1. Pilota għala juża lista meta jkun qed jiċċekkja ajruplan?

KULL darba li pilota jipprepara biex isuq ajruplan, hu jiċċekkjah bir-reqqa. Hu juża lista biex jagħmel ċert li jkun iċċekkja kollox. Jekk ma jiċċekkjax l-ajruplan, forsi ma jindunax bi problema li tistaʼ tikkaġuna aċċident traġiku. Taf liema tip taʼ pilota jiġi mħeġġeġ b’mod partikulari biex jagħmel din il-biċċa xogħol kull darba? Huwa l-pilota li għandu ħafna esperjenza! Pilota bħal dan jistaʼ faċilment jafda wisq fih innifsu u ma jiċċekkjax l-affarijiet kollha fuq il-lista.

2. X’għandna bżonn niċċekkjaw?

² Bħal pilota li jħobb is-sigurtà, int tistaʼ tuża tip taʼ lista biex tkun ċert li l-fidi tiegħek mhix se tiddgħajjef meta l-iktar ikollok bżonnha. Kemm jekk għadek titgħammed u kemm jekk ilek taqdi lil Alla snin sħaħ, huwa essenzjali li regolarment tiċċekkja kemm huma b’saħħithom il-fidi tiegħek f’Alla Ġeħova u d-devozzjoni tiegħek lejh. Jekk ma tiċċekkjax dan regolarment u b’mod diliġenti tistaʼ tispiċċa titlef ir-relazzjoni tiegħek maʼ Ġeħova. Il-Bibbja twissina: “Min jaħseb li hu wieqaf ħa joqgħod attent li ma jaqax.”—1 Kor. 10:12.

3. X’kellhom bżonn jagħmlu l-Kristjani fil-Galazja?

³ Il-Kristjani fil-Galazja kellhom bżonn jiċċekkjaw kemm kienet b’saħħitha l-fidi tagħhom u japprezzaw il-libertà spiritwali tagħhom. Permezz tas-sagrifiċċju tiegħu, Ġesù kien fetaħ it-triq għal dawk li eżerċitaw fidi fih biex isiru jafu lil Alla b’mod tal-għaġeb—setgħu jsiru wlied Alla! (Gal. 4:9) Biex jibqgħu f’dik ir-relazzjoni mbierka, il-Galatin kien se jkollhom jiċħdu t-tagħlim tal-Ġudaisti, li kienu qed jinsistu li josservaw il-Liġi Mosajka. Fil-fatt, fil-kongregazzjonijiet kien hemm xi  Ġentili mhux ċirkonċiżi li qatt ma kienu taħt il-Liġi! Kemm il-Lhud kif ukoll il-Ġentili kellhom bżonn jagħmlu progress spiritwali. Kellhom bżonn jifhmu li Alla ma kienx għadu jirrikjedi li n-nies isegwu l-Liġi.

4, 5. Pawlu liema parir ta lill-Galatin, u dan kif inhu importanti għalina?

⁴ Il-parir tal-appostlu Pawlu lill-Galatin tniżżel bil-miktub bi skop: biex iwaqqaf lill-Kristjani veri fi kwalunkwe perijodu taʼ żmien milli jagħtu daharhom lill-verità tal-Bibbja u milli jerġgħu lura lejn dak li ħallew warajhom. Ġeħova nebbaħ lill-appostlu biex jinkuraġġixxi mhux biss lil dawk fil-kongregazzjonijiet fil-Galazja imma wkoll lill-aduraturi Tiegħu kollha biex jibqgħu leali.

⁵ Kull wieħed minna jagħmel tajjeb jekk jiftakar kif inħeles mill-jasar spiritwali u sar wieħed mix-Xhieda taʼ Ġeħova. Dan tistaʼ tagħmlu billi tikkunsidra dawn iż-żewġ mistoqsijiet: Tiftakar x’passi ħadt biex tikkwalifika għall-magħmudija? Tiftakar kif sirt taf lil Alla u kif ħassejtek meta hu sar jafek?

6. Dwar liema lista se nitgħallmu?

⁶ Meta nidħlu fil-verità, nieħdu disaʼ passi. (Ara l-kaxxa “Il-Passi li Nieħdu Biex Insiru Nafu lil Alla Jistgħu Jgħinuna Nkomplu Nagħmlu Progress.”) Nistgħu nqisu dawn il-passi bħala lista t’affarijiet li nistgħu niċċekkjaw biex inżommu l-fidi tagħna b’saħħitha u biex ma nerġgħux lura lejn l-affarijiet tad-dinja. Bħalma pilota tal-esperjenza iżda li jkun attent dejjem jiċċekkja l-lista tiegħu qabel ma jsuq ajruplan, aħna għandna nibqgħu nirrivedu l-lista tagħna.

7. Liema mudell neħtieġu nsegwu, u għala?

⁷ Bħalma pilota jiċċekkja lista t’affarijiet kull darba li jsuq ajruplan, aħna wkoll nistgħu nibqgħu niċċekkjaw il-progress tagħna fil-verità. Pawlu kiteb lil Timotju: “Ibqaʼ żomm il-mudell taʼ kliem mimli saħħa li smajt mingħandi bil-fidi u l-imħabba li huma fi Kristu Ġesù.” (2 Tim. 1:13) Dan il-“kliem mimli saħħa” jinsab fil-Kelma t’Alla. (1 Tim. 6:3) Tpinġija sempliċi tistaʼ tagħtina ħjiel taʼ kif tidher xi ħaġa. B’mod simili, “il-mudell taʼ kliem mimli saħħa” jgħinna nifhmu b’mod ġenerali dak li Ġeħova jirrikjedi minna. Mela issa ejja nikkunsidraw xi passi li wasslu għall-magħmudija tagħna biex naraw kemm qed insegwu mill-qrib il-mudell tal-verità.

8, 9. (a) Għala għandna nibqgħu nikbru fl-għarfien u fil-fidi? (b) Il-progress tagħna bħala Kristjani għala hu importanti? (ċ) Il-progress tagħna għala hu bħat-tkabbir taʼ siġra?

⁸ L-ewwel pass tagħna kien li ħadna l-għarfien. Imbagħad stajna nrawmu l-fidi. Imma għandna nkomplu nieħdu l-għarfien u nsaħħu l-fidi tagħna. (2 Tess. 1:3) Wara li nitgħammdu, ir-relazzjoni tagħna m’Alla trid tibqaʼ tikber u tissaħħaħ.

⁹ Dan hu simili għall-mod kif tikber siġra. Huwa tal-għaġeb li tara kemm siġra tistaʼ tikber, speċjalment meta jkollha l-għeruq b’saħħithom. Pereżempju, ftit miċ-ċedri sbieħ tal-Libanu jistgħu jkunu għoljin daqs bini li fih 12-il sular. Jistgħu tant ikunu kbar li ħabel taʼ 12-il metru jdur maʼ waħda minnhom biss. (Għan. 5:15) Għall-ewwel siġra tikber malajr ħafna. Hekk kif l-għeruq jinżlu iktar fil-fond u jitbiegħdu iktar mis-siġra, iz-zokk jikber iktar fil-wisaʼ u  fit-tul. Maż-żmien, ma jkunx daqshekk faċli biex tara t-tkabbir tas-siġra. Il-progress tagħna bħala Kristjani huwa simili. Għandna mnejn nagħmlu ħafna bidliet meta għall-ewwel nibdew nistudjaw il-Bibbja u mbagħad nitgħammdu. Oħrajn fil-kongregazzjoni jinnotaw kemm qed nagħmlu progress fil-verità. Forsi nibdew naqdu bħala pijunieri jew ningħataw inkarigi oħrajn fil-kongregazzjoni. Hekk kif jgħaddi ż-żmien, forsi ma jkunx daqshekk faċli għal oħrajn biex jaraw il-progress li qed nagħmlu fil-verità. Imma lkoll irridu nkomplu nikbru fl-għarfien u fil-fidi sakemm inkunu bħal “raġel li kiber għalkollox,” jiġifieri, sakemm inkunu bħalma għandu jkun Kristjan matur. (Efes. 4:13) Allura meta nagħmlu progress bħala Kristjani, aħna nkunu bħal żerriegħa żgħira li tikber u ssir siġra b’saħħitha.

10. Kristjani maturi għala jeħtieġu li jibqgħu jagħmlu progress fil-verità?

¹⁰ Imma l-progress tagħna m’għandux jieqaf hemm. L-għarfien tal-Kelma t’Alla u l-fidi tagħna huma bħal għeruq li jżommuna b’saħħitna u sodi. Dawn l-għeruq iridu jibqgħu jissaħħu. (Prov. 12:3) Fil-kongregazzjoni Kristjana, hemm ħafna aħwa li għamlu dan. Pereżempju, wieħed ħu li ilu anzjan iktar minn 30 sena nnota li għadu qed jikber spiritwalment. Hu jgħid: “L-apprezzament tiegħi għall-Bibbja kiber ferm. Dejjem insib opportunitajiet ġodda biex napplika l-prinċipji u l-liġijiet Bibliċi b’diversi modi. L-apprezzament tiegħi għall-ministeru wkoll jibqaʼ jikber.”

11. Kif nistgħu nsiru nafu lil Ġeħova aħjar maż-żmien?

¹¹ Il-progress tagħna jinvolvi wkoll li nersqu eqreb lejn Ġeħova bħala Ħabibna u Missierna. Hu jridna nħossuna aċċettati. Iridna nkunu nafu li aħna maħbubin u protetti bħalma tifel iħossu maħbub u protett meta jkun imħaddan maʼ ġenitur li jħobbu jew kif inħossuna meta nkunu maʼ ħabib tal-qalb. M’għandniex xi ngħidu, din l-intimità maʼ Ġeħova ma tiżviluppax mil-lum għal għada. Irid jgħaddi ż-żmien biex insiru nafuh u nħobbuh. Allura biex issir taf aħjar lil Ġeħova bħala Persuna, kun determinat li kuljum twarrab il-ħin biex taqra l-Kelma tiegħu. U aqra kull ħarġa tat-Torri tal-Għassa u Stenbaħ! kif ukoll pubblikazzjonijiet oħra bbażati fuq il-Bibbja.

12. X’neħtieġu biex Ġeħova jkun jafna?

 ¹² Il-ħbieb t’Alla jikbru spiritwalment permezz tat-talb sinċier u s-sħubija tajba tagħhom. (Aqra Malakija 3:16.) Widnejn Ġeħova huma “miftuħin għat-talb bil-ħerqa tagħhom.” (1 Pt. 3:12) Bħal ġenitur li jħobb, Ġeħova jismaʼ meta ngħajtulu fit-talb. Għalhekk, għandna bżonn ‘nipperseveraw fit-talb.’ (Rum. 12:12) Ma nistgħux inkomplu nkunu ħbieb t’Alla mingħajr l-għajnuna tiegħu. Jekk ma nibqgħux nitolbu lilu ma jistax ikollna s-saħħa li neħtieġu. Nistgħu nsiru skuraġġiti minħabba din is-sistema mill-agħar jew nitħajru nagħmlu xi ħaġa ħażina. Imma hu lest jagħtina l-għajnuna kollha li għandna bżonn jekk nitolbu għaliha. Titlob int lil Ġeħova bħalma kieku tkellem lil ħabib fdat? Hemm xi modi kif tistaʼ ttejjeb it-talb tiegħek?—Ġer. 16:19.

13. Is-sħubija maʼ sħabna l-Kristjani għala hi vitali biex nikbru spiritwalment?

¹³ Għandna bżonn nibqgħu qrib il-kongregazzjoni biex inkunu m’oħrajn li huma ħbieb taʼ Ġeħova. Hu jħobbhom għax jibqgħu “jfittxu l-kenn fih.” (Naħ. 1:7) F’dinja mimlija skuraġġiment, aħna nkunu għaqlin jekk inkunu mdawrin b’ħutna li jinkuraġġuna. X’inhuma l-benefiċċji? Fil-kongregazzjoni se ssib uħud li se jqanqluk “għall-imħabba u l-għemejjel tajbin.” (Ebr. 10:24, 25) Ma jkunx possibbli li nsegwu l-parir taʼ Pawlu jekk ma nqattgħux ħin mal-aħwa. Allura, agħmel ċert li tmur il-laqgħat regolarment. U ħu sehem fil-laqgħat billi tikkummenta.

14. Il-fatt li nindmu u nieqfu ngħixu ħajja midinba kif inhu proċess kontinwu?

¹⁴ Aħna kellna nindmu u nieqfu ngħixu ħajja midinba meta sirna Kristjani. Madankollu, l-indiema hi proċess kontinwu. Ladarba aħna midinbin u għandna d-dgħufijiet, jistaʼ jkun faċli ħafna għalina li nidinbu. Id-dnub hu bħal serp li lest jigdimna kull meta jistaʼ. (Rum. 3:9, 10; 6:12-14) Ejja noqogħdu b’sebaʼ għajnejn, u ma ninjorawx in-nuqqasijiet tagħna. B’ferħ, Ġeħova hu paċenzjuż magħna waqt li b’ħerqa nissieltu biex nirreżistu d-dgħufijiet tagħna u nagħmlu l-bidliet meħtiġin. (Flp. 2:12; 2 Pt. 3:9) Uża l-ħin u l-enerġija tiegħek fis-servizz taʼ Ġeħova minflok għal raġunijiet egoistiċi. Waħda oħt tikteb: “Jien trabbejt fil-verità, imma kbirt b’ħarsa differenti lejn Ġeħova mill-biċċa l-kbira tan-nies. Ħassejt li kelli nibżaʼ ħafna minnu, u li żgur li qatt ma kien se jirnexxili nogħġbu.” Ma ħassithiex qrib tiegħu u għamlet l-iżbalji f’ħajjitha. Hi tkompli tgħid: “Mhux għax ma kontx inħobb lil Ġeħova, imma għax ma kontx nafu verament. Madankollu, wara ħafna talb intensiv, bdejt nagħmel bidliet.” Hi żiedet tgħid: “Sibt li Ġeħova mexxieni bħal tifla żgħira, u għenni negħleb ostaklu wara l-ieħor, dejjem bil-ġentilezza, u wrieni x’kelli bżonn nagħmel.”

15. X’josservaw Ġesù u Missieru?

¹⁵ “Ibqgħu għidu lin-nies” dwar l-aħbar tajba. L-anġlu t’Alla qal dan il-kliem lil Pietru u lill-appostli l-oħra wara li nħelsu mill-ħabs b’mod mirakoluż. (Atti 5:19-21) Iva, il-parteċipazzjoni tagħna taʼ kull ġimgħa fil-ministeru tal-għalqa hi xi ħaġa oħra li għandna niċċekkjaw fil-lista tagħna. Ġesù u Missieru jinnotaw il-fidi kif ukoll il-ministeru tagħna. (Riv. 2:19) Il-ministeru għandu jkun parti kbira minn ħajjitna.”

16. Għala huwa tajjeb li nimmeditaw fuq id-dedikazzjoni tagħna lil Ġeħova?

¹⁶ Immedita fuq id-dedikazzjoni tiegħek. L-iktar ħaġa prezzjuża li għandna hi r-relazzjoni persunali tagħna maʼ Ġeħova. Hu jaf lil dawk li huma tiegħu.  (Aqra Isaija 44:5.) Iċċekkja r-relazzjoni tiegħek maʼ Ġeħova, u itlob għall-għajnuna tiegħu biex iżżommha b’saħħitha. Flimkien maʼ dan, ftakar fid-data importanti tal-magħmudija tiegħek. Dan ukoll se jgħinek tiftakar li l-magħmudija tiegħek tirrappreżenta l-iktar deċiżjoni sinifikanti li qatt ħadt.

17. Għala neħtieġu s-sabar biex nibqgħu qrib taʼ Ġeħova?

¹⁷ Meta kiteb lill-Galatin, Pawlu enfasizza l-bżonn għas-sabar. (Gal. 6:9) Dan hu vitali għall-Kristjani llum ukoll. Int se tiffaċċja l-provi, imma Ġeħova se jgħinek. Ibqaʼ itlob għall-ispirtu qaddis. Se tħoss serħan hekk kif ibiddel in-niket u d-diqa tiegħek f’ferħ u paċi. (Mt. 7:7-11) Aħseb dwar dan: Jekk Ġeħova jieħu ħsieb l-għasafar, kemm iktar jieħu ħsieb lilek li tħobbu u li ddedikajt ruħek lilu? (Mt. 10:29-31) Huma x’inhuma l-pressjonijiet li tiffaċċja, qatt tmur lura, taqtax qalbek. Aħna għandna ħafna barkiet għax issa Ġeħova jafna!

18. Issa li sirt ‘taf lil Alla,’ x’għandek tkun trid tagħmel?

¹⁸ Kemm jekk tgħammidt dan l-aħħar u kemm jekk tgħammidt ħafna snin ilu, x’għandek tagħmel issa? Ibqaʼ sir afu aħjar lil Ġeħova u ibqaʼ agħmel progress fil-verità. Għandek toqgħod attent li ma taħsibx li tafu tajjeb biżżejjed lil Alla u li m’għandekx għalfejn ittejjeb ir-relazzjoni tiegħek miegħu. Minflok, ilkoll għandna nerġgħu niċċekkjaw il-lista spiritwali tagħna minn żmien għal żmien biex inkunu ċerti li qed inkomplu nsaħħu r-relazzjoni tagħna mal-Missier, il-Ħabib, u l-Alla tagħna kollu mħabba—Ġeħova.—Aqra t-2 Korintin 13:5, 6.