1. Għala għandna bżonn inżommu r-relazzjoni maʼ Ġeħova b’saħħitha?

JEKK int Xhud mgħammed taʼ Ġeħova, int għandek xi ħaġa taʼ valur kbir. Int għandek relazzjoni personali maʼ Ġeħova. Imma din ir-relazzjoni qed tiġi attakkata mid-dinja taʼ Satana u tistaʼ wkoll tiddgħajjef mill-imperfezzjonijiet tagħna stess. Huwa għalhekk li lkoll kemm aħna għandna nżommu r-relazzjoni maʼ Ġeħova b’saħħitha kemm jistaʼ jkun.

2. (a) X’inhi relazzjoni? (Ara n-nota taʼ taħt.) (b) Kif nistgħu nsaħħu r-relazzjoni li għandna maʼ Ġeħova?

² Ġeħova hu reali għalik? Tħoss li hu l-Ħabib tiegħek? Tixtieq li r-relazzjoni li għandek miegħu tkun saħansitra iktar b’saħħitha? Ġakbu 4:8 jgħid kif dan jistaʼ jsir: “Ersqu qrib lejn Alla, u hu jersaq qrib lejkom.” Ir-relazzjoni li  għandek maʼ Ġeħova tinvolvi kemm lilek u kemm lil Ġeħova. * (Ara n-nota taʼ taħt.) Jekk int tagħmel passi biex tersaq qrib lejn Ġeħova, hu se jagħmel passi biex jersaq qrib lejk. Iktar kemm tagħmel dan, iktar ikun reali għalik u jkollok relazzjoni iktar mill-qrib miegħu, tant li mbagħad tħossok bħal Ġesù meta qal: “Dak li bagħatni jeżisti tassew” u “jien nafu.” (Ġwanni 7:28, 29) Imma x’tistaʼ tagħmel biex tersaq eqreb lejn Ġeħova?

3. Kif nistgħu nikkomunikaw maʼ Ġeħova?

³ Jekk trid tersaq qrib lejn Ġeħova, ikun importanti ħafna li int u Ġeħova tikkomunikaw regolarment. Imma dan kif inhu possibbli? Aħseb ftit dwar kif jistaʼ jkun hemm komunikazzjoni bejnek u bejn ħabib tiegħek li jgħix ’il bogħod. Intom tistgħu tiktbu lil xulxin spiss jew titkellmu permezz tat-telefown. B’mod simili, int titkellem maʼ Ġeħova meta b’mod regulari titlob lilu. (Aqra Salm 142:2.) Imma kif tistaʼ tħalli lil Ġeħova jkellmek? Int tagħmel dan meta b’mod regulari taqra l-Kelma tiegħu, il-Bibbja, u timmedita dwarha. (Aqra Isaija 30:20, 21.) Ejjew naraw kif din il-komunikazzjoni li hemm bejnek u bejn Ġeħova tistaʼ ssaħħaħ ir-relazzjoni li għandek miegħu. Se naraw ukoll kif tistaʼ tagħmel lil Ġeħova Ħabib reali għalik.

4, 5. Ġeħova kif ikellmek meta tistudja l-Bibbja? Agħti eżempju.

⁴ Aħna nafu li l-Bibbja hi l-messaġġ t’Alla għal kulħadd. Imma tistaʼ l-Bibbja tgħin lilek tersaq eqreb lejn Ġeħova? Iva! Hekk kif taqra u tistudja l-Bibbja regolarment, agħti kas taʼ kif tħossok dwar dak li qed taqra. U aħseb dwar kif tistaʼ tapplika dak li qed titgħallem. Meta tagħmel dan, int tkun qed tħalli lil Ġeħova jkellmek. Hu jsir Ħabib tal-qalb li qed jgħinek, u int tersaq eqreb lejh.—Ebrej 4:12; Ġakbu 1:23-25.

⁵ Pereżempju, kif tħossok meta taqra kliem Ġesù: “Tibqgħux taħżnu teżori fuq l-art”? Jekk qed tagħmel l-aħjar tiegħek biex tpoġġi lil Ġeħova l-ewwel  f’ħajtek, se tħoss li hu kuntent bik. Iżda forsi taqra kliem Ġesù u tirrealizza li għandek bżonn tissimplifika ħajtek u li tiffoka iktar fuq li taqdi ’l Alla. Jekk inhu hekk, mela Ġeħova qed jgħinek tifhem dak li int tistaʼ tagħmel biex tersaq eqreb lejh.—Mattew 6:19, 20.

6, 7. (a) Meta nistudjaw il-Bibbja, x’jiġri mill-imħabba tagħna għal Ġeħova u minn imħabbtu għalina? (b) X’għandu jkun l-iskop prinċipali meta nistudjaw il-Bibbja?

⁶ Huwa minnu li meta nistudjaw il-Bibbja, nitgħallmu dwar il-bidliet li nistgħu nagħmlu biex naqdu lil Ġeħova aħjar. Imma nitgħallmu wkoll dwar l-affarijiet li jagħmel bi mħabba u l-personalità sabiħa li għandu, li jġegħluna nħobbuh iktar. U hekk kif l-imħabba tagħna għalih tiżdied, l-imħabba tiegħu għalina tiżdied ukoll, u b’hekk ir-relazzjoni li għandna miegħu ssir saħansitra iktar b’saħħitha.—Aqra l-1 Korintin 8:3.

⁷ Jekk irridu nersqu eqreb lejn Ġeħova, hu importanti li nistudjaw il-Bibbja għar-raġuni t-tajba. Ġesù qal: “Il-ħajja taʼ dejjem tfisser dan: li jieħdu għarfien dwarek, l-uniku Alla veru, u dwar Ġesù Kristu li int bgħatt.” (Ġwanni 17:3) Nistgħu nitgħallmu ħafna affarijiet ġodda u interessanti meta naqraw il-Bibbja, imma l-iskop prinċipali tagħna għandu jkun li nieħdu għarfien dwar Ġeħova, jiġifieri li nsiru nafuh aħjar bħala Persuna.—Aqra Eżodu 33:13; Salm 25:4.

8. (a) Xi wħud x’għandhom mnejn jaħsbu dwar kif Ġeħova ttratta lis-Sultan Għażarija? (b) Jekk taf lil Ġeħova, kif tħossok dwar dak li jagħmel?

⁸ Meta nsiru nafu lil Ġeħova tant li nagħmluh il-Ħabib tal-qalb tagħna, ma noqogħdux ninkwetaw jekk il-Bibbja mhux dejjem tispjega għala hu aġixxa b’tali mod. Pereżempju, meta Għażarija kien is-sultan taʼ Ġuda, in-nies qiemu allat foloz. Għażarija m’għamilx bħalhom. Hu kompla ‘jagħmel dak li hu rett f’għajnejn Ġeħova.’ (2 Slaten 15:1-5) Imma Ġeħova kkastiga lil Għażarija bil-ġdiem. Għala? Dan ir-rakkont ma jagħtiniex l-istampa kollha. Allura kif tħossok dwar x’għamel Ġeħova? Dan jinkwetak jew iġiegħlek tħossok li Ġeħova mhuwiex ġust u li kkastiga lil Għażarija għal xejn b’xejn? Le. Jekk verament taf sew lil Ġeħova, mela taf li d-dixxiplina tiegħu dejjem hi ġusta. Hu dejjem jiddixxiplina ‘kemm ikun jistħoqqlu’ dak li jkun. (Ġeremija 30:11) Allura, anki jekk forsi ma tafx għala Ġeħova kkastiga lil Għażarija, tistaʼ tkun ċert li Ġeħova għamel dak li hu sew.

9. Liema dettalji jgħinuna nifhmu għala Ġeħova kkastiga lil Għażarija bil-ġdiem?

⁹ Fil-fatt, il-Bibbja tagħtina iktar dettalji dwar il-ħajja tas-Sultan Għażarija, li kien magħruf ukoll bħala s-Sultan Użżija. (2 Slaten 15:7, 32) L-istorja fit-2 Kronaki 26:3-5, 16-21 tkompli tgħidilna li “għamel dak li hu sewwa f’għajnejn Ġeħova.” Imma tgħid ukoll li iktar tard “qalbu tkabbret sal-punt li ġab ir-rovina tiegħu stess.” Is-sultan għamel xi ħaġa li l-qassisin biss kellhom il-permess li jagħmluha. Kien hemm 81 qassis li qalulu li kien qed jiżbalja u li pprovaw iwaqqfuh. Imma hu kif irreaġixxa? Tant sar kburi li  ħadha kontrihom! Meta nikkunsidraw dawn id-dettalji wkoll, inkunu nistgħu nifhmu għala Ġeħova kkastiga lis-sultan bil-ġdiem.

10. (a) Għala m’hemmx għalfejn ikollna spjegazzjoni taʼ dak kollu li jagħmel Ġeħova? (b) Kif jistaʼ jkollna iktar fiduċja li Ġeħova dejjem jagħmel dak li hu ġust?

¹⁰ Liema lezzjoni importanti nitgħallmu? Fl-istorja tas-Sultan Għażarija, għandna biżżejjed dettalji li jgħinuna nifhmu għala Ġeħova kkastigah. Iżda meta l-Bibbja ma tagħtix id-dettalji kollha, x’se tagħmel? Se toqgħod titħasseb jekk Ġeħova għamilx verament dak li hu sew? Jew se tħoss li l-Bibbja għandha biżżejjed informazzjoni biex tafda li Alla dejjem jagħmel dak li hu ġust? (Dewteronomju 32:4) Iktar kemm issir taf lil Ġeħova bħala Persuna, iktar se tħobbu u tafdah. Imbagħad mhux se jkollok bżonn spjegazzjoni taʼ kulma jagħmel. Hekk kif tistudja l-Bibbja, Ġeħova se jsir iktar reali għalik u int se tersaq eqreb lejh.—Salm 77:12, 13.

11-13. Kif taf li Ġeħova jismaʼ t-talb? (Ara l-ewwel stampa.)

¹¹ Meta nitolbu, nersqu qrib lejn Ġeħova. Aħna nfaħħruh, nirringrazzjawh, u nitolbuh biex jgħinna. (Salm 32:8) Imma jekk trid ħbiberija mill-qrib maʼ Ġeħova, trid tkun konvint li hu jismaʼ t-talb.

¹² Xi nies jgħidu li Alla ma jismax it-talb u li t-talb hu biss xi ħaġa li ġġiegħlek tħossok aħjar. Huma jemmnu  li t-talb qiegħed hemm biex sempliċement jgħinek taħseb sew dwar il-problemi tiegħek u biex issib soluzzjoni int stess. Huwa minnu li t-talb jistaʼ jgħinek f’dawn il-modi. Imma meta tkellem lil Ġeħova fit-talb, ikun letteralment qed jisimgħek. Kif tistaʼ tkun ċert?

¹³ Aħseb dwar dan: Qabel ma Ġesù ġie fid-dinja, ra li Ġeħova wieġeb it-talb tal-qaddejja umani Tiegħu. Meta kien fuq l-art, Ġesù talab lil Missieru tas-sema dwar ħsibijietu u s-sentimenti tiegħu. Darba minnhom, saħansitra talab lejl sħiħ. (Luqa 6:12; 22:40-46) Kien Ġesù se jagħmel hekk li kieku kien jaħseb li Ġeħova ma kienx qed jisimgħu verament? Ġesù lis-segwaċi tiegħu għallimhom ukoll kif jitolbu lil Ġeħova. Kien se jagħmel hekk li kieku kien jaħseb li Ġeħova ma jismax it-talb? B’mod ċar, Ġesù kien jaf li Ġeħova verament jismaʼ t-talb. Hu saħansitra qal: “Missier, nirringrazzjak li smajtni. Veru, kont naf li dejjem tismagħni.” Aħna wkoll nistgħu nkunu ċerti li Ġeħova jismaʼ talbna.—Ġwanni 11:41, 42; Salm 65:2.

14, 15. (a) Kif nibbenefikaw meta nitolbu għal affarijiet speċifiċi? (b) It-talb taʼ Kathy kif għenha biex tersaq eqreb lejn Ġeħova?

¹⁴ It-tweġibiet għat-talb tiegħek mhux dejjem ikunu jidhru ovvji. Iżda meta ssaqsi għal affarijiet speċifiċi fit-talb tiegħek, tkun tistaʼ tara b’mod iktar ċar li Ġeħova qed iwieġeb, u se jsir iktar reali għalik. Jekk tħalli lil Ġeħova jkun jaf dak kollu li qed jinkwetak, hu se jersaq eqreb lejk.

¹⁵ Pereżempju, Kathy spiss marret fil-ministeru, imma ma kinitx tieħu  pjaċir. * (Ara n-nota taʼ taħt.) Hi qalet: “Ma kienx jogħġobni s-service. Irrid ngħid, vera ma kienx jogħġobni s-service.” Meta waqfet mix-xogħol tagħha, anzjan inkuraġġieha biex issir pijuniera regulari. Hi qalet: “Saħansitra tani l-applikazzjoni. Iddeċidejt li nkun pijuniera, imma bdejt ukoll nitlob lil Ġeħova kuljum biex jibda jogħġobni s-service.” Wieġeb Ġeħova t-talb tagħha? Issa li ilha tliet snin pijuniera, tgħid: “Minħabba li qattajt iktar ħin fis-service u tgħallimt minn aħwa nisa oħra, bil-mod il-mod sirt aħjar fl-abbiltà tiegħi li nagħti xhieda. Illum, mhux talli jogħġobni s-service, imma talli sirt inħobbu ħafna. Iktar minn hekk, ir-relazzjoni li għandi maʼ Ġeħova hija ħafna iktar qrib minn kif kienet qabel.” It-talb taʼ Kathy għenha verament tersaq eqreb lejn Ġeħova.

16, 17. (a) X’għandna nagħmlu biex inżommu r-relazzjoni li għandna maʼ Ġeħova b’saħħitha? (b) X’se niddiskutu fl-artiklu li jmiss?

¹⁶ Nistgħu nibqgħu nersqu eqreb lejn Ġeħova għal dejjem. Allura, jalla nkomplu nisimgħuh billi nistudjaw il-Bibbja b’mod regulari, u jalla nibqgħu nkellmuh fit-talb. Jekk nagħmlu hekk, ir-relazzjoni tagħna maʼ Ġeħova se tkun iktar u iktar b’saħħitha, u bl-għajnuna tiegħu nkunu nistgħu nissaportu l-provi.

¹⁷ Imma kultant insibuha diffiċli minħabba l-problemi personali tagħna, avolja nkomplu nitolbu lil Ġeħova. F’dawn iż-żminijiet, jistaʼ jkun li nibdew nitilfu l-fiduċja li għandna f’Ġeħova. Forsi nibdew inħossu li Ġeħova ma jismax it-talb tagħna u forsi jkollna d-dubji jekk aħniex verament il-ħbieb tiegħu. Jekk tibda tħossok b’dan il-mod, x’tistaʼ tagħmel? L-artiklu li jmiss se jgħinek.