“Anki jekk tqum gwerra kontrija, xorta se nafda fih.”​—SALM 27:3.

SKONT IL-​VERSI LI ĠEJJIN, X’JISTAʼ JGĦINEK TRABBI L-​KURAĠĠ?

Salm 27:1

Salm 27:4

Salm 27:11

1. Salm 27 x’se jgħinna nifhmu?

 IX-​XOGĦOL tagħna tal-​ippritkar għala qiegħed jiżdied minkejja li l-​kundizzjonijiet fid-​dinja qed imorru mill-​ħażin għall-​agħar? Għala nagħtu mill-​ħin u l-​enerġija tagħna minn rajna waqt li qed nesperjenzaw problemi ekonomiċi? Kif nistgħu nibqgħu kuraġġużi meta ħafna oħrajn jibżgħu mill-​futur? Għanja ispirata tas-​Sultan David, imniżżla f’​Salm 27, tagħtina t-​tweġibiet.

2. Dak li jkun x’jistaʼ jiġrilu minħabba t-​tkexkix, imma aħna liema fiduċja għandna?

² David jibda dan is-​Salm bil-​kliem: “Ġeħova hu d-​dawl tiegħi u s-​salvazzjoni tiegħi. Minn min se nibżaʼ? Ġeħova hu l-​fortizza taʼ ħajti. Minn min se nitkexkex?” (Salm 27:1) It-​tkexkix, jew biżaʼ kbir, tant jistaʼ jdgħajjef lil dak li jkun li ma jħallih jagħmel xejn. Imma bniedem li jafda f’Ġeħova jkollu l-​kuraġġ u ma jħossux beżgħan. (1 Pt. 3:14) Meta nagħmlu lil Ġeħova l-​fortizza tagħna, aħna se ‘ngħammru fis-​sigurtà u ma ninkwetawx mill-​biżaʼ taʼ xi gwaj.’ (Prov. 1:33; 3:25) Dan kif?

“ĠEĦOVA HU D-​DAWL TIEGĦI U S-​SALVAZZJONI TIEGĦI”

3. Ġeħova f’liema sens hu d-​dawl tagħna, imma aħna x’għandna nagħmlu?

³ Il-​metafora “Ġeħova hu d-​dawl tiegħi” turi li Ġeħova jgħallimna l-​verità. (Salm 27:1) Dawl letterali jistaʼ jurina xi periklu jew ostaklu li jkun hemm fi triqitna, però ma jneħħihx. Għandna naġixxu bil-​għaqal fuq dak li naraw. B’mod simili, Ġeħova jirrivelalna t-​tifsir bażiku taʼ ġrajjiet dinjin. Hu jiftħilna għajnejna għall-​perikli taʼ din is-​sistema u jagħtina prinċipji Bibliċi li huma dejjem siewja. Madankollu, għandna napplikaw dak li nitgħallmu. Meta nagħmlu  dan, niksbu iktar għerf bħas-​salmista li sar ‘iktar għaref mill-​għedewwa tiegħu’ u kellu ‘iktar dehen mill-​għalliema kollha tiegħu.’​—Salm 119:98, 99, 130.

4. (a) David għala setaʼ jgħid b’konvinzjoni li Ġeħova hu s-​salvazzjoni tiegħu? (b) Ġeħova meta b’mod speċjali se jkun is-​salvazzjoni tagħna?

⁴ Il-​kliem taʼ David f’​Salm 27:1 juri li hu ftakar kif Ġeħova kien diġà ħelsu, jew salvah, fil-​passat. Pereżempju, Ġeħova kien salvah “minn taħt difrejn l-​iljun u minn taħt difrejn l-​ors.” Ġeħova tah ukoll rebħa fuq il-​ġgant Gulija. Iktar tard, is-​Sultan Sawl ipprova jniffed lil David b’lanza, imma Ġeħova salvah kull darba. (1 Sam. 17:37, 49, 50; 18:11, 12; 19:10) Mhux taʼ b’xejn li David setaʼ jgħid b’konvinzjoni: “Ġeħova hu . . . s-​salvazzjoni tiegħi”! Ġeħova se jsalva lill-​qaddejja tiegħu, sewwasew bħalma salva lil David. Kif? Billi jeħles lill-​aduraturi tiegħu “mit-​tribulazzjoni l-​kbira” li ġejja.​—Riv. 7:14; 2 Pt. 2:9.

FTAKAR F’KULL DARBA LI ĠEĦOVA GĦENEK

5, 6. (a) Il-​memorji tagħna kif jgħinuna nrabbu l-​kuraġġ? (b) Għala jkun taʼ ġid li naħsbu dwar kif Ġeħova għen lill-​poplu tiegħu fil-​passat?

⁵ Fattur importanti biex inrabbu l-​kuraġġ naqraw dwaru f’​Salm 27:2, 3. (Aqra.) David ftakar f’xi ġrajjiet li fihom esperjenza l-​ħelsien bl-​għajnuna taʼ Ġeħova. (1 Sam. 17:34-​37) Dawk il-​memorji tawh il-​fiduċja biex jiffaċċja saħansitra l-​iktar sitwazzjonijiet diffiċli. Tiftakar kif Ġeħova għen lilek fl-​imgħoddi? Pereżempju, tlabt int bil-​ħeġġa dwar xi problema li kienet qed tinkwetak u mbagħad rajt kif Ġeħova tak l-​għerf jew is-​saħħa biex tkampa maʼ din il-​prova? Jew, tistaʼ tiftakar kif tneħħew xi ostakli li kellek biex taqdi lil Ġeħova bil-​ferħ, jew kif infetaħlek xi bieb taʼ opportunità? (1 Kor. 16:9) Issa kif tħossok meta taħseb f’dawn il-​ġrajjiet? Dawn il-​memorji għandhom ikomplu jikkonvinċuk li Ġeħova jistaʼ jgħinek issolvi jew tkampa maʼ saħansitra l-​iktar problemi jew sitwazzjonijiet diffiċli.​—Rum. 5:3-​5.

⁶ Xi ngħidu jekk xi gvern potenti jwaħħalha f’rasu li jeqred lix-​Xhieda taʼ Ġeħova bħala organizzazzjoni? Ħafna  nies fi żmienna pprovaw jagħmlu proprju hekk, imma ma rnexxilhomx. Meta niftakru kif Ġeħova għen lin-​nies tiegħu fil-​passat niġu inkuraġġiti nissaportu dak kollu li jistaʼ jiġri fil-​futur.​—Dan. 3:28.

APPREZZA L-​QIMA VERA

7, 8. (a) Skont Salm 27:4, David x’talbu lil Ġeħova? (b) X’inhu t-​tempju spiritwali l-​kbir taʼ Ġeħova, u kif inqimuh hemmhekk illum?

⁷ Xi ħaġa oħra li tagħtina l-​kuraġġ hija l-​imħabba tagħna għall-​qima vera. (Aqra Salm 27:4.) Fi żmien David, “id-​dar taʼ Ġeħova” kienet it-​tabernaklu. Kien David innifsu li għamel arranġamenti għall-​istruttura elaborata tat-​tempju li kellu jinbena minn ibnu Salamun. Mijiet taʼ snin wara, Ġesù spjega li kellu jkun hemm żmien meta n-​nies ma kienx se jkollhom bżonn imorru t-​tempju biex iqimu lil Ġeħova. (Ġw. 4:21-​23) F’​Ebrej kapitli 8 sa 10, l-​appostlu Pawlu indika li tempju spiritwali kbir beda jeżisti fis-​sena 29 E.K., meta Ġesù tgħammed u offra lilu nnifsu biex jagħmel ir-​rieda taʼ Ġeħova. (Ebr. 10:10) Dan it-​tempju spiritwali kbir hu l-​arranġament li nieda Ġeħova sabiex, permezz tal-​fidi tagħna fis-​sagrifiċċju taʼ Ġesù bħala fidwa, inkunu nistgħu nersqu lejn Alla b’mod aċċettabbli. Kif inqimu f’dan it-​tempju? Billi nitolbu lil Ġeħova “bi qlub sinċieri u b’fiduċja sħiħa u bil-​fidi,” u billi nippritkaw lil oħrajn dwaru bil-​kuraġġ. Inqimu wkoll f’dan it-​tempju meta nattendu l-​laqgħat tal-​kongregazzjoni u waqt il-​qima tal-​familja. (Ebr. 10:22-​25) L-​imħabba tagħna għall-​qima vera se tgħinna nkomplu nagħmlu dawn l-​affarijiet f’dawn l-​aħħar jiem tant kritiċi.

⁸ Madwar id-​dinja, il-​qaddejja leali taʼ Ġeħova qed iżidu s-​sehem tagħhom fil-​ministeru, jitgħallmu lingwi ġodda, u jmorru jgħixu fi nħawi fejn il-​bżonn għall-​proklamaturi tas-​Saltna hu ikbar. Dawn qed juru li huma bħas-​salmista. Hu talab lil Ġeħova għal ħaġa waħda biss. Ried ‘jara s-​sbuħija taʼ Ġeħova u jħares b’apprezzament lejn it-​tempju tiegħu.’ Il-​qaddejja taʼ Ġeħova llum iridu li hu jberikhom u jridu jqimuh, jiġri x’jiġri.​—Aqra Salm 27:6.

AFDA FL-​GĦAJNUNA T’ALLA

9, 10. Salm 27:10 xi jwegħedna?

⁹ Il-​kliem taʼ David juri kemm kien jafda fl-​għajnuna taʼ Ġeħova. Hu qal: “Kieku missieri u ommi stess jitilquni, Ġeħova jilqagħni għandu.” (Salm 27:10) Mill-​ġrajjiet imsemmijin fl-​1 Samwel kapitlu 22 nistgħu nikkonkludu li l-​ġenituri taʼ David m’abbandunawhx. Imma llum ħafna ġew miċħudin mill-​familja tagħhom. Madankollu, ħafna minn dawk li ġew abbandunati sabu l-​għajnuna u l-​protezzjoni fil-​kongregazzjoni Kristjana kollha mħabba.

¹⁰ Ladarba Ġeħova hu lest li jappoġġa lill-​qaddejja tiegħu meta oħrajn jitilquhom, mhuwiex se jsostnihom ukoll matul kwalunkwe tribulazzjoni oħra? Jekk pereżempju nkunu inkwetati dwar kif se nipprovdu materjalment għall-​familja tagħna, nistgħu nibqgħu ċerti li Ġeħova se jgħinna. (Ebr. 13:5, 6) Hu jifhem iċ-​ċirkustanzi u l-​bżonnijiet tal-​qaddejja leali tiegħu kollha.

11. Il-​fiduċja tagħna f’Ġeħova x’impatt tistaʼ tħalli fuq oħrajn? Agħti eżempju.

¹¹ Ikkunsidra l-​każ taʼ Victoria, studenta tal-​Bibbja mil-​Liberja. Ir-​raġel li kienet qed tgħix miegħu telaq lilha u lit-​tliet uliedha. Minkejja li la kellha saqaf fuq rasha u lanqas impjieg, hi kompliet tagħmel progress spiritwali. Wara li Victoria tgħammdet, bintha taʼ 13-​il sena sabet kartiera mimlija flus. Sabiex jevitaw it-​tentazzjoni, iddeċidew li lanqas biss  jgħodduhom. Minflok, minnufih ikkuntattjaw lis-​suldat li kien tilef il-​kartiera. Hu qalilhom li kieku kulħadd kien onest bħax-​Xhieda taʼ Ġeħova, id-​dinja kollha kienet tkun post aħjar u iktar paċifiku. Victoria użat il-​Bibbja tagħha biex turi lis-​suldat il-​wegħda taʼ Ġeħova taʼ dinja ġdida. Is-​suldat tant baqaʼ impressjonat bil-​fidi u l-​onestà tagħha li lil Victoria taha bħala kumpens ammont sostanzjali mill-​flus li kienet irritornatlu. Madwar id-​dinja, in-​nies jafu li x-​Xhieda taʼ Ġeħova huma dejjem onesti minħabba li għandhom fiduċja sħiħa fl-​abbiltà taʼ Ġeħova li jieħu ħsiebhom.

12. Meta nkomplu naqdu lil Ġeħova minkejja li nġarrbu telf materjali, xi nkunu qed nuru? Agħti eżempju.

¹² Jew immaġina kif ħassu Thomas, pubblikatur mhux mgħammed fis-​Sierra Leone. Hu beda jaħdem bħala għalliem fi skola sekondarja, imma ma tħallasx għal kważi sena. Thomas kellu jiltaqaʼ mal-​amministratur tal-​iskola biex jirċievi l-​flus li kellha tagħtih l-​iskola. Dan l-​amministratur kien qassis u qal lil Thomas li t-​twemmin tax-​Xhieda taʼ Ġeħova ma kienx aċċettat f’din l-​iskola. Hu insista li Thomas jagħżel bejn l-​impjieg u t-​twemmin tiegħu bbażat fuq il-​Bibbja. Thomas telaq dak l-​impjieg u tilef kważi sena paga. Iktar tard, sab xogħol ieħor isewwi r-​radjijiet u l-​mowbajls. Ħafna eżempji juru li jekk nafdaw f’Ġeħova, qatt ma jkollna għalfejn nibżgħu li mhux se jkollna dak li neħtieġu. Minħabba li Ġeħova ħalaq kollox u dejjem ipproteġa lill-​poplu tiegħu, aħna nafu li hu se jieħu ħsiebna.

13. L-​aħwa f’pajjiżi foqra għala huma medhijin ferm fix-​xogħol tal-​ippritkar?

¹³ F’għadd taʼ pajjiżi foqra, l-​aħwa huma medhijin ferm fix-​xogħol tal-​ippritkar. Għala? Uffiċċju taʼ fergħa partikulari kiteb: “Ħafna inkwilini li jaċċettaw studju tal-​Bibbja huma bla xogħol, u għalhekk għandhom iktar ħin biex jistudjaw matul il-​ġurnata. L-​aħwa wkoll għandhom iktar ħin biex jippritkaw. B’mod speċjali fl-​iktar inħawi foqra, in-​nies m’hemmx għalfejn ngħidulhom aħna li qed ngħixu fl-​aħħar jiem; huma jaraw u jmissu b’idejhom dawn il-​kundizzjonijiet.” Missjunarju li ilu jaqdi ’l fuq minn 12-​il sena f’pajjiż fejn kull pubblikatur jikkonduċi, bħala medja, iktar minn tliet studji tal-​Bibbja, kiteb: “Ladarba ħafna mill-​pubblikaturi jgħixu ħajja sempliċi bi ftit distrazzjonijiet, ġeneralment għandhom iktar ħin għall-​ministeru tal-​għalqa u biex jikkonduċu studji tal-​Bibbja.”

14. Alla b’liema modi jistaʼ jipproteġi lill-​folla l-​kbira?

¹⁴ Ġeħova wiegħed li se jgħin, jipproteġi, u jeħles lill-​poplu tiegħu bħala  grupp, fiżikament u spiritwalment, u aħna nafdaw fih. (Salm 37:28; 91:1-​3) Se jkun hemm folla kbira taʼ nies li se ssalva “mit-​tribulazzjoni l-​kbira.” (Riv. 7:9, 14) Għalhekk, Alla se jipproteġi lil din il-​folla bħala grupp billi ma jħalli ’l ħadd jeqred lill-​poplu kollu tiegħu matul l-​aħħar jiem taʼ din is-​sistema. Huma se jingħataw kulma se jkollhom bżonn biex ikampaw mal-​provi u biex jipproteġu r-​relazzjoni tagħhom maʼ Ġeħova. U matul l-​aħħar fażi tat-​tribulazzjoni l-​kbira, Ġeħova se jipproteġi lill-​poplu tiegħu.

“ISTRUWINI, O ĠEĦOVA, DWAR TRIQTEK”

15, 16. Kif nibbenefikaw meta napplikaw dak li jgħallimna Alla? Agħti eżempju.

¹⁵ Biex nibqgħu nuru l-​kuraġġ, għandna bżonn inkomplu niġu mgħallmin minn Alla. Dan jidher ċar fit-​talba bil-​ħrara taʼ David: “Istruwini, O Ġeħova, dwar triqtek, u mexxini fil-​mogħdija retta minħabba l-​għedewwa tiegħi.” (Salm 27:11) Sabiex naġixxu fi qbil maʼ din it-​talba għandna noqogħdu attenti għal kull direzzjoni bbażata fuq il-​Bibbja li ningħataw permezz tal-​organizzazzjoni taʼ Ġeħova, u napplikawha fil-​pront. Ħafna nies li qatgħu djun mhux neċessarji jaqblu li swielhom taʼ ġid li applikaw il-​parir għaqli biex jissimplifikaw ħajjithom matul il-​kriżi ekonomika reċenti. Minflok ma jsibu ruħhom imtaqqlin b’affarijiet materjali li m’għadhomx jaffordjaw, huma issa jistgħu jespandu l-​ministeru tagħhom. Kull wieħed minna jagħmel tajjeb li jistaqsi lilu nnifsu, ‘Napplika jien minnufih kulma naqra mill-​Bibbja u mill-​pubblikazzjonijiet mill-​klassi tal-​ilsir leali u għaqli, anke meta dan ikun jirrikjedi li nagħmel sagrifiċċji personali?’—Mt. 24:45.

¹⁶ Jekk inħallu lil Ġeħova jgħallimna u jgħidilna kif għandna ngħixu ħajjitna, ma jkollniex għalfejn nibżgħu. Pijunier regulari fl-​Istati Uniti pprova jikseb kariga fuq il-​post tax-​xogħol tiegħu li kienet se tgħin lilu u ’l familtu kollha jibqgħu fis-​servizz full-​time. Is-​supervisor tiegħu qallu li qatt ma kien se jingħata dik il-​kariga mingħajr diploma. Li kieku dan ġara lilek, kien jiddispjaċik li dħalt fis-​servizz full-​time minflok ma ħadt edukazzjoni iktar għolja? Ġimagħtejn wara, dak is-​supervisor tkeċċa mix-​xogħol, u maniġer ieħor staqsa lill-ħu dwar il-​miri tiegħu. Il-​ħu spjegalu li hu u martu kienu fil-​ministeru full-​time bħala Xhieda taʼ Ġeħova u li riedu jibqgħu jagħmlu dan. Lanqas laħaq spiċċa l-​kelma, il-​maniġer qallu: “Bsartu jien li inti differenti! Meta missieri kien fuq is-​sodda tal-​mewt, tnejn minn sħabek kienu jiġu jaqrawlu mill-​Bibbja kuljum. Ħlift miegħi nnifsi li jekk qatt tiġini l-​opportunità biex ngħin lil xi ħadd mix-​Xhieda taʼ Ġeħova, naħtafha.” L-​għada filgħodu, dan il-​ħu ngħata l-​istess impjieg li s-​supervisor taʼ qabel ma riedx jagħtih. Tabilħaqq, meta npoġġu s-​Saltna l-​ewwel f’ħajjitna, Ġeħova jżomm il-​wegħda tiegħu u jagħtina kulma neħtieġu.—Mt. 6:33.

IL-​FIDI U T-​TAMA HUMA ESSENZJALI

17. X’se jgħinna niffaċċjaw il-​futur bil-​fiduċja?

¹⁷ David jgħinna nifhmu kemm hu importanti li jkollna l-​fidi u t-​tama. Hu ħass li ma kien ikollu l-​ebda tama kieku ‘ma kellux fidi li jara t-​tjubija taʼ Ġeħova.’ (Salm 27:13) X’kien isir minna kieku Alla ma taniex it-​tama u ma konniex nafu l-​affarijiet imsemmijin f’Salm 27? Għalhekk, f’dawn l-​aħħar jiem, għandna nkomplu nitolbu lil Ġeħova biex isaħħaħna u jsalvana f’Armageddon.—Aqra Salm 27:14.

[Mistoqsijiet ta’ Studju]

[Stampa f’paġna 23]

David ħassu inkuraġġit meta ftakar kif Ġeħova kien salvah

[Stampa f’paġna 25]

Inqisuhom aħna d-​diffikultajiet ekonomiċi bħala opportunità biex nespandu l-​ministeru tagħna?