1, 2. Ġesù kif qawwa qalb id-dixxipli tiegħu fil-ġurnata meta ġie rxoxtat?

FIL-ġurnata li Ġesù ġie rxoxtat, tnejn mid-dixxipli tiegħu kienu mexjin lejn raħal li kien xi 11-il kilometru ’l bogħod minn Ġerusalemm. Kienu mnikktin għax Ġesù kien ġie maqtul u kienu għadhom ma jafux li ġie rxoxtat. F’daqqa waħda, deher Ġesù u beda miexi magħhom. Imbagħad “beda minn Mosè u l-Profeti kollha jfissrilhom dak li kien hemm miktub fuqu fl-Iskrittura kollha.” (Luqa 24:13-15, 27) Ħassewhom imfarrġin u qalbhom bdiet titkebbes fihom, għax Ġesù kien qed ‘jispjegalhom ċar’ l-Iskrittura.—Luqa 24:32.

² Dik l-istess lejla, dawn iż-żewġ dixxipli marru lura Ġerusalemm. Meta sabu l-appostli, qalulhom b’dak li kien ġara. Kif kienu qed jitkellmu, Ġesù deher f’nofshom. L-appostli tgħidx kemm beżgħu u bdew jiddubitaw jekk dan kienx veru Ġesù. Ġesù kif qawwielhom qalbhom? Il-Bibbja tispjega bil-kliem: “Fetħilhom moħħhom biex jifhmu l-Iskrittura.”—Luqa 24:45.

3. Għala nistgħu nħossuna skuraġġiti fis-servizz tagħna lil Ġeħova, imma kif nistgħu nibqgħu ferħanin?

³ Xi kultant jistaʼ jkun li nħossuna mnikktin ħafna, bħalma ħassewhom dawn id-dixxipli. Għalkemm  inkunu beżlin f’li naqdu lil Ġeħova, forsi nħossuna skuraġġiti għax in-nies ma jagħtux widen meta nippritkawlhom. (1 Korintin 15:58) Jew forsi nħossu li l-istudenti tal-Bibbja tagħna mhux qed jagħmlu biżżejjed progress. Xi wħud minnhom jistgħu saħansitra jagħtu daharhom lil Ġeħova. Kif nistgħu nibqgħu ferħanin fil-ministeru tagħna? Ħaġa li se tgħinna hi li nifhmu sew it-tixbihat taʼ Ġesù. Issa se neżaminaw tlieta minnhom u naraw x’nistgħu nitgħallmu.

4. Xi tfisser it-tixbiha taʼ Ġesù dwar dak li jiżraʼ u mbagħad jorqod?

⁴ Aqra Marku 4:26-29. Xi tfisser it-tixbiha taʼ Ġesù dwar dak li jiżraʼ u mbagħad jorqod? Dak li jiżraʼ jirrappreżenta lill-predikaturi tas-Saltna, u ż-żerriegħa tirrappreżenta l-messaġġ li jippritkaw lil nies b’attitudni xierqa. Dak li jiżraʼ jagħmel l-affarijiet normali li jagħmel ħaddieħor, “jorqod bil-lejl u jqum bi nhar.” Iż-żerriegħa ma tikbirx mil-lum għal għada. Il-proċess idum minn meta ż-żerriegħa tinżeraʼ sakemm jasal il-ħsad. Iż-żerriegħa “tinbet u tikber” waħedha, bil-mod il-mod u pass pass. B’mod simili, individwu jikber spiritwalment, jew jersaq qrib taʼ Ġeħova, bil-mod il-mod u pass pass. Meta jagħmel progress sal-punt li jiddeċiedi li jaqdi lil Alla, hu ‘jagħti l-frott’ billi jiddedika ħajtu lil Ġeħova u jitgħammed.

5. Ġesù għala ta t-tixbiha dwar dak li jiżraʼ u mbagħad jorqod?

⁵ Ġesù għala ta din it-tixbiha? Ġesù jridna nirrealizzaw li Ġeħova hu dak li jagħmel il-verità tikber f’qalb dawk li għandhom “attitudni xierqa.” (Atti 13:48; 1 Korintin 3:7) Aħna niżirgħu u nsaqqu, imma ma nistgħux inġiegħlu ż-żerriegħa tikber jew inħaffu t-tkabbir tagħha. Bħar-raġel fit-tixbiha, ma nafux kif ikun qed isir it-tkabbir. Hekk kif inkunu għaddejjin b’ħajjitna, nafu lanqas biss nindunaw li ż-żerriegħa tas-Saltna qed tikber f’ħaddieħor. Imma maż-żmien, jistaʼ ‘jagħti l-frott,’ u mbagħad id-dixxiplu l-ġdid se jaħdem magħna fix-xogħol tal-ħsad.—Ġwanni 4:36-38.

6. Xi rridu nammettu dwar il-progress li jagħmel student tal-Bibbja?

⁶ X’nistgħu nitgħallmu minn din  it-tixbiha? L-ewwel, għandna bżonn nammettu li ma nistgħux nikkontrollaw il-pass li bih student tal-Bibbja jagħmel progress fil-verità. Għalkemm nagħmlu kulma nistgħu biex ngħinu u nappoġġaw l-istudent, qatt m’għandna nagħmlulu pressjoni biex jitgħammed. Minflok, b’umiltà nirrealizzaw li hu biss jistaʼ jiddeċiedi jekk hux se jiddedika ħajtu lil Ġeħova jew le. L-uniku mod kif Ġeħova jaċċetta d-dedikazzjoni tagħna hu jekk verament inħobbuh.—Salm 51:12; 54:6; 110:3.

7, 8. (a) X’nistgħu nitgħallmu iktar mit-tixbiha taʼ Ġesù dwar dak li jiżraʼ u mbagħad jorqod? Agħti eżempju. (b) Dan x’jgħallimna dwar Ġeħova u Ġesù?

⁷ It-tieni, jekk nifhmu l-lezzjoni taʼ din it-tixbiha se niġu megħjunin biex ma naqtgħux qalbna jekk għall-ewwel ma narawx riżultati mix-xogħol taʼ tagħlim tagħna. Irridu nkunu paċenzjużi. (Ġakbu 5:7, 8) Jekk għamilna l-aħjar tagħna biex ngħinu lill-istudent imma l-verità ma tikbirx f’qalbu, dan ma jfissirx li m’aħniex għalliema tajbin. Ġeħova jħalli ż-żerriegħa tal-verità tikber biss f’qalb individwu umli li lest li jagħmel bidliet. (Mattew 13:23) Għalhekk, m’għandniex niġġudikaw kemm aħna effettivi fil-ministeru tagħna sempliċement minn kemm jirnexxilna nwasslu nies għall-magħmudija. Wara kollox, Ġeħova ma jikkalkulax kemm qed ikollna suċċess fil-ministeru tagħna mill-ammont taʼ nies li jniżżlu f’qalbhom dak li qed ngħallmuhom. Minflok, japprezza l-isforzi ħabrieka tagħna.—Aqra Luqa 10:17-20; 1 Korintin 3:8.

⁸ It-tielet, aħna mhux dejjem nistgħu naraw il-bidliet li jkunu qed iseħħu f’qalb dak li jkun. Pereżempju, koppja li kienu qed jistudjaw maʼ missjunarju qalulu li riedu jsiru pubblikaturi mhux mgħammdin. Hu fakkarhom li l-ewwel kellhom jieqfu jpejpu. Baqaʼ sorpriż meta qalulu li ilhom li waqfu jpejpu diversi xhur. Kienu ndunaw li anki jekk ipejpu bil-moħbi, Ġeħova xorta setaʼ jarahom u kienu jafu li jobgħod l-ipokrisija. Għalhekk, iddeċidew li jew kienu se jpejpu quddiem il-missjunarju jew inkella jieqfu għalkollox. Għalkemm il-missjunarju ma kien jaf xejn dwar il-bidla kbira li kienu għamlu l-koppja, l-imħabba tagħhom għal Ġeħova li kienet qed tikber għenithom jieħdu d-deċiżjoni t-tajba.

9. Xi tfisser it-tixbiha taʼ Ġesù dwar ix-xibka l-kbira?

⁹ Aqra Mattew 13:47-50. Xi tfisser it-tixbiha taʼ Ġesù dwar ix-xibka l-kbira? Ġesù qal li l-ippritkar tal-messaġġ tas-Saltna hu bħal xibka kbira li tiġi mitfugħa l-baħar. Bħalma  xibka kbira taqbad kwantità kbira taʼ “ħut taʼ kull xorta,” l-ippritkar tagħna jattira lil miljuni taʼ nies taʼ kull xorta. (Isaija 60:5) Il-miljuni taʼ nies li jiġu kull sena għall-konvenzjonijiet tagħna u għat-Tifkira juru kemm hu minnu dan. Xi wħud minn dawn in-nies huma bħal ħut ‘tajjeb,’ u jsiru parti mill-kongregazzjoni Kristjana. Oħrajn huma bħal ħut ‘ħażin,’ u Ġeħova ma jaċċettahomx.

10. Ġesù għala ta t-tixbiha dwar ix-xibka l-kbira?

¹⁰ Ġesù għala ta din it-tixbiha? Fit-tixbiha, il-ħut tajjeb jinfired mill-ħut ħażin. Dan ma jirreferix għall-ġudizzju finali li se jsir matul it-tribulazzjoni l-kbira. Minflok, jispjega xi ħaġa li qed isseħħ matul l-aħħar jiem taʼ din is-sistema. Ġesù wera li mhux kull min jogħġbu l-messaġġ tas-Saltna se jkun irid isir qaddej taʼ Ġeħova. Ħafna wħud li ġew il-laqgħat tagħna jew li studjaw il-Bibbja magħna mhumiex lesti li jiddedikaw ħajjithom lil Ġeħova. (1 Slaten 18:21) Oħrajn anke waqfu jiġu l-laqgħat. Xi żgħażagħ trabbew minn ġenituri Kristjani, imma ma bnewx relazzjoni mill-qrib huma stess maʼ Ġeħova. Ġesù enfasizza li kull wieħed u waħda minna għandu bżonn jieħu deċiżjoni persunali. Jekk nieħdu d-deċiżjoni t-tajba, Ġeħova se jqisna bħala wħud “mixtiqin,” jew prezzjużi.—Ħaggaj 2:7.

11, 12. (a) Kif nistgħu nibbenefikaw mit-tixbiha dwar ix-xibka l-kbira? (b) Dan x’jgħallimna dwar Ġeħova u Ġesù?

¹¹ Kif nistgħu nibbenefikaw mit-tixbiha dwar ix-xibka l-kbira? Li nifhmu l-lezzjoni taʼ din it-tixbiha se jgħinna ma nkunux imnikktin jew diżappuntati żżejjed jekk xi student tal-Bibbja jew wieħed minn uliedna ma jkunx irid jaqdi lil Ġeħova. Jistaʼ jkun li għamilna kulma stajna biex inħarrġuh. Dak li jkun ma jsirx il-ħabib t’Alla b’mod awtomatiku sempliċement għax aċċetta li jistudja l-Bibbja jew għax trabba fil-verità. Jekk mhuwiex lest li jaċċetta l-awtorità taʼ Ġeħova, ma jistax ikun wieħed mill-qaddejja t’Alla.

¹² Ifisser dan li dawk li telqu mill-verità qatt mhu se jitħallew jiġu  lura fil-kongregazzjoni? Ifisser li m’hemmx tama għal xi ħadd li għadu ma ddedikax ħajtu lil Ġeħova? Le, il-bieb għadu miftuħ biex dak li jkun isir il-ħabib taʼ Ġeħova qabel ma tfaqqaʼ t-tribulazzjoni l-kbira. Ġeħova jgħidilhom: “Erġgħu lura lejja, u jien nerġaʼ lura lejkom.” (Malakija 3:7) Dan jiġi enfasizzat fit-tixbiha taʼ Ġesù dwar l-iben il-ħali.—Aqra Luqa 15:11-32.

13. Xi tfisser it-tixbiha taʼ Ġesù dwar l-iben il-ħali?

¹³ Xi tfisser it-tixbiha taʼ Ġesù dwar l-iben il-ħali? Il-missier mimli ħniena fit-tixbiha jagħti stampa taʼ Missierna tas-sema kollu mħabba, Ġeħova. L-iben li m’apprezzax il-wirt prezzjuż tiegħu jagħti stampa tan-nies li jitilqu mill-kongregazzjoni Kristjana. Dawn isiru parti mid-dinja taʼ Satana, li hi bħal “pajjiż imbiegħed,” ’il bogħod ħafna minn Ġeħova. (Efesin 4:18; Kolossin 1:21) Maż-żmien, xi ftit minn dawn l-uħud jintebħu li żbaljaw bl-ikrah u jiddeċiedu li jerġgħu lura għand Ġeħova. Dan jirrikjedi sforz, imma minħabba li huma umli u jiddispjaċihom b’mod ġenwin għal li għamlu, Ġeħova jaħfrilhom u b’ħerqa jilqagħhom lura.—Isaija 44:22; 1 Pietru 2:25.

14. Ġesù għala ta t-tixbiha dwar l-iben il-ħali?

¹⁴ Ġesù għala ta din it-tixbiha? Ġesù wera li Ġeħova mill-fond taʼ qalbu jrid li dawk li telquh jerġgħu lura. Il-missier fit-tixbiha dejjem baqaʼ jittama li ibnu jirritorna. Meta ra lil ibnu ġej “waqt li kien għadu ’l bogħod,” telaq jiġri biex jilqgħu. Il-missier ried li ibnu jkun jaf li kien ferħan li kien ġie lura. It-tixbiha għandha tqanqal lil dawk li telqu mill-verità biex mill-ewwel jirritornaw lejn Ġeħova. Veru, ir-relazzjoni tagħhom miegħu taf tkun dgħajfa  ħafna, għandhom mnejn iħossuhom imbarazzati, u jistaʼ jidher diffiċli wisq biex jerġgħu lura, imma l-isforz hu taʼ min jagħmlu! Meta jirritornaw, Ġeħova, Ġesù, u l-anġli se jifirħu.—Luqa 15:7.

15, 16. (a) X’nitgħallmu mit-tixbiha taʼ Ġesù dwar l-iben il-ħali? Agħti xi eżempji. (b) Dan x’jgħallimna dwar Ġeħova u Ġesù?

¹⁵ Kif nistgħu nibbenefikaw mit-tixbiha dwar l-iben il-ħali? Għandna nimitaw l-eżempju taʼ mħabba taʼ Ġeħova. Meta xi ħadd jirritorna fil-kongregazzjoni, m’għandniex inkunu ‘ġusti żżejjed’ u nirrifjutaw li nilqgħuh lura. Dan jistaʼ jagħmel ħsara lill-ħbiberija tagħna stess maʼ Ġeħova. (Ekkleżjasti 7:16) Lezzjoni oħra li nistgħu nitgħallmu mit-tixbiha hi li għandna nħarsu lejn xi ħadd li telaq mill-kongregazzjoni bħala “nagħġa mitlufa,” nagħġa li hemm ċans li tirritorna. (Salm 119:176) U jekk niltaqgħu maʼ xi ħadd li telaq mill-kongregazzjoni imma li mhuwiex maqtugħ mis-sħubija, se nagħmlu aħna kulma nistgħu biex ngħinuh jirritorna? Ikun xi jkun il-każ, se ngħidu aħna lill-anzjani mill-ewwel ħalli jkunu jistgħu jgħinuh? Iva, hekk se nagħmlu jekk verament nifhmu u napplikaw il-lezzjoni mit-tixbiha taʼ Ġesù.

¹⁶ Dawk li jirritornaw huma grati għall-ħniena taʼ Ġeħova u għall-imħabba u l-appoġġ tal-kongregazzjoni. Ħu li kien maqtugħ mis-sħubija għal 25 sena jgħid: “Minn mindu ġejt aċċettat lura, il-ferħ tiegħi baqaʼ jiżdied hekk kif irċivejt ‘staġuni taʼ serħan mingħand Ġeħova.’ (Atti 3:19) Kulħadd jagħtini ħafna appoġġ u jurini ħafna mħabba! Issa għandi familja spiritwali mill-isbaħ!” Oħt żagħżugħa li ġiet lura fil-kongregazzjoni wara ħames snin tgħid: “Ma nistax niddeskrivi kif ħassejtni meta rajt l-imħabba li tkellem dwarha Ġesù murija lili b’mod tant ċar. M’hemm xejn aħjar milli tkun parti mill-organizzazzjoni taʼ Ġeħova!”

17, 18. (a) X’tgħallimna minn dawn it-tliet tixbihat? (b) X’aħna determinati li nagħmlu?

¹⁷ X’tgħallimna minn dawn it-tliet tixbihat? L-ewwel, irridu nifhmu li ma nistgħux nikkontrollaw il-pass li bih student tal-Bibbja jagħmel progress fil-verità. Inħallu dan f’idejn Ġeħova. It-tieni, ma nkunux realistiċi jekk nippretendu li dawk kollha li jissieħbu u jistudjaw magħna se jkunu jridu jaqdu lil Ġeħova. U t-tielet, għalkemm xi wħud forsi jitilqu lil Ġeħova, jalla dejjem nibqgħu nittamaw li jerġgħu lura. U meta jirritornaw, ejja nilqgħuhom lura b’mod li juri l-imħabba taʼ Ġeħova.

¹⁸ Jalla kull wieħed u waħda minna jkompli jikseb l-għarfien, l-abbiltà li jifhem, u l-għerf. Hekk kif taqra t-tixbihat taʼ Ġesù, staqsi lilek innifsek: ‘Din it-tixbiha xi tfisser? Għala ġiet imniżżla fil-Bibbja? Kif nistaʼ napplika dak li nitgħallem minnha? X’nitgħallem minn din dwar Ġeħova u Ġesù?’ Meta nagħmlu hekk, nuru li qed nifhmu kliem Ġesù.