“Kulmin jiġi mgħallem b’mod perfett ikun bħall-​għalliem tiegħu.”—LQ. 6:40.

1. Ġesù x’għamel matul il-​ministeru tiegħu sabiex iħarreġ lill-​predikaturi li kellhom isiru kongregazzjoni kbira?

 FIT-​tmiem tar-​rakkont tal-​Evanġelju tiegħu, l-​appostlu Ġwanni kiteb: “Fil-​fatt, hemm ukoll ħafna affarijiet oħra li għamel Ġesù, u li kieku kellhom jinkitbu sa l-​iċken dettall, naħseb jien, id-​dinja nfisha ma kinitx tesaʼ r-​rombli miktubin.” (Ġw. 21:25) Ġesù ħadem iebes fil-​ministeru matul iż-​żmien qasir li kien fuq l-​art. Matul dak iż-​żmien, hu kellu bżonn isib irġiel li setaʼ jħarriġhom biex ikomplu x-​xogħol tiegħu wara li jmur lura fis-​sema. Fis-​sena 33 E.K., hu kien ħarreġ biss grupp żgħir, imma dan malajr kiber u sar kongregazzjoni taʼ eluf taʼ predikaturi.—Atti 2:41, 42; 4:4; 6:7.

2, 3. (a) Għala hemm bżonn li l-​aħwa rġiel jirsistu? (b) X’se jiġi kunsidrat f’dan l-​artiklu?

² Illum, hemm iktar minn sebaʼ miljun proklamatur attiv tas-​Saltna f’iktar minn 100,000 kongregazzjoni mad-​dinja kollha. Hemm bżonn taʼ aħwa rġiel biex jieħdu t-​tmexxija f’dawn il-​kongregazzjonijiet. Pereżempju, hemm ħtieġa kbira għal anzjani Kristjani. Dawk li jirsistu għal dan il-​privileġġ taʼ servizz għandhom jiġu mfaħħrin, għax huma ‘jixtiequ xogħol tajjeb.’—1 Tim. 3:1.

³ Madankollu, l-​irġiel ma jikkwalifikawx awtomatikament għal privileġġi fil-​kongregazzjoni.  L-​edukazzjoni, l-​esperjenza, u l-​abbiltajiet ma jippreparawx lil raġel għal dan ix-​xogħol. Ħajtu trid tkun fi qbil maʼ dak li teħtieġ il-​Bibbja mill-​aħwa rġiel li jaqdu fil-​kongregazzjoni. Kif nistgħu ngħinu lill-​irġiel biex jagħmlu progress fil-​verità u biex jikkwalifikaw għal responsabbiltajiet? “Kulmin jiġi mgħallem b’mod perfett ikun bħall-​għalliem tiegħu,” qal Ġesù. (Lq. 6:40) F’dan l-​artiklu, se nitkellmu dwar xi modi kif Ġesù ħarreġ lid-​dixxipli tiegħu u dwar x’nistgħu nitgħallmu minn dan it-​taħriġ.

“Sejjaħtilkom Ħbieb”

4. Ġesù kif kien ħabib tajjeb għad-​dixxipli tiegħu?

⁴ Ġesù ma ħasibx li kien aħjar mid-​dixxipli tiegħu. Dawn kienu ħbiebu. Hu ried ikun magħhom, u kien jafdahom. Qalilhom: “Kulma smajt mingħand Missieri għarrafthulkom.” (Aqra Ġwanni 15:15.) Immaġina kemm kienu henjin id-​dixxipli meta Ġesù wieġeb il-​mistoqsija tagħhom: “X’se jkun is-​sinjal tal-​preżenza tiegħek u tal-​konklużjoni tas-​sistema?” (Mt. 24:3, 4) Hu riedhom ukoll ikunu jafu x’kien qed jaħseb u jħoss. Pereżempju, fil-​lejl li ġie arrestat, Ġesù ħa lil Pietru, Ġakbu, u Ġwanni fil-​ġnien tal-​Ġetsemani. Kellu bżonn jitlob f’dak iż-​żmien diffiċli. It-​tliet appostli forsi ma semgħux dak li qal fit-​talba tiegħu, imma kienu jafu li kien qed isofri ħafna. (Mk. 14:33-​38) Aħseb ukoll dwar l-​impatt li t-​trasfigurazzjoni żgur li kellha fuq dawn it-​tlieta. (Mk. 9:2-​8; 2 Pt. 1:16-​18) Il-​ħbiberija b’saħħitha taʼ bejn Ġesù u d-​dixxipli tiegħu tathom il-​qawwa li kellhom bżonn biex ikomplu x-​xogħol importanti li kellhom jagħmlu.

5. L-​anzjani kif jgħinu lil ħaddieħor?

⁵ Bħal Ġesù, l-​anzjani llum jgħinu lil ħuthom u jridu jkunu l-​ħbieb tagħhom. Huma jħobbuhom u juruhom li huma interessati sinċerament fihom. Kultant ikun hemm sitwazzjonijiet li l-​anzjani ma jkunux jistgħu jitkellmu dwarhom. Imma huma jitkellmu maʼ ħuthom dwar l-​affarijiet li jkunu tgħallmu mill-​Kelma t’Alla. L-​anzjani jafdawhom lil ħuthom. Huma qatt ma jaħsbu li huma iktar importanti minn xi qaddej ministerjali li jkun iżgħar minnhom. L-​anzjani jifhmu li qaddejja ministerjali żgħażagħ ukoll għamlu progress fil-​verità u jistgħu jibqgħu jagħmlu progress. Jafu li dawn l-​irġiel żgħażagħ iħobbu lil Ġeħova u qed jaqdu magħhom biex jieħdu ħsieb il-​kongregazzjoni.

“Ħallejtilkom Mudell”

6, 7. Iddeskrivi l-​eżempju li ħalla Ġesù għad-​dixxipli tiegħu u l-​effett li dan kellu fuqhom.

⁶ Għalkemm id-​dixxipli taʼ Ġesù kienu japprezzaw l-​affarijiet spiritwali, il-​ħsib tagħhom kultant kien influwenzat mit-​trobbija u l-​kultura tagħhom. (Mt. 19:9, 10; Lq. 9:46-​48; Ġw. 4:27) Madankollu, Ġesù qatt ma kkritikahom jew irrabja magħhom. Ma talabhomx jagħmlu xi ħaġa li kienet diffiċli wisq għalihom. U qatt ma talabhom jagħmlu xi ħaġa li hu stess ma kienx jagħmilha. Minflok, Ġesù għallimhom bl-​eżempju.—Aqra Ġwanni 13:15.

⁷ Ġesù liema mudell ħallielhom lid-​dixxipli tiegħu? (1 Pt. 2:21) Żamm ħajtu sempliċi sabiex ikun jistaʼ juża ħinu biex jaqdi lil oħrajn. (Lq. 9:58) Ġesù kien umli u dejjem ibbaża t-​tagħlim tiegħu fuq l-​Iskrittura. (Ġw. 5:19; 17:14, 17) Kellu qalbu tajba u n-​nies ħassewhom komdi jitkellmu miegħu. Kulma għamel kien motivat mill-​imħabba. (Mt. 19:13-​15; Ġw. 15:12) L-​eżempju taʼ Ġesù kellu influwenza pożittiva fuq l-​appostli tiegħu. Pereżempju, Ġakbu ma ħassux imbeżżaʼ meta ffaċċja l-​mewt, imma sakemm inqatel, qeda lil Alla lealment. (Atti 12:1, 2) Ġwanni segwa l-​passi taʼ Ġesù lealment għal iktar minn 60 sena.—Riv. 1:1, 2, 9.

8. L-​anzjani kif jistgħu jagħtu eżempju tajjeb lil irġiel iżgħar u lil oħrajn?

⁸ L-​anzjani jistgħu jagħtu eżempju tajjeb lil irġiel iżgħar billi jkunu umli, billi juru  l-​imħabba, u billi jużaw il-​ħin u l-​enerġija tagħhom biex jgħinu lil oħrajn. (1 Pt. 5:2, 3) Ukoll, l-​anzjani huma kuntenti li jagħtu eżempju tajjeb sabiex l-​aħwa jkunu jistgħu jimitaw il-​fidi b’saħħitha tagħhom, il-​mod kif jgħallmu, il-​mod kif jgħixu bħala Kristjani, u l-​mod kif jippritkaw.—Ebr. 13:7.

‘Ġesù Tahom l-​Ordnijiet u Bagħathom’

9. Kif nafu li Ġesù ħarreġ lid-​dixxipli tiegħu għax-​xogħol tal-​ippritkar?

⁹ Wara li kien ipprietka għal madwar sentejn, Ġesù bagħat ukoll lit-​12-​il appostlu tiegħu biex jippritkaw. Iżda, l-​ewwel tahom xi istruzzjonijiet. (Mt. 10:5-​14) Meta kien se jitmaʼ lil folla taʼ eluf mirakolożament, Ġesù qal lid-​dixxipli tiegħu kif riedhom jorganizzaw lin-​nies u jqassmu l-​ikel. (Lq. 9:12-​17) Għalhekk, b’mod ċar Ġesù ħarreġ lid-​dixxipli tiegħu billi tahom direzzjonijiet ċari u speċifiċi. Minħabba t-​taħriġ li tahom Ġesù u l-​għajnuna li rċivew mill-​ispirtu qaddis, l-​appostli organizzaw xogħol kbir taʼ ppritkar li beda fis-​sena 33 E.K.

10, 11. L-​anzjani u oħrajn kif jistgħu jħarrġu lill-​irġiel fil-​kongregazzjoni?

¹⁰ Illum, l-​istruzzjoni spiritwali tibda meta raġel jaċċetta studju tal-​Bibbja. Forsi jkollna bżonn ngħinuh jaqra sew. L-​assistenza tagħna tkompli hekk kif nikkonduċu studji tal-​Bibbja miegħu. Meta jibda jattendi għal-​laqgħat, hu jitgħallem x’għandu jagħmel biex jipparteċipa fl-​Iskola tal-​Ministeru Teokratiku u jsir pubblikatur mhux mgħammed. Wara l-​magħmudija, it-​taħriġ tiegħu jistaʼ jinkludi affarijiet bħal li jgħin fil-​manutenzjoni tas-​Sala tas-​Saltna. Maż-​żmien, ħu jistaʼ jiġi megħjun jara x’għandu jagħmel biex jikkwalifika bħala qaddej ministerjali.

¹¹ Meta l-​anzjani jagħtu responsabbiltà fil-​kongregazzjoni lil ħu mgħammed, huma jkunu jridu jgħinuh iwettaqha sew. Huma jispjegawlu l-​mod kif l-​aħwa jagħmlu dan ix-​xogħol fil-​kongregazzjonijiet u juruh b’mod ċar x’għandu jagħmel. Jekk ix-​xogħol kultant ikun diffiċli għalih, l-​anzjani ma jaqbdux u jiddeċiedu li mhuwiex kapaċi jagħmlu. Imma b’qalb tajba jerġgħu jispjegawlu x’għandu jagħmel u kif jagħmlu. L-​anzjani jieħdu pjaċir jgħinu lil xi ħu jieħu ħsieb ir-​responsabbiltajiet tiegħu għaliex jafu li jekk jaqdi lil oħrajn fil-​kongregazzjoni se jkun ferħan.—Atti 20:35.

“Min Jismaʼ mill-​Pariri Huwa Għaref”

12. Il-​pariri taʼ Ġesù għala kienu effettivi?

¹² Ġesù ħarreġ lid-​dixxipli tiegħu billi tahom pariri persunali adattati għall-​bżonnijiet tagħhom. Pereżempju, hu ċanfar lil Ġakbu u lil Ġwanni għax riedu jgħidu lin-​nar jinżel mis-​sema fuq xi Samaritani li ma kinux laqgħuh. (Lq. 9:52-​55) Meta omm Ġakbu u Ġwanni resqet lejn Ġesù għan-​nom tagħhom biex titlob li jingħataw pożizzjonijiet importanti fis-​Saltna, Ġesù indirizza direttament lill-​aħwa, billi qal: “Li toqogħdu bil-​qiegħda fuq il-​lemin u fuq ix-​xellug tiegħi ma nistax nagħtih jien, imma hu taʼ dawk li tħejja għalihom minn Missieri.” (Mt. 20:20-​23) Ġesù dejjem ta pariri li kienu ċari, prattiċi, u bbażati b’mod sod fuq il-​Kelma t’Alla, u għallem lid-​dixxipli tiegħu biex jirraġunaw fuqha. (Mt. 17:24-​27) Ġesù rrikonoxxa wkoll il-​limitazzjonijiet tas-​segwaċi tiegħu u ma kienx jistenna li jkunu perfetti. Il-​pariri tiegħu kienu motivati mill-​imħabba ġenwina.—Ġw. 13:1.

13, 14. (a) Min għandu bżonn il-​pariri? (b) Liema huma xi eżempji taʼ pariri li l-​anzjani jistgħu jagħtu lil ħu?

¹³ Kull raġel li jirsisti għal xi responsabbiltà fil-​kongregazzjoni Kristjana se jkollu bżonn pariri mill-​Bibbja xi darba jew oħra. “Min jismaʼ mill-​pariri huwa għaref,” jgħid Proverbji 12:15. Ħu żagħżugħ qal li qabel kien iħoss li ma kienx tajjeb biżżejjed biex jaqdi. Hu qal li anzjan għenu jifhem li ma kellux għalfejn ikun perfett biex jaqdi.

 ¹⁴ Jekk l-​anzjani jinnotaw li l-​kondotta taʼ ħu qed iżżommu milli jagħmel progress, huma mill-​ewwel jipprovaw jgħinuh bi “spirtu taʼ ħlewwa.” Iriduh ikun kapaċi jaqdi lil oħrajn fil-​kongregazzjoni. (Gal. 6:1) Drabi oħrajn, l-​anzjani jkollhom bżonn jagħtu l-​pariri biex jgħinu lil xi ħadd jaġġusta l-​attitudni tiegħu. Pereżempju, forsi l-​anzjani jinnotaw li ħu kultant donnu jagħmel inqas milli jistaʼ. Huma jistgħu jinkuraġġuh jaħseb dwar l-​eżempju taʼ Ġesù. Ġesù ħadem iebes fix-​xogħol tal-​ippritkar u qal lid-​dixxipli tiegħu biex isegwu l-​eżempju tiegħu. (Mt. 28:19, 20; Lq. 8:1) Jekk ħu jidher li hu ambizzjuż, l-​anzjani jistgħu juruh kif Ġesù għen lid-​dixxipli Tiegħu jaraw il-​perikli taʼ li jfittxu l-​prominenza. (Lq. 22:24-​27) Jew jistaʼ jkun li ħu jsibha diffiċli biex jaħfer lil oħrajn. L-​anzjani jistgħu jgħinuh billi jużaw it-​tixbiha tal-​ilsir li ma riedx jaħfer lil ħaddieħor avolja ħaddieħor kien ħafirlu ħafna. (Mt. 18:21-​35) Meta l-​anzjani jkollhom bżonn jagħtu l-​pariri, għandhom jagħtuhom malajr kemm jistaʼ jkun.—Aqra Proverbji 27:9.

“Ħarreġ Lilek Innifsek”

15. Il-​familja taʼ ħu, kif tistaʼ tgħinu jaqdi lil oħrajn?

¹⁵ L-​anzjani jieħdu t-​tmexxija biex iħarrġu lill-​irġiel ħalli jirsistu, imma oħrajn jistgħu jappoġġaw l-​isforzi tagħhom. Pereżempju, il-​familja taʼ ħu tistaʼ u għandha tgħinu jirsisti. U jekk diġà hu anzjan, martu u wliedu jistgħu jappoġġawh hekk kif jaħdem iebes fil-​kongregazzjoni. Huma jifhmu li hu jrid juża ftit mill-​ħin u l-​enerġija tiegħu għal oħrajn. Hu jieħu pjaċir meta l-​familja tiegħu tkun lesta li tagħmel xi sagrifiċċji sabiex hu jkun jistaʼ jieħu ħsieb sew ir-​responsabbiltajiet tiegħu. Aħna grati għas-​sagrifiċċji li jagħmlu l-​familji tal-​anzjani.—Prov. 15:20; 31:10, 23.

16. (a) Min għandu bżonn juri li għandu x-​xewqa li jaqdi lil ħaddieħor? (b) Raġel kif jistaʼ jirsisti għal privileġġi fil-​kongregazzjoni?

¹⁶ Avolja oħrajn jistgħu jgħinuh, huwa l-​ħu nnifsu li għandu bżonn juri li għandu x-​xewqa li jaqdi lil ħaddieħor. (Aqra Galatin 6:5.) Naturalment, ħu m’għandux għalfejn ikun qaddej ministerjali jew anzjan sabiex jgħin lil oħrajn u biex ikollu sehem sħiħ fil-​ministeru. Madankollu, li wieħed jirsisti għal privileġġi fil-​kongregazzjoni jfisser li jistinka biex jilħaq il-​kwalifiki miktubin fl-​Iskrittura. (1 Tim. 3:1-​13; Titu 1:5-​9; 1 Pt. 5:1-​3) Mela jekk raġel ikun jixtieq li jaqdi bħala qaddej ministerjali jew anzjan imma għadu ma nħatarx, għandu jaħseb dwar affarijiet li jistaʼ jagħmel biex jikkwalifika. Dan jirrikjedi qari regulari tal-​Bibbja, studju persunali diliġenti, meditazzjoni bis-​serjetà, talb mill-​qalb, u  parteċipazzjoni żeluża fil-​ministeru Kristjan. Jekk jagħmel hekk, ikun jistaʼ japplika personalment il-​parir li Pawlu ta lil Timotju: “Ħarreġ lilek innifsek bid-​devozzjoni lejn Alla bħala l-​mira tiegħek.”—1 Tim. 4:7.

17, 18. Ħu x’jistaʼ jagħmel jekk iħoss li mhuwiex tajjeb biżżejjed jew li m’għandux ix-​xewqa li jaqdi?

¹⁷ Imma xi ngħidu jekk raġel ma jkunx qed jirsisti minħabba l-​ansjetà jew għax iħoss li mhuwiex tajjeb biżżejjed? Jagħmel tajjeb li jikkunsidra kemm jagħmlu għalina Alla Ġeħova u Ġesù Kristu. Tabilħaqq, Ġeħova “kuljum iġorr it-​tagħbija għalina.” (Salm 68:19) Għalhekk, Missierna tas-​sema jistaʼ jgħin lil ħu biex jerfaʼ xi responsabbiltà fil-​kongregazzjoni. Ħu li mhuwiex jaqdi bħala qaddej ministerjali jew anzjan se jsibu wkoll taʼ benefiċċju li jqis il-​fatt li hemm ħtieġa kbira għal irġiel maturi biex jaċċettaw privileġġi taʼ servizz fl-​organizzazzjoni t’Alla. Jekk ħu jirrifletti fuq punti bħal dawn jistaʼ jiġi mqanqal biex jagħmel sforz ħalli jegħleb is-​sentimenti negattivi. Jistaʼ jitlob għall-​ispirtu qaddis, billi jżomm f’moħħu li l-​frott tiegħu jinkludi l-​paċi u r-​rażan—kwalitajiet li huma meħtiġin biex jgħinuh ma jibqax iħossu ansjuż jew li mhuwiex tajjeb biżżejjed. (Lq. 11:13; Gal. 5:22, 23) U dak li jkun jistaʼ jkun fiduċjuż li Ġeħova jbierek lil kull min jirsisti b’motiv xieraq.

¹⁸ Jistaʼ jkun li ħu mhuwiex jirsisti minħabba nuqqas taʼ motivazzjoni? X’jistaʼ jgħin lil ħu li m’għandux ix-​xewqa li jaqdi? L-​appostlu Pawlu kiteb: “[Alla], għax hekk għoġbu, qed jaħdem fikom kemm biex ikollkom ir-​rieda u kemm biex taġixxu.” (Flp. 2:13) Ix-​xewqa li wieħed jaqdi tingħata minn Alla, u l-​ispirtu taʼ Ġeħova jistaʼ jsaħħu biex jagħti servizz sagru. (Flp. 4:13) Iktar minn hekk, Kristjan jistaʼ jitlob lil Alla biex jgħinu jagħmel dak li hu sewwa.—Salm 25:4, 5.

19. Xi jfisser li Ġeħova se jqajjem “sebaʼ rgħajja, iva, tmien duki”?

¹⁹ Ġeħova jbierek l-​isforzi li jagħmlu l-​anzjani biex iħarrġu lil ħaddieħor. Hu jbierek ukoll lill-​aħwa rġiel li jwieġbu u jirsistu għal privileġġi fil-​kongregazzjoni. L-​Iskrittura tassigurana li fost il-​poplu t’Alla se jitqajmu “sebaʼ rgħajja, iva, tmien duki”—l-​għadd meħtieġ taʼ rġiel kapaċi—biex jieħdu t-​tmexxija fl-​organizzazzjoni taʼ Ġeħova. (Mik. 5:5) X’barka hi li ħafna rġiel Kristjani qed jitħarrġu u qed jirsistu bl-​umiltà għal privileġġi taʼ servizz għat-​tifħir taʼ Ġeħova!

Int Kif Twieġeb?

• Liema huma xi modi kif Ġesù ħarreġ lid-​dixxipli tiegħu?

• L-​anzjani kif jistgħu jimitaw lil Ġesù hekk kif jgħinu lill-​irġiel fil-​kongregazzjoni biex jieħdu t-​tmexxija?

• Il-​familja taʼ ħu kif tistaʼ tgħinu jaqdi lil oħrajn fil-​kongregazzjoni?

• Il-​ħu nnifsu x’jistaʼ jagħmel biex jirsisti għal privileġġi?

[Mistoqsijiet taʼ Studju]

[Stampi f’paġna 31]

Liema taħriġ tistaʼ tagħti lill-​istudent tal-​Bibbja tiegħek hekk kif jistinka biex jagħmel progress?

[Stampa f’paġna 32]

L-​irġiel kif jistgħu juru li qegħdin jirsistu?