‘L-Iben Lest li Jirrivela lill-Missier’
“Ħadd ma jaf min hu l-Missier ħlief l-Iben, u dak li lilu l-Iben lest li jirrivelah.”—LQ. 10:22.
INT KIF TWIEĠEB?
Ġesù għala setaʼ jirrivela lil Missieru b’mod speċjali?
Ġesù kif irrivela min hu Missieru lil oħrajn?
B’liema modi tistaʼ timita lil Ġesù u tirrivela lill-Missier?
1, 2. Ħafna nies liema mistoqsija jsibu diffiċli biex iwieġbu, u għala?
‘MIN hu Alla?ʼ Din il-mistoqsija ħafna nies isibuha diffiċli ferm biex iwiġbuha. Pereżempju, il-biċċa l-kbira minn dawk li jgħidu li huma Kristjani jemmnu li Alla huwa Trinità, imma jgħidu li dan it-tagħlim hu impossibbli biex tifhmu. Awtur li hu wkoll membru tal-kleru kiteb li t-tagħlim tat-Trinità ma jistax jiġi spjegat għax hemm xi affarijiet li l-bniedem mhuwiex kapaċi jifhimhom. Oħrajn jemmnu fl-evoluzzjoni. Huma jgħidu li Alla ma jeżistix u li l-affarijiet sbieħ kollha li naraw fil-ħolqien ġew b’kumbinazzjoni. Charles Darwin ma ċaħadx li Alla jeżisti. Hu qal li l-bnedmin m’għandhomx l-abbiltà li jifhmu għalkollox is-suġġett dwar Alla.
2 Hu x’inhu t-twemmin tagħhom, il-maġġoranza tan-nies għandhom diversi mistoqsijiet dwar Alla. Madankollu, meta ma jirnexxilhomx jaslu għal konklużjoni sodisfaċenti, eventwalment ħafna minnhom jaqtgħu qalbhom u ma jibqgħux ifittxu lil Alla. Tabilħaqq, Satana “għema l-imħuħ taʼ dawk li ma jemmnux.” (2 Kor. 4:4) Mhux taʼ b’xejn li l-biċċa l-kbira tal-umanità huma mħawdin u ma jafux il-verità dwar il-Missier, il-Ħallieq tal-univers!—Is. 45:18.
3. (a) Min irrivelalna lill-Ħallieq? (b) Liema mistoqsijiet se nikkunsidraw?
3 Però, huwa vitali li n-nies jitgħallmu l-verità dwar Alla. Għala? Għax dawk biss li jsejħu “isem Ġeħova” se jiġu salvati. (Rum. 10:13) Li ssejjaħ isem Alla jfisser li ssir taf lil Ġeħova bħala persuna. Ġesù Kristu għallem lid-dixxipli tiegħu dan l-għarfien vitali. Hu rrivelalhom ’il-Missier. (Aqra Luqa 10:22.) Ġesù għala setaʼ jirrivela lill-Missier b’mod li ebda bniedem ieħor ma setaʼ? Ġesù kif għamlu dan? U kif nistgħu nimitaw lil Ġesù f’li nirrivelaw min hu l-Missier lil oħrajn? Ħalli nikkunsidraw dawn il-mistoqsijiet.
ĠESÙ KRISTU—KWALIFIKAT B’MOD UNIKU
4, 5. Ġesù għala setaʼ jirrivela lil Missieru b’mod speċjali?
4 Ġesù kien kwalifikat b’mod speċjali biex jirrivela ’l Missieru. Għala? Għax qabel ma nħalqet kwalunkwe ħaġa ħajja oħra, Ġesù għex fis-sema bħala spirtu. Hu kien “l-Iben uniġenitu t’Alla.” (Ġw. 1:14; 3:18) X’pożizzjoni unika! Qabel ma sar il-ħolqien l-ieħor kollu, Ġesù kien waħdu maʼ Missieru u gawda l-attenzjoni sħiħa Tiegħu. Peress li kkomunikaw flimkien għal eluf kbar taʼ snin, Ġesù tgħallem ħafna dwar Missieru u l-kwalitajiet tiegħu. Hekk kif ir-relazzjoni taʼ bejniethom baqgħet tissaħħaħ, l-imħabba u l-affezzjoni tagħhom lejn xulxin żdiedu. (Ġw. 5:20; 14:31) Min jaf Ġesù kemm tgħallem dwar il-personalità taʼ Missieru!—Aqra Kolossin 1:15-17.
5 Il-Missier għażel lill-Iben biex ikun ir-rappreżentant tiegħu, biex jitkellem f’ismu bħala “l-Kelma t’Alla.” (Riv. 19:13) B’hekk, Ġesù biss ngħata l-inkarigu speċjali li jirrivela min hu l-Missier lil ħaddieħor. Hu għalhekk li Ġwanni kiteb li Ġesù, “il-Kelma,” huwa “fi ħdan il-Missier.” (Ġw. 1:1, 18) Jistaʼ jkun li Ġwanni kellu f’moħħu d-drawwa li kienet komuni waqt ħin l-ikel. Il-mistidnin kienu jitpoġġew maġenb xulxin biex ikun jistaʼ jkollhom konversazzjoni faċilment. Bl-istess mod, l-Iben kien “fi ħdan” Missieru u setaʼ jkollu konversazzjonijiet fil-fond miegħu.
6, 7. Ir-relazzjoni bejn il-Missier u l-Iben kif kompliet tiżviluppa?
6 Ir-relazzjoni bejn il-Missier u l-Iben kompliet tiżviluppa. Alla ‘kien jgħożż [lill-Iben] b’mod speċjali jum wara l-ieħor.’ (Aqra Proverbji 8:22, 23, 30, 31.) Ovvjament, ir-rabta taʼ bejniethom issaħħet hekk kif it-tnejn li huma ħadmu flimkien u l-Iben tgħallem jimita l-kwalitajiet taʼ Missieru. Meta ġew maħluqin ħlejjaq intelliġenti oħrajn, l-Iben ra kif Ġeħova ttratta maʼ kull wieħed minnhom, u l-imħabba u r-rispett lejn Missieru komplew jikbru.
7 Iktar tard, Satana ħadha kontra d-dritt li Ġeħova jaħkem. Dan ta lill-Iben l-opportunità biex jitgħallem kif Ġeħova kien se juri l-imħabba, il-ġustizzja, l-għerf, u l-qawwa f’sitwazzjoni diffiċli. Dan għen lil Ġesù jkun lest għad-diffikultajiet li hu nnifsu kien se jiffaċċja fil-ministeru tiegħu fuq l-art.—Ġw. 5:19.
8. Ir-rakkonti tal-Evanġelji kif jgħinuna nitgħallmu dwar il-kwalitajiet tal-Missier?
8 Minħabba r-relazzjoni tiegħu mill-qrib maʼ Ġeħova, l-Iben setaʼ jirrivela ’l-Missier b’iktar dettall minn kwalunkwe persuna oħra. L-aħjar mod biex nitgħallmu dwar il-Missier huwa billi nsiru nafu x’għallem u x’għamel l-Iben uniġenitu tiegħu. Biex nagħtu eżempju, nistgħu aħna nifhmu bis-sħiħ xi tfisser il-kelma “mħabba” billi sempliċement naqraw id-definizzjoni tagħha f’dizzjunarju? Diffiċli. Meta nirriflettu fuq ir-rakkonti ħajjin tal-kittieba tal-Evanġelji dwar il-ministeru taʼ Ġesù u l-mod kif ħa ħsieb lil oħrajn, niksbu ħafna dehen mill-istqarrija: “Alla hu mħabba.” (1 Ġw. 4:8, 16) L-istess hu minnu dwar il-kwalitajiet l-oħrajn t’Alla li Ġesù rrivela lid-dixxipli tiegħu meta kien fuq l-art.
KIF ĠESÙ RRIVELA LIL MISSIERU
9. (a) Ġesù b’liema żewġ modi rrivela min hu Missieru lid-dixxipli tiegħu? (b) Agħti eżempju li juri kif Ġesù rrivela ’l Missieru fit-tagħlim tiegħu.
9 Ġesù kif irrivela min hu Missieru lid-dixxipli tiegħu u lil dawk li iktar tard saru dixxipli? Hu għamel dan b’żewġ modi: bit-tagħlim u bil-kondotta tiegħu. Ejja l-ewwel nikkunsidraw it-tagħlim taʼ Ġesù. Minn dak li Ġesù għallem lis-segwaċi tiegħu nitgħallmu dwar il-mogħdijiet, il-ħsibijiet, u s-sentimenti taʼ Missieru. Pereżempju, Ġesù xebbah lil Missieru maʼ sid taʼ merħla nagħaġ. Nagħġa waħda tintilef u peress li jimpurtah minn kull waħda minnhom, is-sid jitlaq lill-merħla biex imur ifittex lin-nagħġa l-mitlufa. Ġesù qal li meta hu jsib lin-nagħġa l-mitlufa “jifraħ biha iktar milli bid-disgħa u disgħin li ma ntilfux.” Ġesù għala uża din it-tixbiha? Hu spjega: “Bl-istess mod, Missieri li hu fis-sema ma jridx li jinqered wieħed minn dawn iċ-ċkejknin.” (Mt. 18:12-14) X’tistaʼ titgħallem dwar Ġeħova minn din it-tixbiha? Li anke jekk xi drabi tħossok ma tiswa għal xejn u minsi, Missierek tas-sema jinteressah u jimpurtah minnek. F’għajnejh, inti “wieħed minn dawn iċ-ċkejknin.”
10. Ġesù kif irrivela lil Missieru bil-kondotta tiegħu stess?
10 It-tieni mod kif Ġesù rrivela min hu Missieru lid-dixxipli tiegħu kien bil-kondotta tiegħu. Għalhekk, meta l-appostlu Filippu talab lil Ġesù: “Urina l-Missier,” Ġesù bir-raġun setaʼ jgħid: “Min ra lili ra wkoll lill-Missier.” (Ġw. 14:8, 9) Ikkunsidra xi eżempji taʼ kif Ġesù wera l-kwalitajiet taʼ Missieru. Meta raġel bil-ġdiem talab lil Ġesù bil-ħniena biex ifejqu, Ġesù mess lir-raġel li kien “mimli ġdiem” u qallu: “Irrid. Indaf.” Wara li ġie mfejjaq, ir-raġel kien jaf li kien Ġeħova li ta lil Ġesù l-qawwa biex ifejqu. (Lq. 5:12, 13) Ukoll, meta miet Lazzru, id-dixxipli żgur li ħassew il-mogħdrija tal-Missier meta Ġesù “karab fl-ispirtu tiegħu u tnikket” u “qabiżlu d-dmugħ.” Għalkemm Ġesù kien jaf li kien se jirxoxta lil Lazzru, hu ħass l-istess swied taʼ qalb li ħassew il-qraba u l-ħbieb taʼ Lazzru. (Ġw. 11:32-35, 40-43) Bla dubju, int għandek ir-rakkonti favoriti tiegħek mill-Bibbja li jgħinuk tara l-ħniena li juri l-Missier.
11. (a) Meta Ġesù naddaf it-tempju, xi rrivela dwar Missieru? (b) Dan għala jfarraġna?
11 Meta taqra r-rakkont taʼ kif Ġesù naddaf it-tempju, x’titgħallem? Ġib quddiem għajnejk x’ġara: Ġesù għamel frosta tal-ħbula u keċċa ’l barra lill-bejjiegħa tal-baqar u n-nagħaġ. Xerred il-muniti tas-sarrafa u qalbilhom l-imwejjed. (Ġw. 2:13-17) Din l-azzjoni qawwija fakkret lid-dixxipli fil-profezija li kiteb is-Sultan David: “Iż-żelu għal darek kielni.” (Salm 69:9) Dak li Ġesù għamel wera x-xewqa kbira li kellu biex jiddefendi l-qima vera. Meta taqra dan ir-rakkont, tara int il-personalità taʼ Ġeħova f’Ġesù? Dan ifakkarna li Alla mhux biss għandu l-qawwa bla limitu biex jiknes il-ħażen minn fuq wiċċ l-art, imma wkoll ix-xewqa kbira li jagħmel dan. Immaġina kif iħossu Ġeħova meta jara l-ħażen madwar l-art kollha! Il-mod kif iħossuhom Ġeħova u Ġesù dwar is-sitwazzjoni jagħtina faraġ liema bħalu meta nsofru inġustizzji.
12, 13. X’tistaʼ titgħallem dwar Ġeħova mill-mod kif Ġesù ttratta lid-dixxipli tiegħu?
12 Ejja nikkunsidraw eżempju ieħor—il-mod kif Ġesù ttratta lid-dixxipli tiegħu. Huma baqgħu jilmentaw dwar min kien l-ikbar fosthom. (Mk. 9:33-35; 10:43; Lq. 9:46) Mill-esperjenza twila tiegħu mal-Missier, Ġesù kien jaf kif Ġeħova jħossu rigward il-kburija. (2 Sam. 22:28; Salm 138:6) Iktar minn hekk, Ġesù kien ra lil Satana x-Xitan juri tendenzi bħal dawn. Dan l-individwu egoist kien jimpurtah ħafna mill-prominenza u l-pożizzjoni. Għalhekk, min jaf kemm ħassu dispjaċut Ġesù meta ra li din l-attitudni ambizzjuża kompliet tintwera fost id-dixxipli li kien ħarreġ. Kienet saħansitra evidenti fost dawk li kien għażel bħala appostli! Huma wrew attitudni ambizzjuża proprju sal-aħħar jum tal-ħajja taʼ Ġesù fuq l-art. (Lq. 22:24-27) Però, Ġesù baqaʼ jikkoreġihom b’qalb tajba, bla ma qatt qataʼ qalbu li maż-żmien se jitgħallmu jimitaw l-istess attitudni umli tiegħu.—Flp. 2:5-8.
13 Tistaʼ int tara l-personalità taʼ Ġeħova mill-mod kif Ġesù imita lil Missieru u kif bil-paċenzja kkoreġa l-attitudni ħażina tad-dixxipli tiegħu? Titgħallem int dwar il-Missier minn dak li qal u għamel Ġesù? Missieru ma jabbandunax lin-nies tiegħu minkejja li spiss jiżbaljaw. L-għarfien dwar il-kwalitajiet t’Alla jinkuraġġina biex nindmu u nitolbu għall-maħfra taʼ Ġeħova meta niżbaljaw.
L-IBEN KIEN LEST LI JIRRIVELA LIL MISSIERU
14. Ġesù kif wera li kien lest li jirrivela lil Missieru?
14 Ħafna dittaturi jipprovaw iżommu lin-nies taħt il-kontroll tagħhom u fil-għama billi jaħbulhom xi informazzjoni. B’kuntrast maʼ dan, Ġesù kien lest li jaqsam l-informazzjoni li kellu dwar il-Missier billi jirrivelah bis-sħiħ lil oħrajn. (Aqra Mattew 11:27.) Iktar minn hekk, Ġesù ta lid-dixxipli tiegħu ‘l-kapaċità intellettwali biex [ikunu jistgħu] jiksbu l-għarfien dwar l-Alla l-veru,’ Ġeħova. (1 Ġw. 5:20) Dan xi jfisser? Li Ġesù għen lis-segwaċi tiegħu jifhmu dak li għallem dwar il-Missier. Hu ma ħebiex lil Missieru fit-tagħlim tat-Trinità—tagħlim stramb li ħadd ma setaʼ jifhem.
15. Ġesù għala ma qalx lid-dixxipli tiegħu kulma kien jaf dwar Missieru?
15 Irrivela Ġesù kulma kien jaf dwar Missieru? Le, hu wera l-għerf billi żamm lura milli jgħid kollox lid-dixxipli tiegħu. (Aqra Ġwanni 16:12.) Għala? Għax dak iż-żmien ma kinux ‘jifilħu’ għal dan l-għarfien. Però, bħalma spjega Ġesù, kien se jiġi rrivelat ħafna iktar għarfien meta jasal “l-ajjutant,” l-ispirtu qaddis li kien se jiggwidahom “lejn il-verità kollha.” (Ġw. 16:7, 13) Sewwasew bħalma ġenituri għaqlin forsi jżommu lura xi informazzjoni minn uliedhom sakemm jikbru biżżejjed biex jifhmuha, hekk ukoll Ġesù stenna sakemm id-dixxipli jkunu f’qagħda li jifhmu ċerti fatti dwar il-Missier. B’qalb tajba, Ġesù żamm f’moħħu l-limitazzjonijiet tagħhom.
IMITA LIL ĠESÙ—GĦIN LIN-NIES ISIRU JAFU LIL ĠEĦOVA
16, 17. Int għala qiegħed f’pożizzjoni li tirrivela min hu l-Missier lil oħrajn?
16 Meta ssir taf lil xi ħadd sew u tapprezza l-imħabba li juri, ma titqanqalx tgħid lil ħaddieħor dwaru? Meta kien fuq l-art, Ġesù tkellem dwar Missieru. (Ġw. 17:25, 26) Nistgħu aħna nimitawh billi nirrivelaw min hu Ġeħova lin-nies?
17 Bħalma rajna, Ġesù kellu ħafna iktar għarfien dwar Missieru milli kellu ħaddieħor. Madankollu, hu kien lest li jaqsam xi għarfien, saħansitra billi ta lis-segwaċi tiegħu l-abbiltà li jifhmu xi aspetti iktar profondi tal-personalità t’Alla. Ġesù għenna nsiru nafu lil Missierna b’mod li l-maġġuranza tan-nies illum ma jafuhx. Kemm aħna grati li permezz tat-tagħlim u l-kondotta tiegħu, Ġesù kien lest li jirrivelalna lil Missieru! Fil-fatt, aħna onorati li nafu lill-Missier. (Ġer. 9:24; 1 Kor. 1:31) Hekk kif stinkajna biex nersqu qrib lejn Ġeħova, hu resaq qrib lejna. (Ġak. 4:8) Għalhekk, aħna qegħdin f’pożizzjoni li naqsmu l-għarfien li għandna m’oħrajn. Kif nistgħu nagħmlu dan?
18, 19. B’liema modi tistaʼ tirrivela min hu l-Missier lil oħrajn? Spjega.
18 Jeħtieġ li nimitaw lil Ġesù billi nirrivelaw lill-Missier bi kliemna u b’għemilna. Żomm f’moħħok li ħafna wħud li niltaqgħu magħhom fis-servizz tal-għalqa ma jafux min hu Alla. Għandu mnejn ikollhom ideat żbaljati dwaru għax ikunu ġew mgħallmin tagħlim falz. Aħna nistgħu naqsmu magħhom dak li nafu dwar isem Alla, l-iskop tiegħu għall-bnedmin, u l-personalità tiegħu kif jintwerew fil-Bibbja. Iktar minn hekk, nistgħu niddiskutu maʼ sħabna fit-twemmin xi rakkonti mill-Bibbja li jirrivelaw il-personalità t’Alla b’mod li ma konniex nifhmu qabel. B’hekk, ikunu jistgħu jibbenefikaw huma wkoll.
19 Għandna nimitaw lil Ġesù u nirrivelaw lill-Missier bil-kondotta tagħna. Meta n-nies jaraw l-imħabba taʼ Kristu fl-aġir tagħna, huma jinġibdu kemm lejn il-Missier kif ukoll lejn Ġesù. (Efes. 5:1, 2) L-appostlu Pawlu inkuraġġiena biex ‘nimitaw lilu, bħalma hu imita lil Kristu.’ (1 Kor. 11:1) Xi privileġġ mill-isbaħ għandna li ngħinu lin-nies isiru jafu lil Ġeħova bil-mod kif inġibu ruħna! Jalla lkoll kemm aħna nkomplu nimitaw lil Ġesù billi nirrivelaw min hu l-Missier lil oħrajn.
[Mistoqsijiet ta’ Studju]