Żomm Sod u Evita n-Nases taʼ Satana!
‘Żomm sod kontra t-tnassis tax-Xitan.’—EFES. 6:11.
INT KIF TWIEĠEB?
Qaddej taʼ Ġeħova kif jistaʼ jevita li jinqabad fin-nassa tal-materjaliżmu?
X’jistaʼ jgħin lil Kristjan miżżewweġ biex ma jaqax fil-ħofra tal-adulterju?
Għala temmen li hu taʼ benefiċċju li tieħu waqfa soda kontra l-materjaliżmu u l-immoralità sesswali?
1, 2. (a) Satana għala ma jħossx mogħdrija għall-midlukin u għan-“nagħaġ oħrajn”? (b) Liema nases taʼ Satana se niddiskutu f’dan l-artiklu?
SATANA X-XITAN ma jħoss l-ebda mogħdrija għall-bnedmin, speċjalment għal dawk li jaqdu lil Ġeħova. Infatti, Satana qed jiġġieled kontra l-midlukin li għadhom fuq l-art. (Riv. 12:17) Dawn il-Kristjani bi qlubija ħadu t-tmexxija fl-ippritkar u kixfu lil Satana bħala l-ħakkiem taʼ din id-dinja. Ukoll, ix-Xitan m’għandu ebda mħabba għan-“nagħaġ oħrajn,” li jappoġġaw lill-midlukin u li għandhom it-tama li jgħixu għal dejjem—prospett li Satana m’għadx għandu. (Ġw. 10:16) Mhux taʼ b’xejn irrabjat! Kemm jekk għandna t-tama għas-sema u kemm jekk għandna t-tama għall-art, Satana ċertament m’għandu l-ebda interess fil-ġid tagħna. Il-mira tiegħu hi li jagħmilna l-vittmi tiegħu.—1 Pt. 5:8.
2 Biex iwettaq l-għan tiegħu, Satana poġġa diversi nasbiet, jew nases. Ladarba hu “għema l-imħuħ” taʼ dawk li ma jemmnux, huma ma jaċċettawx l-aħbar tajba u ma jistgħux jarawhom dawn in-nases. Madankollu, ix-Xitan jaqbad ukoll lil xi wħud li aċċettaw il-messaġġ tas-Saltna. (2 Kor. 4:3, 4) L-artiklu taʼ qabel dan wera kif nistgħu nevitaw tlieta min-nases taʼ Satana: (1) diskors mhux kontrollat, (2) biżaʼ u pressjoni, u (3) sentimenti taʼ ħtija eċċessiva. Issa ejja nikkunsidraw kif nistgħu nibqgħu sodi kontra żewġ nasbiet, jew nases, oħrajn taʼ Satana—il-materjaliżmu u t-tentazzjoni biex nikkommettu adulterju.
IL-MATERJALIŻMU—IN-NASBA LI TOĦNOQ
3, 4. L-ansjetajiet taʼ din is-sistema kif jistgħu jwasslu għall-materjaliżmu?
3 F’waħda mit-tixbihat tiegħu, Ġesù semma xi żrieragħ li nżergħu qalb ix-xewk. Hu spjega li xi ħadd għandu mnejn jismaʼ l-kelma, jew il-messaġġ tas-Saltna, “imma l-ansjetà taʼ din is-sistema u l-qawwa qarrieqa tar-rikkezzi joħonqu l-kelma, u ma jagħmilx frott.” (Mt. 13:22) Iva, il-materjaliżmu hu waħda min-nases li juża l-għadu tagħna Satana.
4 Hemm żewġ affarijiet li flimkien jistgħu “joħonqu l-kelma.” Waħda minnhom hi “l-ansjetà taʼ din is-sistema.” F’dawn iż-“żminijiet kritiċi li diffiċli biex issib tarfhom,” hemm ħafna affarijiet li jistgħu jagħmluk ansjuż. (2 Tim. 3:1) Jistaʼ jkun diffiċli biex tlaħħaq mal-bżonnijiet tal-ħajja għax l-affarijiet jiswew ħafna jew għax ma jkollokx xogħol. Forsi tkun ansjuż ukoll dwar il-futur u tistaqsi, ‘Se jkolli biex ngħix wara li nirtira?’ Minħabba ansjetà bħal din, xi wħud ipprovaw isiru għonja, billi ħasbu li l-flus se jiggarantulhom is-sigurtà.
5. ‘Il-qawwa tar-rikkezzi’ kif tistaʼ tqarraq bina?
5 Il-ħaġa l-oħra li Ġesù tkellem dwarha hi “l-qawwa qarrieqa tar-rikkezzi.” Din, flimkien mal-ansjetà, tistaʼ taqbadna fin-nassa tal-materjaliżmu. Il-Bibbja tirrikonoxxi li “l-flus huma protezzjoni.” (Ekk. 7:12) Madankollu, mhuwiex għaqli li nsusu wara l-għana. Ħafna sabu li iktar ma jissieltu biex jakkwistaw l-għana, iktar jinqabdu fin-nassa tal-materjaliżmu. Xi wħud saħansitra saru lsiera tal-flus.—Mt. 6:24.
6, 7. (a) Il-materjaliżmu kif jistaʼ jkun taʼ periklu fuq il-post tax-xogħol? (b) Kristjan dwar xiex għandu jaħseb meta jintalab jaħdem owvertajm?
6 Jistaʼ jibda jkollok ix-xewqa biex tkun għani mingħajr ma lanqas biss tinduna. Pereżempju, ikkunsidra din ix-xena. L-imgħallem tiegħek javviċinak u jgħidlek: “Għandi aħbar tajba! Il-kumpanija kisbet kuntratt kbir. Dan ifisser li spiss se jkollok taħdem owvertajm fix-xhur li ġejjin. Imma nistaʼ nassigurak li mhux se jiddispjaċik xħin nagħtik il-paga.” Int kif kont tirreaġixxi għal offerta bħal din? M’għandniex xi ngħidu, il-ħtieġa li tipprovdi materjalment għal familtek hi responsabbiltà serja, imma mhijiex l-unika responsabbiltà li għandek. (1 Tim. 5:8) Hemm affarijiet oħrajn li għandek bżonn taħseb dwarhom. Kemm se jkollok taħdem owvertajm? Ix-xogħol sekulari tiegħek se jtellef l-attivitajiet spiritwali tiegħek, fosthom il-laqgħat tal-kongregazzjoni u l-lejla tal-Qima tal-Familja tiegħek?
7 Aħseb dwar x’inhu l-iktar importanti għalik. Il-flus żejda li se ddaħħal jew ir-relazzjoni tiegħek maʼ Ġeħova? Se tieqaf tpoġġi l-interessi tas-Saltna l-ewwel f’ħajtek għax trid taqlaʼ iktar flus? Tistaʼ tara kif il-materjaliżmu se jeffettwak jekk ma tiħux ħsieb ir-relazzjoni li int u familtek għandkom maʼ Ġeħova? Jekk tinsab f’din is-sitwazzjoni, kif tistaʼ tevita li tinħonoq bil-materjaliżmu?—Aqra l-1 Timotju 6:9, 10.
8. Liema eżempji mill-Bibbja jistgħu jgħinuna neżaminaw il-mod kif ngħixu?
8 Jekk ma tridx tinħonoq bil-materjaliżmu, regolarment għandek teżamina l-mod kif tgħix. Qatt ma trid tkun bħal Għesaw, li bl-azzjonijiet tiegħu wera li kien jistmerr l-affarijiet spiritwali! (Ġen. 25:34; Ebr. 12:16) U ċertament m’għandekx tkun bħar-raġel għani li ntqallu jbigħ l-affarijiet tiegħu, jagħti lill-foqra, u jsegwi lil Ġesù. Minflok m’għamel dan, ir-raġel “telaq imnikket, għax kellu ħafna ġid.” (Mt. 19:21, 22) Il-ġid taʼ dan ir-raġel kien bħal nassa li qabditu. Hu setaʼ segwa lil Ġesù, l-aqwa bniedem li qatt għex! Imma m’aċċettax dan il-privileġġ kbir. Oqgħod attent li int ma titlifx il-privileġġ li tkun dixxiplu taʼ Ġesù Kristu.
9, 10. Skont dak li tgħid il-Bibbja, int kif taħseb li għandna nqisuhom l-affarijiet materjali?
9 Irridu nagħtu widen għall-parir taʼ Ġesù jekk ma rridux nitqarrqu bl-affarijiet materjali. Hu qal: “Qatt tkunu ansjużi u tgħidu, ‘X’se nieklu?’ jew, ‘X’se nixorbu?’ jew, ‘X’se nilbsu?’ Għax dawn kollha huma l-affarijiet li l-ġnus qed ifittxu bil-ħerqa. Għax Missierkom tas-sema jaf li teħtieġu dawn l-affarijiet kollha.”—Mt. 6:31, 32; Lq. 21:34, 35.
10 Jekk ma rridux ninqabdu fin-nassa qarrieqa tar-rikkezzi, hemm bżonn li naħsbu bħal Agur, wieħed mill-kittieba tal-Bibbja, li stqarr: “Tħallinix inkun fqir iżżejjed jew għani żżejjed. Agħtini biss dak li neħtieġ.” (Prov. 30:8, Contemporary English Version) Agur fehem li kellu bżonn xi ħaġa tal-flus biex jgħix, imma fehem ukoll il-qawwa qarrieqa tar-rikkezzi. Aħna għandna nirrealizzaw li l-ansjetajiet taʼ din is-sistema u l-qawwa qarrieqa tar-rikkezzi jistgħu jġegħluna nitilfu r-relazzjoni tagħna maʼ Ġeħova. Jekk ninkwetaw iżżejjed dwar l-affarijiet materjali għandna mnejn ma jkollniex il-ħin, l-enerġija, jew ix-xewqa li npoġġu l-interessi tas-Saltna l-ewwel f’ħajjitna. Allura għandna noqogħdu attenti li ma ninqabdux fin-nassa taʼ Satana tal-materjaliżmu!—Aqra Ebrej 13:5.
L-ADULTERJU—ĦOFRA MOĦBIJA
11, 12. Aħwa Kristjani kif jistgħu jinqabdu fin-nasba tal-adulterju fuq il-post tax-xogħol?
11 Il-kaċċaturi li jkunu jridu jaqbdu annimal b’saħħtu għandhom mnejn iħaffru ħofra f’mogħdija li minnha spiss jgħaddi l-annimal. Ġeneralment jaħbu l-ħofra billi fuqha jpoġġu ftit zkuk u ħamrija. Waħda mill-iktar tentazzjonijiet taʼ Satana li jkollha suċċess tixbah din it-tip taʼ nasba. Hija d-dnub tal-immoralità. (Prov. 22:14; 23:27) Għadd taʼ Kristjani waqgħu f’din in-nasba billi ħallew lilhom infushom jidħlu f’sitwazzjonijiet li fihom kien faċli li jikkommettu l-immoralità. Xi Kristjani miżżewġin ċedew għall-adulterju wara li żviluppaw relazzjoni romantika mhix xierqa.
12 Relazzjoni romantika mhix xierqa tistaʼ tiżviluppa fuq il-post tax-xogħol tiegħek. Infatti, iktar minn nofs in-nisa u l-biċċa l-kbira mill-irġiel li kkommettew adulterju għamlu dan maʼ xi ħadd minn fuq ix-xogħol. Jirrikjedi x-xogħol sekulari tiegħek li tqattaʼ ħin maʼ membri tas-sess oppost? Jekk inhu hekk, liema tip taʼ relazzjoni għandek magħhom? Tagħmel limiti biex ir-relazzjoni tagħkom ma ssirx waħda romantika? Pereżempju, forsi oħt spiss titkellem maʼ raġel li jaħdem magħha. Forsi tant isir ħabib fdat u tal-qalb li tgħidlu dwar il-problemi fiż-żwieġ tagħha. Jew ħu jagħmel ħbieb maʼ mara li taħdem miegħu. Għandu mnejn jaħseb: “Jogħġbuha l-opinjonijiet tiegħi u tagħti kasi meta nkellimha. Tirrispettani wkoll. Nixtieq li kieku marti tittrattani hekk!” Tistaʼ tara kif dawn il-Kristjani jistgħu jkunu fil-periklu li jikkommettu adulterju?
13. Kif tistaʼ tiżviluppa relazzjoni romantika mhix xierqa fil-kongregazzjoni?
13 Tistaʼ tiżviluppa relazzjoni romantika mhix xierqa fil-kongregazzjoni. Ikkunsidra dan l-eżempju li seħħ fir-realtà. Daniel u martu, Sarah, a kienu pijunieri regulari. Daniel jgħid li kien ukoll anzjan li jaċċetta kull inkarigu li jingħata fil-kongregazzjoni. Bħala parti mill-ministeru tiegħu, Daniel kellu ħames studji tal-Bibbja maʼ ġuvintur—u tlieta minnhom tgħammdu. Dawn l-aħwa li kienu għadhom kif tgħammdu kellhom bżonn ħafna għajnuna emozzjonali. Peress li Daniel kellu tant x’jagħmel fil-kongregazzjoni, Sarah spiss tathom l-għajnuna li kellhom bżonn. Imma Sarah wkoll kellha bżonn l-attenzjoni, u hi kisbitha mingħand l-istudenti tal-Bibbja taʼ Daniel. Din is-sitwazzjoni saret bħal nasba perikoluża. Daniel jgħid: ‘Xahar wara l-ieħor, marti kienet qed tuża l-enerġija kollha tagħha biex tgħin lil oħrajn, u allura kellha bżonn appoġġ spiritwali u emozzjonali. Matul dan iż-żmien ma kontx qed nieħu ħsiebha. Dawn iċ-ċirkustanzi wasslu għal diżastru. Marti kkommettiet adulterju maʼ wieħed mill-ġuvintur li kont studjajt magħhom. Tant kont medhi f’xogħli li ma kontx indunajt li r-relazzjoni tagħha maʼ Ġeħova kienet iddgħajfet.’ Kif tistaʼ tevita traġedja bħal din?
14, 15. X’jistaʼ jgħin lill-Kristjani miżżewġin jevitaw l-adulterju?
14 Biex tevita l-adulterju trid taħseb profondament dwar xi jfisser li tkun leali lejn is-sieħeb jew is-sieħba tiegħek fiż-żwieġ. Ġesù qal: “Dak li Alla għaqqad flimkien ħa ma jifirdu ebda bniedem.” (Mt. 19:6) Qatt taħseb li l-privileġġi teokratiċi tiegħek huma iktar importanti mir-raġel jew mill-mara tiegħek. Iżjed minn hekk, jekk int spiss tqattaʼ ħin ’il bogħod minn żewġek jew martek għal raġunijiet mhux neċessarji, iż-żwieġ tagħkom jistaʼ jiddgħajjef u int jew is-sieħeb jew is-sieħba tiegħek tistaʼ titħajjar tikkommetti adulterju.
15 Iżda jekk int anzjan, xi ngħidu għall-merħla? L-appostlu Pietru kiteb: “Irgħu l-merħla t’Alla li hemm fil-ħarsien tagħkom, mhux bilfors, imma minn jeddkom; mhux għall-imħabba tal-qligħ diżonest, imma bil-ħerqa.” (1 Pt. 5:2) Ċertament li l-membri tal-kongregazzjoni fil-ħarsien tiegħek m’għandhomx jiġu injorati. Imma int m’għandekx taħdem tant iebes biex tkun anzjan tajjeb li ma tistax tkun raġel tajjeb. Ma jagħmilx sens li tgħin lill-aħwa fil-kongregazzjoni u tittraskura lil martek id-dar. Dan kieku jipperikola ż-żwieġ tagħkom. Daniel jgħid, ‘Qatt m’għandu jkollok tant x’tagħmel f’li tieħu ħsieb ir-responsabbiltajiet li tittraskura lil familtek stess.’
16, 17. (a) Il-Kristjani miżżewġin x’jistgħu jagħmlu fuq il-post tax-xogħol biex jagħmlu ċert li kulħadd jaf li mhumiex disponibbli għal relazzjoni romantika? (b) Semmi xi eżempji t’artikli fir-rivisti tagħna li jistgħu jgħinu lill-Kristjani jevitaw l-adulterju.
16 Ir-rivisti It-Torri tal-Għassa u Stenbaħ! jagħtu ħafna pariri tajbin biex jgħinu lill-Kristjani miżżewġin jevitaw l-adulterju. Pereżempju, It-Torri tal-Għassa tal-15 taʼ Settembru, 2006, ta dan il-parir: “Fuq il-post tax-xogħol u f’postijiet oħra, oqgħod attent minn sitwazzjonijiet li jistgħu jiżviluppaw f’intimità. Per eżempju, il-fatt li tqattaʼ sigħat żejda taħdem mill-qrib maʼ xi ħadd tas-sess oppost jistaʼ jkun taʼ tentazzjoni. Bħala raġel jew mara miżżewġa, għandek tagħmilha ċara bil-kliem tiegħek u l-kondotta tiegħek li int m’intix disponibbli. Bħala xi ħadd li għandu d-devozzjoni lejn Alla, żgur li ma tkunx trid tiġbed attenzjoni mhux xierqa billi titkessaħ jew tkun immodest fl-ilbies u d-dehra. . . . Il-fatt li fuq il-post tax-xogħol ikollok ritratti taʼ martek jew żewġek u taʼ wliedek se jservi bħala tfakkira viżwali għalik u għal oħrajn li int tgħożż il-familja tiegħek. Kun determinat li qatt ma tinkuraġġixxi—jew saħansitra tittollera—avanzi romantiċi minn oħrajn.”
17 L-artiklu intitolat “Il-Fedeltà fiż-Żwieġ—Xi Tfisser Verament?” fi Stenbaħ! taʼ Lulju-Settembru, 2009, wissa kontra fantasiji sesswali li jinvolvu lil xi ħadd li mhuwiex is-sieħeb tiegħek fiż-żwieġ. L-artiklu indika li jekk toqgħod timmaġina fantasiji sesswali se żżid iċ-ċans li tikkommetti adulterju. (Ġak. 1:14, 15) Jekk int miżżewweġ ikun għaqli li minn żmien għal żmien int u martek jew żewġek tirrivedu informazzjoni bħal din flimkien. Iż-żwieġ hu arranġament stabbilit minn Ġeħova nnifsu, u huwa sagru. Il-fatt li twarrab il-ħin biex tkellem lis-sieħeb jew lis-sieħba tiegħek fiż-żwieġ hu mod mill-aqwa kif turi li tgħożż l-affarijiet sagri.—Ġen. 2:21-24.
18, 19. (a) Xi ħsara jikkaġuna l-adulterju? (b) Liema benefiċċji tgawdi jekk tibqaʼ leali lejn żewġek jew martek?
18 Jekk tħoss it-tentazzjoni biex tiżviluppa relazzjoni romantika mhix xierqa, immedita fuq il-ħsara li jistgħu jikkaġunaw iż-żína u l-adulterju. (Prov. 7:22, 23; Gal. 6:7) Dawk li jikkommettu l-immoralità jnikktu lil Ġeħova u jweġġgħu lis-sieħeb jew lis-sieħba tagħhom u lilhom infushom. (Aqra Malakija 2:13, 14.) Minflok, aħseb dwar il-benefiċċji li se jkollok jekk iżżomm il-kondotta tiegħek safja, jew nadifa. Mhux biss ikollok it-tama li tgħix għal dejjem imma wkoll se tgawdi l-aqwa ħajja issa, u dan jinkludi kuxjenza nadifa.—Aqra Proverbji 3:1, 2.
19 Is-salmista kanta: “Paċi abbundanti jkollhom dawk li jħobbu l-liġi [t’Alla], u għalihom m’hemm ebda tfixkil.” (Salm 119:165) Għalhekk, ħobb il-verità u ‘oqgħod attent bis-sħiħ li ma timxix bħal nies bla għaqal imma bħal nies għorrief’ f’dawn iż-żminijiet mill-agħar. (Efes. 5:15, 16) Illum, Satana juża diversi nases biex jaqbad lill-qaddejja veri t’Alla. Imma Ġeħova tana kulma għandna bżonn biex ‘inżommu sod’ u nipproteġu ruħna ħalli qatt ma ninqabdu fin-nases taʼ Satana.—Efes. 6:11, 16.
[Nota ta’ taħt]
a L-ismijiet ġew mibdulin.
[Mistoqsijiet ta’ Studju]
[Stampa f’paġna 26]
Il-materjaliżmu jistaʼ joħnoq lil persuna spiritwalment. Tħallix li dan jiġri lilek
[Stampa f’paġna 29]
Jekk tifflertja jew tħalli lil xi ħadd jifflertja miegħek, dan jistaʼ jġiegħlek taqaʼ fl-adulterju