IMMAĠINA li stenbaħt filgħodu u xtaqt li ma kellekx għalfejn tissaporti l-​ġurnata li għandek quddiemek. Ikollok tħabbat wiċċek maʼ wġigħ fiżiku jew emozzjonali għal jerġaʼ ġurnata oħra. Għandek mnejn saħansitra tħossok bħal Ġob, li qal: “Nippreferi l-​mewt mis-​sofferenzi kollha tiegħi.” (Ġob 7:15, The New English Bible) Xi ngħidu jekk kundizzjoni bħal din tippersisti, anke għal snin?

Hekk ġralu Mefiboset, iben il-​ħabib tas-​Sultan David, Ġonatan. Meta Mefiboset kellu ħames snin, “hu waqaʼ u sar zopp.” (2 Sam. 4:4) Niket emozzjonali bilfors li żied l-​uġigħ tad-​diżabilità tiegħu meta iktar tard ġie mixli b’mod falz li ttradixxa lis-​sultan u mbagħad sofra telfa materjali. Madankollu, b’mod konsistenti hu wera li kien eżempju mill-​aħjar f’li jkampa maʼ nuqqas taʼ saħħa, malafama, u diżappunti, u ma ħalliex lil dawn jisirqulu l-​ferħ.—2 Sam. 9:6-​10; 16:1-​4; 19:24-​30.

L-​appostlu Pawlu hu eżempju ieħor. Darba kiteb dwar “xewka fil-​laħam” li magħha kellu jissielet. (2 Kor. 12:7) Ix-​xewka li semma setgħet kienet diżabilità fit-​tul, jew setgħet kienet in-​nies li sfidaw l-​appostolat tiegħu. Kien x’kien il-​każ, il-​problema ppersistiet u hu kellu jissaporti l-​uġigħ fiżiku jew emozzjonali li ġabet magħha.—2 Kor. 12:9, 10.

Mard kroniku li jdgħajjef is-​saħħa jew stress emozzjonali jifni lil xi qaddejja t’Alla llum. Taʼ 18-​il sena, lil Magdalena sabulha l-​lupus eritematożu sistemiku, marda li biha s-​sistema tal-​immunità tal-​ġisem tidher li tattakka l-​organi tiegħu stess. “Jien kont beżgħana għall-​aħħar,” tgħid hi. “Mal-​medda taż-​żmien, il-​kundizzjoni tiegħi ħadet xejra għall-​agħar u ggravat minħabba mard konness mad-​diġestjoni, ulċeri fil-​ħalq, u problemi tat-​tirojde.” Mill-​banda l-​oħra, Izabela jkollha tkampa b’kundizzjonijiet li mhumiex daqshekk ovvji. Hi tispjega: “Sa mit-​tfulija sofrejt bid-​dipressjoni. Dan irriżulta f’attakki taʼ paniku, problemi tan-​nifs, u wġigħ fl-​istonku. Minħabba f’hekk, ġeneralment inħossni mifnija.”

Niffaċċjaw ir-​Realtà

Il-​mard u n-​nuqqas taʼ saħħa jistgħu jaqilbulek ħajtek taʼ taħt fuq. Meta dan jiġri, ikun t’għajnuna li toqgħod bilqiegħda u tanalizza bl-​onestà s-​sitwazzjoni tiegħek. Li taċċetta l-​limitazzjonijiet tiegħek mhux neċessarjament ikun faċli. Magdalena tgħid: “Il-​marda tiegħi hi waħda li tiggrava hekk kif jgħaddi ż-​żmien. Ħafna drabi nħossni għajjiena wisq biex noħroġ mis-​sodda. In-​natura imprevedibbli tal-​marda tiegħi tagħmilhieli diffiċli ħafna li nippjana bil-​quddiem. L-​ikbar frustrazzjoni tiegħi hi li m’għadnix  nistaʼ nagħmel daqs kemm kont fis-​servizz taʼ Ġeħova.”

Zbigniew jispjega: “Mal-​medda tas-​snin, l-​artrite rewmatika tixrobli saħħti u tagħmilli l-​ħsara f’ġog wara l-​ieħor. Xi drabi meta l-​infjammazzjoni tiggrava, ma nkun nistaʼ nagħmel lanqas l-​iktar biċċa xogħol faċli. Dan iwassalni biex nagħmel f’qalbi.”

Xi snin ilu, lil Barbara sabulha tumur fil-​moħħ li jikber hekk kif jgħaddi ż-​żmien. “Ġismi għadda minn tibdil f’daqqa,” tikkummenta hi. “Inħossni mitluqa, jaqbadni wġigħ taʼ ras spiss, u jkolli problemi taʼ konċentrazzjoni. Minħabba l-​limitazzjonijiet ġodda tiegħi, irrid inqis kollox mill-​ġdid.”

Dawn l-​individwi huma kollha qaddejja ddedikati taʼ Ġeħova. Għalihom, il-​prijorità hi li jagħmlu r-​rieda tiegħu. Huma jpoġġu l-​fiduċja kollha tagħhom f’Alla u jibbenefikaw mill-​appoġġ tiegħu.—Prov. 3:5, 6.

Ġeħova Jgħin​—Kif?

Għandna nevitaw li naħsbu li t-​tbatija personali hija evidenza tad-​diżapprovazzjoni t’Alla. (Lam. 3:33) Aħseb dwar minn xiex kellu jgħaddi Ġob minkejja li kien “bla ħtija u rett.” (Ġob 1:8) Alla ma jipprova lil ħadd b’affarijiet ħżiena. (Ġak. 1:13) Il-​mard kollu—inkluż dak kroniku u emozzjonali—huwa wirt miżeru mingħand l-​ewwel ġenituri tagħna, Adam u Eva.—Rum. 5:12.

Madankollu, Ġeħova u Ġesù mhumiex se jħallu n-​nies sewwa bla għajnuna. (Salm 34:15) Speċjalment waqt mumenti diffiċli f’ħajjitna, naslu biex napprezzaw li Alla hu ‘l-​kenn u l-​fortizza tagħna.’ (Salm 91:2) Allura, meta tkun qed tkampa b’kundizzjonijiet li m’għandhomx soluzzjoni faċli, x’jistaʼ jgħinek iżżomm il-​ferħ?

It-​talb: Billi ssegwi l-​eżempju tal-​qaddejja leali t’Alla fil-​qedem, int tistaʼ tixħet toqlok fuq Missierna tas-​sema bit-​talb. (Salm 55:22) F’li tagħmel dan, tistaʼ tesperjenza “l-​paċi t’Alla li tisboq kull ħsieb.” Din il-​paċi ġewwinija ‘tgħasses lil qalbek u l-​qawwa mentali tiegħek.’ (Flp. 4:6, 7) Billi tistrieħ fuq Alla fit-​talb, Magdalena tkampa mal-​marda tagħha li  tħalliha bla saħħa. Hi tgħid: “Li niftaħ qalbi maʼ Ġeħova jġibli serħan u jġeddidli l-​ferħ. Issa verament nifhem xi jfisser li nistrieħ fuq Alla minn jum għal ieħor.”—2 Kor. 1:3, 4.

Bi tweġiba għat-​talb tiegħek, Ġeħova jistaʼ jagħtik is-​saħħa permezz tal-​ispirtu qaddis tiegħu, il-​Kelma tiegħu, u l-​fratellanza Kristjana. Inti ma tippretendix li Alla jneħħilek il-​marda tiegħek b’mod mirakoluż. Iżda tistaʼ torbot fuqu biex jagħtik l-​għerf u s-​saħħa li għandek bżonn biex tkampa maʼ kull għawġ. (Prov. 2:7) Hu jistaʼ jsaħħek, billi jagħtik “il-​qawwa iktar min-​normal.”—2 Kor. 4:7.

Il-​familja: Atmosfera taʼ mħabba u mogħdrija fid-​dar tistaʼ tgħinek tissaporti l-​mard. Però, żomm f’moħħok li l-​maħbubin tiegħek ibatu wkoll. Jistgħu jħossuhom li ma jistgħu jagħmlu xejn, bħalma tħossok int. Xorta waħda, qegħdin hemm għalik anke fi żminijiet taʼ prova. It-​talb li tgħidu flimkien se jgħinek iżżomm qalb kalma.—Prov. 14:30.

Inkwantu għat-​tifla tagħha u aħwa nisa żgħażagħ oħra fil-​kongregazzjoni, Barbara tgħid: “Huma jappoġġawni fil-​ministeru. Iż-​żelu tagħhom iqawwili qalbi.” Zbigniew isib li l-​appoġġ taʼ martu hu imprezzabbli. “Hi tieħu ħsieb il-​biċċa l-​kbira tal-​faċendi tad-​dar. Tgħinni wkoll nilbes u spiss iġġorrli l-​basket għal-​laqgħat Kristjani u fil-​ministeru.”

Sħabna fit-​twemmin: Meta nkunu maʼ sħabna fit-​twemmin, niġu inkuraġġiti u mfarrġin. Imma xi ngħidu jekk ma tistax tattendi l-​laqgħat minħabba l-​mard tiegħek? Magdalena tgħid: “Il-​kongregazzjoni ħadet ħsieb li nibbenefika mil-​laqgħat permezz taʼ rekordings bl-​awdjo. L-​aduraturi sħabi spiss iċempluli biex jaraw x’jistgħu jagħmlu iktar biex ikunu t’għajnuna. Ukoll, jibagħtuli ittri inkuraġġanti. Li nkun naf li jiftakru fija u huma konċernati dwar il-​benesseri tiegħi jgħinni nissaporti.”

Izabela, li tbati bid-​dipressjoni, tgħid: “Fil-​kongregazzjoni għandi ħafna ‘missirijiet’ u ‘ommijiet,’ dawk li jagħtuni widen u jipprovaw jifhmuni. Il-​kongregazzjoni hi l-​familja tiegħi—hawnhekk insib il-​paċi u l-​ferħ.”

 Dawk li jiġġarrbu b’diversi provi jagħmlu tajjeb li jevitaw li ‘jinqatgħu għalihom.’ Minflok, huma jgħożżu l-​assoċjazzjoni tagħhom mal-​kongregazzjoni. (Prov. 18:1) B’hekk, isiru sors taʼ inkuraġġiment liema bħalu għal oħrajn. Għall-​ewwel għandek mnejn taħsibha darbtejn biex tgħid lill-​aħwa bil-​bżonnijiet tiegħek. Però, sħabek fit-​twemmin se japprezzaw is-​sinċerità tiegħek. Dan jagħtihom l-​opportunità biex jestendu “affezzjoni lejn l-​aħwa mingħajr ipokrisija.” (1 Pt. 1:22) Għala ma tgħidilhomx li għandek bżonn lil min iwasslek għal-​laqgħat, li trid taħdem magħhom fil-​ministeru, jew li tixtieq tiftaħ qalbek magħhom? Ovvjament, m’għandniex nippretendu żżejjed, imma għandna napprezzaw l-​għajnuna tagħhom.

Kun pożittiv: Ħafna drabi jiddependi minnek biex tkampa b’mard kroniku bla ma titlef il-​ferħ. Sentimenti taʼ dwejjaq u skuraġġiment jistgħu jwasslu għal ħsib negattiv. Il-​Bibbja tgħid: “L-​ispirtu taʼ bniedem jistaʼ jissaporti l-​mard li jkollu; imma spirtu mdejjaq, min jiflaħ jissaportih?”—Prov. 18:14.

Magdalena tgħid: “Jien naħdem iebes biex nevita li niffoka fuq il-​problemi tiegħi. Nipprova ngawdi l-​ġranet meta nħossni aħjar. Insib inkuraġġiment f’li naqra l-​bijografiji taʼ wħud li baqgħu leali minkejja mard kroniku.” Izabela tissaħħaħ għax taf li Ġeħova jħobbha u jgħożżha. Hi tgħid: “Inħossni maħbuba u għandi għal min ngħix. Għandi wkoll tama sabiħa għall-​futur.”

Zbigniew jgħid: “Il-​marda tiegħi tgħallimni l-​umiltà u l-​ubbidjenza. Tgħallimni nuri d-​dehen u nuża l-​għaqal kif ukoll li naħfer mill-​qalb. Tgħallimt naqdi lil Ġeħova bil-​ferħ mingħajr ma nitħassar lili nnifsi. Fil-​fatt ġejt immotivat biex nibqaʼ nagħmel progress spiritwali.”

Żomm f’moħħok li Ġeħova jinnota bir-​reqqa s-​sabar tiegħek. Hu jagħdrek fit-​tbatijiet tiegħek u jimpurtah minnek. Hu mhux se ‘jinsa għemilek u l-​imħabba li wrejt għal ismu.’ (Ebr. 6:10) Għożż il-​wegħda li jagħmel lil dawk kollha li jibżgħu minnu: “Żgur ma nitilqekx u żgur ma nabbandunakx.”—Ebr. 13:5.

Jekk kultant tħossok dipress, iffoka fuq it-​tama mill-​isbaħ li tgħix fid-​dinja l-​ġdida. Iż-​żmien qed joqrob ġmielu meta għajnejk stess se jaraw il-​barkiet tas-​Saltna t’Alla fuq l-​art!

[Kaxxa/Stampi f’paġni 28, 29]

Jibqgħu Jippritkaw Minkejja l-​Mard Kroniku

“M’għadnix nistaʼ nimxi waħdi, għalhekk marti jew xi aħwa oħrajn jiġu miegħi fil-​ministeru. Nitgħallem bl-​amment preżentazzjonijiet u skritturi mill-​Bibbja.”—Jerzy, li għandu vista batuta.

“Jien nikteb l-​ittri u nikkorrispondi regolarment maʼ xi wħud interessati. Meta nkun l-​isptar, dejjem inpoġġi l-​Bibbja u pubblikazzjonijiet maġenb is-​sodda. Dan għenni nibda ħafna konversazzjonijiet tajbin.” —Magdalena, li sabulha l-​lupus eritematożu sistemiku.

“Jien inħobb il-​ministeru minn dar għal dar, imma meta nħossni ma nistax noħroġ, nagħti xhieda bit-​telefon.”—Izabela, li tbati bid-​dipressjoni klinika.

“Nieħu pjaċir nagħmel żjajjar lura u ngħin waqt studji tal-​Bibbja. Meta nħossni aħjar mis-​soltu, nieħu gost nagħti xhieda minn dar għal dar.”—Barbara, li għandha tumur fil-​moħħ.

“Il-​basket tar-​rivisti tiegħi nżommu veru ħafif. Nibqaʼ barra kemm iħalluni l-​ġogi muġugħin tiegħi.”—Zbigniew, pazjent li għandu l-​artrite rewmatika.

[Stampa f’paġna 30]

Iż-​żgħar u l-​kbar jistgħu jkunu sorsi taʼ inkuraġġiment