“Jien Magħkom”
“Ħafna jfittxu fih bir-reqqa, u l-għarfien veru jkun abbundanti.”—DAN. 12:4.
INT KIF TWIEĠEB?
Fiż-żminijiet moderni, “l-għarfien veru” kif sar magħruf?
Dawk li aċċettaw il-verità kif saru “ħafna”?
L-għarfien eżatt b’liema modi sar “abbundanti”?
1, 2. (a) Kif nafu li Ġesù qiegħed mas-sudditi tiegħu issa u li se jkun magħhom fil-futur? (b) Skont Danjel 12:4, x’kellu jiġri wara studju bir-reqqa tal-Iskrittura?
IMMAĠINA lilek innifsek fil-Ġenna tal-art. Kull filgħodu tqum u tħossok mistrieħ u ħerqan biex tibda l-ġurnata tiegħek. M’għandek l-ebda wġigħ jew tbatija. Kwalunkwe mard li kellek issa telaq. Is-sensi kollha tiegħek—il-vista, is-smigħ, ix-xamm, il-mess, u t-togħma—jaħdmu perfettament. Għandek enerġija kbira, ix-xogħol tiegħek tieħu pjaċir tagħmlu, ħbiebek huma ħafna, u m’għandek xejn jinkwetak aktar. Dawn se jkunu fost il-barkiet li tistaʼ tgawdi taħt is-Saltna t’Alla. Kristu Ġesù, is-Sultan maħtur, se jbierek is-sudditi tiegħu u se jedukahom bl-għarfien taʼ Ġeħova.
2 Ġeħova se jkun mal-qaddejja leali tiegħu hekk kif jieħdu sehem f’dan ix-xogħol taʼ edukazzjoni globali fil-futur. Alla u Ibnu ilhom sekli sħaħ maʼ wħud leali. Qabel telaʼ s-sema, Ġesù wiegħed lid-dixxipli leali tiegħu li kien se jkun magħhom. (Aqra Mattew 28:19, 20.) Biex insaħħu l-fidi tagħna f’din il-wegħda, ejja neżaminaw sentenza waħda biss minn profezija mnebbħa minn Alla li nkitbet f’Babilonja tal-qedem iktar minn 2,500 sena ilu. Dwar “żmien it-tmiem” li fih issa qed ngħixu, il-profeta Danjel kiteb: “Ħafna jfittxu fih bir-reqqa, u l-għarfien veru jkun abbundanti.” (Dan. 12:4) Kemm kien se jkun hemm barkiet meraviljużi permezz taʼ dan it-tiftix bir-reqqa! Dawk li jistudjaw sew l-Iskrittura kienu se jitbierku bl-għarfien veru, jew eżatt, tal-Kelma t’Alla. Il-profezija tgħid ukoll li ħafna kienu se jaċċettaw “l-għarfien veru.” Iżjed minn hekk, għarfien bħal dan kellu jkun abbundanti. Kien se jkun imqassam mad-dinja kollha u akkwistat bla diffikultà. Hekk kif nistudjaw kif din il-profezija twettqet, se naraw li Ġesù qiegħed mad-dixxipli tiegħu llum u li Ġeħova għandu l-kapaċità kollha li jwettaq dak kollu li wiegħed.
“L-GĦARFIEN VERU” JSIR MAGĦRUF
3. X’sar mill-“għarfien veru” wara l-mewt tal-appostli?
3 Wara l-mewt tal-appostli, l-apostasija mbassra li ħarġet mill-Kristjanità ġenwina żviluppat u nfirxet bħal nar. (Atti 20:28-30; 2 Tess. 2:1-3) Għal sekli wara, ftit li xejn kien hemm “għarfien veru,” mhux biss fost dawk li ma kienu jafu xejn dwar il-Bibbja, imma wkoll fost dawk li qalu li huma Kristjani. Għalkemm qalu li jemmnu fl-Iskrittura, il-mexxejja tal-Kristjaneżmu għallmu gideb reliġjuż—“tagħlim tad-demonji” li ddiżonora lil Alla. (1 Tim. 4:1) In-nies inġenerali tħallew f’injoranza spiritwali. Duttrini apostati inkludew it-tagħlim falz li Alla hu Trinità, li r-ruħ ma tmutx, u li xi erwieħ huma turmentati għal dejjem fin-nar tal-infern.
4. Grupp taʼ Kristjani fis-snin sebgħin tas-seklu dsatax kif bdew ifittxu għall-“għarfien veru”?
4 Madankollu, fis-snin sebgħin tas-seklu dsatax—madwar erbgħin sena qabel bdew “l-aħħar jiem”—grupp żgħir taʼ Kristjani sinċieri f’Pennsylvania, l-Istati Uniti tal-Amerika, iltaqgħu biex jistudjaw b’mod diliġenti l-Bibbja u jfittxu għall-“għarfien veru.” (2 Tim. 3:1) Huma sejħu lilhom infushom Studenti tal-Bibbja. Dawn ma kinux “l-għorrief u l-intellettwali” li minnhom Ġesù qal li l-għarfien kellu jkun moħbi. (Mt. 11:25) Kienu nies umli li xtaqu sinċerament li jagħmlu r-rieda t’Alla. Huma qraw l-Iskrittura, iddiskutew u mmeditaw fuqha bir-reqqa, u talbu għad-direzzjoni t’Alla. Ukoll, qabblu siltiet mill-Bibbja u eżaminaw il-kitbiet taʼ oħrajn li fittxew bħalhom. Bil-mod il-mod, dawn l-Istudenti tal-Bibbja bdew jifhmu veritajiet li kienu ilhom moħbijin għal sekli sħaħ.
5. X’kien l-iskop tas-serje taʼ fuljetti bl-isem The Old Theology?
5 Għalkemm l-Istudenti tal-Bibbja kienu eċċitati dwar l-affarijiet li kienu qed jitgħallmu, huma ma ħallewx l-għarfien il-ġdid li sabu jneffaħhom bil-kburija; lanqas ma ħadu l-krettu talli xandru xi ħaġa ġdida. (1 Kor. 8:1) Minflok, ippubblikaw serje taʼ fuljetti bl-isem The Old Theology. L-iskop kien biex il-qarrejja jsiru midħla taʼ veritajiet Skritturali li kienu mniżżlin fil-Bibbja. L-ewwel fuljetti għenu lin-nies jistudjaw il-Bibbja biex b’hekk ikunu jistgħu jiċħdu “t-tradizzjonijiet foloz kollha tal-bnedmin” u jaċċettaw it-tagħlim veru taʼ Ġesù u l-appostli, jew “it-teoloġija l-qadima.”—The Old Theology, Nru. 1, April 1889, p. 32.
6, 7. (a) Liema veritajiet ġejna megħjunin nifhmu sa mill-1870? (b) Liema veritajiet kont speċjalment ferħan li titgħallem?
6 Kemm veritajiet meraviljużi nstabu minn dak il-bidu żgħir iktar minn 100 sena ilu! a Dawn il-veritajiet mhumiex affarijiet tedjanti u akkademiċi biex jiġu diskussi mit-teologi. Huma veritajiet eċċitanti u li jagħtu l-ħelsien, jagħtu tifsir lil ħajjitna, u jimlewna b’ferħ u tama. Jgħinuna nsiru nafu lil Ġeħova—il-personalità taʼ mħabba tiegħu u l-iskopijiet tiegħu. Ukoll, jiċċaraw l-irwol taʼ Ġesù, jispjegaw għala għex u miet, u juru x’inhu jagħmel issa. Dawn il-veritajiet prezzjużi jgħinuna nifhmu għala Alla jippermetti l-ħażen, għala mmutu, kif għandna nitolbu, u kif nistgħu nkunu tassew ferħanin.
7 Aħna issa nistgħu nifhmu l-profeziji li baqgħu “sigriet” għal żmien twil imma li issa qed jitwettqu f’dan iż-żmien tat-tmiem. (Dan. 12:9) Dawn jinkludu dawk misjubin fl-Iskrittura kollha, speċjalment fl-Evanġelji u l-ktieb tar-Rivelazzjoni. Ġeħova saħansitra għenna nifhmu ġrajjiet li ma stajniex naraw b’għajnejna—il-ħatra taʼ Ġesù bħala Sultan, il-gwerra fis-sema, u t-twaddib għal isfel taʼ Satana lejn l-art. (Riv. 12:7-12) Ukoll, Alla tana d-dehen biex nifhmu dak li nistgħu naraw—gwerer, terremoti, mard li jittieħed, nuqqas taʼ ikel, kif ukoll nies taʼ mingħajr Alla li jkomplu jżidu maż-“żminijiet kritiċi li diffiċli biex issib tarfhom.”—2 Tim. 3:1-5; Lq. 21:10, 11.
8. Lil min nagħtu l-krettu għall-affarijiet li qed naraw u nisimgħu?
8 Huwa faċli għalina biex nifhmu x’qal Ġesù lid-dixxipli tiegħu: “Henjin l-għajnejn li jaraw dak li qed taraw intom. Għax ngħidilkom, Ħafna profeti u slaten xtaqu jaraw dak li qed taraw intom imma ma rawhx, u jisimgħu dak li qed tisimgħu intom imma ma semgħuhx.” (Lq. 10:23, 24) Aħna nagħtu l-krettu lil Alla Ġeħova talli għamilha possibbli għalina li naraw u nisimgħu affarijiet bħal dawn. U kemm aħna grati li “l-ajjutant,” l-ispirtu qaddis t’Alla, intbagħat biex jiggwida lis-segwaċi taʼ Ġesù “lejn il-verità kollha”! (Aqra Ġwanni 16:7, 13.) Jalla dejjem ngħożżu “l-għarfien veru” u naqsmuh m’oħrajn bla egoiżmu!
“ĦAFNA” JAĊĊETTAW “L-GĦARFIEN VERU”
9. Liema sejħa kien hemm fil-ħarġa taʼ din ir-rivista taʼ April tal-1881?
9 F’April tal-1881, inqas minn sentejn wara li ġiet pubblikata l-ewwel ħarġa tat-Torri tal-Għassa bl-Ingliż, din ir-rivista għamlet sejħa għal 1,000 predikatur. L-artiklu stieden lil dawk kollha li setgħu jiddedikaw nofs il-ħin tagħhom jew iżjed għax-xogħol tal-ippritkar sabiex isiru colporteurs, jew pijunieri. Intalbu jmorru kull fejn setgħu biex ifittxu Kristjani sinċieri li kienu jħobbu lil Alla iżda li ma kellhomx għarfien eżatt u biex jgħallmuhom il-verità dwar Alla u l-Bibbja.
10. In-nies kif wieġbu għas-sejħa għal predikaturi full-time?
10 Din is-sejħa wriet li l-Istudenti tal-Bibbja fehmu li xogħol importanti tal-Kristjani veri hu li jippritkaw l-aħbar tajba. Imma s-sejħa għal 1,000 predikatur full-time kienet ottimista, ladarba ftit mijiet biss kienu jattendu l-laqgħat tal-Istudenti tal-Bibbja f’dak iż-żmien. Madankollu, wara li qraw fuljett jew rivista ħafna nies irrealizzaw li kienu sabu l-verità u wieġbu bla telf taʼ żmien għas-sejħa. Pereżempju, fl-1882, wara li qarrej minn Londra, l-Ingilterra, qara ħarġa tat-Torri tal-Għassa bl-Ingliż u ktejjeb pubblikat mill-Istudenti tal-Bibbja, hu kiteb: “Jekk jogħġobkom għiduli kif u x’għandi nipprietka sabiex nagħmel ix-xogħol imbierek li Alla jixtieq li jsir.”
11, 12. (a) Xi skop għandna aħna li hu bħal tal-colporteurs? (b) Il-pijunieri kif kienu jifformaw “klassijiet,” jew kongregazzjonijiet?
11 Sal-1885, madwar 300 Student tal-Bibbja kienu qed jieħdu sehem fix-xogħol taʼ pijunier. Dawn il-ministri full-time kellhom l-istess skop bħalma għandna aħna llum—dak li nagħmlu dixxipli taʼ Ġesù Kristu. Madankollu, il-metodi tagħhom kienu differenti minn tagħna. Illum, normalment nistudjaw il-Bibbja maʼ persuna waħda, billi nagħtu tagħlim individwali. Imbagħad, nistiednu lill-istudent tal-Bibbja biex jissieħeb maʼ kongregazzjoni li tkun diġà fformat. Fiż-żmien tal-bidu, il-pijunieri kienu jqassmu l-kotba u mbagħad ilaqqgħu lil dawk interessati flimkien biex jistudjaw l-Iskrittura bħala grupp. Minflok ma studjaw maʼ individwi, huma fformaw “klassijiet,” jew kongregazzjonijiet.
12 Pereżempju, fl-1907, grupp taʼ pijunieri fittxew f’ċerta belt biex isibu lil dawk li diġà kellhom il-kopji tal-Millennial Dawn (imsejħin ukoll Studies in the Scriptures). Il-Watch Tower irrapporta: “Dawn [l-uħud interessati] kienu miġburin f’laqgħa żgħira f’waħda mid-djar tagħhom. Il-Colporteur tkellem magħhom dwar il-Pjan Divin taż-Żminijiet tul il-ġurnata tal-Ħadd kollha, u l-Ħadd taʼ wara hu ħeġġiġhom biex jibdew ikollhom laqgħat regulari.” Fl-1911, l-aħwa rranġaw il-proċedura. Tmienja u ħamsin ministru li jivvjaġġa taw taħditiet pubbliċi fl-Istati Uniti u l-Kanada kollha. Dawn l-aħwa akkwistaw l-ismijiet u l-indirizzi tan-nies interessati li attendew għal-lekċers u organizzawhom biex jiltaqgħu flimkien fi djar privati biex jifformaw “klassijiet” ġodda. Sal-1914 kien hemm 1,200 kongregazzjoni tal-Istudenti tal-Bibbja madwar id-dinja.
13. X’jimpressjonak dwar kemm hu mifrux “l-għarfien veru” llum?
13 Illum hemm xi 109,400 kongregazzjoni madwar id-dinja, u xi 895,800 ħu u oħt jaqdu bħala pijunieri. Kważi tmien miljun ruħ issa jaċċettaw “l-għarfien veru” u japplikawh fil-ħajja tagħhom. (Aqra Isaija 60:22.) b Din hija ħaġa impressjonanti ferm ladarba Ġesù bassar li d-dixxipli tiegħu kellhom ikunu “mibgħudin minn kulħadd” minħabba ismu. Hu żied jgħid li s-segwaċi tiegħu kellhom ikunu persegwitati, mitfugħin il-ħabs, u saħansitra maqtulin. (Lq. 21:12-17) Minkejja l-oppożizzjoni taʼ Satana, id-demonji tiegħu, u l-opponenti fost il-bnedmin, in-nies taʼ Ġeħova gawdew suċċess fenomenali f’li jwettqu l-inkarigu tagħhom biex jagħmlu dixxipli. Illum qegħdin jippritkaw “fl-art abitata kollha,” mill-iktar partijiet sħan sa dawk l-iktar kesħin, fil-muntanji, fid-deżerti, fil-bliet, u fil-kampanja fejn hemm ftit nies joqogħdu. (Mt. 24:14) Dan qatt ma setaʼ jseħħ mingħajr l-għajnuna taʼ Ġeħova.
“L-GĦARFIEN VERU” JSIR “ABBUNDANTI”
14. “L-għarfien veru” kif sar magħruf mad-dinja kollha permezz tal-pubblikazzjonijiet tagħna?
14 “L-għarfien veru” sar abbundanti permezz taʼ ħafna wħud li qed jipproklamaw l-aħbar tajba. Sar abbundanti wkoll permezz taʼ pubblikazzjonijiet, bħal kotba u rivisti. F’Lulju tal-1879, l-Istudenti tal-Bibbja ppubblikaw l-ewwel ħarġa taʼ din ir-rivista bit-titlu Zion’s Watch Tower and Herald of Christ’s Presence. Kumpanija kummerċjali stampat 6,000 kopja minn din il-ħarġa bl-Ingliż biss. Charles Taze Russell, li kellu 27 sena, intgħażel bħala l-editur, u kien hemm ħames Studenti tal-Bibbja oħra maturi li kitbu artikli regolarment għar-rivista. It-Torri tal-Għassa issa hu ppubblikat b’195 lingwa. Huwa l-iktar rivista mqassma fid-dinja, b’ċirkulazzjoni taʼ 42,182,000 kopja kull ħarġa. Fit-tieni post hemm ir-rivista Stenbaħ! li tmur id f’id magħha, b’ċirkulazzjoni taʼ 41,042,000 kopja b’84 lingwa. Ukoll, madwar 100 miljun ktieb u Bibbja jiġu stampati kull sena.
15. Ix-xogħol tal-istampar tagħna kif inhu finanzjat?
15 Dan ix-xogħol enormi huwa finanzjat minn kontribuzzjonijiet volontarji. (Aqra Mattew 10:8.) Dan waħdu hu impressjonanti għal dawk fl-industrija tal-istampar li jafu xi spejjeż kbar huma involuti għal stamperiji, karta, linka, u materjal ieħor. Ħu li jixtri l-materjal għall-istamperiji tal-Betel qal: “Nies tan-negozju li jżuru l-istamperiji tagħna jibqgħu mistagħġbin kif faċilità daqstant avanzata teknoloġikament u bi produzzjoni kbira tistaʼ tkun finanzjata minn donazzjonijiet volontarji. Jimpressjonahom ukoll il-fatt li n-nies li jaħdmu fil-Betel huma daqshekk żgħażagħ u ferħanin.”
L-GĦARFIEN DWAR ALLA SE JIMLA L-ART
16. Ġeħova għala għamel “l-għarfien veru” abbundanti?
16 “L-għarfien veru” sar abbundanti għal skop tajjeb. Ir-rieda t’Alla hi li “bnedmin taʼ kull xorta jiġu salvati u jaslu għall-għarfien eżatt dwar il-verità.” (1 Tim. 2:3, 4) Ġeħova jrid lin-nies isiru jafu l-verità biex ikunu jistgħu jqimuh sewwa u jkollhom il-barka tiegħu. Billi Ġeħova għamel magħruf “l-għarfien veru,” hu ġabar fdal leali taʼ Kristjani midlukin. Hu qed jiġbor ukoll “folla kbira” minn “kull ġens u tribù u poplu u lsien,” li għandhom it-tama li jgħixu fuq l-art għal dejjem.—Riv. 7:9.
17. X’turi ż-żieda t’aduraturi veri kullimkien?
17 Iż-żieda t’aduraturi veri kullimkien matul l-aħħar 130 sena ġġibna għall-konklużjoni li ma tistax tiċħadha li Alla u s-Sultan maħtur tiegħu, Ġesù Kristu, kienu mal-qaddejja taʼ Ġeħova fuq l-art—jidderiġuhom, jipproteġuhom, jorganizzawhom, u jedukawhom. Ukoll, iż-żieda tagħhom tenfasizza ċ-ċertezza li l-wegħdi taʼ Ġeħova għall-futur se jitwettqu. “L-art se tkun mimlija bl-għarfien taʼ Ġeħova bħalma l-ilmijiet jiksu l-baħar.” (Is. 11:9) X’barkiet se jesperjenzaw imbagħad il-bnedmin!
[Noti ta’ taħt]
a Int tistaʼ titgħallem iktar meta tara d-DVDs Jehovah’s Witnesses—Faith in Action, Part 1: Out of Darkness u Jehovah’s Witnesses—Faith in Action, Part 2: Let the Light Shine.
[Mistoqsijiet ta’ Studju]
[Stampa f’paġna 6]
L-Istudenti tal-Bibbja tal-bidu kienu nies umli li xtaqu sinċerament li jagħmlu r-rieda t’Alla
[Stampa f’paġna 7]
Ġeħova jgħożż l-isforzi tiegħek biex jinfirex “l-għarfien veru” t’Alla