“Ikun imbierek Alla u Missier il-​Mulej tagħna Ġesù Kristu, il-​Missier taʼ kull ħniena tenera u l-​Alla taʼ kull faraġ.”—2 KOR. 1:3.

1. Ikollhom kemm ikollhom età, il-​bnedmin x’għandhom bżonn?

 MINN meta nitwieldu jkollna bżonn il-​faraġ. Tarbija tibki biex turina meta jkollha bżonn il-​faraġ. Forsi trid lil min jerfagħha jew għandha l-​ġuħ. Anke meta nikbru, spiss inħossu l-​bżonn li niġu mfarrġin. Dan speċjalment ikun il-​każ meta nkunu għaddejjin minn sitwazzjonijiet diffiċli.

2. Ġeħova liema assiguranza jagħti dwar li jfarraġ lil dawk li jafdaw fih?

² Membri tal-​familja u ħbieb spiss jistgħu jagħtuna xi faraġ. Imma ma jistgħux jgħinuna fis-​sitwazzjonijiet kollha li jġegħluna nbatu. Alla biss jistaʼ jfarraġna tkun kemm tkun taʼ niket is-​sitwazzjoni tagħna. Il-​Kelma tiegħu tiżgurana: “Ġeħova hu qrib dawk kollha li jsejħulu, . . . u se jismaʼ l-​għajta tagħhom għall-​għajnuna.” (Salm 145:18, 19) Iva, “għajnejn Ġeħova huma fuq in-​nies sewwa, u widnejh miftuħin għall-​għajta tagħhom għall-​għajnuna.” (Salm 34:15) Imma jekk irridu nirċievu l-​appoġġ u l-​faraġ t’Alla, għandna npoġġu l-​fiduċja tagħna fih. Is-​salmista David wera kemm dan hu minnu meta kanta: “Ġeħova jsir post fl-​għoli taʼ sigurtà għal kulmin hu mfarrak, post fl-​għoli taʼ sigurtà fi żminijiet taʼ niket. U dawk li jafu ismek jafdaw fik, għax int żgur ma titlaqx lil dawk li jfittxuk, O Ġeħova.”—Salm 9:9, 10.

3. Ġesù x’qal biex jgħinna nifhmu kemm Ġeħova jħobb lill-​poplu Tiegħu?

³ L-​aduraturi taʼ Ġeħova huma prezzjużi għalih. Ġesù wera dan meta qal: “Ma jinbigħux ħames għasafar tal-​bejt għal żewġ muniti taʼ valur żgħir? Madankollu lanqas wieħed minnhom m’hu minsi quddiem Alla. Imma saħansitra x-​xagħar taʼ raskom kollu hu magħdud. Tibżgħux; intom tiswew iktar minn ħafna għasafar tal-​bejt.” (Lq. 12:6, 7) Permezz tal-​profeta Ġeremija, Ġeħova qal lill-​poplu Tiegħu tal-​qedem: “Bi mħabba dejjiema ħabbejtek. Huwa għalhekk li ġbidtek bil-​qalb tajba bl-​imħabba.”—Ġer. 31:3.

4. Għala nistgħu nafdaw fil-​wegħdi taʼ Ġeħova?

⁴ Il-​fatt li nafdaw f’Ġeħova u fit-​twettiq tal-​wegħdi tiegħu jistaʼ jġibilna faraġ fi żmien l-​inkwiet. Għalhekk, għandu jkollna l-​istess fidi f’Alla li kellu Ġożwè, li qal: “Lanqas kelma waħda mill-​kliem tajjeb kollu li Ġeħova Alla tagħkom qalilkom ma naqset. Kollu seħħ għalikom. Lanqas kelma waħda ma naqset.” (Ġoż. 23:14) Iktar minn hekk, nistgħu nkunu ċerti li anke jekk inħossuna mifnijin għal xi żmien minħabba sitwazzjonijiet diffiċli, “Alla hu leali” u qatt mhu se jabbanduna lill-​qaddejja leali tiegħu.—Aqra l-​1 Korintin 10:13.

5. Kif inhu possibbli għalina li nfarrġu lil oħrajn?

⁵ L-​appostlu Pawlu jirreferi għal Ġeħova bħala “l-​Alla taʼ kull faraġ.” Il-​frażi “li tfarraġ” tfisser li ġġib paċi jew serħan lil xi ħadd imnikket jew batut. Dan isir billi ttaffilu mill-​miżerja jew min-​niket u tfarrġu. Ġeħova żgur li jagħmel dan. (Aqra t-​2 Korintin 1:3, 4.) Missierna tas-​sema mhu limitat minn xejn jew ħadd, u għalhekk jistaʼ jagħmel dak kollu li hemm bżonn biex ifarraġ lil dawk li jħobbuh. Min-​naħa tagħna, aħna nistgħu  nfarrġu lil sħabna fit-​twemmin “f’kull xorta taʼ tribulazzjoni.” Nistgħu nagħmlu dan permezz tal-​“faraġ li aħna stess qed niġu mfarrġin bih minn Alla.” Dan jurina b’mod tajjeb tassew l-​abbiltà taʼ Ġeħova li m’hawnx bħalha biex ifarraġ lil dawk b’qalbhom maqtugħa.

Inkampaw mal-​Kaġuni tan-​Niket

6. Agħti eżempju t’affarijiet li jistgħu jikkaġunaw in-​niket.

⁶ Aħna neħtieġu l-​faraġ f’ħafna oqsma tal-​ħajja. Waħda mill-​iktar affarijiet li tikkaġuna n-​niket hi t-​telfa taʼ xi ħadd maħbub fil-​mewt, speċjalment sieħeb jew sieħba fiż-​żwieġ jew tifel jew tifla tant maħbubin. Jistaʼ jkun hemm bżonn taʼ faraġ ukoll għax persuna tkun vittma tad-​diskriminazzjoni jew tal-​preġudizzju. Saħħa batuta, età avanzata, faqar, problemi fiż-​żwieġ, jew kundizzjonijiet tad-​dinja inkwetanti jistgħu jwasslu għal bżonn personali tal-​faraġ.

7. (a) F’sitwazzjonijiet taʼ niket, x’tip taʼ faraġ ikun meħtieġ? (b) Ġeħova x’jistaʼ jagħmel biex ifejjaq qalb “maqsuma u mgħaffġa”?

⁷ Fiż-​żminijiet tal-​inkwiet, jistaʼ jkollna bżonn faraġ li jserraħ il-​qalb, il-​moħħ, l-​emozzjonijiet, u wkoll is-​saħħa fiżika u spiritwali tagħna. Pereżempju, ħu l-​qalb. Il-​Kelma t’Alla tirrikonoxxi li qalbna tistaʼ tiġi “maqsuma u mgħaffġa.” (Salm 51:17) Ġeħova żgur li jistaʼ jittratta maʼ din is-​sitwazzjoni għax hu “qed ifejjaq lil dawk taʼ qalbhom maqsuma, u qed jinfaxxalhom il-​ġrieħi li juġgħuhom.” (Salm 147:3) Anke f’sitwazzjonijiet tassew diffiċli, Alla jistaʼ jserraħ qalb imnikkta jekk nitolbuh b’fidi sħiħa u nobdu l-​kmandamenti tiegħu.—Aqra l-​1 Ġwanni 3:19-​22; 5:14, 15.

8. Ġeħova kif jistaʼ jgħinna meta nġarrbu niket mentali?

⁸ Moħħna spiss ikollu bżonn faraġ għax diversi provi jistgħu jikkaġunaw niket mentali kbir. Bis-​saħħa tagħna biss, x’aktarx ma nkunux nistgħu nkampaw maʼ dawn il-​provi tal-​fidi. Però, is-​salmista kanta: “Meta l-​ħsibijiet li jinkwetawni żdiedu ġewwa fija, il-​faraġ tiegħek beda jmellisli ruħi.” (Salm 94:19) Barra minn dan, Pawlu kiteb: “Tkunu ansjużi fuq xejn, imma f’kollox b’talb u b’suppliki flimkien maʼ radd il-​ħajr ħallu lil Alla jkun jaf x’teħtieġu; u l-​paċi t’Alla li tisboq kull ħsieb tgħasses lil qalbkom u l-​qawwa mentali tagħkom permezz taʼ Kristu Ġesù.” (Flp. 4:6, 7) Il-​qari u l-​meditazzjoni fuq l-​Iskrittura jistgħu jkunu t’għajnuna kbira f’li nkampaw maʼ niket mentali.—2 Tim. 3:15-​17.

9. Kif nistgħu nkampaw b’niket emozzjonali?

⁹ Kultant, nistgħu tant naqtgħu qalbna li nħossuna mimlijin emozzjonijiet negattivi. Forsi ma nħossuniex kapaċi nieħdu ħsieb ċerta responsabbiltà Skritturali jew privileġġ taʼ servizz. Hawnhekk ukoll Ġeħova jistaʼ jfarraġna u jgħinna. Biex nagħtu eżempju: Meta Ġożwè ġie inkarigat imexxi lill-​Iżraelin kontra ġnus t’għedewwa b’saħħithom, Mosè qal lin-​nies: “Kunu kuraġġużi u agħmlu l-​ħila. Tibżgħux u tinħasdux quddiemhom, għaliex hu Ġeħova Alla tiegħek li qed jimxi miegħek. La se jabbandunak u lanqas jitilqek għalkollox.” (Dt. 31:6) Bl-​appoġġ taʼ Ġeħova, Ġożwè rnexxielu jmexxi l-​poplu t’Alla għal ġol-​Art Imwiegħda u jikseb rebħa fuq l-​għedewwa kollha tagħhom. Iktar qabel ħdejn il-​Baħar l-​Aħmar, Mosè kien esperjenza appoġġ divin simili.—Eżo. 14:13, 14, 29-​31.

10. Jekk is-​saħħa fiżika tagħna tiġi effettwata min-​niket, liema għajnuna nistgħu nirċievu?

¹⁰ Ġrajjiet li jnikktuna jistaʼ jkollhom effett negattiv fuq is-​saħħa fiżika tagħna. Naturalment, ikun t’għajnuna meta nieklu bil-​bilanċ, nistrieħu biżżejjed, nagħmlu eżerċizzju regulari, u nżommu lilna nfusna u darna nodfa. Ukoll, jekk naħsbu dwar dak li tgħid il-​Bibbja dwar il-​futur, dan se jkollu effett pożittiv fuq ġisimna. Għalhekk ikun t’għajnuna jekk meta nkunu għaddejjin minn xi għawġ inżommu f’moħħna  l-​esperjenza u l-​kliem inkuraġġanti taʼ Pawlu: “Aħna magħfusin b’kull mod, imma mhux marsusin li ma nistgħux niċċaqalqu; mifxulin, imma mhux li m’għandniex assolutament minfejn noħorġu; persegwitati, imma mhux abbandunati; mitfugħin maʼ l-​art, imma mhux meqrudin.”—2 Kor. 4:8, 9.

11. Kif nistgħu nikkumbattu l-​mard spiritwali?

¹¹ Ċerti provi jistaʼ jkollhom effett taʼ ħsara fuq is-​saħħa spiritwali tagħna. Ġeħova jistaʼ jgħinna f’dan ir-​rigward ukoll. Il-​Kelma tiegħu tassigurana: “Ġeħova qed iżomm lil kulmin qed jaqaʼ, u qed iqajjem lil kulmin hu mtaqqal.” (Salm 145:14) Għall-​għajnuna biex nikkumbattu l-​mard spiritwali għandna nfittxu l-​assistenza tal-​anzjani Kristjani. (Ġak. 5:14, 15) U l-​fatt li dejjem inżommu f’moħħna t-​tama Skritturali tal-​ħajja taʼ dejjem jistaʼ jgħinna nissaportu matul il-​provi tal-​fidi tagħna.—Ġw. 17:3.

Eżempji taʼ Faraġ Mogħti Minn Alla

12. Ġeħova kif farraġ lil Abraham?

¹² Salmista mnebbaħ iddikjara: “Ftakar fil-​kelma li għedt lill-​qaddej tiegħek, li biha tajtni għalxiex nistenna. Dan ifarraġni fis-​sofferenza tiegħi, għax dak li għedt int [Ġeħova] żammni ħaj.” (Salm 119:49, 50) Illum għandna l-​Kelma miktuba taʼ Ġeħova, li fiha ħafna eżempji taʼ faraġ mogħti minn Alla. Pereżempju, Abraham għandu mnejn kien imnikket ferm meta sar jaf li Ġeħova kien se jeqred lil Sodoma u Gomorra. Dan il-​patrijarka leali staqsa lil Alla: “Int tassew li se teqred lin-​nies sewwa maʼ dawk li huma mill-​agħar?” Ġeħova farraġ lil Abraham billi assigurah li jekk jinstabu biss 50 persuna sewwa, Hu ma jeqridx lil Sodoma. Imma għal ħames darbiet oħra Abraham staqsa lil Ġeħova: Suppost li jinstabu biss 45 persuna sewwa? 40? 30? 20? 10? Kull darba, Ġeħova bil-​paċenzja kollha u b’qalb tajba żgura lil Abraham li Sodoma tinħeles. Għalkemm ma kien hemm lanqas għaxar persuni sewwa fl-​inħawi, Ġeħova salva lil Lot u l-​bniet tiegħu.—Ġen. 18:22-​32; 19:15, 16, 26.

13. Ħanna kif uriet li fdat f’Ġeħova?

¹³ Ħanna, il-​mara t’Elkana, tassew xtaqet li jkollha tarbija. Imma ma setgħetx ikollha tfal u dan nikkitha ferm. Hi talbet lil Ġeħova dwar il-​ħaġa, u l-​Qassis il-​Kbir Eli qalilha: “Jalla l-​Alla taʼ Israel jismaʼ t-​talba tiegħek u jagħtik dak li tlabtu.” Dan farraġ lil Ħanna u “wiċċha ma baqax jidher imħasseb bħal qabel.” (1 Sam. 1:8, 17, 18) Ħanna fdat f’Ġeħova u bil-​fiduċja ħalliet kollox f’idejh.  Għalkemm ma kinitx taf kif kienu se jiżvolġu l-​affarijiet, Ħanna esperjenzat paċi ġewwinija. Maż-​żmien, Ġeħova wieġeb it-​talb tagħha. Hi nqabdet tqila u wildet iben li semmietu Samwel.—1 Sam. 1:20.

14. David għala kellu bżonn il-​faraġ, u lejn min dar?

¹⁴ Is-​Sultan David t’Iżrael tal-​qedem hu eżempju ieħor taʼ individwu mfarraġ minn Alla. Peress li Ġeħova “jara l-​qalb,” meta għażel lil David biex ikun is-​sultan futur t’Iżrael, kien jaf li David kien sinċier u devot għall-​qima vera. (1 Sam. 16:7; 2 Sam. 5:10) Imma mbagħad, David għamel adulterju maʼ Bat-​seba u pprova jgħatti d-​dnub billi ordna l-​qtil tar-​raġel tagħha. Meta David ġie megħjun jirrealizza kemm tassew kien serju d-​dnub tiegħu, hu talab lil Ġeħova: “Skond l-​abbundanza tal-​ħniniet tiegħek ħassar għalkollox in-​nuqqasijiet tiegħi. Aħsilni sew mill-​iżball tiegħi, u naddafni minn dnubi. Għax jien naf in-​nuqqasijiet tiegħi, u dnubi quddiemi l-​ħin kollu.” (Salm 51:1-​3) David kien verament niedem, u Ġeħova ħafirlu. Madanakollu, David kellu jiffaċċja l-​konsegwenzi taʼ dnubu. (2 Sam. 12:9-​12) Minkejja dan, il-​ħniena taʼ Ġeħova kienet sors taʼ faraġ għall-​qaddej umli tiegħu.

15. Ġeħova liema għajnuna ta lil Ġesù eżatt qabel il-​mewt tiegħu?

¹⁵ Meta kien fuq l-​art, Ġesù ħabbat wiċċu maʼ ħafna ċirkustanzi diffiċli. Alla ppermetta dawn il-​provi tal-​fidi, u Ġesù żamm l-​integrità tiegħu bħala bniedem perfett li dejjem fada f’Ġeħova u appoġġa s-​sovranità Tiegħu. Ftit qabel ma ġie tradut u maqtul, Ġesù talab lil Ġeħova: “Ħa sseħħ ir-​rieda tiegħek u mhux tiegħi.” Imbagħad deherlu anġlu u beda jqawwilu qalbu. (Lq. 22:42, 43) Alla ta lil Ġesù l-​faraġ, is-​saħħa, u l-​appoġġ li kellu bżonn dak il-​ħin.

16. Ġeħova kif jistaʼ jgħinna jekk ħajjitna tkun fil-​periklu minħabba l-​fidi tagħna?

¹⁶ Anke jekk aħna stess niffaċċjaw il-​mewt minħabba l-​waqfa soda tagħna bħala Kristjani, Ġeħova jistaʼ jgħinna nżommu l-​integrità tagħna lejh u hekk se jagħmel. Iktar minn hekk, aħna mfarrġin bit-​tama tal-​irxoxt. U kemm inħarsu ’l quddiem għall-​jum meta l-​aħħar għadu, il-​mewt, ‘se jinġieb fix-​xejn’! (1 Kor. 15:26) Il-​qaddejja leali t’Alla li mietu, kif ukoll oħrajn, huma fil-​memorja infallibbli taʼ Ġeħova u se jiġu rxoxtati. (Ġw. 5:28, 29; Atti 24:15) Il-​fiduċja fil-​wegħda taʼ Ġeħova dwar l-​irxoxt iġġibilna faraġ u tama ċerta matul żminijiet taʼ persekuzzjoni.

17. Ġeħova kif jistaʼ jfarraġna meta xi ħadd maħbub imut?

¹⁷ Kemm hu taʼ faraġ li nkunu nafu li l-​maħbubin tagħna li bħalissa jinsabu reqdin fil-​qabar komuni tal-​bnedmin għandhom it-​tama li jerġgħu jgħixu f’dinja ġdida meraviljuża! Din se tkun ħielsa minn dak kollu li jikkaġuna l-​inkwiet illum il-​ġurnata. U xi privileġġ se jkun għall-​“folla kbira” taʼ qaddejja taʼ Ġeħova li jsalvaw mit-​tmiem taʼ din is-​sistema u li jilqgħu u jgħallmu lil dawk irxoxtati għall-​ħajja fuq l-​art!—Riv. 7:9, 10.

Taħt Hemm id-​Dirgħajn Dejjiema t’Alla

18, 19. Il-​qaddejja t’Alla kif ġew imfarrġin meta kienu persegwitati?

¹⁸ Permezz t’għanja li ssaħħaħ u li tqawwi l-​qalb, Mosè assigura lin-​nies t’Iżrael: “Moħba għalik hu l-​Alla taʼ żmien il-​qedem, u taħtek id-​dirgħajn dejjiema hemm.” (Dt. 33:27) Il-​profeta Samwel iktar tard qal lill-​Iżraelin: “Titwarrbux milli ssegwu lil Ġeħova, u aqdu  lil Ġeħova b’qalbkom kollha. . . . Ġeħova ma jabbandunax lill-​poplu tiegħu minħabba ismu l-​kbir.” (1 Sam. 12:20-​22) Sakemm inżommu sod maʼ Ġeħova fil-​qima vera, hu qatt ma se jabbandunana. Dejjem se jagħtina l-​appoġġ li neħtieġu.

¹⁹ Mingħajr waqfien, Alla qed jagħti lin-​nies tiegħu l-​għajnuna u l-​faraġ li għandhom bżonn f’dawn iż-​żminijiet tal-​aħħar kritiċi. Għal iktar minn seklu, eluf mill-​aduraturi sħabna madwar id-​dinja ġew persegwitati u mitfugħin il-​ħabs sempliċement għax qdew lil Ġeħova. L-​esperjenzi tagħhom juru ċar li fi żminijiet taʼ provi, Ġeħova tassew ifarraġ lill-​qaddejja tiegħu. Pereżempju, wieħed minn ħutna f’dik li qabel kienet l-​Unjoni Sovjetika ġie kundannat għal 23 sena ħabs minħabba t-​twemmin tiegħu. Xorta waħda, instab mod kif jirċievi l-​ikel spiritwali ħalli jkun imsaħħaħ u mfarraġ. Hu qal: “Matul dawk is-​snin kollha, tgħallimt nafda f’Ġeħova u nirċievi s-​saħħa mingħandu.”—Aqra l-​1 Pietru 5:6, 7.

20. Għala nistgħu nkunu ċerti li Ġeħova mhux se jabbandunana?

²⁰ Ikun xi jkun dak li għad irridu niffaċċjaw, nagħmlu tajjeb jekk inżommu f’moħħna l-​kliem li jfarraġ tas-​salmista: “Ġeħova mhux se jabbanduna lill-​poplu tiegħu.” (Salm 94:14) Għalkemm personalment għandna bżonn inkunu mfarrġin, aħna wkoll għandna l-​privileġġ grandjuż li nfarrġu ’l ħaddieħor. Bħalma se naraw fl-​artiklu li jmiss, jistaʼ jkollna sehem f’li nfarrġu lil uħud imnikktin f’din id-​dinja mimlija inkwiet.

Int Kif Twieġeb?

• X’inhuma xi affarijiet li jikkaġunawlna n-​niket?

• Ġeħova kif ifarraġ lill-​qaddejja tiegħu?

• Jekk niffaċċjaw il-​mewt, x’jistaʼ jfarraġna?

[Mistoqsijiet taʼ Studju]

[Kaxxa/Stampi f’paġna 25]

KIF INKAMPAW M’AFFARIJIET LI JISTGĦU JEFFETTWAW . . .

▪ lil qalbna Salm 147:3; 1 Ġw. 3:19-​22; 5:14, 15

▪ lil moħħna Salm 94:19; Flp. 4:6, 7

▪ lill-​emozzjonijiet tagħna Eżo. 14:13, 14; Dt. 31:6

▪ lis-​saħħa fiżika tagħna 2 Kor. 4:8, 9

▪ lis-​saħħa spiritwali tagħna Salm 145:14; Ġak. 5:14, 15