Huma Pproklamaw il-Kelma t’Alla bil-Kuraġġ!
Kuraġġ—saħansitra qlubija—meta wieħed ikun wiċċ imb wiċċ maʼ oppożizzjoni. Dawn il-kwalitajiet jidhru fi Kristjani veri, kif muri f’pubblikazzjonijiet bħal Nagħtu Xhieda bir-Reqqa Dwar is-Saltna t’Alla u Jehovah’s Witnesses—Proclaimers of God’s Kingdom. Bħal sħabna fit-twemmin fl-ewwel seklu, aħna nduru lejn Ġeħova fit-talb għall-ispirtu tiegħu u għall-għajnuna biex inxandru l-kelma tiegħu bil-qlubija.—Atti 4:23-31.
Inkwantu għax-xogħol tal-ippritkar tagħna matul l-Ewwel Gwerra Dinjija, ħu wieħed kiteb: “Il-qaddejja t’Alla kienu qed iqassmu bil-ħeġġa s-sebaʼ volum taʼ Studies in the Scriptures, li jismu The Finished Mystery. Kien qed jitqassam b’rata li qatt ma kien hemm bħalha. Il-fuljett Aħbar tas-Saltna Nru. 1 ħareġ fl-1918. Warajh ġie l-Aħbar tas-Saltna Nru. 2, li spjega għala l-awtoritajiet kienu qed iżommu The Finished Mystery milli jitqassam. Ftit wara ħareġ l-Aħbar tas-Saltna Nru. 3. Dawn il-pubblikazzjonijiet kienu mqassmin maʼ kullimkien mill-klassi leali tal-midlukin. Kien jeħtieġ fidi u kuraġġ biex jitqassmu l-Aħbar tas-Saltna.”
Illum, pubblikaturi tas-Saltna ġodda ġeneralment jirċievu taħriġ fil-ministeru, imma dan ma kienx dejjem il-każ. Meta ftakar l-ewwel esperjenza tiegħu fis-servizz tal-għalqa fl-1922, wieħed ħu Pollakk fl-Istati Uniti kiteb: “B’ebda għarfien dwar kif nippreżenta l-letteratura u b’Ingliż batut ferm, kont bilwieqfa waħdi quddiem bieb t’uffiċċju taʼ tabib u ħabbatt. Fetħet infermiera. Qatt ma ninsa dik l-esperjenza għax kont eċċitat u mbeżżaʼ. Jien u niftaħ il-basket waqgħuli l-kotba kollha maʼ saqajn l-infermiera. M’għandi l-ebda idea x’għedtilha, imma ħallejtilha pubblikazzjoni. Sa ma tlaqt, ksibt il-kuraġġ u ħassejtni mbierek minn Ġeħova. Ħallejt ħafna kotba żgħar dakinhar f’dik it-triq taʼ negozju.”
Oħt waħda tgħid: “Madwar l-1933, ħafna aħwa użaw karozzi mgħammrin bl-ispeakers biex iqassmu l-messaġġ tas-Saltna.” F’okkażjoni minnhom, hi u koppja li kienu Xhieda kienu qed jippritkaw f’erja muntanjuża f’Kalifornja, l-Istati Uniti. Hi tiftakar: “Il-ħu ħa l-karozza bl-ispeakers iktar ’il fuq fil-muntanji, u aħna bqajna fir-raħal. Meta beda jdoqq il-messaġġ rekordjat, instemaʼ bħallikieku kien ġej mis-sema. In-nies tar-raħal ipprovaw fuq li pprovaw isibu lill-ħu imma ma setgħux. Wara li spiċċa r-rekording, żorna lin-nies u tajniehom xhieda. Jien ħdimt b’żewġ karozzi oħra bl-ispeakers u nistaʼ niżgurak illi l-maġġoranza tan-nies ma ridux jisimgħu l-messaġġ. Imma ma setgħux ħlief jisimgħu t-taħditiet għax il-messaġġ instemaʼ ċar kristall fi djarhom. Dejjem stajna naraw
li Ġeħova ġiegħel li jintuża l-metodu t-tajjeb fil-ħin it-tajjeb. Dan il-metodu talab il-kuraġġ kollu li stajna rrawmu, imma dejjem wettaq xogħlu, u isem Ġeħova ġie glorifikat.”Fis-snin 30 u kmieni fis-snin 40, kienu jintużaw il-fonografi u t-taħditiet Bibliċi rekordjati fil-ministeru tagħna. Mara Kristjana tiftakar: “Oħt żagħżugħa kienet qed taħdem minn dar għal dar bil-fonografu. Wara li bdiet iddoqq ir-rekording fil-bieb, sid id-dar tant irrabja li ta daqqa taʼ sieq lill-fonografu u xxuttjah minn fuq l-għatba. Ma nkisritx diska waħda. Tlett irġiel li kienu qed jieklu l-ikel taʼ nofsinhar fi trakk ipparkjat raw x’kien ġara, stiednu lill-oħt iddoqqilhom ir-rekording u ħadu l-letteratura mingħandha. Dan patta għat-trattament ħażin.” Kien jeħtieġ il-kuraġġ biex tkampa maʼ provi bħal dawn.
L-istess oħt żiedet: “Niftakar il-bidu tat-tqassim tar-rivisti fit-toroq fl-1940. Qabel dan kien ikun hemm marċi t’informazzjoni. L-aħwa, wieħed wara l-ieħor, kienu jimmarċjaw fuq il-bankina waqt li jġorru tabelli li kienu jgħidu ‘Ir-Reliġjon Hija Nasba u Ingann’ u ‘Aqdi lil Alla u lil Kristu s-Sultan.’ Fl-istess ħin, fuljetti b’xejn kienu qed jitqassmu lin-nies. Kien jeħtieġ il-kuraġġ biex tieħu sehem f’dawn l-oqsma tax-xogħol imma dawn qdew l-għan taʼ li l-isem u l-poplu taʼ Ġeħova jinżammu quddiem għajnejn il-pubbliku.”
“Ix-xogħol bir-rivisti fi rħula żgħar kien diffiċli ħafna,” tgħid oħt oħra. “Dan kien fi żmien meta l-oppożizzjoni kontra x-Xhieda kienet qawwija. . . . Kien jeħtieġ kuraġġ taʼ veru biex toqgħod bilwieqfa f’kantuniera, iżżomm ir-rivisti u tgħajjat frażijiet li kienu suġġeriti biex jintużaw. Madankollu, rari kien hemm Sibt li ma ħriġniex. Xi drabi n-nies kienu jkunu dħulin. Drabi oħra gruppi taʼ nies xejn pjaċevoli kienu jinġemgħu u kultant kien ikollna naħarbu nkiss inkiss biex nevitaw trattament aħrax minn dawn il-gruppi.”
Minkejja l-persekuzzjoni esperjenzata waqt it-Tieni Gwerra Dinjija, ix-Xhieda taʼ Ġeħova bil-kuraġġ komplew il-ministeru tagħhom. F’kampanja taʼ 43 ġurnata mill-1 taʼ Diċembru, 1940, sat-12 taʼ Jannar, 1941, xi 50,000 pubblikatur fl-Istati Uniti qassmu xi tmien miljun ktejjeb matul dak li ġie msejjaħ il-Perijodu taʼ Xhieda “b’Kuraġġ.”
Ħafna wħud ikbar fl-età fl-organizzazzjoni t’Alla jiftakru ċar l-isfidi tal-passat li ġegħluhom irabbu l-kuraġġ. Xi wħud jiftakru li għal snin sħaħ, l-ispirtu kuraġġuż tagħhom intwera fil-motto li tant kienu jgħidu, Biegħdu l-battalja sal-bieb! Min jaf x’forma għad irid jieħu l-messaġġ tagħna mogħti minn Alla qabel ma tispiċċa s-sistema preżenti mill-agħar! Però, bl-għajnuna divina, se nkomplu nipproklamaw il-kelma taʼ Ġeħova bil-fidi u l-kuraġġ.
[Kumment f’paġna 9]
Dejjem kien hemm bżonn il-kuraġġ biex tieħu sehem fix-xogħol tal-ippritkar tas-Saltna