Żomm Ħarsa Pożittiva Meta Tiffaċċja Problemi fiż-Żwieġ
“Lill-miżżewġin nagħtihom l-istruzzjoni, madankollu mhux jien imma l-Mulej.”—1 KOR. 7:10.
TISTAʼ TISPJEGA?
Alla f’liema sens jgħaqqad flimkien lill-koppji miżżewġin?
L-anzjani kif jistgħu jgħinu lill-Kristjani li għandhom il-problemi fiż-żwieġ?
Kif għandna nħarsu lejn iż-żwieġ?
1. Il-Kristjani kif iqisuh iż-żwieġ, u għala?
META l-Kristjani jiżżewġu, jagħmlu wegħda quddiem Alla—responsabbiltà li m’għandhiex tittieħed ħafif ħafif. (Ekk. 5:4-6) Ġeħova hu l-Ħallieq taż-żwieġ, u għalhekk hu “għaqqad flimkien” lill-koppji miżżewġin. (Mk. 10:9) Koppji miżżewġin huma magħqudin flimkien ikunu xi jkunu l-liġijiet tal-pajjiż. Qaddejja taʼ Ġeħova għandhom iħarsu lejn iż-żwieġ bħala arranġament li jgħaqqad b’mod permanenti, kemm jekk kienu l-aduraturi tiegħu meta żżewġu u kemm jekk le.
2. Liema mistoqsijiet se niddiskutu f’dan l-artiklu?
2 Żwieġ taʼ suċċess jistaʼ jwassal għal ferħ kbir. Imma x’nistgħu nagħmlu jekk m’aħniex ferħanin fiż-żwieġ tagħna? Jistaʼ jissaħħaħ żwieġ bħal dan? X’għajnuna hemm disponibbli għal dawk il-koppji li m’għandhomx paċi fiż-żwieġ tagħhom?
SE JKUN TAʼ FERĦ JEW TAʼ QSIM IL-QALB?
3, 4. X’jistaʼ jiġri jekk nieħdu deċiżjoni mhix għaqlija meta niġu biex nagħżlu sieħeb jew sieħba fiż-żwieġ?
3 Meta żwieġ taʼ Kristjan jirnexxi, dan ikun sors taʼ ferħ u jonora lil Ġeħova. Imma jekk żwieġ ma jirnexxix jistaʼ jikkaġuna ħafna iktar minn niket profond. Kristjan mhux miżżewweġ li jsegwi l-gwida t’Alla se jkun jistaʼ jibda ż-żwieġ bl-aħjar mod. Min-naħa l-oħra, individwu li jieħu deċiżjoni mhix għaqlija meta jiġi biex jagħżel sieħeb jew sieħba jistaʼ jħossu frustrat u mnikket. Pereżempju, żagħżugħ u żagħżugħa jibdew joħorġu flimkien meta jkunu għadhom mhux lesti għar-responsabbiltajiet tal-ħajja miżżewġa. Oħrajn isibu sieħeb jew sieħba fuq l-Internet, jiżżewġu malajr, u ma jdumux ma jsibu ruħhom fi żwieġ bla ferħ. Jerġaʼ oħrajn jikkommettu dnub serju waqt l-għerusija, jiżżewġu xorta waħda, u jibdew il-ħajja miżżewġa bi ftit li xejn rispett lejn xulxin.
4 Xi Kristjani ma jiżżewġux “biss fil-Mulej” u mbagħad ibatu l-konsegwenzi li spiss ikunu taʼ wġigħ għax is-sieħeb jew is-sieħba tagħhom mhijiex qaddejja taʼ Ġeħova. (1 Kor. 7:39) Jekk tinsab f’din is-sitwazzjoni, itlob għall-maħfra u l-għajnuna t’Alla. Hu ma jneħħix id-diffikultajiet li ġew minħabba żbalji li ħadt fil-passat, imma jekk tkun niedem, Ġeħova jistaʼ jgħinek tissaporti. (Salm 130:1-4) Għalhekk, agħmel l-almu tiegħek biex togħġob lil Alla issa u għal dejjem, u “l-ferħ taʼ Ġeħova” se jsaħħek.—Neħ. 8:10.
META ŻWIEĠ IKUN F’PERIKLU
5. X’tip taʼ ħsib għandu jiġi evitat fi żwieġ mhux hieni?
5 Dawk li jesperjenzaw qsim il-qalb fiż-żwieġ tagħhom għandhom mnejn jaħsbu: ‘Tassew irrid insalvah iż-żwieġ tiegħi? Forsi nkun iktar ferħana jekk niżżewweġ lil xi ħaddieħor!’ Forsi joħolmu dwar li jitilqu lis-sieħeb tagħhom u jaħsbu: ‘Mhux li kien neħles minnu! Tgħid inġib divorzju? Anke jekk ma nistax inġib divorzju Skritturali, nistaʼ nissepara minn mar-raġel u nerġaʼ nibda ngawdi ħajti.’ Il-Kristjani għandhom jagħmlu l-aħjar tagħhom fis-sitwazzjoni li jinsabu fiha u jsegwu l-gwida t’Alla minflok ma joqogħdu jaħsbu b’dan il-mod u joħolmu dwar kemm setgħet kienet differenti ħajjithom.
6. Xi jfisser kliem Ġesù f’Mattew 19:9?
6 Kieku Kristjan kellu jġib divorzju jistaʼ jkun li ma jkunx ħieles skont l-Iskrittura biex jerġaʼ jiżżewweġ. Ġesù qal: “Kulmin jiddivorzja lil martu, ħlief minħabba ż-żína, u jiżżewweġ oħra jagħmel adulterju.” (Mt. 19:9) Hawnhekk, il-kelma “żína” tinkludi adulterju u dnubiet sesswali serji oħrajn. Hu vitali li Kristjan jitlob lil Alla għall-gwida jekk qed jaħseb dwar li jġib divorzju meta la hu u lanqas martu ma tkun ikkommettiet iż-żína.
7. X’jistgħu jaħsbu xi nies jekk ifalli ż-żwieġ taʼ żewġ Kristjani?
7 Meta żwieġ ifalli, dan jistaʼ juri li r-relazzjoni tal-persuna m’Alla hi dgħajfa. L-appostlu Pawlu qajjem din il-mistoqsija serja: “Jekk raġel ma jafx jippresiedi fuq dawk taʼ daru stess, kif se jieħu ħsieb il-kongregazzjoni t’Alla?” (1 Tim. 3:5) Infatti, meta ż-żewġ imseħbin jgħidu li huma Kristjani u ż-żwieġ tagħhom ifalli, xi nies jistgħu jaħsbu li l-koppja tgħid ħaġa imma tagħmel oħra.—Rum. 2:21-24.
8. X’bilfors li hemm ħażin jekk koppja Kristjana tiddeċiedi li tissepara jew tiddivorzja?
8 Meta mseħbin fiż-żwieġ li huma mgħammdin jippjanaw li jisseparaw jew jiddivorzjaw għal raġunijiet mhux Skritturali, bilfors li jkun hemm xi ħaġa ħażina spiritwalment f’ħajjithom. Jistaʼ jkun li jew waħda minnhom jew it-tnejn li huma ma jkunux qed japplikaw il-prinċipji Bibliċi. Jekk it-tnejn ‘jafdaw f’Ġeħova b’qalbhom kollha’ għandhom ikunu kapaċi jsalvaw iż-żwieġ tagħhom.—Aqra Proverbji 3:5, 6.
9. Xi Kristjani kif ġew premjati talli baqgħu mas-sieħeb jew mas-sieħba tagħhom?
9 Ħafna żwiġijiet li donnhom kienu se jfallu, maż-żmien urew li rnexxew ħafna. Kristjani li ma jaqtgħux qalbhom malajr minn żwieġ diffiċli spiss jiġu premjati. Ikkunsidra x’jistaʼ jiġri meta r-raġel ma jkunx tal-istess twemmin. L-appostlu Pietru kiteb: “Intom in-nisa, kunu sottomessi lejn żwieġkom, sabiex, jekk xi wħud ma jkunux ubbidjenti lejn il-kelma, dawn jintrebħu mingħajr ebda kelma permezz tal-kondotta tan-nisa tagħhom, għax ikunu raw b’għajnejhom stess il-kondotta safja tagħkom flimkien mar-rispett profond.” (1 Pt. 3:1, 2) Iva, minħabba l-kondotta mill-aħjar taʼ martu, raġel li ma jkunx tal-istess twemmin jistaʼ jaċċetta l-verità! Kristjani li jsalvaw iż-żwieġ tagħhom jonoraw lil Alla, u b’hekk jitbierku r-raġel, il-mara, u t-tfal li jistaʼ jkollhom.
10, 11. Liema problemi mhux mistennijin jistgħu jinqalgħu fi żwieġ, imma Kristjan dwar xiex jistaʼ jkun ċert?
10 Meta jiżżewġu, il-maġġoranza tal-Kristjani jagħżlu Kristjan mgħammed ieħor biex ikun is-sieħeb tagħhom għax iridu jogħġbu lil Ġeħova. Anke meta jagħmlu hekk, iċ-ċirkustanzi jistgħu jinbidlu b’tali mod li ma stennewx. Pereżempju, raġel jew mara miżżewġa jistaʼ jibda jkollha problemi emozzjonali serji. Jew sieħeb jistaʼ jieqaf jipprietka u jsir pubblikatur inattiv. Ġrat xi ħaġa simili lil Linda, a pubblikatriċi żeluża u omm kollha mħabba. Ma setgħetx temmen hekk kif żewġha beda jagħmel affarijiet ħżiena. Peress li ma nidimx minn dak li għamel, kellu jiġi maqtugħ mis-sħubija. Kristjani li jinsabu f’sitwazzjonijiet simili għandhom mnejn iħossu li ż-żwieġ tagħhom hu bla tama. X’għandhom jagħmlu?
11 Għandek mnejn tistaqsi: ‘Bilfors irrid nibqaʼ nipprova nsalva ż-żwieġ tiegħi, jiġri x’jiġri?’ Ħadd ma jistaʼ, jew m’għandu, jieħu deċiżjoni bħal din għalik. Però, hemm raġunijiet tajbin għala m’għandekx taqtaʼ qalbek minn żwieġ li jkun jidher bla tama. Il-Kristjani li jissaportu żwieġ diffiċli, għax il-kuxjenza tagħhom ma tħallihomx jitilqu lil żewġhom, huma prezzjużi ferm għal Alla. (Aqra l-1 Pietru 2:19, 20.) Permezz tal-Kelma u tal-ispirtu tiegħu, Ġeħova se jgħin lill-Kristjani jekk jagħmlu kulma jistgħu biex isaħħu ż-żwieġ tagħhom.
HUMA LESTI JGĦINUK
12. L-anzjani kif se jħarsu lejna jekk infittxu l-għajnuna tagħhom?
12 Jekk għandek il-problemi fiż-żwieġ, iżżommx lura milli tfittex l-għajnuna spiritwali taʼ Kristjani maturi. L-anzjani jaqdu bħala rgħajja tal-merħla u se jkunu ferħanin juruk il-pariri t’Alla fl-Iskrittura. (Atti 20:28; Ġak. 5:14, 15) Taqbadx u tikkonkludi li int u martek se titilfu r-rispett tal-anzjani jekk tfittxu l-għajnuna spiritwali tagħhom u tiddiskutu xi problema serja taż-żwieġ magħhom. Huma se jħobbukom u jirrispettawkom saħansitra iktar għax jaraw li verament tridu togħġbu lil Alla.
13. Liema parir insibu fl-1 Korintin 7:10-16?
13 Meta Kristjan li hu miżżewweġ lil xi ħadd li mhux tal-istess twemmin jitlob l-għajnuna tal-anzjani, dawn jistgħu jużaw il-parir taʼ Pawlu: “Lill-miżżewġin nagħtihom l-istruzzjoni, madankollu mhux jien imma l-Mulej, li l-mara m’għandhiex tinfired minn żewġha; imma jekk tinfired, ħa tibqaʼ ma tiżżewwiġx, inkella terġaʼ tirranġa maʼ żewġha; u r-raġel m’għandux jitlaq lil martu. . . . Għax, mara, kif taf jekk issalvax lil żewġek? Jew, raġel, kif taf jekk issalvax lil martek?” (1 Kor. 7:10-16) X’barka tkun meta sieħeb li mhux tal-istess twemmin isir qaddej taʼ Ġeħova!
14, 15. (a) Kristjana meta tistaʼ tibda taħseb dwar li tinfired minn żewġha? (b) Għala hu importanti li Kristjana titlob dwar il-kwistjoni u teżamina s-sentimenti tagħha bl-onestà?
14 F’liema ċirkustanzi mara Kristjana għandha mnejn “tinfired” minn żewġha? Xi wħud għażlu li jisseparaw għal dawn ir-raġunijiet serji: is-sieħeb jirrifjuta li jipprovdi għall-familja materjalment sal-punt li l-familja titħalla mingħajr flus jew ikel, ikun hemm abbuż fiżiku gravi sal-punt li l-mara tħoss li ħajjitha qiegħda fil-periklu, jew jekk l-azzjonijiet tas-sieħeb qed jagħmluha impossibbli biex il-Kristjana taqdi lil Alla.
15 Li tibqaʼ jew ma tibqax maʼ żewġek jew martek hi deċiżjoni persunali. Imma Kristjana għandha titlob dwar il-kwistjoni u teżamina s-sentimenti tagħha bl-onestà. Pereżempju, hu l-wieħed li mhux tal-istess twemmin l-uniku individwu li qed iwaqqaf lill-Kristjana milli taqdi lil Ġeħova? Jew hi l-Kristjana wkoll responsabbli b’xi mod talli mhix regulari fl-istudju tal-Bibbja persunali, fl-attendenza għal-laqgħat, u fl-ippritkar?
16. X’għandu jżomm lill-Kristjani milli jieħdu deċiżjonijiet taʼ malajr rigward id-divorzju?
16 Il-fatt li ngħożżu r-relazzjoni tagħna m’Alla u li napprezzaw l-għotja tiegħu taż-żwieġ għandu jżommna milli nieħdu deċiżjonijiet taʼ malajr rigward id-divorzju. Bħala qaddejja taʼ Ġeħova, aħna konċernati dwar it-taqdis tal-isem qaddis tiegħu. Għalhekk, żgur li qatt ma rridu nittradixxu lil seħibna fiż-żwieġ u nippjanaw li nitilquh ħalli niżżewġu lil ħaddieħor.—Ġer. 17:9; Mal. 2:13-16.
17. F’liema ċirkustanzi jistaʼ jingħad li Alla sejjaħ lil Kristjani miżżewġin għall-paċi?
17 Kristjani li huma miżżewġin lil xi ħadd mhux tal-istess twemmin għandhom jagħmlu kulma jistgħu biex iżommu ż-żwieġ b’saħħtu. Imma m’għandhomx għalfejn iħossuhom ħatjin jekk, minkejja l-isforzi sinċieri tagħhom biex isalvaw iż-żwieġ, seħibhom li mhuwiex tal-istess twemmin jirrifjuta li jibqaʼ magħhom. Pawlu kiteb: “Jekk dak li ma jemminx ikun irid jinfired, ħa jinfired; il-ħu jew l-oħt m’hijiex fil-jasar f’dawn iċ-ċirkustanzi, imma Alla sejħilkom għall-paċi.”—1 Kor. 7:15. b
ITTAMA F’ĠEĦOVA
18. Anke jekk ma jkunx possibbli li ssalva ż-żwieġ, x’ġid jistaʼ joħroġ mill-isforzi biex tipprova ssalvah?
18 Meta jkollna problema fiż-żwieġ tagħna, għandna nitolbu għall-kuraġġ u dejjem nittamaw f’Ġeħova. (Aqra Salm 27:14.) Ikkunsidra lil Linda, li ssemmiet qabel. Eventwalment, iż-żwieġ tagħha spiċċa f’divorzju, avolja kienet qattgħet snin sħaħ tagħmel sforz biex tipprova ssalvah. Tħossha hi li ħliet il-ħin tagħha? “Lanqas xejn,” tgħid hi. “L-isforzi tiegħi taw xhieda tajba lil oħrajn. Għandi kuxjenza nadifa. U l-aħjar ħaġa kienet li dawk is-snin għenu lit-tifla tagħna tibqaʼ soda fil-verità. Saret Xhud dedikata u żeluża taʼ Ġeħova.”
19. X’jistaʼ jiġri jekk nagħmlu sforzi biex insalvaw iż-żwieġ tagħna?
19 Mara Kristjana jisimha Marilyn hi ferħana li fdat f’Alla u li għamlet sforz iktar min-normal biex issalva ż-żwieġ tagħha. Hi tgħid: “Kont imħajra nissepara minn maʼ żewġi minħabba li ma pprovdilix materjalment u għax poġġa r-relazzjoni tiegħi maʼ Ġeħova fil-periklu. Fil-passat, żewġi kien qeda bħala anzjan imma sar involut f’xi attivitajiet tan-negozju mhux għaqlin, beda jitlef il-laqgħat, u waqafna nikkomunikaw. Attakk terroristiku fil-belt tagħna tant beżżagħni li dħalt f’qoxorti. Imbagħad irrealizzajt li jien ukoll kelli tort. Erġajna bdejna nikkomunikaw, erġajna qbadna l-istudju tal-familja, u bdejna nattendu l-laqgħat b’mod regulari. L-anzjani kienu qalbhom tajba u t’għajnuna kbira. Iż-żwieġ tagħna reġaʼ ħa r-ruħ. Maż-żmien, ir-raġel reġaʼ kkwalifika għal xi privileġġi fil-kongregazzjoni. Kienet lezzjoni iebsa, imma kellha riżultati tajbin.”
20, 21. X’għandna nkunu determinati li nagħmlu rigward iż-żwieġ?
20 Kemm jekk aħna miżżewġin u kemm jekk le, ejja dejjem naġixxu b’kuraġġ u nittamaw f’Ġeħova. Jekk qed inħabbtu wiċċna maʼ diffikultajiet fiż-żwieġ għandna nagħmlu kulma nistgħu biex insolvuhom. Għandna niftakru li dawk magħqudin fiż-żwieġ “m’għadhomx iżjed tnejn, imma ġisem wieħed.” (Mt. 19:6) U jekk nibqgħu maʼ sieħeb li mhux tal-istess twemmin avolja jkun hemm id-diffikultajiet, jistaʼ jkollna l-ferħ li narawh jibda jaqdi lil Ġeħova.
21 Ikunu xi jkunu ċ-ċirkustanzi tagħna, ejja nkunu determinati li dejjem naġixxu b’tali mod li jagħti xhieda tajba lil dawk li mhumiex membri tal-kongregazzjoni. Jekk għandna problemi serji ħafna fiż-żwieġ tagħna u nħossu li rridu nitilqu lir-raġel jew lill-mara, għandna b’onestà neżaminaw il-motivi tagħna. Ukoll, għandna nitolbu mill-qalb, nimmeditaw fuq l-Iskrittura, u nitolbu l-għajnuna tal-anzjani. Imma l-iktar importanti, għandna nkunu determinati li nogħġbu lil Alla Ġeħova f’kulma nagħmlu u nuru apprezzament u rispett veru għall-għotja mill-isbaħ tiegħu taż-żwieġ.
[Noti ta’ taħt]
a L-ismijiet ġew mibdulin.
b Ara l-ktieb “Żommu Ruħkom fl-Imħabba t’Alla,” paġni 219-221; It-Torri tal-Għassa tal-1 taʼ Frar, 1989, paġni 12-14; u t-Torri tal-Għassa bl-Ingliż tal-15 taʼ Settembru, 1975, paġni 575.
[Mistoqsijiet ta’ Studju]
[Kumment f’paġna 10]
Kristjani li ma jaqtgħux qalbhom malajr minn żwieġ diffiċli spiss jiġu premjati
[Kumment f’paġna 12]
Dejjem ittama f’Ġeħova u itolbu għall-kuraġġ
[Stampa f’paġna 9]
Ġeħova jbierek lill-koppji Kristjani li jagħmlu kulma jistgħu biex isaħħu ż-żwieġ diffiċli tagħhom
[Stampa f’paġna 11]
Il-kongregazzjoni Kristjana tistaʼ tkun sors taʼ faraġ u t’għajnuna spiritwali