Mill-​Arkivji Tagħna

Meta Charlotte White, proklamatriċi full-​time, waslet Louisville, f’Kentucky, l-​Istati Uniti tal-​Amerika, tiġbed bagalja fuq ir-​roti, hi qajmet ftit tal-​għagħa.

KIENET is-​sena 1908, u Oħtna White żgur li ġibdet l-​attenzjoni tan-​nies tal-​belt permezz taʼ invenzjoni ġdida fjamanta—id-​Dawn-​Mobile, bagalja bir-​roti li fiha kienu jinġarru l-​kotba Millennial Dawn. “Qlajt ftit kummenti,” qalet l-​oħt, “u ġegħlitni nagħti naqra fl-​għajn.”

L-​Istudenti tal-​Bibbja, kif kienu magħrufin dak iż-​żmien ix-​Xhieda taʼ Ġeħova, ħassew il-​bżonn li jaqsmu l-​veritajiet prezzjużi li kienu tgħallmu minn studju ħabrieki tal-​Iskrittura. Ħafna kienu kisbu għarfien mill-​Bibbja permezz taʼ serje taʼ kotba jisimhom Millennial Dawn (li iktar tard kienu jissejħu wkoll Studies in the Scriptures). Dawk il-​Kristjani li riedu u setgħu, ivvjaġġaw ’il bogħod—lejn bliet, irħula, u nħawi rurali—u offrew dawn il-​kotba li ġew imsejħin “L-​Għajnuniet għall-​Istudenti tal-​Bibbja” lil qarrejja ħerqanin oħra.

Fl-​1908, Oħtna White u proklamaturi żelużi oħrajn tas-​Saltna kienu joffru s-​sett taʼ sitt volumi, legati bix-​xoqqa, għal $1.65 (€1.20). Minflok ma kienu jħallu l-​kotba dak il-​ħin, kienu jieħdu l-​ordnijiet u jerġgħu jmorru darb’oħra—ħafna drabi meta tidħol il-​paga—biex jagħtuhomlhom għall-​prezz moderat taʼ kemm jiswa l-​istampar. Wieħed li kien jopponi gerger dwar kemm in-​nies kienu jagħtu ftit kontribuzzjoni għall-​kotba li ngħataw!

Malinda Keefer ftakret li kienet tieħu l-​ordnijiet għal mitejn sa tliet mitt ktieb fil-​ġimgħa. Imma  l-​interess kbir li ntwera fid-​Dawns ġab dilemma miegħu. Biss biss, is-​sitt volum waħdu kellu 740 paġna! “Ħamsin ktieb jiżnu 18-​il kilogramm,” stqarr The Watch Tower, u dan għamel it-​tqassim “xogħol strapazzuż wisq,” speċjalment għall-​aħwa nisa.

Sabiex isolvi d-​dilemma tat-​tqassim tad-​Dawn, Ħuna James Cole vvinta frejm b’żewġ roti li jistaʼ jingħalaq. Fuqu kienet titgħabba l-​bagalja u tintrabat bil-​viti. Peress li ma kellux bżonn iġorr iktar kaxxi tal-​kartun tqal mimlijin kotba, dak stess li vvinta din il-​ħaġa kkummenta: “M’għadnix naqsam dahri.” Hu introduċa l-​apparat il-​ġdid fl-​1908 lil udjenza entużjasta fil-​konvenzjoni tal-​Istudenti tal-​Bibbja f’Cincinnati, Ohio. F’kull tarf tal-​virga kien hemm żewġ buttuni u fuqhom kien hemm imnaqqax l-​isem Dawn-​Mobile, ladarba t-​tagħbija prinċipali tal-​bagalja kkonsistiet minn volumi tal-​Millennial Dawn. Bi ftit prattika, il-​ġarr taʼ bagalja mimlija b’għexieren taʼ kotba sar biċċa xogħol ħafifa li tagħmilha b’id waħda. L-​għoli setaʼ jitranġa, u r-​roti setgħu jduru liberalment fuq toroq bla tarmak. Wara ġurnata fil-​ministeru, ir-​roti bil-​lastku setgħu jingħalqu u jitpoġġew ċatti mal-​bagalja biex wieħed imur lura d-​dar, bil-​mixi jew bit-​tramm.

L-​aħwa nisa fis-​servizz full-​time setgħu jkollhom Dawn-​Mobile bla ħlas. Inkella kienet tiswa $2.50 (€1.80). Oħtna Keefer, li tidher fl-​istampa, ikkontrollat id-​Dawn-​Mobile tant tajjeb li setgħet tmexxi bagalja mimlija fuq ir-​roti b’idha l-​waħda u ġġorr basket ieħor bil-​kotba f’idha l-​oħra. F’waħda mill-​bliet fejn kien isir it-​tħaffir għall-​faħam f’Pennsylvania, l-​Istati Uniti tal-​Amerika, tant sabet nies li jaċċettaw il-​kotba li normalment kienet taqsam minn fuq pont tliet jew erbaʼ darbiet fil-​ġurnata li riedet tqassamhom.

Fl-​aħħar tas-​snin 80, pilota vvinta l-​bagalji bir-​roti li llum tant huma xena komuni fl-​ajruporti u fit-​toroq tal-​bliet iffollati. Iżda xi mitt sena ilu, x’aktarx li l-​Istudenti tal-​Bibbja ħadu pjaċir bin-​nies jiskantaw lejhom kurjużi hekk kif rawhom imexxu d-​Dawn-​Mobile tagħhom ’l hawn u ’l hemm hekk kif qassmu ż-​żrieragħ prezzjużi tal-​verità tal-​Bibbja.

[Kumment f’paġna 32]

Fil-​ġurnata li Oħtna Keefer riedet tqassam il-​kotba, hi normalment kienet taqsam minn fuq pont tliet jew erbaʼ darbiet

[Kumment f’paġna 32]

Solviet id-​dilemma tat-​tqassim tad-​Dawn