Ġeħova Għallimni Nagħmel ir-Rieda Tiegħu
Bijografija
Kif rakkontata minn Max Lloyd
Kien tard bil-lejl fl-1955. Jien u missjunarju ieħor konna fl-inkarigu tagħna fil-Paragwaj, l-Amerika t’Isfel, meta marmalja rrabjata dawret id-dar li konna fiha u bdiet tgħajjat u tgħid: “L-alla tagħna hu alla għatxan għad-demm, u hu jrid id-demm tal-gringos.” Aħna l-gringos (barranin) kif spiċċajna hemm?
GĦALIJA, kollox beda snin ilu fl-Awstralja fejn trabbejt u fejn Ġeħova beda jgħallimni nagħmel ir-rieda tiegħu. Missieri aċċetta l-ktieb Enemies mingħand Xhud fl-1938. Hu u ommi diġà ma kinux sodisfatti bil-kleru lokali li kienu jirreferu għal siltiet mill-Bibbja bħala ħrejjef. Madwar sena wara, il-ġenituri tiegħi tgħammdu b’simbolu tad-dedikazzjoni tagħhom lil Ġeħova. Minn dak iż-żmien ’il quddiem, li nagħmlu r-rieda taʼ Ġeħova saret l-iktar parti importanti fil-ħajja tal-familja tagħna. Imbagħad tgħammdet oħti Lesley, li kienet ħames snin ikbar minni, u jien tgħammidt fl-1940 meta kelli disaʼ snin.
Ftit wara li bdiet it-Tieni Gwerra Dinjija, l-istampar u t-tqassim tal-letteratura Biblika tax-Xhieda taʼ Ġeħova kienu ġew projbiti fl-Awstralja. Għaldaqstant, bħala tifel żgħir, tgħallimt nagħti spjegazzjoni dwar il-fidi tiegħi billi nuża l-Bibbja biss. Kont ħadtha drawwa li nieħu l-Bibbja miegħi l-iskola biex nuri lil oħrajn għala ma kontx insellem lill-bandiera jew nappoġġa l-gwerra.—Eżo. 20:4, 5; Mt. 4:10; Ġw. 17:16; 1 Ġw. 5:21.
Ħafna tfal fl-iskola ma kinux jagħmluha miegħi għax kont ingħatajt it-tikketta taʼ “spjun Ġermaniż.” Dak iż-żmien, kienu jintwerew il-films fl-iskola. Qabel ma kien jibda l-film, kulħadd kien ikun mistenni li jqum bilwieqfa u jkanta l-innu nazzjonali tal-pajjiż. Peress li jien kont nibqaʼ bilqiegħda, żewġ subien jew tlieta kienu jaqbduni minn xagħri biex jipprovaw iqajmuni minn fuq is-siġġu. Spiċċajt tkeċċejt mill-iskola minħabba li kont inħaddan twemmin ibbażat fuq il-Bibbja. Madankollu, kelli l-possibbiltà li nieħu korsijiet bil-korrispondenza mid-dar.
MIRA LI EVENTWALMENT ILĦAQT
Jien kont għamilt mira personali li nibda naqdi fil-ministeru full-time bħala pijunier meta nagħlaq 14-il sena. Għalhekk, veru ħassejtni diżappuntat meta ommi u missieri qaluli li l-ewwel kelli nsib xogħol u noħroġ naħdem. Huma insistew li nħallas tal-kamra u tal-ikel waqt li nkun għadni ngħix id-dar, iżda wegħduni li malli nagħlaq it-18-il sena stajt nibda naqdi bħala pijunier. Minħabba f’hekk, spiss kien ikollna diskussjonijiet dwar il-flus li kont
naqlaʼ. Kont insostni li ridt inwarrabhom għal meta nkun pijunier, imma kienu qed jiħduhomli huma.Meta kien wasal il-waqt biex nibda x-xogħol taʼ pijunier, il-ġenituri poġġew bilqiegħda miegħi u spjegawli li l-flus li kont tajthom kienu ddepożitawhom f’kont il-bank. Imbagħad tawhomli kollha lura biex nixtri l-ħwejjeġ u affarijiet oħrajn li kien se jkolli bżonn bħala pijunier. Kienu qed jgħallmuni nieħu ħsieb tiegħi nnifsi u mhux nippretendi li jagħmel dan ħaddieħor. Meta nħares lura, dan it-taħriġ kien taʼ valur kbir.
Matul it-tfulija tiegħi u taʼ Lesley, spiss kienu joqogħdu xi pijunieri d-dar tagħna, u kienet l-għaxqa tagħna noħorġu magħhom fil-ministeru. Tmiem il-ġimgħa konna nqattgħuh fil-ministeru minn dar għal dar, nagħtu xhieda fit-toroq, u nikkonduċu studji tal-Bibbja. Dak iż-żmien, il-mira li kellu jilħaq kull pubblikatur tal-kongregazzjoni kienet taʼ 60 siegħa fix-xahar. Ommi kważi dejjem kienet tilħaqha din il-kwota, u dan kien taʼ eżempju mill-aqwa għalija u għal Lesley.
NAQDI BĦALA PIJUNIER FIT-TASMANJA
L-ewwel inkarigu tiegħi bħala pijunier kien fil-gżira Awstraljana tat-Tasmanja, fejn ingħaqadt m’oħti u żewġha. Madankollu, huma ma damux ma telqu minn hemm biex jattendu l-15-il klassi tal-Iskola taʼ Gilegħad. Kont mistħi ħafna u kienet l-ewwel darba li kont ’il bogħod mid-dar. Xi wħud bdew jgħidu li ma kontx se nsaddad hemm iktar minn tliet xhur. Iżda fi ftit inqas minn sena, fl-1950, ġejt maħtur f’pożizzjoni simili għall-irwol tal-koordinatur tal-ġemgħa tal-anzjani. Iktar tard, ġejt maħtur bħala pijunier speċjali, u ħu żagħżugħ ieħor sar is-sieħeb tiegħi fil-ministeru.
L-inkarigu tagħna kien f’belt iżolata fejn kien hemm il-minjieri tar-ram u fejn ma kienx hemm Xhieda. Wasalna b’xarabank darba minnhom tard waranofsinhar. L-ewwel lejl qattajnieh f’lukanda antika. L-għada, aħna u nagħtu xhieda minn dar għal dar, staqsejna lill-inkwilini jekk kinux jafu b’xi kamra vojta. Lejn tmiem il-ġurnata, xi ħadd qalilna li d-dar tal-qassis maġenb il-knisja Presbiterjana kienet vojta u qalilna biex inkellmu lid-djaknu. Dan kien dħuli u offra li noqogħdu f’din id-dar. Kienet xi ħaġa stramba li kuljum noħorġu mid-dar taʼ membru tal-kleru biex immorru nippritkaw.
It-territorju kien irendi ħafna frott. Kien ikollna diskussjonijiet sbieħ u bdejna bosta studji tal-Bibbja. Meta l-awtoritajiet tal-knisja fil-belt kapitali saru jafu b’dan, u semgħu li x-Xhieda taʼ Ġeħova kienu qed jgħixu fir-residenza tal-qassis, ordnaw li d-djaknu jqabbiżna ’l barra mid-dar minnufih. Għal darb’oħra, spiċċajna bla saqaf fuq rasna!
Wara li l-għada bqajna nippritkaw sal-ħabta tat-tlieta taʼ waranofsinhar, fittxejna post fejn stajna ngħaddu l-lejl. L-aħjar post li sibna kien fejn joqogħdu bilqiegħda n-nies fi stejdjum imsaqqaf. Ħbejna l-bagalji tagħna hemmhekk u komplejna nippritkaw. Kien qed jidlam, iżda ddeċidejna li nħabbtu ftit djar oħra biex inkunu spiċċajna t-triq.
F’dar minnhom, raġel offrielna dar b’żewġ kmamar fuq wara tal-proprjetà tiegħu biex noqogħdu fihom!IX-XOGĦOL TAS-CIRCUIT U GILEGĦAD
Wara li kont ilni madwar tmien xhur naqdi f’dan l-inkarigu tal-ippritkar, irċivejt stedina mill-uffiċċju tal-fergħa tal-Awstralja biex insir indokratur tas-circuit. Din l-aħbar ħasditni għax kien għad kelli 20 sena biss. Wara li ngħatajt it-taħriġ għal ftit ġimgħat, bdejt inżur il-kongregazzjonijiet regolarment biex ninkuraġġihom. Dawk l-uħud li kienu ikbar minni—tistaʼ tgħid kulħadd—ma ddisprezzawnix minħabba li kont għadni żgħir, iżda rrispettaw ix-xogħol li kont qed nagħmel.
L-ivvjaġġar minn kongregazzjoni għall-oħra kien varjat ħafna! Ġimgħa kont immur b’tal-linja, ġimgħa oħra bit-tramm, imbagħad bil-karozza jew fuq wara taʼ xi mutur—f’id waħda l-bagalja u fl-id l-oħra l-basket tal-ministeru. Meta kont noqgħod mal-aħwa tassew kont inħossni ferħan. Anzjan f’kongregazzjoni kien ħerqan biex noqgħod għandu avolja d-dar tiegħu kienet għadha qed tinbena. Matul dik il-ġimgħa soddti kienet ġol-banju, iżda kienet ġimgħa li ġabitilna ħafna ferħ spiritwalment!
Fl-1953, ħadt sorpriża oħra meta rċivejt applikazzjoni biex nattendi t-22 klassi tal-Iskola taʼ Gilegħad. Imma ma kontx ferħan għalkollox. Ir-raġuni kienet li wara li oħti u żewġha ggradwaw minn Gilegħad fit-30 taʼ Lulju, 1950, intbagħtu l-Pakistan u, inqas minn sena wara, Lesley mardet u mietet hemmhekk. Bdejt ngħid: Min jaf kif se jħossuhom ommi u missieri dwar li mmur naqdi xi mkien ieħor fid-dinja ftit wara dan? Madankollu, huma qaluli: “Mur u aqdi lil Ġeħova kull fejn jidderiġik hu.” Qatt ma rġajt rajtu lil missieri. Hu miet fl-1957.
Ma domtx ma sibt ruħi tielaʼ fuq vapur maʼ ħames aħwa Awstraljani oħra għal vjaġġ li ħa sitt ġimgħat lejn il-belt taʼ New York. Matul il-vjaġġ konna naqraw il-Bibbja, nistudjaw, u nagħtu xhieda lill-passiġġieri l-oħrajn. Qabel ma morna fejn kienet tinżamm l-iskola f’South Lansing, New York, attendejna l-konvenzjoni internazzjonali taʼ Lulju, 1953, f’Yankee Stadium. L-attendenza laħqet quċċata taʼ 165,829 ruħ!
Il-120 student taʼ Gilegħad tal-klassi tagħna kienu ġejjin minn kull rokna tad-dinja. Kien proprju fil-jum tal-gradwazzjoni li ntqalilna fejn konna se nintbagħtu naqdu. Mal-ewwel ċans li kellna, morna niġru lejn il-librerija taʼ Gilegħad biex nagħmlu ftit riċerka dwar il-pajjiżi fejn ġejna assenjati. Sirt naf li l-Paragwaj, fejn intbgħatt jien, kien pajjiż bi storja taʼ rivoluzzjonijiet politiċi. Ftit wara li wasalt hemmhekk, għodwa minnhom staqsejt lill-missjunarji l-oħrajn x’kienet “iċ-ċelebrazzjoni” matul il-lejl. Huma tbissmu u qaluli: “Għadek kemm esperjenzajt l-ewwel rivoluzzjoni tiegħek. Ittawwal mill-bieb taʼ barra.” Kull fejn iddawwar wiċċek kont tara suldati!
ESPERJENZA LI MA NINSIEHA QATT
Darba fost l-oħrajn, akkumpanjajt lill-indokratur tas-circuit biex inżuru kongregazzjoni iżolata
u biex nuru l-film The New World Society in Action. Ivvjaġġajna għal madwar tmien sigħat jew disgħa, l-ewwel bit-trejn, imbagħad biż-żiemel u l-karettun, u fl-aħħar b’karru miġbud minn gendus. Magħna ħadna ġeneratur u proġekter tal-films. L-għada li wasalna fid-destinazzjoni tagħna, qattajna l-ġurnata nżuru lin-nies fl-irziezet u nistidnuhom jiġu jaraw il-film dakinhar filgħaxija. Attendew mal-15-il ruħ.Wara li kienu għaddew madwar 20 minuta mill-film, intqalilna biex nidħlu ġod-dar malajr kemm jistaʼ jkun. Qbadna l-proġekter u obdejna. Kien proprju dak il-ħin li xi rġiel bdew jgħajtu, jisparaw bis-snieter, u jgħidu għal darba wara l-oħra: “L-alla tagħna hu alla għatxan għad-demm, u hu jrid id-demm tal-gringos.” Kien hemm biss żewġ gringos hemm, u jien kont wieħed minnhom! Dawk li ġew jaraw il-film żammew il-marmalja milli tidħol ġod-dar. Imma l-opponenti reġgħu ġew f’xi t-tlieta taʼ filgħodu, jisparaw bis-snieter tagħhom u jheddu li jduru għalina aħna u sejrin lura l-belt iktar tard dakinhar.
L-aħwa kkuntattjaw lix-xeriff, u dan ġie waranofsinhar b’żewġ żwiemel biex jiħodna fil-belt. Fi triqitna lura, kull meta konna nersqu viċin xi roqgħa siġar, kien joħroġ ir-rivolver tiegħu u jmur qabilna biex jispezzjona l-inħawi. Indunajt li ż-żwiemel huma mezz taʼ trasport importanti ħafna, u għalhekk iktar tard ġibt wieħed.
JASLU IKTAR MISSJUNARJI
Ix-xogħol tal-ippritkar kompla jkollu suċċess ġmielu minkejja l-oppożizzjoni li spiss kien ikollna mill-kleru. Fl-1955, waslu ħames missjunarji ġodda, inkluż oħt żagħżugħa mill-Kanada li jisimha Elsie Swanson. Hi ggradwat mill-25 klassi taʼ Gilegħad. Konna flimkien għal ftit żmien fl-uffiċċju tal-fergħa imma mbagħad hi ġiet assenjata f’belt oħra. Kienet iddedikat ħajjitha biex taqdi lil Ġeħova bi ftit li xejn għajnuna mill-ġenituri tagħha, li qatt ma aċċettaw il-verità. Jien u Elsie żżewwiġna fil-31 taʼ Diċembru, 1957, u għexna waħedna f’dar tal-missjunarji fin-Nofsinhar tal-Paragwaj.
Fid-dar tagħna ma kellniex ilma tal-vit; minflok, kellna bir fil-bitħa. Ġewwa ma kellniex xawer jew tojlit. La kellna magna tal-ħasil, u lanqas friġġ. Konna nixtru l-ikel kuljum għax ma kienx iżomm. Imma s-sempliċità tal-ħajja u r-relazzjonijiet mill-qrib maʼ ħutna fil-kongregazzjoni għamlu dak iż-żmien tal-ħajja miżżewġa tagħna hieni ħafna.
Fl-1963, ftit wara li wasalna lura l-Awstralja, morna
nżuru lil ommi u taha attakk tal-qalb—milli jidher bl-eċċitament għax rat lil binha wara għaxar snin. Hekk kif beda jgerbeb iż-żmien biex immorru lura għall-inkarigu tagħna fil-Paragwaj, kellna nieħdu waħda mill-iktar deċiżjonijiet diffiċli taʼ ħajjitna. X’konna se nagħmlu? Inħallu lil ommi l-isptar bit-tama li xi ħadd jieħu ħsiebha u mmorru lura għall-inkarigu tagħna fil-Paragwaj, li tant konna nħobbu? Wara ħafna talb, jien u Elsie ddeċidejna li nibqgħu hemmhekk u nieħdu ħsieb ommi. Stajna nagħmlu hekk u fl-istess ħin nibqgħu fil-ministeru full-time sakemm mietet fl-1966.Kien privileġġ li niġi użat fix-xogħol tas-circuit u tad-distrett fl-Awstralja għal għadd taʼ snin u li ngħallem fl-Iskola tal-Ministeru tas-Saltna għall-anzjani. Imbagħad kellna nagħmlu bidla oħra f’ħajjitna. Ġejt inkarigat biex naqdi bħala membru tal-ewwel Kumitat tal-Fergħa fl-Awstralja. Wara dan, meta kellna nibnu uffiċċju tal-fergħa ġdid, ġejt maħtur bħala ċ-chairman tal-kumitat tal-bini. Bl-għajnuna taʼ ħafna ħaddiema t’esperjenza u li jikkooperaw, inbniet fergħa mill-isbaħ.
Imbagħad ġejt inkarigat fid-Dipartiment tas-Servizz li jieħu ħsieb it-tmexxija tax-xogħol tal-ippritkar fil-pajjiż. Barra minn hekk, ingħatajt il-privileġġ li nżur fergħat oħrajn madwar id-dinja bħala indokratur taż-żona biex ngħin u ninkuraġġixxi lill-aħwa. Il-fidi tiegħi ssodat bil-kbir meta f’xi pajjiżi żort lil dawk li kienu qattgħu snin sħaħ—saħansitra għexur taʼ snin—f’ħabsijiet u f’kampijiet tal-konċentrament minħabba li obdew lealment lil Ġeħova.
L-INKARIGU TAGĦNA BĦALISSA
Wara li ġejna lura minn vjaġġ strapazzuż taʼ żjara taż-żona fl-2001, sibt ittra li fiha ġejt mistieden immur Brooklyn, New York, biex naqdi fil-Kumitat tal-Fergħa tal-Istati Uniti li kien għadu kif ġie fformat. Jien u Elsie kkunsidrajna l-istedina bit-talb, u aċċettajnieha bil-ferħ. Issa li għaddew iktar minn 11-il sena, għadna naqdu fi Brooklyn.
Jien grat ħafna li għandi mara li hi kuntenta tagħmel dak kollu li jitlob Ġeħova. Jien u Elsie issa għalaqna 81 sena u għad għandna saħħa pjuttost tajba. Inħarsu ’l quddiem li ngawdu t-tagħlim taʼ Ġeħova għall-eternità kollha kif ukoll il-barkiet għonja li se jirċievu dawk kollha li jkomplu jagħmlu r-rieda tiegħu.
[Kumment f’paġna 19]
Ġimgħa kont immur b’tal-linja, ġimgħa oħra bit-tramm, imbagħad bil-karozza jew fuq wara taʼ xi mutur—f’id waħda l-bagalja u fl-id l-oħra l-basket tal-ministeru
[Kumment f’paġna 21]
Inħarsu ’l quddiem li ngawdu t-tagħlim taʼ Ġeħova għall-eternità kollha
[Stampi f’paġna 18]
Xellug: Waqt ix-xogħol tas-circuit fl-Awstralja
Lemin: Mal-ġenituri tiegħi
[Stampa f’paġna 20]
Fil-jum tat-tieġ tagħna, fil-31 taʼ Diċembru, 1957