“Ġeħova jaf kif jeħles mill-​provi lil dawk li huma devoti lejh.”—2 PT. 2:9.

GĦALA NISTGĦU NKUNU FIDUĊJUŻI LI ĠEĦOVA:

Jikkontrolla meta jiġru l-​affarijiet sabiex jitwettaq l-​iskop tiegħu?

Se jkun lest juża l-​qawwa li għandu biex isalva lill-​poplu tiegħu?

Jaf eżattament kif se jiġru l-​affarijiet matul it-​tribulazzjoni l-​kbira?

1. Id-​dinja kif se tkun matul ‘it-​tribulazzjoni l-​kbira’?

 IL-​QERDA tad-​dinja taʼ Satana se tibda ħabta u sabta, meta n-​nies ma jkunux qed jistennewha. (1 Tess. 5:2, 3) Matul “il-​jum il-​kbir taʼ Ġeħova,” id-​dinja se tkun mimlija konfużjoni. (Sof. 1:14-​17) Tant se jkun hemm sofferenza u niket li l-​Bibbja tiddeskrivi dan il-​perijodu bħala żmien taʼ “tribulazzjoni kbira li qatt ma kien hawn bħalha mill-​bidu tad-​dinja s’issa.”—Aqra Mattew 24:21, 22.

2, 3. (a) Il-​poplu t’Alla x’se jiffaċċja matul ‘it-​tribulazzjoni l-​kbira’? (b) X’se jsaħħaħ il-​fiduċja tagħna fl-​abbiltà taʼ Ġeħova li jsalva lill-​poplu tiegħu?

² Hekk kif ‘it-​tribulazzjoni l-​kbira’ tersaq lejn il-​quċċata tagħha, il-​poplu t’Alla se jkun il-​mira t’attakk sfrenat minn “Gog taʼ l-​art taʼ Magog.” Matul dan l-​attakk, “qawwa militari numeruża” se tiġi kontra l-​poplu t’Alla “bħal sħab li jiksi l-​pajjiż.” (Eżek. 38:2, 14-​16) L-​ebda organizzazzjoni umana mhi se tgħin lill-​poplu taʼ Ġeħova. Se jkollu bżonn jafda f’Alla għas-​salvazzjoni. Il-​poplu taʼ Ġeħova kif se jirreaġixxi meta l-​għedewwa tiegħu se jiġu biex jeqirduh?

³ Jekk int qaddej taʼ Ġeħova, għandek fidi li Ġeħova jistaʼ u se jsalva lill-​poplu tiegħu matul it-​tribulazzjoni l-​kbira? L-​appostlu Pietru kiteb: “Ġeħova jaf kif jeħles mill-​provi lil dawk li huma devoti lejh, imma jżomm lil dawk li huma inġusti għall-​qtugħ f’jum il-​ġudizzju.” (2 Pt. 2:9) Il-​fiduċja tagħna fl-​abbiltà taʼ Ġeħova li jsalva lill-​poplu tiegħu se tissaħħaħ jekk nimmeditaw fuq eżempji taʼ kif Ġeħova ħeles lill-​qaddejja tiegħu fil-​passat. Mela ejja nikkunsidraw tlieta minn dawn l-​eżempji.

SALVAT MINN DILLUVJU

4. X’kellu jsir qabel ma setaʼ jiġi d-​Dilluvju?

⁴ L-​ewwel, ikkunsidra r-​rakkont tad-​Dilluvju taʼ  żmien Noè. Kellhom isiru ċerti affarijiet qabel ma setaʼ jiġi d-​Dilluvju. Kellha tinbena arka enormi u fiha kellhom jiddaħħlu l-​annimali biex isalvaw ukoll. Ir-​rakkont tal-​Ġenesi ma jgħidx li Ġeħova stenna sakemm tinbena l-​arka biex jiddeċiedi meta kellu jkun hemm id-​Dilluvju. Ġeħova ma kellux għalfejn jinkwieta jekk l-​arka tkunx lesta fil-​ħin. Fil-​fatt, Alla ddeċieda meta kellu jibda d-​Dilluvju ħafna żmien qabel ma qal lil Noè biex jibni l-​arka. Kif nafuh dan?

5. (a) Ġeħova xi ddikjara f’​Ġenesi 6:3? (b) Dan id-​digriet meta ħareġ?

⁵ Il-​Bibbja tgħidilna li Ġeħova ħareġ digriet fis-​sema. Skont Ġenesi 6:3, hu qal: “L-​ispirtu tiegħi mhux se jaġixxi bil-​paċenzja mal-​bniedem għal żmien indefinit għax hu laħam ukoll. Għaldaqstant, jiemu se jkunu mija u għoxrin sena.” Din ma kinitx stqarrija rigward kemm se jgħixu n-​nies inġenerali. Kienet digriet ġudizzjarju li fih Ġeħova ddikjara meta kien se jnaddaf l-​art mill-​ħażen kollu. a Ladarba d-​Dilluvju beda fis-​sena 2370 Q.E.K., aħna nifhmu li Alla ħabbar li kellu jiġi d-​Dilluvju fis-​sena 2490  Q.E.K. F’dak iż-​żmien, Noè kellu 480 sena. (Ġen. 7:6) Xi 20 sena wara, fis-​sena 2470 Q.E.K., twieled l-​ewwel iben taʼ Noè. (Ġen. 5:32) Kien fadal madwar mitt sena biex jibda d-​Dilluvju, imma Ġeħova kien għadu ma qalx lil Noè liema rwol speċjali kien se jkollu biex isalva lir-​razza umana. Alla kemm stenna qabel ma qal lil Noè?

6. Ġeħova meta kkmanda lil Noè biex jibni l-​arka?

⁶ Milli jidher, Ġeħova stenna għaxriet taʼ snin qabel ma qal lil Noè x’kien se jagħmel. Fuq liema bażi naslu għal din il-​konklużjoni? Ir-​rakkont ispirat jindika li wlied Noè kienu diġà kibru u żżewġu meta Alla kkmanda lil Noè biex jibni l-​arka. Ġeħova qallu: “Jien nagħmel patt miegħek; u trid tidħol fl-​arka, int u wliedek u martek u n-​nisa taʼ wliedek miegħek.” (Ġen. 6:9-​18) Għalhekk, jistaʼ jkun li meta Noè ngħata l-​inkarigu biex jibni l-​arka, kien għad fadal biss xi 40 jew 50 sena għad-​Dilluvju.

7. (a) Noè u familtu kif urew il-​fidi? (b) Alla meta qal lil Noè li kellu jibda d-​Dilluvju?

⁷ Waqt li Noè u familtu kienu qed jibnu l-​arka, żgur li ħasbu dwar kif Alla kien se jwettaq l-​iskop tiegħu u dwar meta kien se jibda d-​Dilluvju. Imma minkejja li ma kinux jafu dawn id-​dettalji, huma wrew il-​fidi billi komplew jibnu l-​arka. Il-​Bibbja tgħid: “Noè għamel skond kulma kien ordnalu Alla. Għamel preċiż hekk.” (Ġen. 6:22) Fl-​aħħar, Ġeħova qal lil Noè li d-​Dilluvju kien se jibda fi żmien sebat ijiem. Dan ta biżżejjed ħin lil Noè u lil familtu biex jiġbru l-​annimali fl-​arka. Għalhekk, kollox kien lest meta nfetħu bibien is-​sema “fis-​sena sitt mija tal-​ħajja taʼ Noè, fit-​tieni xahar, fis-​sbatax tax-​xahar.”—Ġen. 7:1-​5, 11.

8. Ir-​rakkont tad-​Dilluvju kif jaċċertana li Ġeħova se jkun jaf meta għandu jsalva lill-​poplu tiegħu fit-​tmiem taʼ din is-​sistema?

⁸ Ir-​rakkont tad-​Dilluvju juri li Ġeħova dejjem ikun jaf l-​aħjar żmien u l-​aħjar mod kif isalva lill-​poplu tiegħu. Hekk kif nersqu eqreb lejn it-​tmiem taʼ din is-​sistema, nistgħu nkunu ċerti li l-​iskopijiet kollha taʼ Ġeħova se jitwettqu eżattament fil-​“jum u s-​siegħa” li hu ddeċieda.—Mt. 24:36; aqra Ħabakkuk 2:3.

 SALVATI ĦDEJN IL-​BAĦAR L-​AĦMAR

9, 10. Ġeħova kif uża lill-​poplu tiegħu biex jonsob lill-​armata Eġizzjana?

⁹ Mir-​rakkont tad-​Dilluvju tgħallimna li Ġeħova jikkontrolla meta jiġru l-​affarijiet sabiex jitwettaq l-​iskop tiegħu. It-​tieni eżempju li se nikkunsidraw juri li nistgħu nkunu fiduċjużi li Ġeħova se juża l-​qawwa bla limitu li għandu biex isalva lil niesu u jagħmel ċert li titwettaq ir-​rieda tiegħu. Naturalment, Ġeħova dejjem ikollu l-​abbiltà li jsalva lin-​nies tiegħu. Imma kultant iħallihom jiġu f’sitwazzjoni perikoluża sabiex jonsbu lill-​għedewwa tiegħu. Hekk ġara meta hu ħeles lill-​Iżraelin mill-​jasar fl-​Eġittu.

¹⁰ L-​Iżraelin li telqu mill-​Eġittu kienu madwar tliet miljun ruħ. Ġeħova inkariga lil Mosè biex imexxihom b’tali mod li ġiegħel lill-​Fargħun jaħseb li kienu mitlufin u konfużi. (Aqra Eżodu 14:1-​4.) Meta ra dan, il-​Fargħun mar warajhom bl-​armata tiegħu, u għalhekk l-​Iżraelin inqabdu bejn l-​armata u l-​Baħar l-​Aħmar. L-​Iżraelin donnhom ġew daharhom mal-​ħajt. (Eżo. 14:5-​10) Imma, fil-​fatt, l-​Iżraelin ma kienu fl-​ebda periklu. Għala le? Għax Ġeħova kien lest biex isalvahom.

11, 12. (a) Ġeħova kif għen lill-​Iżraelin? (b) X’kien ir-​riżultat taʼ dak li għamel Ġeħova, u dan x’jgħallimna dwar Ġeħova?

¹¹ “Il-​kolonna tas-​sħab” li kienet qed tmexxi lill-​Iżraelin qagħdet warajhom, u ma ħallietx lill-​armata Eġizzjana tersaq lejhom. Il-​kolonna ġabet id-​dlam fuq l-​Eġizzjani, imma lill-​Iżraelin tathom id-​dawl saħansitra bil-​lejl. (Aqra Eżodu 14:19, 20.) Imbagħad Ġeħova feraq il-​baħar permezz taʼ riħ qawwi mil-​Lvant u “biddel qiegħ il-​baħar f’art niexfa.” Mingħajr dubju, dan ħa ftit ħin mhux ħażin għax ir-​rakkont jgħid: “Sa fl-​aħħar, ulied Israel għaddew minn nofs il-​baħar fuq art niexfa.” L-​Iżraelin imxew ħafna iktar bil-​mod mill-​karrijiet tal-​gwerra tal-​armata Eġizzjana. Imma xorta waħda kien impossibbli li l-​Eġizzjani jilħqu lill-​Iżraelin  għax Ġeħova kien qed jiġġieled għall-​poplu tiegħu. Hu “tefaʼ lill-​Eġizzjani f’konfużjoni. U beda jaqlgħalhom ir-​roti minn mal-​karrijiet tagħhom, u b’hekk bdew isuquhom bit-​tbatija.”—Eżo. 14:21-​25.

¹² Meta l-​Iżraelin kollha kienu fis-​sigurtà fuq in-​naħa l-​oħra tal-​baħar, Ġeħova qal lil Mosè: “Midd idek fuq il-​baħar, sabiex l-​ilmijiet jerġgħu lura għal fuq l-​Eġizzjani, fuq il-​karrijiet tal-​gwerra tagħhom, u fuq is-​suldati tal-​kavallerija tagħhom.” Hekk kif is-​suldati pprovaw jaħarbu l-​ilmijiet li kienu ġejjin għal fuqhom, “Ġeħova tefaʼ lill-​Eġizzjani f’nofs il-​baħar.” Ma setgħux jaħarbu. “Lanqas wieħed minnhom ma tħalla.” (Eżo. 14:26-​28) B’hekk, Ġeħova wera li hu għandu l-​qawwa biex jeħles lill-​poplu tiegħu minn kwalunkwe sitwazzjoni.

XI WĦUD SALVAW MILL-​QERDA TAʼ ĠERUSALEMM

13. Ġesù ta liema istruzzjonijiet, u s-​segwaċi tiegħu x’għandhom mnejn ħasbu?

¹³ It-​tielet eżempju li se nikkunsidraw hu dak li ġara meta Ġerusalemm ġiet attakkata mill-​armata Rumana fl-​ewwel seklu. Dan l-​eżempju jenfasizza l-​fatt li Ġeħova jaf eżattament kif se jiġru l-​affarijiet biex jitwettaq l-​iskop tiegħu. Permezz taʼ Ġesù, Ġeħova ta istruzzjonijiet lill-​Kristjani li kienu qed jgħixu f’Ġerusalemm u fil-​Lhudija qabel il-​qerda taʼ Ġerusalemm fis-​sena 70 E.K. Ġesù qal: “Meta taraw wieqfa f’post qaddis il-​ħaġa moqżieża li ġġib ħerba u li tkellem dwarha l-​profeta Danjel . . . , imbagħad dawk li jkunu fil-​Lhudija ħa jibdew jaħarbu lejn il-​muntanji.” (Mt. 24:15, 16) Imma s-​segwaċi taʼ Ġesù kif kienu se jindunaw li din il-​profezija kienet qed titwettaq?

14. Liema affarijiet seħħew li wrew ċar it-​tifsir tal-​istruzzjonijiet taʼ Ġesù?

¹⁴ Hekk kif bdew iseħħu l-​ġrajjiet, it-​tifsir tal-​kliem taʼ Ġesù deher ċar. Fis-​sena 66 E.K., armati Rumani mmexxija minn Ċestju Gallu waslu Ġerusalemm biex iwaqqfu ribelljoni mil-​Lhud. Meta r-​ribelli Lhud, magħrufin bħala Zeloti, staħbew fit-​tempju, is-​suldati Rumani bdew iħaffru mina minn taħt il-​ħajt tat-​tempju. Dawk il-​Kristjani li ftakru fl-​istruzzjonijiet li tahom Ġesù kienu jafu xi jfisser dan kollu. Huma fehmu li l-​armata pagana li kienet qed iġġorr il-​bnadar idolatrużi barra l-​ħajt tat-​tempju kienet “il-​ħaġa moqżieża” wieqfa “f’post qaddis.” Dan kien il-​waqt biex is-​segwaċi taʼ Ġesù “jibdew jaħarbu lejn il-​muntanji.” Imma kif kienu se joħorġu minn belt imdawra bl-​għedewwa? Kienet se tiġri xi ħaġa mhix mistennija.

15, 16. (a) Ġesù ta liema istruzzjoni speċifika, u għala kien vitali li s-​segwaċi tiegħu jobduha? (b) Il-​ħelsien tagħna minn xiex se jiddependi?

¹⁵ Bla mistenni, Ċestju Gallu u  s-​suldati tiegħu telqu minn Ġerusalemm, u z-​Zeloti rħewlha għal warajhom. Issa li r-​Rumani u r-​ribelli Lhud kienu telqu mill-​belt, is-​segwaċi taʼ Ġesù kellhom iċ-​ċans jaħarbu. Ġesù kien qalilhom ċar u tond biex jitilqu mill-​belt minnufih u ma jiħdux affarijiet magħhom. (Aqra Mattew 24:17, 18.) Kien vitali li jobdu lil Ġesù u jitilqu mill-​ewwel. Għala? Għax fi ftit jiem, iz-​Zeloti marru lura u bdew iġiegħlu lin-​nies taʼ Ġerusalemm u tal-​Lhudija jingħaqdu fir-​ribelljoni. Diversi gruppi taʼ Lhud bdew jiġġieldu għall-​kontroll, u s-​sitwazzjoni fil-​belt malajr qalbet għall-​agħar. Beda jsir iktar u iktar diffiċli biex jitilqu minn Ġerusalemm. Meta r-​Rumani marru lura fis-​sena 70 E.K., kien impossibbli li wieħed jitlaq minn Ġerusalemm. (Lq. 19:43) Kull min baqaʼ fil-​belt inqabad hemm! Imma l-​Kristjani li obdew l-​istruzzjonijiet taʼ Ġesù u ħarbu lejn il-​muntanji kienu salvati. Huma raw b’għajnejhom stess li Ġeħova jaf kif isalva lill-​poplu tiegħu. Liema lezzjoni nistgħu nitgħallmu minn dan ir-​rakkont?

¹⁶ Hekk kif jibdew iseħħu l-​ġrajjiet matul it-​tribulazzjoni l-​kbira, il-​Kristjani se jkollhom bżonn jobdu l-​istruzzjonijiet mill-​Kelma t’Alla u mill-​organizzazzjoni tiegħu. Pereżempju, il-​kmand taʼ Ġesù biex “jibdew jaħarbu lejn il-​muntanji” japplika għalina llum ukoll. Aħna kif se naħarbu? Għadna ma nafux eżattament. b Madankollu, nistgħu nkunu żguri li Ġeħova se jurina b’mod ċar xi jfissru dawn l-​istruzzjonijiet meta jasal il-​waqt li nsegwuhom. Ladarba l-​ħelsien tagħna se jiddependi mill-​ubbidjenza, nagħmlu tajjeb li nistaqsu lilna nfusna: ‘Jien kif nirreaġixxi għall-​istruzzjonijiet li jagħti Ġeħova lin-​nies tiegħu llum? Nobdi mill-​ewwel jew noqgħod nitnikker?’—Ġak. 3:17.

IMSAĦĦIN GĦAL DAK LI HEMM JISTENNIENA

17. X’nitgħallmu mill-​profezija taʼ Ħabakkuk dwar l-​attakk taʼ Gog kontra l-​poplu t’Alla?

¹⁷ Issa ejja nkomplu nitkellmu dwar l-​attakk minn Gog li semmejna fil-​bidu. Bħal Eżekjel, il-​profeta Ħabakkuk tkellem dwar dan iż-​żmien. Hu qal: “Jien smajt, u ħassejt il-​ġewwieni jitqanqal; mal-​ħoss xofftejja triegħdu; għadmi beda jitħassar; u fis-​sitwazzjoni tiegħi ħassejtni aġitat, u b’hekk se nistenna bil-​kwiet il-​jum taʼ niket, għax ġej għand in-​nies, biex jattakkahom.” (Ħab. 3:16) Meta Ħabakkuk semaʼ li l-​għedewwa kienu ġejjin jattakkaw lill-​poplu t’Alla, ħass l-​istonku jingħafas, xofftejh bdew jitriegħdu, u ġismu ddgħajjef. Imma hu kien lest ‘jistenna bil-​kwiet’ il-​jum il-​kbir taʼ Ġeħova. Meta Gog u s-​segwaċi tiegħu jiġu biex jattakkaw lilna, aħna wkoll għandna mnejn nibżgħu. Imma jistaʼ jkollna l-​istess fiduċja li kellu Ħabakkuk u nkunu fiduċjużi li Ġeħova se jsalva lill-​poplu tiegħu.—Ħab. 3:18, 19.

18. (a) Għala m’għandniex għalfejn nibżgħu mill-​attakk li ġej? (b) X’se nikkunsidraw darb’oħra?

¹⁸ It-​tliet eżempji li kkunsidrajna juru li Ġeħova bla dubju jaf kif jeħles lill-​poplu tiegħu. L-​iskop tiegħu żgur mhux se jfalli; ir-​rebħa hi ċerta. Jekk irridu nifirħu bir-​rebħa kbira taʼ Ġeħova, jeħtieġ li nibqgħu leali sal-​aħħar. Illum, Ġeħova kif jgħinna nżommu l-​integrità tagħna? Dan hu s-​suġġett tal-​artiklu li jmiss.

[Noti ta’ taħt]

[Mistoqsijiet ta’ Studju]

[Stampa f’paġna 24]

Kienu l-​Iżraelin verament fil-​periklu mill-​armata tal-​Fargħun?