“Is-Sigriet” li Tgħallimna mis-Servizz Sagru Tagħna
Bijografija
Kif rakkontata minn Olivier Randriamora
“Naf tassew kif ikolli ftit, u naf ukoll kif ikolli ħafna. F’kollox u f’kull ċirkustanza tgħallimt is-sigriet taʼ kif inkun xebgħan u kif inkun bil-ġuħ . . . Għal kollox għandi s-saħħa permezz taʼ dak li jagħtini l-qawwa.”—Flp. 4:12, 13.
DAN il-kliem tal-appostlu Pawlu kien ilu jkun taʼ inkuraġġiment kbir għalija u għal marti, Oly. Bħal Pawlu, tgħallimna “s-sigriet” billi nistrieħu kompletament fuq Ġeħova waqt li naqduh hawn fil-Madagaskar.
Meta x-Xhieda taʼ Ġeħova bdew jistudjaw il-Bibbja m’omm Oly fl-1982, jien u Oly konna diġà għarajjes. Jien ukoll aċċettajt studju tal-Bibbja, u Oly ngħaqdet miegħi iktar tard. Iżżewwiġna fl-1983, tgħammidna fl-1985, u mill-ewwel bdejna naqdu bħala pijunieri awżiljarji. F’Lulju tal-1986 sirna pijunieri regulari.
F’Settembru tal-1987 bdejna naqdu bħala pijunieri speċjali. L-ewwel inkarigu tagħna kien f’belt żgħira fil-Majjistral tal-Madagaskar fejn ma kien hemm ebda kongregazzjoni. Fil-Madagaskar hemm xi 18-il grupp etniku prinċipali kif ukoll viżibilju taʼ gruppi iżgħar, u d-drawwiet u t-tradizzjonijiet soċjali jvarjaw ħafna. Il-lingwa uffiċjali hija l-Malagasy, imma hemm ukoll djaletti differenti. Għalhekk, iddeċidejna li nitgħallmu d-djalett mitkellem fl-inkarigu ġdid tagħna, u dan għenna nkunu aċċettati iktar malajr fil-komunità.
Għall-ewwel, kont nagħti taħdita pubblika kull nhar taʼ Ħadd, u wara Oly kienet saħansitra ċċapċap. Konna l-uniċi nies preżenti. Konna wkoll nagħmlu l-programm sħiħ tal-Iskola tal-Ministeru Teokratiku, u Oly kienet timmaġina li għandha inkwilina quddiemha. Kemm konna grati meta l-indokratur tas-circuit li ġie jżurna ssuġġerielna b’qalb tajba biex naġġustaw il-laqgħat!
Peress li l-posta ma tantx kienet taʼ min jafdaha, ma konniex nirċievu l-allowance taʼ kull xahar regolarment. B’hekk, tgħallimna ngħixu bil-ftit. Darba minnhom ma kellniex biżżejjed flus biex inħallsu l-karozza tal-linja ħalli nattendu l-assemblea tas-circuit, li kienet xi 130 kilometru ’l bogħod. Ftakarna f’parir tajjeb li tana ħu: “Għidu lil Ġeħova dwar il-problemi tagħkom. Wara kollox, ix-xogħol tiegħu qed tagħmlu.” Għalhekk, tlabna u ddeċidejna li mmorru bil-mixi. Madankollu, eżatt qabel ma tlaqna, bla mistenni żarna ħu u tana xi flus—biżżejjed għan-nol tal-karozza tal-linja.
IX-XOGĦOL TAS-CIRCUIT
Fi Frar tal-1991, inħtart bħala indokratur tas-circuit. Sa dak iż-żmien, il-grupp żgħir tagħna kien kiber għal disaʼ pubblikaturi, tlieta
minnhom kienu mgħammdin, u kellna medja taʼ 50 ruħ jattendu l-laqgħat. Wara li tħarriġna, qdejna f’circuit f’Antananarivo, il-belt kapitali. Fl-1993 erġajna ġejna inkarigati f’circuit fil-Lvant tal-pajjiż. Il-mod t’għajxien hemmhekk kien differenti ħafna minn dak fil-belt.Sabiex nilħqu kongregazzjonijiet u gruppi iżolati, ivvjaġġajna bil-mixi minn ġo muntanji miksijin bis-siġar, kultant anke sa 145 kilometru ’l bogħod. Ġarrejna mill-inqas affarijiet possibbli magħna. M’għandniex xi ngħidu, kull darba li t-taħdita pubblika tal-indokratur tas-circuit inkludiet xi preżentazzjoni bis-slajds, kif ġieli kienet tkun dak iż-żmien, it-tagħbija tagħna kienet tkun itqal. Oly kienet iġġorr il-proġekter u jien kont inqandel batterija taʼ karozza taʼ 12-il volt.
Spiss konna nimxu madwar 40 kilometru kuljum sabiex immorru l-kongregazzjoni li jmiss. Fil-vjaġġi tagħna tlajna u nżilna mogħdijiet fil-muntanji, qsamna xmajjar, u ċaflasna minn ġot-tajn. Xi drabi rqadna mal-ġenb tat-triq, imma fil-biċċa l-kbira pprovajna nsibu raħal fejn stajna nqattgħu l-lejl. Kultant tlabna lil nies stranġieri għalkollox biex iħalluna ngħaddu l-lejl għandhom. Wara li konna nsibu fejn noqogħdu, konna nibdew inħejju xi ikla. Oly kienet tissellef borma u tmur lejn l-eqreb xmara jew lag biex iġġib l-ilma. Sadanittant, kont nissellef mannara biex inqattaʼ l-injam ħalli nsajru fuqu. Kollox kien jieħu l-ħin tiegħu. Kultant konna nixtru tiġieġa ħajja, u mbagħad kellna noqtluha u nnaddfuha.
Wara l-ikel, konna mmorru nġibu iktar ilma biex ninħaslu. Kultant konna norqdu fil-kċina. Jekk is-saqaf kien iqattar meta tagħmel ix-xita, kien ikollna norqdu mserrħin maʼ ħajt biex ma nixxarrbux.
Dejjem konna nagħmlu ċert li nagħtu xhieda lil min kien jilqagħna ġo daru. Meta mbagħad konna naslu fejn ridna mmorru, il-qalb tajba u l-ospitalità taʼ ħutna l-Kristjani kienu jmissulna qalbna. L-apprezzament profond għaż-żjara tagħna kien ipatti għal kull inkonvenjenza li esperjenzajna matul it-triq.
Meta qgħadna fid-djar taʼ ħutna l-Kristjani, konna nieħdu pjaċir ngħinuhom fil-faċendi tad-dar. Dan, imbagħad, kien jagħtihom iċ-ċans li joħorġu magħna fil-ministeru tal-għalqa. Ma stennejniex lussu jew xi ikel speċjali li l-aħwa ma setgħux jaffordjaw.
INŻURU GRUPPI IŻOLATI
Ħadna gost inżuru gruppi iżolati. L-aħwa f’dawn il-gruppi laqgħuna bi skeda ppakkjata t’attività. Spiss ma kienx ikollna ħin biex ‘nistrieħu ftit.’ (Mk. 6:31) F’post minnhom, koppja li kienu Xhieda stiednu f’darhom lill-istudenti kollha tagħhom tal-Bibbja—40 ruħ—biex aħna nieħdu sehem fl-istudji tagħhom. Oly ngħaqdet mal-oħt f’li tikkonduċi xi 20 studju, u jien kont mal-ħu għall-20 studju l-ieħor. Hekk kif student kien jitlaq, fil-pront kien jibda l-istudju l-ieħor. Iktar tard fil-ġurnata waqafna ftit biex nagħmlu l-laqgħat tal-kongregazzjoni u wara komplejna bis-sessjonijiet tal-istudji tal-Bibbja. Il-ġurnata, li kienet bħal maratona, kienet tispiċċa wara t-tmienja taʼ filgħaxija.
Meta żorna grupp ieħor, ilkoll kemm aħna
rħejnielha lejn villaġġ fil-qrib madwar it-tmienja taʼ filgħodu. Kollha konna lebsin ħwejjeġ qodma. Wara vjaġġ twil fil-foresta, wasalna fit-territorju madwar nofsinhar. Ilbisna ħwejjeġ nodfa u mill-ewwel bdejna nippritkaw minn bieb għal bieb. Id-djar kienu ftit u pubblikaturi konna ħafna. Għalhekk, koprejna t-territorju kollu f’madwar nofsiegħa. Imbagħad morna l-villaġġ li kien imiss. Wara li ppritkajna hemm, quddiemna kellna l-vjaġġ twil lura lejn id-dar. Għall-ewwel konna skuraġġiti għax ħadna ħafna ħin biex wasalna fit-territorju iżda ppritkajna għal xi siegħa biss. Madankollu, ix-Xhieda tal-lokal ma gergrux. Huma baqgħu mimlijin entużjażmu.Grupp iżolat f’Taviranambo kien qrib quċċata taʼ muntanja. Hemm sibna familja taʼ Xhieda li kienu joqogħdu f’dar b’kamra waħda. F’binja oħra żgħira fil-qrib kienu jagħmlu l-laqgħat. F’daqqa waħda, il-ħu li laqagħna beda jgħajjat b’vuċi għolja, “Aħwa!” Vuċi mill-quċċata tal-muntanja fil-viċin wieġbet, “Oj!” Il-ħu reġaʼ għajjat, “L-indokratur tas-circuit wasal!” It-tweġiba kienet, “Tajjeb!” Il-messaġġ milli jidher ngħata lil oħrajn li kienu joqogħdu iżjed ’il bogħod. Ma damux ma bdew jinġabru n-nies, u meta bdiet il-laqgħa, kien hemm iżjed minn 100 ruħ.
SFIDI TAʼ TRASPORT
Fl-1996 erġajna ntbgħatna f’circuit ieħor eqreb t’Antananarivo, fil-parti muntanjuża ċentrali. Dan is-circuit kellu wkoll l-isfidi uniċi tiegħu. Ma kienx hemm trasport pubbliku regulari lejn il-postijiet iktar fil-bogħod. Konna biħsiebna nżuru grupp f’Beankàna (Besakay), madwar 240 kilometru minn Antananarivo. Wara li ftehemna mas-sewwieq, tlajna fuq trakk żgħir li kien sejjer f’dik id-direzzjoni. Kien hemm xi 30 passiġġier ieħor fit-trakk u fuqu, ftit mimdudin fuq is-saqaf u oħrajn imqabbdin mat-trakk fuq wara.
Bħalma jiġri spiss, it-trakk ma damx ma waqfilna, u komplejna bil-mixi. Wara li mxejna bit-tbatija għal xi sigħat, ġie trakk kbir. Kien diġà ppakkjat bin-nies u tagħbija oħra, imma s-sewwieq xorta waqaf. Tlajna u aċċettajna li nivvjaġġaw bilwieqfa. Iktar tard wasalna ħdejn xmara, imma l-pont kien qed jissewwa. Għal darb’oħra, tlaqna bil-mixi u fl-aħħar wasalna f’raħal żgħir fejn kienu joqogħdu xi pijunieri speċjali. Għalkemm ma kellniex ħsieb li nagħmlu din iż-żjara, morna nippritkaw magħhom sakemm stennejna l-pont jissewwa u sakemm għadda xi mezz ieħor taʼ trasport.
Għaddiet ġimgħa oħra qabel m’għadda trakk ieħor, u komplejna bil-vjaġġ tagħna. It-triq kienet mimlija ħofor kbar u fondi. Spiss kien ikollna nimbottaw it-trakk minn ġo ilma fond sal-irkopptejn. Mhux darba jew tnejn tfixkilna u waqajna. Meta kien qed ibexbex, wasalna f’raħal żgħir u nżilna hemm. Wara li ħriġna mit-triq prinċipali, komplejna bil-mixi minn ġol-għelieqi tar-ross, sa qaddna f’ilma bit-tajn, lejn id-destinazzjoni tagħna.
Din kienet l-ewwel żjara fl-inħawi, u għalhekk iddeċidejna li nagħtu xhieda lil xi wħud li kienu qed jaħdmu fl-għelieqi tar-ross. Staqsejniehom fejn kienu joqogħdu x-Xhieda tal-lokal. Kemm fraħna li sirna nafu li dawn il-ħaddiema fil-fatt kienu ħutna spiritwali!
NINKURAĠĠIXXU LIL OĦRAJN JIDĦLU FIL-MINISTERU FULL-TIME
Maż-żmien, ir-riżultati taʼ li ninkuraġġixxu lil oħrajn jidħlu fil-ministeru full-time ġabulna ferħ kbir. Waqt li żorna kongregazzjoni b’disaʼ pijunieri regulari, inkuraġġejna kull pijunier biex jagħmel mira li jgħin pubblikatur ieħor isir pijunier. Meta żorniehom sitt xhur wara, in-numru taʼ pijunieri regulari kien telaʼ għal 22. Żewġ aħwa nisa pijunieri inkuraġġew lil missierhom rispettivament biex isiru pijunieri regulari. Imbagħad, dawn il-missirijiet, li t-tnejn li huma kienu anzjani, ħeġġew lil anzjan ieħor biex jingħaqad magħhom. Ftit wara, it-tielet anzjan inħatar bħala pijunier speċjali. Iktar tard, hu u martu bdew fix-xogħol tas-circuit. X’ġara mill-ewwel żewġ anzjani? Wieħed jaqdi bħala indokratur tas-circuit u l-ieħor hu volontier fil-bini tas-Swali tas-Saltna.
Kuljum nirringrazzjaw lil Ġeħova għall-għajnuna tiegħu, għax nifhmu li ma nistgħu nagħmlu xejn waħedna. Veru, kultant inħossuna għajjenin u nimirdu; madankollu nħossuna ferħanin hekk kif nirriflettu fuq ir-riżultati tal-ministeru tagħna. Ġeħova jgħinna biex ikollna suċċess fix-xogħol tiegħu. Huwa l-pjaċir tagħna li għandna sehem żgħir fih, billi issa naqdu bħala pijunieri speċjali. Iva, tgħallimna “s-sigriet” billi striħajna fuq Ġeħova, li ‘jagħtina l-qawwa.’
[Kumment f’paġna 6]
Tgħallimna “s-sigriet” billi striħajna fuq Ġeħova
[Mappa/Stampi f’paġna 4]
Il-Madagaskar, li jissejjaħ ukoll il-Gżira Kbira Ħamra, hu r-rabaʼ l-ikbar gżira fid-dinja. Il-ħamrija tiegħu hija ħamra, u ħafna annimali u ħxejjex uniċi jikbru hemmhekk
[Stampa f’paġna 5]
L-ivvjaġġar kien waħda mill-ikbar sfidi li ffaċċjajna
[Stampi f’paġna 5]
Nieħdu gost ngħinu fl-istudji tal-Bibbja