B’lealtà nappoġġaw lil ħut Kristu
“Kulmeta għamiltu dan maʼ wieħed mill-iżgħar minn dawn ħuti, għamiltuh miegħi.”—MATTEW 25:40.
1, 2. (a) Ġesù liema tixbihat qal lill-ħbieb tal-qalb tiegħu? (Ara l-ewwel stampa.) (b) X’għandna nkunu nafu dwar it-tixbiha tan-nagħaġ u l-mogħoż?
ĠESÙ kien qed jitkellem mal-ħbieb tal-qalb tiegħu Pietru, Indrì, Ġakbu, u Ġwanni dwar xi ħaġa interessanti ħafna. Wara li qalilhom it-tixbihat tal-ilsir leali u għaqli, tal-għaxar verġni, u tat-talenti, Ġesù qal lill-ħbieb tiegħu tixbiha oħra. Fiha, tkellem dwar żmien meta “Bin il-bniedem” se jiġġudika “l-ġnus kollha.” Hu qal li “Bin il-bniedem” se jifred lin-nies f’żewġ gruppi, grupp minnhom iddeskrivieh bħala n-nagħaġ u l-ieħor bħala l-mogħoż. U hu ddeskriva grupp importanti ieħor, jiġifieri ‘ħut’ is-Sultan.—Aqra Mattew 25:31-46.
2 Bħall-appostli, anki l-qaddejja taʼ Ġeħova taʼ żmienna kienu u għadhom interessati f’din it-tixbiha minħabba li l-ħajja tan-nies hi involuta. Ġesù qal li xi wħud se jirċievu l-ħajja taʼ dejjem, imma oħrajn se jinqerdu. Għalhekk, huwa importanti ħafna li nkunu nafu xi tfisser it-tixbiha u x’għandna nagħmlu biex nirċievu l-ħajja taʼ dejjem. Allura f’dan l-artiklu, se nwieġbu l-mistoqsijiet li ġejjin: Ġeħova kif għenna nifhmu din it-tixbiha? Kif nafu li t-tixbiha tenfasizza x-xogħol tal-ippritkar? Min għandu jipprietka? U għala hu importanti għan-nies li jkunu leali issa lejn ‘is-Sultan’ u ‘ħutu’?
ĠEĦOVA KIF GĦENNA NIFHMU T-TIXBIHA?
3, 4. (a) X’neħtieġu nkunu nafu biex nifhmu din it-tixbiha? (b) Fl-1881, It-Torri tal-Għassa kif spjega din it-tixbiha?
3 Sabiex nifhmu dak li tfisser it-tixbiha tan-nagħaġ u l-mogħoż, neħtieġu nkunu nafu t-tweġiba tal-mistoqsijiet li ġejjin: (1) Min hu “Bin il-bniedem,” jew ‘is-Sultan,’ min huma n-nagħaġ u l-mogħoż, u min huma ‘ħut’ is-Sultan? (2) Meta “Bin il-bniedem” se jifred, jew jiġġudika, lin-nagħaġ u l-mogħoż? u (3) Għala xi wħud jissejħu nagħaġ u oħrajn mogħoż?
4 Fl-1881, It-Torri tal-Għassa qal li “Bin il-bniedem,” jew ‘is-Sultan,’ hu Ġesù. Spjega wkoll li ‘ħut’ is-Sultan mhumiex biss dawk li se jmexxu fis-sema maʼ Ġesù imma wkoll in-nies kollha li se jgħixu fuq l-art meta jsiru perfetti. It-Torri tal-Għassa qal li n-nies se jiġu mifrudin matul it-Tmexxija taʼ Elf Sena taʼ Kristu u li dawk li imitaw l-imħabba t’Alla f’kulma jkunu għamlu se jissejħu nagħaġ.
5. Fl-1923, in-nies t’Alla kif fehmu t-tixbiha?
5 Iktar tard, Ġeħova għen lin-nies tiegħu biex jifhmu iktar ċar din it-tixbiha. Fl-1923, It-Torri tal-Għassa tal-15 t’Ottubru qal li “Bin il-bniedem” hu Ġesù. Imma mbagħad uża versi Bibliċi biex jispjega li ‘ħut’ Ġesù fit-tixbiha jirreferu biss għal dawk li se jmexxu maʼ Ġesù u li lkoll kemm huma se jkunu fis-sema matul it-Tmexxija taʼ Elf Sena. Qal ukoll li n-nagħaġ jirreferu għal dawk li se jgħixu fuq l-art taħt it-tmexxija taʼ Ġesù u ħutu. U ladarba t-tixbiha tgħid li dawn se jgħinu lil ħut is-Sultan, il-frid, jiġifieri l-ġudizzju, għandu jseħħ waqt li ħut Ġesù l-midlukin ikunu għadhom fuq l-art, jiġifieri qabel ma tibda t-Tmexxija taʼ Elf Sena. L-artiklu qal ukoll li n-nagħaġ se jkunu dawk li jemmnu b’Ġesù u li jemmnu li s-Saltna se ġġib ħajja aħjar.
6. Fl-1995, kif tbiddlet il-fehma tagħna dwar din it-tixbiha?
6 Għal ħafna snin konna naħsbu li n-nies qed jiġu ġġudikati permezz tal-ippritkar f’dan iż-żmien tal-aħħar. Kieku aċċettaw il-messaġġ, kienu jkunu nagħaġ, u kieku rrifjutaw il-messaġġ, kienu jkunu mogħoż. Imma fl-1995, il-fehma tagħna dwar din it-tixbiha tbiddlet. It-Torri tal-Għassa qabbel Mattew 24:29-31 (aqra) maʼ Mattew 25:31, 32 (aqra), u spjega li Ġesù se jiġġudika lin-nies matul it-tribulazzjoni l-kbira meta hu bħala Bin il-bniedem “jasal fil-glorja tiegħu.” a
Aħna ninsabu grati ħafna li Ġeħova għenna nifhmu t-tixbihat taʼ Ġesù
7. Xi tfisser it-tixbiha?
7 Illum, nifhmu t-tixbiha tan-nagħaġ u l-mogħoż b’mod ċar. Aħna nafu li “Bin il-bniedem,” jew ‘is-Sultan,’ hu Ġesù. ‘Ħut’ is-Sultan huma dawk li huma midlukin bl-ispirtu qaddis u li se jmexxu fis-sema maʼ Ġesù. (Rumani 8:16, 17) “In-nagħaġ” u “l-mogħoż” huma nies minn kull ġens. Huma se jiġu ġġudikati lejn l-aħħar tat-tribulazzjoni l-kbira li dalwaqt se tibda. U aħna nafu li Ġesù se jiġġudika lin-nies skont kif ittrattaw lill-midlukin li għadhom fuq l-art. Aħna ninsabu grati ħafna li matul is-snin Ġeħova għenna nifhmu din it-tixbiha u tixbihat oħra li nsibu f’kapitli 24 u 25 taʼ Mattew!
IT-TIXBIHA TGĦALLIMNA LI L-IPPRITKAR HU IMPORTANTI ĦAFNA
8, 9. Ġesù għala sejjaħ lin-nagħaġ bħala wħud “sewwa”?
8 Ġesù m’użax il-kliem “xandar,” “prietka” jew “xogħol tal-ippritkar” fit-tixbiha tan-nagħaġ u l-mogħoż. Allura, kif nafu li t-tixbiha tgħallimna li l-ippritkar hu importanti ħafna?
9 Sabiex insibu t-tweġiba, l-ewwel irridu niftakru li Ġesù kien qed joħroġ tagħlima permezz taʼ tixbiha. Hu ma kienx qed jitkellem dwar nagħaġ u mogħoż letterali. Bl-istess mod, hu ma kienx qed jgħid li kull individwu li se jkun iġġudikat bħala nagħġa għandu jagħti ikel u ħwejjeġ lill-midlukin, jieħu ħsiebhom meta jkunu morda, jew iżurhom fil-ħabs. Le, Ġesù ddeskriva lin-nagħaġ bħala wħud “sewwa” minħabba li qiesu l-midlukin bħala ħutu u minħabba li huma leali lejn il-midlukin matul dawn iż-żminijiet tal-aħħar li huma diffiċli.—Mattew 10:40-42; 25:40, 46; 2 Timotju 3:1-5.
10. In-nagħaġ kif jistgħu jgħinu lil ħut Kristu?
10 Meta Ġesù qal it-tixbiha tan-nagħaġ u l-mogħoż, kien qed jitkellem dwar x’kellu jiġri fiż-żmien tal-aħħar. (Mattew 24:3) Pereżempju, hu qal: “Din l-aħbar tajba tas-saltna tiġi pridkata fl-art abitata kollha.” (Mattew 24:14) Imbagħad, eżatt qabel ma tkellem dwar in-nagħaġ u l-mogħoż, Ġesù qal it-tixbiha tat-talenti. Hu qal din it-tixbiha biex jgħallem lill-midlukin li għandhom jaħdmu iebes fl-ippritkar. Imma fadal ammont żgħir biss minnhom fuq l-art, u hemm ħafna xogħol xi jsir! Lill-midlukin intqalilhom biex jippritkaw “lill-ġnus kollha” qabel it-tmiem. Bħalma nitgħallmu mit-tixbiha tan-nagħaġ u l-mogħoż, “in-nagħaġ” jgħinu lil ħut Ġesù. U wieħed mill-aħjar modi kif jistgħu jagħmlu dan hu permezz tal-ippritkar. Imma, hu biżżejjed li sempliċement jagħtu donazzjonijiet biex isir ix-xogħol jew li jinkuraġġixxu lil ħut Ġesù biex jippritkaw?
MIN GĦANDU JIPPRIETKA?
11. Liema mistoqsija xi wħud forsi jsaqsu, u għala?
11 Illum, hemm tmien miljun dixxiplu taʼ Ġesù, u l-biċċa l-kbira minnhom mhumiex midlukin. Lil dawn Ġesù ma tahomx it-talenti. Hu ta t-talenti lil ħutu l-midlukin. (Mattew 25:14-18) Għaldaqstant, xi wħud forsi jsaqsu, ‘Jekk Ġesù ma tahomx it-talenti, tassew hemm bżonn li jippritkaw?’ Iva. Ħalli naraw għala.
12. X’nitgħallmu mill-kliem taʼ Ġesù li nsibu f’Mattew 28:19, 20?
12 Ġesù kkmanda lid-dixxipli kollha tiegħu jippritkaw. Wara li Ġesù ġie rxoxtat, qal lis-segwaċi tiegħu biex ‘jagħmlu dixxipli’ u biex jgħallmuhom “dak kollu” li kkmandalhom. Allura, dawn id-dixxipli wkoll kellhom jobdu l-ordni taʼ Ġesù biex jippritkaw. (Aqra Mattew 28:19, 20.) Hu ċar li lkoll neħtieġu nippritkaw, kemm jekk għandna t-tama għas-sema u kemm jekk għall-art.—Atti 10:42.
Ilkoll neħtieġu nippritkaw, kemm jekk għandna t-tama għas-sema u kemm jekk għall-art
13. X’nitgħallmu mill-viżjoni li ra Ġwanni?
13 Mill-ktieb tar-Rivelazzjoni, nitgħallmu li l-ippritkar kellu jsir kemm mill-midlukin u kemm minn oħrajn. Ġesù ta lill-appostlu Ġwanni viżjoni taʼ “għarusa” li qed tistieden lin-nies biex jiġu u jixorbu l-ilma tal-ħajja. L-għarusa tirreferi għall-144,000 midluk li se jmexxu maʼ Ġesù fis-sema. (Rivelazzjoni 14:1, 3; 22:17) L-ilma jirreferi għas-sagrifiċċju taʼ Ġesù bħala fidwa li se jgħin lin-nies biex ikollhom ħajja mingħajr dnub u mewt. (Mattew 20:28; Ġwanni 3:16; 1 Ġwanni 4:9, 10) Il-midlukin jgħallmu b’żelu lin-nies dwar il-fidwa u dwar kif dawn in-nies jistgħu jibbenefikaw minnha. (1 Korintin 1:23) Imma l-viżjoni ssemmi grupp ieħor taʼ nies li mhumiex mill-midlukin imma li għandhom it-tama għall-art. Huma wkoll jiġu kkmandati biex jgħidu lin-nies: “Ejja!” U huma jobdu dan il-kmand billi jgħallmu lil oħrajn l-aħbar tajba. Allura, din il-viżjoni turi li dawk kollha li jaċċettaw il-messaġġ tal-aħbar tajba jeħtieġu jxandru lil oħrajn.
14. Kif nobdu “l-liġi tal-Kristu”?
14 Dawk kollha li jobdu “l-liġi tal-Kristu” jeħtieġu jippritkaw. (Galatin 6:2) Ġeħova jistenna li kull min jaqdih, jobdi l-istess liġijiet. Fil-passat, hu stenna li kemm l-Iżraelin u kemm il-barranin li kienu jgħixu magħhom jobdu l-liġijiet tiegħu. (Eżodu 12:49; Levitiku 24:22) M’għandniex xi ngħidu, illum mhuwiex meħtieġ li nobdu l-liġijiet kollha li ġew mogħtijin lill-Iżraelin. Minflok, kemm jekk aħna mill-midlukin u kemm jekk le, għandna nobdu “l-liġi tal-Kristu.” Waħda mill-iktar affarijiet importanti li għallimna Ġesù hi li nħobbu. (Ġwanni 13:35; Ġakbu 2:8) Aħna għandna nħobbu lil Ġeħova, lil Ġesù, u lin-nies. U l-aħjar mod biex nuru din l-imħabba hu billi ngħidu lin-nies dwar l-aħbar tajba tas-Saltna.—Ġwanni 15:10; Atti 1:8.
15. Għala nistgħu ngħidu li Ġesù kkmanda lid-dixxipli kollha tiegħu jippritkaw?
15 Dak li Ġesù qal lil ftit mid-dixxipli tiegħu kultant jistaʼ jirreferi għal ħafna dixxipli. Pereżempju, Ġesù għamel patt maʼ 11-il appostlu tiegħu biss, u wegħedhom li se jmexxu fis-Saltna tiegħu. Imma fir-realtà, 144,000 se jmexxu miegħu. (Luqa 22:29, 30; Rivelazzjoni 5:10; 7:4-8) U wara li Ġesù ġie rxoxtat, ftit biss mid-dixxipli tiegħu semgħu l-kmand biex jippritkaw. (Atti 10:40-42; 1 Korintin 15:6) Imma d-dixxipli kollha taʼ Ġesù tal-ewwel seklu obdew dan il-kmand. (Atti 8:4; 1 Pietru 1:8) Illum ukoll, aħna nafu li għandna nippritkaw, avolja ma smajniex b’widnejna stess leħen Ġesù jgħidilna biex nagħmlu dan ix-xogħol. Fil-fatt, hemm kważi tmien miljuni minna li qed jippritkaw. Aħna nafu li permezz tal-ippritkar, inkunu qed nuru li verament għandna fidi f’Ġesù.—Ġakbu 2:18.
ISSA HU Ż-ŻMIEN LI NKUNU LEALI
16-18. Kif nistgħu b’lealtà ngħinu lil ħut Kristu, u għala għandna nagħmlu dan issa?
16 Satana qed jiġġieled iktar u iktar kontra l-aħwa midlukin taʼ Kristu li għadhom fuq l-art, u hu jaf li baqagħlu biss “żmien qasir.” (Rivelazzjoni 12:9, 12, 17) Imma minkejja l-attakki taʼ Satana, il-midlukin ikomplu jmexxu x-xogħol tal-ippritkar u aktar nies minn qatt qabel qed jisimgħu l-aħbar tajba. B’mod ċar, Ġesù hu mal-midlukin, u hu qed jiggwidahom.—Mattew 28:20.
Hu unur li ngħinu lil ħut Kristu
17 Aħna nħossu li hu unur għalina li ngħinu lil ħut Kristu billi nippritkaw. Aħna ngħinu wkoll billi nagħtu donazzjonijiet u billi naħdmu iebes biex nibnu Swali tas-Saltna, Swali tal-Assemblea, u uffiċċji tal-fergħa. Meta nobdu b’lealtà lill-anzjani u aħwa oħra maħtura mill-“ilsir leali u għaqli,” nuru li rridu ngħinu lil ħut Kristu.—Mattew 24:45-47; Ebrej 13:17.
18 Dalwaqt, il-midlukin li għad fadal fuq l-art se jirċievu l-aħħar immarkar bis-siġill. Imbagħad, l-anġli se jitilqu “l-erbat irjieħ taʼ l-art,” u t-tribulazzjoni l-kbira tibda. (Rivelazzjoni 7:1-3) Qabel ma tibda Armageddon, Ġesù se jieħu lill-midlukin fis-sema. (Mattew 13:41-43) Allura, jekk irridu niġu ġġudikati bħala nagħaġ meta jiġi Ġesù, issa hu ż-żmien li nkunu leali lejn l-aħwa midlukin taʼ Kristu.
a Għal diskussjoni iktar dettaljata taʼ din it-tixbiha, ara l-artikli “Kif Se Tieqaf Int Quddiem it-Tron tal-Ġudizzju?” u “Liema Futur għan-Ngħaġ u l-Mogħoż?” fil-ħarġa tat-Torri tal-Għassa tal-1 taʼ Novembru 1995.