Se ‘tibqa’ għassa’?
“Għalhekk, ibqgħu għassa għax la tafu l-jum u lanqas is-siegħa.”—MATTEW 25:13.
1, 2. (a) Ġesù x’kixef dwar l-aħħar jiem? (b) Liema mistoqsijiet se niddiskutu?
IPPROVA ġib quddiem għajnejk lil Ġesù bilqiegħda fuq il-Muntanja taż-Żebbuġ, li minn fuqha tistaʼ tara t-tempju f’Ġerusalemm. Miegħu hemm erbgħa mill-appostli tiegħu, Pietru, Indrì, Ġakbu, u Ġwanni. Għandhom għajnejhom imsammrin fuq Ġesù hekk kif jgħidilhom profezija dwar il-futur. Il-profezija tikxef x’kien se jiġri matul l-aħħar jiem taʼ din id-dinja mill-agħar meta Ġesù kien se jkun qed isaltan fis-Saltna t’Alla. Ġesù jgħidilhom li matul dak iż-żmien eċċitanti, “l-ilsir leali u għaqli” tiegħu kien se jirrappreżentah fuq l-art u kien se jagħti lis-segwaċi tiegħu ikel spiritwali fiż-żmien xieraq.—Mattew 24:45-47.
2 Imbagħad, fl-istess profezija, Ġesù jgħid it-tixbiha tal-għaxar verġni. (Aqra Mattew 25:1-13.) F’dan l-artiklu, se niddiskutu dawn il-mistoqsijiet: (1) X’inhu l-messaġġ bażiku tat-tixbiha? (2) Il-midlukin leali b’liema mod taw kas it-twissija li hemm fit-tixbiha, u x’se jkun ir-riżultat? (3) Kull wieħed u waħda minna llum kif jistaʼ jibbenefika mit-tixbiha taʼ Ġesù?
X’INHU L-MESSAĠĠ TAT-TIXBIHA?
3. Fil-passat, il-letteratura tagħna kif spjegat it-tixbiha tal-għaxar verġni, u dan għal xiex setaʼ wassal?
3 Fl-artiklu taʼ qabel, tgħallimna li fi snin reċenti, l-ilsir leali aġġusta l-mod kif jiġu spjegati ċerti rakkonti Bibliċi. Issa l-ilsir leali jiffoka iktar fuq lezzjonijiet prattiċi u inqas fuq tifsiriet simboliċi jew profetiċi li jistaʼ jkun hemm. Pereżempju, ħu t-tixbiha taʼ Ġesù tal-għaxar verġni. Il-letteratura tagħna qabel kienet tgħid li l-imsiebaħ, iż-żejt, u l-kwies, jew fliexken, kienu jirrappreżentaw lil xi ħadd jew xi ħaġa. Jistaʼ jkun li billi qgħadna niffokaw fuq dettalji żgħar, tlifna l-messaġġ sempliċi u urġenti tat-tixbiha? It-tweġiba taʼ din il-mistoqsija hi importanti.
Il-verġni jridu jkunu lesti bl-imsiebaħ tagħhom mixgħulin meta jasal l-għarus
4. Fit-tixbiha, kif nafu (a) min hu l-għarus? (b) min huma l-verġni?
4 Ejja neżaminaw il-messaġġ bażiku tat-tixbiha taʼ Ġesù. L-ewwel, aħseb dwar il-karattri fit-tixbiha tal-għaxar verġni. Min hu l-għarus? Hu Ġesù. Nafu dan għax iktar kmieni, Ġesù rrefera għalih innifsu bħala l-għarus. (Luqa 5:34, 35) Min huma l-verġni? Huma l-“merħla żgħira” magħmula minn Kristjani midlukin. Kif nafu? Fit-tixbiha, il-verġni jridu jkunu lesti bl-imsiebaħ tagħhom mixgħulin meta jasal l-għarus. Issa nnota x’qal Ġesù lis-segwaċi midlukin tiegħu: “Żommu ġenbejkom imħażżma u l-imsiebaħ tagħkom mixgħula; kunu bħal nies jistennew lil sidhom lura mill-festa tat-tieġ.” (Luqa 12:32, 35, 36) Minbarra dan, kemm l-appostlu Pawlu u kemm l-appostlu Ġwanni qabblu lis-segwaċi midlukin taʼ Kristu maʼ verġni safjin. (2 Korintin 11:2; Rivelazzjoni 14:4) Għalhekk, nistgħu naraw li t-twissija f’Mattew 25:1-13 fil-fatt tingħata lis-segwaċi midlukin taʼ Ġesù.
5. It-tixbiha taʼ Ġesù għal liema perijodu taʼ żmien japplika? Spjega.
5 It-tixbiha taʼ Ġesù għal liema perijodu taʼ żmien japplika? Dak li Ġesù qal lejn l-aħħar tat-tixbiha jgħinna nwieġbu din il-mistoqsija. Hu qal: “Wasal l-għarus.” (Mattew 25:10) Fit-Torri tal-Għassa tal-15 taʼ Lulju 2013, tgħallimna li l-profezija taʼ Ġesù f’Mattew kapitli 24 u 25 tirreferi tmien darbiet għal li “jiġi” jew “jasal” Ġesù. Meta Ġesù jirreferi għall-‘wasla’ jew il-‘miġja’ tiegħu, ikun qed jirreferi għal dak iż-żmien, fit-tribulazzjoni l-kbira, meta jiġi biex jiġġudika u jeqred lil din id-dinja mill-agħar. Għalhekk, nistgħu nikkonkludu li t-tixbiha taʼ Ġesù tapplika għall-aħħar jiem, imma se “jiġi” matul it-tribulazzjoni l-kbira.
6. X’inhu l-messaġġ bażiku tat-tixbiha?
6 Liema messaġġ bażiku nitgħallmu minn din it-tixbiha? Ftakar fil-kuntest taʼ dan ir-rakkont Bibliku. F’Mattew kapitlu 24, Ġesù tkellem dwar “l-ilsir leali u għaqli.” Dan l-ilsir kien se jkun grupp żgħir taʼ rġiel midlukin li kienu se jieħdu t-tmexxija fost is-segwaċi taʼ Kristu matul l-aħħar jiem. Ġesù wissa lil dawk l-irġiel li għandhom jibqgħu leali. Fil-kapitlu taʼ wara, Ġesù juża t-tixbiha tal-għaxar verġni biex iwissi lis-segwaċi midlukin kollha tiegħu fl-aħħar jiem. Il-messaġġ kien li ‘jibqgħu għassa’ ħalli ma jitilfux il-premju tagħhom li jmorru fis-sema. (Mattew 25:13) Issa ejja neżaminaw it-tixbiha u naraw kif il-midlukin taw kas din it-twissija.
IL-MIDLUKIN B’LIEMA MOD TAW KAS IT-TWISSIJA TAT-TIXBIHA?
7, 8. (a) Il-verġni għaqlin għala kienu lesti? (b) Il-midlukin kif inhuma preparati?
7 Fit-tixbiha, Ġesù enfasizza li kuntrarju għall-verġni boloh, il-verġni għaqlin kienu lesti meta jiġi l-għarus. Għala? Għax kienu preparati u għassa. L-għaxar verġni kollha kellhom jibqgħu għassa u jżommu l-imsiebaħ tagħhom mixgħulin tul il-lejl kollu. Kuntrarju għall-verġni boloh, il-ħames verġni għaqlin kienu preparati għax minbarra li ġabu l-imsiebaħ tagħhom ġabu wkoll iktar żejt. Il-Kristjani midlukin leali kif ippreparaw ruħhom għall-wasla taʼ Ġesù?
8 Il-midlukin huma preparati u lesti li jwettqu l-inkarigu tagħhom sat-tmiem. Jifhmu li biex jaqdu lil Alla jridu jissagrifikaw xi kumditajiet materjali li toffri d-dinja taʼ Satana, imma dan jagħmluh minn qalbhom. Huma determinati li jaqdu lil Ġeħova b’lealtà, mhux għax qorob it-tmiem, imma għax iħobbuh u jħobbu lil Ibnu. Huma jżommu l-integrità tagħhom, u ma jħallux l-attitudnijiet materjalistiċi, immorali, u egoistiċi tad-dinja jeffettwawhom. Bħall-verġni għaqlin li kienu lesti bl-imsiebaħ tagħhom, il-midlukin ikomplu jiddu u bil-paċenzja jibqgħu jistennew il-wasla tal-Għarus, anke jekk jidher li qed jiddawwar.—Filippin 2:15.
Ġesù wissa lill-midlukin biex jibqgħu leali
9. (a) Ġesù liema twissija ta dwar li wieħed jibda jongħos? (b) Il-midlukin kif wieġbu għall-għajta: “Wasal l-għarus”? (Ara wkoll in-nota taʼ taħt.)
9 Raġuni oħra għala l-verġni għaqlin kienu lesti għall-wasla tal-għarus kienet għax qagħdu għassa. Imma fit-tixbiha, l-għaxar verġni kollha “bdew jonogħsu u raqdu” waqt li kienu qed jistennew lill-għarus, li donnu kien qed jiddawwar. Allura, hu possibbli li Kristjani midlukin illum ‘jorqdu,’ jiġifieri, jiġu aljenati waqt li jkunu qed jistennew il-wasla taʼ Kristu? Iva. Ġesù kien jaf li anki individwu li hu lest u ħerqan jistaʼ jsir dgħajjef u aljenat waqt li jkun qed jistennieh jiġi. Għalhekk, il-Kristjani midlukin leali stinkaw kemm felħu biex jibqgħu għassa. B’liema mod? Fit-tixbiha, l-għaxar verġni kollha wieġbu għall-għajta: “Wasal l-għarus!” Imma l-verġni għaqlin biss baqgħu għassa. (Mattew 25:5, 6; 26:41) Bl-istess mod, matul l-aħħar jiem, Kristjani midlukin leali wieġbu għall-għajta: “Wasal l-għarus!” Aċċettaw l-evidenza ċara daqs il-kristall li Ġesù wasal biex jiġi, u huma lesti għall-wasla tiegħu. a Issa ejja neżaminaw it-tmiem tat-tixbiha taʼ Ġesù, li jiffoka fuq perijodu taʼ żmien speċifiku.
PREMJU GĦALL-GĦAQLIN U KASTIG GĦALL-BOLOH
10. X’għandna mnejn insaqsu dwar il-konversazzjoni bejn il-verġni għaqlin u l-verġni boloh?
10 Lejn l-aħħar tat-tixbiha, il-verġni boloh talbu lill-verġni għaqlin għal ftit żejt għall-imsiebaħ tagħhom. Imma l-verġni għaqlin jirrifjutaw li jgħinuhom. (Aqra Mattew 25:8, 9.) Imma, il-Kristjani midlukin leali qatt irrifjutaw li jgħinu lil xi ħadd fil-bżonn? Tinsiex għal liema perijodu taʼ żmien qed tirreferi t-tixbiha. Ġesù, l-Għarus, jiġi biex jiġġudika lejn l-aħħar tat-tribulazzjoni l-kbira. Għalhekk, x’aktarx li l-konversazzjoni bejn il-verġni għaqlin u l-verġni boloh tirreferi għal dak li jiġri eżatt qabel it-tmiem tat-tribulazzjoni l-kbira. Għala ngħidu hekk? Għax sa dak iż-żmien, il-midlukin se jkunu rċivew l-aħħar immarkar bis-siġill.
11. (a) X’se jiġri eżatt qabel il-bidu tat-tribulazzjoni l-kbira? (b) Il-verġni għaqlin x’riedu jfissru meta qalu lill-verġni boloh biex imorru jixtru ż-żejt?
11 Allura, qabel ma tibda t-tribulazzjoni l-kbira, il-midlukin leali kollha fuq l-art se jkunu rċivew l-aħħar immarkar bis-siġill. (Rivelazzjoni 7:1-4) Minn dak iż-żmien ’il quddiem, mhu se jkun hemm l-ebda dubju li se jitilgħu fis-sema. Imma aħseb dwar is-snin qabel it-tribulazzjoni l-kbira. X’se jiġri minn dawk il-midlukin li ma jibqgħux għassa u li jsiru żleali? Mhux se jirċievu l-aħħar immarkar bis-siġill. Sa dak iż-żmien, Kristjani leali oħra se jkunu ġew midlukin bl-ispirtu qaddis biex jieħdu posthom. Ladarba tibda t-tribulazzjoni l-kbira, il-boloh jafu jibqgħu skantati meta tinqered Babilonja l-Kbira. Jistaʼ jkun li f’dan il-waqt jindunaw li mhumiex lesti għall-wasla taʼ Ġesù. F’dak il-mument, x’se jiġri jekk jitolbu l-għajnuna? Insibu t-tweġiba fit-tixbiha. Il-verġni għaqlin irrifjutaw li jagħtu ż-żejt tagħhom lill-verġni boloh u minflok qalulhom biex imorru jixtru ż-żejt. Peress li kien “nofsillejl,” ma kien hemm ħadd biex ibegħelhom iż-żejt. Kien tard wisq.
12. (a) Matul it-tribulazzjoni l-kbira, x’se jiġri minn dawk li xi darba kienu midlukin imma li saru żleali qabel l-aħħar immarkar bis-siġill? (b) Ġesù kif se jwieġeb lil dawk li huma bħall-verġni boloh?
12 Matul it-tribulazzjoni l-kbira, il-midlukin leali ma jistgħu jgħinu lil ħadd minn dawk li saru żleali. Se jkun tard wisq. Allura x’se jiġri minn dawk żleali? Innota x’ġara lill-verġni boloh li marru jixtru ż-żejt: “Wasal l-għarus, u l-verġni li kienu lesti daħlu miegħu għall-festa tat-tieġ; u l-bieb ngħalaq.” Meta Ġesù jiġi fil-glorja tiegħu lejn l-aħħar tat-tribulazzjoni l-kbira, se jiġbor fis-sema lill-midlukin leali li jkun hawn fuq l-art. (Mattew 24:31; 25:10; Ġwanni 14:1-3; 1 Tessalonikin 4:17) Iżda, Ġesù se jiċħad lil dawk żleali. Bħall-verġni boloh, forsi jgħidu: “Sinjur, sinjur, iftħilna!” Imma, Ġesù kif se jwiġibhom? B’sogħba, se jagħtihom l-istess tweġiba li se jagħti lil ħafna wħud li jkunu bħal mogħoż: “Ngħidilkom il-verità, ma nafkomx.”—Mattew 7:21-23; 25:11, 12.
Kull Kristjan midluk irid jagħżel li jkun preparat u għassa
13. (a) Għala m’għandniex nikkonkludu li ħafna mis-segwaċi midlukin taʼ Kristu se jsiru żleali? (b) Għala nistgħu ngħidu li t-tixbiha taʼ Ġesù tikxef il-fiduċja li għandu fil-Kristjani midlukin? (Ara l-ewwel stampa.)
13 Kien Ġesù qed jgħid li ħafna mill-midlukin kienu se jsiru żleali u jkun hemm bżonn li xi ħadd jiħdilhom posthom? Le. F’Mattew kapitlu 24 naqraw li Ġesù wissa lill-ilsir leali u għaqli biex ma jsirx ilsir mill-agħar. Dan ma jfissirx li stenna li se jiġri hekk. B’mod simili, it-tixbiha tal-għaxar verġni hi twissija. Sewwasew bħalma ħames verġni kienu boloh u ħamsa kienu għaqlin, hekk ukoll kull Kristjan midluk irid jagħżel li jkun preparat u għassa. Inkella, jistaʼ jsir iblah u żleali. Pawlu ta twissija simili lil ħutu rġiel u nisa midlukin. (Aqra Ebrej 6:4-9; qabbel Dewteronomju 30:19.) Pawlu ma qagħadx idur mal-lewża meta ta t-twissija tiegħu, imma kellu wkoll fiduċja li ħutu rġiel u nisa kienu se jirċievu l-premju tagħhom. It-twissija fit-tixbiha tal-għaxar verġni tikxef li Ġesù kellu u għandu fiduċja simili fil-midlukin. Hu jaf li kull wieħed u waħda mill-qaddejja midlukin tiegħu jistaʼ jibqaʼ leali u jirċievi l-premju meraviljuż!
IN-“NAGĦAĠ OĦRAJN” TAʼ KRISTU KIF JISTGĦU JIBBENEFIKAW?
14. Għala jistgħu jibbenefikaw anki n-“nagħaġ oħrajn” mit-tixbiha tal-għaxar verġni?
14 It-tixbiha taʼ Ġesù ngħatat lill-Kristjani midlukin. Imma jistgħu jibbenefikaw anki n-“nagħaġ oħrajn” mit-tixbiha taʼ Ġesù? (Ġwanni 10:16) Iva! Il-messaġġ tat-tixbiha hu sempliċi: “Ibqgħu għassa.” U Ġesù darba minnhom qal: “Dak li ngħid lilkom ngħidu lil kulħadd, Ibqgħu għassa.” (Marku 13:37) Ġesù jistenna li d-dixxipli kollha tiegħu jkunu preparati u għassa. U l-Kristjani kollha jistgħu jimitaw l-eżempju tajjeb tal-midlukin, li jpoġġu l-ministeru l-ewwel f’ħajjithom. Ftakar li l-verġni boloh talbu l-verġni għaqlin għal ftit miż-żejt tagħhom. It-talba tagħhom ma ġietx milqugħa. Dan ifakkarna li hu f’idejn kull wieħed u waħda minna biex jibqaʼ leali lejn Alla, ikun preparat, u jibqaʼ għassa. Ħadd ma jistaʼ jagħmel dan għalina. Ilkoll irridu nagħtu kont lill-Imħallef ġust, Ġesù Kristu, li wasal biex jiġi. Għalhekk, irridu nkunu lesti għalih!
Ħadd ma jistaʼ jkun leali jew joqgħod għassa għalina
15. Iż-żwieġ taʼ Kristu u l-għarusa tiegħu, għala hu eċċitanti għall-Kristjani veri kollha?
15 Il-Kristjani kollha huma eċċitati dwar iż-żwieġ li jissemma fit-tixbiha taʼ Ġesù. Fil-futur, wara l-gwerra t’Armageddon, il-Kristjani midlukin se jingħaqdu maʼ Kristu fiż-żwieġ. (Rivelazzjoni 19:7-9) Imbagħad kulħadd fuq l-art se jibbenefika minn dak iż-żwieġ fis-sema. Għala? Għax meta jiġri dan, se jkun hawn gvern perfett għal kulħadd. Kemm jekk għandna t-tama li ngħixu għal dejjem fis-sema u kemm jekk fuq l-art, ejja nibqgħu determinati li nkunu preparati u nibqgħu għassa. Jekk nagħmlu dan, inkunu nistgħu ngawdu l-futur tal-għaġeb li Ġeħova ħejja għalina!
a Fit-tixbiha, hemm perijodu taʼ żmien bejn l-għajta, “Wasal l-għarus!” (vers 6) u l-miġja tal-għarus (vers 10). Matul l-aħħar jiem, il-midlukin baqgħu għassa. Għarfu s-sinjal tal-preżenza taʼ Ġesù, u għalhekk jafu li qed imexxi bħala Sultan fis-Saltna t’Alla. Xorta waħda, iridu jibqgħu għassa sa ma jiġi.