Karatteristika li Tistaʼ Tivvelena lil Moħħna—L-Għira
Napuljun Bonaparti kellu minnha. Ġulju Ċesari kellu minnha. Alessandru l-Kbir kellu minnha. Minkejja l-qawwa u l-glorja kollha tagħhom, f’qalb dawn l-irġiel tħalliet karatteristika li tistaʼ tivvelena l-moħħ taʼ dak li jkun. It-tlieta li huma għeru għal xi ħadd ieħor.
“Napuljun għer għal Ċesari, Ċesari għer għal Alessandru [l-Kbir], u Alessandru, jekk ikolli ngħid, għer għal Erkole, li qatt m’eżista,” kiteb il-filosfu Ingliż Bertrand Russell. L-għira tistaʼ therri lil kwalunkwe bniedem, minkejja kemm hu sinjur, kemm għandu kwalitajiet sbieħ, u kemm għamel suċċess f’ħajtu.
L-għira hija sentiment taʼ stmerrija għal oħrajn minħabba l-affarijiet li għandhom, il-prosperità, il-vantaġġi, u affarijiet simili. Xogħol taʼ referenza dwar il-Bibbja jiddistingwi l-għira mill-ġelożija b’dan il-mod: “‘Il-ġelożija’ . . . tirreferi għax-xewqa biex wieħed ikollu dak li għandu ħaddieħor, u l-kelma ‘għira’ tirreferi għax-xewqa biex wieħed iċaħħad lil ieħor minn dak li għandu.” Il-bniedem għajjur mhux biss jgħir għal dak li għandhom oħrajn, imma wkoll ikun irid jiħodhulhom.
Inkunu għaqlin jekk neżaminaw kif l-għira tistaʼ tinbet ġo fina u x’inhuma l-konsegwenzi tagħha. Tassew għandna bżonn inkunu nafu x’passi għandna nieħdu biex ma nħallux l-għira tikkontrollalna ħajjitna.
ATTITUDNI LI TISTAʼ TITFAʼ L-ĦATAB FUQ IN-NAR TAL-GĦIRA
Filwaqt li l-bnedmin imperfetti għandhom “tendenza għall-għira,” fatturi differenti jistgħu jsostnu u jsaħħu din l-inklinazzjoni. (Ġak. 4:5) L-appostlu Pawlu identifika wieħed minnhom meta qal: “Ħa ma nintefħux bina nfusna, għax b’hekk inqanqlu l-kompetizzjoni bejnietna, u ngħiru għal xulxin.” (Gal. 5:26) L-attitudni, jew, l-ispirtu taʼ kompetizzjoni jistaʼ saħansitra jżid l-inklinazzjoni imperfetta għall-għira. Żewġ Kristjani jisimhom Cristina u José a sabu kemm dan hu minnu.
Cristina, pijuniera regulari, tgħid: “Spiss insib lili nnifsi nħares lejn oħrajn u nħossni għajjura għalihom. Inqabbel dak li għandhom maʼ dak li m’għandix.” Darba minnhom, Cristina kienet qed tiekol maʼ koppja li għandhom il-privileġġ li jaqdu fix-xogħol tal-ivvjaġġar. Konxja li hi u żewġha, Eric, kienu kważi tal-istess età tal-indokratur li jivvjaġġa u martu u li kellhom inkarigi simili fil-passat, Cristina qalet: “Żewġi huwa anzjan ukoll! Kif inhu li intom qegħdin fix-xogħol tal-ivvjaġġar u aħna m’aħna xejn?” Spirtu taʼ kompetizzjoni waddab il-ħatab fuq in-nar tal-għira, u dan għamieha għax-xogħol mill-aħjar li hi u żewġha kienu qed jagħmlu u ġegħelha ma tkunx sodisfatta b’ħajjithom.
José xtaq li jaqdi bħala qaddej ministerjali fil-kongregazzjoni. Meta ma nħatarx u oħrajn
inħatru, għer għalihom u żamm f’qalbu għall-koordinatur tal-ġemgħa tal-anzjani. “L-għira ġegħlitni rrawwem mibegħda għal dan il-ħu u biex ninterpreta ħażin l-intenzjonijiet tiegħu,” jistqarr José. “Meta l-għira tikkontrollalek ħajtek, tibda taħseb fik innifsek u ma tkunx tistaʼ taħseb ċar.”X’JGĦALLMUNA L-EŻEMPJI SKRITTURALI?
Il-Bibbja fiha ħafna eżempji taʼ twissija. (1 Kor. 10:11) Uħud minn dawn mhux biss juruna kif tikber l-għira, imma wkoll kif tivvelena lil dawk li jħalluha tegħlibhom.
Pereżempju, Kajjin, l-ewwel iben taʼ Adam u Eva, ħassu rrabjat meta Ġeħova aċċetta s-sagrifiċċju taʼ Abel imma lil tiegħu le. Kajjin setaʼ rranġa din is-sitwazzjoni, imma tant sar mogħmi bl-għira li qatel lil ħuh. (Ġen. 4:4-8) Mhux taʼ b’xejn li l-Bibbja titkellem dwar Kajjin bħala wieħed “li oriġina mill-Ħażin,” Satana!—1 Ġw. 3:12.
L-għaxar aħwa taʼ Ġużeppi għeru għar-relazzjoni speċjali li Ġużeppi kellu maʼ missierhom. Il-mibegħda tagħhom għal Ġużeppi kibret meta qalilhom dwar il-ħolm profetiku tiegħu. Saħansitra riedu joqtluh. Fl-aħħar, bigħuh bħala lsir u bi krudeltà ġiegħlu lil missierhom jemmen li Ġużeppi kien mejjet. (Ġen. 37:4-11, 23-28, 31-33) Snin wara, huma ammettew dnubhom u qalu lil xulxin: “Bla dubju aħna ħatjin rigward ħuna, għax rajna kemm kellu ruħu mnikkta meta talabna bil-ħniena biex nagħdruh, imma ma tajniehx widen.”—Ġen. 42:21; 50:15-19.
Fil-każ taʼ Koraħ, Datan, u Abiram, l-għira nibtet meta qabblu l-privileġġi tagħhom maʼ dawk taʼ Mosè u Aron. Huma akkużaw lil Mosè li kien qed ‘jilgħabha tal-prinċep’ u li kien qed jgħolli lilu nnifsu fuq oħrajn. (Num. 16:13) Din l-akkuża ma kinitx vera. (Num. 11:14, 15) Ġeħova stess kien ħatar lil Mosè. Iżda dawn ir-ribelli għeru għall-pożizzjoni taʼ Mosè. Fl-aħħar, l-għira wasslet għall-qerda tagħhom minn Ġeħova.—Salm 106:16, 17.
Is-Sultan Salamun ra b’għajnejh stess sa fejn tistaʼ twassal l-għira. Mara li mititilha tarbija tat-twelid ipprovat tinganna lil seħbitha f’li taħseb li kienet it-tarbija tagħha li kienet mietet. Matul il-ġuri li kien hemm wara dan, il-waħda li gidbet saħansitra aċċettat l-idea li tinqatel it-tarbija li baqgħet ħajja. Madankollu, Salamun għamel ċert li t-tarbija ngħatat lill-omm proprja.—1 Slat. 3:16-27.
L-għira tistaʼ ġġib konsegwenzi taʼ wġigħ. L-eżempji Skritturali li għadna kif semmejna juru li din tistaʼ twassal għall-mibegħda, għall-inġustizzja, u għall-qtil. Iktar minn hekk, f’kull każ il-vittma ma kienet għamlet xejn li jistħoqqilha dak li ġie fuqha f’daqqa waħda. Hemm xi ħaġa li aħna nistgħu nagħmlu biex niżguraw li l-għira ma tikkontrollalniex ħajjitna? Liema passi nistgħu nieħdu bħala rimedji għall-velenu tal-għira?
RIMEDJI EFFETTIVI!
Kattar l-imħabba u l-affezzjoni lejn l-aħwa. L-appostlu Pietru wissa lill-Kristjani: “Issa li saffejtu 1 Pt. 1:22) U x’inhi l-imħabba? L-appostlu Pawlu kiteb: “L-imħabba tistabar fit-tul u qalbha tajba. L-imħabba ma tgħirx, ma tiftaħarx, ma tintefaħx, ma ġġibx ruħha b’mod indeċenti, ma tfittixx l-interessi tagħha.” (1 Kor. 13:4, 5) It-tkattir taʼ mħabba bħal din f’qalbna għal oħrajn irażżan tendenza negattiva għall-għira. (1 Pt. 2:1) Minflok m’għer għal David, Ġonatan ‘ħabbu bħalu nnifsu.’—1 Sam. 18:1.
ruħkom bl-ubbidjenza tagħkom lejn il-verità, u b’hekk għandkom affezzjoni lejn l-aħwa mingħajr ipokrisija, ħobbu lil xulxin mill-qalb bil-ħeġġa kollha.” (Agħmilha maʼ nies li jħobbu lil Alla. Il-kompożitur taʼ Salm 73 ġietu l-għira għall-ħżiena li gawdew ħajja taʼ lussu ħielsa mill-problemi. Madankollu, hu għeleb l-għira li kellu billi mar “fis-santwarju grandjuż t’Alla.” (Salm 73:3-5, 17) Il-fatt li s-salmista għamilha m’aduraturi sħabu għenu jinduna bil-barkiet li ġew milli ‘jersaq qrib Alla.’ (Salm 73:28) Aħna jistaʼ jiġrilna l-istess jekk nassoċjaw regolarment maʼ sħabna fit-twemmin fil-laqgħat Kristjani.
Fittex li tagħmel it-tajjeb. Wara li Alla induna bl-għira u l-mibegħda li żviluppaw f’Kajjin, Hu qallu: ‘Dur biex tagħmel it-tajjeb.’ (Ġen. 4:7) Għall-Kristjani, x’jinvolvi li ‘jagħmlu t-tajjeb’? Ġesù qal li għandna ‘nħobbu lil Ġeħova Alla tagħna b’qalbna kollha u b’ruħna kollha u b’moħħna kollu u nħobbu lill-proxxmu tagħna bħalna nfusna.’ (Mt. 22:37-39) Is-sodisfazzjon li jkollna meta niffokaw ħajjitna fuq li naqdu lil Ġeħova u ngħinu lil oħrajn huwa rimedju effettiv għal sentimenti t’għira. Is-sehem sħiħ tagħna fix-xogħol tal-ippritkar tas-Saltna u taʼ li nagħmlu dixxipli huwa mod mill-aħjar biex naqdu lil Alla u lill-proxxmu u jġibilna “l-barka taʼ Ġeħova.”—Prov. 10:22.
‘Ifraħ maʼ min jifraħ.’ (Rum. 12:15) Ġesù feraħ bis-suċċess tad-dixxipli tiegħu, u qalilhom li kellhom jagħmlu saħansitra iktar minnu fix-xogħol tal-ippritkar. (Lq. 10:17, 21; Ġw. 14:12) Bħala aduraturi taʼ Ġeħova, aħna ninsabu magħqudin; b’hekk, is-suċċess taʼ xi ħadd minna, hu min hu, huwa barka għal kulħadd. (1 Kor. 12:25, 26) Għalhekk, m’għandniex aħna nifirħu minflok ma ngħiru meta oħrajn jingħataw responsabbiltà akbar?
MHIX ĠLIEDA FAĊLI!
Il-ġlieda kontra l-għira tistaʼ tkun waħda twila. Cristina tammetti: “Xorta għad għandi tendenza qawwija li ngħir. Għalkemm nobgħod l-għira, xorta nħossha, u jkolli rrażżanha l-ħin kollu.” José kellu ġlieda simili. Hu jgħid: “Ġeħova għenni napprezza l-kwalitajiet tajbin tal-koordinatur tal-ġemgħa tal-anzjani. Fhimt kemm hu imprezzabbli li jkolli relazzjoni tajba m’Alla.”
L-għira hija waħda mill-“għemejjel tal-laħam” u kontra dawn kull Kristjan għandu jiġġieled. (Gal. 5:19-21) Billi ma nħallux l-għira tikkontrollana, aħna nistgħu nsibu iktar ferħ f’ħajjitna u nistgħu nogħġbu lil Missierna tas-sema, Ġeħova.
[Nota taʼ taħt]
a L-ismijiet ġew mibdulin.
[Kumment f’paġna 17]
‘Ifraħ maʼ min jifraħ’