19) David ħassu responsabbli għall-imwiet tagħhom. Kien bħallikieku kien hu li qatel lill-qassis li kien għenu. Kieku kont fil-pożizzjoni taʼ David, kont tħossok responsabbli? Il-fatt li ma kellux mistrieħ għax Sawl baqaʼ jiġri warajh kompla jżid mal-istress taʼ David.
17 Ftit wara dan miet il-profeta Samwel, li kien dilek lil David biex ikun is-sultan futur. (1 Sam. 25:1) Dan setaʼ ġiegħel lil David iħossu waħdu, bħallikieku ma kellu lil ħadd biex jgħinu. Madankollu, David kien jaf lejn min setaʼ jdur għall-għajnuna—lejn Ġeħova. David ma kellux l-istess privileġġ taʼ servizz bħal-Leviti, imma hu kien diġà ġie midluk biex iwettaq tip taʼ servizz ieħor, li maż-żmien kellu jkun is-sultan tal-poplu t’Alla. (1 Sam. 16:1, 13) Għalhekk, David fetaħ qalbu maʼ Ġeħova u kompla jfittex lil Alla għad-direzzjoni. Int ukoll jistaʼ u għandu jkollok Lilu bħala s-sehem u r-refuġju tiegħek hekk kif tistinka fis-servizz tiegħu.
18. L-uħud li ddiskutejna f’dan l-artiklu, kif urew li kellhom lil Ġeħova bħala s-sehem tagħhom?
18 L-uħud li kkunsidrajna kellhom lil Ġeħova bħala s-sehem tagħhom fis-sens li rċivew inkarigu taʼ xogħol fis-servizz tiegħu. Huma straħu fuq Alla għall-bżonnijiet hekk kif qdewh. Kemm il-Leviti kif ukoll dawk tat-tribujiet l-oħrajn taʼ Iżrael, bħal David, setgħu jħallu lil Alla jkun is-sehem tagħhom. Int kif tistaʼ bl-istess mod tħalli lil Ġeħova jkun is-sehem tiegħek? Dan se niddiskutuh fl-artiklu li jmiss.
[Nota taʼ taħt]
a Biex titgħallem iktar dwar kif Ġeħova ħa ħsieb il-bżonnijiet tal-qassisin, ara Insight on the Scriptures, Volume 2, paġna 684.
Int Kif Twieġeb?
• Ġeħova f’liema sens kien is-sehem tal-Leviti?
• Asaf, Ġeremija, u David x’għamlu biex juru li Ġeħova kien is-sehem tagħhom?
• Liema kwalità teħtieġ jekk trid li Alla jkun is-sehem tiegħek?
[Mistoqsijiet taʼ Studju]
[Kumment f’paġna 8]
Il-Leviti ma ngħatawx art bħala wirt. Minflok, Ġeħova kien sehemhom, għax huma kellhom il-privileġġ kbir li jaqduh
[Stampa f’paġna 7]
Ġeħova kif kien is-sehem tal-qassisin u tal-Leviti?
[Stampa f’paġna 9]
X’kien li għen lil Asaf ikompli jkollu lil Ġeħova bħala s-sehem tiegħu?