1. (a) Il-ġlieda tagħna kontra Satana, għala hi importanti b’mod speċjali issa? (b) Kif nafu li nistgħu nirbħu l-ġlieda kontra Satana?

SATANA qed jiġġieled kontra l-midlukin li għadhom fuq l-art u n-“nagħaġ oħrajn.” (Ġwanni 10:16) Fil-ftit żmien li baqagħlu, ix-Xitan irid jeqred il-fidi taʼ kemm jistaʼ jkun qaddejja taʼ Ġeħova. (Aqra Rivelazzjoni 12:9, 12.) Imma aħna nistgħu nirbħu l-ġlieda kontra Satana. Il-Bibbja tgħid: “Opponu lix-Xitan, u hu jaħrab minnkom.”—Ġakbu 4:7.

2, 3. (a) Satana għala jrid lin-nies jemmnu li hu ma jeżistix? (b) Kif taf li Satana jeżisti tassew?

² Ħafna nies jiħduha biċ-ċajt l-idea li jeżisti Satana. Għalihom, Satana u d-demonji huma karattri li jinsabu biss f’kotba, f’films tal-biżaʼ, u f’logħob tal-kompjuter. Nies bħal dawn iħossu li jekk int intelliġenti, ma temminx li jeżistu spirti mill-agħar. Taħseb li Satana se jħabbel rasu jekk in-nies ma jemmnux bih u bid-demonji tiegħu? Le. Huwa eħfef għal Satana li jqarraq b’dawn li jiddubitaw bl-eżistenza tiegħu. (2 Korintin 4:4) Anzi, Satana jippromwovi ideat bħal dawn ħalli jkun jistaʼ jqarraq bin-nies.

 ³ Bħala qaddejja taʼ Ġeħova, m’aħniex imqarrqin. Aħna nafu li x-Xitan hu persuna reali. Kif nafu dan? Il-Bibbja tgħidilna li Satana tkellem m’Eva permezz taʼ serp. (Ġenesi 3:1-5) Hu tkellem maʼ Ġeħova meta qajjem dubji dwar il-motivi taʼ Ġob. (Ġob 1:9-12) Satana pprova jħajjar lil Ġesù. (Mattew 4:1-10) U wara li Ġesù sar Sultan fl-1914, Satana beda “jiggwerra” kontra l-midlukin li għadhom fuq l-art. (Rivelazzjoni 12:17) Ix-Xitan qed ikompli b’din il-gwerra billi jipprova jeqred il-fidi tal-midlukin u n-nagħaġ oħrajn. Biex nirbħu l-gwerra, irridu niġġieldu kontra Satana u nżommu l-fidi tagħna b’saħħitha. Dan l-artiklu jiddiskuti tliet modi kif jistaʼ jsir dan.

4. Satana kif inhu l-aqwa eżempju tal-kburija?

⁴ Satana hu kburi ħafna. Dan l-anġlu mill-agħar ażżarda jisfida d-dritt t’Alla li jmexxi, u hu pprova jġiegħel lil ħaddieħor iqim lilu flok lil Ġeħova. Allura hu l-eżempju perfett tal-kburija u l-arroganza. Għaldaqstant, mod minnhom taʼ kif nistgħu niġġieldu kontra Satana hu billi nwarrbu l-kburija u nkunu umli. (Aqra l-1 Pietru 5:5.) Imma x’inhi l-kburija? Hija dejjem ħażina?

5. Il-kburija hi dejjem ħażina? Spjega.

⁵ Skont dizzjunarju, il-kburija hi sentiment taʼ kunfidenza fina nfusna u rispett għalina nfusna. Hija wkoll “sentiment taʼ sodisfazzjon li jkollok minħabba li int, il-qraba, jew il-ħbieb tal-qalb tiegħek għamlu xi ħaġa tajba jew għandhom xi ħaġa tajba.” M’hemm xejn ħażin f’sentimenti bħal dawn. L-appostlu Pawlu qal hekk lill-aħwa f’Tessalonika: “Aħna kburin bikom fost il-kongregazzjonijiet t’Alla minħabba s-sabar u l-fidi tagħkom fil-persekuzzjonijiet kollha tagħkom u t-tribulazzjonijiet li qed tissaportu.” (2 Tessalonikin 1:4) Allura li nħossuna kburin bix-xogħol taʼ ħaddieħor u saħansitra xi ftit kburin bix-xogħol tagħna, jistaʼ jkun taʼ ġid għalina. M’għandniex għalfejn nistħu minħabba l-familja tagħna, il-kultura tagħna, jew il-post fejn trabbejna.—Atti 21:39.

6. X’tip taʼ kburija hi ħażina, u x’eżempji Bibliċi għandna taʼ dan?

⁶ Madankollu, hemm ċerta kburija li tistaʼ ġġib fix-xejn ir-relazzjonijiet, speċjalment il-ħbiberija li għandna maʼ Ġeħova. Din it-tip taʼ kburija tistaʼ ġġegħelna nieħdu għalina meta ningħataw parir. Tistaʼ saħansitra ġġegħelna nwarrbu l-parir minflok naċċettawh b’umiltà. (Salm 141:5) Din it-tip taʼ kburija hi deskritta bħal meta wieħed jaħseb wisq fih innifsu jew bħal “meta n-nies ikunu kburin għax jaħsbu li huma aħjar minn ħaddieħor u spiss jagħmlu dan mingħajr ġustifikazzjoni.” Ġeħova jobgħod kburija li hi arroganti. (Eżekjel 33:28; Għamos 6:8) Imma Satana jieħu pjaċir meta n-nies jimitaw l-arroganza tiegħu billi jiftaħru bihom infushom. Immaġina kemm Satana feraħ meta Nimrod, il-Fargħun, u Absalom urew kburija mhix xierqa meta bdew jiftaħru! (Ġenesi 10:8, 9; Eżodu 5:1, 2; 2 Samwel 15:4-6) Barra minn hekk, il-kburija kienet waħda mir-raġunijiet għala Kajjin tilef ir-relazzjoni li kellu maʼ Ġeħova. Ġeħova nnifsu ta l-parir lil Kajjin, imma Kajjin kien kburi wisq biex jagħti widen. Hu kellu rasu iebsa, injora t-twissija t’Alla, u ma ħasibhiex  darbtejn biex jidneb kontra Ġeħova.—Ġenesi 4:6-8.

7, 8. (a) X’inhu r-razziżmu, u kif inhu marbut mal-kburija? (b) Spjega għala l-kburija tistaʼ tkisser il-paċi tal-kongregazzjoni.

⁷ Illum, in-nies juru l-kburija b’ħafna modi ħżiena. Il-kburija xi drabi hi marbuta mar-razziżmu. Skont dizzjunarju, ir-razziżmu hu diskriminazzjoni kontra nies li huma taʼ razez oħra. Hu wkoll “il-fehma li nies taʼ razez differenti għandhom kwalitajiet u abbiltajiet differenti, u li xi razez huma superjuri jew inferjuri awtomatikament.” Ir-razziżmu ġab miegħu ġlied, gwerer, u saħansitra qtil taʼ ħafna nies f’daqqa.

⁸ Ovvjament, affarijiet bħal dawn m’għandhomx jiġru fil-kongregazzjoni Kristjana. Madankollu, mill-kburija jistaʼ jinbeda nuqqas taʼ qbil bejn l-aħwa u dan jistaʼ jispiċċa f’xi ġlieda. Hekk ġralhom xi Kristjani tal-bidu, u huwa għalhekk li Ġakbu saqsiehom din il-mistoqsija li fiha x’tomgħod: “Minfejn ġejjin il-gwerer u minfejn ġej il-ġlied fostkom?” (Ġakbu 4:1) Jekk inħossu mibegħda għal oħrajn u nħossu li aħna aħjar minnhom, għandu mnejn ngħidu jew nagħmlu xi ħaġa li verament tweġġagħhom. (Proverbji 12:18) B’mod ċar, il-kburija tistaʼ tkisser il-paċi tal-kongregazzjoni.

9. Il-Bibbja kif tgħinna niġġieldu kontra r-razziżmu u tipi oħra taʼ kburija li mhumiex xierqa? (Ara l-ewwel stampa.)

⁹ Jekk għandna t-tendenza li nħossu li aħna aħjar minn ħaddieħor, għandna bżonn niftakru li Ġeħova jobgħod lil “kulmin hu kburi f’qalbu.” (Proverbji 16:5) Apparti minn hekk, hemm bżonn li neżaminaw lil qalbna u nsaqsu lilna nfusna, ‘Inħoss li jien aħjar minn nies taʼ razza, nazzjonalità, jew kultura oħra?’ Jekk iva, aħna qed ninsew li Alla “minn raġel wieħed għamel il-ġnus kollha tal-bnedmin.” (Atti 17:26) Allura, sa ċertu punt, aħna lkoll razza waħda għax kulħadd ġej minn Adam. Hija bluha kbira li nemmnu li Alla għamel xi razez aħjar minn oħrajn. Jekk naħsbu hekk, inkunu qed inħallu lil Satana jeqred l-imħabba u l-għaqda li għandna bħala Kristjani. (Ġwanni 13:35) Biex niġġieldu lil Satana u nirbħulu, hemm bżonn li nevitaw kull tip taʼ kburija li mhix xierqa.—Proverbji 16:18.

10, 11. (a) Għala jistaʼ jkun faċli li tħobb id-dinja? (b) X’kien ir-riżultat tal-imħabba għad-dinja li kellu Dema?

¹⁰ Satana hu “l-ħakkiem taʼ din id-dinja,” u hu jikkontrollaha. (Ġwanni 12:31; 1 Ġwanni 5:19) Ħafna mill-affarijiet li din id-dinja tippromwovi ma jaqblux mal-livelli tal-Bibbja. Naturalment, mhux kulma hemm fid-dinja hu ħażin. Madankollu, aħna nistgħu nkunu ċerti li Satana se jibqaʼ juża d-dinja tiegħu biex jieħu vantaġġ mix-xewqat tagħna u jipprova jġegħelna nidinbu. Jew jipprova jġegħelna nħobbu d-dinja u nittraskuraw il-qima tagħna lil Ġeħova.—Aqra l-1 Ġwanni 2:15, 16.

¹¹ Xi Kristjani tal-bidu kienu jħobbu  d-dinja. Pereżempju, Pawlu kiteb: “Dema telaqni peress li ħabb din is-sistema.” (2 Timotju 4:10) Il-Bibbja ma tgħidx bl-eżatt liema aspett taʼ din id-dinja Dema kien iħobb, jiġifieri dak li ġiegħlu jabbanduna lil Pawlu. Jistaʼ jkun li Dema beda jħobb l-affarijiet materjali iktar mis-servizz tiegħu lil Ġeħova. Jekk dan kien minnu, Dema tilef l-opportunità li jkollu privileġġi eċċitanti fis-servizz t’Alla. Kien worth it? Le. Dema setaʼ jibqaʼ jkun t’għajnuna għal Pawlu. Id-dinja qatt ma setgħet toffrilu xi ħaġa aħjar milli setaʼ Ġeħova!—Proverbji 10:22.

12. Satana kif jistaʼ jieħu vantaġġ mix-xewqat tagħna billi juża “l-qawwa qarrieqa tar-rikkezzi”?

¹² L-istess jistaʼ jiġrilna llum. Bħala Kristjani, huwa normali li nkunu rridu nipprovdu għall-familja tagħna u għalina nfusna. (1 Timotju 5:8) Ġeħova jridna nieħdu pjaċir bil-ħajja. Aħna nafu dan minħabba li ta lil Adam u Eva ġenna tal-art sabiħa fejn jgħixu. (Ġenesi 2:9) Imma Satana jistaʼ jieħu vantaġġ mix-xewqat tagħna billi juża “l-qawwa qarrieqa tar-rikkezzi.” (Mattew 13:22) Ħafna jaħsbu li l-flus u l-affarijiet materjali se jagħmluhom ferħanin jew iġibulhom suċċess. Jekk naħsbu hekk, dan jistaʼ jġegħelna nitilfu l-iktar ħaġa taʼ valur, jiġifieri l-ħbiberija li għandna maʼ Ġeħova. Ġesù wissa: “Ħadd ma jistaʼ jkun ilsir taʼ żewġ sidien; għax jew jobgħod lil wieħed u jħobb lill-ieħor, jew jintrabat maʼ wieħed u jistmerr lill-ieħor. Ma tistgħux tkunu lsiera t’Alla u tal-flus.” (Mattew 6:24) Jekk inkunu lsiera biss tal-affarijiet materjali, inkunu waqafna naqdu lil Ġeħova. Satana preċiż hekk iridna nagħmlu. Jalla qatt ma nħallu l-flus jew l-affarijiet li nistgħu nixtru bil-flus isiru iktar importanti mill-ħbiberija li għandna maʼ Ġeħova. Biex niġġieldu lil Satana u nirbħulu, għandu jkollna l-attitudni t-tajba lejn l-affarijiet materjali.—Aqra l-1 Timotju 6:6-10.

13. Din id-dinja kif tippromwovi ħarsa ħażina dwar iż-żwieġ u s-sess?

¹³ Nassa oħra taʼ Satana hi l-immoralità sesswali. Ħafna nies jaħsbu li billi jkunu leali lejn ir-raġel jew il-mara, u wkoll lejn iż-żwieġ innifsu, ikunu antikwati u jkunu qed jillimitaw il-libertà tagħhom. Pereżempju, attriċi qalet li hu impossibbli li tkun leali lejn persuna waħda. Hi żiedet tgħid: “Ma naf lil ħadd li hu leali jew li jrid ikun leali.” Attur qal: “Għandi d-dubji tiegħi jekk aħniex verament magħmulin biex inqattgħu l-kumplament taʼ ħajjitna mal-istess individwu.” Satana żgur li hu kuntent ħafna meta nies famużi jikkritikaw l-għotja t’Alla taż-żwieġ. Ix-Xitan ma jappoġġax l-arranġament taż-żwieġ, u ma jridx li ż-żwiġijiet jirnexxu. Allura, biex niġġieldu lil Satana u nirbħulu, għandu jkollna l-ħarsa t’Alla dwar iż-żwieġ.

14, 15. X’tistaʼ tagħmel jekk tkun imħajjar li tikkommetti l-immoralità sesswali?

 ¹⁴ Kemm jekk aħna miżżewġin u kemm jekk aħna single, għandna naħdmu iebes biex niġġieldu kull tip taʼ immoralità sesswali. Huwa dan faċli? Lanqas xejn! Pereżempju, jekk int żagħżugħ jew żagħżugħa, għandu mnejn tismaʼ lil sħabek tal-iskola jiftaħru dwar li jagħmlu s-sess maʼ min iridu. Għandhom mnejn li jiftaħru wkoll dwar is-sexting, jiġifieri, meta jintbagħtu messaġġi u stampi sesswali permezz tal-mowbajl. Fil-fatt, f’xi pajjiżi, is-sexting hu meqjus daqslikieku qed jintbagħat ritratt pornografiku taʼ tifel jew tifla. Il-Bibbja tgħid: “Min jipprattika ż-żína qed jidneb kontra ġismu stess.” (1 Korintin 6:18) Il-mard li jinfirex permezz taʼ relazzjonijiet sesswali rriżultaw f’ħafna tbatija u mwiet. U l-maġġorparti taż-żgħażagħ li għamlu s-sess meta ma jkunux miżżewġin jgħidu li ddispjaċiehom għal dak li għamlu. Id-dinja tad-divertiment tridna nemmnu li m’hemm l-ebda konsegwenza mbilli jinkisru l-liġijiet t’Alla. Jekk aħna nemmnu gideb bħal dan, nistgħu niġu mqarrqin mill-“qawwa qarrieqa tad-dnub.”—Ebrej 3:13.

¹⁵ Jekk tkun imħajjar li tikkommetti l-immoralità sesswali, x’tistaʼ tagħmel? Irrikonoxxi li għandek dgħufija. (Rumani 7:22, 23) Itlob lil Alla għas-saħħa.  (Filippin 4:6, 7, 13) Evita sitwazzjonijiet li jistgħu jwaqqgħuk għall-immoralità. (Proverbji 22:3) U meta jkun hemm tentazzjoni, irrifjuta mill-ewwel.—Ġenesi 39:12.

16. Ġesù x’qal meta Satana pprova jħajru, u x’nistgħu nitgħallmu minn dak l-eżempju?

¹⁶ Ġesù ħallielna eżempju tajjeb ħafna. Hu ma ġiex imqarraq mill-wegħdi taʼ Satana. Hu lanqas qagħad jaħseb dwarhom. Minflok, hu immedjatament qal lil Satana: “Hu miktub.” (Aqra Mattew 4:4-10.) Ġesù kien jaf il-Kelma t’Alla, allura kien possibbli għalih li jikkwota l-iskritturi mill-ewwel meta Satana pprova jħajru. Sabiex niġġieldu lil Satana u nirbħulu, m’għandniex inħallu lilna nfusna nkunu mħajrin li nikkommettu l-immoralità sesswali.—1 Korintin 6:9, 10.

17, 18. (a) Liema nases oħra juża Satana, u għala m’għandniex niħduha bi kbira? (b) X’se jiġrilu Satana, u dan kif jinkuraġġik biex tissaporti?

¹⁷ Il-kburija, il-materjaliżmu, u l-immoralità sesswali huma biss tliet nases taʼ Satana. Hemm ħafna iktar. Pereżempju, xi Kristjani għandhom xi membri tal-familja li jopponuhom jew tfal tal-iskola li jgħadduhom biż-żmien. Oħrajn jgħixu f’pajjiżi fejn il-gvern jipprova jwaqqafhom milli jippritkaw. Aħna ma niħduhiex bi kbira li jkollna niffaċċjaw diffikultajiet bħal dawn. Ġesù nnifsu wissiena: “Intom tkunu mibgħudin minn kulħadd minħabba ismi; imma min jissaporti sat-tmiem jiġi salvat.”—Mattew 10:22.

¹⁸ Kif nistgħu niġġieldu lil Satana u nirbħulu? Ġesù qal: “Bis-sabar tagħkom tiksbu ruħkom.” (Luqa 21:19) Kwalunkwe ħsara li jistaʼ jagħmlilna l-bniedem mhix permanenti. Ħadd ma jistaʼ jiħdilna l-ħbiberija li għandna m’Alla sakemm ma nippermettux aħna li jiġri dan. (Rumani 8:38, 39) Anki jekk xi qaddejja leali taʼ Ġeħova jmutu, ma jfissirx li Satana rebaħ. Ġeħova se jirxoxtahom. (Ġwanni 5:28, 29) Imma Satana m’għandux futur. Wara li din id-dinja mill-agħar tiġi meqruda, hu se jiġi mitfugħ fl-abbiss għal 1,000 sena. (Rivelazzjoni 20:1-3) Fit-tmiem tat-tmexxija taʼ elf sena taʼ Kristu, Satana se jitħalla “jinħall mill-ħabs” u se jipprova għall-aħħar darba jqarraq bin-nies perfetti. Imbagħad, se jiġi meqrud. (Rivelazzjoni 20:7-10) Għalkemm ix-Xitan m’għandu ebda futur, int għandek! Ibqaʼ ġġieled lil Satana, u żomm il-fidi tiegħek b’saħħitha. Int tistaʼ tiġġieled lil Satana u tirbaħlu!