Ġeħova Jistaʼ Jaħfer—Xi Jfisser Dan Għalik?
“Ġeħova [hu] Alla ħanin u grazzjuż, bil-mod biex jirrabja . . . , jaħfer l-iżball u l-ksur tal-liġi u d-dnub.” —EŻO. 34:6, 7.
FITTEX IT-TWEĠIBIET
Ġeħova x’għamel meta dinbu David u Manasse, u għala?
Ġeħova għala ma ħafirx lill-ġens t’Iżrael?
X’għandna nagħmlu jekk irridu lil Ġeħova jaħfrilna?
1, 2. (a) Ġeħova x’tip t’Alla kien għall-ġens t’Iżrael? (b) Dwar xiex se nitgħallmu f’dan l-artiklu?
FI ŻMIEN Neħemija, grupp taʼ Leviti ammettew f’talba pubblika li l-ġens t’Iżrael ripetutament “ma ridux jisimgħu” mill-kmandamenti taʼ Ġeħova. Imma Ġeħova ħafrilhom darba wara l-oħra. Hu ‘Alla t’atti taʼ maħfra, grazzjuż u mimli ħniena, bil-mod biex jirrabja u għani fil-qalb tajba bl-imħabba.’ Ġeħova kompla jurihom qalb tajba mhux mistħoqqa.—Neħ. 9:16, 17.
2 Kull wieħed u waħda minna jistaʼ jistaqsi lilu nnifsu, ‘Jien kif nistaʼ nibbenefika mill-maħfra t’Alla?’ Biex niġu megħjunin inwieġbu din il-mistoqsija importanti, ejja neżaminaw il-mod kif Alla ttratta maʼ żewġt irġiel li bbenefikaw mill-maħfra taʼ Ġeħova—is-Sultan David u s-Sultan Manasse.
ID-DNUBIET SERJI TAʼ DAVID
3-5. Liema dnubiet serji kkommetta David?
3 Għalkemm David kien raġel li ried jobdi lil Alla, hu kkommetta dnubiet serji. Tnejn minn dawn involvew koppja miżżewġa, Urija u Batseba. Il-konsegwenzi taʼ dawn id-dnubiet kienu taʼ wġigħ għal dawk kollha involuti. Minkejja dan, il-mod kif Alla kkoreġa lil David jgħallimna dwar il-maħfra taʼ Ġeħova. Ejja naraw x’ġara.
4 David bagħat lill-armata t’Iżrael biex tassedja lill-belt kapitali tal-Għammonin, Rabba. Din kienet tinsab xi 80 kilometru lejn il-Lvant taʼ Ġerusalemm, fin-naħa l-oħra tax-Xmara Ġordan. Sadanittant, mill-bejt tal-palazz tiegħu f’Ġerusalemm, David ra lil Batseba—mara miżżewġa—tinħasel. Żewġha kien mal-armata. David tant ried lil Batseba li bagħat lil xi messaġġiera biex iġibuha l-palazz, fejn hu kkommetta adulterju magħha.—2 Sam. 11:1-4.
5 Meta David sar jaf li Batseba kienet tqila, qal lill-kmandant tal-armata tiegħu biex jibgħat lil Urija lura Ġerusalemm bit-tama li dan ikollu relazzjonijiet sesswali magħha. Imma Urija lanqas biss ried jidħol id-dar—minkejja l-isforzi taʼ David biex jinkuraġġih jagħmel dan. Għalhekk, is-sultan bil-moħbi kiteb lill-kmandant tal-armata tiegħu biex lil Urija jpoġġih “fuq quddiem fl-eħrex attakki tal-battalja” u mbagħad jgħid lis-suldati l-oħrajn biex jabbandunawh. Urija ma damx ma nqatel mill-għadu, sewwasew bħalma kien ippjana David. (2 Sam. 11:12-17) Allura s-sultan mhux talli kkommetta adulterju imma talli d-dnub tiegħu għamlu saħansitra agħar billi qatel raġel innoċenti.
DAVID IBIDDEL L-ATTITUDNI TIEGĦU
6. (a) Alla x’għamel wara li David dineb? (b) Dan x’jgħallimna dwar Ġeħova?
6 M’għandniex xi ngħidu, Ġeħova jara kollox, u għalhekk kien jaf x’kien għamel David. (Prov. 15:3) Avolja s-Sultan David iżżewweġ lil Batseba wara li miet Urija, “dak li kien għamel David deher ħażin f’għajnejn Ġeħova.” (2 Sam. 11:27) Allura x’għamel Alla? Bagħat lill-profeta tiegħu Natan għand David. Ladarba Ġeħova hu Alla tal-maħfra, hu ried juri ħniena maʼ David. Imma kellu bżonn isir jaf jekk David verament kienx niedem. Ma jqawwilekx qalbek il-fatt li Ġeħova kien lest li jagħmel dan? Hu ma sforzax lil David jistqarr dnubietu, imma sempliċement qal lil Natan biex jgħid lis-sultan storja li wriet kemm kienu serji d-dnubiet taʼ David. (Aqra t-2 Samwel 12:1-4.) Dan kien mod tajjeb ħafna biex Ġeħova jsir jaf kif David kien qed iħossu verament!
7. David kif ħassu meta semaʼ l-istorja taʼ Natan?
7 Is-sultan ħaseb li dak li ġara fl-istorja taʼ Natan ma kienx ġust. David irrabja għar-raġel għani tal-istorja u qal lil Natan: “Daqskemm hu ħaj Ġeħova, ir-raġel li għamel dan jistħoqqlu jmut!” David qal ukoll li għandu jingħata xi ħaġa lir-raġel li nsterqitlu n-nagħġa. Imma mbagħad Natan qal lil David: “Int hu dak ir-raġel!” Dan ħasdu ħafna lil David. Natan qallu li minħabba dak li kien għamel, David kien se jġarrab traġedja u membri taʼ familtu kienu se jmutu b’mod vjolenti. Kien ukoll se jiġi umiljat fil-pubbliku għal dnubietu. David irrealizza l-gravità t’għemilu u b’dispjaċir ammetta: “Jien dnibt kontra Ġeħova.”—2 Sam. 12:5-14.
DAVID JITLOB U ALLA JAĦFIRLU
8, 9. (a) F’Salm 51, David kif wera kif ħassu dwar dnubietu? (b) X’nistgħu nitgħallmu dwar Ġeħova minn Salm 51?
8 Is-Sultan David iktar tard ikkompona Salm 51. Il-kliem f’dan is-salm juri kemm ħassu dispjaċut. David ittallab maʼ Ġeħova għall-għajnuna. Imma għamel iktar milli sempliċement ammetta l-ħażen tiegħu. Hu nidem ukoll minn dnubietu. Ir-relazzjoni taʼ David m’Alla kienet l-iktar ħaġa importanti għalih. Hu stqarr: “Kontrik u kontrik biss dnibt jien.” Lil Ġeħova talbu bil-ħerqa: “Oħloq fija qalb pura, O Alla, u poġġi ġewwa fija spirtu ġdid, wieħed sod.” U talab: “Erġaʼ agħtini l-ferħ tas-salvazzjoni tiegħek, qajjem fija x-xewqa li nobdik.” (Salm 51:1-4, 7-12) Meta int titkellem maʼ Ġeħova dwar l-iżbalji li għamilt, tkun sinċier u onest miegħu daqskemm kien David?
9 Ġeħova ma pproteġiex lil David mill-konsegwenzi ħżiena taʼ dnubietu. Dawk id-dnubiet kienu se jkomplu jeffettwaw lil David għall-kumplament taʼ ħajtu. Imma peress li David kellu “qalb maqsuma u mgħaffġa,” jew attitudni niedma, Ġeħova ħafirlu. (Aqra Salm 32:5; Salm 51:17) Alla li Jistaʼ Kollox jifhem is-sentimenti u r-raġunijiet veri li jġiegħlu lil individwu jidneb. Għalhekk, Alla ma qalx li l-imħallfin umani kellhom jikkundannaw lil David u Batseba għall-mewt, fi qbil mal-Liġi Mosajka. (Lev. 20:10) Minflok, hu nnifsu ġġudika lil David u Batseba u wera ħniena magħhom. Maż-żmien, binhom Salamun sar is-sultan t’Iżrael.—1 Kron. 22:9, 10.
10. (a) Liema raġuni oħra għandu mnejn kien hemm biex Ġeħova jaħfer lil David? (b) Individwu x’għandu jagħmel biex jinħafer minn Ġeħova?
10 Forsi raġuni oħra għala Ġeħova ħafer lil David hi l-fatt li David innifsu kien wera ħniena maʼ Sawl. (1 Sam. 24:4-7) Bħalma spjega Ġesù, Ġeħova jittrattana bl-istess mod li aħna nittrattaw lil oħrajn. Ġesù qal: “Tibqgħux tiġġudikaw biex ma tiġux ġudikati; għax bl-istess ġudizzju li tiġġudikaw, tiġu ġudikati; u bil-kejl li tkejlu, ikejlulkom.” (Mt. 7:1, 2) Huwa taʼ faraġ li nkunu nafu li Ġeħova jaħfrilna dnubietna, saħansitra dnubiet serji bħall-adulterju jew il-qtil! Imma se jaħfrilna biss jekk aħna nkunu lesti li naħfru lil oħrajn, jekk nistqarru dnubietna miegħu, u jekk inbiddlu l-attitudni tagħna billi nqisu d-dnubiet tagħna kif iqishom Ġeħova. Meta l-midinbin jindmu sinċerament, Ġeħova jagħtihom “staġuni taʼ serħan,” jiġifieri jgħinhom ikollhom kuxjenza nadifa.—Aqra Atti 3:19.
MANASSE JIDNEB SERJAMENT IŻDA JINDEM
11. Is-Sultan Manasse b’liema modi għamel dak li hu ħażin f’għajnejn Alla?
11 Il-Bibbja tagħti eżempju ieħor li juri li Ġeħova hu lest li jaħfer anki dnubiet serji ħafna. Xi 360 sena wara li David beda jaħkem, Manasse sar is-sultan taʼ Ġuda. Ġeħova kkundannah għad-dnubiet diżgustanti li kkommetta matul il-ħakma tiegħu taʼ 55 sena. Pereżempju, Manasse għamel artali lil Bagħal; qiem lix-xemx, lill-qamar, u lill-kwiekeb; ħaraq lil uliedu bħala sagrifiċċju lil alla falz; u inkuraġġixxa lin-nies biex jipprattikaw l-ispiritiżmu. Iva, “għamel kemm felaħ dak li hu ħażin f’għajnejn Ġeħova.”—2 Kron. 33:1-6.
12. Manasse kif dar lura lejn Ġeħova?
12 Eventwalment, Manasse ttieħed minn art twelidu u ntefaʼ f’ħabs Babiloniż. Hemmhekk għandu mnejn ftakar fil-kliem li Mosè qal lil Iżrael: “Meta tkun f’sitwazzjoni mwiegħra u fi tmiem il-jiem jiġrilek skond dan il-kliem kollu, imbagħad ikollok iddur lura lejn Ġeħova Alla tiegħek u tismaʼ leħnu.” (Dt. 4:30) Manasse dar lura lejn Ġeħova. Kif? Hu “baqaʼ jumilja ruħu ħafna” u ‘baqaʼ jitlob’ lil Alla (bħalma jidher fl-istampa f’paġna 21). (2 Kron. 33:12, 13) Il-Bibbja ma tgħidilniex il-kliem eżatt li Manasse lissen f’dak it-talb, imma hu possibbli li kien simili għall-kliem tas-Sultan David f’Salm 51. Kien x’kien il-każ, nafu li Manasse biddel l-attitudni tiegħu kompletament.
13. Ġeħova għala ħafer lil Manasse?
13 Ġeħova kif wieġeb għat-talb taʼ Manasse? “Hu ħallieh [lil Manasse] jitolbu bil-ħrara u Hu semaʼ s-supplika tiegħu għall-ħniena.” Manasse rrikonoxxa s-serjetà taʼ dnubietu u kien verament niedem bħal David. Huwa għalhekk li Alla ħafer lil Manasse u ħallieh imur lura Ġerusalemm bħala s-sultan. Minħabba f’hekk, “Manasse għaraf li Ġeħova hu l-Alla l-veru.” (2 Kron. 33:13) Kemm hu taʼ faraġ li nitgħallmu anki minn dan l-eżempju li Ġeħova hu ħanin u jaħfer lil dawk li jkunu niedma ġenwinament!
ĠEĦOVA DEJJEM JAĦFER?
14. Ġeħova kif jiddeċiedi jekk jaħfirx lil individwu li jkun dineb?
14 Il-biċċa l-kbira min-nies t’Alla qatt mhu se jkollhom jitolbuh jaħfrilhom dnubiet serji daqs dawk taʼ David u Manasse. Madankollu, il-fatt li Ġeħova ħafer lil dawn iż-żewġ slaten jgħinna nagħrfu li Alla tagħna hu lest li jaħfer saħansitra dnubiet gravi jekk il-midneb ikun verament niedem.
15. Kif nafu li l-maħfra taʼ Ġeħova mhijiex awtomatika?
15 M’għandniex xi ngħidu, ma nkunux korretti jekk nikkonkludu li Ġeħova awtomatikament jaħfer id-dnubiet tal-bnedmin kollha. Rigward dan, ejja nqabblu l-attitudni taʼ David u Manasse maʼ dik tan-nies diżubbidjenti t’Iżrael u Ġuda. Alla bagħat lil Natan għand David u tah l-opportunità biex ibiddel l-attitudni tiegħu. David b’apprezzament aċċetta din l-offerta. Meta Manasse sab ruħu f’sitwazzjoni mwiegħra, hu tqanqal biex jindem sinċerament. Però, l-abitanti t’Iżrael u Ġuda spiss ma nidmux. Għalhekk, Ġeħova ma ħafrilhomx. Minflok, darba wara l-oħra bagħat lill-profeti tiegħu biex jgħidulhom kif qies il-kondotta diżubbidjenti tagħhom. (Aqra Neħemija 9:30.) Anki wara li l-Iżraelin minn Babilonja marru lura Ġuda, Ġeħova kompla jibagħtilhom messaġġiera leali, bħall-qassis Esdra u l-profeta Malakija. Meta n-nies aġixxew fi qbil mar-rieda taʼ Ġeħova, huma esperjenzaw ferħ kbir.—Neħ. 12:43-47.
16. (a) Xi ġralhom il-ġens t’Iżrael minħabba li rrifjutaw li jindmu minn dnubiethom? (b) Ġeħova liema opportunità jagħti lil dawk li huma dixxendenti tal-ġens t’Iżrael?
16 Ġeħova m’għadux jaċċetta s-sagrifiċċji tal-annimali li kienu mitlubin mill-ġens t’Iżrael. Minflok, hu bagħat lil Ġesù fuq l-art biex ikun is-sagrifiċċju perfett bħala fidwa għall-umanità kollha. (1 Ġw. 4:9, 10) Meta Ġesù kien fuq l-art, hu tkellem dwar Ġerusalemm b’mod li wera kif Ġeħova ħassu dwarha. Hu qal: “Ġerusalemm, Ġerusalemm, il-qattiela tal-profeti u l-ħaġġara taʼ dawk li ntbagħtulha! Kemm-il darba ridt niġbor lil uliedek flimkien, kif qroqqa tiġbor il-flieles tagħha taħt ġwinħajha! Imma intom dan ma ridtuhx.” Allura Ġesù ddikjara: “Ara! Darkom mitluqa f’idejkom.” (Mt. 23:37, 38) B’hekk, Iżrael spiritwali ħa post il-ġens midneb li ma weriex indiema. (Mt. 21:43; Gal. 6:16) Imma xi ngħidu għall-membri individwali t’Iżrael naturali? Ġeħova lest li jaħfrilhom u jurihom ħniena jekk ikollhom fidi f’Alla u fis-sagrifiċċju taʼ Ġesù Kristu. Matul l-irxoxt fuq l-art, Ġeħova se jkun lest ukoll li jaħfer lin-nies li mietu mingħajr ma nidmu minn dnubiethom.—Ġw. 5:28, 29; Atti 24:15.
NIBBENEFIKAW MILL-MAĦFRA TAʼ ĠEĦOVA
17, 18. Kif nistgħu nirċievu l-maħfra taʼ Ġeħova?
17 Ladarba Ġeħova lest li jaħfrilna, x’għandna nagħmlu? Ċertament li għandna naġixxu kif aġixxew David u Manasse. Għandna nirrikonoxxu li nidinbu, għandna nindmu minn dnubietna, nitolbu bil-ħrara lil Ġeħova biex jaħfrilna, u nistaqsuh jgħinna ninħelsu mix-xewqat ħżiena tagħna. (Salm 51:10) Jekk dnibna serjament, għandna wkoll infittxu l-għajnuna spiritwali tal-anzjani. (Ġak. 5:14, 15) Kienu kemm kienu serji dnubietna, huwa taʼ faraġ li niftakru li Ġeħova hu “Alla ħanin u grazzjuż, bil-mod biex jirrabja u għani fil-qalb tajba bl-imħabba u l-verità, jerfaʼ l-qalb tajba bl-imħabba għal eluf, jaħfer l-iżball u l-ksur tal-liġi u d-dnub.” Ġeħova ma nbidilx.—Eżo. 34:6, 7.
18 Ġeħova wiegħed lill-Iżraelin nedmin li kien se jaħfrilhom kompletament. Hu qal li dnubiethom kienu bħal tebgħa ħamra, imma li kien se jagħmilhom nodfa bħal “silġ” abjad. (Aqra Isaija 1:18.) Allura kif nistgħu nibbenefikaw mill-maħfra taʼ Ġeħova? Nistgħu ninħafru kompletament minn dnubietna dment li napprezzaw il-maħfra taʼ Ġeħova u nindmu.
19. X’se nikkunsidraw fl-artiklu li jmiss?
19 Kif nistgħu nkunu lesti li naħfru lil oħrajn bħalma Ġeħova lest li jaħfer lin-nies? Kif nistgħu naħfru meta oħrajn jikkommettu dnubiet serji u mbagħad jindmu sinċerament? L-artiklu li jmiss se jgħinna neżaminaw lil qalbna stess sabiex insiru iktar bħal Missierna, Ġeħova, li hu ‘tajjeb u lest li jaħfer.’—Salm 86:5.
[Mistoqsijiet ta’ Studju]
[Stampa f’paġna 24]
Minħabba l-maħfra taʼ Ġeħova, Manasse tħalla jmur lura Ġerusalemm bħala s-sultan