1. Peress li nħlaqna fix-xbieha t’Alla, liema ħila għandna?

“WIĊĊ missieru għandu!” Din hi frażi li jgħiduha ħafna nies. Tabilħaqq, ħafna tfal huma fula maqsuma mal-ġenituri tagħhom. Wara kollox, kull tifel u tifla jirtu kwalitajiet mingħand missierhom u ommhom. Ġeħova, Missierna tas-sema, hu d-Donatur tal-ħajja. (Salm 36:9) U aħna, uliedu l-bnedmin, sa ċertu punt nixbhuh. Peress li nħlaqna fix-xbieha tiegħu, għandna l-ħila nirraġunaw u nieħdu deċiżjonijiet u niżviluppaw u nżommu ħbiberiji.—Ġen. 1:26.

2. Ġeħova jistaʼ jsir il-Ħabib tagħna fuq liema bażi?

² Ġeħova jistaʼ jkun l-aqwa Ħabib tagħna. Ħbiberija bħal din hi bbażata fuq l-imħabba t’Alla għalina u l-fidi tagħna fih u f’Ibnu. Ġesù stqarr: “Alla tant ħabb lid-dinja li ta l-Iben uniġenitu tiegħu, biex kulmin jeżerċita l-fidi fih ma jinqeridx imma jkollu l-ħajja taʼ dejjem.” (Ġw. 3:16) Hemm ħafna eżempji taʼ dawk li kellhom relazzjoni mill-qrib maʼ Ġeħova. Ejja nikkunsidraw tnejn minnhom.

3, 4. X’kuntrast hemm bejn Abraham u d-dixxendenti tiegħu rigward il-ħbiberija maʼ Ġeħova?

³ Ġeħova rrefera għall-patrijarka u l-antenat tal-Iżraelin  bħala “Abraham il-ħabib tiegħi.” (Is. 41:8) It-2 Kronaki 20:7 jikkonferma dan, għax jgħid li Abraham ħabb lil Alla. X’kienet il-bażi għall-ħbiberija dejjiema taʼ dan ir-raġel leali mal-Ħallieq tiegħu? Kienet il-fidi t’Abraham.—Ġen. 15:6; aqra Ġakbu 2:21-23.

⁴ Id-dixxendenti t’Abraham, li saru l-ġens taʼ Iżrael tal-qedem, oriġinalment kellhom lil Ġeħova bħala Missierhom u Ħabibhom. Madankollu, b’sogħba, tilfu l-ħbiberija tagħhom m’Alla. Għala? Għaliex ma baqgħux jeżerċitaw il-fidi tagħhom fil-wegħdi taʼ Ġeħova.

5, 6. (a) Ġeħova kif sar il-Ħabib tiegħek? (b) Liema mistoqsijiet jixirqilhom l-attenzjoni tagħna?

⁵ Iktar ma titgħallem dwar Ġeħova, iktar se tissaħħaħlek il-fidi fih, u mħabbtek lejh se tkun iktar profonda. Ftakar fiż-żmien meta skoprejt li Alla hu Persuna reali, xi ħadd li miegħu stajt tiżviluppa relazzjoni mill-qrib. Sirt taf ukoll li lkoll kemm aħna twelidna fid-dnub minħabba d-diżubbidjenza taʼ Adam. Bdejt tifhem li l-umanità inġenerali hi mbiegħda minn Alla. (Kol. 1:21) Imbagħad bdejt tirrealizza li Missierna tas-sema kollu mħabba mhuwiex xi persuna mbiegħda li tiġi taqaʼ u tqum minna. Meta tgħallimna dwar il-provvediment tiegħu tas-sagrifiċċju taʼ Ġesù bħala fidwa u eżerċitajna l-fidi f’dan il-provvediment, bdejna nibnu ħbiberija m’Alla.

⁶ Hekk kif inħarsu lura, għandna nistaqsu lilna nfusna: ‘Qed nagħmel progress fil-ħbiberija tiegħi m’Alla? Il-fiduċja tiegħi fih hi b’saħħitha? U l-imħabba tiegħi għal dan il-Ħabib maħbub, Ġeħova, qed tikber maʼ kull ġurnata li tgħaddi?’ Individwu ieħor tal-imgħoddi li kellu relazzjoni mill-qrib maʼ Ġeħova kien Gidegħon. Issa, ejja nikkunsidraw l-eżempju mill-aħjar tiegħu u ndaħħluh f’qalbna.

7-9. (a) Gidegħon liema esperjenza rimarkevoli kellu, u x’kien ir-riżultat tagħha? (Ara l-ewwel stampa.) (b) Aħna kif nistgħu nsaħħu l-ħbiberija tagħna maʼ Ġeħova?

⁷ L-Imħallef Gidegħon qeda lil Ġeħova matul perijodu taʼ taqlib fl-istorja taʼ Iżrael wara li l-ġens daħal fl-Art Imwiegħda. Imħallfin kapitlu 6 jirrakkonta li l-anġlu taʼ Ġeħova żar lil Gidegħon f’Għofra. Dakinhar, il-Midjanin kienu veru taʼ theddida għal Iżrael. Għal din ir-raġuni, Gidegħon ma kienx qed jidres il-qamħ f’xi għalqa miftuħa imma f’magħsar tal-inbid, fejn setaʼ jaħbi malajr il-qmuħ taʼ valur. Gidegħon issorprenda ruħu li l-anġlu deherlu u indirizzah bħala “qalbieni u setgħan.” Hu ddubita jekk Ġeħova, li kien ħeles lill-Iżraelin mill-Eġittu, kienx tassew se jgħinhom issa. Meta tkellem għan-nom tal-Ħallieq, l-anġlu assigura lil Gidegħon li Ġeħova verament kien qed jappoġġah.

⁸ Gidegħon beda jitħasseb kif kien se jkun possibbli għalih biex “isalva lil Israel minn id Midjan.” Ir-risposta li rċieva kienet diretta: “Għax se nkun miegħek,” qal Ġeħova, “u int toqtol lil Midjan bħallikieku raġel wieħed.” (Mħ. 6:11-16) Probabbli għax kien għadu qed jitħasseb kif kien se jirnexxilu jagħmel dan, Gidegħon talab sinjal. Innota li f’din il-konversazzjoni, Gidegħon qatt ma ddubita jekk Alla kienx Persuna reali jew le.

⁹ Dak li ġara mbagħad saħħaħ il-fidi taʼ Gidegħon u ressqu eqreb lejn Alla. Gidegħon ħejja ikla u servieha lill-anġlu. Meta l-ikel inbelaʼ min-nar mirakolożament malli ntmess mill-bastun tal-anġlu, Gidegħon irrealizza li l-anġlu kien tabilħaqq ir-rappreżentant taʼ Ġeħova. Maħsud, Gidegħon esklama: “Jaħasra, Sovran Mulej Ġeħova, għax jien rajt l-anġlu taʼ Ġeħova wiċċ imbwiċċ!” (Mħ. 6:17-22)  Imma taħseb li dik l-esperjenza effettwat ħażin il-ħbiberija li Gidegħon kellu maʼ Ġeħova? Xejn affattu! Pjuttost l-oppost. Gidegħon sar jaf lil Ġeħova b’tali mod li ħassu fil-paċi m’Alla. Dan nafuh mill-isem mogħti lill-artal li bena Gidegħon f’dak il-post—“Ġeħova-sliem.” Dan l-isem ifisser “Ġeħova hu paċi.” (Aqra Mħallfin 6:23, 24.) Meta nimmeditaw fuq dak li Ġeħova jagħmlilna kull jum, nibdew nirrealizzaw li hu Ħabib veru. Talb regulari lil Alla jżidilna s-sentimenti taʼ paċi, u jsaħħaħ il-ħbiberija tagħna miegħu.

10. Skont Salm 15:3, 5, Ġeħova x’jirrikjedi minna jekk irridu nkunu ħbiebu?

¹⁰ Madankollu, biex Ġeħova jkun Ħabibna, irridu nissodisfaw ċerti kundizzjonijiet. Kif inhu dokumentat f’Salm 15, David kanta dwar dak li hu meħtieġ minna biex inkunu ‘mistidnin fit-tinda taʼ Ġeħova,’ jiġifieri, biex inkunu ħbieb m’Alla. (Salm 15: 1) Ejja niffokaw fuq tnejn minn dawn il-ħtiġijiet—ma nimmalafamawx u nkunu onesti f’kulma nagħmlu. Rigward dawn il-kwistjonijiet, David qal hekk dwar mistieden fit-tinda taʼ Ġeħova: “Ma mmalafamax bi lsienu. . . . U tixħim kontra l-innoċenti m’aċċettax.”—Salm 15:3, 5.

11. Għala ma rridu nimmalafamaw lil ħadd?

¹¹ F’Salm ieħor, David wissa: “Ħares ilsienek mill-ħażen.” (Salm 34:13) Meta ma nagħtux kas dan il-parir imnebbaħ, inkunu qed nibnu ħajt bejnna u bejn Missierna ġust tas-sema. Difatti, il-malafama hija karatteristika taʼ Satana, l-għadu l-kbir taʼ Ġeħova. It-terminu “Xitan” ġej minn kelma Griega li tissinifika “wieħed li jimmalafama.” Meta noqogħdu attenti x’ngħidu lil oħrajn u x’ngħidu dwarhom, dan se jgħinna nibqgħu qrib Ġeħova. Dan hu speċjalment minnu fejn tidħol l-attitudni tagħna rigward irġiel maħturin fil-kongregazzjoni.—Aqra Ebrej 13:17; Ġuda 8.

12, 13. (a) Għala għandna nkunu onesti f’kollox? (b) L-onestà tagħna kif teffettwa lil oħrajn?

¹² Il-qaddejja taʼ Ġeħova huma magħrufin li huma onesti. L-appostlu Pawlu kiteb: “Ibqgħu itolbu għalina, għax aħna fiduċjużi li għandna kuxjenza onesta, peress li nixtiequ nġibu ruħna bl-onestà f’kollox.” (Ebr. 13:18) Peress li aħna determinati li “nġibu ruħna bl-onestà f’kollox,” ma niħdux vantaġġ minn ħutna l-Kristjani. Pereżempju, jekk jaħdmu għalina, nagħmlu ċert li jiġu trattati b’mod ġust u jitħallsu fi qbil maʼ dak li nkunu qbilna dwaru. Bħala Kristjani, inġibu ruħna bl-onestà mal-impjegati tagħna u maʼ kulħadd. U jekk aħna impjegati maʼ Kristjan seħibna, noqogħdu attenti li ma niħdux vantaġġ minnu billi nistennew li jittrattana b’mod differenti.

¹³ In-nies fid-dinja spiss ifaħħru lix-Xhieda taʼ Ġeħova għall-onestà tagħhom. Pereżempju, id-direttur taʼ kumpanija kbira ħafna nnota li x-Xhieda taʼ Ġeħova jżommu l-wegħdi tagħhom, u qal, “Intom dejjem iżżommu maʼ dak li tkunu qbiltu dwaru.” (Salm 15:4) Kondotta bħal din tgħinna nżommu l-ħbiberija tagħna maʼ Ġeħova. Iktar minn hekk, iġġib tifħir lil Missierna tas-sema kollu mħabba.

14, 15. Fil-ministeru, kif nistgħu ngħinu lil oħrajn isiru l-ħbieb taʼ Ġeħova?

¹⁴ Għalkemm għandhom mnejn jemmnu li Alla jeżisti, ħafna nies li niltaqgħu magħhom fil-ministeru ma jqisuhx bħala l-aqwa Ħabib tagħhom. Kif nistgħu ngħinuhom? Ikkunsidra l-istruzzjonijiet li Ġesù ta lil 70 mid-dixxipli tiegħu meta bagħathom tnejn tnejn sabiex jippritkaw: “Kulfejn tidħlu  f’xi dar, l-ewwel għidu, ‘Jalla jkollha l-paċi din id-dar!’ U jekk ikun hemm ħabib tal-paċi, il-paċi tagħkom tibqaʼ fuqu. Imma jekk le, terġaʼ lura għandkom.” (Lq. 10:5, 6) Nistgħu niġbdu lin-nies lejn il-verità jekk inkunu dħulin magħhom. Jekk nuru qalb tajba maʼ dawk li jopponuna bir-rabja, dan jistaʼ jgħinhom jikkalmaw, u forsi darb’oħra jkunu lesti li jagħtu widen għall-verità.

¹⁵ Meta niltaqgħu maʼ individwi li huma reliġjużi ħafna jew li għandhom drawwiet mhux Skritturali, inkomplu nuru attitudni dħulija u paċifika. Aħna nilqgħu mill-qalb fil-laqgħat tagħna lil kulħadd, speċjalment lil dawk li ma jkunux sodisfatti bid-dinja tal-lum u li għalhekk tqum fihom xewqa li jsiru jafu iktar dwar l-Alla li naduraw aħna. Artikli fis-serje “Il-Bibbja tbiddel il-ħajjiet” jagħtuna ħafna eżempji mill-aħjar.

16. F’liema sens nistgħu nitqiesu kemm il-ħbieb t’Alla kif ukoll “ħaddiema sħab” miegħu?

¹⁶ Nies li jaħdmu flimkien spiss jiżviluppaw ħbiberiji mill-qrib. Dawk kollha li jiddedikaw ruħhom lil Ġeħova għandhom il-privileġġ li jitqiesu kemm il-ħbieb tiegħu kif ukoll “ħaddiema sħab” miegħu. (Aqra l-1 Korintin 3:9.) Tabilħaqq, hekk kif nieħdu sehem fix-xogħol tal-ippritkar u taʼ li nagħmlu dixxipli, nitgħallmu iktar dwar il-kwalitajiet meraviljużi taʼ Missierna tas-sema. Naraw kif l-ispirtu qaddis tiegħu jgħinna billi jarmana ħalli nwettqu l-inkarigu tagħna li nippritkaw l-aħbar tajba.

17. L-ikel spiritwali provdut fl-assembleat u fil-konvenzjonijiet tagħna, kif juru li Ġeħova hu Ħabibna?

¹⁷ Iktar ma jkun kbir is-sehem tagħna fix-xogħol taʼ li nagħmlu dixxipli, iktar inħossuna eqreb lejn Ġeħova. Perkażu, nosservaw il-mod kif Ġeħova jfixkel il-pjanijiet taʼ dawk li jopponuna. Ħarsu lejn il-ftit snin li għaddew. Ma rajniex b’mod ċar il-mod kif Alla qed jiggwidana? Nistagħġbu bil-provvista regulari taʼ ikel spiritwali bnin. Il-programmi tal-konvenzjonijiet u l-assembleat tagħna juru li Missierna kollu mħabba jifhem il-problemi u l-bżonnijiet tagħna. F’ittra t’apprezzament għal konvenzjoni, familja kitbet: “Il-programm tassew messilna qalbna. Ħassejna kemm Ġeħova jħobb lil kull wieħed u waħda minna u jridna nirnexxu.” Wara li attendew konvenzjoni speċjali fl-Irlanda, koppja mill-Ġermanja esprimew il-gratitudni tagħhom għall-mod kif l-aħwa laqgħuhom mill-qalb u ħadu ħsiebhom, u żiedu: “Imma l-akbar ringrazzjament imur lil Ġeħova u lis-Sultan Ġesù Kristu. Huma stidnuna biex inkunu parti minn dan il-ġens verament unit. M’aħniex biss nitkellmu dwar l-unità, imma wkoll qed ingawduha kuljum.  L-esperjenzi tagħna f’konnessjoni mal-konvenzjoni speċjali f’Dublin dejjem se jfakkruna fil-privileġġ prezzjuż li għandna li naqdu lil Alla l-kbir tagħna flimkien magħkom ilkoll.”

18. X’nistgħu nistaqsu lilna nfusna rigward il-komunikazzjoni tagħna maʼ Ġeħova?

¹⁸ Il-ħbiberiji jsiru iktar profondi meta teżisti komunikazzjoni tajba. Illum, in-nies il-ħin kollu jużaw l-Internet u jibagħtu messaġġi bil-mowbajl. Imma dan kif jitqabbel mal-komunikazzjoni tagħna mal-aqwa Ħabib tagħna, Ġeħova? Veru, hu “Semmiegħ it-talb.” (Salm 65:2) Imma kemm spiss nieħdu l-inizjattiva biex nitkellmu miegħu?

19. X’jistaʼ jgħinna jekk insibuha diffiċli biex niftħu qlubna maʼ Missierna tas-sema?

¹⁹ Xi qaddejja t’Alla ma jsibuhiex faċli li jiftħu qlubhom u jesprimu l-emozzjonijiet profondi tagħhom. Madankollu, dak hu li jridna nagħmlu Ġeħova meta nitolbu. (Salm 119:145; Lam. 3:41) Anki jekk insibu li espressjonijiet mill-qalb bħal dawn ikunu diffiċli biex nesprimuhom bil-kliem, m’aħniex mingħajr għajnuna. Pawlu kiteb lill-Kristjani f’Ruma: “Il-problema hi li ma nafux għalxiex għandna nitolbu kif hemm bżonn li nagħmlu, imma l-ispirtu nnifsu jitlob bil-ħniena għalina bi krib li ma jitlissinx. Iżda dak li jfittex fil-qlub jaf x’inhi t-tifsira taʼ l-ispirtu, għax dan qed jitlob bil-ħniena f’armonija m’Alla għall-qaddisin.” (Rum. 8:26, 27) Il-meditazzjoni fuq il-kliem dokumentat f’kotba Bibliċi bħal Ġob, Salmi, u Proverbji se tgħinna nesprimu s-sentimenti l-iktar ġewwinin tagħna lil Ġeħova.

20, 21. Il-kliem taʼ Pawlu f’Filippin 4:6, 7, liema faraġ jagħtina?

²⁰ Meta nħabbtu wiċċna maʼ sitwazzjonijiet taʼ niket, ejja nagħtu kas il-parir ispirat taʼ Pawlu lill-Filippin: “Tkunu ansjużi fuq xejn, imma f’kollox b’talb u b’suppliki flimkien maʼ radd il-ħajr ħallu lil Alla jkun jaf x’teħtieġu.” Komunikazzjoni bil-miftuħ bħal din mal-aqwa Ħabib tagħna żgur li tfarraġna u tikkonslana, għax Pawlu jżid: “Il-paċi t’Alla li tisboq kull ħsieb tgħasses lil qalbkom u l-qawwa mentali tagħkom permezz taʼ Kristu Ġesù.” (Flp. 4:6, 7) Jalla dejjem ngħożżu “l-paċi t’Alla” li ma titqabbel maʼ xejn u li tassew tgħasses lil qlubna u l-qawwa mentali tagħna.

²¹ It-talb jgħinna nikkultivaw ħbiberija maʼ Ġeħova. Għalhekk, ejja ‘nitolbu bla waqfien.’ (1 Tess. 5:17) Jalla dan l-istudju jsaħħaħ ir-relazzjoni prezzjuża tagħna m’Alla u d-determinazzjoni tagħna biex inġibu ħajjitna fi qbil mal-ħtiġijiet ġusti tiegħu. U ejja nwarrbu l-ħin biex nimmeditaw fuq il-barkiet li ngawdu għax Ġeħova hu verament Missierna, Alla tagħna, u l-Ħabib tagħna.