“L-​imħabba t’Alla tfisser dan: li nosservaw il-​kmandamenti tiegħu; u madankollu l-​kmandamenti tiegħu m’humiex tqal.”​—1 ĠW. 5:3.

TAF TWIEĠEB?

Satana kif jipprova jagħmel il-​liġijiet t’Alla jidhru li huma taʼ piż?

Għala għandna noqogħdu attenti ferm rigward l-​għażla tagħna tal-​ħbieb?

X’se jgħinna nibqgħu leali lejn l-​Alla tal-​libertà?

1. Ġeħova kif juża l-​libertà tiegħu, u lil Adam u Eva liema libertà tahom?

 ĠEĦOVA biss għandu libertà bla limitu. Iżda dejjem juża l-​libertà tiegħu b’mod korrett. Hu ma jikkontrollax sal-​iċken ħaġa li jagħmlu l-​qaddejja tiegħu. Minflok, hu ħalliehom fil-​libertà biex jieħdu d-​deċiżjonijiet tagħhom huma stess u biex jissodisfaw ix-​xewqat xierqa kollha tagħhom. Pereżempju, kien hemm ħaġa waħda biss li Alla ma ħalliex lil Adam u Eva jagħmlu. Qalilhom biex ma jiklux “mis-​siġra taʼ l-​għarfien tat-​tajjeb u l-​ħażin.” (Ġen. 2:17) Mela kien possibbli għalihom li jagħmlu r-​rieda t’Alla u xorta jkollhom libertà liema bħalha!

2. Adam u Eva għala tilfu l-​libertà li tahom Alla?

² Alla għala ta lil Adam u Eva daqshekk libertà? Hu ħalaqhom fix-​xbieha tiegħu u tahom kuxjenza. Bir-​raġun, hu stenna li mħabbithom lejh bħala l-​Ħallieq tagħhom tiggwidahom fit-​triq it-​tajba. (Ġen. 1:27; Rum. 2:15) B’sogħba, Adam u Eva m’apprezzawx lid-​Donatur tal-​Ħajja meraviljuż tagħhom u l-​libertà li kien tahom. Minflok, huma għażlu li jiddeċiedu għalihom infushom x’kien tajjeb u x’kien ħażin. Ħasbu li dan se jagħtihom iktar libertà, iżda fir-​realtà, l-​għażla tagħhom għamlet lilhom u lil nisilhom ilsiera tad-​dnub u dan ġab tbatija u mewt.​—Rum. 5:12.

3, 4. Satana kif jipprova jqarraq bina fejn jidħlu l-​livelli taʼ Ġeħova?

³ Ladarba Satana kien kapaċi jinfluwenza żewġ bnedmin perfetti u għadd kbir taʼ anġli biex jiċħdu s-​sovranità t’Alla, hu kapaċi jqarraq bina wkoll. L-​istrateġija tiegħu għadha xi ftit jew wisq l-​istess. Hu jipprova jiżvijana billi jġegħelna naħsbu li l-​livelli t’Alla huma taʼ piż u jisirqulna l-​ferħ u l-​eċċitament. (1 Ġw. 5:3) In-​nies fid-​dinja hekk jaħsbuha, u jekk spiss inqattgħu l-​ħin magħhom għandna mnejn nibdew  naħsbuha bħalhom. “Il-​kumpanija ħażina kellha effett kbir fuqi, speċjalment minħabba li kont nibżaʼ jkolli opinjoni differenti minn sħabi,” qalet oħt li għandha 24 sena u li kienet ikkommettiet l-​immoralità. Forsi anki int esperjenzajt pressjoni simili minn sħabek.

⁴ B’sogħba, xi drabi l-​influwenza negattiva tistaʼ tiġi wkoll minn uħud fil-​kongregazzjoni Kristjana. “Jien kont ħbieb maʼ xi żgħażagħ li kienu jinnamraw maʼ wħud li ma kinux fil-​verità,” qal Xhud żagħżugħ. “Iżda, maż-​żmien intbaħt li iktar ma kont nagħmilha magħhom, iktar bdejt insir bħalhom. L-​ispiritwalità tiegħi marret minn taħt. Ma kontx qed nieħu pjaċir bl-​ikel spiritwali fil-​laqgħat, u bilkemm kont noħroġ fil-​ministeru. Kien proprju b’dan is-​sinjal li indunajt li kelli naqtaʼ dawn il-​ħbieb, u hekk għamilt!” Konxju int taʼ kemm sħabek jinfluwenzawk? Ikkunsidra eżempju Bibliku li jistaʼ jgħinna llum.

SERQILHOM QLUBHOM

5, 6. (a) Absalom kif qarraq b’oħrajn? (b) Il-​pjan tiegħu rnexxa?

⁵ Il-​Bibbja fiha bosta eżempji taʼ wħud li kienu taʼ influwenza ħażina fuq oħrajn. Eżempju wieħed minn dawn kien Absalom, bin is-​Sultan David. Absalom kien raġel tassew attraenti. Iżda maż-​żmien, bħal Satana, Absalom ħalla xewqa ħażina tinbet f’qalbu għax ried jilħaq sultan flok missieru, avolja ma kellux id-​dritt li jsaltan. a Biex jasal fejn ried, hu pprova jaħtaf it-​tron taʼ missieru taħt idejh u għamel tabirruħu li kien jimpurtah minn sħabu l-​Iżraelin. Fl-​istess ħin, b’ħażen insinwa li s-​sultan ma kienx jimpurtah minnhom. Iva, eżatt bħax-​Xitan fil-​ġnien tal-​Għeden, Absalom ġiegħel lin-​nies jaħsbu li hu xi benefattur, u fl-​istess ħin immalafama lil missieru stess.​—2 Sam. 15:1-​5.

⁶ Irnexxa l-​pjan makakk taʼ Absalom? Sa ċertu punt iva għax ir-​rakkont fil-​Bibbja jgħid: “Absalom baqaʼ jisraq il-​qlub taʼ l-​irġiel taʼ Israel.” (2 Sam. 15:6) Iżda, fl-​aħħar mill-​aħħar, l-​arroganza taʼ Absalom wasslitu biex jieħu tisbita kbira. U traġikament din wasslet ukoll għall-​mewt tiegħu u tal-​eluf taʼ nies li ġew imqarrqin minnu.​—2 Sam. 18:7, 14-​17.

7. Liema lezzjonijiet nistgħu nitgħallmu mir-​rakkont dwar Absalom? (Ara l-​istampa f’paġna 14.)

⁷ Dawn l-​Iżraelin għala ġew imqarrqin daqshekk faċilment? Forsi għax xtaqu l-​affarijiet li wegħedhom Absalom. Jew forsi ġew influwenzati mid-​dehra fiżika tiegħu. Kien x’kien il-​każ, nistgħu nkunu ċerti minn dan: Huma ma kinux leali lejn Ġeħova u lejn is-​sultan maħtur minnu. Illum, Satana jkompli juża lil nies bħal Absalom biex jipprova jisraq il-​qlub tal-​qaddejja taʼ Ġeħova. Huma forsi jgħidu: ‘Il-​livelli taʼ Ġeħova huma riġidi żżejjed. Ħares lejn dawk in-​nies kollha li ma jaqdux lil Ġeħova—huma dejjem jixxalaw!’ Meta tismaʼ dawn l-​affarijiet, se tidentifikahom bħala gideb u tkompli tkun leali lejn Alla? Se tirrikonoxxi li hija biss “il-​liġi perfetta” taʼ Ġeħova, il-​liġi tal-​Kristu, li tistaʼ twasslek għal-​libertà vera? (Ġak. 1:25) Jekk iva, għożż din il-​liġi, u qatt titħajjar tuża ħażin il-​libertà Kristjana li għandek.​—Aqra l-​1 Pietru 2:16.

8. Liema eżempji juru li n-​nies ma jkunux ferħanin meta ma jobdux il-​ħtiġijiet taʼ Ġeħova?

⁸ B’mod partikulari ż-​żgħażagħ huma l-​mira taʼ Satana. Ħu li issa għandu ’l fuq minn 30 sena qal hekk dwar is-​snin meta kien adoloxxent: “Kont inħares lejn il-​livelli morali taʼ Ġeħova bħala restrizzjoni, mhux bħala protezzjoni.” Minħabba f’hekk, hu kkommetta l-​immoralità sesswali. Imma dan ma ġablu l-​ebda ferħ. Hu qal: “Ħassejtni mifni b’sentimenti taʼ  ħtija u rimors għal diversi snin.” Meta rriflettiet fuq is-​snin tal-​adoloxxenza tagħha, oħt kitbet li wara li kkommettiet l-​immoralità ħassitha mdejqa u ma tiswa għal xejn. Hi kompliet tgħid: “Anki issa wara 19-​il sena, il-​memorji koroh għadhom jitturmentawni.” Oħt oħra qalet: “Il-​ħsieb li l-​imġiba tiegħi kiddet lin-​nies li tant inħobb kellu effett fuqi li kien devastanti mentalment, spiritwalment, u emozzjonalment. Huwa terribbli li tgħix mingħajr l-​approvazzjoni taʼ Ġeħova.” Satana ma jridekx taħseb dwar konsegwenzi taʼ dnub bħal dawn.

9. (a) Liema mistoqsijiet jistgħu jgħinuna nanalizzaw il-​ħarsa tagħna lejn Ġeħova u lejn il-​liġijiet u l-​prinċipji tiegħu? (b) Għala hu importanti li nsiru nafu lil Alla sew?

⁹ Bħalma juru dawn l-​eżempji, il-​konsegwenzi li jiġu meta wieħed ma jobdix lil Alla huma terribbli. Hija ħasra li ħafna żgħażagħ fil-​verità, u saħansitra xi wħud ikbar, kellhom ibatu l-​konsegwenzi biex jitgħallmu dan! (Gal. 6:7, 8) Mela, staqsi lilek innifsek: ‘Nagħrafhom in-​nases li juża Satana biex jipprova jqarraq bija? Inqisu lil Ġeħova bħala l-​akbar Ħabib tiegħi, il-​wieħed li dejjem jgħid il-​verità u li jixtieqli l-​ġid? Konvint jien għalkollox li hu qatt mhu se jċaħħadni minn xi ħaġa li hi tassew tajba u li tagħmilni ferħan?’ (Aqra Isaija 48:17, 18.) Sabiex tkun tistaʼ tgħid iva mill-​qalb għandek bżonn iktar minn sempliċi għarfien superfiċjali dwar Ġeħova. Għandek bżonn issir tafu b’mod intimu u tirrikonoxxi li l-​liġijiet u l-​prinċipji Bibliċi jirriflettu l-​imħabba tiegħu lejk, u mhux ix-​xewqa li joħnoqlok il-​libertà.​—Salm 25:14.

 ITLOB BIEX IKOLLOK QALB GĦARFA U UBBIDJENTI

10. Għala għandna nistinkaw biex nimitaw lis-​sultan żagħżugħ Salamun?

¹⁰ Meta kien għadu żagħżugħ, Salamun b’umiltà talab: “Jien m’iniex ħlief naqra taʼ tifel. Ma nafx kif noħroġ u kif nidħol.” Hu mbagħad talab biex ikollu qalb għarfa u ubbidjenti. (1 Slat. 3:7-​9, 12) Ġeħova wieġeb din it-​talba sinċiera, u se jwieġeb tiegħek ukoll, sew jekk int żgħir u sew jekk int kbir. M’għandniex xi ngħidu, Ġeħova mhux se jagħtik dehen u għerf b’mod mirakoluż. Iżda hu se jagħmlek għaref jekk tistudja bil-​ħerqa l-​Kelma tiegħu, titlob għall-​ispirtu qaddis, u tieħu vantaġġ sħiħ mill-​provvedimenti spiritwali li huma disponibbli permezz tal-​kongregazzjoni Kristjana. (Ġak. 1:5) Tabilħaqq, permezz taʼ dawn, Ġeħova anki lill-​qaddejja żgħażagħ tiegħu jagħmilhom iktar għorrief minn dawk kollha li jinjoraw il-​pariri tiegħu, inkluż l-​hekk imsejħin ‘għorrief u intellettwali’ taʼ din id-​dinja.​—Lq. 10:21; aqra Salm 119:98-​100.

11-13. (a) Liema lezzjonijiet taʼ valur nistgħu nitgħallmu minn Salm 26:4, Proverbji 13:20, u l-​1 Korintin 15:33? (b) Kieku int kif tapplikahom dawn il-​prinċipji Skritturali?

¹¹ Sabiex naraw kemm hu taʼ valur li nistudjaw il-​Bibbja u nimmeditaw fuq dak li naqraw bl-​għan li nsiru nafu lil Ġeħova mill-​qrib, ejja nikkunsidraw dawn l-​iskritturi. Kull waħda fiha prinċipju importanti rigward l-​għażla tagħna tal-​ħbieb: “Jien ma poġġejtx maʼ nies li ma jgħidux il-​verità; u ma nimxix maʼ dawk li jaħbu x’inhuma.” (Salm 26:4) “Min qed jimxi maʼ l-​għorrief se jsir għaref, imma min qed jagħmilha maʼ l-​istupidi se jaħbatlu ħażin.” (Prov. 13:20) “Kumpanija ħażina tħassar id-​drawwiet siewja.”​—1 Kor. 15:33.

¹² Liema lezzjonijiet taʼ valur nistgħu nitgħallmu minn dawn l-​iskritturi? (1) Ġeħova jridna nkunu selettivi meta niġu biex nagħżlu l-​ħbieb tagħna. Hu jrid jipproteġina moralment u spiritwalment. (2) In-​nies li nagħmluha magħhom jinfluwenzawna sew għat-​tajjeb u sew għall-​ħażin; dan hu sempliċement fatt tal-​ħajja. Il-​mod kif inhuma miktubin il-​versi t’hawn fuq juri li Ġeħova qed jipprova jmissilna qalbna. Innota li dawn il-​versi huma miktubin bħala veritajiet sempliċi, u mhux bħala regoli. Pereżempju, ma nsibux miktub “tagħmilx hekk.” Huwa bħallikieku Ġeħova qed jgħidilna: ‘Dawn huma l-​fatti. Int x’se tagħmel? X’hemm f’qalbek?’

¹³ Finalment, minħabba li dawn it-​tliet versi huma miktubin bħala veritajiet bażiċi, dawn huma minnhom illum daqskemm kienu meta nkitbu u jistgħu japplikaw għan-​nies f’ħafna sitwazzjonijiet. Staqsi lilek innifsek mistoqsijiet bħal dawn: Kif nistaʼ nevita li nassoċja maʼ individwi “li jaħbu x’inhuma”? F’liema sitwazzjonijiet għandi mnejn niġi f’kuntatt maʼ wħud bħal dawn? (Prov. 3:32; 6:12) Min huma “l-​għorrief” maʼ min Ġeħova jridni nassoċja? Min huma “l-​istupidi” li jridni nevita? (Salm 111:10; 112:1; Prov. 1:7) Liema “drawwiet siewja” se nħassar jekk nagħżel kumpanija ħażina? Fid-​dinja biss se nsib “kumpanija ħażina”? (2 Pt. 2:1-​3) Kieku int kif twieġeb dawn il-​mistoqsijiet?

14. Kif tistaʼ ttejjeb il-​lejla tal-​Qima tal-​Familja tiegħek?

¹⁴ Bl-​istess mod li għadek kemm irraġunajt fuq dawn it-​tliet skritturi, tistaʼ taqra skritturi oħrajn biex tifhem il-​mod kif jaħsibha Alla dwar suġġetti li huma importanti għalik u għall-​familja tiegħek. b Ġenituri, għala ma tikkunsidrawx li tiddiskutu suġġetti bħal dawn matul il-​lejla tal-​Qima tal-​Familja tagħkom? Intom  u tagħmlu dan, żommu f’moħħkom li l-​għan tagħkom hu li tgħinu lil kull membru tal-​familja japprezza iktar bis-​sħiħ kemm hi profonda l-​imħabba t’Alla għalina kif tidher fil-​liġijiet u l-​prinċipji tiegħu. (Salm 119:72) Tabilħaqq, studju bħal dan għandu jressaq lil kull membru tal-​familja eqreb lejn Ġeħova u lejn xulxin.

15. Kif tkun taf jekk intix qed tiżviluppa qalb għarfa u ubbidjenti?

¹⁵ Kif tistaʼ tkun taf jekk intix qed tiżviluppa qalb għarfa u ubbidjenti? Mod wieħed hu billi tqabbel il-​mod taʼ kif taħsibha int maʼ kif kienu jaħsbuha wħud leali tal-​qedem, bħal pereżempju s-​Sultan David li kiteb: “Jien tgħaxxaqt nagħmel ir-​rieda tiegħek, O Alla tiegħi, u l-​liġi tiegħek qiegħda fil-​ġewwieni tiegħi.” (Salm 40:8) Bl-​istess mod, il-​kittieb taʼ Salm 119 qal: “Kemm inħobbha l-​liġi tiegħek! Il-​jum kollu moħħni fiha.” (Salm 119:97) Trid tistinka biex ikollok din it-​tip taʼ mħabba. Din l-​imħabba tikber meta tistudja l-​Bibbja bis-​serjetà, titlob, u timmedita. Tikber ukoll meta f’ħajtek stess tinnota li l-​ubbidjenza lejn il-​ħtiġijiet taʼ Ġeħova ġġib ħafna barkiet.​—Salm 34:8.

ISSIELET GĦAL-​LIBERTÀ KRISTJANA TIEGĦEK!

16. X’għandna nirrealizzaw sabiex nirbħu l-​battalja tagħna għal-​libertà vera?

¹⁶ Matul l-​istorja, il-​ġnus kienu lesti li jiġġieldu gwerer ħorox sabiex jiksbu l-​libertà. Mela, kemm iktar għandek tkun lest int li tissielet spiritwalment sabiex tikseb il-​libertà Kristjana tiegħek! Trid tirrealizza li l-​għedewwa tiegħek mhumiex biss Satana u l-​mod qerried kif taħsibha d-​dinja. Ikollok tkampa wkoll mal-​imperfezzjonijiet tiegħek stess, inkluż qalb qarrieqa. (Ġer. 17:9; Efes. 2:3) Madankollu, bl-​għajnuna taʼ Ġeħova, tistaʼ tirbaħha l-​battalja. Iktar minn hekk, kull rebħa—kbira jew żgħira—se tħalli minn tal-​inqas żewġ effetti pożittivi. L-​ewwel nett, se tferraħ qalb Ġeħova. (Prov. 27:11) It-​tieni nett, kull darba li tirrealizza li l-​ubbidjenza lejn “il-​liġi perfetta tal-​libertà” hi taʼ ġid għalik, int se ssir saħansitra iktar determinat li tibqaʼ fit-​triq li twassal għall-​ħajja taʼ dejjem. Maż-​żmien, int se tgawdi l-​libertà fuq skala akbar li Ġeħova jwiegħed lil dawk kollha li huma leali lejh.​—Ġak. 1:25; Mt. 7:13, 14.

17. Għala m’għandniex inħossuna skuraġġiti minħabba l-​imperfezzjonijiet tagħna, u Ġeħova liema għajnuna jipprovdi?

¹⁷ Naturalment, kultant ilkoll niżbaljaw. (Ekk. 7:20) Meta jiġri hekk, tħossokx li ma tiswa għal xejn jew skuraġġit iżżejjed. Jekk tieħu gambetta, biex ngħidu hekk, qum fuq saqajk u kompli għaddej—anki jekk dan ikun ifisser li titlob l-​għajnuna tal-​anzjani lokali. “It-​talb tal-​fidi” tagħhom, kiteb Ġakbu, “ifejjaq lill-​marid, u Ġeħova jqajmu. Ukoll, jekk ikun għamel xi dnubiet, jinħafrulu.” (Ġak. 5:15) Iva, qatt tinsa li Alla hu tassew ħanin u li ġibdek lejn il-​kongregazzjoni għax ra xi ħaġa tajba fik. (Aqra Salm 103:8, 9.) Mela dment li żżomm qalb sħiħa lejn Ġeħova, hu qatt mhu se jaqtaʼ qalbu minnek.​—1 Kron. 28:9.

18. Kif nistgħu naġixxu fi qbil mat-​talba taʼ Ġesù li nsibu fi Ġwanni 17:15?

¹⁸ Hu u jitlob fl-​aħħar lejl taʼ ħajtu fuq l-​art mal-​11-​il appostlu leali tiegħu, Ġesù qal dan il-​kliem li ma jintesiex għan-​nom tagħhom: ‘Ħarishom minħabba l-​Ħażin.’ (Ġw. 17:15) Sewwasew bħalma Ġesù ħa ħsieb l-​appostli tiegħu, hu jieħu ħsieb is-​segwaċi tiegħu kollha llum. Għalhekk, nistgħu nkunu ċerti li Ġeħova se jwieġeb it-​talba taʼ Ġesù billi jħarisna matul dawn iż-​żminijiet kritiċi. Ġeħova “huwa tarka għal dawk li jimxu bl-​integrità . . . u jgħasses it-​triq tal-​leali tiegħu.” (Prov. 2:7, 8) Iva, it-​triq tal-​integrità fiha l-​isfidi tagħha, imma hija l-​unika triq li twassal għall-​ħajja taʼ dejjem u għal-​libertà vera. (Rum. 8:21) Tħalli lil ħadd jiżvijak minnha!

[Noti ta’ taħt]

[Mistoqsijiet ta’ Studju]

[Stampi f’paġna 14]

Kif nistgħu nidentifikaw lil uħud bħal Absalom fi żmienna u nipproteġu lilna nfusna minnhom?