“Ippriedka l-​kelma u agħmel dan b’urġenza.”—2 TIM. 4:2.

TISTAʼ TISPJEGA?

Il-​Kristjani tal-​ewwel seklu għala ppritkaw b’urġenza?

Kif nistgħu nżommu sens t’urġenza?

L-​ippritkar tas-​Saltna għala hu iktar urġenti issa minn qatt qabel?

1, 2. Liema mistoqsijiet iqumu dwar il-​kmand biex ‘nippritkaw b’urġenza’?

 IN-​NIES li xogħolhom hu li jsalvaw il-​ħajjiet ġeneralment jaħdmu b’sens t’urġenza. Pereżempju, il-​pompiera jwieġbu malajr għal xi emerġenza għax jafu li jistaʼ jkun hemm il-​ħajjiet fil-​periklu.

² Bħala Xhieda taʼ Ġeħova, aħna rridu ngħinu lin-​nies isalvaw. Għaldaqstant, niħduh bis-​serjetà l-​inkarigu tagħna biex nippritkaw l-​aħbar tajba tas-​Saltna. M’għandniex xi ngħidu, ma niġrux ’l hemm u ’l hawn bl-​addoċċ. Allura, l-​appostlu Pawlu x’ried ifisser meta ta dan il-​parir: “Ippriedka l-​kelma u agħmel dan b’urġenza”? (2 Tim. 4:2) Kif nistgħu nippritkaw b’urġenza? U xogħolna għala hu daqstant urġenti?

L-​IPPRITKAR TAGĦNA GĦALA HU URĠENTI?

3. X’jistaʼ jkun ir-​riżultat jekk in-​nies jaċċettaw il-​messaġġ tas-​Saltna jew ma jaċċettawhx?

³ Meta taħseb dwar kif ix-​xogħol tal-​ippritkar tagħna jistaʼ jsalva l-​ħajjiet, x’aktarx li tħoss bżonn urġenti li tgħid lil oħrajn dwar l-​aħbar tajba. (Rum. 10:13, 14) Il-​Kelma t’Alla tgħid: “Meta ngħid lill-​ħażin: ‘Żgur se tmut,’ u hu fil-​fatt idur lura mid-​dnub tiegħu u jwettaq il-​ġustizzja u s-​sewwa, . . . hu żgur jibqaʼ jgħix. Ma jmutx. Ebda wieħed mid-​dnubiet li dineb bihom ma se jitfakkar kontrih.” (Eżek. 33:14-​16) Il-​Bibbja tgħid lil dawk li jgħallmu l-​messaġġ tas-​Saltna: “Issalva kemm lilek innifsek u kemm lil dawk li jisimgħuk.”—1 Tim. 4:16; Eżek. 3:17-​21.

4. L-​apostasija għala għamlet l-​ippritkar fl-​ewwel seklu urġenti?

⁴ Biex tapprezza għala Pawlu ħeġġeġ lil Timotju biex jipprietka b’urġenza, ikkunsidra ftit mill-​kuntest tal-​iskrittura tat-​tema. Naqraw: “Ippriedka l-​kelma u agħmel dan b’urġenza fi żmien favorevoli u fi żmien taʼ inkwiet, widdeb, ċanfar, ħeġġeġ, bil-​paċenzja  kollha u bl-​arti tat-​tagħlim. Għax ikun hemm perijodu taʼ żmien meta ma jittollerawx it-​tagħlim mimli saħħa, imma, fi qbil max-​xewqat tagħhom, jiġbru għalliema madwarhom biex jgħarrxulhom widnejhom; u jbiegħdu widnejhom mill-​verità.” (2 Tim. 4:2-​4) Ġesù kien bassar li kien se jkun hemm apostasija. (Mt. 13:24, 25, 38) Għalhekk, kien urġenti li Timotju ‘jipprietka l-​kelma’ saħansitra fil-​kongregazzjoni sabiex din l-​apostasija ma tattirax lill-​Kristjani u tqarraq bihom b’tagħlim falz. Ħajjithom kienet fil-​periklu. Xi ngħidu għal-​lum?

5, 6. Maʼ liema ideat popolari għandna mnejn niltaqgħu fil-​ministeru tagħna?

⁵ L-​apostasija mill-​qima vera issa kibret u nfirxet. (2 Tess. 2:3, 8) Liema tagħlim jgħarrax widnejn in-​nies illum? F’ħafna postijiet, l-​evoluzzjoni hi mgħallma bl-​istess sentimenti qawwijin li n-​nies għandhom għar-​reliġjon tagħhom. Avolja x-​xjenza s-​soltu tintuża biex tispjega u tappoġġa l-​evoluzzjoni, l-​evoluzzjoni saret kważi reliġjon sekulari, u teffettwa l-​mod kif in-​nies iqisu lil Alla u lil oħrajn. Tagħlim popolari ieħor hu li Alla mhuwiex interessat fina; b’hekk, aħna m’għandniex għalfejn inkunu interessati fih. Miljuni taʼ nies għala jagħtu widen għal dan it-​tagħlim li jwaqqafhom milli jkollhom relazzjoni m’Alla? Iż-​żewġ tagħlimiet għandhom l-​istess messaġġ bażiku, ‘Tistaʼ tagħmel li trid għax mhux se tintalab tagħti kont.’ Dan verament hu messaġġ li għarrax widnejn ħafna nies.—Aqra Salm 10:4.

⁶ Imma dan mhuwiex l-​uniku mod kif in-​nies qed jintgħarrxulhom widnejhom. Xi wħud li għadhom imorru l-​knisja jieħdu pjaċir meta dawk li jgħallmuhom jgħidulhom, ‘Tagħmel x’tagħmel, Alla xorta jħobbok.’ Il-​qassisin u l-​kappillani jgħarrxu widnejn oħrajn billi jikkonvinċuhom li ċ-​ċerimonji, il-​Quddies, il-​festi, u x-​xbihat għandhom il-​barka t’Alla. Dawk li jmorru l-​knisja għandhom mnejn ma jirrealizzawx kemm hi perikoluża s-​sitwazzjoni tagħhom. (Salm 115:4-​8) Però, jekk nistgħu nqajmuhom spiritwalment sabiex jifhmu l-​messaġġ veru tal-​Bibbja, jistgħu jibbenefikaw mis-​Saltna t’Alla.

L-​IPPRITKAR B’URĠENZA XI JFISSER?

7. Kif nistgħu nuru s-​sens t’urġenza tagħna?

⁷ Kirurgu tajjeb għandu jagħti attenzjoni sħiħa lil xogħlu għax hemm il-​ħajjiet fin-​nofs. Fil-​ministeru Kristjan tagħna, nistgħu nuru sens t’urġenza billi nikkonċentraw fuq xogħolna. Dan nistgħu nagħmluh billi naħsbu dwar liema kwistjonijiet, mistoqsijiet, jew informazzjoni tistaʼ tkun taʼ interess għan-​nies li niltaqgħu magħhom. Sens t’urġenza jistaʼ jqanqalna wkoll biex naġġustaw l-​iskeda tagħna ħalli nżuru lin-​nies meta jkunu iktar lesti li jagħtu widen għall-​messaġġ tagħna.—Rum. 1:15, 16; 1 Tim. 4:16.

8. Xi jfisser li jkollok sens t’urġenza?

⁸ Li jkollok sens t’urġenza jfisser ukoll li tagħmel il-​prijoritajiet. (Aqra Ġenesi 19:15.) Pereżempju, immaġina li wara li tirċievi r-​riżultat taʼ xi test mediku, it-​tabib isejjaħlek fl-​uffiċċju tiegħu u jgħidlek: “Għandek problema taʼ saħħa urġenti u m’għandekx iktar minn xahar żmien biex tagħmel xi ħaġa dwarha.” Int kieku x’tagħmel? X’aktarx li ma titlaqx tiġri mill-​uffiċċju tiegħu biex tagħmel xi ħaġa dwar is-​sitwazzjoni. Imma tismaʼ b’attenzjoni dak li hu jaħseb li għandek tagħmel, tmur id-​dar, u taħseb bis-​serjetà dwar il-​prijoritajiet tiegħek.

9. Għala nistgħu ngħidu li Pawlu pprietka b’urġenza waqt li kien Efesu?

⁹ Nistgħu nitgħallmu mis-​sens t’urġenza taʼ Pawlu billi naqraw dak li qal lill-​anzjani minn Efesu dwar l-​ippritkar tiegħu tal-​aħbar tajba fid-​distrett tal-​Asja.  (Aqra Atti 20:18-​21.) Milli jidher, mill-​ewwel ġurnata li wasal hemmhekk, hu ħadem bla heda biex iżur lin-​nies minn dar għal dar bl-​aħbar tajba. Barra minn hekk, għal sentejn kellu skeda regulari taʼ li “kuljum kien jagħti taħditiet fis-​sala taʼ l-​iskola taʼ Tirannu.” (Atti 19:1, 8-​10) B’mod ċar, is-​sens t’urġenza taʼ Pawlu influwenza r-​rutina tiegħu. Il-​parir biex nippritkaw bl-​urġenza mhuwiex intenzjonat biex iġegħelna nħossu li x-​xogħol tal-​ippritkar hu wisq għalina. Minkejja dan, ix-​xogħol tal-​ippritkar għandu jingħata prijorità f’ħajjitna.

10. Għala nistgħu nkunu ferħanin li l-​Istudenti tal-​Bibbja bdew jippritkaw b’urġenza?

¹⁰ Qabel l-​1914, grupp żgħir taʼ Studenti tal-​Bibbja bdew jippritkaw l-​aħbar tajba. L-​eżempju tagħhom jurina xi jfisser li jkollok sens t’urġenza. Għalkemm kienu biss ftit eluf, kienu jafu li kienu qed jgħixu fi żminijiet urġenti u bdew jippritkaw dwar is-​Saltna biż-​żelu. Kellhom prietki stampati f’mijiet taʼ gazzetti u wrew programm taʼ slajds bil-​kulur u bi stampi jiċċaqalqu msejjaħ il-​“Photo-​Drama of Creation.” Bix-​xogħol tal-​Istudenti tal-​Bibbja, miljuni taʼ nies semgħu dwar l-​aħbar tajba. Minħabba li l-​Istudenti tal-​Bibbja kellhom sens t’urġenza, kien possibbli għal ħafna minna li nisimgħu dwar is-​Saltna.—Aqra Salm 119:60.

OQGĦOD ATTENT LI MA TITLIFX IS-​SENS T’URĠENZA

11. Xi wħud kif tilfu s-​sens t’urġenza tagħhom?

¹¹ L-​aljenazzjonijiet jistgħu jwaqqfu lil dak li jkun milli jaħseb dwar kemm hu importanti x-​xogħol tal-​ippritkar. Satana juża din is-​sistema dinjija biex jaljenana mis-​servizz taʼ Ġeħova billi juża interessi persunali u affarijiet li mhumiex importanti biex jipprova jżommna beżlin. (1 Pt. 5:8; 1 Ġw. 2:15-​17) Xi nies li darba kienu jpoġġu s-​servizz taʼ Ġeħova l-​ewwel f’ħajjithom tilfu s-​sens t’urġenza tagħhom. Pereżempju, Dema kien Kristjan li ħadem spalla maʼ spalla mal-​appostlu Pawlu, imma iktar tard ġie aljenat mid-​dinja. Minflok ma kompla jinkuraġġixxi lil Pawlu matul żmien diffiċli, Dema abbandunah.—2 Tim. 4:10; Flm. 23, 24.

12. (a) Liema opportunità għandna issa? (b) Liema opportunitajiet se jkollna fil-​futur?

¹² Jekk irridu nżommu s-​sens t’urġenza, hemm bżonn li nirreżistu t-​tentazzjoni biex nagħmlu affarijiet li jaljenawna mix-​xogħol tal-​ippritkar tagħna. Għandna nirsistu biex ‘naqbdu qabda soda mal-​ħajja vera.’ (1 Tim. 6:18, 19) Int bla dubju temmen li l-​ħajja taʼ dejjem fuq l-​art taħt is-​Saltna t’Alla se tagħtina opportunitajiet li ma jispiċċaw qatt biex ingawdu attivitajiet interessanti. Imma għal issa, l-​opportunità biex ngħinu lil oħrajn jgħaddu ħajjin minn Armageddon hi unika għal żmienna.

13. Issa li sirna Kristjani, kif nistgħu nżommu s-​sens t’urġenza tagħna?

¹³ Peress li l-​biċċa l-​kbira min-​nies fid-​dinja taʼ madwarna ma jafux lil Ġeħova, x’jistaʼ jgħinna biex ma nitilfux is-​sens t’urġenza tagħna? Irridu niftakru li forsi kien hemm żmien meta aħna wkoll ma konniex nafu lil Alla u ma kellniex tama għall-​futur. Imma tgħallimna l-​verità dwar Ġeħova u Ġesù, u issa għandna l-​privileġġ li ngħallmu lil oħrajn dwar il-​verità. (Aqra Efesin 5:14.) Pawlu kiteb: “Oqogħdu attenti bis-​sħiħ li ma timxux bħal nies bla għaqal imma bħal nies għorrief, u użaw il-​ħin bl-​aħjar mod, għax il-​jiem huma ħżiena.” (Efes. 5:15, 16) F’din id-​dinja mill-​agħar, ejja ‘nużaw il-​ħin’ għal attivitajiet li jistgħu jżommuna mqajmin spiritwalment.

NGĦIXU FI ŻMIEN IMPORTANTI FERM

14-16. L-​ippritkar tas-​Saltna għala hu iktar urġenti issa minn qatt qabel?

¹⁴ Il-​ministeru Kristjan minn dejjem  kien urġenti. Imma issa hu iktar urġenti minn qatt qabel. Mill-​1914 ’l hawn, rajna ħafna ġrajjiet iseħħu fuq l-​art eżatt bħalma bassret il-​Bibbja. (Mt. 24:3-​51) Il-​bnedmin kollha huma mheddin li jinqerdu bħal qatt qabel. Avolja l-​iktar nazzjonijiet potenti fid-​dinja għamlu trattati taʼ paċi, xorta għad għandhom madwar 2,000 missila nukleari li jistgħu jiġu sparati lejn kwalunkwe post fuq l-​art. L-​awtoritajiet għamlu mijiet taʼ rapporti li fihom jistqarru li materjal nukleari “ntilef.” Huwa possibbli li t-​terroristi għandhom ftit minn dan il-​materjal nukleari? Xi nies jgħidu li l-​bnedmin kollha jistgħu faċilment jinqerdu bi gwerra li tinbeda minn terrorist. Imma mhijiex il-​gwerra biss li qed thedded l-​eżistenza tal-​umanità.

¹⁵ Rapport tal-​2009 dwar żmienna jgħid: “Il-​bidla fil-​klima hi l-​akbar theddida għas-​saħħa fid-​dinja.” (The Lancet u University College London.) Qal li l-​effetti tal-​bidla fil-​klima se jeffettwaw is-​saħħa tal-​biċċa l-​kbira min-​nies u jipperikolaw il-​ħajjiet taʼ biljuni taʼ nies. Ħafna postijiet jistgħu jinqerdu minħabba li l-​livell tal-​baħar qed jogħla, minħabba nuqqas taʼ xita, għargħar, mard, uragani, u gwerer minħabba nuqqas taʼ provvisti. Iva, il-​gwerer u d-​diżastri qed jheddu lill-​umanità.

¹⁶ Xi nies forsi jaħsbu li t-​theddida taʼ gwerra nukleari tistaʼ twassal għal ġrajjiet li se jwettqu l-​profezija taʼ Ġesù dwar l-​aħħar jiem. Imma l-​maġġuranza tan-​nies ma jifhmux it-​tifsir veru tal-​profezija taʼ Ġesù. Għal bosta snin, aħna rajna ġrajjiet li wrew li l-​preżenza taʼ Kristu hi reali u li t-​tmiem taʼ din is-​sistema hu fil-​qrib. (Mt. 24:3) Qatt qabel ma rajna daqshekk ġrajjiet mill-​profezija taʼ Ġesù. Hu l-​waqt biex in-​nies jistenbħu mill-​irqad spiritwali. Il-​ministeru tagħna jistaʼ jgħin biex iqajjimhom.

17, 18. (a) Il-​fatt li ngħixu fl-​aħħar jiem kif jeffettwana? (b) X’jistaʼ jqanqal lin-​nies juru interess fil-​messaġġ tas-​Saltna?

¹⁷ Fadlilna biss żmien qasir biex nagħtu prova taʼ mħabbitna għal Ġeħova u biex illestu x-​xogħol tal-​ippritkar li tana biex nagħmlu fl-​aħħar jiem. Dak li qal Pawlu lill-​Kristjani tal-​ewwel seklu f’Ruma hu saħansitra iktar importanti għalina llum: “Tafu f’liema żmien stabbilit qegħdin, li diġà waslet is-​siegħa biex tistenbħu mill-​irqad, għax issa s-​salvazzjoni tagħna hi eqreb minn meta sirna nemmnu.”—Rum. 13:11.

¹⁸ Il-​ġrajjiet imbassrin għall-​aħħar jiem jistgħu jagħmlu lil xi individwi konxji tal-​bżonn spiritwali tagħhom. Xi nies juru interess fil-​messaġġ tas-​Saltna meta jaħsbu dwar kif fallew il-​gvernijiet umani. Il-​gvernijiet ma rnexxilhomx iwaqqfu d-​diżastri ekonomiċi, it-​theddid nukleari, id-​delitti vjolenti, jew il-​qerda tal-​ambjent. Jerġaʼ oħrajn isiru konxji tal-​bżonn spiritwali tagħhom minħabba ġrajjiet fil-​familja tagħhom stess, bħal xi kriżi tas-​saħħa, divorzju, jew il-​mewt taʼ xi ħadd maħbub. Hekk kif nieħdu sehem fil-​ministeru, nistgħu ngħinu lil dawn l-​uħud.

IMQANQLIN MINN SENS T’URĠENZA

19, 20. Sens t’urġenza kif qanqal lil ħafna Kristjani biex ibiddlu ħajjithom?

¹⁹ Sens t’urġenza qanqal lil ħafna Kristjani biex ikabbru s-​sehem tagħhom fil-​ministeru. Pereżempju, koppja żagħżugħa mill-​Ekwador iddeċidew li jissimplifikaw ħajjithom wara li semgħu l-​programm tal-​jum t’assemblea speċjali tal-​2006 bit-​tema “Żomm Għajnejk Sempliċi.” Għamlu lista t’affarijiet li ma kellhomx bżonnhom, u fi żmien tliet xhur telqu mill-​appartament tagħhom bi tliet kmamar tas-​sodda u marru f’post b’kamra tas-​sodda waħda, biegħu xi affarijiet,  u nħelsu mid-​dejn li kellhom. Ma damux ma bdew jaqdu bħala pijunieri awżiljarji u aċċettaw is-​suġġeriment tal-​indokratur tas-​circuit biex imorru jaqdu maʼ kongregazzjoni li kellha bżonn akbar.

²⁰ Ħu fl-​Istati Uniti jikteb: “Meta jien u marti attendejna assemblea fl-​2006, konna ilna mgħammdin 30 sena. Hekk kif konna qed insuqu lura lejn id-​dar wara l-​programm, iddiskutejna kif stajna napplikaw il-​pariri li ngħataw dwar li nissimplifikaw ħajjitna. (Mt. 6:19-​22) Kellna tlett idjar, art, karozzi lussużi, dgħajsa, u karavan. Minħabba li ħassejna li konna ħlejna l-​ħin u l-​enerġija tagħna f’affarijiet materjali, iddeċidejna li nagħmlu l-​ministeru full-​time l-​mira tagħna. Fl-​2008, ngħaqadna maʼ bintna fis-​servizz taʼ pijunier regulari. X’ferħ esperjenzajna hekk kif ħdimna iktar mill-​qrib mal-​aħwa! Stajna naqdu fejn kien hemm bżonn akbar. Ukoll, l-​esperjenza taʼ li nagħmlu iktar għal Ġeħova ressqitna eqreb lejh. Xi ħaġa li tassew ngħożżu hi l-​privileġġ li naraw għajnejn in-​nies jixegħlu meta jisimgħu u jifhmu l-​verità tal-​Kelma t’Alla.”

21. Liema għarfien iġegħelna nippritkaw b’sens t’urġenza?

²¹ Aħna nafu li “jum il-​ġudizzju u l-​qerda taʼ nies bla devozzjoni lejn Alla” dalwaqt se jtemm din id-​dinja mill-​agħar. (2 Pt. 3:7) Minħabba l-​għarfien li għandna tal-​Kelma t’Alla, nippritkaw biż-​żelu dwar it-​tribulazzjoni l-​kbira li riesqa u d-​dinja l-​ġdida. Hekk kif ngħidu lin-​nies dwar tama vera għall-​futur, nibqgħu nuru sens kbir t’urġenza. Billi nagħmlu kemm nistgħu f’dan ix-​xogħol urġenti, nuru mħabba vera għal Alla u għan-​nies.

[Mistoqsijiet taʼ Studju]