‘Imxi skond l-​ispirtu u mhux skond il-​laħam.’—RUM. 8:4.

1, 2. (a) Għala hu perikoluż li tiġi aljenat waqt li qed issuq? (b) Għala hu perikoluż li niġu aljenati spiritwalment?

 UFFIĊJAL tal-​gvern fl-​Istati Uniti qal li l-​problema tan-​nies li jiġu aljenati waqt li qed isuqu qed tiggrava kull sena. Pereżempju, jistgħu jaljenaw ruħhom jekk jużaw il-​mowbajl waqt li qed isuqu. Ħafna rrapportaw li kienu f’aċċident, jew li kważi kienu f’aċċident, għax is-​sewwieq taʼ karozza oħra kien qed juża l-​mowbajl waqt li kien qed isuq. In-​nies għandhom mnejn jaħsbu li qed jiffrankaw il-​ħin jekk jużaw il-​mowbajl waqt li jkunu qed isuqu, imma li jagħmlu dan jistaʼ jikkaġuna aċċident serju.

² Sewwieq li jiġi aljenat għandu mnejn ma jinnotax perikli fit-​triq. Xi ħaġa simili tistaʼ tiġri fir-​relazzjoni tagħna maʼ Ġeħova. Jistaʼ jkun perikoluż li nħallu l-​affarijiet jaljenawna milli naqdu lil Alla u milli nżommu kondotta tajba. Pawlu qal li l-​fidi tagħna tistaʼ tiġi mġarrfa sewwasew bħalma bastiment jistaʼ jiġġarraf f’nawfraġju. (1 Tim. 1:18, 19) L-​appostlu Pawlu wissa dwar dan il-​periklu meta kiteb lil ħutu f’Ruma: “Li tkun moħħok fil-​laħam ifisser  mewt, imma li tkun moħħok fl-​ispirtu jfisser ħajja u paċi.” (Rum. 8:6) Pawlu x’ried ifisser b’dan? Kif nistgħu nevitaw ‘li nkunu moħħna fil-​laħam’ u naħdmu iebes biex ‘inkunu moħħna fl-​ispirtu’?

“M’Għandhomx Kundanna”

3, 4. (a) Pawlu kiteb dwar liema taqbida persunali? (b) Għala għandna nkunu interessati fis-​sitwazzjoni taʼ Pawlu?

³ Fl-​ittra tiegħu lir-​Rumani, Pawlu kiteb dwar taqbida li esperjenza hu stess—konflitt bejn laħmu u moħħu. (Aqra Rumani 7:21-​23.) Pawlu ma tkellimx dwar dan biex iġib l-​iskużi għall-​azzjonijiet tiegħu jew għax tħassar lilu nnifsu. Ma kienx qed jgħid li kien impossibbli għalih biex jagħmel is-​sewwa. Wara kollox, hu kien Kristjan matur midluk bl-​ispirtu, magħżul biex ikun “appostlu tal-​ġnus.” (Rum. 1:1; 11:13) Allura, Pawlu għala kiteb dwar it-​taqbida persunali tiegħu?

⁴ Pawlu kien qed jirrikonoxxi onestament li waħdu ma kienx kapaċi jagħmel ir-​rieda t’Alla sal-​punt li hu nnifsu xtaq. Għala? “Għax kollha dinbu u jonqsu milli jilħqu l-​glorja t’Alla,” qal hu. (Rum. 3:23) Bħall-​ulied kollha t’Adam, Pawlu kien imperfett u kellu xewqat ħżiena. Nistgħu nifhmu kif kien iħossu għax ilkoll kemm aħna imperfetti u rridu niffaċċjaw taqbid simili kuljum. Iktar minn hekk, hemm ħafna aljenazzjonijiet li jistgħu jfixkluna u jbegħduna mit-​‘triq imħarbta li tieħu għall-​ħajja.’ (Mt. 7:14) Madankollu, is-​sitwazzjoni ma kinitx bla tama għal Pawlu, u lanqas mhi bla tama għalina.

5. Pawlu fejn sab għajnuna u serħan?

⁵ Pawlu kiteb: “Min jeħlisni . . . ? Ħajr lil Alla permezz taʼ Ġesù Kristu, il-​Mulej tagħna!” (Rum. 7:24, 25) Imbagħad indirizza lil dawk “f’unjoni maʼ Kristu Ġesù”—il-​Kristjani midlukin. (Aqra Rumani 8:1, 2.) Permezz tal-​ispirtu qaddis tiegħu, Ġeħova jadottahom bħala wliedu, u jsejħilhom biex ikunu “werrieta bi sħab maʼ Kristu.” (Rum. 8:14-​17) L-​ispirtu t’Alla, flimkien mal-​fidi tagħhom fis-​sagrifiċċju taʼ Kristu bħala fidwa, jgħinhom joħorġu rebbiħin fit-​taqbida li ddeskriva Pawlu, u b’hekk “m’għandhomx kundanna.” Huma meħlusin mil-​“liġi tad-​dnub u l-​mewt.”

6. Il-​qaddejja kollha t’Alla, għala għandhom ikunu jridu jifhmu l-​kliem taʼ Pawlu?

⁶ Filwaqt li Pawlu kien qed ikellem lill-​Kristjani midlukin, dak li qal dwar l-​ispirtu qaddis t’Alla u s-​sagrifiċċju taʼ Ġesù bħala fidwa jistaʼ jkun taʼ benefiċċju għall-​qaddejja kollha taʼ Ġeħova, kemm jekk għandhom it-​tama li jgħixu fis-​sema u kemm jekk fuq l-​art. Għalkemm Pawlu kien imnebbaħ biex jagħti dan il-​parir lill-​Kristjani midlukin, huwa vitali li l-​qaddejja kollha t’Alla jifhmu u jobdu dak li kiteb.

Kif Alla “Kkundanna d-​Dnub fil-​Laħam”

7, 8. (a) Il-​Liġi f’liema sens kienet “dgħajfa permezz tal-​laħam”? (b) Alla x’wettaq permezz tal-​ispirtu tiegħu u tal-​fidwa?

⁷ F’Rumani kapitlu 7, Pawlu spjega li l-​bnedmin imperfetti huma taħt il-​qawwa tad-​dnub. F’kapitlu 8, hu tkellem dwar il-​qawwa tal-​ispirtu qaddis. L-​appostlu spjega kif l-​ispirtu t’Alla jistaʼ jgħin lill-​Kristjani fit-​taqbida tagħhom kontra l-​qawwa tad-​dnub sabiex ikunu jistgħu jgħixu fi qbil mar-​rieda taʼ Ġeħova u jiksbu l-​approvazzjoni tiegħu. Pawlu wera li Alla uża l-​ispirtu qaddis tiegħu u s-​sagrifiċċju taʼ Ġesù bħala fidwa biex jagħmel xi ħaġa li l-​Liġi taʼ Mosè ma setgħetx tagħmilha.

⁸ Il-​Liġi, bil-​ħafna kmandamenti tagħha, ikkundannat lill-​midinbin. Iżjed minn hekk, il-​qassisin il-​kbar taʼ Iżrael li kienu qed jaqdu taħt il-​Liġi kienu imperfetti u ma setgħux joffru sagrifiċċju adegwat  għad-​dnub. Għaldaqstant, il-​Liġi kienet “dgħajfa permezz tal-​laħam.” Imma “billi bagħat lil Ibnu stess fix-​xebh tal-​laħam midneb” u billi offrieh bħala fidwa, Alla “kkundanna d-​dnub fil-​laħam,” u b’hekk għeleb “dak li ma setgħetx tagħmel il-​Liġi.” Minħabba f’hekk, il-​Kristjani midlukin huma meqjusin ġusti fuq il-​bażi tal-​fidi tagħhom fis-​sagrifiċċju taʼ Ġesù bħala fidwa. Huma mħeġġin biex ‘jimxu skond l-​ispirtu u mhux skond il-​laħam.’ (Aqra Rumani 8:3, 4.) Tabilħaqq, għandhom jagħmlu hekk fedelment sa tmiem il-​ħajja tagħhom fuq l-​art sabiex jingħataw “il-​kuruna tal-​ħajja.”—Riv. 2:10.

9. Xi tfisser il-​kelma “liġi” kif inhi użata f’Rumani 8:2?

⁹ Flimkien mal-​“Liġi,” Pawlu semma “l-​liġi taʼ dak l-​ispirtu” u “l-​liġi tad-​dnub u l-​mewt.” (Rum. 8:2) X’inhuma dawn il-​liġijiet? Il-​kelma “liġi” hawnhekk ma tirreferix għal ċerti regoli, bħal dawk fil-​Liġi Mosajka. Ktieb taʼ referenza jgħid li l-​kelma Griega għal “liġi” f’dan il-​vers tfisser l-​affarijiet tajbin jew ħżiena li jagħmlu n-​nies u li jikkontrollawhom bħala liġi. Tistaʼ tfisser ukoll il-​prinċipji li jiddeċiedu li jgħixu fi qbil magħhom.

10. Il-​liġi tad-​dnub u l-​mewt kif tikkontrollana?

¹⁰ L-​appostlu Pawlu kiteb: “Permezz taʼ bniedem wieħed id-​dnub daħal fid-​dinja, u permezz tad-​dnub il-​mewt, u b’hekk il-​mewt infirxet fuq il-​bnedmin kollha għax kollha dinbu.” (Rum. 5:12) Minħabba li aħna lkoll ulied Adam, il-​liġi tad-​dnub u l-​mewt tikkontrollana. Ix-​xewqa midinba tagħna hi li nagħmlu affarijiet li ma jogħġbux lil Alla. Imma dawn l-​affarijiet iwasslu għall-​mewt. Fl-​ittra tiegħu lill-​Galatin, Pawlu qal li dawn l-​azzjonijiet u d-​drawwiet midinbin huma “għemejjel tal-​laħam.” Imbagħad żied jgħid: “Min jipprattika dawn l-​affarijiet ma jiritx is-​saltna t’Alla.” (Gal. 5:19-​21) Nies taʼ din ix-​xorta huma l-​istess bħal dawk li jimxu skont il-​laħam. (Rum. 8:4) Huma gwidati minn dak li l-​laħam imperfett tagħhom jgħidilhom biex jagħmlu. Imma huma n-​nies li jikkommettu dnubiet bħaż-​żína, l-​idolatrija, l-​ispiritiżmu, u dnubiet oħrajn l-​uniċi wħud li qed isegwu x-​xewqat tal-​laħam tagħhom? Le. “L-​għemejjel tal-​laħam” imsemmijin f’Galatin jinkludu wkoll affarijiet li ħafna jistgħu jaħsbu li huma biss nuqqasijiet persunali. Dawn jinkludu affarijiet bħall-​għira,  l-​għadab, it-​tilwim, u l-​invidja. Qatt m’għandna naħsbu li m’għandniex bżonn niġġieldu kontra l-​laħam imperfett tagħna.

11, 12. (a) Ġeħova x’għamel biex jeħlisna mil-​liġi tad-​dnub u l-​mewt? (b) X’għandna nagħmlu biex ikollna l-​approvazzjoni t’Alla?

¹¹ Kemm nistgħu nkunu ferħanin li Ġeħova għamilha possibbli għalina biex negħlbu l-​liġi tad-​dnub u l-​mewt! Ġesù qal: “Alla tant ħabb lid-​dinja li ta l-​Iben uniġenitu tiegħu, biex kulmin jeżerċita l-​fidi fih ma jinqeridx imma jkollu l-​ħajja taʼ dejjem.” Billi naċċettaw l-​imħabba t’Alla u billi neżerċitaw il-​fidi fis-​sagrifiċċju taʼ Ġesù Kristu bħala fidwa, nistgħu niġu meħlusin mill-​kundanna li jġib miegħu d-​dnub li writna. (Ġw. 3:16-​18) Għalhekk, nistgħu nħossuna bħalma ħassu Pawlu meta qal: “Ħajr lil Alla permezz taʼ Ġesù Kristu, il-​Mulej tagħna!”

¹² Is-​sitwazzjoni tagħna hi simili għal li nitfejqu minn marda serja. Jekk nixtiequ nfiqu għalkollox, għandna nagħmlu dak li jgħidilna t-​tabib. Għalkemm nistgħu niġu meħlusin mil-​liġi tad-​dnub u l-​mewt jekk neżerċitaw il-​fidi fil-​fidwa, aħna xorta għadna imperfetti u midinbin. Sabiex inżommu relazzjoni b’saħħitha maʼ Ġeħova u jkollna l-​approvazzjoni tiegħu, irridu nagħmlu xi ħaġa. Jekk irridu nfiqu mill-​marda tal-​imperfezzjoni, Pawlu jgħidilna li rridu nimxu skont l-​ispirtu.

Kif Nistgħu Nimxu Skont l-​Ispirtu?

13. Xi jfisser li nimxu skont l-​ispirtu?

¹³ Meta nkunu sejrin xi mkien, nibqgħu mexjin lejn dak il-​post. Biex nimxu skont l-​ispirtu, hemm bżonn li nagħmlu progress fil-​verità. (1 Tim. 4:15) Għalkemm ma nistgħux nagħmlu dan perfettament, kuljum nagħmlu l-​almu tagħna biex insegwu l-​gwida tal-​ispirtu t’Alla. Jekk ‘nimxu bl-​ispirtu’ jkollna l-​approvazzjoni t’Alla.—Gal. 5:16.

14. Nies li jgħixu “f’armonija mal-​laħam,” kif jaħsbu u jaġixxu?

¹⁴ Fl-​ittra tiegħu lir-​Rumani, Pawlu mbagħad tkellem dwar nies li għandhom żewġ modi taʼ ħsib opposti. (Aqra Rumani 8:5.) Hawnhekk il-​laħam mhuwiex neċessarjament il-​ġisem fiżiku. Fil-​Bibbja, il-​kelma “laħam” tistaʼ kultant tirreferi għall-​imperfezzjonijiet tagħna. L-​imperfezzjonijiet tagħna jikkaġunaw it-​taqbida bejn il-​laħam u l-​moħħ li tkellem dwarha Pawlu. Madankollu, għall-​kuntrarju tiegħu, dawk  li “huma f’armonija mal-​laħam” lanqas biss jissieltu. Minflok ma jikkunsidraw dak li Alla jirrikjedi minnhom u jaċċettaw l-​għajnuna li pprovda hu, huma għandhom it-​tendenza li “jixħtu moħħhom fuq l-​affarijiet tal-​laħam.” Spiss jiffokaw fuq li jissodisfaw lil ġisimhom u x-​xewqat fiżiċi tagħhom. B’kuntrast, l-​inklinazzjoni taʼ dawk li huma “f’armonija maʼ l-​ispirtu” hi li jixħtu moħħhom fuq “l-​affarijiet taʼ l-​ispirtu”—provvedimenti u attività spiritwali.

15, 16. (a) Il-​fatt li wieħed jixħet moħħu fuq xi ħaġa, kif jeffettwa l-​attitudni mentali tiegħu? (b) Illum, il-​biċċa l-​kbira min-​nies fiex inhuma interessati?

¹⁵ Aqra Rumani 8:6. Biex dak li jkun jagħmel xi ħaġa—kemm jekk tajba u kemm jekk ħażina—irid jixħet moħħu fuqha. In-​nies li dejjem jixħtu moħħhom fuq l-​affarijiet tal-​laħam ma jdumux ma jiżviluppaw attitudni jew inklinazzjoni mentali li hi ffokata totalment fuq l-​affarijiet tal-​laħam. Is-​sentimenti, l-​interessi, u l-​affezzjonijiet tagħhom ġeneralment ikunu okkupati għalkollox b’dawn l-​affarijiet.

¹⁶ Illum, il-​biċċa l-​kbira min-​nies biex inhuma okkupati? L-​appostlu Ġwanni kiteb: “Kulma hemm fid-​dinja—ix-​xewqa tal-​laħam u x-​xewqa taʼ l-​għajnejn u l-​iffanfrar bil-​mezzi tal-​ħajja—ma joriġinax mill-​Missier, imma mid-​dinja.” (1 Ġw. 2:16) Dawn ix-​xewqat jinvolvu affarijiet bħall-​immoralità, il-​prominenza, u l-​affarijiet materjali. Kotba, rivisti, gazzetti, films, programmi tat-​televixin, u l-​Internet huma miżgħudin b’materjal bħal dan, primarjament għax il-​maġġuranza min-​nies fuq hekk jixħtu moħħhom u dan hu dak li verament jixtiequ. Madankollu, “li tkun moħħok fil-​laħam ifisser mewt”—mewt spiritwali issa u mewt fiżika fil-​futur qarib. Għala? “Għax li tkun moħħok fil-​laħam ifisser għadwa m’Alla, għax il-​laħam m’huwiex sottomess lejn il-​liġi t’Alla, fil-​fatt, lanqas ma jistaʼ jkun sottomess. Għalhekk, dawk li huma f’armonija mal-​laħam ma jistgħux jogħġbu lil Alla.”—Rum. 8:7, 8.

17, 18. (a) Kif nistgħu nħallu l-​ispirtu t’Alla jiggwidana? (b) X’se jkun ir-​riżultat jekk nagħmlu hekk?

¹⁷ Mill-​banda l-​oħra, “li tkun moħħok fl-​ispirtu jfisser ħajja u paċi”—ħajja taʼ dejjem fil-​futur kif ukoll paċi ġewwinija u paċi m’Alla issa. Kif nistgħu nuru li aħna moħħna fl-​ispirtu? Jekk dejjem insegwu l-​gwida t’Alla u tal-​ispirtu qaddis tiegħu, se niżviluppaw mod taʼ ħsib li jaqbel mal-​mod taʼ ħsib tiegħu. Aħna rridu li l-​ħsib tagħna jkun “sottomess lejn il-​liġi t’Alla.” Imbagħad, meta nkunu f’sitwazzjoni li rridu nirreżistu t-​tentazzjoni, se nkunu nafu x’għandna nagħmlu. Se jkollna x-​xewqa li nagħmlu l-​għażla t-​tajba—waħda li hi gwidata mill-​ispirtu t’Alla.

¹⁸ Għandha tkun ix-​xewqa tagħna li nixħtu moħħna fuq l-​affarijiet t’Alla. L-​attivitajiet Kristjani rridu nagħmluhom l-​iktar parti importanti taʼ ħajjitna. Dawn l-​attivitajiet jinkludu t-​talb, il-​qari u l-​istudju tal-​Bibbja, l-​attendenza għal-​laqgħat, u l-​ministeru Kristjan fuq bażi regulari. (1 Pt. 1:13) Minflok ma nħallu x-​xewqat midinbin tagħna jikkontrollawna, għandna nsegwu l-​mod taʼ ħsib t’Alla u nħallu l-​ispirtu tiegħu jiggwidana. Jekk nagħmlu dan, se jkollna ħafna barkiet u se jkollna ħajja taʼ dejjem u paċi.—Gal. 6:7, 8.

Tistaʼ Tispjega?

• X’kien “dak li ma setgħetx tagħmel il-​Liġi,” u Alla kif għelbu?

• X’inhi “l-​liġi tad-​dnub u l-​mewt,” u kif nistgħu ninħelsu minnha?

• Xi rridu nagħmlu biex ‘inkunu moħħna fl-​ispirtu’?

[Mistoqsijiet taʼ Studju]

[Stampi f’paġni 12, 13]

Timxi int skont il-​laħam jew skont l-​ispirtu?