“Il-​qalb tajba mhix mistħoqqa tal-​Mulej Ġesù Kristu tkun maʼ l-​ispirtu li turu.”​—FLP. 4:23.

KIF NISTGĦU NŻOMMU SPIRTU BNIN FIL-​KONGREGAZZJONI . . .

meta nassoċjaw maʼ ħutna?

biż-​żelu tagħna fil-​ministeru tal-​għalqa?

billi nirrapportaw il-​ħażen serju?

1. Għal xiex ġew imfaħħrin il-​kongregazzjonijiet f’Filippi u fi Tjatira?

 IL-​KRISTJANI tal-​ewwel seklu f’Filippi kienu foqra materjalment. Madankollu, kienu ġenerużi u wrew imħabba taʼ min jimitaha maʼ sħabhom fit-​twemmin. (Flp. 1:3-​5, 9; 4:15, 16) Allura, fl-​aħħar tal-​ittra ispirata li kien se jibagħtilhom, l-​appostlu Pawlu setaʼ jikteb: “Il-​qalb tajba mhix mistħoqqa tal-​Mulej Ġesù Kristu tkun maʼ l-​ispirtu li turu.” (Flp. 4:23) Minħabba li spirtu bħal dan ġie muri mill-​Kristjani fi Tjatira, Ġesù Kristu glorifikat qalilhom: “Naf l-​għemejjel tiegħek, u l-​imħabba u l-​fidi u l-​ministeru u s-​sabar tiegħek, u li l-​għemejjel tiegħek taʼ dan l-​aħħar huma iktar kotrana minn dawk taʼ qabel.”—Riv. 2:19.

2. L-​attitudni li nuru kif qed tinfluwenza l-​ispirtu li l-​kongregazzjoni tagħna turi?

² L-​istess illum, kull kongregazzjoni tax-​Xhieda taʼ Ġeħova turi ċertu spirtu, jew, attitudni ġenerali. Xi kongregazzjonijiet huma magħrufin speċjalment għal li juru spirtu taʼ mħabba u kordjalità. Oħrajn huma eċċezzjonali f’li juru appoġġ żeluż għax-​xogħol tal-​ippritkar tas-​Saltna u f’li juru apprezzament profond għax-​xogħol tal-​ministeru full-​time. Meta aħna bħala individwi naħdmu iebes biex ikollna spirtu pożittiv, inkunu qed nagħtu sehemna għall-​unità tal-​kongregazzjoni u navanzaw l-​ispiritwalità tagħha inġenerali. (1 Kor. 1:10) Mill-​banda l-​oħra, spirtu negattiv min-​naħa tagħna jistaʼ jinfluwenza wħud fil-​kongregazzjoni biex jonogħsu spiritwalment, juru attitudni fietla, u saħansitra jittolleraw dnubiet serji. (1 Kor. 5:1; Riv. 3:15, 16) Xi spirtu għandha l-​kongregazzjoni tiegħek? Int kif tistaʼ tippromwovi personalment spirtu pożittiv fil-​kongregazzjoni?

 INKURAĠĠIXXI SPIRTU POŻITTIV

3, 4. Kif nistgħu ‘nfaħħru lil Ġeħova fil-​kongregazzjoni l-​kbira’?

³ Is-​salmista kanta: “Jien se nfaħħrek [Ġeħova] fil-​kongregazzjoni l-​kbira; fost poplu kbir se nagħtik tifħir.” (Salm 35:18) Is-​salmista ma żammx lura milli jfaħħar lil Ġeħova meta kien maʼ qaddejja oħra t’Alla. Il-​laqgħat tal-​kongregazzjoni taʼ kull ġimgħa, inkluż l-​Istudju tat-​Torri tal-​Għassa, jagħtuna opportunitajiet mill-​aħjar biex nuru attitudni żeluża meta nikkummentaw u nesprimu l-​fidi tagħna. Ilkoll kemm aħna nagħmlu tajjeb nistaqsu lilna nfusna: ‘Qed nieħu vantaġġ sħiħ mill-​privileġġ biex nipparteċipa fil-​laqgħat? Nipprepara tajjeb għalihom u nikkummenta bis-​sens? Bħala kap tal-​familja, ngħin jien lil uliedi biex jippreparaw kummenti bil-​quddiem u ngħallimhom biex iwieġbu fi kliemhom stess?’

⁴ Is-​salmista David għamel rabta bejn is-​sodizza taʼ qalbna u l-​kant tagħna. “Qalbi soda, O Alla,” qal hu, “qalbi soda. Se nkanta u ngħanni.” (Salm 57:7) L-​għanjiet li jintużaw fil-​laqgħat Kristjani jipprovdulna opportunità mill-​aħjar biex ‘inkantaw u ngħannu’ lil Ġeħova b’qalb soda. Jekk m’aħniex midħla taʼ xi għanjiet, għala ma nipprattikawhomx waqt il-​lejla tal-​Qima tal-​Familja? Jalla nkunu determinati biex ‘inkantaw lil Ġeħova tul ħajjitna kollha u ngħannulu kemm indumu ħajjin.’—Salm 104:33.

5, 6. Kif nistgħu nkunu ospitabbli u ġenerużi m’oħrajn, u dan xi jnissel fil-​kongregazzjoni?

⁵ Li nkunu ospitabbli lejn ħutna hu mod ieħor kif innisslu spirtu taʼ mħabba fil-​kongregazzjoni. Fl-​aħħar kapitlu tal-​ittra tiegħu lill-​Ebrej, Pawlu jinkludi dan it-​tħeġġiġ: “Komplu uru mħabbitkom lejn l-​aħwa. Tinsewx l-​ospitalità.” (Ebr. 13:1, 2) Mod eċċellenti kif nuru l-​ospitalità hu billi nistiednu għall-​ikel lill-​indokratur li jivvjaġġa u lil martu, jew lill-​qaddejja full-​time fil-​kongregazzjoni. Aħsbu wkoll dwar ir-​romol, il-​familji b’ġenitur wieħed, jew individwi oħrajn li jistgħu jibbenefikaw milli kultant naqsmu ikla magħhom jew nistidnuhom jingħaqdu magħna għall-​qima tal-​familja.

⁶ Pawlu qal lil Timotju jinkuraġġixxi lil oħrajn “biex jagħmlu l-​ġid, ikunu għonja f’għemejjel tajbin, ikunu idhom miftuħa, lesti biex jaqsmu m’oħrajn u, bħala t-​teżor tagħhom, iqiegħdu fis-​sigurtà  għalihom infushom pedament tajjeb għall-​futur, sabiex jaqbdu qabda soda mal-​ħajja vera.” (1 Tim. 6:17-​19) Pawlu kien qed iħeġġeġ lill-​aduraturi sħabu biex iżidu l-​ispirtu taʼ ġenerożità tagħhom. Anke fi żminijiet ekonomiċi diffiċli, aħna nistgħu nkabbru spirtu taʼ ġenerożità. Mod mill-​aħjar biex nagħmlu dan huwa billi nipprovdu t-​trasport għall-​ministeru u lejn u mil-​laqgħat lil dawk li jeħtiġuh. U xi ngħidu għal dawk li jibbenefikaw minn atti taʼ qalb tajba bħal dawn? Huma jkunu qed jinkuraġġixxu spirtu pożittiv fil-​kongregazzjoni jekk juru apprezzament, forsi billi joffru dak li jistgħu biex jagħmel tajjeb għall-​ispejjeż għoljin tal-​fjuwil li dejjem jiżdiedu. Iktar minn hekk, il-​fatt li nippjanaw li nkunu iktar maʼ ħutna spiritwali jġegħelhom iħossuhom apprezzati u maħbubin. Meta noktru f’għemejjel tajbin “maʼ min jiġi minna fil-​fidi” u nkunu lesti li nagħtuhom mill-​ħin u r-​riżorsi tagħna, aħna mhux biss inkunu qed inkattru mħabbitna lejhom imma wkoll inkunu qed ngħinu biex jinbena spirtu pożittiv u taʼ mħabba fil-​kongregazzjoni.—Gal. 6:10.

7. Li nżommu l-​affarijiet personali t’oħrajn kunfidenzjali, kif jgħin biex jinżamm spirtu tajjeb fil-​kongregazzjoni?

⁷ Ikkunsidra terġaʼ fatturi oħrajn li jsaħħu l-​għaqda taʼ mħabba maʼ sħabna fit-​twemmin: il-​ħbiberija u l-​kunfidenzjalità. (Aqra Proverbji 18:24.) Ħbieb veri jżommu b’kunfidenzjalità l-​affarijiet personali. Meta ħutna jgħidulna bil-​ħsibijiet u s-​sentimenti l-​iktar ġewwinin tagħhom u jkunu ċerti li dawn ma jsirx jaf bihom kulħadd, l-​għaqda taʼ mħabba li diġà tkun teżisti se tissaħħaħ. Jalla nippromwovu spirtu taʼ mħabba bħal taʼ familja fil-​kongregazzjoni billi nkunu ħbieb taʼ min jafdana u li kapaċi nżommu affarijiet kunfidenzjali.—Prov. 20:19.

KUN ŻELUŻ FIL-​MINISTERU

8. Liema parir ngħataw il-​Laodikin, u għala?

⁸ Meta kien qed ikellem lill-​kongregazzjoni f’Laodiċija, Ġesù qal: “Naf l-​għemejjel tiegħek, li la int kiesaħ u lanqas sħun. Nixtieq li kont kiesaħ inkella sħun. Għalhekk, għax int fietel, u la int sħun u lanqas kiesaħ, nobżqok minn ħalqi.” (Riv. 3:15, 16) Il-​Laodikin kellhom nuqqas taʼ żelu għall-​ministeru Kristjan. Attitudni bħal din x’aktarx li effettwat ukoll ir-​relazzjonijiet personali tagħhom. Għalhekk, Ġesù wissiehom bl-​imħabba: “Lil kulmin għandi affezzjoni lejh inwiddbu u niddixxiplinah. Għalhekk, kun żeluż u indem.”—Riv. 3:19.

9. L-​attitudni tagħna lejn il-​ministeru tal-​għalqa, kif teffettwa l-​ispirtu tal-​kongregazzjoni?

⁹ Sabiex nippromwovu spirtu pożittiv u bnin fil-​kongregazzjoni, aħna għandna nagħtu kas iż-​żelu tagħna lejn il-​ministeru tal-​għalqa. Il-​kongregazzjoni  hi organizzata bil-​mira li nsibu wħud bħal nagħaġ fit-​territorju u nibnuhom spiritwalment. B’hekk, għandna bżonn nieħdu sehem fix-​xogħol taʼ li nagħmlu dixxipli bl-​entużjażmu, bħalma għamel Ġesù. (Mt. 28:19, 20; Lq. 4:43) Iktar ma jkollna żelu għall-​ministeru, iktar se nkunu magħqudin bħala “ħaddiema sħab m’Alla.” (1 Kor. 3:9) Hekk kif nosservaw oħrajn fil-​ministeru tal-​għalqa jiddefendu l-​fidi tagħhom u jesprimu l-​apprezzament tagħhom għall-​affarijiet spiritwali, aħna nitqanqlu biex inħobbuhom u nirrispettawhom iżjed. Ukoll, li naqdu “spalla maʼ spalla” fil-​ministeru jipproduċi spirtu t’għaqda fil-​kongregazzjoni.—Aqra Sofonija 3:9.

10. L-​isforzi li nagħmlu biex intejbu l-​kwalità tal-​ministeru tagħna, x’effett għandhom fuq oħrajn fil-​kongregazzjoni?

¹⁰ L-​isforzi tagħna biex intejbu l-​kwalità tal-​ministeru tagħna għandhom ukoll effett tajjeb fuq oħrajn. Hekk kif ninteressaw ruħna iktar fin-​nies li niltaqgħu magħhom u hekk kif nirsistu biex inkunu iktar effettivi f’li nilħqu l-​qlub taʼ dawk li jisimgħuna, l-​entużjażmu tagħna għall-​ministeru jiżdied. (Mt. 9:36, 37) L-​entużjażmu għandu t-​tendenza li jittieħed minn dawk li jkunu magħna. Ġesù bagħat lid-​dixxipli tiegħu tnejn tnejn biex jippritkaw minflok wieħed wieħed. (Lq. 10:1) Dan mhux biss inkuraġġiehom u ħarriġhom imma wkoll kabbar iż-​żelu tagħhom għall-​ministeru. Ma napprezzawx aħna li naħdmu maʼ pubblikaturi żelużi tas-​Saltna? L-​entużjażmu tagħhom jinkuraġġina u jgħinna nkomplu fix-​xogħol tal-​ippritkar.—Rum. 1:12.

GĦASSES KONTRA T-​TGERGIR U L-​GĦEMIL ĦAŻIN

11. Fi żmien Mosè, xi Iżraelin liema tip taʼ spirtu żviluppaw, u dan x’effett kellu fuqhom?

¹¹ Sa ftit ġimgħat biss wara li bdew jeżistu bħala ġens ġdid, l-​Iżraelin żviluppaw spirtu taʼ skuntentizza u tgergir. Dan wassal għal ribelljoni kontra Ġeħova u r-​rappreżentanti tiegħu. (Eżo. 16:1, 2) Numru żgħir biss mill-​Iżraelin li ħarġu mill-​Eġittu tħallew jidħlu fl-​Art Imwiegħda. Anke Mosè ġie mċaħħad milli jidħol f’dik l-​art minħabba r-​reazzjoni tiegħu għall-​attitudni ħażina tal-​Iżraelin! (Dt. 32:48-​52) X’nistgħu nagħmlu llum biex ma naqgħux vittma taʼ li jkollna spirtu negattiv?

12. Kif nistgħu ngħassu kontra li niżviluppaw spirtu taʼ tgergir?

¹² Aħna għandna ngħassu kontra li niżviluppaw spirtu taʼ tgergir. L-​umiltà u r-​rispett lejn l-​awtorità se jgħinuna nevitaw din l-​attitudni. Xi ħaġ’oħra li tistaʼ tgħinna hi li nagħżlu lil ħbiebna bir-​reqqa. Għażla mhix għaqlija taʼ divertiment jew li nqattgħu ħafna ħin mal-​kollegi tagħna tax-​xogħol u sħabna tal-​iskola li m’għandhom l-​ebda rispett għall-​prinċipji tajbin se jġibu konsegwenzi koroh. Inkunu għaqlin jekk nillimitaw l-​assoċjazzjoni tagħna maʼ nies li huma negattivi jew li qed jippromwovu attitudni indipendenti.—Prov. 13:20.

13. L-​influwenza li tikkorrompi tat-​tgergir tistaʼ twassal għal liema ħsara oħra fl-​ispiritwalità tal-​kongregazzjoni?

¹³ L-​influwenza li tikkorrompi tat-​tgergir tistaʼ twassal biex ikun hemm ħsara oħra fl-​ispiritwalità. Pereżempju, it-​tgergir jistaʼ jfixkel il-​paċi u l-​għaqda tal-​kongregazzjoni. Iktar minn hekk, it-​tgergir kontra sħabna fit-​twemmin jistaʼ mhux biss iweġġagħhom imma jistaʼ wkoll iwassal għad-​dnubiet taʼ malafama u żebliħ. (Lev. 19:16; 1 Kor. 5:11) Uħud li kienu gergru fil-​kongregazzjoni tal-​ewwel seklu kienu “jinjoraw lil min hu fuqhom u jmaqdru lill-​glorjużi.” (Ġuda 8, 16) Tgergir bħal dan kontra rġiel  responsabbli fil-​kongregazzjoni żgur li ma kellux l-​approvazzjoni t’Alla.

14, 15. (a) Kif se tiġi effettwata l-​kongregazzjoni kollha meta wieħed iħalli l-​ħażen għaddej qisu qatt ma kien xejn? (b) X’għandna nagħmlu jekk insiru nafu li xi ħadd hu involut f’xi dnub bil-​moħbi?

¹⁴ Xi ngħidu jekk insiru nafu li xi ħadd hu involut f’xi dnub bil-​moħbi, forsi billi jabbuża mill-​alkoħol, jara l-​pornografija, jew jgħix ħajja immorali? (Efes. 5:11, 12) Li nagħlqu għajn waħda għall-​għemejjel ħżiena serji jistaʼ jtellef l-​ispirtu qaddis taʼ Ġeħova milli jinfirex liberalment fuq il-​kongregazzjoni kollha u jhedded il-​paċi tagħha. (Gal. 5:19-​23) L-​istess bħalma l-​Kristjani tal-​bidu f’Korintu kellhom ineħħu l-​ħażen, hekk ukoll illum, kwalunkwe influwenza ħażina għandha tinżamm ’il barra mill-​kongregazzjoni sabiex nipproteġu l-​ispirtu pożittiv u bnin. X’tistaʼ tagħmel int biex tgħin għaż-​żamma tal-​paċi fil-​kongregazzjoni?

¹⁵ Bħalma semmejna qabel, huwa importanti li nżommu l-​kunfidenzjalità f’ċerti kwistjonijiet, speċjalment meta oħrajn jaqsmu magħna s-​sentimenti u l-​ħsibijiet tagħhom. Kemm huwa ħażin u taʼ wġigħ li xxerred informazzjoni kunfidenzjali dwar xi ħadd! Xorta waħda, meta jkun sar xi dnub serju, dawk maħturin Skritturalment biex jieħdu ħsieb il-​kwistjoni—l-​anzjani tal-​kongregazzjoni—għandhom jiġu informati. (Aqra Levitiku 5:1.) Għalhekk, jekk nafu b’xi ħu jew oħt li kkommettiet xi ħażen bħal dan, għandna ninkuraġġuha tmur għand l-​anzjani u titlob l-​għajnuna tagħhom. (Ġak. 5:13-​15) Iżda, jekk dak li jkun ma jagħmilx dan fi żmien raġunevoli, aħna għandna nirrapportaw il-​ħażen.

16. Kif nipproteġu lill-​kongregazzjoni billi ngħidu lill-​anzjani jekk inkunu nafu b’xi ħażen serju?

¹⁶ Il-​kongregazzjoni Kristjana hija post taʼ kenn spiritwali, u aħna għandna ngħinu biex nipproteġuha billi nirrapportaw kwalunkwe ħażen serju. Jekk l-​anzjani jġibu f’sensih lil dak li għamel il-​ħażen u dan, għax nidem, jaċċetta t-​twiddib u l-​korrezzjoni, hu ma jkunx qed jipperikola iktar l-​ispirtu tal-​kongregazzjoni. Imma xi ngħidu jekk dan il-​midneb ma jindimx u ma jaċċettax il-​parir bl-​imħabba tal-​anzjani? Hu jinqataʼ mis-​sħubija. Dan jirriżulta fil-​“qerda,” jew, it-​tneħħija tal-​influwenza qerrieda minn fostna, u l-​ispirtu tal-​kongregazzjoni jiġi protett. (Aqra l-​1 Korintin 5:5.) Iva, li nipproteġu l-​ispirtu tal-​kongregazzjoni jeħtieġ li kull wieħed u waħda minna jieħu azzjoni xierqa, jikkoopera mal-​ġemgħa tal-​anzjani, u jipproteġi l-​benesseri taʼ sħabu fit-​twemmin.

INKURAĠĠIXXI “L-​UNITÀ TAʼ L-​ISPIRTU”

17, 18. X’se jgħinna ‘nħarsu l-​unità taʼ l-​ispirtu’?

¹⁷ Billi “baqgħu jingħataw għat-​tagħlim taʼ l-​appostli,” is-​segwaċi tal-​bidu li kellu Ġesù għenu biex ikun hemm spirtu t’għaqda fil-​kongregazzjoni. (Atti 2:42) Huma apprezzaw il-​parir Skritturali u d-​direzzjoni mogħtijin mill-​irġiel ixjeħ. Minħabba li l-​anzjani tal-​lum jikkooperaw mal-​klassi tal-​ilsir leali u għaqli, kulħadd fil-​kongregazzjoni hu inkuraġġit u megħjun biex jibqaʼ f’unità. (1 Kor. 1:10) Meta nissottomettu ruħna għall-​istruzzjoni bbażata fuq il-​Bibbja mill-​organizzazzjoni taʼ Ġeħova u nsegwu d-​direzzjoni tal-​anzjani, aħna nagħtu prova li qed ‘nagħmlu ħilitna biex bil-​ħeġġa kollha nħarsu l-​unità taʼ l-​ispirtu fir-​rabta li tgħaqqad tal-​paċi.’—Efes. 4:3.

¹⁸ B’kull mezz, mela, ejja naħdmu biex inżommu spirtu pożittiv u bnin fil-​kongregazzjoni. Jekk nagħmlu hekk, aħna żgurati li ‘l-​qalb tajba mhix mistħoqqa tal-​Mulej Ġesù Kristu tkun maʼ l-​ispirtu li nuru.’—Flp. 4:23.

[Mistoqsijiet taʼ Studju]

[Stampa f’paġna 19]

Tagħti sehmek għal spirtu pożittiv billi tipprepara kummenti bis-​sens?

[Stampa f’paġna 20]

Agħti sehmek għal spirtu pożittiv billi ssir midħla tal-​għanjiet tagħna