Tgħallem mill-Appostli taʼ Ġesù Kif Tibqaʼ Għassa
“Ibqgħu għassa miegħi.”—MT. 26:38.
X’TISTAʼ TITGĦALLEM DWAR:
Li toqgħod għassa għal direzzjoni dwar fejn tipprietka?
Li toqgħod attent u ma tittraskurax it-talb?
Li tagħti xhieda bir-reqqa minkejja l-ostakli?
1-3. (a) L-appostli kif ma baqgħux għassa waqt l-aħħar lejl taʼ Ġesù fuq l-art? (b) X’juri li tgħallmu mill-iżball tagħhom?
IMMAĠINA x-xena f’dak l-aħħar lejl tal-ħajja taʼ Ġesù fuq l-art. Ġesù jmur f’wieħed mill-postijiet favoriti tiegħu, il-ġnien tal-Ġetsemani, lejn il-Lvant taʼ Ġerusalemm. Imur hemmhekk mal-appostli leali tiegħu. Ġesù għandu ħafna affarijiet importanti dwar xiex jaħseb, u allura għandu bżonn isib post fejn jistaʼ joqgħod waħdu biex jitlob.—Mt. 26:36; Ġw. 18:1, 2.
2 Tlieta mill-appostli—Pietru, Ġakbu, u Ġwanni—imorru maʼ Ġesù f’post iktar ’il ġewwa fil-ġnien. Hu jgħidilhom: “Oqogħdu hawnhekk u ibqgħu għassa miegħi,” u mbagħad imur jitlob. Meta jiġi lura, isib lil sħabu reqdin. Għal darb’oħra jitlobhom bil-ħrara: “Ibqgħu għassa.” Però, jerġgħu jorqdu darbtejn oħra! Iktar tard dak il-lejl stess, l-appostli kollha ma jibqgħux imqajmin spiritwalment. Saħansitra jabbandunaw lil Ġesù u jaħarbu!—Mt. 26:38, 41, 56.
3 L-appostli żgur li ddispjaċiehom li ma baqgħux għassa. Dawn l-irġiel leali malajr tgħallmu mill-iżball tagħhom. Il-ktieb Bibliku tal-Atti juri li saru eżempju eċċellenti taʼ kif wieħed jibqaʼ għassa. L-eżempju tagħhom żgur li għen lil Kristjani oħrajn fl-ewwel seklu biex jagħmlu l-istess. Issa, iktar minn qatt qabel, għandna bżonn nibqgħu għassa. (Mt. 24:42) Ejja niddiskutu tliet lezzjonijiet li nistgħu nitgħallmu mill-ktieb tal-Atti dwar kif nibqgħu għassa.
QAGĦDU GĦASSA GĦAL DIREZZJONI DWAR FEJN JIPPRITKAW
4, 5. L-ispirtu qaddis kif idderieġa lil Pawlu u lil sħabu li kienu qed jivvjaġġaw miegħu?
4 L-ewwel lezzjoni hi li l-appostli qagħdu għassa għal direzzjoni dwar fejn jippritkaw. Il-Bibbja turina kif Ġesù uża l-ispirtu t’Alla biex jiggwida lill-appostlu Pawlu u lil sħabu fi vjaġġ interessanti ħafna. (Atti 2:33) Ejja naqraw dwaru mill-bidu.—Aqra Atti 16:6-10.
5 Pawlu, Sila, u Timotju kienu telqu mill-belt taʼ Listra fin-Nofsinhar tal-Galazja. Xi jiem wara waslu fi triq prinċipali Rumana li kienet se tiħodhom lejn il-Punent, fl-iktar reġjun li joqogħdu nies fih tad-distrett tal-Asja. Riedu jgħaddu minn din it-triq biex iżuru xi bliet fejn eluf taʼ nies kellhom bżonn jisimgħu dwar Kristu. Imma xi ħaġa waqqfithom ħesrem. Vers 6 jgħid: “Għaddew mill-Friġja u mill-art tal-Galazja, għax l-ispirtu qaddis ma ħallihomx ixandru l-kelma fid-distrett taʼ l-Asja.” Il-Bibbja ma tgħidx kif, imma b’xi mod l-ispirtu qaddis waqqaf lill-vjaġġaturi milli jippritkaw fid-distrett tal-Asja. Pawlu u sħabu fehmu li din id-direzzjoni mill-ispirtu qaddis kienet tfisser li Ġesù riedhom jippritkaw xi mkien ieħor.
6, 7. (a) Pawlu u l-vjaġġaturi l-oħrajn, xi ġralhom ħdejn il-Bitinja? (b) Id-dixxipli liema deċiżjoni ħadu, u b’liema riżultat?
6 Pawlu u sħabu fejn marru? Vers 7 jispjega: “Ukoll, meta niżlu l-Misja pprovaw imorru l-Bitinja, imma l-ispirtu taʼ Ġesù ma ppermettilhomx.” Minħabba li l-ispirtu t’Alla waqqafhom milli jippritkaw fl-Asja, marru lejn it-Tramuntana bil-ħsieb li jippritkaw fil-bliet tal-Bitinja. Madankollu, meta resqu viċin il-Bitinja, Ġesù reġaʼ uża l-ispirtu qaddis biex iwaqqafhom. Sadanittant, l-irġiel bilfors li ħassewhom konfużi. Kienu jafu x’għandhom jippritkaw u kif jippritkaw, imma ma kinux jafu fejn jippritkaw. Kien bħallikieku ħabbtu fuq bieb li kien jagħti għall-Asja, imma ma nfetħilhomx. Imbagħad reġgħu pprovaw fil-Bitinja, u ġara l-istess. Waqfu jipprovaw dawn il-predikaturi żelużi? Le, ma waqfux!
7 Dak il-ħin, l-irġiel ħadu deċiżjoni li forsi dehret ftit stramba. Vers 8 jgħidilna: “Qabżu l-Misja u niżlu Troas.” Għalhekk, il-vjaġġaturi daru lejn il-Punent u mxew 563 kilometru, u qabżu belt wara oħra sakemm waslu ħdejn il-port taʼ Troas, il-bieb naturali li jagħti għall-Maċedonja. Hemmhekk, għat-tielet darba, Pawlu u sħabu ħabbtu fuq bieb, imma din id-darba nfetaħ beraħ! Vers 9 jirrapporta x’ġara wara: “Matul il-lejl Pawlu kellu viżjoni: ra raġel mill-Maċedonja bil-wieqfa, jitolbu bil-ħrara u jgħidlu: ‘Għaddi l-Maċedonja u għinna.’” Fl-aħħar, Pawlu kien jaf fejn kellu jipprietka. Mingħajr dewmien, l-irġiel salpaw lejn il-Maċedonja.
8, 9. X’nistgħu nitgħallmu mir-rakkont tal-vjaġġ taʼ Pawlu?
8 X’nistgħu nitgħallmu minn dan ir-rakkont? Innota li kien biss wara li Pawlu telaq lejn l-Asja li l-ispirtu t’Alla interviena. Imbagħad kien biss wara li Pawlu resaq viċin il-Bitinja li Ġesù aġixxa. U fl-aħħar, kien biss wara li Pawlu wasal Troas li Ġesù dderiġieh lejn il-Maċedonja. Bħala l-Kap tal-kongregazzjoni, Ġesù għandu mnejn jittrattana b’mod simili. (Kol. 1:18) Pereżempju, forsi ilek xi ftit taħseb dwar li taqdi bħala pijunier jew li tmur tgħix f’post fejn il-bżonn hu akbar. Imma jistaʼ jkun biss wara li tieħu passi biex tilħaq il-mira tiegħek li Ġesù, permezz tal-ispirtu t’Alla, se jiggwidak. Biex nagħtu tixbiha: Sewwieq jistaʼ jidderieġi l-karozza tiegħu biex iddur lejn ix-xellug jew lejn il-lemin, imma biss jekk il-karozza tkun miexja. B’mod simili, Ġesù jistaʼ jidderiġina biex inkabbru l-ministeru tagħna, imma biss jekk inkunu mexjin—jekk inkunu qed nagħmlu sforz biex nilħqu l-mira tagħna.
9 Però, xi ngħidu jekk l-isforzi tiegħek ma jirnexxux mill-ewwel? Għandek taqtaʼ qalbek, u tirraġuna li l-ispirtu t’Alla mhuwiex qed jiggwidak? Ftakar li Pawlu wkoll iffaċċja xi xkiel. Madankollu, baqaʼ jfittex u jħabbat sakemm sab bieb li nfetaħlu. Bl-istess mod, jekk tippersevera biex tfittex “bieb kbir għax-xogħol,” int ukoll tistaʼ tiġi premjat.—1 Kor. 16:9.
QAGĦDU ATTENTI U MA TTRASKURAWX IT-TALB
10. X’juri li biex nibqgħu għassa huwa essenzjali li noqogħdu attenti u ma nittraskurawx it-talb?
10 Issa ejja nitkellmu dwar it-tieni lezzjoni li nitgħallmu minn ħutna fl-ewwel seklu. Huma qagħdu attenti u ma ttraskurawx it-talb. (1 Pt. 4:7) Biex nibqgħu għassa huwa essenzjali li nibqgħu nitolbu. Ftakar li fil-ġnien tal-Ġetsemani, eżatt qabel ma ġie arrestat, Ġesù qal lil tlieta mill-appostli tiegħu: “Ibqgħu għassa u itolbu kontinwament.”—Mt. 26:41.
11, 12. Erodi għala u kif ittrattahom ħażin lill-Kristjani, inkluż lil Pietru?
11 Pietru, li kien preżenti f’din l-okkażjoni, iktar tard esperjenza kemm jistaʼ jkun importanti t-talb t’oħrajn. (Aqra Atti 12:1-6.) Fl-ewwel versi taʼ dan ir-rakkont, insiru nafu li sabiex jitħabbeb mal-Lhud, Erodi ttrattahom ħażin lill-Kristjani. X’aktarx li kien jaf li Ġakbu kien appostlu li kien qrib ħafna taʼ Ġesù. Għalhekk, Erodi qatel lil Ġakbu “bis-sejf.” (Vers 2) B’hekk, il-kongregazzjoni tilfet appostlu maħbub. Xi prova għall-aħwa!
12 Erodi x’għamel imbagħad? Vers 3 jispjega: “Meta ra li dan kien għoġob lil-Lhud, arresta lil Pietru wkoll.” Imma qabel, xi appostli kienu nħelsu mirakolożament mill-ħabs. Pietru kien wieħed minnhom. (Atti 5:17-20) Erodi għandu mnejn kien jaf b’dan, u għalhekk ried jagħmel ċert li Pietru ma jaħrabx. Erodi “poġġa miegħu erbaʼ gruppi t’erbaʼ suldati l-wieħed biex, grupp wara l-ieħor, joqogħdu għassa miegħu, għax kellu l-ħsieb li jressqu quddiem il-poplu wara l-Qbiż.” (Vers 4) Immaġina ftit! Erodi kkmanda li Pietru jintrabat bil-ktajjen bejn 2 gwardji, b’16-il gwardja jaħdmu bix-xift lejl u nhar biex ikun ċert li dan l-appostlu ma jaħrabx. L-idea taʼ Erodi kienet li jogħġob lill-folol billi joqtol lil Pietru wara l-Qbiż. F’din is-sitwazzjoni terribbli, x’setgħu jagħmlu l-aħwa?
13, 14. (a) Il-kongregazzjoni x’għamlet meta Pietru ġie arrestat? (b) X’nistgħu nitgħallmu dwar it-talb minn dak li għamlet il-kongregazzjoni?
13 Il-kongregazzjoni kienet taf eżattament x’għandha tagħmel. Vers 5 jgħid: “Għaldaqstant, Pietru kien qed jinżamm il-ħabs; imma kien qed isir ħafna talb bil-ħeġġa lil Alla għalih mill-kongregazzjoni.” Iva, it-talb tagħhom għal ħuhom il-maħbub kien intens, talb bil-ħrara u mill-qalb. Mela l-mewt taʼ Ġakbu ma kinitx qatgħatilhom qalbhom, u lanqas ma kienet ġegħlithom iqisu t-talb bħala li hu bla valur. Għall-kuntrarju, kienu jafu li t-talb taʼ qaddejja leali jiswa ħafna għal Ġeħova. Jekk talb bħal dan ikun fi qbil mar-rieda tiegħu, hu se jwieġbu.—Ebr. 13:18, 19; Ġak. 5:16.
14 X’nistgħu nitgħallmu minn dak li għamlet il-kongregazzjoni? Jekk irridu nibqgħu għassa, ma rridux nitolbu biss għalina nfusna imma wkoll għal ħutna. (Efes. 6:18) Taf b’xi aħwa li qed jiffaċċjaw ħafna provi? Xi wħud forsi qed iġarrbu persekuzzjoni, projbizzjonijiet mill-gvern, jew diżastri naturali. Għala ma titlobx għalihom mill-qalb? Forsi taf ukoll dwar xi wħud li għaddejjin minn tbatijiet li ma jagħtux daqstant fil-għajn. Forsi qed jissieltu maʼ inkwiet fil-familja, skuraġġiment, jew saħħa batuta. Għax ma taħsibx f’individwi speċifiċi li tistaʼ ssemmihom b’isimhom hekk kif tkellem lil Ġeħova, “Semmiegħ it-talb”?—Salm 65:2.
15, 16. (a) Iddeskrivi kif l-anġlu taʼ Ġeħova ħeles lil Pietru mill-ħabs. (Ara l-istampa t’hawn taħt.) (b) Għala hu taʼ faraġ li nimmeditaw dwar il-mod kif Ġeħova ħeles lil Pietru?
15 Imma xi ġralu Pietru? Matul l-aħħar lejl tiegħu fil-ħabs, waqt li kien rieqed bejn iż-żewġ gwardji tiegħu, seħħet xi ħaġa tal-għaġeb. (Aqra Atti 12:7-11.) Immaġina dak li ġara: F’daqqa waħda, dawl qawwi mela ċ-ċella tiegħu. Kien hemm anġlu bilwieqfa, li milli jidher il-gwardji ma setgħux jarawh, u qajjem lil Pietru b’urġenza. U dawk il-ktajjen li kienu maʼ jdejh sempliċement waqgħu! L-anġlu mbagħad ħareġ lil Pietru miċ-ċella, eżatt minn ħdejn il-gwardji li kienu għassa barra, u għaddew mir-rixtellu kbir tal-ħadid, li nfetaħ “waħdu.” Ladarba kienu barra l-ħabs, l-anġlu sparixxa. Pietru kien ħieles!
16 Ma jsaħħilniex il-fidi li nimmeditaw fuq il-qawwa taʼ Ġeħova biex jeħles lill-qaddejja tiegħu? M’għandniex xi ngħidu, ma nistennewx li Ġeħova jeħlisna mirakolożament f’dan iż-żmien. Madankollu, għandna fiduċja sħiħa li llum juża l-qawwa tiegħu għall-benefiċċju tal-poplu tiegħu. (2 Kron. 16:9) Permezz tal-ispirtu qaddis setgħan tiegħu, hu jistaʼ jsaħħaħna biex nissaportu kwalunkwe prova. (2 Kor. 4:7; 2 Pt. 2:9) U Ġeħova dalwaqt se jagħti l-qawwa lil Ġesù biex jirxoxta lil miljuni taʼ nies li issa huma bħal priġunieri tal-mewt. (Ġw. 5:28, 29) Il-fiduċja tagħna fil-wegħdi t’Alla tistaʼ tagħtina kuraġġ kbir biex nissaportu l-provi llum.
TAW XHIEDA BIR-REQQA MINKEJJA L-OSTAKLI
17. Pawlu kif kien eżempju eċċellenti taʼ xi ħadd li pprietka biż-żelu u bl-urġenza?
17 Issa se naraw it-tielet lezzjoni li nistgħu nitgħallmu mill-appostli dwar li nibqgħu għassa: Baqgħu jagħtu xhieda bir-reqqa minkejja l-ostakli. Biex nibqgħu għassa huwa vitali li nippritkaw biż-żelu u bl-urġenza. L-appostlu Pawlu kien eżempju eċċellenti f’dan. Ħadem iebes fix-xogħol tal-ippritkar. Ivvjaġġa f’ħafna postijiet u stabbilixxa bosta kongregazzjonijiet. Avolja esperjenza ħafna provi, baqaʼ jipprietka biż-żelu u bl-urġenza.—2 Kor. 11:23-29.
18. Pawlu kif kompla jagħti xhieda meta kien priġunier f’Ruma?
18 L-aħħar darba li naqraw dwar Pawlu fil-ktieb tal-Atti hu f’kapitlu 28. Pawlu wasal Ruma, fejn kellu jidher quddiem Neruni. Inżamm bħala priġunier, forsi marbut b’katina mal-gwardja tiegħu. Però, ebda katina ma setgħet issikket lill-appostlu żeluż! Pawlu kompla jsib modi kif jagħti xhieda. (Aqra Atti 28:17, 23, 24.) Wara tlett ijiem, Pawlu sejjaħ lill-kbarat tal-Lhud sabiex jagħtihom xhieda. Imbagħad, f’ġurnata li għażlu l-Lhud, tahom xhieda saħansitra akbar. Vers 23 jgħid: “Issa [l-Lhud lokali] ftiehmu miegħu dwar il-ġurnata, u ġew għandu fejn kien joqgħod u l-għadd tagħhom kien akbar minn qabel. U minn fil-għodu sa fil-għaxija, spjegalhom dwar dan billi tahom xiehda bir-reqqa dwar is-saltna t’Alla u billi pprova jipperswadihom dwar Ġesù kemm mil-liġi taʼ Mosè u kemm mill-Profeti.”
19, 20. (a) Pawlu għala kien effettiv f’li jagħti xhieda? (b) Pawlu kif irreaġixxa meta mhux kulħadd aċċetta l-aħbar tajba?
19 Pawlu għala kien daqstant effettiv f’li jagħti xhieda? Vers 23 jagħtina ftit mir-raġunijiet. (1) Hu ffoka fuq is-Saltna t’Alla u fuq Ġesù Kristu. (2) Hu għen lis-semmiegħa tiegħu “billi pprova jipperswadihom.” (3) Hu rraġuna mill-Iskrittura. (4) Hu wera li kien jimpurtah iktar min-nies milli minnu nnifsu billi tahom xhieda “minn fil-għodu sa fil-għaxija.” Pawlu ta xhieda qawwija, imma mhux kulħadd aċċettaha. Vers 24 jgħid: “Xi wħud bdew jemmnu dak li ntqal, imma oħrajn m’emmnux.” Dan wassal biex ikun hemm nuqqas taʼ qbil, u n-nies telqu.
20 Qataʼ qalbu Pawlu għax mhux kulħadd aċċetta l-aħbar tajba? Lanqas xejn! Atti 28:30, 31 jgħidilna: “Baqaʼ sentejn sħaħ fid-dar li kien kera, u b’qalb tajba kien jilqaʼ lil kulmin kien imur għandu; u kien jippriedka s-saltna t’Alla u jgħallem fuq il-Mulej Ġesù Kristu bl-akbar libertà tal-kelma u bla tfixkil.” Il-ktieb ispirat tal-Atti jintemm b’dan il-kliem inkuraġġanti.
21. X’nistgħu nitgħallmu mill-eżempju taʼ Pawlu meta kien arrestat id-dar?
21 X’nistgħu nitgħallmu mill-eżempju taʼ Pawlu? Waqt li kien arrestat id-dar, Pawlu ma kienx ħieles biex jagħti xhieda minn dar għal dar. Madankollu, hu żamm attitudni pożittiva, billi ta xhieda lil kull min kien imur għandu. Bl-istess mod, ħafna min-nies t’Alla llum iżommu l-ferħ tagħhom u jibqgħu jippritkaw minkejja li b’mod inġust jiġu mitfugħin il-ħabs minħabba l-fidi tagħhom. Xi wħud mill-għeżież ħutna ma jistgħux joħorġu minn djarhom, forsi saħansitra qed jgħixu fi djar tal-anzjani minħabba l-età avanzata jew il-mard. Skont iċ-ċirkustanzi tagħhom, huma jippritkaw lit-tobba, lil dawk li jżuruhom, u lil oħrajn li jistgħu jiġu f’kuntatt magħhom. Ix-xewqa taʼ qalbhom hi li jagħtu xhieda bir-reqqa dwar is-Saltna t’Alla. Kemm napprezzaw l-eżempju li jagħtuna!
22. (a) Liema pubblikazzjoni qed tgħinna nibbenefikaw mill-ktieb Bibliku tal-Atti? (Ara l-kaxxa hawn fuq.) (b) X’inhi d-determinazzjoni tiegħek hekk kif tistenna t-tmiem taʼ din is-sistema qadima?
22 B’mod ċar, l-appostli u Kristjani oħrajn tal-ewwel seklu msemmijin fil-ktieb Bibliku tal-Atti jistgħu jgħallmuna ħafna dwar kif nibqgħu għassa. Hekk kif nistennew it-tmiem taʼ din is-sistema qadima, ejja nkunu determinati li nimitaw dawn il-Kristjani tal-ewwel seklu f’li nagħtu xhieda bil-qlubija u biż-żelu. Issa m’hemmx privileġġ akbar milli nieħdu sehem f’li nagħtu “xiehda bir-reqqa” dwar is-Saltna t’Alla!—Atti 28:23.
[Mistoqsijiet taʼ Studju]
[Kaxxa f’paġna 13]
“IL-KTIEB TAL-ATTI QATT MA SE JKUN L-ISTESS GĦALIJA”
Wara li qara l-ktieb Nagħtu Xhieda bir-Reqqa Dwar is-Saltna t’Alla, indokratur li jivvjaġġa esprima ruħu b’dan il-mod: “Il-ktieb tal-Atti qatt ma se jkun l-istess għalija.” Hu kien qara l-ktieb Bibliku tal-Atti diversi drabi, imma issa li kien qara din il-pubblikazzjoni, ħass li setaʼ jibbenefika ħafna iktar meta jaqra l-ktieb tal-Atti.
[Stampa f’paġna 12]
Anġlu ħareġ lil Pietru mir-rixtellu kbir tal-ħadid